NEHEMIYA

1 Hakaliya pɩyalʋ Nehemiya*+ tɔm yɔ: Pɩnaɣ 20 ñɩŋga taa, Kislev* fenaɣ taa lɛ, maawɛ Suuzaŋ,*+ wiyaʋ ɖɩɣa taa.* 2 Alɩwaatʋ ndʋ Ananii+ weyi ɛkɛ mon-koobiya taa lɛlʋ yɔ, ɛ nɛ abalaa lalaa palɩnɩ Yuuda nɛ pɔkɔɔ. Nɛ mɔnpɔzɩ-wɛ Yuuda ñɩma mba pakazaa nɛ palɩnɩ yomiye taa nɛ papɩsɩ yɔ pɔ-yɔɔ,+ nɛ mɔnpɔzɩ Yeruzalɛm yɔɔ ɖɔɖɔ. 3 Nɛ pocosi-m se: «Mba pakazɩ egeetiye* taa peeɖe yɔ, mba patʋlɩnɩ yomiye taa yɔ, wɛtʋ ndʋ tɩ-taa pɛwɛɛ yɔ tɩfɛyɩ ɖeu kpem nɛ pɛwɛ fɛyɛ taa.+ Yeruzalɛm kolonzi tɔlaa+ nɛ miŋ ñaɣ kɩ-nɔnɔsɩ.»+

4 Mantɩɩnɩ tɔm ndʋ lɛ, mentii mancaɣ nɛ manpaɣzɩ wiu nɛ mancaɣ kʋñɔwiye avema sakɩyɛ, nɛ mɛwɛɛ nɔɔ hɔkʋʋ+ yɔɔ nɛ mantɩmɩɣ ɛsɔdaa Ɛsɔ ɛsɩndaa. 5 Mantɩmaa se: «Hayɩ ɛsɔdaa Ɛsɔ, Yehowa, ña weyi ŋkɛ Ɛsɔ sɔsɔ nɛ ŋcaɣ sɔɔndʋ yɔ, weyi ɛɖɔkʋʋ ɛ-ɛgbɛyɛ nɛ ɛwɩlɩɣ sɔɔlɩm siɣsiɣ ñɩmbʋ mba pɔsɔɔlɩ-ɩ nɛ pɔɖɔŋ ɛ-paɣtʋ yɔɔ yɔ,+ 6 mentendi-ŋ, kʋ ña-nɩŋgbaŋʋʋ nɛ ŋkuli ñɛ-ɛsa nɛ ŋwelisi ña-lɩmɖʋyʋ adɩma wena mantɩmɩɣnɩ-ŋ sɔnɔ yɔ, adɩma wena malakɩ-ŋ wɩsɩ nɛ ɖoo+ ña-lɩmɖʋyaa Izrayɛɛlɩ piya yɔɔ yɔ, alɩwaatʋ ndʋ payɩ monkuluu kɩwɛɛkɩm mbʋ Izrayɛɛlɩ samaɣ labɩ-ŋ yɔ pɩ-yɔɔ yɔ. Ma nɛ man-caa ɖɩɣa ɖɩlabɩ kɩwɛɛkɩm.+ 7 Toovenim taa lɛ, ɖɩlabɩ tɛtɛ lakasɩ ñɛ-ɛsɩndaa+ mbʋ pʋyɔɔ yɔ ɖɩtɩɖɔ paɣtʋ, ɖʋtʋ nɛ tɔm hʋʋ paɣtʋ ndʋ ŋcɛlɩ ña-lɩmɖʋyʋ Moyizi yɔ tɩ-yɔɔ.+

8 «Mentendi-ŋ, tɔzɩ tɔm ndʋ ŋŋheyi* ña-lɩmɖʋyʋ Moyizi yɔ tɩ-yɔɔ: “Ye ɩlabɩ lakasɩ nzɩ sɩfɛyɩ siɣsiɣ yɔ yɔ, mankaɣ-mɩ mɩzʋʋ samasɩ hɛkʋ taa.+ 9 Ɛlɛ ye ɩpɩsɩnɩ mɔ-yɔɔ nɛ ɩɖɔ man-paɣtʋ yɔɔ nɛ ɩñam-tʋ yɔ, paa mɩ-samaɣ ŋga kamɩzaa yɔ, kɛwɛ ɛsɔdaa kamaɣ yɔɔ yɔ, mankaɣ-kɛ kpeɣluu+ nɛ peeɖe nɛ mɔnkɔnɩ-kɛ lone nɖɩ ɖɩ-taa malɩzaa se ma-hɩɖɛ ɛwɛɛ yɔ ɖɩ-taa.”+ 10 Pɛkɛ ña-lɩmɖʋyaa, ña-samaɣ ŋga ŋyabɩ ka-ñʋʋ nɛ ño-ɖoŋ sɔsɔŋ nɛ ñe-nesi ɖoŋ ñɩnzɩ yɔ.+ 11 Hayɩ Yehowa, mentendi-ŋ, welisi ña-lɩmɖʋyʋ adɩma nɛ adɩma wena ña-lɩmɖʋyaa mba peseɣ ña-hɩɖɛ sɔɔndʋ nɛ taa leleŋ yɔ palakɩ-ŋ yɔ; mentendi-ŋ, yele nɛ pɩɖɔmnɩ ña-lɩmɖʋyʋ camɩyɛ sɔnɔ, tɛtɛ nɛ ŋyele nɛ abalʋ ɛnɛ yɔ ɛna man-pʋtɔdɩyɛ.»+

Maakɛ wiyaʋ sʋlʋm cɛɖʋ.+

2 Nisaŋ* fenaɣ taa, Wiyaʋ Artaazɛɛrɩzɛɛsɩ+ pɩnaɣ 20 ñɩŋga taa,+ paasɩ vɛɛ ɛ-ɛsɩndaa, nɛ mankpaɣ vɛɛ nɛ mɛncɛlɩ wiyaʋ ɛzɩ mantɩɩlakʋʋ yɔ.+ Ɛlɛ wiɖiyi ɛtaana mɛ-ɛsɩndaa ñɩŋaa. 2 Pʋyɔɔ wiyaʋ pɔzɩ-m se: «Ɛbɛ yɔɔ ñɛ-ɛsɩndaa ñɩŋ kpem mbʋ, ŋgʋ pɩɩwɩɣ-ŋ? Pɩɩpɩzɩɣ nɛ pɩkɛ nabʋyʋ yem nɛ pɩtɩkɛ laŋwɛɛkɩyɛ.» Peeɖe sɔɔndʋ kpa-m kpem.

3 Nɛ meheyi wiyaʋ se: «Wiyaʋ wezuu ɛɖaɣlɩ! Mɛ-ɛsɩndaa ɛɛñɩŋɩɣ suwe? Tɛtʋ ndʋ tɩ-taa pepim mɔn-cɔzɔnaa yɔ, tɩpɩsɩ njɛyɛ, nɛ miŋ ñaɣ tɩ-nɔnɔsɩ.»+ 4 Peeɖe wiyaʋ pɔzɩ-m se: «Ɛbɛ ŋsɔɔlaa yɔ?» Kpaagbaa mbʋ lɛ, mantɩmnɩ ɛsɔdaa Ɛsɔ.+ 5 Nɛ moncosi wiyaʋ se: «Ye pɩkɛdɩnɩ wiyaʋ nɛ ye ŋna ña-lɩmɖʋyʋ pʋtɔdɩyɛ yɔ, tiyi-m Yuuda, tɛtʋ ndʋ tɩ-taa pepim mɔn-cɔzɔnaa yɔ nɛ manɖaɣnɩ-tʋ maʋ.»+ 6 Ðɩnɛ ɛlɛ wiyaʋ, weyi abiɖe* kaacaɣ ɛ-cɔlɔ kpam yɔ, ɛpɔzɩ-m se: «Alɩwaatʋ ɛzɩma ña-nʋmɔʋ ɖɔm kpakɩɣ, nɛ ɛzɩmtaa ŋkaɣ pɩsʋʋ?» Nɛ pɩkɛdɩnɩ wiyaʋ se eyebi-m nɛ mɛnɖɛɛ,+ nɛ meheyi-i alɩwaatʋ ɛzɩma pɩkpakɩɣ yɔ.+

7 Nɛ meheyi wiyaʋ se: «Ye pɩkɛdɩnɩ wiyaʋ yɔ, ɛha nʋmɔʋ nɛ pɛcɛlɩ-m takayɩsɩ nɛ maacɛlɩ-sɩ egeetiye nɖɩ ɖɩwɛ Pɔɔ nɛ Wayɩ*+ yɔ ɖɩ-ñʋndɩnaa, nɛ pɩsa nɛ peyebi-m nɛ mɛnɖɛɛ nɛ mantalɩ Yuuda laŋhɛzɩyɛ taa, 8 nɛ ɛha nʋmɔʋ nɛ pɛcɛlɩ-m ɖɔɖɔ takayaɣ nɛ mɛncɛlɩ Wiyaʋ Kaɖaɣ* yɔɔ cɔnɩyʋ Azaafʋ, nɛ ɛlɛ ha-m tɩŋ nɛ pasaɣnɩ Sɔɔjanaa Ðɩɣa+ ŋga kɛwɛ Templo* cɔlɔ yɔ kɔ-nɔnɔsɩ, nɛ pamanɩ ɖɔɖɔ tɛtʋ kolonzi+ nɛ ɖɩɣa ŋga ka-taa mowoki yɔ.» Nɛ wiyaʋ cɛlɩ-m sɩ,+ mbʋ pʋyɔɔ yɔ mɛ-Ɛsɔ nesi kɩbanzɩ kaawɛ mɔ-yɔɔ.+

9 Pʋwayɩ lɛ, mantalɩ egeetiye nɖɩ ɖɩwɛ Pɔɔ nɛ Wayɩ yɔ ɖɩ-ñʋndɩnaa cɔlɔ nɛ mɛncɛlɩ-wɛ wiyaʋ takayɩsɩ. Wiyaʋ kaayeba ɖɔɖɔ nɛ sɔɔjanaa ñʋndɩnaa nɛ kpaŋnaŋ yɔɔ caɣyaa tɩŋɩ-m. 10 Alɩwaatʋ ndʋ Horonɩ tʋ Sanɩbalaatɩ+ nɛ Amooni tʋ+ Tobiya+ weyi ɛkɛ kaɖɩka* yɔ panɩ-tʋ lɛ, pɩwɩzɩ-wɛ kpem se nɔɔyʋ kɔma se ɛla kɩbandʋ Izrayɛɛlɩ samaɣ.

11 Nɛ pɩtɛmna se mantalɩ Yeruzalɛm, nɛ mancaɣ peeɖe kɩyakɩŋ naadozo. 12 Mankʋyɩ ɖoo taa, ma nɛ abalaa nabɛyɛ pazɩ, mantiheyi nɔɔyʋ mbʋ mɛ-Ɛsɔ ɖʋ ma-laŋɩyɛ taa se mala Yeruzalɛm yɔ, nɛ kpɩnɛ naɖɩyɛ taawɛɛ mɔn-cɔlɔ nɛ pɩtasɩnɩ nɖɩ ɖɩ-yɔɔ maacaɣaa yɔ. 13 Nɛ mantɩŋnɩ Fɛɛʋ Nɔnɔɔ+ nɛ malɩɩ ɖoo taa, nɛ mantɩŋ Ðʋm Sɔsɔ Hiɖe ɛsɩndaa nɛ mowolo Tɔlɩma Huwa Nɔnɔɔ+ cɔlɔ, nɛ mɔncɔnɩ Yeruzalɛm kolonzi nzɩ sɩɖaba yɔ nɛ kɩ-nɔnɔsɩ nzɩ miŋ ñaɣaa yɔ.+ 14 Nɛ mantalɩ Hiɖe Nɔnɔɔ+ cɔlɔ nɛ Wiyaʋ Lɩŋgamʋʋ cɔlɔ, ɛlɛ nʋmɔʋ taawalɩ se kpɩnɛ nɖɩ ɖɩ-yɔɔ mancaɣaa yɔ ɖɩpɩzɩ nɛ ɖɩtɩŋ. 15 Ɛlɛ mɛwɛɛ ma-nʋmɔʋ ɖɔm yɔɔ fɛɛʋ+ taa ɖoo taa, kpaʋ yɔɔ, nɛ mɛwɛɛ nɛ mɔncɔŋnɩ koloŋa, pʋwayɩ lɛ menkiti nɛ mansʋʋnɩ Fɛɛʋ Nɔnɔɔ nɛ manpɩsɩ.

16 Kaɖɩsɩ+ taatɩlɩ ɖenɖe maawoba yɔ, nɛ pataatɩlɩ ɖɔɖɔ mbʋ malakaɣ yɔ, mbʋ pʋyɔɔ yɔ mantaaheyiti natʋyʋ Yuuda mba, cɔjɔnaa, sɔsaa, kaɖɩsɩ nɛ tʋmlaɖaa lalaa. 17 Pʋwayɩ lɛ, meheyi-wɛ se: «Ɩnaɣ kaɖɛ wɛtʋ ndʋ tɩ-taa ɖɩwɛɛ yɔ, ɛzɩma Yeruzalɛm pɩsɩ njɛyɛ nɛ miŋ ñaɣ kɩ-nɔnɔsɩ yɔ. Ɩkɔɔ nɛ ɖɩɖaɣnɩ maʋ Yeruzalɛm kolonzi, nɛ piyele nɛ fɛyɛ ɖɩnɛ ɖɩsɩɩ tɩnaɣ.» 18 Pʋwayɩ lɛ, mɛnkɛdɩ-wɛ ɛzɩma mɛ-Ɛsɔ nesi kɩbanzɩ kaawɛ mɔ-yɔɔ+ yɔ pɩ-tɔm, nɛ mɛnkɛdɩ-wɛ ɖɔɖɔ tɔm ndʋ wiyaʋ kaaheyi-m yɔ.+ Peeɖe pɔyɔɔdaa se: «Ðɩkʋyɩ nɛ ɖɩma.» Nɛ pakpazɩ pa-tɩ* ɖoŋ se pala tʋmɩyɛ kɩbanɖɛ nɖɩ.+

19 Ɛlɛ Horonɩ tʋ Sanɩbalaatɩ, Amooni tʋ+ Tobiya+ weyi ɛkɛ kaɖɩka* yɔ nɛ Arabii tʋ Gesɛɛm+ panɩ-tʋ lɛ, papaɣzɩ-ɖʋ woŋuu+ nɛ peniŋ-ɖʋ nɛ pɔtɔŋ se: «Ɛbɛ ɩlakɩ mbʋ yɔ? Ɩcaɣ se ɩkaɖɩnɩ wiyaʋ?»+ 20 Ɛlɛ moncosi-wɛ se: «Ɛsɔdaa Ɛsɔ kaɣnɩ yebu nɛ pɩɖɔmnɩ-ɖʋ camɩyɛ;+ nɛ ɖa mba ɖɩkɛ ɛ-lɩmɖʋyaa yɔ, ɖɩkaɣ kʋyʋʋ nɛ ɖɩma; ɛlɛ mɩ lɛ, ɩfɛyɩnɩ ɖeɖe naɖɩyɛ yaa nɔɔ nakɛyɛ nɛ ɩtɩla nabʋyʋ se pɔtɔzʋʋnɩ mɩ-yɔɔ Yeruzalɛm taa.»+

3 Cɔjɔ kɩlɩm Eliyasiib+ nɛ e-koobiya mba pɛkɛ cɔjɔnaa yɔ, pakʋyɩ nɛ papaɣzɩ maʋ Heŋ Nɔnɔɔ.+ Papɩsɩ-kɛ kele kele+ nɛ paɖʋ kɔ-pɔɔyɩŋ; papɩsɩ-kɛ kele kele nɛ pɩkɔɔ pɩtalɩ Meya Tilimiye,+ nɛ pɩkɔɔ pɩtalɩ ɖɔɖɔ ɖooo Hananɛlɩ Tilimiye.+ 2 Nɛ pɔ-cɔlɔ lɛ, Yeriikoo abalaa+ kaawɛɛ nɛ pamaɣ; nɛ paba cɔlɔ lɛ, Imirii pɩyalʋ Zakuurɩ ñaawɛɛ nɛ ɛmaɣ.

3 Hasenaa pɩyalaa ma Kpakpasɩ Nɔnɔɔ;+ pesiɣ ko-kpoŋgbolonaa mba pɔ-yɔɔ paɖʋʋ pɔɔyɩŋ yɔ,+ nɛ pʋwayɩ lɛ paɖʋ kɔ-pɔɔyɩŋ, ka-kɩkaɖɩŋ nɛ ka-ɖaŋ sɔsɔŋ. 4 Nɛ pɔ-cɔlɔ lɛ, Hakɔɔzɩ pɩyalʋ Uriyaa pɩyalʋ Meremɔɔtɩ+ labɩ koloŋa ñɔɔzʋʋ tʋmɩyɛ, nɛ ɛlɛ cɔlɔ lɛ, Mesezabɛɛlɩ pɩyalʋ Berekiya pɩyalʋ Mesulam+ labɩ ñɔɔzʋʋ tʋmɩyɛ, nɛ ɛlɛ cɔlɔ lɛ, Baana pɩyalʋ Sadɔɔkɩ labɩ ñɔɔzʋʋ tʋmɩyɛ. 5 Ɛ-cɔlɔ lɛ, Tekowa mba+ labɩ ñɔɔzʋʋ tʋmɩyɛ, ɛlɛ pɛ-tɛ abalaa mba pa-hɩla kaasɛwa yɔ, patiluzi pa-tɩ* se paɖʋ nesi pa-kɩbaɣlaa tʋmɩyɛ.

6 Paseya pɩyalʋ Yoyiyadaa nɛ Besodiya pɩyalʋ Mesulam pɔñɔɔzɩ Tɛtʋ Kɩbɩndʋ Nɔnɔɔ;+ pesiɣ ko-kpoŋgbolonaa mba pɔ-yɔɔ paɖʋʋ pɔɔyɩŋ yɔ, nɛ pʋwayɩ lɛ paɖʋ kɔ-pɔɔyɩŋ, ka-kɩkaɖɩŋ nɛ ka-ɖaŋ sɔsɔŋ. 7 Pɔ-cɔlɔ lɛ, Gabawɔɔ tʋ+ Melaatiya nɛ Meronɔɔtɩ tʋ Yadoni palabɩ ñɔɔzʋʋ tʋmɩyɛ, paakɛ Gabawɔɔ nɛ Mizpaa+ abalaa mba paawɛ egeetiye nɖɩ ɖɩwɛ Pɔɔ nɛ Wayɩ*+ yɔ ɖɩ-ñʋʋdʋ ɖoŋ tɛɛ yɔ.* 8 Pɔ-cɔlɔ lɛ, Uziyɛɛlɩ, Harayiya pɩyalʋ, sika wondu luɖaa taa lɛlʋ, labɩ ñɔɔzʋʋ tʋmɩyɛ, ɛlɛ cɔlɔ lɛ, Anaanɩya weyi ɛkɛ sɔzɩŋ num laɖaa* taa lɛlʋ yɔ, ɛla ñɔɔzʋʋ tʋmɩyɛ; nɛ pɔpɔ kaaŋ weyi ɩwalaa yɔ tataa Yeruzalɛm nɛ piwolo pɩtalɩ ɖooo Koloŋa Kɩwalaɣ.+ 9 Pɔ-cɔlɔ lɛ, Refaya, Huuri pɩyalʋ, Yeruzalɛm egeetiye hɔɔlʋʋ awumbu, labɩ ñɔɔzʋʋ tʋmɩyɛ. 10 Nɛ ɛlɛ cɔlɔ lɛ, Harumaafʋ pɩyalʋ Yedaya labɩ ñɔɔzʋʋ tʋmɩyɛ ɛ-ɖɩɣa ɛsɩndaa, nɛ ɛ-cɔlɔ lɛ, Hasabiniya pɩyalʋ Hatuusi labɩ ñɔɔzʋʋ tʋmɩyɛ.

11 Harim+ pɩyalʋ Malɩkiiya nɛ Pahaatɩ-Mowaabʋ+ pɩyalʋ Hasuubi pɔñɔɔzɩ hɔɔlʋʋ lɛɛkʋ,* nɛ pɔñɔɔzɩ ɖɔɖɔ Mɩzasɩ Tilimiye.+ 12 Pɔ-cɔlɔ lɛ Saalum, Alohɛɛsɩ pɩyalʋ, Yeruzalɛm egeetiye hɔɔlʋʋ awumbu, la ñɔɔzʋʋ tʋmɩyɛ, ɛ nɛ ɛ-pɛlaa.

13 Hanuuni nɛ Zanowa+ mba, pɔñɔɔzɩ Fɛɛʋ Nɔnɔɔ;+ pama-kɛ nɛ pʋwayɩ lɛ, paɖʋ kɔ-pɔɔyɩŋ, ka-kɩkaɖɩŋ nɛ ka-ɖaŋ sɔsɔŋ, nɛ pɔñɔɔzɩ koloŋa nuŋgolonzi 1 000* nɛ piwolo pɩtalɩ ɖooo Tɔlɩma Huwa Nɔnɔɔ.+ 14 Malɩkiiya, Rekaab pɩyalʋ, Bɛtɩ-Akerɛɛm+ egeetiye awumbu, ñɔɔzɩ Tɔlɩma Huwa Nɔnɔɔ; ɛma-kɛ, ɛɖʋ kɔ-pɔɔyɩŋ, ka-kɩkaɖɩŋ nɛ ka-ɖaŋ sɔsɔŋ.

15 Saluni, Koloozee pɩyalʋ, Mizpaa+ egeetiye awumbu, ñɔɔzɩ Hiɖe Nɔnɔɔ;+ ɛma-kɛ nɛ ɛlɔbɩ-kɛ, ɛɖʋ kɔ-nɔnɔsɩ, ka-kɩkaɖɩŋ nɛ ka-ɖaŋ sɔsɔŋ, ɛñɔɔzɩ ɖɔɖɔ Wiyaʋ Kaɖaɣ+ cɔlɔ Hɛɛʋ Lɩŋgamʋʋ+ koloŋa nɛ piwolo pɩtalɩ ɖooo Tendemee+ wena awɛ kpaɣnɩ Daviid Tɛtʋ+ taa nɛ pitii yɔ.

16 Ɛ-wayɩ lɛ, Nehemiya, Azɩbukɩ pɩyalʋ, Bɛtɩ-Zur+ egeetiye hɔɔlʋʋ awumbu, labɩ ñɔɔzʋʋ tʋmɩyɛ kpaɣnɩ Daviid Pɩlaŋ+ ɛsɩndaa nɛ piwolo pɩtalɩ lɩŋgamʋʋ+ ŋgʋ pamawa yɔ, nɛ piwolo pɩtalɩ ɖɔɖɔ ɖooo Ðoŋ Tɩnaa Ðɩɣa.

17 Ɛ-wayɩ lɛ, Leevi mba labɩ ñɔɔzʋʋ tʋmɩyɛ: Bani pɩyalʋ Rehum; nɛ ɛ-cɔlɔ lɛ, Keyila+ egeetiye hɔɔlʋʋ awumbu Hasabiya labɩ e-egeetiye ñɔɔzʋʋ tʋmɩyɛ. 18 Ɛ-wayɩ lɛ, po-koobiya labɩ ñɔɔzʋʋ tʋmɩyɛ: Henadaadɩ pɩyalʋ Bavayii, Keyila egeetiye hɔɔlʋʋ awumbu.

19 Ɛ-cɔlɔ lɛ, Ezɛɛrɩ, Yesuwa+ pɩyalʋ, Mizpaa awumbu, kaawɛɛ nɛ ɛñɔɔzʋʋ hɔɔlʋʋ lɛɛkʋ ŋgʋ kɩha ɛsa nɛ nʋmɔʋ ŋgʋ kɩkpaɣnɩ You Wondu Ðɩzɩyɛ taa Tilimiye Kɩtɩlɩyɛ+ cɔlɔ yɔ.

20 Ɛ-wayɩ lɛ, Zabaayɩ+ pɩyalʋ Baaruuki la tʋmɩyɛ nɛ kpekpeka nɛ ɛñɔɔzɩ hɔɔlʋʋ lɛɛkʋ, kpaɣnɩ Tilimiye Kɩtɩlɩyɛ nɛ piwolo pɩtalɩ ɖooo cɔjɔ kɩlɩm Eliyasiib+ ɖɩɣa nɔnɔɔ taa.

21 Ɛ-wayɩ lɛ, Hakɔɔzɩ pɩyalʋ Uriyaa pɩyalʋ Meremɔɔtɩ+ ñɔɔzɩ hɔɔlʋʋ lɛɛkʋ, kpaɣnɩ Eliyasiib ɖɩɣa nɔnɔɔ taa nɛ piwolo pɩtalɩ ɖooo Eliyasiib ɖɩɣa tɩnaɣ yɔɔ.

22 Nɛ ɛ-wayɩ lɛ, cɔjɔnaa, Yɔɔrdaŋ egeetiye*+ taa abalaa, la ñɔɔzʋʋ tʋmɩyɛ. 23 Pa-wayɩ lɛ, Bɛnjamɛɛ nɛ Hasuubi pala ñɔɔzʋʋ tʋmɩyɛ pa-ɖɩɣa ɛsɩndaa. Pa-wayɩ lɛ, Ananiya pɩyalʋ Maaseyiya pɩyalʋ Azariya la ñɔɔzʋʋ tʋmɩyɛ ɛ-ɖɩɣa cɔlɔ. 24 Ɛ-wayɩ lɛ, Henadaadɩ pɩyalʋ Binuwii ñɔɔzɩ hɔɔlʋʋ lɛɛkʋ, kpaɣnɩ Azariya ɖɩɣa nɛ piwolo pɩtalɩ Tilimiye Kɩtɩlɩyɛ,+ nɛ piwolo pɩtalɩ ɖɔɖɔ ɖooo kɔna taa.

25 Ɛ-wayɩ lɛ, Uzaayɩ pɩyalʋ Palaalɩ labɩ ñɔɔzʋʋ tʋmɩyɛ Tilimiye Kɩtɩlɩyɛ ɛsɩndaa nɛ tilimiye nɖɩ ɖɩlɩnɩ Wiyaʋ Ðɩɣa+ taa yɔ ɖɩ-ɛsɩndaa, Feŋiyaa Kadaɣ+ taa tilimiye hayo kiŋ ñɩnɖɛ. Parɔɔsɩ+ pɩyalʋ Pedayiya kaawɛ ɛ-wayɩ.

26 Templo taa lɩmɖʋyaa*+ mba pɛwɛ Ofɛɛlɩ+ yɔ, palabɩ ñɔɔzʋʋ tʋmɩyɛ nɛ piwolo pɩtalɩ ɖooo Lɩm Nɔnɔɔ+ ɛsɩndaa wɩsɩ ɖɩlɩyɛ taa nɛ pɩtalɩ ɖɔɖɔ tilimiye nɖɩ ɖilosuu yɔ.

27 Pa-wayɩ lɛ, Tekowa mba+ ñɔɔzɩ ɖɔɖɔ hɔɔlʋʋ lɛɛkʋ, kpaɣnɩ tilimiye sɔsɔyɛ nɖɩ ɖilosuu yɔ ɖɩ-ɛsɩndaa nɛ piwolo pɩtalɩ ɖooo Ofɛɛlɩ koloŋa.

28 Cɔjɔnaa labɩ ñɔɔzʋʋ tʋmɩyɛ Kpaŋnaŋ Nɔnɔɔ+ ñʋʋ yɔɔ, pa-taa paa weyi lɛ, ɛlabɩ ñɔɔzʋʋ tʋmɩyɛ ɛ-ɖɩɣa ɛsɩndaa.

29 Pa-wayɩ lɛ, Imɛɛrɩ pɩyalʋ Sadɔɔkɩ+ la ñɔɔzʋʋ tʋmɩyɛ ɛ-ɖɩɣa ɛsɩndaa.

Nɛ ɛ-wayɩ lɛ, Sekaniya pɩyalʋ Semayaa, Wɩsɩ Ðɩlɩyɛ taa Nɔnɔɔ+ yɔɔ ɖaŋɩyʋ, la ñɔɔzʋʋ tʋmɩyɛ.

30 Ɛ-wayɩ lɛ, Selemiya pɩyalʋ Anaanɩya nɛ Zalafʋ pɩyalʋ 6 ñɩnʋ Hanuuni pɔñɔɔzɩ hɔɔlʋʋ lɛɛkʋ.

Pa-wayɩ lɛ, Berekiya pɩyalʋ Mesulam+ la ñɔɔzʋʋ tʋmɩyɛ e-kuduyuu ɛsɩndaa.

31 Ɛ-wayɩ lɛ, sika wondu luɖaa ɛgbɛyɛ taa tʋ Malɩkiiya labɩ ñɔɔzʋʋ tʋmɩyɛ piwolo pɩtalɩ ɖooo templo taa lɩmɖʋyaa*+ nɛ tadɩyɛ laɖaa ɖɩɣa cɔlɔ, Wiluu Nɔnɔɔ* ɛsɩndaa nɛ piwolo pɩtalɩ ɖɔɖɔ ɖooo kɔna taa ɛsɔdaa kuduyuu.

32 Nɛ sika wondu luɖaa nɛ tadɩyɛ laɖaa palabɩ ñɔɔzʋʋ tʋmɩyɛ kɔna taa ɛsɔdaa kuduyuu nɛ Heŋ Nɔnɔɔ+ pɛ-hɛkʋ taa.

4 Nɛ Sanɩbalaatɩ+ tɩɩnɩwa se ɖɩwɛɛ nɛ ɖɩɖaɣnɩɣ maʋ koloŋa lɛ, pɩwɩzɩ-ɩ nɛ ɛkɔ pana siŋŋ, nɛ ɛpaɣzɩ woŋuu Yuuda mba. 2 Nɛ ɛyɔɔdɩ e-koobiya nɛ Samaarii sɔɔjanaa ɛsɩndaa se: «Ɛbɛ Yuuda mba sɩkasɩ nzɩ sɩwɛɛ nɛ sɩlakɩ? Pa-maɣmaɣ pakaɣnɩ tʋmɩyɛ nɖɩ labʋ na? Pakaɣ laʋ kɩlaŋ na? Pakaɣ tɛm kɩyakʋ kʋɖʋmʋʋ na? Pakaɣ pɛɛ wena añaɣ miŋ yɔ wezuu haʋ tambaɣ wena mʋzʋʋ hu a-yɔɔ yɔ a-huwa tɛɛ?»+

3 Nɛ Amooni tʋ+ Tobiya+ weyi ɛɛsɩŋ ɛ-cɔlɔ yɔ, ɛyɔɔdɩ se: «Paa sɔŋgɔlɔ haɣ maɣmaɣ ɛkpanɩ mbʋ pɛwɛɛ nɛ pamaɣ yɔ pɩ-yɔɔ yɔ, kakaɣ yɔlɩsʋʋ pɛ-pɛɛ koloŋa ŋga.»

4 Hayɩ ɖɛ-Ɛsɔ, kemsi; mbʋ pʋyɔɔ yɔ pɛwɛɛ nɛ powoŋuu-ɖʋ,+ yele nɛ pa-tʋtʋ pɩsɩ pa-maɣmaɣ pa-ñʋŋ taa,+ nɛ ŋyele nɛ palazɩ-wɛ nɛ pɛɖɛnɩ-wɛ yomiye ɛjaɖɛ naɖɩyɛ taa. 5 Nɛ taahuuzi pa-kɩwɛɛkɩm yɔɔ nɛ taahɩzɩ pa-kɩdɛkɛdɩm ñɛ-ɛsɩndaa,+ mbʋ pʋyɔɔ yɔ patʋ koloŋa mayaa.

6 Nɛ ɖiwolo koloŋa maʋ yɔɔ, nɛ koloŋa kpeekpe cɔɔ kata, nɛ ɖɩɖaɣnɩ-kɛ maʋ nɛ katalɩ ka-kʋkʋyɩŋ hɛkʋ, nɛ samaɣ wɛɛ nɛ kalakɩ tʋmɩyɛ nɛ ka-laŋɩyɛ.

7 Alɩwaatʋ ndʋ Sanɩbalaatɩ, Tobiya,+ Arabii mba,+ Amooni mba, nɛ Asɩdoodi mba+ patɩɩnɩwa se Yeruzalɛm kolonzi maʋ wɛɛ nɛ pɩɖɛɣnɩ ɛsɩndaa nɛ pɛwɛɛ nɛ pɔtɔʋ sɩ-pɛŋla lɛ, pɩwɩzɩ-wɛ siŋŋ. 8 Pala nɔɔ se pɔkɔŋ nɛ poyooni Yeruzalɛm tɛtʋ nɛ pala nɛ putuli tɩ-taa. 9 Ɛlɛ ɖɩtɩmnɩ ɖɛ-Ɛsɔ; nɛ pɔ-yɔɔ lɛ, ɖɩsɩɩ cɔŋɩyaa se pɔcɔŋʋʋ ɖoo nɛ wɩsɩ.

10 Paa mbʋ yɔ, Yuuda samaɣ kaawɛɛ nɛ kɔyɔɔdʋʋ se: «Tʋmlaɖaa* ɖoŋ tɛma, nɛ tambaɣ kɩlɩ ɖɔʋ; ɖɩɩkaɣ pɩzʋʋ nɛ ɖɩma koloŋa kpa.»

11 Nɛ ɖo-koyindinaa kaawɛɛ nɛ pɔyɔɔdʋʋ se: «Ðɩkaɣ sʋʋ pɛ-hɛkʋ taa mɛsaɣ tɛɛ nɛ ɖɩkʋ-wɛ nɛ ɖɩsɩnzɩ tʋmɩyɛ.»

12 Paa ɛzɩmtaa, Yuuda ñɩma mba pɔñɔtɩnɩ-wɛ yɔ pɔkɔŋaɣ lɛ, peheyaɣ-ɖʋ nɛ pɛlɛlɩɣ* se: «Pakaɣ lɩnʋʋ hɔɔlɩŋ kpeekpe taa nɛ pɔkɔɔ ɖa-wayɩ.»

13 Nɛ mansɩɩ abalaa hadɛ lona wena awɛ koloŋa wayɩ yɔ a-taa, lona wena pɩnaɣ-yɛ kaɣlaa yɔ, mansɩ-wɛ hɔʋ hɔʋ, pa nɛ pa-laɣla, pa-kɩgbɛzɛmɩŋ nɛ pɔ-tɔŋ. 14 Manawa se sɔɔndʋ kpaɣaɣ-wɛ lɛ, mankʋyɩ kpaka nɛ meheyi ñʋndɩnaa+ nɛ kaɖɩsɩ nɛ samaɣ taa mba pɩkazaa yɔ se: «Itaase-wɛ sɔɔndʋ.+ Ɩtɔzɩ Yehowa yɔɔ, ɛnʋ weyi ɛpaɣlaa nɛ ɛcaɣ sɔɔndʋ yɔ;+ nɛ iyoo mi-koobiya yɔɔ, mɩ-pɩyalaa nɛ mɩ-pɛlaa yɔɔ, mɩ-halaa nɛ mɩ-ɖɩsɩ yɔɔ.»

15 Ðo-koyindinaa nɩwa se ɖɩtɩlɩ mbʋ pɛwɛɛ nɛ palakɩ yɔ, nɛ Ɛsɔ toovenim tʋ laba nɛ pa-tamaɣ ɖʋ lɩm lɛ, ɖa-tɩŋa ɖɩpɩsɩ koloŋa maʋ tʋmɩyɛ taa. 16 Kpaɣnɩ kɩyakʋ ŋgʋ lɛ, mɛ-ɛyaa hɔɔlʋʋ kʋɖʋmʋʋ lakaɣ tʋmɩyɛ,+ nɛ hɔɔlʋʋ lɛɛkʋ ɖɔkʋʋ kɩgbɛzɛmɩŋ, kpayɩŋ, tɔŋ nɛ ñɩɣyʋʋ tokonaa. Nɛ awumbiya+ kaawɛ Yuuda mba kpeekpe wayɩ, 17 Yuuda ñɩma mba pamaɣaɣ koloŋa yɔ. Mba pakpakaɣ sʋʋtʋ yɔ, palakaɣ tʋmɩyɛ nɛ nesi kʋɖʋmsɩ nɛ pɔɖɔkʋʋ you wonuu* nesi lɛɛsɩ taa. 18 Nɛ paa koloŋa mayʋ weyi lɛ, ɛtam laɣɖɛ tambaɖɛ nɖɩ ɖɩwɛ ɛ-tɩnaɣ taa yɔ ɖɩ-yɔɔ, nɛ nɔndɔʋ hʋlɩyʋ+ kaasɩŋ mɔn-cɔlɔ.

19 Peeɖe meheyi ñʋndɩnaa nɛ kaɖɩsɩ nɛ samaɣ taa mba pɩkazaa yɔ se: «Tʋmɩyɛ ɖɔwa nɛ ɖɩpaɣlɩ, nɛ ɖɩmɩzɩ ɖama koloŋa yɔɔ nɛ ɖiposini ɖama. 20 Alɩwaatʋ ndʋ ɩnɩɣ nɔndɔʋ taŋ lɛ, ikpeɣli ɖama ɖenɖe ɖɩwɛɛ yɔ. Ðɛ-Ɛsɔ kaɣ lʋbʋ* ɖɔ-yɔɔ.»+

21 Nɛ ɖɩwɛɛ tʋmɩyɛ labʋ yɔɔ, nɛ ɛyaa hɔɔlʋʋ lɛɛkʋ ɖɔkɩ kɩgbɛzɛmɩŋ, kpaɣnɩ tɛbɩyɛ nɛ pɩkɔɔ pɩtalɩ alɩwaatʋ ndʋ tɩɩnzɩ lɩwa yɔ. 22 Alɩwaatʋ ndʋ lɛ, meheyi samaɣ se: «Pɩwɛɛ se abalaa ɩsʋʋ Yeruzalɛm tɛtʋ taa ɖoo taa, paa weyi lɛ ɛ nɛ ɛ-lɩmɖʋyʋ, nɛ paɖaŋ ɖɔ-yɔɔ ɖoo taa nɛ pala tʋmɩyɛ wɩsɩ taa.» 23 Nɛ ma-maɣmaɣ, mon-koobiya, ma-lɩmɖʋyaa+ nɛ cɔŋɩyaa mba patɩŋaɣ-m yɔ, ɖa-taa nɔɔyʋ taahɔzʋʋ e-tokonaa nɛ ɖa-taa paa weyi kaaɖɔkɩ e-you wonuu ɛ-nɩwaŋ nesi taa.

5 Ɛlɛ samaɣ taa abalaa nɛ pa-halaa pamakaɣ kubusi sɔsɔsɩ po-koobiya Yuuda mba yɔɔ.+ 2 Nabɛyɛ yɔɔdaɣ se: «Ða nɛ ɖa-pɩyalaa nɛ ɖɛ-pɛlaa ɖɩɖɔwa. Pɩpɔzʋʋ-ɖʋ tɔɔnaɣ* se ɖɩtɔɔ nɛ ɖɩcaɣ wezuu.» 3 Lalaa ñɔyɔɔdaɣ se: «Ðɩcɛlɩɣ ɖa-hayɩm, ɖe-viiñi hayɩm nɛ ɖa-ɖɩsɩ pʋcɔ nɛ ɖihikiɣ kʋtɔɔm,* tɔɔnaɣ kɛdɛɖaɣ alɩwaatʋ taa.» 4 Nɛ lalaa ñɔyɔɔdaɣ ɖɔɖɔ se: «Wiyaʋ lambuu yɔɔ lɛ, ɖɩkɩndɩ liidiye ɖa-hayɩm nɛ ɖe-viiñi hayɩm yɔɔ.+ 5 Ða nɛ ɖo-koobiya ɖɩkɛ tomnaɣ kʋɖʋmaɣ nɛ calɩm kʋɖʋmʋm,* nɛ ɖe-piya wɛ ɖɔɖɔ ɛzɩ pa-ñɩnzɩ yɔ; paa mbʋ yɔ, pɩwɛɛ se ɖɩsʋzɩ ɖa-pɩyalaa nɛ ɖɛ-pɛlaa yomiye taa, nɛ ɖɛ-pɛlaa nabɛyɛ tɛm wɛʋ yomiye taa.+ Ɛlɛ ɖɩfɛyɩnɩ ɖoŋ se ɖɩla nabʋyʋ nɛ pɩsɩɩ tɩnaɣ, mbʋ pʋyɔɔ yɔ lalaa tɩnɩ ɖa-hayɩm nɛ ɖe-viiñi hayɩm.»

6 Manɩ po-kubusi nɛ tɔm ndʋ lɛ, pɩwɩzɩ-m siŋŋ. 7 Pʋyɔɔ mamaɣzɩ tɔm ndʋ tɩ-yɔɔ ma-laŋɩyɛ taa nɛ mankalɩ sɔsaa nɛ kaɖɩsɩ nɛ meheyi-wɛ se: «Mɩ-taa paa weyi wɛɛ nɛ ɛpɔzʋʋ kɛzɛɣa* e-koobu maɣmaɣ.»+

Pɩtasɩ lɛ, pɔ-yɔɔ lɛ, maaya kigbeɣluu sɔsɔʋ nakʋyʋ. 8 Nɛ meheyi-wɛ se: «Ðɩlabɩ ɖo-ɖoŋ ɖeɖe nɛ ɖɩya ɖo-koobiya Yuuda ñɩma mba paapɛdɩ-wɛ nɛ ajɛɛ yɔ nɛ ɖɩpɩsɩna; ɛlɛ lɛɛlɛɛyɔ ɩkaɣ mi-koobiya pɛdʋʋ+ nɛ pɩpɔzɩ se paɖaɣnɩ-ɖʋ wɛ pɛdɩnʋʋ na?» Peeɖe posum tamɩyɛ, nɛ paanaɣ se pɔyɔɔdɩ suwe. 9 Nɛ mantasɩ yɔɔdʋʋ se: «Mbʋ iɖiɣni labʋ yɔ pɩfɛyɩ ɖeu. Pɩtɩkɛ ɖɛ-Ɛsɔ sɔɔndʋ seu taa pɩwɛɛ se ɩɖɔ+ se pɩsa nɛ ajɛɛ nɛ ɖo-koyindinaa pataakʋ ɖɔ-tɔm na? 10 Pɩtasɩ lɛ, ma, mon-koobiya nɛ ma-lɩmɖʋyaa ɖiɖiɣni-wɛ kɩndʋʋ liidiye nɛ tɔɔnaɣ.* Mentendi-mɩ, ɖiyele kɩndʋʋ kɛzɛɣa yɔɔ mbʋ.+ 11 Mentendi-mɩ, sɔnɔ maɣmaɣ, ɩpɩsɩnɩ-wɛ pa-hayɩm,+ pe-viiñi hayɩm, pɛ-tɛ oliivi hayɩm nɛ pa-ɖɩsɩ, pɩkpɛndɩnɩ ɖɔɖɔ liidiye, tɔɔnaɣ,* vɛɛ kɩfalʋʋ nɛ num pɩtɩŋa pɩ-hɔɔlʋʋ 100 ñɩŋgʋ* tɛ kɛzɛɣa ŋga ɩpɔzʋʋ-wɛ yɔ.»

12 Peeɖe pɔyɔɔdaa se: «Ðɩpɩsɩɣnɩ-wɛ wondu ndʋ nɛ ɖɩɩkaɣ-wɛ pɔzʋʋ nabʋyʋ. Ðɩkaɣ labʋ ɖeyi ɖeyi ɛzɩ ŋyɔɔdʋʋ yɔ.» Ðɩnɛ ɛlɛ mayaa cɔjɔnaa nɛ meyele nɛ abalaa mba poɖuu se palakɩ ɛzɩ pɔyɔɔdʋʋ yɔ. 13 Pɩtasɩ lɛ, menkpizi mon-toko kabɩsɩ nɛ mɔyɔɔdɩ se: «Abalʋ weyi ɛɛɖɔŋ ɖuutu tʋnɛ tɩ-yɔɔ yɔ, Ɛsɔ toovenim tʋ ekpizi-i mbʋ ɖɔɖɔ nɛ eposi-i nɛ ɛ-ɖɩɣa nɛ ɛ-ñɩm, ekpizi-i mbʋ nɛ ɛpɩsɩ-ɩ kpɛɖɛ.» Peeɖe samaɣ kpeekpe yɔɔdaa se: «Amɛn!»* Nɛ pasa Yehowa, nɛ samaɣ la ɛzɩ kaaɖuuu yɔ.

14 Pɩtasɩ ɖɔɖɔ lɛ, kpaɣnɩ kɩyakʋ ŋgʋ ɛlɩzɩ-m se manpɩsɩ pa-ñʋʋdʋ+ Yuuda ɛjaɖɛ taa yɔ, kpaɣnɩ Wiyaʋ Artaazɛɛrɩzɛɛsɩ+ pɩnaɣ 20 ñɩŋga+ nɛ piwolo pɩnaɣ 32 ñɩŋga,+ pɩnzɩ 12 taa, ma yaa mon-koobiya, wiɖiyi ɖɩtɩtɔɔ tɔɔnaɣ ŋga pɩwɛɛ se pɛcɛlɩ ñʋʋdʋ yɔ.+ 15 Ɛlɛ ñʋndɩnaa mba paalɛyɩ-m wɛʋ yɔ paasʋʋ samaɣ sʋʋtʋ nɛ pamʋwaɣ kɔ-cɔlɔ liidiye siklinaa* 40, kpɔnɔ nɛ vɛɛ yɔɔ paa evemiye nɖɩ. Pɩtasɩ lɛ, pa-lɩmɖʋyaa wɩlɩ samaɣ ñaŋ. Ɛlɛ matɩla mbʋ,+ mbʋ pʋyɔɔ yɔ menseɣaɣ Ɛsɔ sɔɔndʋ.+

16 Pɩtasɩ lɛ, manɖʋ nesi koloŋa kanɛ ka-tʋmɩyɛ taa, nɛ hayɩm nabʋyʋ tɩpɩsɩ ɖa-ñɩmbʋ;+ ma-lɩmɖʋyaa kpeekpe kaakpeɣli peeɖe tʋmɩyɛ yɔɔ. 17 Yuuda mba nɛ kaɖɩsɩ, ɛyaa 150 tɔkaɣ man-taabɩlɩ yɔɔ, pɩtasɩnɩ mba paalɩnɩ ajɛɛ taa nɛ pɔkɔɔ ɖɔ-cɔlɔ yɔ. 18 Paa evemiye nɖɩ lɛ, patɩzaɣ-m* nɔ abalɩñɩnʋ kʋɖʋm, heŋ kɩbaŋ 6 nɛ sumasɩ, nɛ tam kʋɖʋm paa kɩyakɩŋ 10 weyi ɩ-taa lɛ, ɖɩɩwɛnɩ sʋlʋm* mbʋ pɩtɩŋa pɩtɩŋa sakɩyɛ. Paa mbʋ yɔ, mantɩpɔzɩ se pɔkɔnɩ-m tɔɔnaɣ ŋga pɩɩwɛɛ se pɛcɛlɩ ñʋʋdʋ yɔ, mbʋ pʋyɔɔ yɔ tʋmɩyɛ nɖɩ samaɣ lakaɣ yɔ ɖɩɩtɛm-kɛ kɛnʋʋ sʋʋtʋ. 19 Hayɩ mɛ-Ɛsɔ, kɩbandʋ ndʋ payɩ malabɩ samaɣ kanɛ yɔ tɩ-yɔɔ lɛ, tɔzɩ mɔ-yɔɔ nɛ mɔn-tɔm kɛdɩnɩ-ŋ.+

6 Nɛ alɩwaatʋ ndʋ Sanɩbalaatɩ, Tobiya,+ Arabii tʋ+ Gesɛɛm nɛ ɖo-koyindinaa lalaa patɩɩnɩwa se manɖaɣnɩ maʋ koloŋa+ nɛ pɛŋla tɩtasɩ kɔ-yɔɔ wɛʋ lɛ, (ŋgʋ alɩwaatʋ ndʋ tɩ-taa, mantaaɖʋtɩ pɔɔyɩŋ nɔnɔsɩ yɔɔ),+ 2 Sanɩbalaatɩ nɛ Gesɛɛm petiyi kpaagbaa se peheyi-m tɔm tʋnɛ: «Kɔɔ, ɖa nɛ ŋ ɖɩɖʋ alɩwaatʋ nɛ ɖɩkatɩ Onoo+ Fɛɛʋ tɛtʋ cikpetu taa.» Ɛlɛ paawɛɛ nɛ palakɩ lɩmaɣza se palabɩ-m kɩdɛkɛdɩm. 3 Peeɖe mentiyi ɛyaa se peheyi-wɛ se: «Tʋmɩyɛ sɔsɔɖɛ menɖiɣni labʋ, nɛ maakaɣ pɩzʋʋ nɛ mentii. Ɛbɛ yɔɔ meyeki tʋmɩyɛ nɛ ɖɩsɩŋ se mɔnkɔɔ mɩ-cɔlɔ?» 4 Petiyi ma-wayɩ nɛ tɔm kʋɖʋmtʋ ndʋ tam nabʋnaza, nɛ paa ɛzɩmtaa lɛ, tɔm kʋɖʋmtʋ ndʋ moncosaɣ-wɛ.

5 Pʋwayɩ lɛ, Sanɩbalaatɩ ɖaɣnɩ tiyuu ɛ-lɩmɖʋyʋ mɔn-cɔlɔ nɛ tɔm kʋɖʋmtʋ ndʋ tam 5 ɖeɖe, nɛ ɛɖʋzɩ takayaɣ e-nesi taa ɛlɛ patisuli-kɛ. 6 Paama ka-taa se: «Pɛwɛɛ nɛ pɔyɔɔdʋʋ ajɛɛ taa, nɛ Gesɛɛm+ ɖɔɖɔ wɛɛ nɛ ɛyɔɔdʋʋ se ña nɛ Yuuda mba ɩwɛɛ nɛ ɩlakɩ lɩmaɣza se ɩkaɖɩnɩ wiyaʋ.+ Pʋyɔɔ ŋɖiɣni maʋ koloŋa, nɛ pɛwɛɛ nɛ pɔyɔɔdʋʋ ɖɔɖɔ se ŋcaɣ se ŋpɩsɩ pe-wiyaʋ. 7 Pɩtasɩ lɛ, ŋɖʋ nayaa se posusuu ñɔ-yɔɔ tɔm Yeruzalɛm taa se: “Wiyaʋ nɔɔyʋ wɛ Yuuda!” Nɛ tɔm ndʋ, pakaɣ-tʋ heyuu wiyaʋ. Pʋyɔɔ lɛ, kɔɔ nɛ ɖa nɛ ŋ ɖɩtazɩ tɩ-taa.»

8 Paa mbʋ yɔ, mentiyaa se peheyi-i se: «Tɔm ndʋ payɩ ŋyɔɔdʋʋ yɔ, tɩ-taa natʋyʋ tɩla mbʋ; ña-maɣmaɣ ñolukini-tʋ ña-laŋɩyɛ taa.»* 9 Mbʋ pʋyɔɔ yɔ, pe-kpeekpe pañɩnaɣ se paɖʋ-ɖʋ sɔɔndʋ, pɔyɔɔdaɣ se: «Pɩkaɣ-wɛ tibu yɔɔɔ tʋmɩyɛ ɖɩnɛ ɖɩ-taa, nɛ tʋmɩyɛ kaɣ sɩʋ tɩnaɣ.»+ Ɛlɛ mantɩmɩ se: «Ɛsɔ, kpazɩ me-nesi ɖoŋ.»+

10 Nɛ mowolo Mehetabɛɛlɩ pɩyalʋ Delayiya pɩyalʋ Semayaa ɖɩɣa taa, alɩwaatʋ ndʋ ɛlɛ kaawɛ ɛ-tɛ nɛ ɛtaalɩɣ yɔ. Nɛ eheyi-m se: «Ðɩɖʋ alɩwaatʋ nɛ ɖɩkatɩ, Ɛsɔ toovenim tʋ ɖɩɣa taa, templo taa, nɛ ɖɩɖɩɣ templo nɔnɔsɩ, mbʋ pʋyɔɔ yɔ peɖiɣni kɔm se pakʋ-ŋ. Pɔkɔŋ ɖoo taa se pakʋ-ŋ.» 11 Ɛlɛ moncosi-i se: «Ɛzɩ pɩwɛɛ se ɛyʋ ɛzɩ ma yɔ ese? Ɛyʋ ɛzɩ ma yɔ pɩzɩɣ nɛ ɛsʋʋ templo taa nɛ ɛtasɩ wezuu caɣʋ na?+ Maakaɣ kɩ-taa sʋʋ!» 12 Peeɖe menɖiɣzinaa se pɩtɩkɛ Ɛsɔ tiyini-i, ɛlɛ Tobiya nɛ Sanɩbalaatɩ+ pɛhɛyɩnɩ-ɩ liidiye se ɛyɔɔdɩ natʋ tɔm tʋnɛ nɛ epeɣzini-m. 13 Pɛhɛyɩ-ɩ liidiye se ɛla nɛ sɔɔndʋ kpa-m nɛ mala kɩdɛkɛdɩm nɛ patɩŋnɩ pɩ-yɔɔ nɛ pɛwɛɛkɩ ma-hɩɖɛ nɛ pakʋ mɔn-tɔm.

14 Hayɩ mɛ-Ɛsɔ, tɔzɩ Tobiya+ nɛ Sanɩbalaatɩ nɛ lakasɩ sɩnɛ sɩ-yɔɔ, tɔzɩ ɖɔɖɔ nayʋ halɩñɩnʋ Noowadiya nɛ nayaa lalaa mba paawɛɛ nɛ pañakɩ pana tam se paɖʋ-m sɔɔndʋ yɔ pɔ-yɔɔ.

15 Nɛ ɖɩtɛzɩ koloŋa maʋ tʋmɩyɛ kɩyakɩŋ 52 taa, Eluulɩ* fenaɣ kɩyakʋ 25 ñɩŋgʋ wiye.

16 Ðo-koyindinaa tɩŋa tɩɩnɩ-tʋ, nɛ ajɛɛ wena aacɔ-ɖʋ nɛ ata yɔ a-tɩŋa ana mbʋ lɛ, fɛyɛ sɔsɔɖɛ naɖɩyɛ kpa-wɛ,*+ nɛ peɖiɣzina se ɖɛ-Ɛsɔ ɖoŋ taa ɖɩlabɩ tʋmɩyɛ ɖɩnɛ. 17 Kɩyakɩŋ ɛnɩ ɩ-taa lɛ, Yuuda sɔsaa+ tiyaɣni takayɩsɩ sakɩyɛ Tobiya, nɛ Tobiya ñocosuu-wɛ. 18 Yuuda mba sakɩyɛ kaalabɩ ɖuutu se patɩnɩɣ ɛ-yɔɔ, mbʋ pʋyɔɔ yɔ ɛɛkɛ Araa+ pɩyalʋ Sekaniya ɛtɩ, nɛ ɛ-pɩyalʋ Yehohanaanɩ kaakpaɣ Berekiya pɩyalʋ Mesulam+ pɛlɛ. 19 Pɩtasɩ lɛ, peheyaɣ-m tɔm kɩbandʋ ɛ-yɔɔ kaahɛzaɣ, nɛ peheyiɣ-i ndʋ mɔyɔɔdaɣ yɔ. Nɛ Tobiya tiyaɣni takayɩsɩ se ɛɖʋnɩ-m sɔɔndʋ.+

7 Ðɩtɩɩtɛm koloŋa maʋ lɛ,+ manɖʋ nɔnɔsɩ;+ nɛ pʋwayɩ lɛ pasɩɩ nɔnɔsɩ yɔɔ ɖaŋɩyaa,+ hendu teyaa+ nɛ Leevi mba.+ 2 Pʋwayɩ lɛ, mansɩɩ mon-koobu Ananii+ se ɛcɔnɩ Yeruzalɛm yɔɔ, ɛ nɛ Sɔɔjanaa Ðɩɣa+ ñʋʋdʋ Anaanɩya, mbʋ pʋyɔɔ yɔ ɛlɛ kaakɛ abalʋ weyi papɩzaɣ se pataa-ɩ liu nɛ pɩkɩlɩ yɔ, nɛ eseɣaɣ Ɛsɔ toovenim tʋ sɔɔndʋ+ nɛ pɩkɩlɩ pa-taa sakɩyɛ. 3 Nɛ meheyi-wɛ se: «Pɩtɩpɔzɩ se patʋlɩ Yeruzalɛm nɔnɔsɩ pʋcɔ nɛ wɩsɩ saa, nɛ alɩwaatʋ ndʋ feŋiyaa wɛ pa-tʋmɩyɛ taa yɔ, pɩwɛɛ se paɖɩɣ nɔnɔsɩ nɛ pakaɖɩ-sɩ. Nɛ ɩɖʋ Yeruzalɛm mba tʋmɩyɛ se pɛkɛ feŋiyaa, ɩha nabɛyɛ lona wena a-taa pɩpɔzʋʋ se pefeŋ yɔ nɛ lalaa ñefeŋ pa-ɖɩsɩ ɛsɩndaa.» 4 Tɛtʋ kaapaɣlaa nɛ tɩwalɩ, ɛlɛ ɛyaa pazɩ kaawɛnɩ tɩ-taa,+ nɛ pataaɖaɣnɩ ɖɩsɩ maʋ.

5 Ɛlɛ mɛ-Ɛsɔ ɖʋ ma-laŋɩyɛ taa se menkpeɣli sɔsaa nɛ kaɖɩsɩ nɛ samaɣ nɛ pama pa-hɩla takayɩsɩ taa hɔʋ hɔʋ.+ Peeɖe mehiɣ mba pacalɩ lɩnʋʋ yomiye taa nɛ pakpa yɔ pɔ-hɔŋ hɩla takayaɣ, nɛ mana pama ka-taa se:

6 Egeetiye taa ñɩma, mba Babilɔɔnɩ wiyaʋ Nabukodonozɔɔrɩ+ kaawoni yomiye taa yɔ,+ pa-taa mba palɩnɩ yomiye taa pʋwayɩ nɛ papɩsɩ Yeruzalɛm nɛ Yuuda yɔ mba yɔ, paa weyi ɛpɩsɩ ɛ-tɛtʋ taa,+ 7 mba pa nɛ Zorobabɛɛlɩ,+ Yesuwa,+ Nehemiya, Azariya, Raamiya, Nahamanii, Mɔrɩdekayɩ, Bilisaanɩ, Misiperɛɛtɩ, Bigivaayi, Nehum nɛ Baanaa pɔkɔma yɔ.

Izrayɛɛlɩ abalaa ñʋʋ yɔ:+ 8 Parɔɔsɩ pɩyalaa 2 172; 9 Sefatiya pɩyalaa 372; 10 Araa+ pɩyalaa 652; 11 Pahaatɩ-Mowaabʋ+ pɩyalaa, mba palɩnɩ Yesuwa nɛ Yowaabʋ+ pa-pɩyalaa taa yɔ 2 818; 12 Elam+ pɩyalaa 1 254; 13 Zatuu pɩyalaa 845; 14 Zakaayɩ pɩyalaa 760; 15 Binuwii pɩyalaa 648; 16 Bebayii pɩyalaa 628; 17 Azɩgadɩ pɩyalaa 2 322; 18 Adonikam pɩyalaa 667; 19 Bigivaayi pɩyalaa 2 067; 20 Adinɩ pɩyalaa 655; 21 Atɛɛrɩ pɩyalaa mba palɩnɩ Ezekiyaasɩ ɖɩɣa taa yɔ 98; 22 Asuum pɩyalaa 328; 23 Bezayi pɩyalaa 324; 24 Harifu pɩyalaa 112; 25 Gabawɔɔ+ pɩyalaa 95; 26 Bɛtɩlɛhɛm nɛ Netofa pa-abalaa 188; 27 Anatɔɔtɩ+ abalaa 128; 28 Bɛtɩ-Azɩmavɛɛtɩ abalaa 42; 29 Kiriyatɩ-Yeyarim,+ Kefira nɛ Beerɔɔtɩ+ pa-abalaa 743; 30 Ramaa nɛ Geba+ pa-abalaa 621; 31 Mikmasɩ+ abalaa 122; 32 Betɛɛlɩ+ nɛ Ayi+ pa-abalaa 123; 33 Nebo lɛɛkʋ abalaa 52; 34 Elam lɛlʋ pɩyalaa 1 254; 35 Harim pɩyalaa 320; 36 Yeriikoo pɩyalaa 345; 37 Lod, Hadid nɛ Onoo+ pa-pɩyalaa 721; 38 Senaa pɩyalaa 3 930.

39 Cɔjɔnaa:+ Yedaya pɩyalaa, mba palɩnɩ Yesuwa ɖɩɣa taa yɔ 973; 40 Imɛɛrɩ pɩyalaa 1 052; 41 Pasuuri+ pɩyalaa 1 247; 42 Harim+ pɩyalaa 1 017.

43 Leevi mba:+ Yesuwa nɛ Kadɩmɩyɛɛlɩ+ pa-pɩyalaa, mba palɩnɩ Odevaa pɩyalaa taa yɔ 74. 44 Hendu teyaa:+ Azaafʋ+ pɩyalaa 148. 45 Nɔnɔsɩ yɔɔ ɖaŋɩyaa:+ Saalum pɩyalaa, Atɛɛrɩ pɩyalaa, Talɩmɔɔnɩ pɩyalaa, Akubɩ+ pɩyalaa, Hatita pɩyalaa, Sobaayɩ pɩyalaa, 138.

46 Templo taa lɩmɖʋyaa:*+ Ziya pɩyalaa, Asuufa pɩyalaa, Tabawɔɔtɩ pɩyalaa, 47 Kerɔɔsɩ pɩyalaa, Siya pɩyalaa, Padooni pɩyalaa, 48 Lebaana pɩyalaa, Hagaba pɩyalaa, Salɩmaayɩ pɩyalaa, 49 Hanaanɩ pɩyalaa, Gidɛɛlɩ pɩyalaa, Gahaarɩ pɩyalaa, 50 Reyaya pɩyalaa, Reziini pɩyalaa, Nekoda pɩyalaa, 51 Gazam pɩyalaa, Uza pɩyalaa, Paseya pɩyalaa, 52 Beesayii pɩyalaa, Mewunim pɩyalaa, Nefusesim pɩyalaa, 53 Bakɩbukɩ pɩyalaa, Hakufa pɩyalaa, Haruuri pɩyalaa, 54 Bazɩliiti pɩyalaa, Mehiida pɩyalaa, Harɩsaa pɩyalaa, 55 Barɩkɔsɩ pɩyalaa, Sisera pɩyalaa, Tema pɩyalaa, 56 Neziya pɩyalaa, Hatifa pɩyalaa.

57 Salomɔɔ lɩmɖʋyaa pɩyalaa:+ Sotaayɩ pɩyalaa, Soferɛɛtɩ pɩyalaa, Perida pɩyalaa, 58 Yaala pɩyalaa, Darɩkooni pɩyalaa, Gidɛɛlɩ pɩyalaa, 59 Sefatiya pɩyalaa, Hatiili pɩyalaa, Pokerɛɛtɩ-Hazebayim pɩyalaa, Amɔɔnɩ pɩyalaa, 60 Templo taa lɩmɖʋyaa*+ tɩŋa nɛ Salomɔɔ lɩmɖʋyaa pɩyalaa paakpɛndɩ 392.

61 Nɛ mba pakʋyɩnɩ Tɛɛlɩ-Melaa, Tɛɛlɩ-Harɩsaa, Kerub, Adɔɔnɩ nɛ Imɛɛrɩ, ɛlɛ pataapɩzɩɣ se patʋʋzɩ pa-caanaa hɔŋ nɛ pe-liɖe nɛ pawɩlɩ se pɛkɛ Izrayɛɛlɩ mba yɔ, mba yɔ:+ 62 Delayiya pɩyalaa, Tobiya pɩyalaa, Nekoda pɩyalaa, pɛkpɛndɩ 642. 63 Nɛ mba palɩnɩ cɔjɔnaa taa yɔ mba yɔ: Habayiya pɩyalaa, Hakɔɔzɩ+ pɩyalaa, Barizilayii weyi ɛɛkpaɣ Galaadɩ tʋ Barizilayii+ pɛlɛ nɔɔyʋ nɛ payaa-ɩ nɛ ɛ-ɛtɩ hɩɖɛ yɔ, ɛ-pɩyalaa. 64 Pañɩnɩ pɔ-hɔŋ hɩla takayɩsɩ taa se papɩzɩ nɛ patʋʋzɩ pe-liɖe, ɛlɛ patɩna-yɛ, pʋyɔɔ pataamʋna se pala cɔjɔtʋ tʋmɩyɛ.*+ 65 Egeetiye ñʋʋdʋ*+ heyi-wɛ se pɩtɩpɔzɩ se pɔtɔɔ wondu ndʋ tɩkɛ kiɖeɖetu siŋŋ yɔ,+ pɩkɔɔ nɛ pɩtalɩ alɩwaatʋ ndʋ cɔjɔ weyi ɛpɩzɩɣ nɛ ɛpɔzɩ Uriim nɛ Tuumiim+ yɔ ɛwɛɛ yɔ.

66 Samaɣ kpeekpe kaakpɛndɩ ɛyaa 42 360,+ 67 nɛ pɩtasɩnɩ po-yomaa abalɩñɩma nɛ halɩñɩma+ mba paba ñaakpɛndɩ 7 337 yɔ; paawɛnɩ ɖɔɖɔ hendu teyaa abalɩñɩma nɛ halɩñɩma+ 245. 68 Pa-kpaŋnaŋ kaakpɛndɩ 736, pa-kpaŋasɩ sɔsɔsɩ 245, 69 pa-aɖaaɖaanaa 435 nɛ pa-kpaŋasɩ cikpesi 6 720.

70 Hɔŋ ñʋndɩnaa nabɛyɛ labɩ haɖɛ se pɩsɩnɩ tʋmɩyɛ.+ Egeetiye ñʋʋdʋ* ha sika drakɩmwaa* 1 000, ñanzɩ 50, nɛ cɔjɔnaa tokonaa kɩɖaɣlaa 530 se powoni ñɩm ɖɩzɩyɛ taa.+ 71 Nɛ hɔŋ ñʋndɩnaa nabɛyɛ ha ɖɩɣa maʋ ñɩm ɖɩzɩyɛ sika drakɩmwaa 20 000 nɛ liidiye miinɩwaa 2 200.* 72 Nɛ mba pɩkazɩ samaɣ taa yɔ, paha sika drakɩmwaa 20 000 nɛ liidiye miinɩwaa 2 000 nɛ cɔjɔnaa tokonaa kɩɖaɣlaa 67.

73 Nɛ cɔjɔnaa, Leevi mba, nɔnɔsɩ yɔɔ ɖaŋɩyaa, hendu teyaa,+ samaɣ taa ɛyaa nabɛyɛ, templo taa lɩmɖʋyaa,* nɛ Izrayɛɛlɩ ñɩma mba payɩ pɩkazaa yɔ,* paa mba lɛ pacaɣ pɛ-tɛtʋ taa.+ Fenaɣ 7 ñɩŋga talaa lɛ,+ Izrayɛɛlɩ mba kaacaɣ pɛ-tɛtʋ taa.+

8 Nɛ ɛyaa samaɣ kpeekpe kpeɣli nɔɔ kʋɖʋmaɣ taa kadaɣ ŋga kɛwɛ Lɩm Nɔnɔɔ+ ɛsɩndaa yɔ ka-taa, nɛ peheyi takayɩsɩ mayʋ Ɛsɩdrasɩ*+ se ɛkɔnɩ Moyizi Paɣtʋ takayaɣ,+ Paɣtʋ ndʋ Yehowa kaaɖʋ Izrayɛɛlɩ yɔ.+ 2 Ðɩnɛ ɛlɛ cɔjɔ Ɛsɩdrasɩ kɔnɩ Paɣtʋ takayaɣ samaɣ* ɛsɩndaa:+ Abalaa, halaa, nɛ mba payɩ papɩzaɣ se panɩɩ tɔm tɔbʋʋ yɔ pɛ-ɛsɩndaa, fenaɣ 7 ñɩŋga kajalaɣ kɩyakʋ wiye.+ 3 Nɛ ɛkalɩ ka-taa tɔm nɛ nɔɔ kɩkʋyaɣ+ samaɣ kadaɣ ŋga kɛwɛ Lɩm Nɔnɔɔ ɛsɩndaa yɔ kɛ-ɛsɩndaa, kpaɣnɩ tanaŋ tɛɛ nɛ piwolo pɩtalɩ wɩsɩ siɣu. Ɛkalɩ-kɛ abalaa, halaa nɛ mba payɩ papɩzaɣ se panɩɩ tɔm taa yɔ pɛ-ɛsɩndaa; nɛ samaɣ welisi Paɣtʋ takayaɣ taa tɔm camɩyɛ.+ 4 Nɛ takayɩsɩ mayʋ Ɛsɩdrasɩ* kaasɩŋ ɖasɩ tendene nɖɩ paalabɩ kigbeɣluu ŋgʋ kɩ-yɔɔ yɔ ɖɩ-yɔɔ; nɛ Matitiya, Sema, Anaya, Uriya, Hilikiya nɛ Maaseyiya paasɩŋ ɛ-cɔlɔ, e-nesi kɩbanzɩ yɔɔ; nɛ Pedayiya, Misaayɛɛlɩ, Malɩkiiya,+ Asuum, Hasɩ-Badanaa, Zakarii nɛ Mesulam paba ñaasɩŋ ɛ-nɩmɩyɛ yɔɔ.

5 Ɛsɩdrasɩ kuli takayaɣ samaɣ kpeekpe ɛsɩndaa, mbʋ pʋyɔɔ yɔ ɛɛsɩŋ lone nɖɩ ɖɩkʋyaa nɛ pɩkɩlɩ samaɣ ñɩnɖɛ yɔ ɖɩ-taa. Ekuli-kɛ lɛ, samaɣ kpeekpe kʋyɩ nɛ kasɩŋ. 6 Ðɩnɛ ɛlɛ Ɛsɩdrasɩ sa Ɛsɔ toovenim tʋ Yehowa, Ɛsɔ sɔsɔ, nɛ ɛyaa samaɣ kpeekpe tisi se: «Amɛn!* Amɛn!»+ nɛ pakpazɩ pe-nesi nɛ ɛsɔdaa kiŋ. Pʋwayɩ lɛ, poluŋ Yehowa ɛsɩndaa nɛ papa pɛ-ɛsa nɛ tɛtʋ. 7 Nɛ Yesuwa, Bani, Serebiya,+ Yamiini, Akubɩ, Sabɩtaayɩ, Hodiya, Maaseyiya, Kelita, Azariya, Yozabaadɩ,+ Hanaanɩ nɛ Pelayiya mba paakɛ Leevi mba yɔ, pɛwɛɛ nɛ palɩzɩɣ samaɣ Paɣtʋ tɔbʋʋ,+ nɛ alɩwaatʋ ndʋ tɩ-taa lɛ samaɣ ñaasɩŋ mbʋ. 8 Nɛ paawɛɛ nɛ pakalɩɣ takayaɣ taa tɔm, Ɛsɔ toovenim tʋ Paɣtʋ nɛ nɔɔ kɩkʋyaɣ, palɩzɩɣ tɩ-taa camɩyɛ nɛ peyeki nɛ panɩɣ tɩ-tɔbʋʋ; mbʋ pasɩnɩ samaɣ se kanɩɩ tɔm ndʋ pakalaɣ yɔ tɩ-taa.*+

9 Nɛ Nehemiya weyi ɛɛkɛ egeetiye ñʋʋdʋ* yɔ, cɔjɔ Ɛsɩdrasɩ+ weyi ɛɛkɛ takayɩsɩ mayʋ yɔ,* nɛ Leevi ñɩma mba pawɩlaɣ tɔm samaɣ yɔ peheyi samaɣ kpeekpe se: «Evemiye ɖɩnɛ ɖɩkɛ kiɖeɖeye mɩ-Ɛsɔ Yehowa ɛsɩndaa.+ Ɩtaacaɣ kʋñɔwiye nɛ itaawii.» Mbʋ pʋyɔɔ yɔ samaɣ kpeekpe kaawɛɛ nɛ kewiɣ alɩwaatʋ ndʋ kanɩɣaɣ Paɣtʋ takayaɣ taa tɔm yɔ. 10 Nɛ Nehemiya heyi-wɛ se: «Iwolo nɛ ɩtɔɔ mbʋ pɩwɛ num* yɔ nɛ ɩñɔɔ mbʋ pɩwɛ leleŋ yɔ nɛ itiyini tɔɔnaɣ+ mba patɩtɩzɩ nabʋyʋ yɔ; mbʋ pʋyɔɔ yɔ evemiye ɖɩnɛ ɖɩkɛ kiɖeɖeye ɖa-Kɩbaɣlʋ ɛsɩndaa, ɩtaacaɣ pʋtɔdɩyɛ, mbʋ pʋyɔɔ yɔ Yehowa taa leleŋ kɛnɩ mi-ɖoŋ.»* 11 Nɛ Leevi mba hɛzaɣ samaɣ kpeekpe laŋɩyɛ nɛ peheyiɣ-kɛ se: «Isu mbʋ! Mbʋ pʋyɔɔ yɔ evemiye ɖɩnɛ ɖɩkɛ kiɖeɖeye, ɩtaacaɣ pʋtɔdɩyɛ.» 12 Nɛ samaɣ kpeekpe ɖɛɛ se kɔtɔɔ nɛ kɔñɔɔ nɛ ketiyini tɔɔnasɩ lalaa nɛ kɛmɛyɩ amɛya sɔsɔna,+ mbʋ pʋyɔɔ yɔ kaanɩ tɔm ndʋ paawɩlɩ-kɛ yɔ tɩ-taa.+

13 Nɛ kɩyakʋ 2 ñɩŋgʋ wiye lɛ, samaɣ kpeekpe taa hɔŋ ñʋndɩnaa, cɔjɔnaa nɛ Leevi mba powolo pekpeɣli takayɩsɩ mayʋ Ɛsɩdrasɩ* cɔlɔ se patasɩ Paɣtʋ taa nɩʋ nɛ pɩkpaɖɩ. 14 Peeɖe panawa se pama Paɣtʋ ndʋ Yehowa kaatɩŋnɩ Moyizi yɔɔ nɛ ɛɖʋ yɔ tɩ-taa se pɩɩwɛɛ se Izrayɛɛlɩ mba ɩcaɣ coka* tɛɛ fenaɣ 7 ñɩŋga kazandʋ alɩwaatʋ taa,+ 15 nɛ pɩwɛɛ se posusi+ nɛ pɔyɔɔdɩ pɛ-tɛtʋ tɩŋa taa nɛ Yeruzalɛm kpeekpe taa se: «Ɩkpa pʋŋ egeetiye taa nɛ ɩsɛtɩ oliivi tɩŋ pilinzi, num tɩŋ pilinzi, mirɩtɩ tɩŋ pilinzi, sɩ-tɩŋa sɩ nɛ sɩ-hatʋ, paadɛtʋ nɛ tɩŋ lɛɛŋ pilinzi nɛ sɩ-hatʋ nɛ ɩkɔna nɛ ɩlabɩnɩ coka ɛzɩ pamaʋ yɔ.»

16 Nɛ ɛyaa samaɣ wolo nɛ pɔkɔnɩ tɩŋ pilinzi nɛ pesiɣ pa-tɩ coka, paa weyi lɛ, e-kuduyuu ñʋʋ taa, nɛ pa-kadasɩ taa, Ɛsɔ toovenim tʋ ɖɩɣa kadasɩ taa,+ Lɩm Nɔnɔɔ+ kadaɣ taa nɛ Efrayim Nɔnɔɔ+ kadaɣ taa. 17 Mbʋ samaɣ taa ñɩma mba payɩ palɩnɩ yomiye taa nɛ papɩsɩ yɔ pesiɣ coka nɛ pacaɣ a-tɛɛ, mbʋ pʋyɔɔ yɔ pɩɩkpaɣʋnɩ ɖooo Nuuni pɩyalʋ Yozuwee+ alɩwaatʋ taa nɛ pɩtalɩ puwiye yɔ, wiɖiyi Izrayɛɛlɩ mba taatɔɔ kazandʋ ndʋ mbʋ, pʋyɔɔ lɛ paawɛ amɛya sɔsɔna taa.+ 18 Nɛ kpaɣnɩ kajalaɣ kɩyakʋ nɛ piwolo kɛdɛzaɣ kɩyakʋ wiye lɛ, paawɛɛ nɛ pakalɩɣ Ɛsɔ toovenim tʋ Paɣtʋ takayaɣ paa evemiye nɖɩ.+ Nɛ pɔtɔɔ kazandʋ kɩyakɩŋ 7, nɛ kɩyakʋ 8 ñɩŋgʋ wiye lɛ, pala ŋgee kigbeɣluu ɛzɩ paɣtʋ pɔzʋʋ yɔ.+

9 Fenaɣ ŋga ka-kɩyakʋ 24 ñɩŋgʋ wiye lɛ, Izrayɛɛlɩ mba kaakpeɣlaa; paasu fɔlɔtɔnaa nɛ papɩyɩɣ po-tomnasɩ yɔɔ puuyuu nɛ pɔhɔkʋʋ nɔsɩ.+ 2 Ðɩnɛ ɛlɛ mba paakɛ Izrayɛɛlɩ lʋlʋʋ taa piya yɔ, poposi pa-tɩ nɛ agbaaɣdaa mba tɩŋa,+ nɛ pakʋyɩ nɛ pokuli pa-maɣmaɣ pa-kɩwɛɛkɩm yɔɔ nɛ pa-caanaa kɩdɛkɛdɩm yɔɔ.+ 3 Pʋwayɩ lɛ, pasɩŋ po-lona taa nɛ pakalɩ pɛ-Ɛsɔ Yehowa Paɣtʋ takayaɣ nɛ nɔɔ kɩkʋyaɣ+ ñɩɣtʋ 3; nɛ paɖaɣnɩ kpaɣʋ ñɩɣtʋ 3 nɛ pokuluuni pa-kɩwɛɛkɩm yɔɔ nɛ poluŋuu pɛ-Ɛsɔ Yehowa tɛɛ.

4 Yesuwa, Bani, Kadɩmɩyɛɛlɩ, Sebaniya, Buunii, Serebiya,+ Bani nɛ Kenanii paasɩŋ Leevi mba tendene yɔɔ,+ nɛ pama kubusi ɖoŋ nɛ pɛ-Ɛsɔ Yehowa cɔlɔ kiŋ. 5 Nɛ Leevi mba Yesuwa, Kadɩmɩyɛɛlɩ, Bani, Hasabiniya, Serebiya, Hodiya, Sebaniya nɛ Petahiya pɔyɔɔdɩ se: «Ɩkʋyɩ nɛ ɩsa mɩ-Ɛsɔ Yehowa nɛ pɩkpaɣ nɛ pɩɖɛɛ tam tam.*+ Yele nɛ pasa ña-hɩɖɛ nɖɩ ɖɩ-yɔɔ wɛ ñamtʋ yɔ, nɖɩ ɖɩkɩlɩ wazasɩ nɛ samtʋ tɩŋa yɔ.

6 «Ñe-ɖeke ñɛkɛnɩnɩ Yehowa;+ ñalɩzɩnɩ ɛsɔdaa, ɛɛɛ, ñalɩzɩnɩ ɛsɔdaa tɛ ɛsɔdaa nɛ ki-yoyaa tɩŋa, ñalɩzɩnɩ tɛtʋ nɛ mbʋ payɩ pɩwɛ tɩ-yɔɔ yɔ, teŋgunaa nɛ mbʋ payɩ pɩwɛ pa-taa yɔ. Ñɔɖɔkʋʋnɩ pɩtɩŋa pi-wezuu, nɛ ɛsɔdaa yoyaa luŋuu ñɛ-tɛɛ. 7 Ñɛkɛnɩ Yehowa, Ɛsɔ toovenim tʋ, weyi ɛñɩɣ niye Abram+ yɔɔ nɛ ɛlɩzɩ-ɩ Kalɩdee mba tɛ Uuri+ tɛtʋ taa nɛ ɛha-ɩ hɩɖɛ se Abraham+ yɔ. 8 Ŋnawa se ɛ-laŋɩyɛ wɛ siɣsiɣ ñɛ-ɛsɩndaa,+ pʋyɔɔ ŋɖʋ ɛgbɛyɛ ña nɛ ɩ mɩ-hɛkʋ taa se ŋcɛlɩɣ-ɩ Kanaŋ mba, Hɛɛtɩ mba, Amoori mba, Perizi mba, Yebuusi mba nɛ Girgasɩ mba ɛjaɖɛ, se ŋcɛlɩɣ-ɖɩ ɛ-lʋlʋʋ taa mba;*+ nɛ ŋɖɔm ñɔ-tɔm yɔɔ, mbʋ pʋyɔɔ yɔ ŋkɛ siɣsiɣ tʋ.

9 «Pʋyɔɔ ŋna ɖɔ-cɔzɔnaa kʋñɔŋ Ejipiti+ nɛ ŋnɩɩ po-kubusi Teŋgu Kɩsɛɛmʋʋ nɔɔ. 10 Nɛ ŋla yʋsasɩ nɛ maamaaci lakasɩ nɛ ŋkʋyɩnɩ Farawɔɔ nɛ ɛ-lɩmɖʋyaa nɛ ɛ-ɛjaɖɛ taa mba tɩŋa yɔɔ,+ mbʋ pʋyɔɔ yɔ ŋŋnawa se palabɩ tɩ kpazʋʋ lakasɩ+ ña-samaɣ yɔɔ. Ŋŋyeba nɛ ña-hɩɖɛ sɛɛ, nɛ ɖɩsɛ mbʋ halɩ nɛ sɔnɔ.+ 11 Ŋfaɣ teŋgu pɛ-ɛsɩndaa, nɛ piyele nɛ pɔɖɔ tɛtʋ waɣwaɣ yɔɔ nɛ pɛtɛzɩ teŋgu,+ nɛ ŋlɔ mba paɖʋwaɣ pa-wayɩ yɔ lɩm cukaŋ taa ɛzɩ pɔlɔʋ pɩyɛ lɩm ɖoŋ ñɩmbʋ taa yɔ.+ 12 Ŋɖiyi-wɛ wɩsɩ taa nɛ mɩndʋ tilimiye; nɛ ɖoo taa lɛ, ŋɖiyi-wɛ nɛ miŋ tilimiye, se ɖɩñandɩ nʋmɔʋ ŋgʋ kɩ-taa pɩwɛɛ se pɔɖɔ yɔ.+ 13 Ŋtibi Sinayii Pʋʋ yɔɔ,+ ŋyɔɔdɩnɩ-wɛ nɛ ɛsɔdaa+ nɛ ŋcɛlɩ-wɛ tɔm hʋʋ ɖʋtʋ siɣsiɣ ñɩndʋ, toovenim paɣtʋ,* ɖʋtʋ nɛ kpalɩtʋ kɩbandʋ.+ 14 Ŋyeba nɛ patɩlɩ ña-Sabaatɩ kiɖeɖeu,+ nɛ ŋtɩŋnɩ ña-lɩmɖʋyʋ Moyizi yɔɔ nɛ ŋcɛlɩ-wɛ kpalɩtʋ, ɖʋtʋ nɛ paɣtʋ. 15 Ñɔɔsɩ wɩɣaɣ-wɛ lɛ ŋha-wɛ kpɔnɔ nɛ ɛsɔdaa kiŋ,+ nɛ lɔkɔtʋ kaaɖɛ-wɛ lɛ ŋlɩzɩ lɩm nɛ kaaʋ taa,+ nɛ ŋheyi-wɛ se pasʋʋ nɛ pamʋ ɛjaɖɛ nɖɩ ŋŋɖuwaa* se ŋcɛlɩɣ-wɛ yɔ.

16 «Ɛlɛ paba, ɖɔ-cɔzɔnaa mba, palabɩ tɩ kpazʋʋ lakasɩ+ nɛ papɩsɩ ñʋʋ taa ɖoŋ tɩnaa,*+ nɛ patiwelisi ña-kpalɩtʋ. 17 Pekizi welisuu,+ nɛ patɩtɔzɩ ñe-piti lakasɩ nzɩ ŋlabɩ pɛ-hɛkʋ taa yɔ sɩ-yɔɔ, ɛlɛ papɩsɩ ñʋʋ taa ɖoŋ tɩnaa* nɛ palɩzɩ pa-tɩ ñʋʋdʋ nɔɔyʋ se papɩsɩ po-yomiye taa Ejipiti.+ Ɛlɛ ŋkɛ Ɛsɔ weyi ɛsɔɔlɩ kpeɣu yɔ,* weyi ɛnɩɣ ɛyaa siziŋ yɔ nɛ pʋtɔdɩyɛ nayʋ, ŋŋkɔʋ pana lɛɛ lɛɛ nɛ ñɔ-sɔɔlɩm siɣsiɣ ñɩmbʋ ɖɔ pɩdɩɩfɛyɩ,+ nɛ ŋtɩlɔ-wɛ.+ 18 Halɩ paalubi pa-tɩ ñɩɣtʋ neɣye sɩʋ kpeliɣa* nɛ pɔtɔŋ se: “Ñɛ-Ɛsɔ weyi ɛlɩzɩ-ŋ Ejipiti yɔ ɛnʋ yɔ,”+ nɛ pala kaañamtʋ lakasɩ sɔsɔsɩ, 19 paa mbʋ yɔ, ña lɛ, ña-pʋtɔdɩyɛ naʋ sɔsɔm yɔɔ lɛ, ŋtɩlɔ-wɛ kañɩmbusuu taa.+ Mɩndʋ tilimiye ɖiyaɣ-wɛ pa-nʋmɔʋ taa wɩsɩ taa, nɛ ɖitiposi ɖɩ-tɩ nɛ wɛ; nɛ ɖoo taa lɛ miŋ tilimiye ñandaɣ nʋmɔʋ ŋgʋ pɩɩwɛɛ se patɩŋ yɔ, nɛ ɖitiposi ɖɩ-tɩ nɛ wɛ ɖɔɖɔ.+ 20 Nɛ ŋha-wɛ ñe-fezuu kɩbaŋʋ se pɩsa nɛ pɛwɛɛnɩ lɛɣtʋ,+ nɛ ŋtɩlɩzɩ ña-maana pɔ-nɔsɩ taa,+ nɛ ŋha-wɛ lɩm alɩwaatʋ ndʋ lɔkɔtʋ ɖɛ-wɛ yɔ.+ 21 Ŋha-wɛ tɔɔnaɣ kañɩmbusuu taa pɩnzɩ 40.+ Patɩtɛɖɩ nabʋyʋ. Po-tokonaa tɩcɩyɩ,+ nɛ pa-nɩŋgbanzɩ tihuu.

22 «Ŋcɛlɩ-wɛ kewiyisi nɛ ajɛɛ, nɛ ŋtayɩ-wɛ a-tɛtʋ,+ nɛ piyele nɛ pamʋ Sihɔɔnɩ+ ɛjaɖɛ, pʋ-tɔbʋʋ se Hɛsɩbɔɔnɩ+ wiyaʋ ɛjaɖɛ, nɛ pɩkpɛndɩnɩ ɖɔɖɔ Basaanɩ wiyaʋ Oogi+ ɛjaɖɛ. 23 Ŋyeba nɛ pa-pɩyalaa ɖɔɔ ɛzɩ ɛsɔdaa tɩɩnzɩ yɔ.+ Pʋwayɩ lɛ ŋwoni-wɛ ɛjaɖɛ nɖɩ ŋŋheyi pɔ-cɔzɔnaa se pɩwɛɛ se pasʋʋ nɛ pamʋ-ɖɩ yɔ ɖɩ-taa.+ 24 Nɛ pa-pɩyalaa sʋʋ nɛ pamʋ ɛjaɖɛ,+ nɛ ŋluzi pɛ-tɛɛ Kanaŋ ñɩma+ mba paakɛ ɛjaɖɛ nɖɩ ɖɩ-taa mba yɔ, nɛ ŋɖʋzɩ-wɛ pe-nesi tɛɛ, pa-awiya nɛ pɩkpɛndɩnɩ ɛjaɖɛ taa ɛyaa, se palabɩ-wɛ ɛzɩ pɔsɔɔlʋʋ yɔ. 25 Nɛ pamʋ tɛtʋ ɖoŋ ñɩndʋ*+ nɛ tɛtʋ ndʋ tɩwɛ mʋzʋŋ yɔ,+ nɛ pamʋ ɖɩsɩ nzɩ wondu kɩbandʋ ndɩ ndɩ su sɩ-taa yɔ, lɔkɔnaa* mba paatɛm-wɛ huyuu yɔ, viiñi hayɩm, oliivi hayɩm,+ nɛ tɩŋ weyi ɩlʋlʋʋ yɔ pɩfɛyɩ kalʋʋ. Nɛ pɔtɔɔ nɛ pahaɣ nɛ paɖʋ num, nɛ pɛmɛyɩ ña-kɩbandʋ sɔsɔtʋ taa.

26 «Paa mbʋ yɔ, patɩña, pakaɖɩnɩ-ŋ+ nɛ paha ña-Paɣtʋ siɣye.* Pakʋ ña-nayaa mba paapaɣ-wɛ se papɩsɩnɩ-wɛ ñɔ-yɔɔ yɔ, nɛ pala kaañamtʋ sɔsɔtʋ lakasɩ.+ 27 Pʋyɔɔ ŋŋɖʋzɩ-wɛ po-koyindinaa nesi tɛɛ,+ nɛ paba ñawɩlaɣ-wɛ kʋñɔŋ tam.+ Ɛlɛ pɛwɛɣ kʋñɔŋ taa lɛ, pamakɩ kubusi nɛ ñɔ-cɔlɔ kiŋ nɛ ŋwelisiɣni-wɛ nɛ ɛsɔdaa; nɛ ña-pʋtɔdɩyɛ naʋ sɔsɔm yɔɔ lɛ, ŋhaɣaɣ-wɛ ñʋʋ yaɖaa se poholi-wɛ po-koyindinaa nesi tɛɛ.+

28 «Ɛlɛ pañɩtɩɣ nɛ poholi-wɛ lɛ, paɖaɣnɩ paɣzʋʋ kɩdɛkɛdɩm labʋ ñɛ-ɛsɩndaa,+ nɛ ŋɖʋzʋʋ-wɛ po-koyindinaa nesi tɛɛ nɛ paba ñoluzuu-wɛ.*+ Ðɩnɛ ɛlɛ papɩsaɣ nɛ payaɣ-ŋ se ŋsɩnɩ-wɛ,+ nɛ ña lɛ ŋwelisaɣni-wɛ nɛ ɛsɔdaa nɛ ŋlɩzɩɣ-wɛ tam sakɩyɛ ña-pʋtɔdɩyɛ naʋ sɔsɔm yɔɔ.+ 29 Ŋpakaɣ-wɛ se pɩsa nɛ ŋpɩsɩnɩ-wɛ ña-Paɣtʋ yɔɔ, paa mbʋ yɔ palakaɣ tɩ kpazʋʋ lakasɩ nɛ pekiziɣ ña-kpalɩtʋ yɔɔ ɖɔm;+ pekizaɣ ña-ɖʋtʋ yɔɔ ɖɔm, ña-ɖʋtʋ ndʋ tɩhaɣ ɛyʋ wezuu ye ɛɖɔŋ tɩ-yɔɔ yɔ.+ Ɛlɛ paha-ŋ siɣye nɛ pala ñʋʋ taa ɖoŋ lakasɩ* nɛ pekizi welisuu. 30 Ŋwɩlɩ-wɛ suuɖu+ pɩnzɩ sakɩyɛ nɛ ŋwɛɛ ŋtɩŋɩɣnɩ ña-nayaa yɔɔ nɛ ŋpakɩ-wɛ nɛ ñe-fezuu, ɛlɛ pekizi welisuu. Nɛ pɩtɛmna se ŋɖʋzɩ-wɛ ajɛɛ taa ɛyaa nesi tɛɛ.+ 31 Ña-pʋtɔdɩyɛ naʋ sɔsɔm yɔɔ lɛ, ŋtɩɖɩzɩ-wɛ+ nɛ ŋtɩlɔ-wɛ ɖɔɖɔ, mbʋ pʋyɔɔ yɔ ŋkɛ Ɛsɔ weyi ɛnɩɣ ɛyaa siziŋ nɛ ɛnaɣ pʋtɔdɩyɛ yɔ.+

32 «Lɛɛlɛɛyɔ lɛ, hayɩ ɖɛ-Ɛsɔ, Ɛsɔ sɔsɔ, ɖoŋ tʋ, weyi ɛcaɣ sɔɔndʋ yɔ, weyi ɛɖɔkɩ ɛ-ɛgbɛyɛ nɛ ɛwɩlɩ sɔɔlɩm siɣsiɣ ñɩmbʋ yɔ,+ taani kʋñɔmɩŋ weyi payɩ ɩtalɩ ɖa nɛ ɖa-awiya, ɖa-awumbiya,+ ɖɔ-cɔjɔnaa,+ ɖa-nayaa,+ ɖɔ-cɔzɔnaa nɛ ña-samaɣ kpeekpe kpaɣnɩ Asiirii awiya+ alɩwaatʋ taa nɛ pɩkɔɔ pɩtalɩ sɔnɔ yɔ. 33 Ŋwɛ siɣsiɣ mbʋ payɩ pɩtalɩ-ɖʋ yɔ pɩ-taa, mbʋ pʋyɔɔ yɔ ŋlabɩ siɣsiɣ lakasɩ; ɛlɛ ɖalabɩnɩ kañatʋ lakasɩ.+ 34 Piyele nɛ ɖa-awiya, ɖa-awumbiya, ɖɔ-cɔjɔnaa nɛ ɖɔ-cɔzɔnaa lɛ, patɩɖɔ ña-Paɣtʋ yɔɔ nɛ patɩña ña-kpalɩtʋ nɛ tɔm ndʋ ŋtɔzaɣ-wɛ se ŋpaɣnɩ-wɛ yɔ.* 35 Halɩ alɩwaatʋ ndʋ paawɛ pe-kewiyaɣ taa nɛ panɩɣ leleŋ kɩbandʋ sakɩyɛ ndʋ ŋlabɩ-wɛ yɔ tɩ-yɔɔ nɛ pɛwɛɛ mʋzʋŋ tɛtʋ kɩwalɩtʋ ndʋ ŋha-wɛ yɔ tɩ-yɔɔ yɔ, patɩsɛ-ŋ+ nɛ patɩha siɣye pa-lakasɩ kɩdɛkɛdɩsɩ. 36 Nɛ sɔnɔ lɛ, ɖɩpɩsɩ yomaa,+ ɛɛɛ, ɖɩpɩsɩ yomaa ɛjaɖɛ nɖɩ ŋŋcɛlɩ ɖɔ-cɔzɔnaa se pɔtɔɔ ɖi-pee nɛ ɖi-wondu kɩbandʋ yɔ ɖɩ-taa. 37 Pee sakɩyɛ wena ɛjaɖɛ nɖɩ ɖɩlʋlʋʋ yɔ, awiya wena ŋsɩ ɖa-ñʋŋ yɔɔ ɖa-kɩdɛkɛdɩm yɔɔ yɔ, ana tɩnɩ-yɛ.+ Atɔkɩ kewiyitu ɖo-tomnasɩ nɛ ɖa-kpɩna yɔɔ ɛzɩ asɔɔlʋʋ yɔ, nɛ ɖɩwɛ kʋñɔŋ sɔsɔʋ taa.

38 «Pɩtɩŋa payɩ mbʋ yɔ pʋyɔɔ lɛ, ɖiɖuki ŋgee ɖuutu+ natʋyʋ nɛ ɖɩma-tʋ takayaɣ taa; ɖa-awumbiya, ɖɛ-tɛ Leevi mba nɛ ɖɔ-cɔjɔnaa ñɩɣ niye tɩ-yɔɔ nɛ pa-mayaɣ.»+

10 Mba pañɩɣ niye tɩ-yɔɔ nɛ pa-mayaɣ yɔ+ mba yɔ:

9 Leevi ñɩma mba pañɩɣ niye tɩ-yɔɔ yɔ mba yɔ: Azaniya pɩyalʋ Yesuwa, Binuwii weyi ɛlɩnɩ Henadaadɩ pɩyalaa taa yɔ, Kadɩmɩyɛɛlɩ,+ 10 nɛ po-koobiya Sebaniya, Hodiya, Kelita, Pelayiya, Hanaanɩ, 11 Mika, Rehob, Hasabiya, 12 Zakuurɩ, Serebiya,+ Sebaniya, 13 Hodiya, Bani nɛ Beninu.

14 Samaɣ ñʋndɩnaa mba pañɩɣ niye tɩ-yɔɔ yɔ mba yɔ: Parɔɔsɩ, Pahaatɩ-Mowaabʋ,+ Elam, Zatuu, Bani, 15 Buunii, Azɩgadɩ, Bebayii, 16 Adoniya, Bigivaayi, Adinɩ, 17 Atɛɛrɩ, Ezekiyaasɩ, Azuurɩ, 18 Hodiya, Asuum, Bezayi, 19 Harifu, Anatɔɔtɩ, Nebaayɩ, 20 Magɩpiyaasɩ, Mesulam, Heziiri, 21 Mesezabɛɛlɩ, Sadɔɔkɩ, Yaduwa, 22 Pelatiya, Hanaanɩ, Anaya, 23 Osee, Anaanɩya, Hasuubi, 24 Alohɛɛsɩ, Piila, Sobɛɛkɩ, 25 Rehum, Hasabɩna, Maaseyiya, 26 Ahiya, Hanaanɩ, Anaanɩ, 27 Maluuki, Harim nɛ Baanaa.

28 Samaɣ taa mba pɩkazaa yɔ: Cɔjɔnaa, Leevi mba, nɔnɔsɩ yɔɔ ɖaŋɩyaa, hendu teyaa, templo taa lɩmɖʋyaa* nɛ mba payɩ poposi pa-tɩ nɛ ajɛɛ taa mba se pɔɖɔ Ɛsɔ toovenim tʋ Paɣtʋ yɔɔ yɔ,+ pa nɛ pa-halaa, pa-pɩyalaa, nɛ pɛ-pɛlaa, mba payɩ pɛwɛnɩ sɩmtʋ nɛ tɔm taa nɩʋ lɛɣtʋ yɔ* 29 pɛkpɛndɩ po-koobiya yɔɔ, pɛ-ɛyaa mba pa-hɩla sɛwa yɔ pɔ-yɔɔ nɛ poɖuu ɖuutu nɛ pɔyɔɔdɩ se piyoo mba ye patɩɖɔ tɩ-yɔɔ yɔ; poɖuwaa se pɔɖɔŋ Ɛsɔ toovenim tʋ Paɣtʋ yɔɔ, ndʋ ɛtɩŋnɩ Ɛsɔ toovenim tʋ lɩmɖʋyʋ Moyizi yɔɔ nɛ ɛɖʋ yɔ, poɖuwaa se pɔɖɔŋ camɩyɛ ɖa-Kɩbaɣlʋ Yehowa kpalɩtʋ, ɛ-tɔm hʋʋ ɖʋtʋ nɛ ɛ-ɖʋtʋ tɩŋa yɔɔ. 30 Ðɩɩkaɣ cɛlʋʋ ɛjaɖɛ taa mba ɖɛ-pɛlaa, nɛ ɖɩɩkaɣ kpaɣʋ pɛ-pɛlaa nɛ ɖɩcɛlɩ ɖa-pɩyalaa.+

31 Ye ɛjaɖɛ taa mba ɩkɔnɩ pa-tadɩyɛ wondu nɛ tɔɔnasɩ pee ndɩ ndɩ se pɛpɛdɩɣ Sabaatɩ wiye yɔ, ɖɩɩkaɣ nabʋyʋ yabʋ pɔ-cɔlɔ Sabaatɩ wiye+ yaa evemiye kiɖeɖeye naɖɩyɛ wiye.+ Ðɩkaɣ yebu tɛtʋ nɛ tɩhɛzɩ pɩnaɣ 7 ñɩŋga taa,+ nɛ ɖɩɩkaɣ nɔɔyʋ pɔzʋʋ kɩmɩyɛ naɖɩyɛ.+

32 Pɩtasɩ lɛ, ɖɩɖʋ ɖa-taa se pɩwɛɛ se ɖa-taa paa weyi lɛ, ɛha sikli* hɔɔlʋʋ 3 ñɩŋgʋ paa pɩnaɣ ŋga ɖɛ-Ɛsɔ ɖɩɣa* tʋmɩyɛ yɔɔ,+ 33 se pɩsa nɛ pɔcɔnɩ ɖʋtʋ tʋnɛ ti-ɖeɖe: Kpɔnɔnaa mba patɩnɩɣ-wɛ ɖama yɔɔ yɔ,*+ tɔɔnaɣ pee kɩlaʋ ŋgʋ palaɣ ɖoŋ ɖoŋ yɔ,+ kɩlaʋ kɩñaɣzʋʋ ŋgʋ palaɣ ɖoŋ ɖoŋ Sabaatɩwaa+ nɛ fenasɩ kɩfasɩ wiye+ yɔ, nɛ kazandʋ ndʋ pɔtɔkɩ tɩ-alɩwaatʋ yɔɔ yɔ,+ wondu kiɖeɖetu, kɩwɛɛkɩm yɔɔ kɩlaŋ+ weyi ihuuzuu Izrayɛɛlɩ kɩwɛɛkɩm yɔɔ yɔ nɛ ɖɛ-Ɛsɔ ɖɩɣa tʋma lɛɛna kpeekpe.

34 Pɩtasɩ lɛ, ɖɩtɔ piye ɖasɩ nzɩ pɩwɛɛ se cɔjɔnaa, Leevi mba, nɛ ɛyaa samaɣ iwoni ɖɛ-Ɛsɔ ɖɩɣa taa, ɖɔ-cɔzɔnaa hɔŋ nɔsɩ taa yɔ sɩ-yɔɔ, se pɩsa nɛ powoni-sɩ paa pɩnaɣ ŋga alɩwaatʋ ndʋ paɖʋwa yɔ tɩ-yɔɔ nɛ pañaɣzɩ-sɩ miŋ ɖɛ-Ɛsɔ Yehowa altaaru yɔɔ ɛzɩ pamaʋ Paɣtʋ taa yɔ.+ 35 Paa pɩnaɣ ŋga lɛ, ɖɩkaɣ wonuu ɖɔɖɔ Yehowa ɖɩɣa taa ɖɛ-tɛtʋ yɔɔ kajalaɣ tɔɔnaɣ pee nɛ tɩŋ ndɩ ndɩ kajalaɣ pee,+ 36 pɩkpɛndɩnɩ ɖa-pɩyalaa taa kajalaɣ piya nɛ ɖa-kpɩna taa kajalaɣ wondu,+ ɛzɩ pamaʋ Paɣtʋ taa yɔ, nɛ ɖa-naŋ nɛ ɖa-pʋŋ nɛ ɖe-heŋ taa kajalaɣ wondu. Ðɩkaɣ-wɛ wonuu ɖɛ-Ɛsɔ ɖɩɣa taa, ɖiwokini-wɛ cɔjɔnaa mba palakɩ tʋmɩyɛ ɖɛ-Ɛsɔ ɖɩɣa taa yɔ.+ 37 Pɩtasɩ lɛ, ɖɩkaɣ wonuu ɖa-kajalaɣ tɔɔnaɣ mʋlʋm,*+ ɖa-haɖɛ, tɩŋ ndɩ ndɩ pee,+ vɛɛ kɩfalʋʋ nɛ num,+ nɛ ɖɩcɛlɩ cɔjɔnaa ɖɛ-Ɛsɔ ɖɩɣa wondu ɖɩzɩyɛ taa;*+ ɖɩkaɣ cɛlʋʋ ɖɔɖɔ Leevi mba ɖɛ-tɛtʋ yɔɔ tɔɔnaɣ hɔɔlʋʋ 10 ñɩŋgʋ,+ mbʋ pʋyɔɔ yɔ tɛtʋ ndʋ tɩ-taa payɩ ɖɩhayɩɣ yɔ, Leevi mba mʋʋnɩ hɔɔlʋʋ 10 ñɩŋgʋ tɩ-taa.

38 Nɛ pɩwɛɛ se cɔjɔ nɔɔyʋ, Aarɔɔnɩ lʋlʋʋ taa tʋ nɔɔyʋ ɛwɛɛ Leevi mba cɔlɔ alɩwaatʋ ndʋ Leevi mba mʋʋ hɔɔlʋʋ 10 ñɩŋgʋ yɔ; nɛ pɩwɛɛ ɖɔɖɔ se Leevi mba ɩha hɔɔlʋʋ 10 ñɩŋgʋ yɔɔ hɔɔlʋʋ 10 ñɩŋgʋ ɖɛ-Ɛsɔ ɖɩɣa,+ wondu ɖɩzɩyɛ ɖamɩŋ* taa. 39 Mbʋ pʋyɔɔ yɔ wondu ɖɩzɩyɛ* taa pɩwɛɛ se Izrayɛɛlɩ mba nɛ Leevi pɩyalaa powoni tɔɔnaɣ pee haɖɛ,+ vɛɛ kɩfalʋʋ nɛ num,+ nɛ peeɖe kooka kiɖeɖeɣa ñanzɩ wɛɛ, nɛ peeɖe ɖɔɖɔ cɔjɔnaa mba paɖʋʋ lɩm yɔ, nɔnɔsɩ yɔɔ ɖaŋɩyaa nɛ hendu teyaa pɛwɛɛ. Ðɩɩkaɣ labʋ kaakendu ɖɛ-Ɛsɔ ɖɩɣa yɔɔ.+

11 Samaɣ taa awumbiya kaawɛ Yeruzalɛm,+ ɛlɛ samaɣ hɔɔlʋʋ ŋgʋ kɩkazaa yɔ, kɩtɔ piye+ se hɔŋ 10 yɔɔ lɛ, kʋɖʋmʋʋ ewolo nɛ kɩcaɣ Yeruzalɛm, tɛtʋ kiɖeɖetu taa, nɛ hɔŋ 9 weyi pɩkazaa yɔ ɩcaɣ tɛtʋ lɛɛtʋ taa. 2 Pɩtasɩ lɛ, samaɣ wazɩ abalaa mba payɩ paha pa-tɩ se powoki nɛ pacaɣ Yeruzalɛm yɔ.

3 Egeetiye ñʋndɩnaa mba paawɛ Yeruzalɛm yɔ mba yɔ. (Izrayɛɛlɩ ñɩma mba pɩkazaa yɔ, cɔjɔnaa, Leevi mba, templo taa lɩmɖʋyaa*+ nɛ Salomɔɔ lɩmɖʋyaa pɩyalaa,+ paawɛ Yuuda tɛtʋ lɛɛtʋ taa, paa weyi lɛ ɛɛwɛ e-kotoŋa yɔɔ ɛ-tɛtʋ taa.+

4 Yuuda cejewiye taa mba nabɛyɛ nɛ Bɛnjamɛɛ cejewiye taa mba nabɛyɛ kaawɛ Yeruzalɛm ɖɔɖɔ.) Yuuda cejewiye taa lɛ Ataya, ɛɛkɛ Uziya pɩyalʋ, Zakarii pɩyalʋ, Amariya pɩyalʋ, Sefatiya pɩyalʋ, Mahalalɛɛlɩ weyi ɛlɩnɩ Perɛɛzɩ+ pɩyalaa taa yɔ ɛ-pɩyalʋ, 5 nɛ Maaseyiya weyi ɛɛkɛ Baaruuki pɩyalʋ, Koloozee pɩyalʋ, Azayiya pɩyalʋ, Adayaa pɩyalʋ, Yoyiyarib pɩyalʋ, Zakarii weyi ɛlɩnɩ Seelaa mba hɔʋ taa yɔ ɛ-pɩyalʋ. 6 Perɛɛzɩ pɩyalaa mba payɩ paawɛ Yeruzalɛm yɔ, paakpɛndɩ abalaa ɖoŋ tɩnaa 468.

7 Bɛnjamɛɛ cejewiye taa lɛ Saluu,+ ɛɛkɛ Mesulam pɩyalʋ, Yowɛɛdɩ pɩyalʋ, Pedayiya pɩyalʋ, Kolayiya pɩyalʋ, Maaseyiya pɩyalʋ, Itiyɛɛlɩ pɩyalʋ, Yesayɩya pɩyalʋ; 8 ɛlɛ wayɩ lɛ, Gabaayɩ nɛ Salaayɩ; paakpɛndɩ ɛyaa 928; 9 nɛ Zikiri pɩyalʋ Yowɛɛlɩ kaakɛnɩ pɔ-yɔɔ cɔnɩyʋ, nɛ Hasenuwa pɩyalʋ Yuuda kaakɛnɩ ɛ-tɛɛ tʋ weyi ɛsɩɣaɣnɩ-ɩ tɛtʋ yɔɔ cɔnʋʋ yɔ.

10 Cɔjɔnaa taa lɛ Yoyiyarib pɩyalʋ Yedaya, Yakiini,+ 11 Seraya, ɛɛkɛ Hilikiya pɩyalʋ, Mesulam pɩyalʋ, Sadɔɔkɩ pɩyalʋ, Merayɔɔtɩ pɩyalʋ, Ahitub+ weyi ɛɛkɛ Ɛsɔ toovenim tʋ ɖɩɣa* ɖiyiyu yɔ, ɛ-pɩyalʋ, 12 nɛ po-koobiya mba paalabɩ ɖɩɣa tʋmɩyɛ yɔ, paakpɛndɩ ɛyaa 822; nɛ Adayaa, ɛɛkɛ Yeroham pɩyalʋ, Pelaliya pɩyalʋ, Amɩzi pɩyalʋ, Zakarii pɩyalʋ, Pasuuri+ pɩyalʋ, Malɩkiiya pɩyalʋ, 13 nɛ e-koobiya, hɔŋ ñʋndɩnaa; paakpɛndɩ ɛyaa 242; nɛ Amasɩsaayi, ɛɛkɛ Azarɛɛlɩ pɩyalʋ, Azayi pɩyalʋ, Mesilemɔɔtɩ pɩyalʋ, Imɛɛrɩ pɩyalʋ, 14 nɛ po-koobiya mba paakɛ abalaa ɖoŋ tɩnaa mba pɛwɛ abalɩtʋ yɔ, paakpɛndɩ ɛyaa 128; nɛ Zabɩdɩyɛɛlɩ kaakɛnɩ pɔ-yɔɔ cɔnɩyʋ, hɔʋ ŋgʋ kɩ-taa ɛlɩnaa yɔ kɩ-hɩɖɛ kaasɛwa.

15 Nɛ Leevi mba taa lɛ Semayaa,+ ɛɛkɛ Hasuubi pɩyalʋ, Azɩrikam pɩyalʋ, Hasabiya pɩyalʋ, Buunii pɩyalʋ, 16 nɛ Sabɩtaayɩ+ nɛ Yozabaadɩ,+ palɩnɩ Leevi mba ñʋndɩnaa taa, mba cɔŋnaɣnɩ Ɛsɔ toovenim tʋ ɖɩɣa tʋma wena palakaɣ awayɩ yɔ a-yɔɔ; 17 nɛ Mataaniya,+ ɛɛkɛ Mikee pɩyalʋ, Zabɩdii pɩyalʋ, Azaafʋ+ pɩyalʋ, ɛnʋ lɛ hendu teyaa ñʋʋdʋ weyi ɛɖɛɣaɣ samtʋ hendu teyaa nɔɔ adɩma alɩwaatʋ taa yɔ,+ nɛ Bakɩbukiya weyi ɛsɩɣaɣnɩ e-koobiya yɔ, nɛ Abɩda, ɛɛkɛ Samuwaa pɩyalʋ, Galaalɩ pɩyalʋ, Yedutuunɩ+ pɩyalʋ. 18 Leevi ñɩma mba payɩ paawɛ tɛtʋ kiɖeɖetu taa yɔ, paakpɛndɩ 284.

19 Akubɩ nɛ Talɩmɔɔnɩ+ paakɛnɩ nɔnɔsɩ yɔɔ ɖaŋɩyaa, nɛ po-koobiya mba pefeŋaɣ nɔnɔsɩ yɔɔ yɔ; paakpɛndɩ ɛyaa 172.

20 Izrayɛɛlɩ ñɩma mba pɩkazaa yɔ, cɔjɔnaa nɛ Leevi mba, paawɛ Yuuda tɛtʋ ndɩ ndɩ lɛɛtʋ tɩŋa taa, paa weyi lɛ ɛ-cɔzɔnaa tɛtʋ ndʋ ehiɣaa yɔ tɩ-yɔɔ. 21 Templo taa lɩmɖʋyaa*+ kaawɛ Ofɛɛlɩ.+ Ziya nɛ Giisɩpa pɛɖɛɣaɣnɩ templo taa lɩmɖʋyaa* nɔɔ.

22 Uuzi kaakɛnɩ Leevi ñɩma mba paawɛ Yeruzalɛm yɔ pɔ-yɔɔ cɔnɩyʋ, ɛɛkɛ Bani pɩyalʋ, Hasabiya pɩyalʋ, Mataaniya+ pɩyalʋ, Mika weyi ɛlɩnɩ Azaafʋ pɩyalaa hendu teyaa taa yɔ, ɛ-pɩyalʋ; ɛnʋ cɔŋnaɣnɩ Ɛsɔ toovenim tʋ ɖɩɣa tʋma yɔɔ. 23 Mbʋ pʋyɔɔ yɔ wiyaʋ kaaɖʋ paɣtʋ hendu teyaa yɔɔ,+ nɛ pɩɩwɛɛ se pɛcɛlɩ-wɛ mbʋ pɩpɔzʋʋ-wɛ paa evemiye nɖɩ yɔ. 24 Nɛ Mesezabɛɛlɩ weyi ɛlɩnɩ Yuuda pɩyalʋ Zeraa pɩyalaa taa yɔ, ɛ-pɩyalʋ Petahiya kaakɛnɩ wiyaʋ lɔŋ tasɩyʋ* tɔm ndʋ payɩ titukaɣni samaɣ yɔ tɩ-yɔɔ.

25 Lona wena a-taa paacaɣaa yɔ nɛ a-hayɩm hɔɔlʋʋ taa lɛ, Yuuda samaɣ taa ɛyaa nabɛyɛ kaawɛ Kiriyatɩ-Arba+ nɛ tɛtʋ ndʋ tɩɩcɔ-kʋ nɛ tɩta yɔ tɩ-taa, Dibɔɔnɩ nɛ tɛtʋ ndʋ tɩɩcɔ-kʋ nɛ tɩta yɔ tɩ-taa, Yekabzeyɛɛlɩ+ nɛ kɩ-tɛtʋ cikpetu taa, 26 Yesuwa, Molada,+ Bɛtɩ-Pelɛɛtɩ,+ 27 Hazaar-Suwaalɩ,+ Beyɛɛrɩ-Seeba nɛ tɛtʋ ndʋ tɩɩcɔ-kʋ nɛ tɩta yɔ tɩ-taa, 28 Zikɩlaagɩ,+ Mekona nɛ tɛtʋ ndʋ tɩɩcɔ-kʋ nɛ tɩta yɔ tɩ-taa, 29 Ɛn-Rimɔɔnɩ,+ Zora,+ nɛ Yarmuti, 30 Zanowa,+ Adulam nɛ pɛ-tɛtʋ cikpetu taa, Lakisi+ nɛ kɩ-hayɩm nɛ Azeka+ nɛ tɛtʋ ndʋ tɩɩcɔ-kʋ nɛ tɩta yɔ tɩ-taa. Paacaɣ kpaɣnɩ Beyɛɛrɩ-Seeba nɛ piwolo Hinɔɔm Fɛɛʋ+ taa.

31 Nɛ Bɛnjamɛɛ cejewiye taa mba kaawɛ Geba,+ Mikmaasɩ, Ayiya, Betɛɛlɩ+ nɛ tɛtʋ ndʋ tɩɩcɔ-kʋ nɛ tɩta yɔ tɩ-taa, 32 Anatɔɔtɩ,+ Noob,+ Ananiya, 33 Hazɔɔrɩ, Ramaa,+ Gitayim, 34 Hadid, Zeboyim, Nebalaatɩ, 35 Lod nɛ Onoo,+ wondu luɖaa fɛɛʋ taa. 36 Leevi mba tindima wena alɩnɩ Yuuda yɔ a-taa naayɛ caɣ Bɛnjamɛɛ egeetiye taa.

12 Cɔjɔnaa nɛ Leevi ñɩma mba pa nɛ Seyalɩtɩyɛɛlɩ+ pɩyalʋ Zorobabɛɛlɩ+ nɛ Yesuwa+ paalɩnɩ yomiye taa nɛ pakpa yɔ, mba yɔ: Seraya, Yereemii, Ɛsɩdrasɩ, 2 Amariya, Maluuki, Hatuusi, 3 Sekaniya, Rehum, Meremɔɔtɩ, 4 Ido, Ginetɔɔyɩ, Abiya, 5 Miyamiinɩ, Maadiya, Biliga, 6 Semayaa, Yoyiyarib, Yedaya, 7 Saluu, Amɔɔkɩ, Hilikiya nɛ Yedaya. Mba kaakɛnɩ cɔjɔnaa ñʋndɩnaa nɛ po-koobiya ñʋndɩnaa, Yesuwa alɩwaatʋ taa.

8 Leevi mba yɔ: Yesuwa, Binuwii, Kadɩmɩyɛɛlɩ,+ Serebiya, Yuuda nɛ Mataaniya+ weyi ɛ nɛ e-koobiya pɔcɔŋnaɣ sɛtʋ hendu teu yɔɔ yɔ. 9 Po-koobiya Bakɩbukiya nɛ Uuni paasɩŋaa nɛ paha-wɛ nɛ ɛsa nɛ palakɩ feŋuu tʋma.* 10 Yesuwa lʋlɩ Yoyiyakim, nɛ Yoyiyakim lʋlɩ Eliyasiib,+ nɛ Eliyasiib ñalʋlɩ Yoyiyadaa.+ 11 Yoyiyadaa lʋlɩ Yonataanɩ, nɛ Yonataanɩ lʋlɩ Yaduwa.

12 Yoyiyakim alɩwaatʋ taa, cɔjɔnaa mba paakɛ hɔŋ ñʋndɩnaa yɔ mba yɔ: Seraya+ hɔʋ taa lɛ, Merayiya; Yereemii hɔʋ taa lɛ, Anaanɩya; 13 Ɛsɩdrasɩ+ hɔʋ taa lɛ, Mesulam; Amariya hɔʋ taa lɛ, Yehohanaanɩ; 14 Malukii hɔʋ taa lɛ, Yonataanɩ; Sebaniya hɔʋ taa lɛ, Yosɛɛfʋ; 15 Harim+ hɔʋ taa lɛ, Adɩna; Merayɔɔtɩ hɔʋ taa lɛ, Hɛlɩkayɩ; 16 Ido hɔʋ taa lɛ, Zakarii; Ginetɔɔnɩ hɔʋ taa lɛ, Mesulam; 17 Abiya+ hɔʋ taa lɛ, Zikiri; Miniyamini hɔʋ taa lɛ, . . . ;* Mowadiya hɔʋ taa lɛ, Pilɩtaayɩ; 18 Biliga+ hɔʋ taa lɛ, Samuwaa; Semayaa hɔʋ taa lɛ, Yehonataanɩ; 19 Yoyiyarib hɔʋ taa lɛ, Matenaayɩ; Yedaya+ hɔʋ taa lɛ, Uuzi; 20 Salaayɩ hɔʋ taa lɛ, Kalaayɩ; Amɔɔkɩ hɔʋ taa lɛ, Ebɛɛrɩ; 21 Hilikiya hɔʋ taa lɛ, Hasabiya; Yedaya hɔʋ taa lɛ, Netanɛɛlɩ.

22 Eliyasiib, Yoyiyadaa, Yohanaanɩ nɛ Yaduwa+ alɩwaatʋ taa, paama Leevi mba hɔŋ ñʋndɩnaa hɩla takayaɣ taa, pɩkpɛndɩnɩ cɔjɔnaa, pɩkɔɔ pɩtalɩ Pɛrɩsɩ tʋ Dariyusi kewiyitu tɔɔʋ alɩwaatʋ taa.

23 Paama Leevi ñɩma mba paakɛ hɔŋ ñʋndɩnaa yɔ, pa-hɩla takayaɣ ŋga ka-taa pamaɣaɣ mbʋ mbʋ pɩlakaɣ alɩwaatʋ ndʋ yɔ ka-taa, pɩkɔɔ pɩtalɩ Eliyasiib pɩyalʋ Yohanaanɩ alɩwaatʋ taa. 24 Hasabiya, Serebiya, nɛ Kadɩmɩyɛɛlɩ+ pɩyalʋ Yesuwa+ paakɛnɩ Leevi mba ñʋndɩnaa, nɛ po-koobiya kaasɩŋaa nɛ paha-wɛ nɛ ɛsa se pasa Ɛsɔ nɛ pɛsɛɛ-ɩ, ɛzɩ Ɛsɔ toovenim tʋ tɛ ɛyʋ Daviid kaaɖʋʋ paɣtʋ yɔ,+ feŋiyaa tindimiye lɛɛɖɛ kaasɩŋ lɛɛɖɛ cɔlɔ. 25 Mataaniya,+ Bakɩbukiya, Abɩdɩyasɩ, Mesulam, Talɩmɔɔnɩ nɛ Akubɩ+ paakɛ nɔnɔsɩ yɔɔ ɖaŋɩyaa,+ pefeŋaɣ kuduyuŋ weyi ɩ-tɛɛ pasɩɣaɣ wondu yɔ ɩ-yɔɔ, nɔnɔsɩ cɔlɔ. 26 Palakaɣ tʋmɩyɛ Yozadaakɩ pɩyalʋ Yesuwa+ pɩyalʋ Yoyiyakim alɩwaatʋ taa, nɛ egeetiye ñʋʋdʋ Nehemiya nɛ cɔjɔ Ɛsɩdrasɩ+ weyi ɛɛkɛ takayɩsɩ mayʋ* yɔ pa-alɩwaatʋ taa.

27 Pɔtɔkaɣ Yeruzalɛm kolonzi nɔnɔsɩ tʋlʋʋ kazandʋ lɛ, pañɩnɩ Leevi mba lona wena a-taa payɩ paawɛɛ yɔ nɛ pɔkɔnɩ-wɛ Yeruzalɛm se pɔtɔɔ nɔnɔsɩ tʋlʋʋ kazandʋ nɛ amɛya, sɛtʋ hendu,+ ŋgbamɛɛ, cɩmʋʋ wondu ndʋ tɩ-yɔɔ wɛ nimasɩ yɔ nɛ cɩmɩŋ. 28 Nɛ hendu teyaa pɩyalaa* kɔɔ nɛ pekpeɣli, palɩnɩ egeetiye taa,* nɛ Yeruzalɛm cɔlɔ kpɛɛɛ, nɛ Netofa mba+ tɛtʋ cikpetu taa, 29 nɛ Bɛtɩ-Gilgaalɩ,+ nɛ Geba+ nɛ Azɩmavɛɛtɩ+ ageeta taa, mbʋ pʋyɔɔ yɔ hendu teyaa kaama pa-tɩ tɛtʋ cikpetu ndɩ ndɩ Yeruzalɛm cɔlɔ kpɛɛɛ. 30 Nɛ cɔjɔnaa nɛ Leevi mba papɩsɩ pa-tɩ kele kele, nɛ papɩsɩ ɖɔɖɔ samaɣ,+ nɔnɔsɩ+ nɛ koloŋa+ kele kele.

31 Ðɩnɛ ɛlɛ mankpanɩ Yuuda awumbiya koloŋa ñʋʋ taa. Pɩtasɩ lɛ, manɖʋ sɛtʋ hendu teyaa tindima sɔsɔna 2, nɛ ɛyaa samaɣ nakɛyɛ tɩŋaɣ paa tindimiye nɖɩ; kajalaɣ tindimiye ɖɔm koloŋa yɔɔ nesi kɩbanzɩ yɔɔ nɛ ɖɩɖɛɛnɩ Tɔlɩma Huwa Nɔnɔɔ+ cɔlɔ kiŋ. 32 Osayiya nɛ Yuuda awumbiya hɔɔlʋʋ ɖɔŋaɣ pa-wayɩ, 33 pa nɛ Azariya, Ɛsɩdrasɩ, Mesulam, 34 Yuuda, Bɛnjamɛɛ, Semayaa nɛ Yereemii. 35 Cɔjɔnaa pɩyalaa mba paaɖɔkɩ aganda yɔ, pa-taa nabɛyɛ kaawɛ pɔ-cɔlɔ:+ Zakarii, ɛɛkɛ Yonataanɩ pɩyalʋ, Semayaa pɩyalʋ, Mataaniya pɩyalʋ, Mikayiya pɩyalʋ, Zakuurɩ pɩyalʋ, Azaafʋ+ pɩyalʋ, 36 nɛ e-koobiya Semayaa, Azarɛɛlɩ, Milalaayɩ, Gilalaayɩ, Maayɩ, Netanɛɛlɩ, Yuuda nɛ Ananii, paaɖɔkɩ Ɛsɔ toovenim tʋ tɛ ɛyʋ Daviid minziiki wondu;+ nɛ takayɩsɩ mayʋ* Ɛsɩdrasɩ+ kaaɖɛ-wɛ nɔɔ. 37 Patalɩ Hiɖe Nɔnɔɔ+ cɔlɔ lɛ, pɛɖɛɛ saaa nɛ pakpa Daviid Tɛtʋ+ Tendemee+ yɔɔ, paatɩŋnɩ Daviid Ðɩɣa ñʋʋ yɔɔ koloŋa yɔɔ, nɛ patalɩ Lɩm Nɔnɔɔ+ cɔlɔ wɩsɩ ɖɩlɩyɛ taa.

38 Sɛtʋ hendu teyaa tindimiye 2 ñɩnɖɛ ñakpaɣ nʋmɔʋ lɛɛkʋ, nɛ ma nɛ ɛyaa samaɣ hɔɔlʋʋ lɛɛkʋ ɖɩtɩŋ ɖɩ-wayɩ, ɖɩtɩŋnɩ koloŋa yɔɔ Mɩzasɩ Tilimiye+ ñʋʋ yɔɔ nɛ ɖɩtalɩ Koloŋa Kɩwalaɣ+ cɔlɔ 39 nɛ ɖɩtɩŋnɩ Efrayim Nɔnɔɔ+ ñʋʋ yɔɔ nɛ ɖɩtalɩ Tɛtʋ Kɩbɩndʋ Nɔnɔɔ+ cɔlɔ nɛ Kpakpasɩ Nɔnɔɔ+ cɔlɔ, Hananɛlɩ Tilimiye+ cɔlɔ, Meya Tilimiye cɔlɔ nɛ Heŋ Nɔnɔɔ+ cɔlɔ; nɛ ɖɩtalɩ ɖɩsɩŋ Feŋuu Nɔnɔɔ cɔlɔ.

40 Pʋwayɩ lɛ, sɛtʋ hendu teyaa tindima ana a-naalɛ akɔɔ nɛ asɩŋ Ɛsɔ toovenim tʋ ɖɩɣa ɛsɩndaa; nɛ ɖa ɖɔɖɔ ɖɩla mbʋ, ma nɛ kaɖɩsɩ hɔɔlʋʋ ŋgʋ kɩɩwɛ mɔn-cɔlɔ yɔ, 41 nɛ cɔjɔnaa Eliyaakim, Maaseyiya, Miniyamini, Mikayiya, Eliyowenayɩ, Zakarii nɛ Anaanɩya, pɔɖɔkɩ aganda, 42 nɛ Maaseyiya, Semayaa, Eleyaazaarɩ, Uuzi, Yehohanaanɩ, Malɩkiiya, Elam nɛ Ezɛɛrɩ. Nɛ hendu teyaa tee hendu ɖoŋ, Iziraya kaakɛnɩ pa-ñʋʋdʋ.

43 Evemiye nɖɩ ɖi-wiye, palaa kɩlaŋ sɔsɔŋ nɛ pɛmɛyɩ,+ mbʋ pʋyɔɔ yɔ Ɛsɔ toovenim tʋ yeba nɛ pɛmɛyɩ nɛ pa-taa la leleŋ siŋŋ. Halaa nɛ piya pɛmɛyaa ɖɔɖɔ,+ nɛ piyeba nɛ papɩzaɣ se panɩɩ Yeruzalɛm amɛya taŋ ɖooo poliŋ taa.+

44 Evemiye nɖɩ ɖi-wiye, pasɩ abalaa se pɔcɔnɩ lona+ wena a-taa pamʋʋ haɖɛ,+ kajalaɣ tɔɔnaɣ pee,+ nɛ hɔɔlʋʋ 10 ñɩŋgʋ+ nɛ pasɩɣ yɔ a-yɔɔ. Pɩɩwɛɛ se pekpeɣli lona ana a-taa hayɩm taa wondu ndʋ Paɣtʋ pɔzaɣ se pamʋ+ tɛtʋ ndɩ ndɩ taa nɛ pɛcɛlɩ cɔjɔnaa nɛ Leevi mba yɔ;+ amɛya kaawɛ Yuuda, mbʋ pʋyɔɔ yɔ cɔjɔnaa nɛ Leevi mba palakaɣ pa-tʋmɩyɛ. 45 Papaɣzɩ pɛ-Ɛsɔ tʋma labʋ nɛ papɩsɩɣ pɩtɩŋa kele kele, ɛzɩ hendu teyaa nɛ nɔnɔsɩ yɔɔ ɖaŋɩyaa palabʋ yɔ, ɛzɩ Daviid nɛ ɛ-pɩyalʋ Salomɔɔ paaɖʋʋ paɣtʋ yɔ. 46 Mbʋ pʋyɔɔ yɔ, ɖooo Daviid nɛ Azaafʋ pa-alɩwaatʋ taa, hendu teyaa ñʋndɩnaa kaawɛɛ, nɛ mba ɖiyaɣni mba peteɣ Ɛsɔ samtʋ hendu nɛ sɛtʋ hendu yɔ.+ 47 Zorobabɛɛlɩ+ alɩwaatʋ taa nɛ Nehemiya alɩwaatʋ taa lɛ, Izrayɛɛlɩ kpeekpe haɣaɣ hendu teyaa+ nɛ nɔnɔsɩ yɔɔ ɖaŋɩyaa+ mbʋ pɩpɔzʋʋ-wɛ paa evemiye nɖɩ yɔ. Palɩzɩ ɖɔɖɔ mbʋ pɩwɛɛ se paha Leevi mba yɔ nɛ pasɩɩnɩ hɔɔlʋʋ,+ nɛ Leevi mba ñalɩzɩ mbʋ pɩwɛɛ se paha Aarɔɔnɩ lʋlʋʋ taa mba yɔ nɛ pasɩɩnɩ hɔɔlʋʋ.

13 Alɩwaatʋ ndʋ tɩ-taa, pakalɩ Moyizi takayaɣ ɛyaa samaɣ ɛsɩndaa+ nɛ pana se pama ka-taa se pɩtɩmʋna se Amooni tʋ yaa Mowaabʋ tʋ+ nɔɔyʋ ɛsʋʋ Ɛsɔ toovenim tʋ samaɣ taa kpa,+ 2 mbʋ pʋyɔɔ yɔ patɩkpaɣ kpɔnɔ nɛ lɩm nɛ pakatɩnɩ Izrayɛɛlɩ mba, ɛlɛ pɛhɛyɩ Baalam se ɛlɔ pɔ-yɔɔ nɔɔ kɩdɛkɛdaɣ.+ Paa mbʋ yɔ ɖɛ-Ɛsɔ lɛɣzɩ nɔɔ kɩdɛkɛdaɣ lone taa wazaɣ.+ 3 Samaɣ tɩɩñɩtaa nɛ kanɩɩ Paɣtʋ taa tɔm ndʋ lɛ, kapaɣzɩ lɩzʋʋ mba payɩ paalɩnɩ agbaaɣdaa mba lʋlʋʋ taa yɔ* Izrayɛɛlɩ taa.+

4 Pʋcɔ nɛ pɩlakɩ mbʋ lɛ, Eliyasiib+ kaakɛnɩ cɔjɔ weyi ɛcɔŋnaɣ ɖɛ-Ɛsɔ ɖɩɣa* kuduyuŋ weyi ɩ-tɛɛ pasɩɣ wondu yɔ* ɩ-yɔɔ yɔ,+ ɛɛkɛ Tobiya+ hɔʋ taa tʋ nɔɔyʋ. 5 Ɛɛha Tobiya kuduyuu sɔsɔʋ nakʋyʋ ŋgʋ kɩ-tɛɛ pasɩɣ wondu yɔ,* pasɩɣaɣ kɩ-tɛɛ tɔɔnaɣ pee kɩlaʋ, tɩlaaɖɩ kʋhʋlʋmʋʋ, wondu ndʋ palakaɣnɩ tʋmɩyɛ templo taa yɔ, nɛ tɔɔnaɣ pee, vɛɛ kɩfalʋʋ nɛ num pɔ-hɔɔlʋʋ 10 ñɩŋgʋ,+ mbʋ pɩkɛ Leevi mba,+ hendu teyaa nɛ nɔnɔsɩ yɔɔ ɖaŋɩyaa pe-ɖeɖe yɔ, nɛ haɖɛ nɖɩ palakɩ cɔjɔnaa yɔ.+

6 Alɩwaatʋ ndʋ tɩ-tɩŋa tɩ-taa lɛ, mantaawɛɛ Yeruzalɛm, mbʋ pʋyɔɔ yɔ maawobi wiyaʋ cɔlɔ, Babilɔɔnɩ wiyaʋ Artaazɛɛrɩzɛɛsɩ+ pɩnaɣ 32 ñɩŋga taa;+ nɛ alɩwaatʋ natʋyʋ wayɩ lɛ, mɔnpɔzɩ wiyaʋ se ɛha-m nʋmɔʋ nɛ mɛnɖɛɛ. 7 Pʋwayɩ lɛ, mantalɩ Yeruzalɛm nɛ mana kɩdɛkɛdɩm sɔsɔm mbʋ Eliyasiib+ laba yɔ, ɛha Tobiya+ kuduyuu nakʋyʋ ŋgʋ kɩ-tɛɛ pasɩɣ wondu yɔ Ɛsɔ toovenim tʋ ɖɩɣa kadaɣ taa. 8 Pɩtaakɛdɩnɩ-m paa ññɩɩ, nɛ malɩzɩ Tobiya wondu* tɩŋa payɩ kuduyuu ŋgʋ kɩ-tɛɛ pasɩɣ wondu yɔ* kɩ-tɛɛ nɛ mɔlɔ. 9 Pʋwayɩ lɛ, manɖʋ paɣtʋ nɛ papɩsɩ kuduyuŋ weyi ɩ-tɛɛ pasɩɣ wondu yɔ* kele kele; nɛ manpɩsɩnɩ ɩ-tɛɛ wondu ndʋ palakɩnɩ tʋmɩyɛ Ɛsɔ toovenim tʋ ɖɩɣa taa yɔ,+ pɩkpɛndɩnɩ tɔɔnaɣ pee kɩlaʋ nɛ tɩlaaɖɩ kʋhʋlʋmʋʋ.+

10 Menɖiɣzinaa ɖɔɖɔ se pataacɛlɩ+ Leevi mba mbʋ pɩɩwɛɛ se pɛcɛlɩ-wɛ yɔ,+ piyeba nɛ Leevi mba nɛ hendu teyaa mba palakaɣ tʋmɩyɛ yɔ pɛɖɛɛ, paa weyi lɛ ɛ-hayɩm taa.+ 11 Pʋyɔɔ mankalɩ kaɖɩsɩ+ nɛ mɔnpɔzɩ-sɩ se: «Ɛbɛ yɔɔ palabɩ kaakendu Ɛsɔ toovenim tʋ ɖɩɣa yɔɔ?»+ Nɛ menkpeɣli mba paaɖɛwa yɔ nɛ manpɩsɩnɩ-wɛ pa-tʋma taa. 12 Nɛ Yuuda mba kpeekpe kɔnɩ tɔɔnaɣ pee, vɛɛ kɩfalʋʋ nɛ num pɔ-hɔɔlʋʋ 10 ñɩŋgʋ+ kuduyuŋ weyi ɩ-tɛɛ pasɩɣ wondu yɔ ɩ-tɛɛ.+ 13 Pʋwayɩ lɛ, mansɩɩ cɔjɔ Selemiya, takayɩsɩ mayʋ Sadɔɔkɩ* nɛ Pedayiya weyi ɛɛkɛ Leevi tʋ yɔ se pɔcɔnɩ kuduyuŋ weyi ɩ-tɛɛ pasɩɣ wondu yɔ ɩ-yɔɔ, nɛ Mataaniya pɩyalʋ Zakuurɩ pɩyalʋ Hanaanɩ kaakɛnɩ pa-sɩnɩyʋ, mbʋ pʋyɔɔ yɔ abalaa mba, paakɛnɩ ɛyaa mba papɩzɩɣ nɛ pataa-wɛ liu yɔ. Pa-tʋmɩyɛ pɩɩkɛnaa se patayɩ wondu po-koobiya.

14 Pʋyɔɔ lɛ, hayɩ mɛ-Ɛsɔ, tɔzɩ mɔ-yɔɔ,+ nɛ taasɔɔ sɔɔlɩm siɣsiɣ ñɩmbʋ lakasɩ nzɩ malabɩ mɛ-Ɛsɔ ɖɩɣa nɛ ka-tʋma yɔɔ yɔ sɩ-yɔɔ.+

15 Kɩyakɩŋ ɛnɩ ɩ-taa, mana Yuuda mba peɖiɣni fɛyʋʋ viiñi pee viiñi ɖɩfɛyɩyɛ taa Sabaatɩ wiye,+ pekpeɣliɣ tɔɔnaɣ pee huwa nɛ patɩnɩɣ-yɛ kpaŋasɩ yɔɔ, nɛ pɔkɔŋnɩ vɛɛ, viiñi pee, fiigi pee, nɛ wondu ndɩ ndɩ Yeruzalɛm Sabaatɩ wiye.+ Pʋyɔɔ manpaɣ-wɛ se pataapɛdɩ wondu evemiye nɖɩ.* 16 Tiirɩ ñɩma mba paawɛ tɛtʋ taa yɔ pɔkɔŋnaɣ kpakpasɩ nɛ tadɩyɛ wondu ndɩ ndɩ nɛ pɛpɛdɩɣnɩ Yuuda mba Yeruzalɛm taa Sabaatɩ wiye.+ 17 Pʋyɔɔ mankalɩ Yuuda sɔsaa nɛ mɔnpɔzɩ-wɛ se: «Kɩdɛkɛdɩm mbʋ ɩlakɩ mbʋ yɔ nɛ halɩ ɩɩñaŋ Sabaatɩ kɩyakʋ? 18 Pɩtɩkɛ mbʋ mɩ-cɔzɔnaa kaalaba nɛ piyele nɛ ɖɛ-Ɛsɔ kɔnɩ kʋñɔmɩŋ ɩnɛ ɩ-tɩŋa ɖɔ-yɔɔ nɛ tɛtʋ tʋnɛ tɩ-yɔɔ? Lɛɛlɛɛyɔ ɩɩñaŋ Sabaatɩ, piyeba nɛ ɩsɔzʋʋ Ɛsɔ pana wena awɛ Izrayɛɛlɩ yɔɔ yɔ a-yɔɔ.»+

19 Pʋyɔɔ kuzotuu tɩɩpaɣzɩ tibu Yeruzalɛm nɔnɔsɩ yɔɔ pʋcɔ nɛ Sabaatɩ paɣzɩ lɛ, manɖʋ paɣtʋ se paɖɩɣ nɔnɔsɩ. Manɖʋ paɣtʋ ɖɔɖɔ se pataatʋlɩ-sɩ pʋcɔ nɛ Sabaatɩ tɛ, nɛ mansɩɩ ma-maɣmaɣ ma-lɩmɖʋyaa nabɛyɛ nɔnɔsɩ yɔɔ se pɩsa nɛ nɔɔyʋ ɛtaasʋnɩ sʋʋtʋ natʋyʋ Sabaatɩ wiye. 20 Nɛ tadɩyɛ laɖaa nɛ wondu ndɩ ndɩ pɛdɩyaa pasʋʋ Yeruzalɛm nɛ wayɩ tam kʋɖʋm yaa tam nabʋlɛ. 21 Ðɩnɛ ɛlɛ manpaɣ-wɛ nɛ meheyi-wɛ se: «Ɛbɛ yɔɔ ɩsʋʋ koloŋa cɔlɔ ɖoo taa? Ye ɩtasɩ labʋ mbʋ yɔ, mɔnɖɔɔnʋʋ-mɩ cɩnɛ nɛ ɖoŋ.» Kpaɣnɩ alɩwaatʋ ndʋ lɛ, patɩtasɩ kɔm Sabaatɩ wiye.

22 Nɛ meheyi Leevi mba se pɩwɛɛ se papɩsɩɣ pa-tɩ kele kele ɖoŋ ɖoŋ nɛ pɔkɔŋ nɛ paɖaŋɩɣ nɔnɔsɩ yɔɔ nɛ Sabaatɩ kɩyakʋ kɛ kiɖeɖeu tam.+ Pʋyɔɔ ɖɔɖɔ lɛ, hayɩ mɛ-Ɛsɔ, tɔzɩ mɔ-yɔɔ nɛ ŋna man-pʋtɔdɩyɛ, ñɔ-sɔɔlɩm siɣsiɣ ñɩmbʋ sɔsɔm yɔɔ.+

23 Alɩwaatʋ ndʋ tɩ-taa, mana ɖɔɖɔ Yuuda ñɩma mba pakpaɣ* Asɩdoodi,+ Amooni nɛ Mowaabʋ+ halaa+ yɔ. 24 Pe-piya hɔɔlʋʋ yɔɔdaɣ Asɩdoodi mba kʋnʋŋ nɛ ajɛɛ lɛɛna kʋnʋmɩŋ, ɛlɛ sɩ-taa nakɛyɛ taatɩlɩ Yuuda mba kʋnʋŋ yɔɔdʋʋ. 25 Pʋyɔɔ mankalɩ-wɛ nɛ mɔlɔ pɔ-yɔɔ nɔɔ kɩdɛkɛdaɣ nɛ mama abalaa nabɛyɛ+ nɛ mɛnkpɛzɩ pɔ-ñɔsɩ nɛ meyele nɛ poɖuuni Ɛsɔ se: «Pɩtɩpɔzɩ se ɩcɛlɩ mɩ-pɛlaa pa-pɩyalaa, nɛ pɩtɩpɔzɩ se ɩkpaɣ pɛ-pɛlaa nɛ ɩcɛlɩ mɩ-pɩyalaa yaa mɩ-maɣmaɣ ɩkpaɣ pɛ-pɛlaa.+ 26 Pɩtɩkɛ mbʋ yebina nɛ Izrayɛɛlɩ wiyaʋ Salomɔɔ la kɩdɛkɛdɩm na? Wiyaʋ nɔɔyʋ taawɛɛ ɛjaɖɛ naɖɩyɛ taa ɛzɩ ɛnʋ yɔ;+ nɛ ɛ-Ɛsɔ kaasɔɔlɩ ɛ-tɔm,+ pʋyɔɔ ɛsɩ-ɩ wiyaʋ Izrayɛɛlɩ kpeekpe yɔɔ. Ɛlɛ halɩ ɛ-maɣmaɣ, agbaaɣdaa halaa yeba nɛ ɛla kɩdɛkɛdɩm.+ 27 Pɩtɩkɛ kigiluu tɔm se ɩwɛɛ nɛ ɩlakɩ kɩdɛkɛdɩm sɔsɔm pʋnɛ nɛ ɩlakɩ mbʋ pɩfɛyɩ siɣsiɣ yɔ ɖɛ-Ɛsɔ ɛsɩndaa nɛ ɩkpakɩɣ agbaaɣdaa halaa na?»+

28 Cɔjɔ kɩlɩm Eliyasiib+ pɩyalʋ Yoyiyadaa+ pɩyalʋ nɔɔyʋ kaapɩsɩ Horonɩ tʋ Sanɩbalaatɩ+ ɛtɩ. Pʋyɔɔ mɔnɖɔɔnɩ-ɩ mɔn-cɔlɔ.

29 Hayɩ mɛ-Ɛsɔ, tɔzɩ pɔ-yɔɔ, mbʋ pʋyɔɔ yɔ pepisi cɔjɔtʋ nɛ cɔjɔtʋ ɛgbɛyɛ+ nɛ Leevi mba.+

30 Nɛ malɩzɩ pa-taa agbaaɣdaa mba azuluma tɩŋa nɛ manpɩsɩ-wɛ kele kele, nɛ manɖʋ cɔjɔnaa nɛ Leevi mba tʋma, paa weyi lɛ ɛpɩsɩ ɛ-tʋmɩyɛ taa,+ 31 nɛ mala ɖʋtʋ se pɔkɔnɩ ɖasɩ+ alɩwaatʋ ndʋ paɖʋwa yɔ tɩ-yɔɔ nɛ pɔkɔnɩ ɖɔɖɔ kajalaɣ tɔɔnaɣ pee.

Hayɩ mɛ-Ɛsɔ, tɔzɩ mɔ-yɔɔ nɛ mɔn-tɔm kɛdɩnɩ-ŋ.+