Yereemii
16 Yehowa tɔm tasɩ-m talʋʋ se: 2 «Pɩtɩpɔzɩ se ŋkpaɣ halʋ, nɛ pɩtɩpɔzɩ se ŋwɛɛnɩ abalɩbiya nɛ halɩbiya lone ɖɩnɛ ɖɩ-taa. 3 Mbʋ pʋyɔɔ yɔ tɔm tʋnɛ Yehowa yɔɔdʋʋ abalɩbiya nɛ halɩbiya nzɩ palʋlʋʋ-sɩ cɩnɛ yɔ nɛ po-ɖoonaa mba palʋlʋʋ-sɩ yɔ nɛ pa-caanaa mba peyeki se palʋlɩ-sɩ ɛjaɖɛ ɖɩnɛ ɖɩ-taa yɔ pɔ-yɔɔ: 4 “Pakaɣ sɩbɩnʋʋ kʋdɔmɩŋ weyi ɩkɔŋnɩ sɩm yɔ,+ ɛlɛ nɔɔyʋ ɛɛkaɣ caɣʋ kʋñɔwiye pɔ-yɔɔ yaa nɔɔyʋ ɛɛkaɣ-wɛ pim; pakaɣ pɩsʋʋ ɛzɩ huɖe yɔ tɛtʋ yɔɔ.+ Pakaɣ-wɛ kʋʋ nɛ laɣɖɛ nɛ ñɔɔsɩ kaɣ-wɛ kʋʋ nɛ pasɩ,+ nɛ po-tomnasɩ kaɣ pɩsʋʋ ɛsɔdaa sumasɩ nɛ tɛtʋ yɔɔ tɛtɛgbɩna tɔɔnaɣ.”
5 Mbʋ pʋyɔɔ yɔ tɔm tʋnɛ Yehowa yɔɔdʋʋ:
“Taasʋʋ ɖɩɣa ŋga ka-taa pahaɣ kʋñɔwiye caɣyaa tɔɔnaɣ yɔ,
Nɛ taasʋʋ se ŋwii yaa se ŋnɩɩ pe-siziŋ.”+
“Mbʋ pʋyɔɔ yɔ malɩzɩ ma-laŋhɛzɩyɛ samaɣ kanɛ kɔ-yɔɔ,
Malɩzɩ ɖɔɖɔ mɔn-sɔɔlɩm siɣsiɣ ñɩmbʋ nɛ man-pʋtɔdɩyɛ naʋ kɔ-yɔɔ,”+ Yehowa yɔɔdʋʋna.
6 “Sɔsaa nɛ cikpema, pa-tɩŋa pakaɣ sɩbʋ ɛjaɖɛ ɖɩnɛ ɖɩ-taa.
Paakaɣ-wɛ pim,
Nɔɔyʋ ɛɛkaɣ caɣʋ kʋñɔwiye pɔ-yɔɔ,
Nɔɔyʋ ɛɛkaɣ hɛdʋʋ e-tomnaɣ nɛ ɛɖʋ-kɛ heŋ yaa ɛɛkaɣ hʋm ɛ-ñʋʋ koloŋgolo pɔ-yɔɔ.*
7 Nɛ nɔɔyʋ ɛɛkaɣ haʋ tɔɔnaɣ mba pɛwɛ kʋñɔwiye taa yɔ,
Se ɛhɛzɩ pa-laŋa pɛ-ɛyʋ weyi ɛsɩba yɔ ɛ-yɔɔ;
Nɛ nɔɔyʋ ɛɛkaɣ-wɛ haʋ ɖɔɖɔ vɛɛ kɔpʋ ŋgʋ kɩhɛzɩɣ laŋɩyɛ yɔ
Se pɔñɔɔ pa-caa yaa po-ɖoo sɩm yɔɔ.
8 Nɛ taasʋʋ kazandʋ ɖɩɣa taa
Se ña nɛ wɛ ɩcaɣ nɛ ɩtɔɔ nɛ ɩñɔɔ.”
9 «Mbʋ pʋyɔɔ yɔ tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ, yɔɔdʋʋ: “Cɩnɛ, lone ɖɩnɛ ɖɩ-taa, mi-wezuu caɣʋ alɩwaatʋ taa nɛ mɩ-maɣmaɣ mɩ-ɛsɩndaa, mankaɣ yebu nɛ amɛya nɛ taa leleŋ taŋ sɩɩ tɩnaɣ, walʋ nɔɔ nɛ asɛyʋ kɩfalʋ nɔɔ sɩɩ tɩnaɣ.”+
10 «Alɩwaatʋ ndʋ ŋheyiɣ samaɣ kanɛ tɔm tʋnɛ tɩ-tɩŋa yɔ, pakaɣ-ŋ pɔzʋʋ se: “Ɛbɛ yɔɔ Yehowa yɔɔdɩ asɛyʋʋ sɔsɔʋ kʋnɛ kɩ-tɩŋa kɩ-tɔm ɖɔ-yɔɔ? Kɩdɛkɛdɩm nɛ kɩwɛɛkɩm mbʋ ɖɩlabɩ ɖɛ-Ɛsɔ Yehowa?”+ 11 Pɩwɛɛ se ŋcosi-wɛ se: “‘Mbʋ pʋyɔɔ yɔ mɩ-cɔzɔnaa yebi-m,+ nɛ powobi pɩ-yɔɔ nɛ patɩŋɩɣ ɛsɔnaa lalaa nɛ pɛsɛɣ-wɛ nɛ poluŋuu pɛ-tɛɛ.+ Ɛlɛ ma lɛ peyebi-m, nɛ patɩɖɔkɩ man-paɣtʋ,+ Yehowa yɔɔdʋʋna. 12 Nɛ mɩ yɔ, ɩlabɩ kɩdɛkɛdɩm kpem nɛ pɩkpaɖɩ mɩ-cɔzɔnaa,+ nɛ mɩ-taa paa weyi lɛ ɛtɩŋɩɣ ɛ-laŋɩyɛ nɖɩ ɖɩkɛ kɩdɛkɛdɩyɛ nɛ ɖɩwɛɛ kpɩzɩŋ yɔ nɛ ekiziɣ se ɛɛñaŋɩ-m.+ 13 Pʋyɔɔ lɛ mankaɣ-mɩ kpaɣʋ ɛjaɖɛ ɖɩnɛ ɖɩ-taa nɛ mɔlɔ-mɩ ɛjaɖɛ nɖɩ mɩ-maɣmaɣ yaa mɩ-cɔzɔnaa tɩsɩm-ɖɩ yɔ ɖɩ-taa,+ nɛ peeɖe lɛ pɩkaɣ pɔzʋʋ se ɩsɛɛ ɛsɔnaa lalaa wɩsɩ nɛ ɖoo,+ mbʋ pʋyɔɔ yɔ maakaɣ naʋ mɩ-pʋtɔdɩyɛ.’”
14 «“Ɛlɛ, kɩyakɩŋ ɖiɣni kɔm, nɛ alɩwaatʋ ndʋ lɛ paakaɣ tasʋʋ yɔɔdʋʋ se: ‘Yehowa ñɩtʋʋ nɛ ɛwɛɛ wezuu yɔ, ɛnʋ weyi ɛlɩzɩ Izrayɛɛlɩ samaɣ Ejipiti ɛjaɖɛ taa yɔ!’+ Yehowa yɔɔdʋʋna. 15 Ɛlɛ pakaɣ yɔɔdʋʋ se: ‘Yehowa ñɩtʋʋ nɛ ɛwɛɛ wezuu yɔ, ɛnʋ weyi ɛlɩzɩ Izrayɛɛlɩ samaɣ hayo kiŋ ɛjaɖɛ taa nɛ ajɛɛ kpeekpe wena a-taa ɛɛmɩzɩ-kɛ yɔ!’ Nɛ mankaɣ-wɛ pɩsɩnʋʋ pɛ-ɛjaɖɛ, nɖɩ maaha pɔ-cɔzɔnaa yɔ ɖɩ-taa.”+
16 “Na, mentiyiɣ nɛ payaa kpakpasɩ kpayaa sakɩyɛ,
Nɛ pakaɣ-wɛ kpaʋ.
Pʋwayɩ lɛ, mankaɣ tiyuu nɛ payaa agbama sakɩyɛ,
Nɛ pakaɣ-wɛ ñɩnʋʋ paa pʋʋ ŋgʋ lɛ kɩ-yɔɔ nɛ paa piyaɣ ŋga lɛ kɔ-yɔɔ
Nɛ kaaŋ sɔsɔŋ hɛɛnzɩ taa, Yehowa yɔɔdʋʋna.
17 Mbʋ pʋyɔɔ yɔ mɛ-ɛsa wɛ mbʋ payɩ palakɩ yɔ pɩ-yɔɔ.*
Paapɩzɩɣ nɛ pɛmɛsɩ-m mbʋ palakɩ yɔ
Paapɩzɩɣ ɖɔɖɔ nɛ pɛmɛsɩ-m pa-kɩdɛkɛdɩm.
18 Kajalaɣ lɛ, mankaɣ-wɛ hɛyʋʋ kɩhɛyʋʋ pilim ŋgʋ kɩmʋnɩ pa-kɩdɛkɛdɩm nɛ pa-kɩwɛɛkɩm yɔ,+
Mbʋ pʋyɔɔ yɔ pakpaɣ pa-sɩɩnaa mba pɛwɛ kiniŋ yɔ pa-sɩʋ kpelisi nzɩ sɩfɛyɩ wezuu yɔ* nɛ pepisini mɛ-ɛjaɖɛ
Nɛ peyele nɛ pa-kʋzɔɔtʋ wondu su ma-ñɩm taa.”»+
19 Hayɩ Yehowa, mon-ɖoŋ nɛ man-ɖɩjɔzɩyɛ,
Lone nɖɩ ɖɩ-taa menseɣ se mowolo kʋñɔŋ kɩyakʋ wiye yɔ,+
Ajɛɛ kaɣ lɩnʋʋ tɛtʋ kamasɩ yɔɔ nɛ akɔɔ ñɔ-cɔlɔ,
Nɛ akaɣ yɔɔdʋʋ se: «Ðɔ-cɔzɔnaa kaamʋ mbʋ nɛ pɩkɛ pa-ñɩm yɔ, pɩkɛ cɛtɩm siŋŋ;
Falaa pʋyʋ nɛ mbʋ pɩfɛyɩ wazaɣ nakɛyɛ yɔ.»+
20 Ɛyʋ pɩzɩɣ nɛ elu ɛ-tɩ ɛsɔnaa
Ŋgʋ patɩkɛ ɛsɔnaa toovenim taa?+
21 «Pʋyɔɔ lɛ, mankaɣ yebu nɛ patɩlɩ,
Alɩwaatʋ ndʋ lɛ, mankaɣ yebu nɛ patɩlɩ mon-ɖoŋ nɛ mo-hoɖe,
Nɛ pɩtʋʋ fɛyɩ se pakaɣ tɩlʋʋ se ma-hɩɖɛ lɛ Yehowa.»