Ezekɩyɛɛlɩ
13 Nɛ Yehowa tɔm tasɩ-m talʋʋ se: 2 «Ɛyʋ pɩyalʋ, yɔɔdɩ natʋ tɔm Izrayɛɛlɩ nayaa yɔɔ,+ nɛ ŋheyi mba poluki pa-maɣmaɣ pa-natʋ tɔm yɔ* se:+ “Ɩnɩɩ Yehowa tɔm. 3 Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Pɩtɔɔ nayaa kɩmɛlɛmɩŋ, mba patɩŋɩɣ pa-maɣmaɣ pa-lɩmaɣza,* ŋgʋ patɩna nabʋyʋ yɔ!+ 4 Oo Izrayɛɛlɩ, ña-nayaa pɩsɩ ɛzɩ sɔŋgɔlɔ hasɩ yɔ njaa taa. 5 Ɩɩkaɣ wobu pɛɛ kolonzi nzɩ sɩyɔkaa yɔ si-lona taa se ɩɖaɣnɩ-sɩ maʋ nɛ sɩkandɩyɩ Izrayɛɛlɩ ɖɩɣa yɔɔ,+ se pɩsa nɛ Izrayɛɛlɩ pɩzɩ nɛ kɩsɩŋ you taa Yehowa kɩyakʋ wiye.’+ 6 ‘Pana cɛtɩm natʋ nɛ pɔyɔɔdɩ cɛtɩm tɔm natʋyʋ se tɩkaɣ labʋ, mba pɛwɛɛ nɛ pɔyɔɔdʋʋ se: “Yehowa tɔm kɔyɔ,” ŋgʋ Yehowa ñetitiyi-wɛ yɔ; nɛ paɖaŋaa se pɔ-tɔm ɛla.+ 7 Ɛzɩ pɩtɩkɛ cɛtɩm natʋ ɩnawa nɛ pɩtɩkɛ cɛtɩm tɔm natʋyʋ ɩyɔɔdaa se tɩkaɣ labʋ alɩwaatʋ ndʋ ɩyɔɔdʋʋ se: “Yehowa tɔm yɔ,” ŋgʋ mantɩyɔɔdɩ natʋyʋ yɔ?’”
8 «“Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘“Ɩyɔɔdɩ cɛtɩm tɔm nɛ mɩ-natʋ kɛ cɛtɩm natʋ, pʋyɔɔ lɛ mankʋyʋʋ mɩ-yɔɔ,” Kɩbaɣlʋ Kɩlɩm Yehowa yɔɔdʋʋna.’+ 9 Mankaɣ kpazʋʋ me-nesi nayaa mba pa-natʋ kɛ cɛtɩm natʋ nɛ pɔyɔɔdʋʋ cɛtɩm tɔm natʋyʋ se tɩkaɣ labʋ yɔ pɔ-yɔɔ.+ Paakaɣ wɛʋ ɛyaa mba meheyiɣ-wɛ man-taa tɔm yɔ pa-taa; nɛ paakaɣ pa-hɩla maʋ ɖɔɖɔ Izrayɛɛlɩ ɖɩɣa takayaɣ taa; nɛ paakaɣ pɩsʋʋ ɖɔɖɔ Izrayɛɛlɩ ɛjaɖɛ taa; nɛ toovenim taa lɛ ɩkaɣ tɩlʋʋ se ma lɛ Kɩbaɣlʋ Kɩlɩm Yehowa.+ 10 Pɩtɩŋa payɩ mbʋ yɔ, pɩkaɣ labʋ mbʋ pʋyɔɔ yɔ pelesi man-samaɣ alɩwaatʋ ndʋ pɔyɔɔdaa se: ‘Laŋhɛzɩyɛ wɛɛ!’ ŋgʋ laŋhɛzɩyɛ naɖɩyɛ fɛyɩ yɔ.+ Pamaɣ koloŋa ŋga kɛfɛyɩ ɖoŋ yɔ lɛ, paba ñataɣ-kɛ akalʋʋ.”*+
11 «Heyi mba pataɣ-kɛ akalʋʋ yɔ se kakaɣ tɔlʋʋ. Tɛʋ sɔsɔʋ nakʋyʋ kaɣ nɩʋ, ɖɔmbɛɛ* kaɣ tɔlʋʋ, nɛ helim sɔsɔm nabʋyʋ kaɣ-kɛ yɔkʋʋ.+ 12 Nɛ alɩwaatʋ ndʋ koloŋa ŋga kɔtɔlʋʋ yɔ pakaɣ-mɩ pɔzʋʋ se: “Le tɔlɩm mbʋ ɩtawa yɔ pɩwɛɛ?”+
13 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mankaɣ yebu nɛ helim sɔsɔm ma nɛ tɛʋ sɔsɔʋ nakʋyʋ nɩɩ mbʋ pʋyɔɔ yɔ mɔnkɔ pana. Nɛ mankaɣ tiyinuu ɖɔmbɛɛ nɛ ayɔkɩ-kɛ mbʋ pʋyɔɔ yɔ mɔnkɔ pana siŋŋ. 14 Mankaɣ yɔkʋʋ koloŋa ŋga ɩta-kɛ akalʋʋ yɔ nɛ mentisi-kɛ tataa, nɛ pɩkaɣ kuluu ke-tigiɖe yɔɔ. Alɩwaatʋ ndʋ tɛtʋ tɔlʋʋ yɔ ɩkaɣ sɩbʋ tɩ-taa; nɛ toovenim taa lɛ ɩkaɣ tɩlʋʋ se ma lɛ Yehowa.”
15 «“Alɩwaatʋ ndʋ manpɩyɩɣ man-pana tɩŋa koloŋa nɛ mba pata-kɛ akalʋʋ yɔ pɔ-yɔɔ yɔ, mankaɣ-mɩ heyuu se: ‘Koloŋa tɩtasɩ wɛʋ, nɛ mba pataɣ-kɛ akalʋʋ yɔ patɩtasɩ wɛʋ ɖɔɖɔ.+ 16 Izrayɛɛlɩ nayaa tɩtasɩ wɛʋ, mba panaɣaɣ natʋ tɔm nɛ peheyiɣ Yeruzalɛm nɛ panaɣ laŋhɛzɩyɛ natʋ nɛ peheyiɣ-kʋ, ŋgʋ laŋhɛzɩyɛ naɖɩyɛ fɛyɩ yɔ,’”+ Kɩbaɣlʋ Kɩlɩm Yehowa yɔɔdʋʋna.
17 «Piyele nɛ ña yɔ, ɛyʋ pɩyalʋ, pa ñɛ-ɛsa nɛ ña-samaɣ pɛlaa mba poluki pa-maɣmaɣ pa-natʋ tɔm yɔ, nɛ ŋyɔɔdɩ natʋ tɔm pɔ-yɔɔ. 18 Heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Pɩtɔɔ halaa mba pɛkpɛndaa nɛ pɛñɛyɩɣ kɩtamɩŋ nɩŋgbɛɛnzɩ* tɩŋa yɔɔ nɛ palakɩ ñʋŋ kɛdɛɛkasɩ nzɩ sɩ-paɣlɩka wɛ ndɩ ndɩ se pɩsa nɛ pakpa ɛyaa weziŋ* kpaca taa yɔ! Ɩwɛɛ nɛ ɩkpaɣ man-samaɣ weziŋ* kpaca taa nɛ ɩñakɩ pana se ɩya mɩ-maɣmaɣ mi-weziŋ* ñʋʋ na? 19 Orjɩ nikpiɖe tɛɛ nɛ kpɔnɔ hɔɔlasɩ yɔɔ lɛ, ɩkaɣ-m pisuu man-samaɣ taa,+ nɛ ɩkʋʋ mba* pɩtɩpɔzɩ se pasɩ yɔ nɛ iyeki mba* pɩtɩpɔzɩ se pɛwɛɛ wezuu yɔ nɛ pɛ-ɛsa na? Ɩtɩŋɩɣnɩ mɩ-cɛtɩm tɔm ndʋ iheyiɣ man-samaɣ nɛ kewelisiɣni-mɩ yɔ tɩ-yɔɔ nɛ ɩlakɩ mbʋ.’”+
20 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Oo halaa, manpaɖɩɣ mɩ-kɩtamɩŋ, weyi ɩlakɩnɩ tʋmɩyɛ se ɩkpa ɛyaa* ɛzɩ sumasɩ yɔ, nɛ mankaɣ-ɩ cɛbʋ mɩ-nɩŋgbɛɛnzɩ yɔɔ, nɛ mba ɩwɛɛ nɛ ɩtaŋ-wɛ se ɩkpa-wɛ kpaca taa ɛzɩ sumasɩ yɔ, moholi-wɛ. 21 Mankaɣ cɩyʋʋ mɩ-kɛdɛɛkasɩ nɛ moholi man-samaɣ mi-nesi tɛɛ, nɛ paatasɩɣ kɛʋ mbʋ ɩtaŋ se ɩkpa yɔ; nɛ toovenim taa lɛ ɩkaɣ tɩlʋʋ se ma lɛ Yehowa.+ 22 Mbʋ pʋyɔɔ yɔ, ɩtɩŋnɩ mɩ-cɛtɩm tɔm yɔɔ nɛ iyele nɛ pitii ɛyʋ siɣsiɣ tʋ yɔɔɔ+ alɩwaatʋ ndʋ mantaala nɛ ɛwɛɛ laŋwɛɛkɩyɛ* taa yɔ, nɛ ɩkpazɩ kañatʋ tʋ nesi ɖoŋ,+ pʋyɔɔ eeyeki ɛ-nʋmɔʋ kɩdɛkɛdʋʋ se ɛwɛɛ wezuu.+ 23 Pʋyɔɔ lɛ, halaa mɩ, ɩɩkaɣ tasʋʋ naʋ cɛtɩm natʋ nɛ ɩɩkaɣ tasʋʋ labʋ tɩyɩtʋ lakasɩ;+ nɛ mankaɣ holuu man-samaɣ mi-nesi tɛɛ, nɛ toovenim taa lɛ ɩkaɣ tɩlʋʋ se ma lɛ Yehowa.”»