Kroniiki takayaɣ kajalaɣ ñɩŋga
18 Pɩlabɩ alɩwaatʋ natʋyʋ pʋwayɩ lɛ, Daviid wa Filistii mba nɛ eluzi-wɛ ɛ-tɛɛ, nɛ ɛmʋ Gaatɩ+ nɛ kɩ-tɛtʋ cikpetu ndɩ ndɩ* Filistii mba nesi tɛɛ.+ 2 Nɛ ɛwa Mowaabʋ,+ nɛ Mowaabʋ mba pɩsɩ Daviid lɩmɖʋyaa nɛ pɛhɛyɩɣ lambuu.+
3 Daviid wabɩ Zobaa+ wiyaʋ Hadadezɛɛrɩ,+ Hamatɩ+ cɔlɔ, alɩwaatʋ ndʋ ɛlɛ ñaawɛ nʋmɔʋ taa nɛ ewoki se ɛwalɩsɩ e-kewiyaɣ tɛtʋ nɛ tɩtalɩ Efraatɩ Pɔɔ+ egeetiye taa yɔ. 4 Daviid kpa Hadadezɛɛrɩ kɛɛkɛɛnaa 1 000, kpaŋnaŋ yɔɔ caɣyaa 7 000, nɛ ɛ-sɔɔjanaa nɩŋgbanzɩ ɖɔnaa 20 000.+ Nɛ Daviid sɛtɩ kpaŋnaŋ weyi ɩhɔŋ kɛɛkɛɛnaa yɔ ɩ-tɩŋa ɩ-naakoɖiŋ, ɛlɛ ɛkazɩ kpaŋnaŋ 100 ɖeke.+ 5 Siirii ñɩma mba pɛwɛ Damaasɩ yɔ pɔkɔm se pasɩɣnɩ Zobaa wiyaʋ Hadadezɛɛrɩ lɛ, Daviid kʋ Siirii ñɩma mba pa-taa ɛyaa 22 000.+ 6 Nɛ Daviid sɩɩ sɔɔjanaa tindima Damaasɩ ŋgʋ kɩwɛ Siirii yɔ kɩ-taa, nɛ Siirii mba pɩsɩ Daviid lɩmɖʋyaa nɛ pɛhɛyɩɣ lambuu. Yehowa yekaɣ nɛ Daviid wakɩ* ɖenɖe payɩ ewokaɣ yɔ.+ 7 Pɩtasɩ lɛ, Daviid mʋ sika kpayɩŋ weyi ɩwɛ kulukulu yɔ Hadadezɛɛrɩ lɩmɖʋyaa cɔlɔ nɛ ewoni-i Yeruzalɛm. 8 Daviid ku ñɩɣtʋ kɩsɛɛmtʋ sakɩyɛ Hadadezɛɛrɩ tɛ tɛtʋ Tibaatɩ nɛ Kuuni pa-taa. Ñɩɣtʋ ndʋ Salomɔɔ kpaɣaa nɛ ɛlabɩnɩ ñɩɣyʋʋ kɩsɛɛmʋʋ Teŋgu,+ tilima, nɛ ñɩɣyʋʋ kɩsɛɛmʋʋ wondu.+
9 Hamatɩ wiyaʋ Toowu nɩwa se Daviid wabɩ Zobaa wiyaʋ Hadadezɛɛrɩ+ sɔɔjanaa kpeekpe lɛ,+ 10 ɛcaŋ etiyi ɛ-pɩyalʋ Hadoram se ewolo Wiyaʋ Daviid cɔlɔ nɛ ɛpɔzɩ ɛ-alaafɩya yɔɔ nɛ ɛsamɩ-ɩ mbʋ pʋyɔɔ yɔ eyoni Hadadezɛɛrɩ nɛ ɛwabɩ-ɩ (mbʋ pʋyɔɔ yɔ, Hadadezɛɛrɩ yowaɣni Toowu ɖoŋ ɖoŋ); nɛ Hadoram woni Daviid sika wondu, liidiye wondu, nɛ ñɩɣyʋʋ kɩsɛɛmʋʋ wondu ndɩ ndɩ. 11 Wiyaʋ Daviid pɩsɩ-tʋ Yehowa wondu kiɖeɖetu,+ pɩkpɛndɩnɩ liidiye ñɩɣtʋ nɛ sika ŋga ɛɛmʋ ajɛɛ tɩŋa cɔlɔ yɔ: Edom nɛ Mowaabʋ pɔ-cɔlɔ, Amooni mba+ cɔlɔ, Filistii mba+ cɔlɔ nɛ Amalɛɛkɩ mba+ cɔlɔ.
12 Zeruyaa+ pɩyalʋ Abisayii+ kʋ Edom mba 18 000 Ðɔm Fɛɛʋ taa.+ 13 Nɛ ɛsɩɩ sɔɔjanaa tindima Edom, nɛ Edom mba kpeekpe pɩsɩ Daviid lɩmɖʋyaa.+ Yehowa yekaɣ nɛ Daviid wakɩ* ɖenɖe payɩ ewokaɣ yɔ.+ 14 Daviid wolo pɩ-yɔɔ nɛ ɛtɔkɩ kewiyitu Izrayɛɛlɩ kpeekpe yɔɔ.+ Nɛ ɛhʋwaɣ ɛ-samaɣ kpeekpe tɔm siɣsiɣ nɛ eyeki nɛ pañaŋ paa weyi lɛ ɛ-waɖɛ.+ 15 Zeruyaa pɩyalʋ Yowaabʋ kaakɛnɩ sɔɔjanaa ñʋʋdʋ,+ Ahiluudɩ pɩyalʋ Yozafaatɩ+ ñaakɛ tɔm ndʋ tɩlakɩ yɔ tɩ-mayʋ, 16 Ahitub pɩyalʋ Sadɔɔkɩ nɛ Abiyaataarɩ pɩyalʋ Ahimelɛɛkɩ paakɛ cɔjɔnaa, nɛ Savɩsa ñaakɛ takayaɣ taa mayʋ. 17 Yehoyiyada pɩyalʋ Benayaa kaakɛ Kereti mba+ nɛ Peleti mba+ pa-ñʋʋdʋ. Nɛ wiyaʋ wayɩ lɛ, Daviid pɩyalaa kaakɛnɩ ñʋndɩnaa sɔsaa.