Ezekɩyɛɛlɩ

20 Nɛ pɩnaɣ 7 ñɩŋga taa, fenaɣ 5 ñɩŋga taa, fenaɣ ŋga ka-kɩyakʋ 10 ñɩŋgʋ wiye, Izrayɛɛlɩ ɛzʋtʋyaa nabɛyɛ kɔma nɛ pacaɣ mɛ-ɛsɩndaa se pɔpɔzɩ nɛ patɩlɩ Yehowa lɩmaɣza. 2 Nɛ Yehowa tɔm talɩ-m se: 3 «Ɛyʋ pɩyalʋ, yɔɔdɩnɩ Izrayɛɛlɩ ɛzʋtʋyaa nɛ ŋheyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩkɔma se ɩpɔzɩ nɛ ɩtɩlɩ ma-lɩmaɣza na? “Mañɩtʋʋ nɛ mɛwɛɛ wezuu yɔ, maakaɣ cosuu tɔm ndʋ ɩpɔzʋʋ-m yɔ tɩ-yɔɔ,”+ Kɩbaɣlʋ Kɩlɩm Yehowa yɔɔdʋʋna.’”

4 «Ŋñɔɔzɩ ña-tɩ se ŋhʋʋnɩ-wɛ tɔm na? Ɛyʋ pɩyalʋ, ŋñɔɔzɩ ña-tɩ se ŋhʋʋnɩ-wɛ tɔm na? Yele nɛ patɩlɩ lakasɩ kɩdɛkɛdɩsɩ nzɩ pɔ-cɔzɔnaa laba yɔ.+ 5 Heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Kɩyakʋ ŋgʋ malɩzɩ Izrayɛɛlɩ yɔ,+ monɖuuni* ɖɔɖɔ Yakɔɔb ɖɩɣa lʋlʋʋ taa mba,* nɛ meyele nɛ patɩlɩ-m Ejipiti ɛjaɖɛ taa.+ Ɛɛɛ, monɖuuni-wɛ nɛ mɔyɔɔdɩ se: “Mɛkɛnɩ mɩ-Ɛsɔ Yehowa.” 6 Kɩyakʋ ŋgʋ, ki-wiye monɖuuni-wɛ se mankaɣ-wɛ lɩzʋʋ Ejipiti ɛjaɖɛ taa nɛ mowoni-wɛ ɛjaɖɛ nɖɩ maañɩnaa* nɛ mansɩɩ-wɛ yɔ ɖɩ-taa, nɖɩ ɖɩ-taa naalɩm nɛ tʋŋ num pikpeŋ yem yɔ.+ Nɖɩ kaakɩlɩnɩ kajʋka ajɛɛ kpeekpe taa.* 7 Nɛ meheyi-wɛ se: “Pɩwɛɛ se mɩ-taa paa weyi lɛ ɛlɔ kʋzɔɔtʋ wondu ndʋ tɩwɛ mɩ-ɛsɩndaa yɔ; itaapisi mɩ-tɩ nɛ Ejipiti sɩʋ kpelisi nzɩ sɩwɛ kiniŋ yɔ.*+ Mɛkɛnɩ mɩ-Ɛsɔ Yehowa.”+

8 «“‘Ɛlɛ pakaɖɩnɩ-m nɛ patitisi se pewelisini-m. Patɩlɔ kʋzɔɔtʋ wondu ndʋ tɩɩwɛ pɛ-ɛsɩndaa yɔ, nɛ patiyele Ejipiti sɩʋ kpelisi nzɩ sɩwɛ kiniŋ yɔ.+ Pʋyɔɔ mɔyɔɔdaa se manpɩyɩɣ man-pana pɔ-yɔɔ, nɛ meyeki nɛ man-pana tɩŋa tii pɔ-yɔɔ Ejipiti ɛjaɖɛ taa. 9 Ɛlɛ ma-hɩɖɛ yɔɔ malabɩ mbʋ se pɩsa nɛ pitaapisi-ɖɩ ajɛɛ wena a-taa paawɛɛ yɔ a-ɛsɩndaa.+ Mbʋ pʋyɔɔ yɔ ajɛɛ ana a-ɛsɩndaa meyeba nɛ patɩlɩ-m* alɩwaatʋ ndʋ maalɩzɩ-wɛ* Ejipiti ɛjaɖɛ taa yɔ.+ 10 Pʋyɔɔ malɩzɩ-wɛ Ejipiti ɛjaɖɛ taa nɛ mowoni-wɛ kañɩmbusuu taa.+

11 «“‘Nɛ mɛncɛlɩ-wɛ man-paɣtʋ nɛ meyele nɛ patɩlɩ mɔn-tɔm hʋʋ paɣtʋ,+ se pɩsa nɛ ɛyʋ weyi ɛɖɔŋ tɩ-yɔɔ yɔ ɛwɛɛ wezuu.+ 12 Mɛncɛlɩ-wɛ ɖɔɖɔ man-sabaatɩwaa+ se pɛkɛ yʋsaɣ ma nɛ wɛ ɖɛ-hɛkʋ taa,+ se pɩsa nɛ patɩlɩ se ma Yehowa, mapɩsɩɣnɩ-wɛ kiɖeɖema.

13 «“‘Ɛlɛ Izrayɛɛlɩ ɖɩɣa kaɖɩnɩ-m kañɩmbusuu taa.+ Patɩɖɔ man-paɣtʋ yɔɔ, nɛ pɔlɔ mɔn-tɔm hʋʋ paɣtʋ, ŋgʋ, ye ɛyʋ ɛɖɔŋ tɩ-yɔɔ yɔ, ɛkaɣ wɛʋ wezuu. Pepisi man-sabaatɩwaa siŋŋ. Pʋyɔɔ mɔyɔɔdaa se manpɩyɩɣ man-pana pɔ-yɔɔ kañɩmbusuu taa nɛ manɖɩzɩ-wɛ.+ 14 Ma-maɣmaɣ ma-hɩɖɛ yɔɔ malabɩ mbʋ se pɩsa nɛ pitaapisi-ɖɩ ajɛɛ ɛsɩndaa, wena a-ɛsɩndaa maalɩzɩ-wɛ* yɔ.+ 15 Monɖuuni-wɛ ɖɔɖɔ kañɩmbusuu taa se maakaɣ-wɛ wonuu ɛjaɖɛ nɖɩ maha-wɛ yɔ ɖɩ-taa+ (nɖɩ ɖɩ-taa naalɩm nɛ tʋŋ num pikpeŋ yem yɔ,+ nɖɩ kaakɩlɩnɩ kajʋka ajɛɛ kpeekpe taa)* 16 mbʋ pʋyɔɔ yɔ pɔlɔ mɔn-tɔm hʋʋ paɣtʋ, patɩɖɔ man-paɣtʋ yɔɔ, nɛ pepisi man-sabaatɩwaa, mbʋ pʋyɔɔ yɔ pa-laŋa tɩŋaɣ pa-sɩʋ kpelisi nzɩ sɩwɛ kiniŋ yɔ sɩ-wayɩ.+

17 «“‘Ɛlɛ pɔ-tɔm labɩ-m* pʋtɔdɩyɛ nɛ mantɩɖɩzɩ-wɛ; mantɩkʋ-wɛ kañɩmbusuu taa. 18 Meheyi pa-pɩyalaa kañɩmbusuu taa se:+ “Ɩtaaɖɔ mɩ-cɔzɔnaa paɣtʋ yɔɔ,+ ɩtaaɖɔkɩ pɔ-tɔm hʋʋ paɣtʋ yaa itaapisi mɩ-tɩ nɛ pa-sɩʋ kpelisi nzɩ sɩwɛ kiniŋ yɔ. 19 Mɛkɛnɩ mɩ-Ɛsɔ Yehowa. Ɩɖɔ man-paɣtʋ yɔɔ, nɛ ɩɖɔkɩ mɔn-tɔm hʋʋ paɣtʋ nɛ ɩɖɔ tɩ-yɔɔ.+ 20 Nɛ ɩpɩsɩ man-sabaatɩwaa kiɖeɖema,+ nɛ pakaɣ kɛʋ yʋsaɣ ma nɛ mɩ ɖɛ-hɛkʋ taa, se pɩsa nɛ ɩtɩlɩ se mɛkɛnɩ mɩ-Ɛsɔ Yehowa.”+

21 «“‘Ɛlɛ pa-pɩyalaa paɣzɩ-m kaɖɩnʋʋ.+ Patɩɖɔ man-paɣtʋ yɔɔ, nɛ patɩɖɔkɩ mɔn-tɔm hʋʋ paɣtʋ nɛ pɔɖɔ tɩ-yɔɔ, ŋgʋ, ye ɛyʋ ɛɖɔŋ tɩ-yɔɔ yɔ, ɛkaɣ wɛʋ wezuu. Pepisi man-sabaatɩwaa. Pʋyɔɔ mɔyɔɔdaa se manpɩyɩɣ man-pana pɔ-yɔɔ nɛ meyeki nɛ man-pana tɩŋa tii pɔ-yɔɔ kañɩmbusuu taa.+ 22 Ɛlɛ mankpa man-tɩ,+ nɛ ma-maɣmaɣ ma-hɩɖɛ yɔɔ+ malabɩ mbʋ se pɩsa nɛ pitaapisi-ɖɩ ajɛɛ ɛsɩndaa, wena a-ɛsɩndaa malɩzɩ-wɛ* yɔ. 23 Pɩtasɩ lɛ, monɖuuni-wɛ kañɩmbusuu taa se mamɩzɩɣ-wɛ samasɩ taa nɛ mɛyɛkɛlɩ-wɛ ajɛɛ taa,+ 24 mbʋ pʋyɔɔ yɔ patɩɖɔ mɔn-tɔm hʋʋ paɣtʋ yɔɔ nɛ pɔlɔ man-paɣtʋ,+ pepisi man-sabaatɩwaa, nɛ patɩŋ* pɔ-cɔzɔnaa sɩʋ kpelisi nzɩ sɩwɛ kiniŋ yɔ sɩ-wayɩ.+ 25 Maha-wɛ nʋmɔʋ ɖɔɖɔ se patɩŋ paɣtʋ ndʋ tɩfɛyɩ ɖeu yɔ nɛ tɔm hʋʋ paɣtʋ ndʋ tɩɩpɩzɩɣ nɛ tiyele nɛ pɛwɛɛ wezuu yɔ.+ 26 Meyeba nɛ pa-maɣmaɣ pa-kɩlaŋ pisi-wɛ—alɩwaatʋ ndʋ pañaɣzɩ paa kajalaɣ pɩɣa ŋga lɛ miŋ yɔ+—se pɩsa nɛ manɖɩzɩ-wɛ nɛ patɩlɩ se ma lɛ Yehowa.’”

27 «Pʋyɔɔ lɛ, Oo ɛyʋ pɩyalʋ, yɔɔdɩnɩ Izrayɛɛlɩ ɖɩɣa nɛ ŋheyi-kɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mbʋ ɖɔɖɔ mɩ-cɔzɔnaa tʋ-m, mbʋ pʋyɔɔ yɔ palabɩ mbʋ pɩfɛyɩ siɣsiɣ yɔ mɛ-ɛsɩndaa. 28 Mowoni-wɛ ɛjaɖɛ nɖɩ monɖuwaa se mahaɣ-wɛ yɔ ɖɩ-taa.+ Pana piyisi nzɩ payɩ sɩkʋyaa yɔ nɛ tɩŋ weyi payɩ ɩwɛ hatʋ camɩyɛ yɔ lɛ,+ papaɣzɩ laʋ pa-kɩlaŋ nɛ pa-haɖɛ nɖɩ ɖɩɖʋʋ-m ɖɩwɩzɩyɛ yɔ. Pala pa-kɩlaŋ weyi ɩlɩɣ sɔzɩŋ camɩyɛ yɔ* nɛ pelizi pe-kilizasɩ peeɖe. 29 Pʋyɔɔ mɔnpɔzɩ-wɛ se: “Ɛbɛ iwoki labʋ lone kʋkʋyɩyɛ nɖɩ ɖɩ-taa? (Halɩ nɛ sɔnɔ payaɣ peeɖe se Lone Kʋkʋyɩyɛ.)”’”+

30 «Lɛɛlɛɛyɔ lɛ, heyi Izrayɛɛlɩ ɖɩɣa se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Ɩwɛɛ nɛ ipisiɣ mɩ-tɩ ɛzɩ mɩ-cɔzɔnaa kaalabʋ nɛ patɩŋ pa-sɩʋ kpelisi nzɩ sɩwɛ kiniŋ yɔ sɩ-wayɩ se pa nɛ sɩ pala fezuu taa hayitu yɔ?+ 31 Nɛ halɩ nɛ sɔnɔ, ɩwɛɛ nɛ ɩlaɣ kɩlaŋ mɩ-sɩʋ kpelisi nzɩ sɩwɛ kiniŋ yɔ sɩ-tɩŋa nɛ ɩñaɣzɩɣ mɩ-pɩyalaa miŋ nɛ ipisiɣni mɩ-tɩ?+ Ɛzɩ pɩwɛɛ se alɩwaatʋ kʋɖʋmtʋ ndʋ tɩ-taa lɛ, moncosi tɔm ndʋ ɩpɔzʋʋ-m yɔ tɩ-yɔɔ, Oo Izrayɛɛlɩ ɖɩɣa?’”+

«“Mañɩtʋʋ nɛ mɛwɛɛ wezuu yɔ, maakaɣ cosuu tɔm ndʋ ɩpɔzʋʋ-m yɔ tɩ-yɔɔ,”+ Kɩbaɣlʋ Kɩlɩm Yehowa yɔɔdʋʋna. 32 “Nɛ mbʋ pɩ-yɔɔ ɩmaɣzɩɣ yɔ, pɩɩkaɣ labʋ kpa. Ɩyɔɔdʋʋ se: ‘Ðɩwɛɛ ɛzɩ ajɛɛ yɔ, ɛzɩ ajɛɛ lɛɛna taa hɔŋ yɔ, weyi ɩsɛɣ* ɖasɩ nɛ pɛɛ yɔ.’”»+

33 «“Mañɩtʋʋ nɛ mɛwɛɛ wezuu yɔ, mankaɣ tɔɔʋ kewiyitu mɩ-yɔɔ nɛ nesi ɖoŋ ñɩnzɩ nɛ nesi nzɩ mensezaa yɔ, nɛ mankaɣ pɩyʋʋ man-pana mɩ-yɔɔ,”+ Kɩbaɣlʋ Kɩlɩm Yehowa yɔɔdʋʋna. 34 “Mankaɣ-mɩ lɩzʋʋ nɛ samasɩ taa nɛ mankpaɣ-mɩ nɛ ajɛɛ wena a-taa ɩɩmɩzaa yɔ nɛ menkpeɣli-mɩ; mankpakɩɣ-mɩ nɛ nesi ɖoŋ ñɩnzɩ nɛ nesi nzɩ mensezaa yɔ, nɛ mankaɣ pɩyʋʋ man-pana mɩ-yɔɔ.+ 35 Mankaɣ-mɩ wonuu ɛyaa samasɩ kañɩmbusuu taa nɛ ma nɛ mɩ ɖɩpa ɖama nɛ ɛsa peeɖe nɛ mahʋʋnɩ-mɩ tɔm.+

36 «“Ɛzɩ maahʋnʋʋ tɔm mɩ-cɔzɔnaa Ejipiti ɛjaɖɛ kañɩmbusuu taa yɔ, mbʋ ɖɔɖɔ mankaɣ-mɩ hʋnʋʋ tɔm,” Kɩbaɣlʋ Kɩlɩm Yehowa yɔɔdʋʋna. 37 “Mankaɣ yebu nɛ ɩtɩŋ ninɖiɣyu ɖaʋ tɛɛ+ nɛ mankpa-mɩ nɛ ɖoŋ nɛ ɩña ɛgbɛyɛ. 38 Ɛlɛ mankaɣ lɩzʋʋ mɩ-hɛkʋ taa kaañamtʋ tɩnaa nɛ mba pakaɖɩɣnɩ-m yɔ.+ Mbʋ pʋyɔɔ yɔ mankaɣ-wɛ lɩzʋʋ ɛjaɖɛ nɖɩ ɖɩ-taa pacaɣ ɛgɔndʋ yɔ ɖɩ-taa, ɛlɛ paakaɣ sʋʋ Izrayɛɛlɩ ɛjaɖɛ taa;+ nɛ toovenim taa lɛ ɩkaɣ tɩlʋʋ se ma lɛ Yehowa.”

39 «Piyele nɛ mɩ lɛ, Oo Izrayɛɛlɩ ɖɩɣa, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mɩ-taa paa weyi lɛ, ewolo nɛ ɛsɛɛ ɛ-sɩʋ kpelisi nzɩ sɩwɛ kiniŋ yɔ.+ Ɛlɛ pʋwayɩ, ye itiwelisini-m yɔ, ɩɩtasɩɣ pɩzʋʋ nɛ ɩtɩŋnɩ mɩ-kɩlaŋ nɛ mɩ-sɩʋ kpelisi nzɩ sɩwɛ kiniŋ yɔ sɩ-yɔɔ nɛ ipisi ma-hɩɖɛ kiɖeɖeye.”+

40 «“Mbʋ pʋyɔɔ yɔ, Izrayɛɛlɩ ɖɩɣa kpeekpe, pa-tɩŋa payɩ, pakaɣ-m sɛʋ ɛjaɖɛ taa+ man-pʋʋ kiɖeɖeu taa, Izrayɛɛlɩ pʋʋ kʋkʋyʋʋ nakʋyʋ yɔɔ.+ Pɔ-tɔm kaɣ-m kɛdɩnʋʋ peeɖe, nɛ mankaɣ pɔzʋʋ se ɩkɔnɩ-m mɩ-haɖɛ nɛ mɩ-haɖɛ taa kajalaɣ pee, mi-wondu kiɖeɖetu tɩŋa,”+ Kɩbaɣlʋ Kɩlɩm Yehowa yɔɔdʋʋna. 41 “Sɔzɩŋ kɩbaŋ* yɔɔ lɛ, mɩ-tɔm kaɣ-m kɛdɩnʋʋ alɩwaatʋ ndʋ malɩzɩɣ-mɩ nɛ samasɩ taa nɛ mankpaɣ-mɩ nɛ ajɛɛ wena a-taa ɩɩmɩzaa yɔ nɛ menkpeɣli-mɩ yɔ;+ nɛ mankaɣ pɩsʋʋ kiɖeɖeu mɩ-hɛkʋ taa, ajɛɛ ɛsɩndaa.”+

42 «“Nɛ toovenim taa lɛ ɩkaɣ tɩlʋʋ se ma lɛ Yehowa+ alɩwaatʋ ndʋ mowokini-mɩ Izrayɛɛlɩ ɛjaɖɛ taa yɔ,+ ɛjaɖɛ nɖɩ maaɖuwaa se mahaɣ mɩ-cɔzɔnaa yɔ. 43 Nɛ peeɖe ɩkaɣ tɔzʋʋ mɩ-ɖɔnɛ nɛ mɩ-lakasɩ nzɩ payɩ ipisini mɩ-tɩ yɔ sɩ-yɔɔ,+ nɛ ɩkaɣ mɩ-tɩ lɩʋ sɔŋ lakasɩ kɩdɛkɛdɩsɩ nzɩ payɩ ɩlaba yɔ sɩ-yɔɔ.+ 44 Ðɩnɛ ɛlɛ, ɩkaɣ tɩlʋʋ toovenim taa se ma lɛ Yehowa alɩwaatʋ ndʋ malakɩ-mɩ mbʋ ma-hɩɖɛ yɔɔ,+ nɛ pɩɩkɛɣnɩ mɩ-ɖɔnɛ kɩdɛkɛdɩyɛ yaa mɩ-lakasɩ kɩdɛkɛdɩsɩ nɔɔ taa yɔ, Oo Izrayɛɛlɩ ɖɩɣa,” Kɩbaɣlʋ Kɩlɩm Yehowa yɔɔdʋʋna.»

45 Nɛ Yehowa tɔm tasɩ-m talʋʋ se: 46 «Ɛyʋ pɩyalʋ, kɛzɩ ñɛ-ɛsa nɛ hadɛ kiŋ egeetiye taa nɛ ŋsusi hadɛ kiŋ tɔm, nɛ ŋheyi natʋ tɔm hadɛ kiŋ laʋ ɛjaɖɛ. 47 Heyi hadɛ kiŋ laʋ se: “Nɩɩ Yehowa tɔm. Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mɔnsɔkɩ-ŋ miŋ,+ nɛ ɩkaɣ ñaɣʋ tɩŋ lɛŋ ñɩŋ kpeekpe nɛ tɩŋ kɩwɩlɩŋ kpeekpe ña-taa. Miŋ nzʋlʋmɩyɛ nɖɩ, ɖɩɩkaɣ ɖɩm,+ nɛ ɖɩkaɣ kou paa weyi, kpaɣnɩ hadɛ kiŋ nɛ piwolo hayo kiŋ. 48 Nɛ tomnasɩ* kpeekpe kaɣ naʋ se ma Yehowa, ma-maɣmaɣ mɔsɔbɩnɩ-kʋ miŋ, nɛ ɩɩkaɣ ɖɩm.’”»+

49 Nɛ mɔyɔɔdɩ se: «Hayɩ, Kɩbaɣlʋ Kɩlɩm Yehowa! Pɛwɛɛ nɛ pɔyɔɔdʋʋ mɔn-tɔm se: “Pɩtɩkɛ ɖimɖimɖanaa yem ɛɖʋʋ kɛ?”»*