Ezekɩyɛɛlɩ

16 Yehowa tɔm tasɩ-m talʋʋ se: 2 «Ɛyʋ pɩyalʋ, yele nɛ Yeruzalɛm tɩlɩ kɩ-lakasɩ kɩdɛkɛdɩsɩ.+ 3 Pɩwɛɛ se ŋyɔɔdɩ se: “Tɔm tʋnɛ Kɩbaɣlʋ Kɩlɩm Yehowa heyiɣ Yeruzalɛm: ‘Kanaŋ mba ɛjaɖɛ taa ŋlɩnaa nɛ peeɖe palʋlɩ-ŋ. Ña-caa kaakɛ Amoori tʋ+ nɛ ño-ɖoo ñɛkɛ Hɛɛtɩ tʋ.+ 4 Piyele nɛ ña-lʋlʋʋ lɛ, kɩyakʋ ŋgʋ palʋlɩ-ŋ yɔ patɩsɛtɩ ño-huluu, nɛ patɩsɔ-ŋ lɩm se ŋwɛɛ cɩɖɩ cɩɖɩ, patɩsayɩ-ŋ ɖɔm, nɛ patɩhɔkɩ-ŋ pɩsaŋ taa. 5 Nɔɔyʋ tɩna ña-pʋtɔdɩyɛ se ɛlabɩ-ŋ pɩ-taa nabʋyʋ. Nɔɔyʋ tɩnɩɩ ñe-siziŋ. Ɛlɛ pɔlɔ-ŋ ñɩtʋ taa, mbʋ pʋyɔɔ yɔ papaɖɩ-ŋ* kɩyakʋ ŋgʋ palʋlɩ-ŋ yɔ.

6 «“‘Mɛnɖɛɣaɣ lɛ, mana-ŋ ŋɖiɣni tɔʋ nɩŋgbanzɩ ña-calɩm taa. Nɛ ŋhɩnɩ ña-calɩm taa peeɖe mbʋ lɛ, mɔyɔɔdɩ se: “Wɛɛ wezuu!” Ɛɛɛ, ŋhɩnɩ ña-calɩm taa peeɖe mbʋ lɛ, meheyi-ŋ se: “Wɛɛ wezuu!” 7 Meyeba nɛ ŋpɩsɩ samaɣ sɔsɔɔ siŋŋ, ɛzɩ ñɩtʋ ñɔʋ hayɩm taa yɔ, nɛ ŋpaɣlɩ nɛ ŋla pɛlɛ nɛ ŋsuu ajana wondu ndʋ tɩkpaɖɩ ɖeu yɔ. Ña-hɩla lɩ camɩyɛ, nɛ ñɔ-ñɔsɩ ñɔ camɩyɛ; ɛlɛ ŋwɛ ndaakpeɖe ña-tɩŋa mbʋ.’”

8 «“Mɛnɖɛɣaɣ nɛ mana-ŋ lɛ, menɖiɣzina se ŋtalaa se ŋlɩzɩ sɔɔlɩm nɛ ŋwɩlɩ. Peeɖe monposi mon-toko* ñɔ-yɔɔ+ nɛ mohuuzi ña-ndaakpeɖe yɔɔ nɛ monɖuu nɛ manɖʋ-ŋ nɛ ɛgbɛyɛ nɛ ŋpɩsɩ man-pʋyʋ,” Kɩbaɣlʋ Kɩlɩm Yehowa yɔɔdʋʋna. 9 “Pɩtasɩ lɛ, mɔnsɔ-ŋ lɩm nɛ mañalɩ ñɔ-yɔɔ calɩm nɛ manta-ŋ num.+ 10 Pʋwayɩ lɛ monsu-ŋ toko ŋgʋ pacanɩ-kʋ yɔ nɛ maha-ŋ naataŋgbala wena palabɩnɩ tɔnɛ kɩbanɖɛ* yɔ nɛ mohuuzi ñɔ-yɔɔ pɩsaʋ fɛlɛ fɛlɛ ñɩŋgʋ nɛ monsu-ŋ wondu ndʋ tɩwɛ liidiye yɔ. 11 Mankpaɣ ajana wondu nɛ mancanɩnɩ-ŋ nɛ mɛlɛɛ kpayasɩ ñe-nesi yɔɔ nɛ mɛlɛɛ lɩyʋʋ ñe-liu tɛɛ. 12 Manɖʋ ɖɔɖɔ kokooye ñɔ-mɔɔʋ yɔɔ nɛ mɛlɛɛ naŋgbacaɣlanaa ña-nɩŋgbaaŋ yɔɔ nɛ manpamɩ-ŋ awiya hulaɣ ŋga kɛwɛ kajʋka yɔ. 13 Ŋwɛɛ nɛ ŋcanɩɣ ña-tɩ nɛ sika nɛ liidiye wondu; nɛ wondu ndʋ ŋsuu yɔ palabɩ-tʋ nɛ pɩsaŋ fɛlɛ fɛlɛ ñɩŋ, wondu ndʋ tɩwɛ liidiye yɔ, nɛ wondu kususutu ndʋ pacanɩ-tʋ yɔ. Mʋlʋm mbʋ pɩkpɩzɩ camɩyɛ yɔ, tʋŋ num, nɛ num ŋtɔkaɣ, nɛ ŋkɔɔ ŋɖe pɩdɩɩfɛyɩ,+ nɛ ŋmʋna se ŋkɛ abiɖe.”»*

14 «“Ñe-keɖeɣa yɔɔ lɛ, ña-hɩɖɛ* paɣzɩ yɛlʋʋ ajɛɛ taa,+ mbʋ pʋyɔɔ yɔ katalɩ pilim, mbʋ pʋyɔɔ yɔ mansɩ ma-maɣmaɣ men-keɖeɣa ñɔ-yɔɔ,”+ Kɩbaɣlʋ Kɩlɩm Yehowa yɔɔdʋʋna.»

15 «“Ɛlɛ ŋpaɣzɩ ñe-keɖeɣa taʋ liu,+ nɛ ña-hɩɖɛ sɛʋ yɔɔ lɛ, ŋpɩsɩ hayitu laɖʋ.+ Ŋlabɩ ña-hayitu lakasɩ pɩdɩɩfɛyɩ nɛ mba payɩ pɛɖɛɣ yɔ,+ nɛ ñe-keɖeɣa pɩsɩ pa-ñɩŋga. 16 Ŋkpaɣ ño-wondu kususutu taa natʋyʋ nɛ ŋlabɩnɩ lona kʋkʋya wena awɛnɩ tɔlɩm ndɩ ndɩ yɔ, ɖenɖe ŋlakaɣ hayitu lakasɩ yɔ+—pɩtaapɔzɩ se pɩla mbʋ, pɩtaapɔzɩ se lakasɩ nzɩ sɩla kaaʋ. 17 Ŋkpaɣ ɖɔɖɔ ña-ajana wondu ndʋ tɩwɛ kajʋka yɔ, ndʋ palabɩnɩ sika nɛ liidiye nɖɩ maaha-ŋ yɔ nɛ ŋlabɩnɩ ña-tɩ sɩʋ kpelisi abalɩñɩnzɩ nɛ ŋlabɩ-sɩ nɛ hayitu.+ 18 Nɛ ŋkpaɣ ño-wondu kususutu ndʋ pacanɩ-tʋ yɔ nɛ ŋhuuzi sɩ-yɔɔ* nɛ ŋkpaɣ mo-num nɛ men-ŋgee tɩlaaɖɩ nɛ ŋlaa-sɩ.+ 19 Nɛ ŋkpaɣ ɖɔɖɔ kpɔnɔ ŋgʋ maaha-ŋ yɔ nɛ ŋlaa-sɩ kɩlaʋ nɛ pɩlɩɣ sɔzɩŋ camɩyɛ;* palabɩ kpɔnɔ ŋgʋ nɛ mʋlʋm mbʋ pɩkpɩzɩ camɩyɛ yɔ, num nɛ tʋŋ num, nɛ mɛncɛlɩ-ŋ kʋ se ŋtɔɔ.+ Mbʋ pɩlabɩ ɖeyi ɖeyi,” Kɩbaɣlʋ Kɩlɩm Yehowa yɔɔdʋʋna.»

20 «“Ŋkpaɣ ña-pɩyalaa nɛ ñɛ-pɛlaa mba ŋlʋlɩ-m yɔ,+ nɛ ŋlaa-wɛ sɩʋ kpelisi nzɩ se sɩtɔɔ-wɛ.+ Ña-hayitu lakasɩ tɩmaɣ-ŋ yaa we? 21 Ŋkʋ man-pɩyalaa, nɛ ŋkpaɣ-wɛ nɛ ŋñaɣzɩ miŋ nɛ ŋlaa kɩlaŋ.+ 22 Ŋlakaɣ ña-lakasɩ kɩdɛkɛdɩsɩ nɛ ña-hayitu lakasɩ tɩŋa lɛ, ŋtɩtɔzɩ ñɛ-pɛlɛtʋ kɩyakɩŋ yɔɔ, alɩwaatʋ ndʋ ŋŋwɛ ndaakpeɖe ña-tɩŋa nɛ ŋtɔʋ nɩŋgbanzɩ ña-calɩm taa yɔ. 23 Pɩtɔɔ-ŋ! Pɩtɔɔ-ŋ!+ Mbʋ pʋyɔɔ yɔ ŋlabɩ lakasɩ kɩdɛkɛdɩsɩ nzɩ sɩ-tɩŋa,” Kɩbaɣlʋ Kɩlɩm Yehowa yɔɔdʋʋna. 24 “Ŋma ña-tɩ tendene nɛ ŋla ña-tɩ lone kʋkʋyɩyɛ paa samaɣ kadaɣ ŋga lɛ ka-taa. 25 Ŋma ño-lona kʋkʋya paa habɩyɛ nɖɩ lɛ ɖi-lone nɖɩ pɩnaɣ-ɖɩ nɛ pɩkpaɖɩ yɔ ɖɩ-taa. Nɛ ŋtɩŋnɩ ɛzɩma ŋyeki ña-tɩ* nɛ mba payɩ pɛɖɛɣ yɔ+ pɩ-yɔɔ nɛ ŋpɩsɩ ñe-keɖeɣa kʋzɔɔtʋ pʋyʋ; nɛ ŋyeba nɛ ña-hayitu lakasɩ huu.+ 26 Ŋlabɩ hayitu nɛ Ejipiti mba,+ ñɔ-cɔlɔ ñɩma mba pɛwɛnɩ kʋzʋʋ kɔɖɛyɩ siŋŋ yɔ,* nɛ ŋtɩŋnɩ ña-hayitu lakasɩ nzɩ sɩfɛyɩ kalʋʋ yɔ sɩ-yɔɔ nɛ ŋɖʋ-m ɖɩwɩzɩyɛ. 27 Lɛɛlɛɛyɔ lɛ, mankaɣ kpazʋʋ me-nesi ñɔ-yɔɔ nɛ manpasɩ ñɔ-tɔɔnaɣ+ nɛ manɖʋzɩ-ŋ halaa mba papaɖɩɣ-ŋ yɔ pe-nesi tɛɛ nɛ palabɩ-ŋ mbʋ pɔsɔɔlaa yɔ,+ Filistii mba pɛlaa mba ña-kʋzɔɔtʋ lakasɩ cɛyɩ-wɛ yɔ.+

28 «“Ñɔ-kɔɖɛyɩ ɛɛsɩkɩ; pʋyɔɔ lɛ, ŋlabɩ hayitu nɛ Asiirii mba ɖɔɖɔ,+ ɛlɛ ŋtɛm-wɛ labɩnʋʋ hayitu lɛ, ñɔ-kɔɖɛyɩ tɩsɩ ɖɔɖɔ. 29 Pʋyɔɔ ŋyeba nɛ ña-hayitu lakasɩ huu tadɩyɛ laɖaa ɛjaɖɛ* taa, nɛ Kalɩdee mba cɔlɔ,+ paa mbʋ yɔ ñɔ-kɔɖɛyɩ tɩsɩ ɖɔɖɔ. 30 Ña-laŋɩyɛ kaahɩnɩ kʋdɔŋ siŋŋ* alɩwaatʋ ndʋ ŋlakaɣ lakasɩ nzɩ sɩ-tɩŋa nɛ ŋwɛɛ ɛzɩ hayitu laɖʋ weyi ɛfɛyɩ fɛyɛ yɔ!”+ Kɩbaɣlʋ Kɩlɩm Yehowa yɔɔdʋʋna. 31 “Ɛlɛ alɩwaatʋ ndʋ ŋma ña-tɩ tendene paa habɩyɛ nɖɩ lɛ ɖi-lone nɖɩ pɩnaɣ-ɖɩ nɛ pɩkpaɖɩ yɔ ɖɩ-taa, nɛ ŋla ña-tɩ lone kʋkʋyɩyɛ paa samaɣ kadaɣ ŋga lɛ ka-taa yɔ, ŋtaawɛɛ ɛzɩ hayitu laɖʋ yɔ, mbʋ pʋyɔɔ yɔ ŋtaatisiɣ se pɛhɛyɩ-ŋ. 32 Ŋkɛ halʋ acɛyɛ tʋ weyi ɛsɔɔlɩ agɔma nɛ pɩkɩlɩ ɛ-maɣmaɣ ɛ-walʋ yɔ!+ 33 Ɛyaa lakɩ kʋjɔʋ hayitu laɖaa kpeekpe;+ ɛlɛ ña lɛ, ñalabɩnɩ kʋjɔŋ mba payɩ pɛwɛnɩ kʋzʋʋ kɔɖɛyɩ ñɔ-yɔɔ yɔ,+ nɛ ŋhɛyɩɣ-wɛ se palɩɩnɩ hɔɔlɩŋ tɩŋa taa nɛ pɔkɔɔ ñɔ-cɔlɔ nɛ ña nɛ wɛ ɩla hayitu.+ 34 Ŋwɛ ndɩ kpem nɛ halaa lalaa mba palakɩ hayitu yɔ. Nɔɔyʋ ɛɛlakɩ hayitu ɛzɩ ña yɔ! Ŋhɛyɩɣ lalaa nɛ paahɛyɩɣ-ŋ. Ña-lakasɩ wɛ ndɩ kpem nɛ lalaa.”

35 «Pʋyɔɔ lɛ, Oo hayitu laɖʋ,+ nɩɩ Yehowa tɔm. 36 Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ŋlɩzɩ ña-kʋzʋʋ kɔɖɛyɩ nɛ ŋwɩlɩ kadadayaɣ nɛ ŋkuli ña-ndaakpeɖe yɔɔ alɩwaatʋ ndʋ ŋlakaɣ hayitu nɛ mba pɔsɔɔlɩ-ŋ yɔ nɛ ña-kʋzɔɔtʋ sɩʋ kpelisi nzɩ sɩwɛ kiniŋ yɔ,*+ nɛ halɩ ŋkpaɣ ña-pɩyalaa calɩm nɛ ŋlaa-sɩ kɩlaŋ;+ 37 pʋyɔɔ lɛ, menkpeɣliɣ mba payɩ pɔsɔɔlɩ-ŋ nɛ ŋyele nɛ panɩɩ leleŋ yɔ, mba payɩ ŋsɔɔlaa nɛ pɩkpɛndɩnɩ mba payɩ ŋpaɖaa yɔ. Mankaɣ-wɛ kpeɣluu nɛ hɔɔlɩŋ tɩŋa taa nɛ pɔkɔɔ ña-wayɩ nɛ monkuli ña-ndaakpeɖe yɔɔ nɛ mawɩlɩ-wɛ, pakaɣ naʋ ña-tɩŋa ndaakpeɖe.+

38 «“Nɛ mankaɣ ña-nɩŋgbaŋʋʋ hɔm nɛ pʋmʋnɩ ɛzɩma pahʋʋnɩ tɔm halaa acɛyɛ tɩnaa+ nɛ halaa mba pɛkpɛdɩɣ calɩm yɔ,+ nɛ pakaɣ ña-calɩm kpɛdʋʋ nɛ pana nɛ sʋsɩ.+ 39 Mankaɣ-ŋ ɖʋzʋʋ pe-nesi tɛɛ, nɛ pakaɣ yɔkʋʋ ñe-tendemee, nɛ pakaɣ tuzuu ño-lona kʋkʋya nɛ pɛpɛɖɩ;+ nɛ pakaɣ hɔzʋʋ ñɔ-yɔɔ wondu+ nɛ pakpaɣ ña-ajana wondu ndʋ tɩwɛ kajʋka yɔ,+ nɛ peyele ña-tɩŋa ndaakpeɖe. 40 Pakaɣ kɔnʋʋ samaɣ nakɛyɛ ña-wayɩ,+ nɛ pakaɣ-ŋ yaɣʋ pɛɛ+ nɛ pakʋ-ŋ nɛ pa-laɣla.+ 41 Pakaɣ ñaɣzʋʋ ña-ɖɩsɩ miŋ+ nɛ pahʋʋnɩ-ŋ tɔm halaa sakɩyɛ ɛsɩndaa; nɛ mankaɣ yebu nɛ ña-hayitu lakasɩ sɩɩ tɩnaɣ,+ nɛ ŋŋkaɣ tasʋʋ nɔɔyʋ hɛyʋʋ. 42 Mankaɣ yebu nɛ pana wena maakɔnɩ-ŋ yɔ ahɛɛ,+ nɛ man-ɖɩwɩzɩyɛ ɛɛkaɣ tasʋʋ wɛʋ ñɔ-yɔɔ;+ nɛ man-taa kaɣ hɛʋ nɛ man-taa ɛɛkaɣ tasʋʋ wɩʋ.”

43 «“Ŋtɩtɔzɩ ñɛ-pɛlɛtʋ kɩyakɩŋ yɔɔ,+ nɛ ŋla lakasɩ sɩnɛ sɩ-tɩŋa nɛ ŋkulusi man-pana; pʋyɔɔ lɛ, mankaɣ kɔnʋʋ mbʋ ña-lakasɩ lʋlaa yɔ ña-maɣmaɣ ña-ñʋʋ taa, nɛ ŋŋkaɣ tasʋʋ wobu pɩ-yɔɔ nɛ ŋlakɩ ña-kʋzɔɔtʋ lakasɩ nɛ lakasɩ kɩdɛkɛdɩsɩ nzɩ payɩ ŋlakaɣ yɔ;” Kɩbaɣlʋ Kɩlɩm Yehowa yɔɔdʋʋna.»

44 «“Na! Mba payɩ potuki aduwa yɔ, pakaɣ-ŋ tuuu eduuye ɖɩnɛ se: ‘Ðoyo wɛ wɛtʋ ndʋ yɔ, mbʋ ɖɔɖɔ ɛ-pɛlɛ wɛɣ!’+ 45 Ŋwɛ ɛzɩ ño-ɖoo yɔ, ño-ɖoo weyi enim ɛ-walʋ nɛ e-piya yɔ. Nɛ ŋwɛ ɖɔɖɔ ɛzɩ ñɔ-kɔɔ nɛ ñe-neu yɔ, mba penim pa-walaa nɛ pe-piya yɔ. Ño-ɖoo kaakɛ Hɛɛtɩ tʋ, nɛ ña-caa ñaakɛ Amoori tʋ.”»+

46 «“Ñɔ-kɔɔ lɛ Samaarii,+ weyi ɛ nɛ ɛ-pɛlaa* pɛwɛ ñɛ-tɛ nɛ hayo kiŋ* yɔ;+ nɛ ñe-neu halɩñɩnʋ, weyi ɛwɛ ñɛ-tɛ nɛ hadɛ kiŋ* yɔ, ɛnʋ lɛ Sodom+ nɛ ɛ-pɛlaa.+ 47 Pɩtɩsɩɩna se ŋɖɔm pa-nʋmɔŋ taa nɛ ŋla pa-lakasɩ kɩdɛkɛdɩsɩ, ɛlɛ alɩwaatʋ pazɩ taa lɛ, ñe-wezuu caɣʋ kpeekpe wɛɛkɩ siŋŋ nɛ pɩkpaɖɩ-wɛ.+ 48 Mañɩtʋʋ nɛ mɛwɛɛ wezuu yɔ, ñe-neu halɩñɩnʋ Sodom nɛ ɛ-pɛlaa patɩla mbʋ ña nɛ ñɛ-pɛlaa ɩlaba yɔ;” Kɩbaɣlʋ Kɩlɩm Yehowa yɔɔdʋʋna. 49 “Na! Kɩdɛkɛdɩm pʋnɛ ñe-neu halɩñɩnʋ Sodom laba: Ɛ nɛ ɛ-pɛlaa+ paawɛ cajayɛ+ nɛ paawɛnɩ tɔɔnaɣ sakɩyɛ+ nɛ paacaɣ yem fɛɛɛ pa-paa fɛyɩnɩ natʋyʋ;+ paa mbʋ yɔ patɩsɩnɩ mba pɛwɛ kʋñɔŋ taa yɔ nɛ kʋñɔndɩnaa.+ 50 Powobi pɩ-yɔɔ nɛ pakpazɩɣ pa-tɩ+ nɛ palakɩ lakasɩ kɩdɛkɛdɩsɩ mɛ-ɛsɩndaa,+ pʋyɔɔ manawa se pɩcɛyaa se mankʋsɩ-wɛ.+

51 «“Halɩ Samaarii+ ɖɔɖɔ tɩla kɩwɛɛkɩm sakɩyɛ mbʋ ŋlaba yɔ pɩ-hɔɔlʋʋ. Ŋwobi pɩ-yɔɔ nɛ ŋyele nɛ ña-lakasɩ kɩdɛkɛdɩsɩ huu nɛ pɩkpaɖɩ pa-ñɩnzɩ, nɛ pʋyɔɔ lɛ ña-lakasɩ kɩdɛkɛdɩsɩ nzɩ sɩ-tɩŋa sɩ-yɔɔ lɛ, pɩpɩsaa nɛ pɩwɛɛ ɛzɩ ñɔ-kɔɔ nɛ ñe-neu pɛwɛ siɣsiɣ yɔ.+ 52 Lɛɛlɛɛyɔ lɛ, pɩwɛɛ se fɛyɛ ɛkpa-ŋ, mbʋ pʋyɔɔ yɔ ŋɖezi ñɔ-kɔɔ nɛ ñe-neu pɔ-tɔm se pa-lakasɩ wɛ ɖeu.* Pɛwɛ siɣsiɣ nɛ pɩkpaɖɩ-ŋ, mbʋ pʋyɔɔ yɔ ŋwobi pɩ-yɔɔ nɛ ŋlakɩ lakasɩ kɩdɛkɛdɩsɩ nzɩ sɩkpaɖɩ pa-ñɩnzɩ yɔ nɛ pɩkɛnɩ-ŋ kɩwɛɛkɩm. Pʋyɔɔ lɛɛlɛɛyɔ lɛ, fɛyɛ ɛkpa-ŋ nɛ ñɛ-fɛyɛ wɛɛ ñɔ-yɔɔ, mbʋ pʋyɔɔ yɔ ŋyeba nɛ pɩpɩsɩ nɛ pɩwɛɛ ɛzɩ ñɔ-kɔɔ nɛ ñe-neu pɛwɛ siɣsiɣ yɔ.”

53 «“Nɛ mankaɣ kpeɣluu pɛ-ɛyaa mba pɛwɛ yomiye taa yɔ, Sodom nɛ ɛ-pɛlaa pɛ-ɛyaa mba pɛwɛ yomiye taa yɔ, nɛ Samaarii nɛ ɛ-pɛlaa pɛ-ɛyaa mba pɛwɛ yomiye taa yɔ; mankaɣ ɖɔɖɔ kpeɣluu ñɛ-ɛyaa mba pɛwɛ yomiye taa yɔ nɛ pɩkpɛndɩnɩ-wɛ,+ 54 se pɩsa nɛ ñɛ-fɛyɛ wɛɛ ñɔ-yɔɔ; nɛ fɛyɛ kaɣ-ŋ kpaʋ mbʋ pʋyɔɔ yɔ ŋyeba nɛ pɩhɛzɩ pa-laŋɩyɛ. 55 Ña-maɣmaɣ ñe-neu Sodom nɛ ɛ-pɛlaa pakaɣ pɩsʋʋ ɛzɩ ɖooo paawɛʋ yɔ, nɛ ña-maɣmaɣ ñɔ-kɔɔ Samaarii nɛ ɛ-pɛlaa pakaɣ pɩsʋʋ ɛzɩ ɖooo paawɛʋ yɔ, nɛ ña nɛ ña-maɣmaɣ ñɛ-pɛlaa ɩkaɣ pɩsʋʋ ɛzɩ ɖooo ɩɩwɛʋ yɔ.+ 56 Ñe-neu Sodom taamʋna se ŋyɔɔdɩ ɛ-yɔɔ tɔm ña-tɩ kpazʋʋ kɩyakʋ wiye, 57 pʋcɔ nɛ pikuli ña-maɣmaɣ ña-kañatʋ lakasɩ yɔɔ.+ Lɛɛlɛɛyɔ lɛ Siirii pɛlaa nɛ kɩ-cɔlɔ ñɩma pɛwɛɛ nɛ patʋʋ-ŋ, nɛ Filistii mba+ pɛlaa, mba payɩ pɔcɔ-ŋ nɛ pata yɔ, pɛwɛɛ nɛ peniŋi-ŋ. 58 Ŋkaɣ sɩɣlʋʋ mbʋ pɩlɩɣ ña-kʋzɔɔtʋ lakasɩ nɛ ña-lakasɩ kɩdɛkɛdɩsɩ taa yɔ,” Yehowa yɔɔdʋʋna.»

59 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Lɛɛlɛɛyɔ mankaɣ-ŋ labʋ ɖeyi ɖeyi ɛzɩ ŋlabʋ yɔ,+ mbʋ pʋyɔɔ yɔ ŋtɩŋnɩ ɛzɩma ŋcɛbɩ mɛ-ɛgbɛyɛ yɔ pʋyɔɔ nɛ ŋni ɖuutu.+ 60 Ɛlɛ ma-maɣmaɣ mankaɣ tɔzʋʋ ɛgbɛyɛ nɖɩ maaɖʋnɩ-ŋ ñɛ-pɛlɛtʋ alɩwaatʋ taa yɔ ɖɩ-yɔɔ, nɛ mankaɣ-ŋ ɖʋnʋʋ tamtam ɛgbɛyɛ.+ 61 Ŋkaɣ tɔzʋʋ ña-lakasɩ yɔɔ nɛ fɛyɛ kpa-ŋ+ alɩwaatʋ ndʋ ŋlakɩ talɩ ɖeu ñɔ-kɔɔnaa nɛ ñe-newaa halɩñɩma yɔ, nɛ mankaɣ-ŋ wɛ cɛlʋʋ nɛ pɛkɛ ñɛ-pɛlaa, ɛlɛ pɩtɩkɛ ñɛ-ɛgbɛyɛ yɔɔ.”

62 «“Nɛ ma-maɣmaɣ mankaɣ-ŋ ɖʋnʋʋ ɛgbɛyɛ; nɛ toovenim taa lɛ, ŋkaɣ tɩlʋʋ se ma lɛ Yehowa. 63 Ðɩnɛ ɛlɛ ŋkaɣ tɔzʋʋ nɛ fɛyɛ kpa-ŋ siŋŋ se ŋkuli ñɔ-nɔɔ ñɛ-fɛyɛ yɔɔ,+ alɩwaatʋ ndʋ mohuuzuu ña-kɩwɛɛkɩm yɔɔ, paa ŋlabɩ pɩtɩŋa payɩ mbʋ yɔ yɔ,”+ Kɩbaɣlʋ Kɩlɩm Yehowa yɔɔdʋʋna.»