Pama Yesu wezuu caɣʋ yɔɔ tɔm

Ŋsɩm ɛyaa mba pɛwɛ kɩlɛmʋʋ kʋnɛ kɩ-yɔɔ yɔ?— Payaɣ-wɛ se: Maatiyee, Maarkɩ, Luka, Yohanɛɛsɩ, Pɩyɛɛrɩ, Yakubu, Yuudi nɛ Pɔɔlɩ. Ɛyaa panɛ, pa nɛ Yesu paacaɣ wezuu alɩwaatʋ kʋyʋmtʋ taa nɛ pama ɖɔɖɔ Yesu wezuu caɣʋ yɔɔ tɔm. Yele nɛ ɖɩkpɛlɩkɩ pɔ-yɔɔ tɔm pazɩ.

Tɔm ndʋ ŋsɩm ɛyaa panɛ pɔ-yɔɔ?

Ɛyaa mba pama Yesu wezuu caɣʋ yɔɔ tɔm yɔ, pa-taa naadozo kaakɛ apostoloowaa. Ŋsɩm-wɛ?— Mba yɔ: Maatiyee, Yohanɛɛsɩ nɛ Pɩyɛɛrɩ. Maatiyee nɛ Yohanɛɛsɩ paakɛ apostoloowaa mba paasɩm Yesu camɩyɛ yɔ. Pa-taa paa anɩ kaama ɖɔɖɔ takayaɣ nɛ ɛkɛdɩ Yesu wezuu caɣʋ tɔm. Yohanɛɛsɩ ma ɖɔɖɔ takayaɣ ŋga payaɣ se Natʋ, nɛ nzɩ payaɣ se 1 Yohanɛɛsɩ, 2 Yohanɛɛsɩ nɛ 3 Yohanɛɛsɩ yɔ. Apostoloo Pɩyɛɛrɩ ma Bibl taa takayɩsɩ naalɛ nɛ payaɣ-sɩ se 1 Pɩyɛɛrɩ nɛ 2 Pɩyɛɛrɩ. Ɛ-takayaɣ naalɛ ŋga taa lɛ, Pɩyɛɛrɩ kɛdɩ alɩwaatʋ ndʋ Yehowa kaayɔɔdɩnɩ Yesu nɛ ɛtɔ se: ‘Ɛnʋ yɔ ɛkɛnɩ man-pɩyalʋ kʋsɔɔlʋ weyi man-taa wɛnɩ-ɩ leleŋ yɔ’ tɩ-tɔm.

Kɩlɛmʋʋ kʋnɛ kɩ-yɔɔ ɛyaa lalaa tɩŋnɩ takayɩsɩ nzɩ pamawa yɔ, sɩ-yɔɔ nɛ pɛkpɛlɩkɩɣ-ɖʋ Yesu yɔɔ tɔm. Pa-taa lɛlʋ payaɣ se Maarkɩ. Pɩtɩla, ɛɛwɛ lone nɖɩ ɖɩ-taa paakpa Yesu yɔ nɛ ɛna mbʋ pɩɖɔm payɩ yɔ. Lɛlʋ payaɣ se Luka. Ɛɛkɛ ɖɔkɔtɔ nɛ pɩtʋʋ fɛyɩ se Yesu sɩba pʋcɔ nɛ ɛpɩsɩɣ Krɩstʋ tʋ.

Bibl takayɩsɩ mayaa mba pɛwɛ kɩlɛmʋʋ yɔɔ cɩnɛ yɔ, pa-taa naalɛ kaakɛ Yesu newaa. Ŋsɩm pa-hɩla na?— Payaɣ-wɛ se Yakubu nɛ Yuudi. Kajalaɣ lɛ, pataatisi Yesu yɔɔ. Halɩ pamaɣzaɣ se ɛsʋ kpaaŋ pazɩ. Ɛlɛ pʋwayɩ lɛ, pɔkɔma nɛ petisi ɛ-yɔɔ nɛ papɩsɩ ɖɔɖɔ Krɩstʋ ñɩma.

Bibl mayaa taa kɛdɛzaɣ tʋ weyi ɛwɛ kɩlɛmʋʋ kʋnɛ kɩ-yɔɔ yɔ, ɛnʋ payaɣ se Pɔɔlɩ. Pʋcɔ nɛ ɛpɩsɩɣ Krɩstʋ tʋ lɛ payaɣaɣ-ɩ se Sɔɔlɩ. Ɛpaɖaɣ Krɩstʋ ñɩma nɛ ɛlakɩ-wɛ kañatʋ pɩdɩɩfɛyɩ. Ŋna mbʋ pɩlaba nɛ Pɔɔlɩ kɔɔ nɛ ɛpɩsɩ Krɩstʋ tʋ yɔ?— Kɩyakʋ nakʋyʋ Pɔɔlɩ ɖɔŋaɣ nʋmɔʋ nakʋyʋ taa; pɩkɛdaa lɛ, ɛnɩɣ nɔɔ nakɛyɛ kalɩnɩ ɛsɔdaa nɛ kɔyɔɔdʋʋnɩ-ɩ. Yesu nɔɔ ɛnɩɣaɣ mbʋ yɔ! Yesu pɔzɩ-ɩ se: ‘Ɛbɛ yɔɔ ŋlakɩ kañatʋ mon-koobiya mbʋ?’ Mbʋ labɩna nɛ, pʋwayɩ lɛ, Pɔɔlɩ pɩsɩ Krɩstʋ tʋ. Pɔɔlɩ ma Bibl taa takayɩsɩ 14; pʋ-tɔbʋʋ lɛ se kpaɣnɩ Roma nɛ ŋwolo Ebree.

Ðɩkalɩɣ Bibl paa ɖooye, yaa we?— Ye ɖɩkalɩɣ Bibl yɔ, ɖɩtɩlɩɣ Yesu yɔɔ tɔm sakɩyɛ. Ŋsɔɔlaa se ŋtɩlɩ Yesu yɔɔ tɔm sakɩyɛ na?—