Ejipiti Lɩʋ
27 «Ŋkaɣ kpaɣʋ akasɩya ɖaŋ nɛ ŋlabɩnɩ altaaru;+ kɩ-ɖaɣlɩkɩŋ kaɣ kɛʋ nuŋgolonzi* 5 nɛ kɩ-walanzɩ kɛ nuŋgolonzi 5. Pɩwɛɛ se altaaru hɔɔlɩŋ 4 tɩŋa ɩwɛɛ kɩmaŋ nɛ kɩ-kʋkʋyɩŋ kɛ nuŋgolonzi naadozo.+ 2 Ŋkaɣ labʋ hɩŋ+ kɩ-kɔnanaa 4 taa; hɩŋ ɛnɩ ɩkaɣ kɛʋ altaaru hɔɔlʋʋ nakʋyʋ, nɛ ŋkaɣ kpaɣʋ ñɩɣyʋʋ kɩsɛɛmʋʋ nɛ ŋpɔ altaaru ŋgʋ kɩ-yɔɔ.+ 3 Ŋkaɣ labʋ tɔkasɩ nɛ pokuuni kɩ-yɔɔ tɔlɩma,* pɩkpɛndɩnɩ pɛɛlɩnaa, ñanzɩ, kela lɔɔyɩsɩ nɛ miŋ ñanzɩ; ñɩɣyʋʋ kɩsɛɛmʋʋ+ ŋkaɣ kpaɣʋ nɛ ŋlabɩnɩ ki-wondu ndʋ tɩ-tɩŋa. 4 Ŋkaɣ labʋ altaaru ŋgʋ giriyaazɩ, pɩkɛ ñɩɣyʋʋ kɩsɛɛmʋʋ giriyaazɩ, nɛ ŋkpaɣ ñɩɣyʋʋ kɩsɛɛmʋʋ nɛ ŋla kokoo 4 giriyaazɩ ŋgʋ kɩ-kɔnanaa 4 taa. 5 Ŋkaɣ giriyaazɩ ŋgʋ ɖʋʋ altaaru kpɛnzɩ tɛɛ, nɛ kɩkaɣ wɛʋ altaaru ŋgʋ kɩ-hɛkʋ taa kiŋ. 6 Ŋkaɣ akasɩya ɖaŋ labʋ altaaru ŋgʋ nɛ ŋpɔ ɩ-yɔɔ ñɩɣyʋʋ kɩsɛɛmʋʋ. 7 Pakaɣ ɖaŋ ɛnɩ sʋzʋʋ kokoo taa se pɩsa nɛ ɖaŋ ɛnɩ ɩwɛɛ altaaru hɔɔlɩŋ 2 yɔɔ alɩwaatʋ ndʋ pakpakɩɣ-kʋ yɔ.+ 8 Ŋkaɣ kpaɣʋ kpoŋgbolonaa nɛ ŋlabɩnɩ altaaru ŋgʋ nɛ kɩwɛɛ ɛzɩ aɖakaɣ ŋga kɛwɛ haaa yɔ. Pɩwɛɛ se ŋlabɩ-kʋ ɖeyi ɖeyi ɛzɩ pawɩlʋʋ-ŋ kʋ pʋʋ yɔɔ yɔ.+
9 «Ŋkaɣ Ɛsɔ sɛtʋ kɩɖanɖʋʋ ŋgʋ labʋ kadaɣ.+ Hadɛ kiŋ, pʋ-tɔbʋʋ se hɔɔlʋʋ ŋgʋ kɩha ɛsa nɛ hadɛ kiŋ yɔ, ŋkaɣ puzuu pɩsaŋ kikendiŋ weyi palabɩnɩ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ kadaɣ hɔɔlʋʋ ŋgʋ kɩ-yɔɔ, nɛ kɩ-ɖaɣlɩkɩŋ kaɣ kɛʋ nuŋgolonzi 100.+ 10 Kakaɣ wɛnʋʋ tilima 20 nɛ ɖɩdɩnɩyɛ lona 20 wena palabɩnɩ ñɩɣyʋʋ kɩsɛɛmʋʋ yɔ. Liidiye ñɩɣtʋ ŋkaɣ kpaɣʋ nɛ ŋlabɩnɩ tilima ana a-kokoo wena a-nɔsɩ howa yɔ nɛ mbʋ pataŋnɩ-yɛ yɔ.* 11 Pɩsaŋ kikendiŋ weyi popuzuu hayo kiŋ hɔɔlʋʋ yɔɔ yɔ, ɩ-ɖaɣlɩkɩŋ kaɣ kɛʋ ɖɔɖɔ nuŋgolonzi 100, nɛ ki-tilima 20 nɛ a-ɖɩdɩnɩyɛ lona 20 wena palabɩnɩ ñɩɣyʋʋ kɩsɛɛmʋʋ yɔ, pɩ nɛ liidiye ñɩɣtʋ kokoo wena a-nɔsɩ howa yɔ nɛ mbʋ pataŋnɩ-yɛ yɔ.* 12 Pakaɣ puzuu pɩsaŋ kikendiŋ wɩsɩ ɖɩɖʋyɛ taa hɔɔlʋʋ yɔɔ, kadaɣ walanzɩ yɔɔ, ɩ-ɖaɣlɩkɩŋ kaɣ kɛʋ nuŋgolonzi 50, pɩ nɛ tilima 10 nɛ ɖɩdɩnɩyɛ lona 10. 13 Kadaɣ hɔɔlʋʋ ŋgʋ kɩwɛnɩ wɩsɩ ɖɩlɩyɛ taa yɔ, pɩwɛɛ se kɩ-walanzɩ ɛkɛ nuŋgolonzi 50. 14 Pakaɣ puzuu pɩsaŋ kikendiŋ nuŋgolonzi 15 hɔɔlʋʋ kʋɖʋmʋʋ yɔɔ, pɩ nɛ tilima 3 nɛ ɖɩdɩnɩyɛ lona 3.+ 15 Nɛ hɔɔlʋʋ lɛɛkʋ yɔɔ lɛ, pakaɣ puzuu pɩsaŋ kikendiŋ nuŋgolonzi 15, pɩ nɛ tilima 3 nɛ ɖɩdɩnɩyɛ lona 3.
16 «Kadaɣ nɔnɔɔ kaɣ wɛnʋʋ pɩsaʋ kikenduu nakʋyʋ, nɛ kɩ-ɖaɣlɩkɩŋ kaɣ kɛʋ nuŋgolonzi 20; pɩwɛɛ se palabɩ-kʋ nɛ pɩsatʋ ndʋ tɩwɛ pʋlɔɔ yɔ, heŋ hʋndʋ kɩsɛɛmtʋ yuulee, pɩsatʋ kɩsɛɛmtʋ cɩɩɩ nɛ pɩsatʋ fɛlɛ fɛlɛ ñɩndʋ ndʋ pamɩlɩtɩ camɩyɛ yɔ, ndʋ pɛkpɛndaa nɛ palʋʋ yɔ,+ pɩ nɛ tilima naanza nɛ a-ɖɩdɩnɩyɛ lona naanza.+ 17 Tilima wena acɔ kadaɣ nɛ ata yɔ, a-tɩŋa akaɣ wɛnʋʋ liidiye ñɩɣtʋ kɩhɔkɩŋ nɛ liidiye ñɩɣtʋ kokoo wena a-nɔsɩ howa yɔ, ɛlɛ ñɩɣyʋʋ kɩsɛɛmʋʋ pakaɣ labɩnʋʋ a-ɖɩdɩnɩyɛ lona.+ 18 Kadaɣ ŋga ka-ɖaɣlɩkɩŋ kaɣ kɛʋ nuŋgolonzi 100,+ ka-walanzɩ ñɛkɛ nuŋgolonzi 50 nɛ ka-kʋkʋyɩŋ kɛ nuŋgolonzi 5. Palakɩ-kɛ nɛ pɩsaŋ fɛlɛ fɛlɛ ñɩŋ, nɛ pɩwɛɛ se kɛwɛɛnɩ ɖɩdɩnɩyɛ lona wena palabɩnɩ ñɩɣyʋʋ kɩsɛɛmʋʋ yɔ. 19 Wondu ndʋ payɩ palakɩnɩ tʋmɩyɛ Ɛsɔ sɛtʋ kɩɖanɖʋʋ tɛɛ yɔ, pɩkpɛndɩnɩ kizinziku kaŋgamasɩ nɛ kadaɣ kaŋgamasɩ tɩŋa, pɩwɛɛ se pɩkɛ mbʋ palabɩnɩ ñɩɣyʋʋ kɩsɛɛmʋʋ yɔ.+
20 «Pɩwɛɛ se ŋpɔzɩ Izrayɛɛlɩ mba se pɔkɔnɩ-ŋ oliivi num mbʋ pɩwɛ kele kele yɔ, mbʋ pɔsɔbɩ oliivi kɩsɔbʋ nɛ palɩzɩ-pʋ yɔ nɛ paɖʋnɩ kanɖʋnaa, se pɩsa nɛ kanɖʋnaa mba pɛwɛɛ mʋʋ yɔɔ tam.+ 21 Kediɣzaɣ kizinziku tɛɛ, pɩsaʋ kikenduu ŋgʋ kɩñɔtɩnɩ Aseɣɖe Lɩzʋʋ yɔ kɩ-ɛsɩndaa,+ Aarɔɔnɩ nɛ ɛ-pɩyalaa pakaɣ cɔnʋʋ kanɖʋnaa yɔɔ se pɛwɛɛ mʋʋ yɔɔ Yehowa ɛsɩndaa, kpaɣnɩ ɖanaɣ yɔɔ nɛ pɩkɔɔ pɩtalɩ tanaŋ tɛɛ.+ Pɩkɛ Izrayɛɛlɩ mba tamtam paɣtʋ ndʋ tɩ-yɔɔ pɩwɛɛ se pɔɖɔ pa-kpaɖɩŋ kpeekpe taa yɔ.+