Yehowa labɩ piti lakasɩ Teŋgu Kɩsɛɛmʋʋ cɔlɔ

Farawɔɔ ñɩtaa nɛ ɛnɩɩ se Izrayɛɛlɩ mba lɩ Ejipiti ɛjaɖɛ taa lɛ, ɛlɛɣzɩ lɩmaɣza. Eheyi ɛ-sɔɔjanaa se: “Ɩñɔɔzɩ mo-you lɔɔɖa nɛ ɖɩɖʋ pa-wayɩ. Pɩtaapɔzɩ se ɖiyele-wɛ nɛ pɛɖɛɛ.” Nɛ ɛ nɛ ɛ-sɔɔjanaa paɖʋ Izrayɛɛlɩ mba wayɩ.

Yehowa kaawɛɛ nɛ eɖiyiɣ ɛ-samaɣ; wɩsɩ taa lɛ, mɩndʋ kaawɛna nɛ tiɖiyiɣ-wɛ nɛ ɖoo taa lɛ, ñalɩmɩyɛ ɖiyiɣ-wɛ. Ewoni-wɛ Teŋgu Kɩsɛɛmʋʋ cɔlɔ nɛ eheyi-wɛ se pesiɣ kizinzikiŋ nɛ pasʋʋ ɩ-tɛɛ.

Pʋwayɩ lɛ, Izrayɛɛlɩ mba na Farawɔɔ nɛ ɛ-sɔɔjanaa, peɖiɣni pa-wayɩ kɔm. Lɛɛlɛɛyɔ, Teŋgu Kɩsɛɛmʋʋ nɛ Ejipiti sɔɔjanaa paɖʋ-wɛ hɛkʋ. Pokoo nɛ peheyi Moyizi se: “Ðɔ-tɔm tɛma! Ye ŋŋnawa, ŋyebi-ɖʋ Ejipiti.” Ɛlɛ Moyizi heyi-wɛ se: “Sɔɔndʋ ɛtaakpa-mɩ. Ɩsɩŋ nɛ ɩna ɛzɩma Yehowa kaɣ yabʋ ɖa-ñʋʋ yɔ.” Moyizi taɣaɣ Yehowa liu siŋŋ, yaa we?

Yehowa heyi Izrayɛɛlɩ mba se pɛkpɛzɩ kizinzikiŋ. Ðoo yuwa lɛ, Yehowa yele nɛ mɩndʋ wɛɛ Izrayɛɛlɩ mba nɛ Ejipiti mba pɛ-hɛkʋ taa. Cɩkpɛndʋʋ kaawɛ Ejipiti mba hɔɔlʋʋ taa, nɛ ñalɩmɩyɛ ñɛwɛɛ Izrayɛɛlɩ mba hɔɔlʋʋ taa.

Yehowa heyi Moyizi se eposi e-nesi teŋgu yɔɔ. Nɛ Yehowa yele nɛ helim sɔsɔm nabʋyʋ ma ɖoo ana a-taa. Teŋgu tayɩ nabʋlɛ nɛ nʋmɔʋ wɛɛ hɛkʋ taa. Nʋmɔʋ ŋgʋ kɩ-taa wɩlɩ ɛzɩ tɛtʋ maɣmaɣ yɔɔ yɔ, nɛ Izrayɛɛlɩ mba miiliyɔɔwaa sakɩyɛ ɖɔ kɩ-taa nɛ pɛtɛzɩ teŋgu.

Farawɔɔ sɔɔjanaa tɩŋ pa-wayɩ nʋmɔʋ ŋgʋ kɩ-taa. Peeɖe Yehowa yeba nɛ po-you lɔɔɖa pɔbɔla paɣzɩ lɩʋ. Sɔɔndʋ kpa sɔɔjanaa nɛ papaɣzɩ kou nɛ pɔyɔɔdʋʋ se: “Ðise ɖɩpɩsɩ! Yehowa wɛɛ nɛ ɛlʋkɩ pɔ-yɔɔ.”

Yehowa heyi Moyizi se: “Posi ñe-nesi teŋgu yɔɔ.” Ɛlabɩ mbʋ lɛ, lɩm kolonzi pɩsɩ nɛ sɩwadɩ Ejipiti sɔɔjanaa yɔɔ. Farawɔɔ nɛ ɛ-sɔɔjanaa pa-tɩŋa pasɩ. Pa-taa nɔɔyʋ tɩpɩzɩ nɛ ɛlɩɩ.

Izrayɛɛlɩ samaɣ wɛ teŋgu kidiiliŋ lɛɛkʋ yɔɔ lɛ, ketee Yehowa hendu nɛ kasamɩ-ɩ se: “Ðiteɣ hendu Yehowa mbʋ pʋyɔɔ yɔ ɛ-samtʋ paɣlaa siŋŋ. Ɛpɛɖɩ kpaŋnʋ nɛ ɛ-yɔɔ caɣyʋ teŋgu taa.” Samaɣ teɣaɣ hendu lɛ, halaa ñɛwɛɛ nɛ papaɣ nɛ pamakɩ nesi tɛɛ soo. Paa weyi ɛ-taa kaawɛ leleŋ, mbʋ pʋyɔɔ yɔ lɛɛlɛɛyɔ lɛ, pɛhɛzaa.