Ezekɩyɛɛlɩ
31 Pɩnaɣ 11 ñɩŋga taa, fenaɣ 3 ñɩŋga taa, fenaɣ ŋga ka-kajalaɣ kɩyakʋ ñɩŋgʋ wiye, Yehowa tɔm tasɩ-m talʋʋ se: 2 «Ɛyʋ pɩyalʋ, heyi Ejipiti wiyaʋ Farawɔɔ nɛ ɛ-samaɣ sɔsɔɔ se:+
“Apaɣlaa ɛzɩ ña yɔ?
3 Asiirii tʋ nɔɔyʋ kaawɛɛ, Libaŋ sɛɛdrɩ tɩʋ nakʋyʋ,
Kɩɩwɛnɩ pilinzi kɩbanzɩ ɛzɩ hɔɖʋʋ ŋgʋ kɩhaɣ kuzotuu yɔ, kɩɩkʋyaa kpem;
Kɩ-ñʋʋ kaatukuni mɩndʋ.
4 Lɩm kaalaba nɛ kɩpaɣlɩ, lɩm cukaŋ ñɩmbʋ kaalaba nɛ kɩkʋyɩ.
Lemisi kaacɔ ɖenɖe paasɔ-kʋ yɔ nɛ sɩta;
Sɩ-lɔɔŋ taa lɩm niɣdaɣ hayɩm taa tɩŋ kpeekpe.
5 Pʋyɔɔ kɩkʋyaa nɛ kɩkɩlɩ hayɩm taa tɩŋ lɛɛŋ kpeekpe.
Ki-pilinzi ɖɔwa nɛ sɩɖaɣlɩ,
Mbʋ pʋyɔɔ yɔ ki-lemisi taa lɩm kaaɖɔwa.
6 Ɛsɔdaa sumasɩ kpeekpe ɖʋwaɣ ɖandʋ ki-pilinzi taa,
Ñɩtʋ taa kpɩna kpeekpe ɖʋwaɣ piya ki-pilinzi tɛɛ,
Nɛ ajɛɛ kpeekpe taa samasɩ cakaɣ ki-kuzotuu taa.
7 Kiiɖewa pɩdɩɩfɛyɩ nɛ ki-pilinzi ɖaɣlɩ pɩdɩɩfɛyɩ,
Mbʋ pʋyɔɔ yɔ ki-lila kaatibi lɩm sɔsɔm taa.
8 Pataapɩzɩɣ se pakpaɣ Ɛsɔ kaɖaɣ taa+ sɛɛdrɩ tɩʋ nakʋyʋ nɛ pamaɣzɩnɩ-kʋ.
Jenevriyee tɩʋ nakʋyʋ taawɛɛnɩ pilinzi ɛzɩ ŋgʋ yɔ,
Nɛ pɩlataanɩ tɩʋ nakʋyʋ pilinzi taatalɩ ki-pilinzi.
Ɛsɔ kaɖaɣ taa tɩʋ nakʋyʋ keɖeɣa taatalɩ ki-keɖeɣa.
9 Malaba nɛ kiɖe nɛ kɩwɛɛnɩ hatʋ kpimm,
Nɛ Ɛsɔ toovenim tʋ kaɖaɣ Edɛɛnɩ taa tɩŋ lɛɛŋ tɩŋa sʋsʋʋ-kʋ.”
10 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ðenɖe ɛzɩ kɩkʋyɩ* siŋŋ nɛ kɩ-ñʋʋ kpa nɛ kitukuni mɩndʋ, nɛ kɩ-kʋkʋyɩŋ yɔɔ lɛ, kɩ-laŋɩyɛ kpazɩɣ ɖɩ-tɩ yɔ pʋyɔɔ lɛ, 11 mankaɣ-kʋ ɖʋzʋʋ ajɛɛ ñʋʋdʋ weyi ɛwɛ ɖoŋ yɔ e-nesi taa.+ Paa pɩɩlabɩ ɛzɩma yɔ ɛkaɣ-kʋ wɩlʋʋ nɛ kɩna, nɛ kɩ-kañatʋ lakasɩ yɔɔ lɛ, mankaɣ-kʋ lɔʋ. 12 Nɛ agɔma, ajɛɛ taa ɛyaa mba pakɩlɩ kañatʋ yɔ, pakaɣ-kʋ sɛtʋʋ, nɛ pakaɣ-kʋ yebu pʋŋ taa, kɩ-hatʋ kaɣ tɔʋ fɛɛŋ tɩŋa taa nɛ pakaɣ ki-pilinzi pɛlʋʋ nɛ pɛpɛɖɩ ɛjaɖɛ taa lemisi kpeekpe taa.+ Tɛtʋ yɔɔ samasɩ kpeekpe kaɣ lɩʋ ki-kuzotuu taa nɛ siyebi-kʋ. 13 Ɛsɔdaa sumasɩ kpeekpe kaɣ caɣʋ kɩ-hɔɔyɛ nɖɩ ɖɩtɔlaa yɔ ɖɩ-yɔɔ, nɛ ñɩtʋ taa kpɩna kpeekpe kaɣ caɣʋ ki-pilinzi yɔɔ.+ 14 Pɩkaɣ labʋ mbʋ se pɩsa nɛ tɩŋ weyi ɩwɛ lɩm nɔɔ yɔ, ɩ-taa nakʋyʋ ɛtaakʋyɩ ɛsɔdaa liɣ liɣ yaa kɩ-ñʋʋ ɛtaakpa nɛ kitukuni mɩndʋ, nɛ tɩŋ weyi lɩm niɣdiɣ-i camɩyɛ yɔ, ɩ-taa nakʋyʋ ɛtaakʋyɩ nɛ kitukuni mɩndʋ. Mbʋ pʋyɔɔ yɔ pakaɣ ɩ-tɩŋa ɖʋzʋʋ sɩm nesi taa, ɛjaɖɛ nɖɩ ɖɩwɛ hadɛ yɔ ɖi-nesi taa, pɩkpɛndɩnɩ ɛyaa pɩyalaa, mba petiki pɔʋ* taa yɔ.”
15 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Kɩyakʋ ŋgʋ kitiki Pɩlaʋ* taa yɔ, mankaɣ labʋ nɛ kʋñɔwiye wɛɛ. Pʋyɔɔ lɛ, mankaɣ huuzuu lɩm cukaŋ ñɩmbʋ yɔɔ nɛ mankpa ki-lemisi se pɩsa nɛ lɩm sɔsɔm sɩŋ. Kɩ-yɔɔ lɛ, mankaɣ labʋ nɛ cɩkpɛndʋʋ yu Libaŋ yɔɔ, nɛ hayɩm taa tɩŋ kpeekpe kaɣ lou. 16 Kɩtɔlʋʋ nɛ pitili lɛ, mankaɣ labʋ nɛ ajɛɛ seli alɩwaatʋ ndʋ mentisiɣ-kʋ Pɩlaʋ* taa nɛ pɩkpɛndɩnɩ mba payɩ petiki pɔʋ* taa yɔ; nɛ Edɛɛnɩ tɩŋ kpeekpe,+ Libaŋ tɩŋ weyi ɩkɩlɩ ɖeu nɛ ɩ-wayɩ fɛyɩ yɔ, tɩŋ weyi lɩm niɣdiɣ-i camɩyɛ yɔ ɩ-tɩŋa, pakaɣ ɩ-laŋɩyɛ hɛzʋʋ ɛjaɖɛ nɖɩ ɖɩwɛ hadɛ yɔ ɖɩ-taa. 17 Ɩ nɛ ɩ petibi Pɩlaʋ* taa, mba pakʋ-wɛ nɛ laɣɖɛ yɔ pɔ-cɔlɔ,+ pɩkpɛndɩnɩ mba patɩnɩɣ ɛ-yɔɔ yɔ,* mba pɛwɛ e-kuzotuu taa ajɛɛ taa yɔ.”+
18 «“Edɛɛnɩ tɩʋ ŋgʋ samtʋ nɛ kɩ-paɣlɩka kaawɛ ɛzɩ ña-ñɩŋga yɔ?+ Ɛlɛ paa pɩɩlabɩ ɛzɩma yɔ, pakaɣ tisuu ña nɛ Edɛɛnɩ tɩŋ ɛjaɖɛ nɖɩ ɖɩwɛ hadɛ yɔ ɖɩ-taa. Ŋkaɣ hɩnʋʋ kɩdɩbɛlɩŋ hɛkʋ taa, ña nɛ mba pakʋ-wɛ nɛ laɣɖɛ yɔ. Mbʋ kaɣnɩ talʋʋ Farawɔɔ nɛ ɛ-samaɣ sɔsɔɔ tɩŋa,” Kɩbaɣlʋ Kɩlɩm Yehowa yɔɔdʋʋna.»