Izaayii
39 Alɩwaatʋ ndʋ tɩ-taa, Babilɔɔnɩ wiyaʋ Berodakɩ-Baladaanɩ weyi ɛɛkɛ Baladaanɩ pɩyalʋ yɔ, etiyini Ezekiyaasɩ takayɩsɩ nɛ kʋjɔʋ nakʋyʋ,+ mbʋ pʋyɔɔ yɔ ɛɛnɩwa se pɩɩwɩ-ɩ nɛ ɛ-yɔɔ kɔɔ nɛ pɩcɛ.+ 2 Ezekiyaasɩ mʋ-wɛ nɛ taa leleŋ* nɛ ɛwɩlɩ-wɛ ɛ-ñɩm ɖɩzɩyɛ+—liidiye, sika, balɩsam num nɛ num lɛɛbʋ mbʋ pɩwɛ wazaɣ siŋŋ yɔ, e-you wondu kpeekpe, nɛ mbʋ payɩ pɩɩwɛ ɛ-ñɩm ɖɩzɩyɛ taa yɔ. Pɩtɩkazɩ nabʋyʋ se Ezekiyaasɩ tɩwɩlɩ-wɛ ɛ-maɣmaɣ ɛ-ɖɩɣa* taa nɛ lona wena payɩ a-yɔɔ ɛtɔkɩ kewiyitu yɔ a-taa.
3 Pʋwayɩ lɛ, nayʋ Izaayii sʋʋ Wiyaʋ Ezekiyaasɩ cɔlɔ nɛ ɛpɔzɩ-ɩ se: «Suwe abalaa mba pɔyɔɔdaa, nɛ le palɩnaa?» Nɛ Ezekiyaasɩ cosi se: «Palɩnɩ ɛjaɖɛ poliŋ ñɩnɖɛ naɖɩyɛ taa, Babilɔɔnɩ.»+ 4 Ɛtasɩ-ɩ pɔzʋʋ se: «Ɛbɛ pana ña-ɖɩɣa taa?» Ezekiyaasɩ cosi se: «Pana pɩtɩŋa payɩ man-ɖɩɣa* taa. Pɩtɩkazɩ nabʋyʋ ma-ñɩm ɖɩzɩyɛ taa se mantɩwɩlɩ-wɛ.»
5 Ðɩnɛ ɛlɛ Izaayii heyi Ezekiyaasɩ se: «Welisi tɔm ndʋ yoyaa tɛ Yehowa yɔɔdʋʋ yɔ: 6 “Na! Kɩyakɩŋ ɖiɣni kɔm, nɛ mbʋ payɩ pɩwɛ ña-ɖɩɣa* taa, nɛ mbʋ payɩ ñɔ-cɔzɔnaa tɔsaa nɛ pɩkɔɔ nɛ pɩtalɩnɩ sɔnɔ yɔ, pakaɣ-pʋ kpaɣʋ nɛ pɛɖɛnɩ Babilɔɔnɩ. Nabʋyʋ ɛɛkaɣ kazʋʋ,”+ Yehowa yɔɔdʋʋna.+ 7 “Nɛ pakaɣ kpaɣʋ ña-maɣmaɣ ña-pɩyalaa mba ŋkaɣ lʋlʋʋ yɔ pa-taa nabɛyɛ nɛ pɛɖɛna, nɛ pakaɣ pɩsʋʋ Babilɔɔnɩ wiyaʋ ɖɩɣa taa kaɖɩsɩ.”»+
8 Peeɖe Ezekiyaasɩ cosi Izaayii se: «Yehowa tɔm ndʋ ŋyɔɔdaa yɔ tɩwɛ ɖeu.» Nɛ ɛtasɩ yɔɔdʋʋ se: «Mbʋ pʋyɔɔ yɔ laŋhɛzɩyɛ nɛ ɖiɣ ɖiɣ caɣʋ* kaɣ wɛʋ me-wezuu caɣʋ alɩwaatʋ* taa.»+