Ejipiti Lɩʋ
30 «Pɩwɛɛ se ŋla altaaru nakʋyʋ nɛ pɔsɔkɩ kɩ-yɔɔ ŋgee tɩlaaɖɩ;+ akasɩya ɖaŋ ŋkaɣ kpaɣʋ nɛ ŋlabɩnɩ-kʋ.+ 2 Pɩwɛɛ se kɩ-hɔɔlɩŋ 4 tɩŋa ɩwɛɛ kɩmaŋ, kɩ-ɖaɣlɩkɩŋ ɛkɛ nuŋgoloŋa kʋɖʋmaɣ,* kɩ-walanzɩ kɛ nuŋgoloŋa kʋɖʋmaɣ, nɛ kɩ-kʋkʋyɩŋ kɛ nuŋgolonzi 2. Kɩ nɛ kɩ-hɩŋ pakaɣ kpɛndʋʋ nɛ pɛkɛ pʋyʋ kʋɖʋm.+ 3 Pɩwɛɛ se ŋtaa kɩ-yɔɔ sika kele kele ñɩŋga: kɩ-ñʋʋ taa, kɩ-hɔɔlɩŋ tɩŋa yɔɔ kpɛɛɛ, nɛ kɩ-hɩŋ yɔɔ; nɛ pɩwɛɛ se ŋkpaɣ sika nɛ ŋlabɩnɩ kɩ-nɔsɩ nɛ pɩcɔɔ pɩta. 4 Ŋkaɣ-kʋ labʋ ɖɔɖɔ sika kokoo 2 kɩ-nɔɔ tɛɛ, hɔɔlɩŋ 2 ɛnɩ ɩ-yɔɔ, nɛ ana kaɣnɩ ɖɔkʋʋ ɖaŋ weyi pakpakɩɣnɩ-kʋ yɔ. 5 La akasɩya ɖaŋ nɛ ŋtaa ɩ-yɔɔ sika. 6 Pɩwɛɛ se ŋsɩɩ-kʋ pɩsaʋ kikenduu ŋgʋ kɩwɛ Aseɣɖe Lɩzʋʋ aɖakaɣ cɔlɔ yɔ kɩ-ɛsɩndaa,+ sulaɣ ŋga kɛwɛ Aseɣɖe Lɩzʋʋ yɔɔ yɔ kɛ-ɛsɩndaa, ɖenɖe mankaɣ man-tɩ lɩzʋʋ nɛ mawɩlɩ-ŋ yɔ.+
7 «Aarɔɔnɩ+ kaɣ ñaɣzʋʋ miŋ ŋgee tɩlaaɖɩ sɔzɩŋ ñɩŋgʋ+ kɩ-yɔɔ,+ nɛ ɛla nɛ kɩ-ñɔsɩ ñɛyɩ altaaru yɔɔ alɩwaatʋ ndʋ ɛcɔŋnɩ kanɖʋnaa yɔɔ+ paa tanaŋ ŋgʋ yɔ. 8 Pɩtasɩ lɛ, alɩwaatʋ ndʋ Aarɔɔnɩ kaasɔkɩ kanɖʋnaa wɩsɩ ɖʋʋ* nɛ pɩtɛ lɛ, ɛkaɣ sɔbʋ ŋgee tɩlaaɖɩ. Pɩkɛ ŋgee tɩlaaɖɩ ŋgʋ pɩwɛɛ se pɔsɔkɩ Yehowa ɛsɩndaa tam mɩ-kpaɖɩŋ kpeekpe taa yɔ. 9 Pɩtɩpɔzɩ se ɩsɔ kɩ-yɔɔ ŋgee tɩlaaɖɩ ŋgʋ kɩtɩmʋna yɔ+ yaa kɩlaʋ kɩñaɣzʋʋ yaa tɔɔnaɣ pee kɩlaʋ, nɛ pɩtɩpɔzɩ se ɩpɩyɩ kɩ-yɔɔ kilizaɣ. 10 Pɩwɛɛ se Aarɔɔnɩ ɛlaa kɩwɛɛkɩm yɔɔ huuzuu kɩlaʋ altaaru ŋgʋ kɩ-hɩŋ yɔɔ tam kʋɖʋm pɩnaɣ taa.+ Ɛkaɣ kpaɣʋ kɩwɛɛkɩm yɔɔ huuzuu+ kɩlaʋ* calɩm hɔɔlʋʋ nakʋyʋ nɛ ehuuzini kɩ-yɔɔ kɩwɛɛkɩm, tam kʋɖʋm pɩnaɣ taa mɩ-kpaɖɩŋ kpeekpe taa. Kɩkɛ pʋyʋ kiɖeɖeu siŋŋ Yehowa ɛsɩndaa.»
11 Pʋwayɩ lɛ, Yehowa heyi Moyizi se: 12 «Alɩwaatʋ ndʋ ŋlakɩ kɩgalʋʋ nɛ ŋkalɩɣ Izrayɛɛlɩ piya yɔ,+ paa Izrayɛɛlɩ pɩɣa ŋga lɛ, pɩwɛɛ se kaha Yehowa kɩhɛyʋʋ ke-wezuu* yɔɔ kɩgalʋʋ alɩwaatʋ taa. Pɩpɔzɩ mbʋ se pɩsa nɛ kʋdɔŋ nakʋyʋ ɛtaakɔɔ pɔ-yɔɔ alɩwaatʋ ndʋ pakalɩɣ-wɛ yɔ. 13 Pʋnɛ pɩwɛɛ se mba payɩ pakalɩɣ-wɛ yɔ paha: Sikli* hɔɔlʋʋ, kɩmʋnɩ lone kiɖeɖeye taa sikli.*+ Gerawaa* 20 kɛ sikli kʋɖʋmʋʋ. Sikli hɔɔlʋʋ kɛnɩ haɖɛ nɖɩ pahaɣ Yehowa yɔ.+ 14 Weyi pakalɩ-ɩ nɛ ɛwɛnɩ pɩnzɩ 20 yaa pɩcɛzɩ mbʋ yɔ, ɛkaɣ haʋ haɖɛ Yehowa.+ 15 Pɩtɩpɔzɩ se ñɩm tʋ ɛha nɛ pɩcɛzɩ, nɛ pɩtɩpɔzɩ ɖɔɖɔ se kʋñɔndʋ ɛha nɛ pɩtɩtalɩ sikli* hɔɔlʋʋ se pɩkɛ haɖɛ nɖɩ pahaɣ Yehowa se pɩkɛnɩ mi-weziŋ* kɩwɛɛkɩm yɔɔ huuzuu kɩlaʋ yɔ. 16 Pɩwɛɛ se ŋmʋ Izrayɛɛlɩ mba cɔlɔ kɩwɛɛkɩm yɔɔ huuzuu kɩlaʋ liidiye pɔɔyaɣ nɛ ŋcɛlɩ-kɛ nɛ palabɩnɩ tʋmɩyɛ kediɣzaɣ kizinziku tɛɛ, nɛ kɛkɛnɩ Izrayɛɛlɩ mba mbʋ pɩ-yɔɔ pɔtɔzʋʋ yɔ Yehowa ɛsɩndaa, nɛ pɩkɛnɩ pe-weziŋ* kɩwɛɛkɩm yɔɔ huuzuu kɩlaʋ.»
17 Yehowa tasɩ yɔɔdɩnʋʋ Moyizi se: 18 «Kpaɣ ñɩɣyʋʋ kɩsɛɛmʋʋ nɛ ŋlabɩnɩ ñanaɣ sɔsɔɔ nɛ ka-ɖɩdɩnɩyɛ se pɩsa nɛ pasaŋɩɣ;+ pʋwayɩ lɛ ŋsɩɩ-kɛ kediɣzaɣ kizinziku nɛ altaaru pɛ-hɛkʋ taa nɛ ŋɖʋ ka-taa lɩm.+ 19 Aarɔɔnɩ nɛ ɛ-pɩyalaa pakaɣ saŋʋʋ pe-nesi nɛ pɔkɔ pa-nɩŋgbanzɩ lɩm peeɖe.+ 20 Alɩwaatʋ ndʋ powoki kediɣzaɣ kizinziku tɛɛ yaa alɩwaatʋ ndʋ pɔñɔtʋʋnɩ altaaru se pala pa-tʋmɩyɛ nɛ palaa Yehowa miŋ kɩlaŋ nɛ ɩ-ñɔsɩ kpa yɔ, pakaɣ kpaɣʋ lɩm mbʋ nɛ pasaŋ se pɩsa nɛ pataasɩ. 21 Pɩwɛɛ se pasaŋ pe-nesi nɛ pɔkɔ pa-nɩŋgbanzɩ lɩm se pɩsa nɛ pataasɩ, nɛ pɩwɛɛ se pɩkɛnɩ-wɛ tamtam paɣtʋ, ɛ nɛ ɛ-lʋlʋʋ taa mba, pa-kpaɖɩŋ kpeekpe taa.»+
22 Yehowa wolo pɩ-yɔɔ nɛ ɛyɔɔdɩnɩ Moyizi nɛ eheyi-i se: 23 «Pʋwayɩ lɛ, kpaɣ tɩlaaɖɩnaa kɩbama: miiri ŋgʋ kikiwa yɔ kilonaa 6, nɛ kanɛɛlɩ ŋgʋ kɩlɩɣ sɔzɩŋ camɩyɛ yɔ miiri ɖɔʋ hɔɔlʋʋ, kilonaa 3, nɛ kañɩŋgbayaɣ ŋga kalɩɣ sɔzɩŋ camɩyɛ yɔ kilonaa 3,* 24 nɛ kasiya kilonaa 6, pamaɣzɩnɩ lone kiɖeɖeye taa sikli,*+ pɩkpɛndɩnɩ oliivi num hiini* kʋɖʋmʋʋ. 25 Pʋwayɩ lɛ, ŋkpaɣ-pʋ nɛ ŋlabɩnɩ ŋgee num kiɖeɖem; pɩwɛɛ se pesidi-pʋ nɛ lɛɣtʋ.*+ Pɩkɛnɩ ŋgee num kiɖeɖem.
26 «Pɩwɛɛ se ŋtaa num kediɣzaɣ kizinziku+ nɛ Aseɣɖe Lɩzʋʋ aɖakaɣ, 27 pɩkpɛndɩnɩ taabɩlɩ nɛ kɩ-yɔɔ wondu kpeekpe, kanɖʋnaa ɖɩzɩyɛ nɛ ɖɩ-yɔɔ wondu, nɛ ŋgee tɩlaaɖɩ altaaru, 28 kɩlaʋ kɩñaɣzʋʋ altaaru nɛ kɩ-yɔɔ wondu kpeekpe, nɛ ñanaɣ sɔsɔɔ nɛ ka-ɖɩdɩnɩyɛ. 29 Pɩwɛɛ se ŋsɩɩ-tʋ nɛ hɔɔlʋʋ nɛ palabɩnɩ man-tʋmɩyɛ nɛ tɩpɩsɩ pʋyʋ kiɖeɖeu siŋŋ.+ Weyi etukuuni-pʋ yɔ, pɩwɛɛ se ɛkɛ kiɖeɖeu.+ 30 Nɛ ŋkaɣ taʋ num Aarɔɔnɩ+ nɛ ɛ-pɩyalaa+ nɛ ŋpɩsɩ-wɛ kiɖeɖema se palabɩ-m cɔjɔtʋ tʋmɩyɛ.+
31 «Ŋkaɣ yɔɔdɩnʋʋ Izrayɛɛlɩ mba nɛ ŋheyi-wɛ se: “Pɩwɛɛ se pʋnɛ pɩkɛ me-ŋgee num kiɖeɖem tam mɩ-kpaɖɩŋ taa.+ 32 Pɩtɩpɔzɩ se pataa-pʋ ɛyʋ tomnaɣ, nɛ pɩtɩpɔzɩ se ɩkpaɣ wondu ndʋ palakɩnɩ-pʋ yɔ nɛ ɩla nabʋyʋ nɛ pɩnɩɣzɩnɩ-pʋ. Pɩkɛ pʋyʋ kiɖeɖeu. Pɩwɛɛ se pɩkɛnɩ-mɩ pʋyʋ kiɖeɖeu tam. 33 Weyi ɛlakɩ num nabʋyʋ nɛ pɩnɩɣzɩnɩ-pʋ nɛ ɛtaa-pʋ weyi pɩtɩha-ɩ nʋmɔʋ yɔ* ɛ-yɔɔ yɔ, pɩwɛɛ se palɩzɩ-ɩ* ɛ-samaɣ taa.”»+
34 Nɛ Yehowa heyi Moyizi se: «Kpaɣ tɩlaaɖɩnaa panɛ kɩmaŋ:+ sɩtakɩtee, onika, galɩbaanɔɔm sɔzɩŋ ñɩŋgʋ, nɛ tɩlaaɖɩ kʋhʋlʋmʋʋ kele kele ñɩŋgʋ. 35 Kpaɣ-wɛ nɛ ŋlabɩnɩ ŋgee tɩlaaɖɩ;+ pɩwɛɛ se pesidi ki-wondu nɛ lɛɣtʋ,* paɖʋ kɩ-taa ɖɔm,+ kɩwɛɛ kele kele nɛ kɩkɛ pʋyʋ kiɖeɖeu. 36 Pɩwɛɛ se ŋkpaɣ kɩ-hɔɔlʋʋ nakʋyʋ nɛ ŋsɔ nɛ pɩkpɩzɩ camɩyɛ nɛ ŋsɩɩ pɩ-hɔɔlʋʋ nakʋyʋ kediɣzaɣ kizinziku tɛɛ Aseɣɖe Lɩzʋʋ ɛsɩndaa, ɖenɖe mankaɣ man-tɩ lɩzʋʋ nɛ mawɩlɩ-ŋ yɔ. Pɩwɛɛ se kɩkɛnɩ-mɩ pʋyʋ kiɖeɖeu siŋŋ. 37 Pɩtɩpɔzɩ se ŋkpaɣ wondu ndʋ ŋlabɩnɩ ŋgee tɩlaaɖɩ kʋnɛ yɔ nɛ ŋlabɩnɩ ña-tɩ ŋgee tɩlaaɖɩ.+ Pɩwɛɛ se pɩkɛnɩ-ŋ mbʋ pɩkɛ pʋyʋ kiɖeɖeu Yehowa ɛsɩndaa yɔ. 38 Weyi ɛlakɩ tɩlaaɖɩ nakʋyʋ nɛ kɩnɩɣzɩnɩ-kʋ se ɛnɩɩ kɩ-sɔzɩŋ nɛ pɩkɛdɩnɩ-ɩ yɔ, pɩwɛɛ se palɩzɩ-ɩ* ɛ-samaɣ taa.»