Kroniiki takayaɣ kajalaɣ ñɩŋga
13 Daviid pɔzɩ lɔŋ tasʋʋ kudokiŋ ñʋndɩnaa nɛ mɩnɩŋ ñʋndɩnaa nɛ paa ñʋʋdʋ weyi.+ 2 Nɛ Daviid heyi Izrayɛɛlɩ samaɣ kpeekpe se: «Ye pɩkɛdɩnɩ-mɩ, nɛ ye pɩwɛ ɖeu ɖɛ-Ɛsɔ Yehowa ɛsɩndaa yɔ, iyele nɛ ɖitiyini tɔm ɖo-koobiya mba pakazɩ Izrayɛɛlɩ ageeta kpeekpe taa yɔ, nɛ cɔjɔnaa nɛ Leevi mba ɖɔɖɔ pɛ-tɛtʋ ndɩ ndɩ+ ndʋ tɩ-taa pɛwɛnɩ lona wena a-taa kpɩna tɔkɩ ñɩtʋ yɔ, nɛ pɔkɔɔ nɛ pɛkpɛndɩ ɖɔ-yɔɔ. 3 Nɛ iyele nɛ ɖɩpɩsɩnɩ ɖɛ-Ɛsɔ Aɖakaɣ.»+ Mbʋ pʋyɔɔ yɔ pataacɔnɩ kɔ-yɔɔ Sɔɔlɩ alɩwaatʋ taa.+ 4 Samaɣ kpeekpe tisi se kalakɩ mbʋ, mbʋ pʋyɔɔ yɔ tɔm ndʋ, tɩɩwɛ ɖeu kɛ-ɛsɩndaa. 5 Nɛ Daviid kpeɣli Izrayɛɛlɩ samaɣ kpeekpe, kpaɣnɩ Ejipiti pɔɔ* nɛ piwolo pɩtalɩ ɖooo Lebo-Hamatɩ,*+ se pakpaɣ Ɛsɔ toovenim tʋ Aɖakaɣ Kiriyatɩ-Yeyarim nɛ pɔkɔna.+
6 Nɛ Daviid nɛ Izrayɛɛlɩ kpeekpe pakpa Baala,+ Kiriyatɩ-Yeyarim, ŋgʋ kɩwɛ Yuuda taa yɔ kɩ-taa, se pakpaɣ Ɛsɔ toovenim tʋ Yehowa Aɖakaɣ peeɖe nɛ pakpana, ɛnʋ weyi ɛcaɣ e-kewiyaɣ kpelaɣ taa kerebimwaa ñʋʋ yɔɔ,*+ ɖenɖe payaɣ ɛ-hɩɖɛ yɔ. 7 Ɛlɛ, paasɩ Ɛsɔ toovenim tʋ Aɖakaɣ kɛɛkɛɛ kɩfalʋʋ yɔɔ+ nɛ pakpaɣ-kɛ nɛ Abinadaabɩ ɖɩɣa taa nɛ pɛɖɛɣna, nɛ Uuza nɛ Ahiyo peɖiyaɣni naŋ weyi ɩhɔŋaɣ kɛɛkɛɛ ŋgʋ yɔ.+ 8 Daviid nɛ Izrayɛɛlɩ kpeekpe paawɛɛ nɛ palakɩ kazandʋ Ɛsɔ toovenim tʋ ɛsɩndaa nɛ po-ɖoŋ kpeekpe, nɛ peteɣ hendu, pamakɩ cɩmɩŋ, cɩmʋʋ wondu lɛɛtʋ ndʋ tɩ-yɔɔ wɛ nimasɩ yɔ, nesi tɛɛ soo,*+ ŋgbamɛɛ+ nɛ aganda.+ 9 Ɛlɛ pɔkɔm nɛ patalɩ Kidooni tɔɔnaɣ ɖɩmaɖɛ lɛ, Uuza sezi e-nesi nɛ ɛɖɔkɩ Aɖakaɣ, mbʋ pʋyɔɔ yɔ naŋ weyi ɩɩwɛɛ nɛ ɩhɔŋ kɛɛkɛɛ ŋgʋ yɔ, ɩlaba nɛ Aɖakaɣ caɣaɣ tɔlʋʋ. 10 Peeɖe Yehowa taa wɩnɩ Uuza siŋŋ, nɛ ɛkʋ-ɩ mbʋ pʋyɔɔ yɔ esezi e-nesi nɛ ɛɖɔkɩ Aɖakaɣ.+ Uuza sɩbɩ peeɖe, Ɛsɔ ɛsɩndaa.+ 11 Ɛlɛ Daviid kɔ pana,* mbʋ pʋyɔɔ yɔ Yehowa pana tibi Uuza yɔɔ; nɛ payaa lone nɖɩ se Perɛɛzɩ-Uuza* halɩ nɛ sɔnɔ.
12 Pʋyɔɔ Daviid paɣzɩ seu sɔɔndʋ Ɛsɔ toovenim tʋ kɩyakʋ ŋgʋ ki-wiye nɛ ɛtɔ se: «Ɛzɩma manpɩzɩɣ nɛ mɔnkɔnɩ Ɛsɔ toovenim tʋ Aɖakaɣ mɔn-cɔlɔ?»+ 13 Daviid tiwoni Aɖakaɣ Daviid Tɛtʋ taa ɖenɖe ɛɛwɛɛ yɔ, ɛlɛ eyeba nɛ powoni-kɛ Gaatɩ tʋ Obɛɛdɩ-Edom ɖɩɣa taa. 14 Ɛsɔ toovenim tʋ Aɖakaɣ kaawɛ Obɛɛdɩ-Edom ɖɩɣa taa mba cɔlɔ, nɛ kacaɣ ɛ-ɖɩɣa taa fenasɩ 3, nɛ Yehowa wɛɛ nɛ ɛwazɩɣ Obɛɛdɩ-Edom ɖɩɣa taa mba nɛ mbʋ payɩ ɛɛwɛna yɔ.+