Ejipiti Lɩʋ
24 Nɛ eheyi Moyizi se: «Kpa Yehowa cɔlɔ, ña nɛ Aarɔɔnɩ, Naadaabʋ nɛ Abihu,+ nɛ Izrayɛɛlɩ taa ɛzʋtʋyaa 70, nɛ ɩsɩŋ poliŋ taa nɛ iluŋ. 2 Moyizi ɖeke pɩwɛɛ se ɛñɔtɩnɩ Yehowa; ɛlɛ pɩtɩpɔzɩ se lalaa ɩñɔtɩna, nɛ pɩtɩpɔzɩ se samaɣ ɛtɩŋɩ-ɩ nɛ kakpa.»+
3 Peeɖe Moyizi kɔm nɛ ɛkɛdɩ samaɣ Yehowa tɔm kpeekpe nɛ tɔm hʋʋ paɣtʋ kpeekpe,+ nɛ samaɣ tɩŋa kpɛndɩ nɔɔ nɛ kocosi se: «Tɔm ndʋ payɩ Yehowa yɔɔdaa yɔ, ɖɩsɔɔlaa se ɖɩɖɔ tɩ-yɔɔ.»+ 4 Nɛ Moyizi ma Yehowa tɔm kpeekpe.+ Nɛ ɛkʋyɩ tanaŋ tɛɛ pala nɛ ɛma pʋʋ liu tɛɛ altaaru nakʋyʋ nɛ tilima 12 ɛzɩ Izrayɛɛlɩ cejewe wɛʋ 12 yɔ. 5 Pʋwayɩ lɛ etiyi Izrayɛɛlɩ evebiya, nɛ palaa kɩlaŋ kɩñaɣzɩŋ nɛ pakpaɣ naŋ abalɩñɩŋ nɛ palaa Yehowa laŋhɛzɩyɛ kɩlaŋ.+ 6 Nɛ Moyizi kpaɣ calɩm hɔɔlʋʋ kʋɖʋmʋʋ nɛ ɛɖʋ ñanzɩ kulam ñɩnzɩ taa, nɛ ɛkpaɣ calɩm hɔɔlʋʋ lɛɛkʋ nɛ ɛmɩzɩ altaaru yɔɔ. 7 Ðɩnɛ ɛlɛ ɛkpaɣ ɛgbɛyɛ takayaɣ nɛ ɛkalɩ-kɛ nɛ nɔɔ kɩkʋyaɣ samaɣ ɛsɩndaa.+ Nɛ kɔyɔɔdɩ se: «Tɔm ndʋ payɩ Yehowa yɔɔdaa yɔ, ɖɩsɔɔlaa se ɖɩɖɔ tɩ-yɔɔ, nɛ ɖɩkaɣ-tʋ ñam.»+ 8 Peeɖe Moyizi kpaɣ calɩm nɛ ɛmɩzɩ samaɣ yɔɔ+ nɛ ɛtɔ se: «Pʋnɛ pɩkɛnɩ ɛgbɛyɛ nɖɩ Yehowa ɖʋnɩ-mɩ nɛ pɩla nɔɔ kʋɖʋmaɣ nɛ tɔm tʋnɛ ti-kpeekpe yɔ ɖɩ-calɩm.»+
9 Moyizi nɛ Aarɔɔnɩ, Naadaabʋ nɛ Abihu, nɛ Izrayɛɛlɩ taa ɛzʋtʋyaa 70 pakpa, 10 nɛ pana Izrayɛɛlɩ tɛ Ɛsɔ.+ Nabʋyʋ kaawɛ ɛ-nɩŋgbanzɩ tɛɛ ɛzɩ saafiirɩ pɛɛ wena pɔpɔwa yɔ, nɛ pɩwɛɛ kele kele ɛzɩ ɛsɔdaa maɣmaɣ yɔ.+ 11 Ɛtɩkɔnɩ kaɖɛ naɖɩyɛ Izrayɛɛlɩ abalaa mba peɖiyaɣ samaɣ yɔ,+ nɛ pana Ɛsɔ toovenim tʋ natʋ natʋyʋ taa nɛ pɔtɔɔ nɛ pɔñɔɔ.
12 Nɛ Yehowa heyi Moyizi se: «Kpa mɔn-cɔlɔ pʋʋ yɔɔ nɛ ŋcaɣ peeɖe. Mankaɣ-ŋ cɛlʋʋ pɩtaahalanzɩ, nɛ mankaɣ maʋ sɩ-yɔɔ paɣtʋ nɛ tɔm ndʋ tɩwɛ paɣtʋ taa yɔ se mawɩlɩnɩ-wɛ tɔm.»+ 13 Peeɖe Moyizi nɛ ɛ-lɩmɖʋyʋ Yozuwee pakʋyaa nɛ pɛɖɛɛ,+ nɛ Moyizi kpa Ɛsɔ toovenim tʋ pʋʋ yɔɔ.+ 14 Ɛlɛ eeheyi ɛzʋtʋyaa se: «Ɩɖaŋ-ɖʋ cɩnɛ pɩkɔɔ pɩsɩɩnɩ alɩwaatʋ ndʋ ɖɩpɩsɩɣ mɩ-cɔlɔ yɔ.+ Aarɔɔnɩ nɛ Huuri+ pɛwɛ mɩ-cɔlɔ. Ye nɔɔyʋ ɛwɛnɩ tɔm natʋyʋ nɛ pɩpɔzʋʋ se pahʋʋ-tʋ yɔ, ɛpɩzɩɣ nɛ ewolo pɔ-cɔlɔ.»+ 15 Nɛ Moyizi kpa pʋʋ yɔɔ alɩwaatʋ ndʋ ɛsɔmɩnʋʋ wɛɛ nɛ kihuuzuu kɩ-yɔɔ yɔ.+
16 Yehowa samtʋ+ caɣ Sinayii Pʋʋ yɔɔ,+ nɛ ɛsɔmɩnʋʋ huuzi kɩ-yɔɔ kɩyakɩŋ 6. Kɩyakʋ 7 ñɩŋgʋ wiye lɛ, ɛyaa Moyizi nɛ ɛsɔmɩnʋʋ hɛkʋ taa. 17 Izrayɛɛlɩ ñɩma mba pɔcɔŋnaɣ yɔ pɛ-ɛsɩndaa lɛ, Yehowa samtʋ kaawɛ ɛzɩ miŋ weyi ɛɖɩzɩɣ wondu caɣ caɣ yɔ pʋʋ ñʋʋ taa. 18 Nɛ Moyizi sʋʋ ɛsɔmɩnʋʋ taa nɛ ɛkpa pʋʋ yɔɔ.+ Nɛ Moyizi caɣ pʋʋ yɔɔ kɩyakɩŋ 40 nɛ ɖoo 40.+