Mai

Pɩnzɩ nzɩ sɩɖɛwa yɔ sɩ-taa, ajɛɛ sakɩyɛ mʋ hʋyʋʋ ɖʋyaa sakɩyɛ. Pɩɩwɛɣ ɖeu se ŋkpɛlɩkɩ ɛzɩma ɛyaa mba pɛsɛɣ ɖama pa-kʋnʋŋ taa yɔ? Pɩtasɩ lɛ, ­pɩɩwɛɣ ɖeu se ŋkpɛlɩkɩ pa-kʋnʋŋ taa tɔm pee wena apɩzɩɣ nɛ ahɔ pa-lɩmaɣza yɔ? Ye ŋlabɩ mbʋ yɔ, ŋkaɣ pɩzʋʋ nɛ ŋwoni-wɛ jw.org yɔɔ nɛ ŋwɩlɩ-wɛ videowaa ndɩ ndɩ nɛ takayɩsɩ nzɩ sɩwɛ pa-kʋnʋŋ taa yɔ. Yehowa ­tɩŋɩɣnɩ Ðe-wezuu caɣʋ nɛ ɖɛ-Ɛsɔ sɛtʋ ­kediɣzaɣ yɔɔ nɛ ɛfalɩsɩɣ-ɖʋ se ɖɩlʋlɩ pee tɔm susuu taa nɛ pɩkɩlɩ. Lɔŋ kɩbaŋ weyi patasɩɣ-ɖʋ kediɣzaɣ ŋga ka-taa yɔ, ɩsɩɣnɩ ɖa-taa sakɩyɛ se sɔɔndʋ ɛtaakpa-ɖʋ nɛ pɩsɩ nɛ ŋna-ɩ waa labʋ nɛ Bibl kpɛlɩkʋʋ nɛ ɛyaa. Lʋlɩyaa, ɩsɩnɩ mi-piya nɛ ɩwɩlɩ-sɩ ɛzɩma sicosi tɔm nɛ sɩ-maɣmaɣ sɩ-tɔm pee nɛ piyele nɛ si-mintʋsʋʋ ñandɩ yɔ. Tɔm kɛlɛʋ ndʋ sɩyɔɔdʋʋ nɛ tɩlɩɣnɩ sɩ-laŋa taa yɔ, tiyeba nɛ ɛyaa kɩfama nabɛyɛ tɩlɩ se ɖɛwɛnɩ toovenim taa.​—1 Kɔr. 14:25. w18.06 22- 23 § 7-9

Pɩwɛ ɖeu se ɖɩtɔzɩ se alɩwaatʋ natʋyʋ taa lɛ, ɖa-tɩŋa ɖɩkɛ “agɔma” nɛ taabalɩyɛ taawɛɛ ɖa nɛ Ɛsɔ ɖɛ-hɛkʋ taa. (Efɛz. 2:​12) Ɛlɛ Yehowa hɔm-ɖʋ nɛ “sɔɔlɩm taŋgbaka nimaɣ” nɛ ɛkɔnɩ ɛ-cɔlɔ. (Ozee 11:4; Yoh. 6:​44) Nɛ Krɩstʋ tisi nɛ ɛmʋ-ɖʋ camɩyɛ. Ɛtʋlɩ-ɖʋ nɔnɔɔ nɛ pʋyɔɔ lɛ, ɖɩpɩzɩɣ nɛ ɖɩkɛ Ɛsɔ hɔʋ taa ñɩma. Paa ɖɩtɩtalɩ pilim yɔ, Yesu tisi faaa nɛ ɛmʋ-ɖʋ nɛ pʋyɔɔ lɛ, pɩɩwɛɣ ɖeu se ɖini nɔɔyʋ! Pɩtʋʋ fɛyɩ se ɖɩwɛɛ nɛ ɖɩñɔtʋʋnɩ ɛjaɖɛ kɩdɛkɛdɩyɛ ɖɩnɛ ɖɩ-ɖɩdɛnɖɛ; pʋyɔɔ lɛ, ɖama taa tayʋʋ, lalaa yɔɔ lɩmaɣza kɩdɛkɛda wɛnʋʋ nɛ sʋsɩ pɩkaɣ tɔyʋʋ nɛ pɩkpaɖɩ. (Gal. 5:​19-​21; 2 Tim. 3:​13) Paa mbʋ yɔ, ɖa Yehowa sɛyaa lɛ, ɖɩñɩnɩɣ se ɖɩwɛɛnɩ lɔŋ weyi ɛlɩnɩ hayo yɔ, weyi ɩ-taa tɛ yɔɔ tɛ yɔɔ lakasɩ fɛyɩ yɔ, nɛ ɖɩñɩnɩ laŋhɛzɩyɛ. (Yak. 3:​17, 18) Ða-taa wɛ leleŋ se taabalɩyɛ wɛ ɖa nɛ ajɛɛ lɛɛna taa ɛyaa lalaa ɖɛ-hɛkʋ taa, nɛ ɖɩmʋʋ ɖama paa ɖɔ-sɔnzɩ ɛwɛ ndɩ ndɩ yɔ; nɛ halɩ ɖɩkpɛlɩkɩɣ kʋnʋmɩŋ lɛɛŋ. Alɩwaatʋ ndʋ ɖɩlakɩ mbʋ yɔ, ɖa-laŋhɛzɩyɛ wɛɣ ɛzɩ lɩm hoɖe yɔ, nɛ ɖe-siɣsiɣ wɛtʋ wɛɛ ɛzɩ lɩm sɔsɔm yaa teŋgu hola yɔ.​—Iza. 48:17, 18. w18.06 12 § 18-​19

Roma sɔɔja weyi ɛtɩlɛɛ e-naakoma yɔ, ɛɛpɩzɩɣ nɛ ewolo you. Naakoma wena Roma sɔɔjanaa lɛɣ yɔ, palabɩ-yɛ nɛ tɔna ndɩ ndɩ naadozo nɛ patɩnɩ-yɛ ɖama yɔɔ se sɔɔja ɛlɛ-yɛ lɛ, ɛpɩzɩ nɛ ɛɖɔ paa le. Ɛzɩma palabɩ-yɛ yɔ, piyeki se awɛɛ ɖoŋ camɩyɛ nɛ aleɖi. Naakoma wena Roma sɔɔjanaa lɛɣ yɔ, ɛzɩma asɩɣnɩ-wɛ se powolo you yɔ, mbʋ ɖɔɖɔ, fezuu taa naakoma wena Krɩstʋ ñɩma lɛɣ yɔ asɩɣnɩ-wɛ se posusi laŋhɛzɩyɛ tɔm. (Iza. 52:7; Roma 10:15) Paa mbʋ yɔ, pɩpɔzʋʋ se ɛyʋ ɛwɛɛnɩ abalɩtʋ nɛ ɛpɩzɩ ɛyɔɔdɩ alɩwaatʋ ndʋ ehikiɣ waɖɛ naɖɩyɛ yɔ. Boi wɛnɩ pɩnzɩ 20, ɛyɔɔdaa se: “Sɔɔndʋ kpaɣ-m se monsusi tɔm mon-sukuli ɖaŋ taa taabalaa. Mamaɣzaɣ se pɩwɛ-m fɛyɛ. Mɔntɔzʋʋ pɩ-yɔɔ lɛ, maasɩŋ mbʋ pʋyɔɔ ɖeyi ɖeyi pɩlakaɣ-m yɔ. Lɛɛlɛɛyɔ man-taa wɛ leleŋ se monsusuu tɔm man-ɖaɣʋnaa.” Piya evelisi sakɩyɛ kɔm nɛ siɖiɣzina se ye sɩñɔɔzɩ sɩ-tɩ camɩyɛ yɔ, pɩwɛɣ-sɩ kɛlɛʋ se sisusi tɔm kɩbandʋ. w18.05 29 § 9-​11

Yesu kaaheyi apostoloowaa se: “Mahaɣ-mɩ ma-laŋhɛzɩyɛ.” (Yoh. 14:27) Ɛzɩma tɩyɛ ɛ-laŋhɛzɩyɛ nɖɩ ɖɩsɩɣnɩ-ɖʋ se ɖɩlʋlɩ pee? Ye ɖiwobi pɩ-yɔɔ nɛ ɖɩwɛɛ abalɩtʋ yɔ, ɖɩkaɣ hiɣu laŋhɛzɩyɛ siŋŋ alɩwaatʋ ndʋ ɖɩnaɣ se ɖɔ-tɔm kɛdɩɣnɩ Yehowa nɛ Yesu yɔ. (Keɣa 149:4; Roma 5:​3, 4; Kol. 3:​15) Yesu heyi apostoloowaa se ɛsɔɔlaa se pa-taa ‘ɛwɛɛ leleŋ pɩŋŋ’ nɛ pɩtɛ lɛ, ɛtasɩ-wɛ heyuu ɖɔɖɔ se pɩcɛyaa se pɛwɛɛnɩ sɔɔlɩm mbʋ pɩ-taa piɖeni men-ɖeke wɛtʋ fɛyɩ yɔ. (Yoh. 15:​11-​13) Pʋwayɩ ɛtasɩ yɔɔdʋʋ se: “Maya-mɩ se taabalaa.” Kʋjɔʋ kɩbaŋʋ siŋŋ pɩkɛnaa se ɛgbaɣdɩyɛ yaa taabalɩyɛ ɛwɛɛ ɛyʋ nɛ Yesu pɛ-hɛkʋ taa! Ɛbɛ pɩɩwɛɛ se apostoloowaa ɩla nɛ powolo pɩ-yɔɔ nɛ pɛkɛ Yesu taabalaa? Pɩɩwɛɛ se ‘powolo pɩ-yɔɔ nɛ palakɩ camɩyɛ lakasɩ’ yaa palʋlʋʋ pee. (Yoh. 15:​14-​16) Pɩnzɩ naalɛ pʋcɔ pɩtalɩɣ mbʋ lɛ, Yesu falɩsɩ apostoloowaa nɛ eheyi-wɛ se “Iwoki lɛ, isusi se: ‘Ɛsɔdaa Kewiyaɣ ñɔtaa.’ ” (Mat. 10:⁠7) Pʋyɔɔ ɖoo kɛdɛzaɣ ñɩna pʋcɔ nɛ pakʋ-ɩ lɛ, ɛkpazɩ-wɛ ɖoŋ se powolo pɩ-yɔɔ nɛ palakɩ tʋmɩyɛ nɖɩ paatɛm paɣzʋʋ labʋ yɔ nɛ abalɩtʋ.​—Mat. 24:13; Mark. 3:​14. w18.05 20-21 § 15-16

Piya evelisi, ɩsɩɩ Yehowa sɔɔlɩm labʋ kajalaɣ lone taa. Pɩ-tɔbʋʋ se ɩka ­mɩ-ñʋʋ nɛ fezuu taa kaɖʋsɩ nzɩ ɩɖʋ ­mɩ-tɩ yɔ mi-wezuu caɣʋ taa. Piya ­evelisi lɛɛsɩ kaŋ ñʋʋ nɛ helim mʋʋ nɛ aleɣya labʋ nɛ pɩtʋʋ fɛyɩ se sɩkaɣ-ŋ seɣtiɣ se ña ɖɔɖɔ ŋla mbʋ. Pʋyɔɔ lɛ pɩpɔzʋʋ se ŋtɛ ña-taa nɛ ŋñɔɔnɩ kaɖʋsɩ nzɩ ŋɖʋ ña-tɩ yɔ kpam. Taayele nɛ ña-ɖaɣʋnaa piya evelisi lɛɛsɩ lɛɣzɩ ña-lɩmaɣza. Ðɩpɩzɩɣ ɖɩtɩŋnɩ nʋmɔŋ ndɩ ndɩ yɔɔ nɛ ɖɩkaɖɩnɩ ɛzɩma ɖa-ɖaɣʋnaa ñɩkɩɣ ɖɔ-yɔɔ se ɖɩla pɔ-sɔɔlɩm yɔ. Nʋmɔŋ ɛnɩ ɩ-taa nakʋyʋ lɛ se ɖɩtaaɖʋ ɖa-tɩ wɛtʋ ndʋ tɩpɩzɩɣ nɛ tiyele nɛ pɩtakɩ-ɖʋ yɔ tɩ-taa. (Adu. 22:3) Lɛɛkʋ ɖɔɖɔ lɛ se ŋtɔzɩ ­asɛyʋʋ ŋgʋ kɩpɩzɩɣ nɛ kɩtalɩ-ŋ ye ­ŋtɩŋɩɣ lalaa pa-lakasɩ kɩdɛkɛdɩsɩ taa yɔ kɩ-yɔɔ. Pɩtasɩ lɛ, tɩlɩ se pɩcɛyaa se patasɩ-ŋ lɔŋ. Tɩ luzuu kaɣ-ŋ sɩnʋʋ ɖɔɖɔ nɛ ŋmʋ lɔŋ tasʋʋ mbʋ ña-lʋlɩyaa nɛ ­ñɛ-ɛgbɛyɛ taa ñɩma mba papɩ fezuu taa yɔ pahaɣ-ŋ yɔ. (1 Pɩy. 5:​5, 6) Ŋwɛnɩ tɩ luzuu nɛ ŋmʋʋ lɔŋ tasʋʋ kɩbam mbʋ patasɩɣ-ŋ yɔ? w18.04 28-29 § 14-​16

Tɔm ndʋ Yesu heyi Aazii cikpeluu taa agbaa naayɛ yɔ, tɩwɩlɩɣ se ɛsam ɛ-wayɩ tɩŋɩyaa tʋmɩyɛ nɖɩ palaba yɔ ɖɩ-yɔɔ. Kɩɖaʋ nakʋyʋ yɔ: Eheyaɣ Tiyaatiiri ɛgbɛyɛ tɔm lɛ, ɛpaɣzɩnaa se: “Mansɩm ña-lakasɩ nɛ ñɔ-sɔɔlɩm nɛ ñe-tisuu nɛ ñɛ-Ɛsɔ sɛtʋ tʋmɩyɛ nɛ ña-laŋɩyɛ ɖɔkʋʋ, nɛ manawa se ña-lakasɩ kɛdɛzaɣ ñɩnzɩ kɩlɩ nzɩ ŋŋlabɩ kiɖe tɛɛ yɔ.” (Natʋ 2:​19) Yesu tɩyɔɔdɩ ɛgbɛyɛ taa ñɩma mba pa-tʋmɩyɛ tɔm ɖeke, ɛlɛ ɛsam-wɛ ɖɔɖɔ wɛtʋ kɩbandʋ ndʋ tituzi-wɛ nɛ palabɩ-ɖɩ yɔ tɩ-yɔɔ. Paa pɩɩwɛɛ se Yesu ɛtasɩ lɔŋ nɩɩyɩ Tiyaatiiri ɛgbɛyɛ taa ñɩma nabɛyɛ yɔ, ɛpaɣzɩnɩ ɖoŋ kpazʋʋ tɔm nɛ ɛtɛzɩnɩ ɖɔɖɔ ɖoŋ kpazʋʋ tɔm. (Natʋ 2:​27, 28) Yesu kɛnɩ agbaa tɩŋa ñʋʋdʋ; maɣzɩ ɖoŋ weyi ɛwɛna yɔ ɩ-yɔɔ nɛ ŋna. Pɩtɩkɛnɩ-ɩ kɩjɛyʋʋ se ɛsɛɛ-ɖʋ tʋmɩyɛ nɖɩ ɖɩlakɩ-ɩ yɔ ɖɩ-yɔɔ. Paa mbʋ yɔ, ɛwɩlɩɣ-ɖʋ ɛ-ɛsɩmɩyɛ. Ɛkɛnɩ kɩɖaʋ kɩbaŋʋ siŋŋ ɛgbɛyɛ taa ɛzʋtʋyaa! w19.02 16 § 10

Kajalaɣ pɩnzɩ mɩnʋʋ taa Nɔɔɖɛyaa Ɛgbɛyɛ kaakpazɩ ɖoŋ siŋŋ Krɩstʋ agbaa taa ñɩma nɛ mba pɛɖɛɣaɣ nɔɔ a-taa yɔ. Petiyini pa-taa koobiya naalɛ, Pɩyɛɛrɩ nɛ Yohanɛɛsɩ se powolo nɛ pala adɩma nɛ Ɛsɔ yele nɛ fezuu kiɖeɖeu tii Krɩstʋ ñɩma kɩfama yɔɔ. (Tʋma 8:​5, 14-​17) Pɩtʋʋ fɛyɩ se Nɔɔɖɛyaa Ɛgbɛyɛ nesi ɖʋʋ mbʋ, pɩɩkpazɩ Filiipu nɛ Krɩstʋ ñɩma kɩfama mba ɖoŋ pɩdɩɩfɛyɩ! Sɔnɔ Yehowa Aseɣɖe Tɩnaa tɛ Nɔɔɖɛyaa Ɛgbɛyɛ kpazɩɣ ɖoŋ Betɛɛlɩ hɔʋ taa ñɩma, alɩwaatʋ tɩŋa Ɛsɔ sɛtʋ tʋmlaɖaa nɛ koobiya tɩŋa mba pɛwɛ ɛjaɖɛ kpeekpe yɔɔ yɔ. Koobiya hikiɣ taa leleŋ nɛ ɖoŋ kpazʋʋ, ɛzɩ pɩɩwɛʋ kajalaɣ pɩnzɩ mɩnʋʋ taa yɔ. Pɩtasɩ lɛ, pɩnaɣ 2015 taa Nɔɔɖɛyaa Ɛgbɛyɛ lɩzɩ hatʋ cabɩ takayaɣ Reviens à Jéhovah nɛ takayaɣ ŋga kɛwɛɛ nɛ kakpazɩɣ ɖoŋ siŋŋ koobiya sakɩyɛ ɛjaɖɛ kpeekpe yɔɔ. w18.04 19 § 18-​20

Ɛyaa pɩzɩɣ pamaɣzɩ se ye pɛwɛ pa-tɩ yɔɔ hɔɔlɩŋ tɩŋa taa yɔ, piɖeɣni-wɛ nɛ pɩkpaɖɩ. Ɛlɛ toovenim taa lɛ, ye tɩ-yɔɔ wɛʋ ɛfɛyɩnɩ kamaɣ yɔ, pɩkɔŋnɩ kala sakɩyɛ. Ye paɣtʋ natʋyʋ ɛfɛyɩ nɛ tɩɖʋʋ kamaɣ ɖa-tɩ yɔɔ wɛʋ mbʋ yɔ, ɛzɩma pɩkaɣ wɛʋ ɛjaɖɛ yɔɔ? Pʋyɔɔ takayaɣ nakɛyɛ (The World Book Encyclopedia) yɔɔdaa se: “Paa samaɣ ŋga ka-taa lɛ, pañakɩ pana se paɖʋ paɣtʋ nɛ tihuuzi ka-taa ɛyaa yɔɔ, paɖʋʋ-tʋ ɖɔɖɔ se tɩsɩnɩ paa weyi nɛ ɛtɩlɩ se ɛ-tɩ yɔɔ wɛʋ wɛnɩ tɩnaɣ. Pɩ-labʋ fɛyɩ kɛlɛʋ.” Toovenim pɩ-labʋ fɛyɩ kɛlɛʋ. Pʋyɔɔ palɩzɩ paɣtʋ sakɩyɛ sakɩyɛ, lɔyaawaa nɛ tɔm hʋyaa sakɩyɛ sakɩyɛ se paba ɩpɩzɩ nɛ palɩzɩ paɣtʋ ndʋ tɩ-taa; nɛ peyele ɖɔɖɔ nɛ ɛyaa ɖɔ paɣtʋ ndʋ tɩ-yɔɔ. Tɔm ndʋ Yesu yɔɔdɩ tɩ-yɔɔ wɛʋ yɔɔ yɔ, tɩwɩlɩɣ se pʋcɔ nɛ ɛyʋ wɛɛ ɛ-tɩ yɔɔ siŋŋ lɛ, pɩpɔzʋʋ se ɛkpɛzɩ nɩŋgbanzɩ naalɛ: Kajalaɣ lɛ, pɩwɛɛ se ɛkpɛlɩkɩ toovenim tɔm ndʋ Yesu wɩlaa yɔ nɛ etisi tɩ-yɔɔ. Nɛ nabʋlɛ lɛ, ɛpɩsɩ ɛ-tɔm mʋyʋ. Ye ɖɩlabɩ mbʋ yɔ, ɖɩwɛɣ ɖa-tɩ yɔɔ siŋŋ. Ɛlɛ ɛzɩma tɩyɛ ɖɩwɛɣ ɖa-tɩ yɔɔ? Yesu wobi pɩ-yɔɔ nɛ ɛlɩzɩ pɩ-taa se: “Ɛyʋ weyi ɛlakɩ kɩwɛɛkɩm yɔ, ɛkɛ yom. Ye Pɩyalʋ eholi-mɩ yɔ, ɩkaɣ wɛʋ mɩ-tɩ yɔɔ siŋŋ.”​—Yoh. 8:​34, 36. w18.04 6-7 § 13-14

Ðɩsɔɔlaa se ɖɩwɛɛ ɛyaa mba panɩɣ ɖe-siziŋ nɛ pañɩnɩɣ se piɖeni-ɖʋ yɔ, pɛ-hɛkʋ taa. Pañakɩ pana se paɖʋ pa-tɩ ɖo-lone taa, patɩlɩ ndʋ ɖɩmaɣzɩɣ yɔ nɛ ɛzɩma pɩlakɩ-ɖʋ yɔ. Patɩlɩɣ ɖa-kɩcɛyɩm nɛ halɩ nabʋyʋ taa pasɩɣnɩ-ɖʋ pʋcɔ nɛ ɖɩpɔzʋʋ-wɛ sɩnʋʋ. Ðɩsɔɔlɩ ɛyaa mba pawɩlɩɣ se ‘panɩɣ ɖe-siziŋ’ yɔ. Ðɩkɛ Krɩstʋ ñɩma nɛ pʋyɔɔ lɛ ɖa-tɩŋa ɖɩsɔɔlaa se ɖɩna ɛyaa pʋtɔdɩyɛ yaa ɖɩnɩɩ pe-siziŋ. Toovenim taa lɛ, pɩfɛyɩ kɛlɛʋ paa ɛzɩmtaa. Ɛbɛ yɔɔ? Lɩmaɣzɩyɛ naɖɩyɛ lɛ se ɖɩtɩtalɩ pilim. (Roma 3:​23) Ðoŋ ɖoŋ lɛ, ɖɩkɩlɩɣ maɣzʋʋ ɖa-tɩ yɔɔ ɖeke. Pʋyɔɔ pɩwɛɛ se ɖɩñaɣ pana nɛ ɖɩmaɣzɩɣ lalaa yɔɔ. Pɩtasɩ lɛ, lone nɖɩ ɖɩ-taa palʋlɩ ɖa-taa nabɛyɛ nɛ mbʋ pɩtalɩ-wɛ pe-wezuu caɣʋ taa yɔ, pɩpɩzɩɣ piyele nɛ pɩwɛɛ-wɛ kaɖɛ se pana lalaa pʋtɔdɩyɛ. Kɛdɛzaɣ ɖeɖe lɛ, ɛyaa mba pɛ-hɛkʋ taa ɖɩwɛɛ yɔ pɛ-wɛtʋ pɩzɩɣ nɛ tɩwɛɛnɩ ɖoŋ ɖɔ-yɔɔ. Kɛdɛzaɣ kɩyakɩŋ ɩnɛ ɩ-taa, ɛyaa sakɩyɛ ɩɩnɩɣ lalaa siziŋ, ɛlɛ ‘pɔsɔɔlɩ pa-tɩ ɖeke.’ (2 Tim. 3:​1, 2) Ɛlɛ ye ɖɩmaɣzɩɣnɩ Yehowa nɛ ɛ-Pɩyalʋ Yesu Krɩstʋ yɔ, ɖɩpɩzɩɣ nɛ ɖɩnɩɩ lalaa siziŋ nɛ pɩkpaɖɩ. w19.03 14 § 1-3

Paɣtʋ Hiu ndʋ Ɛsɔ kaaha Izrayɛɛlɩ piya yɔ, tɩ-kɛdɛzaɣ ñɩndʋ pɔzaɣ-sɩ se sɩkpa sɩ-tɩ nɛ ɛsɩyɛ ɖʋʋ yaa mbʋ lɛlʋ wɛna yɔ pɩ-yɔɔ lɩmaɣza kɩdɛkɛda wɛnʋʋ. (Wp. 5:​21; Roma 7:7) Yehowa tɩŋnɩ paɣtʋ tʋnɛ tɩ-yɔɔ se ɛwɩlɩ-sɩ lɔŋ ɩnɛ: Pɩwɛɛ se ɛ-samaɣ taa paa weyi lɛ, ɛcɔnɩ ɛ-laŋɩyɛ yɔɔ pʋ-tɔbʋʋ se ɛ-maɣzɩm nɛ ɛ-yɔɔdaɣ yɔɔ camɩyɛ. Ɛnawa se lɩmaɣza kɩdɛkɛda yekina nɛ ɛyʋ lakɩ lakasɩ kɩdɛkɛdɩsɩ. Kpaca ŋgʋ kɩ-taa Daviid kaatɔlaa. Toovenim lɛ, Daviid kaakɛ ɛyʋ kɩbanʋ. Ɛlɛ alɩwaatʋ natʋyʋ taa lɛ, ɛkɔma nɛ ɛɖʋ ɛsɩyɛ lɛlʋ halʋ yɔɔ. Ɛ-lɩmaɣza kɩdɛkɛda ana ayeba nɛ ɛla kɩwɛɛkɩm. (Yak. 1:​14, 15) Daviid labɩ acɛyɛ nɛ pɩtɛ lɛ, ɛñaɣ pana se epeɣzi halʋ weyi ɛ nɛ ɩ palabɩ acɛyɛ yɔ ɛ-walʋ, nɛ pʋwayɩ eyele nɛ pakʋ-ɩ. (2 Sam. 11:​2-4; 12:​7-​11) Pɩtɩkɛ mbʋ pɩnaɣ ɛsa yɔɔ yem yɔ pi-ɖeke Yehowa naɣ, ɛlɛ ɛnaɣ pɩkpɛndɩnɩ laŋɩyɛ taa. (1 Sam. 16:7) Lɩmaɣza naayɛ yaa lakasɩ nasɩyɩ fɛyɩ se ɖɩpɩzɩɣ nɛ ɖɩmɛsɩ-ɩ sɩ. Ɛñɩnɩɣ se ɛna wɛtʋ kɩbandʋ ndʋ ɖɩwɛna yɔ, nɛ eseɣtiɣ-ɖʋ se ɖɩñɔɔnɩ-tʋ. Ɛlɛ ɛsɔɔlaa se ɖɩtɩlɩ lɩmaɣza kɩdɛkɛda wena añɔʋ ɖa-laŋa taa yɔ nɛ ɖɩlɩzɩ-yɛ kpaagbaa nɛ ataakɔɔ nɛ atuzi-ɖʋ nɛ ɖɩla lakasɩ kɩdɛkɛdɩsɩ.​—4 Aw. 16:9; Mat. 5:​27-​30. w19.02 21 § 9; 22 § 11

Bibl yɔɔdaa se Moyizi kɛ “ɛyʋ weyi ɛwakɩ ɛ-tɩ luzuu tataa ɛyaa kpeekpe taa yɔ.” (Kɩg. 12:3) Ɛzɩ tɔm tʋnɛ tɩwɩlɩɣ se ɛkɛ ɛjam, pɩwɛ-ɩ kaɖɛ se ɛkpaɣ lɩmaɣza, nɛ eseɣ lalaa sɔɔndʋ na? Nabɛyɛ pɩzɩɣ nɛ pamaɣzɩ se ɛyʋ weyi ɛwɛnɩ tɩ luzuu yɔ, mbʋ ɛwɛɛ. Ɛlɛ lɩmaɣza ana atɩtʋʋzɩ. Moyizi kaakɛ Ɛsɔ sɛyʋ weyi ɛwɛ ɖoŋ, ɛsɩm lɩmaɣza kpaɣʋ nɛ ɛwɛɛ abalɩtʋ yɔ. Yehowa sɩnɩ-ɩ nɛ ɛkaɖɩnɩ Ejipiti wiyaʋ ɖoŋ tʋ, eɖiyi ɛyaa mba paatalɩ ɛzɩ miiliyɔɔwaa 3 mbʋ yɔ kañɩmbusuu taa, nɛ ɛsɩnɩ ɖɔɖɔ Izrayɛɛlɩ samaɣ nɛ kawa ko-koyindinaa. Ðɩɩkatɩɣ kala wena Moyizi kaakataa yɔ, ɛlɛ paa evemiye nɖɩ lɛ, ɖɩkatɩɣ ɛyaa yaa wɛtʋ ndʋ tɩpɩzɩɣ tiyele nɛ pɩwɛɛ-ɖʋ kaɖɛ se ɖɩwɛɛnɩ tɩ luzuu yɔ. Paa mbʋ yɔ, pɩwɛɛ se ɖɩñaɣ pana nɛ ɖɩwɛɛnɩ wɛtʋ ndʋ, mbʋ pʋyɔɔ yɔ Yehowa yɔɔdaa se: “Ðɛfɛɛ tɩnaa [yaa tɩ luziyaa] hikiɣ tɛtʋ.” (Keɣa 36:11) Ŋkaɣ yɔɔdʋʋ se ŋwɛnɩ tɩ luzuu na? Lalaa sɩmɩ-ŋ se ŋwɛnɩ tɩ luzuu na? w19.02 8 § 1-2

Ɛyaa wɛnɩ ɛhʋyɛ. Ɛsɔ lɩzɩ ɛyʋ ɖooo kiɖe tɛɛ lɛ, ɛha-ɩ ɛhʋyɛ. Alɩwaatʋ ndʋ Aɖam nɛ Ɛva pamanɩ Yehowa paɣtʋ yɔɔ yɔ, pesewa nɛ pɛmɛlɩ. Pɩwɩlɩɣ se pɛ-ɛhʋyɛ kaawɛ nɛ ɖɩcɛyɩɣ-wɛ. Ɛhʋyɛ nɖɩ patɩfalɩsɩ-ɖɩ camɩyɛ yɔ, papɩzɩɣ pakpaɣ-ɖɩ nɛ pamaɣzɩnɩ haɣ ŋga kaakpeziɣ kaaʋ yɔ. Mɩlaa pɩzɩɣ nɛ powolo nɛ pamɩlɩ ka-tʋ ñɩm kɛlɛʋ. Ɛlɛ ye pafalɩsɩ haɣ ŋga camɩyɛ yɔ, kakandɩyɩɣ ka-tʋ ñɩm yɔɔ camɩyɛ. Ðɩpɩzɩɣ nɛ ɖɩkpaɣ ɛhʋyɛ kɩbanɖɛ nɛ ɖɩmaɣzɩnɩ haɣ ŋga pafalɩsɩ-kɛ nɛ kakandɩyɩɣ ka-tʋ ɖɩɣa yɔɔ camɩyɛ yɔ. Ɛhʋyɛ kɛnɩ mbʋ Ɛsɔ ɖʋ ɖa-taa se pɩwɩlɩ-ɖʋ mbʋ pɩwɛ ɖeu nɛ mbʋ pɩfɛyɩ ɖeu yɔ nɛ ɖɩpɩzɩ nɛ ɖɩkpaɣ lɩmaɣza kɩbana yɔ. Ɛlɛ pʋcɔ nɛ ɖɛ-ɛhʋyɛ pɩzɩ nɛ ɖiɖiyi-ɖʋ camɩyɛ lɛ, pɩpɔzaa se ɖɩfalɩsɩ-ɖɩ camɩyɛ. Ye nɔɔyʋ ɛtɩfalɩsɩ ɛ-ɛhʋyɛ camɩyɛ yɔ, ɖɩɩpɩzɩɣ nɛ ɖiheyi-i se mbʋ ɛlakɩ yɔ, pɩfɛyɩ ɖeu. (1 Tim. 4:​1, 2) Ɛhʋyɛ nɖɩ ɖɩpɩzɩɣ nɛ ɖipeɣzi-ɖʋ nɛ ɖɩyaa “kɩdɛkɛdɩm se kɩbam.” w18.06 16 § 1-​3

Pɩwɛɛ se ɖɩtɩlɩ mɛsaɣ tɛɛ nʋmɔŋ weyi ɩpɩzɩɣ iyele nɛ ɖɩwɛɛnɩ ɛjaɖɛ maɣzɩm yɔ nɛ ɖikizi-i. Nabʋyʋ taa papɩzɩɣ nɛ pɔyɔɔdɩ tɔm natʋyʋ ɛjaɖɛ yɔɔ tɔm susuu nʋmɔʋ nakʋyʋ yɔɔ se piyele nɛ ɖe-liu tɛɛ kɔtɩnɩ politiki lɩmaɣza naayɛ. Ɛyʋ nɔɔyʋ yɔɔ tɔm kɛdʋʋ pɩzɩɣ nɛ pɩsandɩ lɩmaɣza wena ɛjaɖɛ wɛna kaɖʋsɩ nɛ nʋmɔŋ weyi ɛyʋ tɩŋɩɣnɩ ɩ-yɔɔ se ɛtalɩ-sɩ yɔ. Videowaa nabɛyɛ nɛ takayɩsɩ nasɩyɩ sandɩɣ ɛyaa se pasɩɩ “pa-maɣmaɣ” nɛ “pɔ-hɔʋ” kajalaɣ lone taa nɛ piyeki se wɛtʋ ndʋ tɩkɛdɩnɩ ɛyaa nɛ halɩ pamaɣzɩ se tɩwɛ ɖeu. Ɛlɛ lɩmaɣza ana akaɖɩɣnɩ tɔm ndʋ Masɩ wɩlɩɣ yɔ. Masɩ wɩlɩɣ se alɩwaatʋ ndʋ ɖɩsɩɣ Yehowa kajalaɣ lone taa yɔ, ɖa-maɣmaɣ yaa ɖɔ-hɔŋ wɛɣ koboyaɣ taa. (Mat. 22:36-​39) Pɩtɩwɩlɩ se pɩfɛyɩ ɖeu se ɛyʋ ɛla aleɣya kɩbana, ɛlɛ pɩwɛɣ ɖeu se pʋcɔ nɛ ɖɩla aleɣya naayɛ lɛ, ɖɩpɔzɩ ɖa-tɩ tɔm tʋnɛ: ‘Manpɩzɩɣ nɛ mantɩlɩ ɛjaɖɛ yɔɔ lɩmaɣza, paa pɛwɛɛ nɛ patɩŋɩɣnɩ mɛsaɣ tɛɛ nʋmɔʋ nakʋyʋ yɔɔ nɛ pasandɩɣ-yɛ yɔ? Ðɩwɛɛ nɛ ɖɩɖʋʋ kamasɩ nzɩ siyeki se ɖa-maɣmaɣ yaa ɖe-piya ɩtaacɔnɩ videowaa yaa ɩtaakalɩ takayɩsɩ nzɩ siyeki se palɩɩ ɛjaɖɛ yɔɔ lɩmaɣza yɔɔ yɔ? Ðɩwɛɛ nɛ ɖɩtɩŋɩɣnɩ lɩmaɣza wena Yehowa wɛna yɔ a-yɔɔ nɛ ɖɩkaɖɩɣnɩ ɛjaɖɛ maɣzɩm mbʋ ɖe-piya nɩɣ yɔ? w18.11 22 § 18-​19

Yehowa wɩlɩɣ se ɛwɛ ɖɔ-cɔlɔ pɩtɩŋnɩ ɛzɩma ɛwɩlɩɣ-ɖʋ ɛ-sɔɔlɩm nɛ ekeŋni-ɖʋ yɔ. Yʋsɩ tɔm ndʋ ɛyɔɔdaa nɛ pɩwɩlɩɣ sɔɔlɩm sɔsɔm mbʋ ɛwɛnɩ ɖɔ-yɔɔ yɔ. Yehowa yɔɔdaa se: “Ðenɖe ɛzɩ ŋkɛ mɛ-ɛsɩndaa pʋyʋ nɛ pʋyʋ keem pɩŋŋ yɔ, mɔnsɔɔlɩ-ŋ.” (Iza. 43:4) Ðoŋ nɩɩyɩ fɛyɩ se ɛpɩzɩɣ nɛ ɛɖɩɣ Yehowa nʋmɔʋ se ɛtaasɔɔlɩ-ɖʋ. Ɛ-sɔɔlɩm ɛɛlɛɣzɩɣ kpa. (Iza. 54:10) Yehowa tɩyɔɔdɩ se ɛlakɩ nɛ mbʋ piyeki nɛ ɖɩtɔkɩ kʋñɔŋ yɔ pɩsɩɩ tɩnaɣ, ɛlɛ ɛɛkaɣ haʋ nʋmɔʋ se kʋñɔmɩŋ weyi ɩwɛ ɛzɩ “pɔsɩ” yaa kala wena awɛ ɛzɩ “miŋ nzʋlʋmɩyɛ yɔ” acamɩ-ɖʋ tam. Ɛha-ɖʋ lidaʋ se ɛwɛɣ ɖɔ-cɔlɔ nɛ ­ɛsɩnɩ-ɖʋ nɛ ‘ɖɩtɛzɩ’ kala ana a-tɩŋa. Ɛbɛ Yehowa kaɣ labʋ? Ɛkaɣ-ɖʋ sɩnʋʋ nɛ sɔɔndʋ ɛtaakpa-ɖʋ nɛ pɩsa nɛ ­ɖɩɖɔkɩ ɖa-cɩŋgɩlɩm wɛtʋ, halɩ pɩkpɛndɩnɩ kala wena apɩzɩɣ nɛ akɔnɩ-ɖʋ sɩm yɔ a-taa. (Iza. 41:13; 43:2) Ye ɖɩtaɣ liu tɔm ndʋ Yehowa yɔɔdaa se “mɛwɛ ñɔ-cɔlɔ” yɔ, ɖa ɖɔɖɔ ɖɩwɛɣnɩ abalɩtʋ nɛ ɖoŋ nɛ ɖɩɖɔkɩ ɖa-tɩ kala taa. w19.01 3 § 4-6

Ye ŋkɛ pɩɣa evelaɣ yɔ, pɩtɩla yɔ, wɩlɩyaa, lɔŋ tasɩyaa yaa ɛyaa lalaa tasɩ-ŋ lɔŋ se ŋla sukuli kɩɖaɣlʋʋ nɛ ŋñɩnɩ ɖɔɖɔ tʋmɩyɛ nɖɩ ɖɩkɔŋnɩ-ŋ liidiye sakɩyɛ yɔ. Ɛlɛ pɩtɩkɛ mbʋ Yehowa ñacaɣ se ŋla. Toovenim taa lɛ, Yehowa sɔɔlaa se ŋla tʋmɩyɛ camɩyɛ sukuli taa nɛ pɩɩsɩnɩ-ŋ nɛ ŋhiɣ tʋmɩyɛ nɛ ŋcɔnɩ ña-kɩcɛyɩm ɖeɖe. (Kol. 3:​23) Ɛɛɛ alɩwaatʋ ndʋ ŋkpakɩɣ lɩmaɣza sɔsɔna ñe-wezuu caɣʋ taa yɔ, ɛsɔɔlaa se ŋlabɩnɩ tʋmɩyɛ paɣtʋ kila wena alakɩ nɔɔ kʋyʋmaɣ nɛ ɛ-kaɖʋwa nɛ ɛ-sɔɔlɩm mbʋ ɛcaɣ se ɖɩla kɛdɛzaɣ kɩyakɩŋ ɩnɛ ɩ-taa yɔ. (Mat. 24:14) Yehowa sɩm mbʋ pɩkaɣ labʋ cee wayɩ yɔ, nɛ ɛnawa se ɛjaɖɛ ɖɩnɛ, pɩkazɩ pazɩ lɛ ɖɩkaɣ tɛm. (Iza. 46:10; Mat. 24:​3, 36) Ɛsɩm-ɖʋ ɖɔɖɔ camɩyɛ: Ɛsɩm mbʋ pɩpɩzɩɣ nɛ pɩha-ɖʋ taa leleŋ nɛ koboyaɣ siŋŋ nɛ mbʋ pɩpɩzɩɣ ɖɔɖɔ nɛ pɩkɔnɩ-ɖʋ laŋwɛɛkɩyɛ nɛ ɛsɩñɩŋɩyɛ yɔ. Pʋyɔɔ lɛ, ye patasɩ-ɖʋ lɔŋ nɩɩyɩ nɛ ɛwɛɛ ɖeu ɛyaa ɛsɩndaa ɛlɛ ɛɛlakɩ nɔɔ kʋɖʋmaɣ nɛ Bibl paɣtʋ kila yɔ, lɔŋ tasʋʋ mbʋ, lɔŋsɩnɖɛ fɛyɩ pɩ-taa paa ññɩɩ. w18.12 19 § 1-2

Ɛlɛ “ɖɛfɛɛ tɩnaa” hikiɣ tɛtʋ nɛ pɛwɛɛ tamtam ɖɩhɛzɩyɛ taa.” Daviid mawa ɖɔɖɔ se: “Siɣsiɣ tʋ tɩnɩ tɛtʋ, ɛwɛɣ tɩ-yɔɔ tam.” (Keɣa 36:11, 29; 2 Sam. 23:2) Ŋmaɣzɩɣ se ɖoŋ weyi tɔm tʋnɛ tɩwɛɣnɩ ɛyaa mba pɔsɔɔlaa se pala Ɛsɔ sɔɔlɩm yɔ pɔ-yɔɔ? Tɔm tʋnɛ tiyeba nɛ pa-taa tɛ se ye siɣsiɣ tɩnaa ɖeke ɩcakɩnɩ wezuu tɛtʋ yɔɔ yɔ, pʋbʋ taa lɛ, paradisuu ŋgʋ kɩwɛ ɛzɩ Edɛɛnɩ kaɖaɣ yɔ, kɩkaɣ wɛʋ tɛtʋ yɔɔ. Alɩwaatʋ wɛɛ nɛ tɩɖɛɣ lɛ, Izrayɛɛlɩ piya nzɩ sɩmaɣzaɣ se sɩwɛɛ nɛ sɩsɛɣ Yehowa yɔ, sɩ-taa sakɩyɛ ha-ɩ siɣye nɛ sikizi toovenim Ɛsɔ sɛtʋ. Pʋyɔɔ lɛ, Ɛsɔ yeba nɛ Babilɔɔnɩ ñɩma wa ɛ-samaɣ, paɖɩzɩ kɛ-tɛtʋ nɛ pakpa ka-taa ɛyaa sakɩyɛ nɛ pɛɖɛnɩ yomiye taa. (4 Aw. 36:15-​21; Yer. 4:​22-​27) Paa mbʋ, Ɛsɔ tɩŋnɩ nayaa yɔɔ nɛ ɛyɔɔdɩ se pɩnzɩ 70 wayɩ lɛ, ɛ-samaɣ ɖaɣnɩɣ pɩsʋʋ kɛ-tɛtʋ taa. Natʋ tɔm ndʋ tɩlaba. Ɛlɛ ɛzɩma natʋ tɔm ndʋ tɩlaba yɔ, tɩkpɛlɩkɩɣ-ɖʋ se cee wayɩ paradisuu kaɣ kɔm ɖɔɖɔ. w18.12 4 § 9-​10

Lɔŋ tasʋʋ sakɩyɛ kaɖɩɣnɩ tɔm ndʋ Masɩ wɩlɩɣ yɔ. Paa mbʋ, ɛzɩ ɛjaɖɛ lɔŋ tasʋʋ mbʋ pɩ-taa nabʋyʋ tɩmʋnɩ camɩyɛ ɖa-alɩwaatʋ tʋnɛ tɩ-taa nɛ pɩkpaɖɩ yaa we? Yesu yɔɔdaa se: “Peɖezi [lɔŋ] tɔm tʋma yɔɔ.” (Mat. 11:19) Paa ɛjaɖɛ ɛɖɛnɩ ɛsɩndaa lɛɣtʋ ñɩnʋʋ nɛ ­won­du kɩfatʋ lubu nʋmɔʋ taa yɔ, ɛyaa tɩpɩzɩ nɛ pawa kala wena ayeki se pataahiɣ koboyaɣ yɔ ɛzɩ yoŋ, ɖama taa tayʋʋ tomnaɣ tɔlɩm yɔɔ nɛ puuyaɣ lakasɩ mbʋ yɔ. Nɛ wezuu kɩbaŋʋ caɣʋ nʋmɔʋ taa yɔ? Ɛyaa sakɩyɛ nawa se lɩmaɣza wena ɛjaɖɛ wɛna yɔ, atɩñɔɔzɩ hɔʋ taa wezuu caɣʋ ɛlɛ pɩkɔnɩ kaɖɛ hɔŋ taa nɛ pɩkɔnɩ ɖɔɖɔ kʋdɔmɩŋ nɛ kʋñɔmɩŋ lɛɛŋ. Ɛlɛ ɛjaɖɛ kpeekpe yɔɔ Krɩstʋ ñɩma mba pɛwɛnɩ Ɛsɔ maɣzɩm yɔ, pɛwɛ koboyaɣ taa pɔ-hɔŋ taa nɛ wezuu kɩbaŋʋ caɣʋ kɔŋnɩ-wɛ ɖɔɖɔ tomnaɣ taa alaafɩya nɛ pa nɛ po-koobiya Krɩstʋ ñɩma lalaa pɛwɛ laŋhɛzɩyɛ taa. (Iza. 2:4; Tʋma 10:34, 35; 1 Kɔr. 6:​9-​11) Tɔm tʋnɛ tɩɩwɩlɩɣ se Yehowa maɣzɩm kpaɖɩ ɖeu ɛjaɖɛ maɣzɩm yaa we? w18.11 20 § 8-​10

Paa ɖɩñakɩ pana se ɖa nɛ ɖɔ-hɔʋ taa ñɩma ɖɛ-hɛkʋ taa ɛwɛɛ leleŋ nɛ ɖɩwɩlɩɣ-wɛ se ɖɩwɛnɩ wɛtʋ kɩbandʋ yɔ, pɩwɛɛ se ɖɩkpa ɖa-tɩ nɛ pataawɛɛnɩ ɖoŋ kɩdɛkɛdɩŋ ɖɔ-yɔɔ nɛ ɖɩpɩsɩnɩ wayɩ toovenim taa. Ðiwoki pɩ-yɔɔ nɛ ɖɩñakɩ pana se ɖa nɛ ɖɔ-hɔʋ taa ñɩma ɖɛ-hɛkʋ taa ɛwɛɛ camɩyɛ, ɛlɛ mba pɔsɔɔlɩ Yehowa yɔ, pe-ɖeke pɩwɛɛ se ɖɩɖʋnɩ taabalɩyɛ. Mba pɔɖɔŋ toovenim taa yɔ, pɩwɛɛ se pɛkɛ ɛyaa kiɖeɖema. (Iza. 35:8; 1 Pɩy. 1:​14-​16) Alɩwaatʋ ndʋ ɖɩpaɣzɩ toovenim tɩlʋʋ yɔ, ɖa-tɩŋa ɖɩlabɩ lɛɣzɩtʋ se ɖe-wezuu caɣʋ ɛmʋnɩ Bibl paɣtʋ. Lalaa lʋbɩnɩ wɛtʋ kɩdɛkɛdɩtʋ sɔsɔtʋ siŋŋ. Paa lɛɣzɩtʋ ndʋ ɖɩtɩɩlaba yɔ, pɩtɩpɔzɩ kpa se ɖɩkpaɣ kele kele wɛtʋ ndʋ ɖɩwɛnɩ lɛɛlɛɛyɔ yɔ nɛ ɖɩlɛɣzɩnɩ wezuu kɩdɛkɛdʋʋ ŋgʋ kɩtɔyɩ ɛjaɖɛ yɔɔ yɔ. Ɛbɛ pɩzɩɣ nɛ pɩsɩnɩ-ɖʋ nɛ ɖɩtaatɔlɩ wezuu kɩdɛkɛdʋʋ caɣʋ kpaca taa? Pɩwɛɛ se ɖɩmaɣzɩ kɩhɛyʋʋ sɔsɔʋ ŋgʋ Yehowa hɛyaa se pɩsa nɛ ɖɩpɩsɩ kiɖeɖema yɔ kɩ-yɔɔ. Kɩhɛyʋʋ ŋgʋ lɛ ɛ-Pɩyalʋ Yesu Krɩstʋ calɩm kiɖeɖem. (1 Pɩy. 1:​18, 19) Pɩsa nɛ ɖɩwɛɛ kele kele Yehowa ɛsɩndaa lɛ, pɩwɛɛ se ɖɩtɔzʋʋ tam kɩhɛyʋʋ pʋ-ñʋʋ taa kɩlaʋ ŋgʋ Yesu laba yɔ kɩ-yɔɔ nɛ ɖiyele nɛ kɩcaɣ ɖa-maɣzɩm nɛ ɖa-laŋa taa tam. w18.11 11 § 10-​11

Alɩwaatʋ tɩŋa Ɛsɔ sɛtʋ tʋmɩyɛ laɖaa sakɩyɛ ɖiɣzinaa se alɩwaatʋ ndʋ pakaŋ pa-lɩmaɣza pɛ-Ɛsɔ sɛtʋ tʋmɩyɛ yɔɔ yɔ, pɩsɩɣnɩ-wɛ nɛ pɛwɛɛ kpekpeka fezuu taa, paa pɛ-wɛtʋ ɛlɛɣzaa yɔ. Ɛzɩ pa-kɩɖaŋ wɩlʋʋ yɔ, ye ɖɩwɛ wɛtʋ natʋyʋ taa nɛ ɖɩlakɩ ɖo-ɖoŋ ɖeɖe nɛ ɖɩɖaŋɩɣ Yehowa nɛ ɖɩtaɣ-ɩ liu yɔ, ɖɩɩkaɣ lesuu taa leleŋ weyi ɖɩwɛna yɔ. Halɩ ɖɩpɩzɩɣ nɛ ɖihiɣ fezuu taa wazasɩ sakɩyɛ, mbʋ pʋyɔɔ yɔ ɖɩɖɔkɩ ɖa-tɩ wɛtʋ kɩfatʋ natʋyʋ taa. Ye ŋkatɩ wɛtʋ ndʋ ŋtaaɖʋna yɔ ñe-wezuu caɣʋ taa, ɛzɩ teokrasɩ tʋmɩyɛ kɩfaɖɛ labʋ, kʋdɔŋ yaa hɔʋ yɔɔ cɔnʋʋ sʋʋtʋ kɩfatʋ mbʋ yɔ yɔ, ña-taa ɛtɛ se Yehowa kaɣ ñɔ-yɔɔ cɔnʋʋ nɛ ɛsɩnɩ-ŋ alɩwaatʋ kɩbandʋ yɔɔ. (Ebr. 4:​16; 1 Pɩy. 5:​6, 7) Pʋcɔ nɛ ɛsɩnɩ-ŋ lɛ, ñaɣ pana nɛ ŋla ño-ɖoŋ ɖeɖe wɛtʋ ndʋ tɩ-taa. Ñɔtɩnɩ ña-Caa weyi ɛwɛ ɛsɔdaa yɔ adɩma taa nɛ ŋɖʋzɩ ña-tɩ e-nesi tɛɛ. Ye ŋlakɩ mbʋ yɔ, ña ɖɔɖɔ ŋŋkaɣ lesuu taa leleŋ weyi ŋwɛna yɔ, paa lɛɣzɩtʋ ndʋ ŋkatɩ ñe-wezuu caɣʋ taa yɔ. w18.10 30 § 17; 31 § 19, 22

Bibl yɔɔdʋʋ kɩɖaŋ sakɩyɛ weyi ɩwɩlɩɣ se Yehowa maɣzɩɣ ɛ-sɛyaa yɔɔ camɩyɛ yɔ, ɩ-tɔm. Ɩ-taa nakʋyʋ lɛ ɛzɩma ɛmaɣzɩ pɩɣa evelaɣ Samɩyɛɛlɩ yɔɔ nɛ ɛsɩnɩ-kɛ se kapɩzɩ nɛ keheyi nɩŋgbaŋʋʋ hɔm tɔm Cɔjɔ Sɔsɔ Elii yɔ. Pɔyɔɔdɩ kɩ-tɔm 1 Samɩyɛɛlɩ 3:​1-​18 taa. Yehowa kaaɖʋ paɣtʋ se piya ɩña sɔsaa, kɔzɩ kɔzɩ awiya. (Ejl. 22:27; Lev. 19:32) Ŋmaɣzɩɣ se Samɩyɛɛlɩ pɩzɩɣ nɛ ɛkʋyɩ tanaŋ ŋgʋ kɩ-tɛɛ nɛ ɛɖɔmnɩ cajayɛ se ewolo nɛ eheyi Elii nɩŋgbaŋʋʋ hɔm tɔm ndʋ? Aayɩ! Bibl heyiɣ-ɖʋ se “sɔɔndʋ kpaɣaɣ Samɩyɛɛlɩ nɛ Elii heyuu ndʋ ɛnawa yɔ.” Ɛlɛ Ɛsɔ yeba nɛ Elii nɩɩ pɩ-taa kpayɩ kpayɩ se ɛnʋ wɛna nɛ ɛyaɣ Samɩyɛɛlɩ. Pʋyɔɔ Elii heyi Samɩyɛɛlɩ se sɔɔndʋ ɛtaakpa-ɩ ɛlɛ ɛyɔɔdɩ tɔm ndʋ payɩ ɛnawa yɔ nɛ ɛtaamɛsɩ “tɩ-taa natʋyʋ.” Nɛ Samɩyɛɛlɩ “heyi-i tɔm kpeekpe,” nɛ tɩlabɩ nɔɔ kʋɖʋmaɣ nɛ tɔm ndʋ “Ɛsɔ tɛ ɛyʋ” nɔɔyʋ kaatɛm yɔɔdʋʋ yɔ. (1 Sam. 2:​27-​36) Samɩyɛɛlɩ nɛ Elii pɔ-yɔɔ tɔm tʋnɛ tɩwɩlɩɣ kpayɩ kpayɩ se Yehowa wɛ lɔŋ pɩdɩɩfɛyɩ nɛ ɛmaɣzɩɣ ɖɔɖɔ lalaa yɔɔ camɩyɛ. w18.09 23 § 2; 24 § 4-5

Cɛtɩm tɔm susuu tɔyɩ sɔnɔ siŋŋ. Pama tɔm ñʋʋ nakʋyʋ nɛ kɩtɔŋ se “Mbʋ pʋyɔɔ ɖɩcɛtɩɣ yɔ.” (fransɩɩ taa.) Pɔyɔɔdɩ kɩ-taa se ɛyaa sakɩyɛ kɔm nɛ pana se “cɛtɩm tɔm yɔɔdʋʋ pɩsɩ mbʋ pɩwɛ ɖooo ɛyʋ calɩm taa yɔ.” Ðoŋ ɖoŋ lɛ, ɛyaa cɛtɩɣ se pataahɔ pa-nɩŋgbaaŋ yaa se pa-hɩla ɩsɛɛ. Pɛcɛtɩɣ se pɩsa nɛ pohuuzi pa-lakasɩ nzɩ sɩfɛyɩ ɖeu yɔ sɩ-yɔɔ yaa se pɩsa nɛ pehiɣ liidiye yaa kɛzɛsɩ lɛɛsɩ. Ɛzɩ takayaɣ ŋga kɔyɔɔdʋʋ yɔ, nabɛyɛ lɛ agɔma, pa-tʋmɩyɛ taa ñɩma, pa-taabalaa, nɛ pɛ-ɛyaa kʋsɔɔlaa cɛtʋʋ wɛ-wɛ kɛlɛʋ, paa pɩkɛ pʋyʋ sɔsɔm yaa pʋyʋ cikpem taa yɔ. Ɛbɛ cɛtɩm mbʋ payɩ pɩkɔnaa? Ɛyaa ɩɩtasɩɣ ɖama taʋ liu. Daviid tɩmnɩ Yehowa se: “Ɛlɛ manawa se toovenim ŋsɔɔlɩ ma-laŋɩyɛ taa.” (Keɣa 50:8) Daviid kaanawa se toovenim yɔɔdʋʋ lɩɣnɩ laŋɩyɛ taa na. Pɩpɔzʋʋ se Krɩstʋ ñɩma “iheyi toovenim paa weyi lɛ e-koobu,” wezuu caɣʋ hɔɔlɩŋ kpeekpe taa.​—Zek. 8:​16. w18.10 7 § 4; 8 § 9-10; 10 § 19

Izrayɛɛlɩ samaɣ lɩ Ejipiti pɩnaɣ 1513 P.P.Y.; nɛ pɩtɩla yɔ, kaatalɩ ɛyaa miiliyɔɔwaa naadozo mbʋ yɔ. Samaɣ taa ɛyaa Kpaɖɩŋ kaatalɩ ɛzɩ naadozo yaa naanza mbʋ yɔ. Piya, akpadɩyaa nɛ pɩtʋʋ fɛyɩ se ajamaa kaawɛ samaɣ ŋga ka-taa. Pɩɩpɔzɩ ɖiyiyu weyi ɛnɩɣ ɛyaa tɔm taa nɛ pɩwɛɛ kɛlɛʋ se pɔñɔtɩnɩ-ɩ yɔ, nɛ eɖiyi samaɣ sɔsɔɔ ŋga nɛ ɛlɩzɩ-kɛ yomiye taa. Yehowa tɩŋnɩ Moyizi yɔɔ nɛ ɛwɩlɩ se ɛkɛ ɖiyiyu kɩbanʋ weyi ɛmʋnɩ camɩyɛ yɔ. Piyeba nɛ Izrayɛɛlɩ samaɣ pɩzɩ nɛ kalɩɩ Ejipiti ɛjaɖɛ taa nɛ kaɖɛ naɖɩyɛ tɩtalɩ-kɛ. (Keɣa 77:52) Ɛzɩma Yehowa kandɩyɩ ɛ-samaɣ yɔɔ? Mbʋ Yehowa laba yɔ, pɩ-taa nabʋyʋ lɛ se ɛñɔɔzɩ-wɛ ɛzɩ mba pɛɖɛɣ you yɔ. (Ejl. 13:18) Ɛñɔɔzɩ-wɛ mbʋ nɛ pɩsɩnɩ-wɛ nɛ patɩlɩ se pɛ-Ɛsɔ wɛna nɛ eɖiyiɣ-wɛ. Yehowa yeba ɖɔɖɔ nɛ patɩlɩ se ɛwɛ pɔ-cɔlɔ, mbʋ pʋyɔɔ yɔ “wɩsɩ taa lɛ, ehuuzaɣ pɔ-yɔɔ mɩndʋ, nɛ ɖoo taa lɛ, miŋ caɖɩyɛ.” (Keɣa 77:14) Pɩwɛ ɛzɩ Yehowa kaawɛɛ nɛ eheyiɣ-wɛ se: “Sɔɔndʋ ɛtaakpa-mɩ, mɛwɛ mɩ-cɔlɔ se menɖiyi-mɩ nɛ mohuuzi mɩ-yɔɔ.” w18.09 26 § 11-​12

Bibl alɩwaatʋ taa, wɛtʋ ndʋ tɩɩtalɩ Ɛsɔ sɛyaa siɣsiɣ ñɩma nabɛyɛ yɔ tɩ-yɔɔ lɛ, pɩlakaɣ-wɛ ɛzɩ pasɩ nɛ pɛhɛzɩ yɔ. Alɩwaatʋ ndʋ kʋñɔmɩŋ sakɩyɛ talɩ Yɔɔb yɔ, ɛyɔɔdaa se: “Me-wezuu lɩm sɔŋ; mewiɣ me-witu nɛ mɛntɛ ­man-taa, mankaɣ kɛdʋʋ men-ciyam taa ñaŋ tɔm.” (Yɔɔb 10:​1) Mbʋ pɩtalɩ Yoonaasɩ tʋmɩyɛ nɖɩ Ɛsɔ ɖʋ-ɩ yɔ ɖɩ-labʋ taa yɔ pʋyɔɔ lɛ ɛyɔɔdaa se: “Nɛ lɛɛlɛɛyɔ hayɩ [Yehowa] mentendi-ŋ, tɛzɩ men-ciyam mʋʋ, mbʋ yɔ sɩbʋ kɩlɩ-m ɖeu wɛʋ.” (Yon. 4:⁠3) Alɩwaatʋ natʋyʋ taa mbʋ pɩtalɩ nayʋ siɣsiɣ tʋ Eliya yɔ pʋyɔɔ lɛ, ɛmaɣzaɣ se ye ɛsɩba yɔ pɩkɩlɩ-ɩ ɖeu. Ɛyɔɔdaa se: “Pɩɖɔ-m [Yehowa]! Kpaɣ me-wezuu.” (1 Aw. 19:⁠4) Paa mbʋ yɔ, Yehowa kaasɔɔlɩ ɛ-sɛyaa siɣsiɣ ñɩma mba nɛ ɛɛsɔɔlaa ɖɔɖɔ se pacaɣ wezuu. Ɛtɩkalɩ-wɛ pa-lɩmaɣza ana a-yɔɔ, ɛlɛ ɛsɩnɩ-wɛ nɛ pawabɩ-yɛ nɛ ɛkpazɩ-wɛ ɖoŋ nɛ sɔɔlɩm se powolo pɩ-yɔɔ nɛ pɛsɛɣ-ɩ nɛ pa-laŋɩyɛ pilim. w18.09 13 § 4

Ɛsɔ sɩnɩyaa sɔɔlɩ ɛgɔndʋ mʋʋ. Grɛɛkɩ Masɩ taa lɛ tɔm piye nɖɩ palabɩnɩ tʋmɩyɛ se “ɛgɔndʋ” yɔ, ɖɩ-tɔbʋʋ lɛ se “kɩbandʋ labʋ agɔma.” (Ebr. 13:2) Tɔm ndʋ tɩwɛ Bibl taa yɔ, tiseɣtiɣ-ɖʋ se ɖɩwɩlɩ lalaa sɔɔlɩm mbʋ. (Kiɖe 18:​1-5) Pɩwɛɛ se ɖɩtɩŋnɩ nʋmɔŋ ndɩ ndɩ yɔɔ nɛ ɖɩsɩnɩ lalaa paa pɛkɛ ɖo-koobiya yaa patɩkɛ yɔ. (Gal. 6:​10) Ŋpɩzɩɣ nɛ ŋwɩlɩ se ŋkɛ Ɛsɔ sɩnɩyʋ nɛ ŋmʋ ɛgɔndʋ koobiya mba pɛwɛ alɩwaatʋ tɩŋa Ɛsɔ sɛtʋ taa yɔ? (3 Yohanɛɛsɩ 5, 8) Ye ŋlakɩ mbʋ yɔ, pɩkaɣ yebu nɛ ña nɛ wɛ ‘ɩkpazɩ ɖama ɖoŋ.’ (Roma 1:​11, 12) Bibl seɣtiɣ ɛgbɛyɛ taa abalaa se pɛɖɛɛnɩ ɛsɩndaa nɛ pe-liu tɛɛ kɔtɩnɩ ɛgbɛyɛ taa tʋmlaɖʋ tʋmɩyɛ nɛ ɛgbɛyɛ taa ɛzʋtʋyʋ tʋmɩyɛ nɛ piyele nɛ pa nɛ Ɛsɔ pala tʋmɩyɛ. (1 Tim. 3:​1, 8, 9; 1 Pɩy. 5:​2, 3) Nɛ mba palakɩ mbʋ yɔ, pɔsɔɔlaa se pasɩnɩ lalaa tomnaɣ yɔɔ nɛ fezuu taa. (Tʋma 6:​1-4) Mba pɛtɛm paɣzʋʋ ɛgbɛyɛ taa tʋma labʋ yɔ, pakaɣ-ŋ kɛdʋʋ taa leleŋ sɔsɔŋ weyi pehikiɣ alɩwaatʋ ndʋ pasɩɣnɩ po-koobiya yɔ. w18.08 24-​25 § 6-7, 10

Paa paaha Timootee waɖɛ ɛgbɛyɛ taa nɛ pɩcɛzɩ koobiya mba yɔ, pɩwɛɛ se ɛha-wɛ ñamtʋ. Paa mbʋ yɔ, ɛzɩma pɩwɛɛ se ñamtʋ ndʋ tɩwɛɛ? Ye nɔɔyʋ ɛkɩlɩ-ŋ pɩnzɩ nɛ ɛɖʋʋ ɛ-taa faɖaɖa nɛ ɛlakɩ kɩwɛɛkɩm nabʋyʋ yaa ɛsandɩɣ lakasɩ nzɩ sɩtɩkɛdɩnɩ Yehowa yɔ, ɛzɩma pɩwɛɛ se ŋla? Yehowa ɛɛcɔŋnɩ mbʋ pɩnaɣ ɛsa yɔɔ yem yɔ nɛ ɛhʋʋ tɔm, pʋyɔɔ lɛ eeyeki weyi ɛɖʋʋ ɛ-taa faɖaɖa nɛ ɛla kɩwɛɛkɩm yɔ ɛ-nɩŋgbaŋʋʋ hɔm, paa ɛzʋtʋyaa yɔ. Na tɔm ndʋ pɔyɔɔdɩ Ezekɩyɛɛlɩ 9:​5-6 taa yɔ: “Ɩtɩŋ ɛ-wayɩ nɛ ɛtɛzɩ tɛtʋ nɛ ɩmaa; ɩtaafɛɛ nɔɔyʋ nɛ pɩtaalabɩ-mɩ pʋtɔdɩyɛ: Akpadɩyʋ, evebu, pɛlɛ, halaa, ɩkʋ-wɛ, ɩtɔyɩtɩ-wɛ.” Lɩmaɣzɩyɛ kʋɖʋmɖɩyɛ nɖɩ ɖɩwɛnɩ natʋ tɔm ndʋ tɩwɛ Izaayii 65 taa yɔ. (Izaayii 65:20) Ye mbʋ, mbʋ pɩ-tɔm pɩwɛɛ se pɩkɩlɩ cɛyʋʋ ɖɛ-ɛsɩndaa yɔ, mbʋ lɛ se ɖɩha ñamtʋ “Kɩyakɩŋ Akpadɩyʋ” Yehowa. (Dan. 7:​9, 10, 13, 14) Ye ɖɩlakɩ mbʋ yɔ, sɔɔndʋ ɛɛkaɣ-ɖʋ kpaʋ alɩwaatʋ ndʋ pɩpɔzʋʋ se ɖɩhɔ nɔɔyʋ nɩŋgbaaŋ paa ɛ-pɩnzɩ ɩwɛ ɛzɩma yɔ.​—Gal. 6:1. w18.08 11 § 13-​14

Ðɩkɛ Krɩstʋ ñɩma toovenim mba nɛ pʋyɔɔ lɛ, pɩcɛyaa se ɖɩtɩlɩ ɛzɩma ɖɩtazɩ tɔm natʋyʋ taa nɛ ɖɩna se tɩkɛ toovenim, yaa cɛtɩm yɔ. (Adu. 3:​21-​23; 8:​4, 5) Ye ɖɩtɩkpɛlɩkɩ ɛzɩma ɖɩtazɩ tɔm taa camɩyɛ yɔ, pɩwɛɣ kɛlɛʋ se Sataŋ nɛ ɛ-ɛjaɖɛ pɛwɛɛkɩ ɖa-lɩmaɣza. (Efɛz. 5:6; Kol. 2:8) Ye mbʋ, alɩwaatʋ ndʋ ɖɩtazɩɣ tɔm taa camɩyɛ yɔ, piyeki nɛ ɖɩtɩlɩ se tɩkɛ toovenim yaa cɛtɩm. Sɔnɔ, tɔm ndʋ ɛyaa tɩŋɩɣnɩ intɛrnɛɛtɩ lona, teeleewaa nɛ tɔm susuu ­won­du lɛɛtʋ yɔɔ nɛ pañɩnɩɣ se lalaa ɩtɩlɩ-tʋ yɔ, tɩfɛyɩ kalʋʋ. Taabalaa nɛ ɛyɩsɩmaa tɩŋɩɣnɩ intɛrnɛɛtɩ, pɔrtaabɩlɩwaa nɛ nʋmɔŋ lɛɛŋ yɔɔ nɛ petiyiɣni ɛyaa lalaa tɔm ndɩ ndɩ. Ɛyaa sɔɔlɩ tiyinuu cɛtɩm tɔm yaa tɔm ndʋ tɩtɩkɛ toovenim ɖeyi ɖeyi yɔ, pʋyɔɔ lɛ pɩcɛyaa se ɖɩtazɩ tɔm ndʋ payɩ ɖɩnɩɣ yɔ tɩ-taa camɩyɛ. w18.08 3 § 1, 3

Alɩwaatʋ talaa se palʋlɩ Ɛsɔ Pɩyalʋ tɛtʋ yɔɔ lɛ, Yehowa lɩzɩ Maarɩɩ, pɛlɛ weyi eluzuu ɛ-tɩ nɛ ɛtɩtɩlɩ abalʋ yɔ se ɛkɛnɩ ɛ-pɩɣa ŋga kɛwɛ ŋgee yɔ ko-ɖoo. Maarɩɩ kaawɛ tɛtʋ cikpetu ndʋ payaɣ se Nazarɛɛtɩ yɔ tɩ-taa. Tɛtʋ ndʋ tɩɩwɛ poliŋ nɛ Yeruzalɛm nɛ ki-templo sɔsɔʋ. (Luka 1:​26-​33) Alɩwaatʋ ndʋ Maarɩɩ yɔɔdɩnɩ ɛ-hɔʋ taa tʋ Elizaabɛɛtɩ yɔ, ɛwɩlaa se ɛwɛnɩ fezuu taa wɛtʋ kɩbandʋ. (Luka 1:​46-​55) Ɛɛɛ, Yehowa cɔŋnaɣ mbʋ payɩ Maarɩɩ lakaɣ yɔ, nɛ ɛzɩma Maarɩɩ kaawɛ siɣsiɣ yɔ, mbʋ yebina nɛ Ɛsɔ ha-ɩ waɖɛ nɖɩ ɖɩ-yɔɔ ɛtaamaɣzɩ yɔ. Alɩwaatʋ ndʋ Maarɩɩ lʋlɩ Yesu yɔ, Yehowa tɩɖʋ hɩɖɛ tɛtʋ ñʋndɩnaa yaa paɣtʋ ɖʋyaa mba paawɛ Yeruzalɛm nɛ Bɛtɩlɛhɛm yɔ, etiyele se pa-taa nɔɔyʋ ɛna mbʋ pɩlaba yɔ. Ɛsɔ tiyiyaa nabɛyɛ wobi ninɖiɣyaa ­kʋñɔndɩnaa mba pɔcɔŋnaɣ kpɩna yɔɔ hayɩm mbʋ pɩɩñɔtɩnɩ Bɛtɩlɛhɛm yɔ pɔ-cɔlɔ. (Luka 2:​8-​14) Nɛ ninɖiɣyaa mba powolo nɛ pana pɩɣa kɩfalaɣ ŋga palʋlaa yɔ. (Luka 2:​15-​17) Pɩɩɖɩɣzɩ Maarɩɩ nɛ Yosɛɛfʋ alɩwaatʋ ndʋ ninɖiɣyaa kɔma nɛ paɖʋ hɩɖɛ Yesu yɔ! w18.07 9-​10 § 11-​12

Ɛbɛ yɔɔ Yehowa taa wɩnɩ Salomɔɔ?Bibl heyiɣ-ɖʋ se: “[Yehowa] hɔyɛ wɩnɩ Salomɔɔ se ɛha siɣye [Yehowa] . . . , weyi ɛwɩlɩ-ɩ ɛ-tɩ tam nabʋlɛ yɔ nɛ ɛɖʋ-ɩ paɣtʋ se ɛtaatɩŋ agbaaɣdaa agɔlɩma wayɩ; nɛ ɛtɩɖɔkɩ paɣtʋ ndʋ [Yehowa] ɖʋ-ɩ yɔ.” Piyeba nɛ samtʋ ndʋ Salomɔɔ haɣaɣ Ɛsɔ yɔ, tɩtɩtasɩ ɛlɛ kɛdɩnʋʋ. Salomɔɔ sɩm wayɩ lɛ, Izrayɛɛlɩ kewiyaɣ tayɩ nɛ awiya wena atɔɔ kewiyitu ­pʋwayɩ yɔ, akatɩ kala ndɩ ndɩ pɩnzɩ sakɩyɛ. (1 Aw. 11:​9-​13) Ɛzɩ Salomɔɔ yɔ, ye ɖɩɖʋʋ taabalɩyɛ nɛ ɛyaa mba paañaŋ yaa paanɩɣ Yehowa paɣtʋ taa yɔ, pɩpɩzɩɣ nɛ pɩcamɩ-ɖʋ fezuu taa. Ɛyaa mba, pa-taa nabɛyɛ pɩzɩɣ nɛ pɛwɛɛ ɛgbɛyɛ taa, ɛlɛ pɛfɛyɩ ɖoŋ fezuu taa. Nɛ lalaa ñapɩzɩɣ nɛ pɛkɛ ɖɔ-hɔʋ taa ñɩma, ɖo-kooka taa ñɩma, ɖa nɛ mba ɖɩlakɩ tʋmɩyɛ yɔ, yaa ɖo-sukuli taa taabalaa mba paasɛɣ Yehowa yɔ. Pɩwɩlɩɣ se ye ɖɩɖʋʋ taabalɩyɛ nɛ mba paañaŋ Yehowa paɣtʋ yɔ, alɩwaatʋ kaaɖɛɣ lɛ, papɩzɩɣ peyele nɛ ɖa nɛ Ɛsɔ ɖa-taabalɩyɛ cɛ. w18.07 19 § 9-​10

Sataŋ tɩŋɩɣnɩ filimwaa nɛ teelee yɔɔ ɖʋtʋ yɔɔ se eyele nɛ ɛ-maɣzɩm yɛlɩ nɛ pɩtalɩ paa le. Ɛnawa se tɔm ndʋ pɛkɛdɩɣ yɔ, pɩtasɩna se ɛyaa tɩŋɩɣnɩ tɩ-yɔɔ nɛ pamʋʋ helim lɛ, tɩwɛnɩ ɖoŋ ɖɔɖɔ pa-maɣzɩm nɛ pa-lakasɩ yɔɔ. Yesu kaalabɩnɩ nʋmɔʋ ŋgʋ tʋmɩyɛ. Kɩɖaŋ nɩɩyɩ lɛ Samaarii tʋ kɩbanʋ nɛ pɩɣa kilebaɣ aduwa. (Mat. 13:34; Luka 10:29-​37; 15:11-​32) Ɛlɛ, mba pɛwɛnɩ Sataŋ maɣzɩm yɔ, papɩzɩɣ nɛ patɩŋnɩ tɔm ndʋ pɛkɛdɩɣ-ɖʋ yɔ tɩ-yɔɔ nɛ pepisi-ɖʋ. Pʋyɔɔ pɩcɛyaa se ɖɩtɩlɩ labʋ. Toovenim se ɖɩpɩzɩɣ nɛ ɖɩtɩŋnɩ filimwaa nɛ teelee yɔɔ ɖʋtʋ yɔɔ nɛ ɖɩmʋ helim nɛ ɖɩkpɛlɩkɩ ɖɔɖɔ tɔm ndʋ tiipisiɣ ɖa-maɣzɩm yɔ. Ɛlɛ pɩwɛɛ se ɖɩtɩlɩ labʋ. Ðɩɩlɩzɩɣ aleɣya naayɛ lɛ, pɩwɛɣ ɖeu se ɖɩpɔzɩ ɖa-tɩ se: ‘Filim yaa teelee yɔɔ ɖʋtʋ ndʋ mancaɣ cɔnʋʋ yɔ, tiseɣtiɣ-m se mala mon-tomnaɣ sɔɔlɩm na?’ (Gal. 5:​19-​21; Efɛz. 2:​1-3) Ye ŋkɔma nɛ ŋyʋsɩ se ɖʋtʋ natʋyʋ wɛɛ nɛ tɩsandɩɣ Sataŋ lɩmaɣza, ɛbɛ pɩwɛɛ se ŋla? Kpa ña-tɩ nɛ tʋ ɛzɩ ɛyʋ cɔŋnʋʋ ɛ-tɩ yɔɔ se kʋdɔŋ kɩɖɛɖɛʋ nakʋyʋ ɛtaaɖɛɛ-ɩ yɔ. w19.01 15-​16 § 6-7

Ɛzɩma ñɩɣtʋ hulaɣ kandɩyɩɣ sɔɔja feteenim yɔɔ yɔ, mbʋ ɖɔɖɔ ‘ɖa-ñʋʋ yabɩtʋ lidaʋ’ kandɩyɩɣ ɖa-maɣzɩm yɔɔ. (1 Tes. 5:8; Adu. 3:21) Ɛzɩma Sataŋ pɩzɩɣ nɛ epeɣzi-ɖʋ nɛ ɖikuli ɖa-ñɩɣtʋ hulaɣ? Na mbʋ ɛlaba se epeɣzi Yesu nɛ ɛlɛ la mbʋ yɔ. Sataŋ ɖiɣzinaa se Yesu wɛnɩ lidaʋ se piileɖiɣ lɛ, ɛkaɣ tɔɔʋ Kewiyitu ɛyaa kpeekpe yɔɔ. Ɛlɛ pɩɩpɔzaa se Yesu ɛɖaŋ nɛ pɩtalɩ alɩwaatʋ ndʋ Yehowa haɣ-ɩ nʋmɔʋ yɔ. Nɛ pʋcɔ nɛ alɩwaatʋ ndʋ tɩtalɩ lɛ, pɩɩpɔzaa se ɛtɔɔ kʋñɔŋ nɛ ɛsɩ. Ɛlɛ Sataŋ ha Yesu waɖɛ se e-lidaʋ ŋgʋ kɩla kpaagbaa. Eheyi Yesu se ye etisaa nɛ eluŋ ɛ-tɛɛ nɛ ɛsɛɛ-ɩ yɔ, ɛwɛɣnɩ waɖɛ se ɛtɔɔ kewiyitu kpaagbaa. (Luka 4:​5-7) Mbʋ ɖɔɖɔ Sataŋ ɖiɣzinaa se ɛjaɖɛ kɩfaɖɛ taa Yehowa kaɣ-ɖʋ wazʋʋ nɛ ɖɩwɛɛnɩ tomnaɣ yɔɔ ñɩm. Ɛlɛ pɩwɛɛ se ɖɩɖaŋ nɛ halɩ pɩtɩla yɔ, pɩpɔzʋʋ se ɖɩtɔɔ kʋñɔmɩŋ pʋcɔ nɛ pɩtalɩ mbʋ. Pʋyɔɔ Sataŋ ñatakɩɣ-ɖʋ nɛ ɛñɩnɩɣ se ɛha-ɖʋ wala ndɩ ndɩ wena ayeki se ɖɩwɛɛnɩ ñɩm mbʋ sɔnɔ sɔnɔ yɔ. Ɛñɩnɩɣ se ɖɩcalɩnɩ ñɩnʋʋ tomnaɣ yɔɔ ñɩm nɛ ɖɩwɛɛnɩ ñɩm mbʋ pɩtɩŋa sɔnɔ kpaagbaa. Sataŋ seɣtiɣ-ɖʋ se ɖɩtaacalɩnɩ ñɩnʋʋ ­Kewiyaɣ.​—Mat. 6:​31-​33. w18.05 30-31 § 15-​17

Toovenim, Yehowa sɔɔlaa se evebiya nɛ pɛlaa pehiɣ taa leleŋ siŋŋ. Pʋyɔɔ lɛ, ye ŋkɛ pɩɣa evelaɣ yɔ, ka ñʋʋ nɛ fezuu taa kaɖʋsɩ nɛ taasɔɔ Yehowa yɔɔ kaaʋ ña-lɩmaɣza kpaɣʋ taa. Ye ŋpaɣzɩ labʋ mbʋ lɔŋ yɔ, mbʋ ɖɔɖɔ Yehowa kaɣ-ŋ sɩnʋʋ, ehuuzi ñɔ-yɔɔ nɛ ŋhiɣ ɖɔɖɔ ɛ-wazasɩ lɔŋ. Taasɔɔ lɔŋ tasʋʋ mbʋ pɩwɛ Bibl taa yɔ pɩ-yɔɔ kaaʋ nɛ ŋɖɔ mayaɣ kanɛ kɔ-tɔm yɔɔ: “Tɔzɩ ña-Lɩzɩyʋ yɔɔ ñe-evebitu wɛɛ taa.” (Ekl. 12:1) Krɩstʋ ɛgbɛyɛ taa evebiya nɛ ­pɛlaa mʋnɩ samtʋ siŋŋ mbʋ pʋyɔɔ yɔ, pakaŋ ñʋʋ nɛ ­Yehowa sɔɔlɩm labʋ pe-wezuu caɣʋ taa. ­Ɛzɩma pañakɩ pana nɛ patalɩɣ pe-fezuu taa kaɖʋsɩ nɛ pasɩɣ tɔm susuu tʋmɩyɛ kajalaɣ lone taa yɔ, pɩwɩlɩɣ se toovenim pasɩɣ ­Yehowa sɔɔlɩm labʋ kajalaɣ lone taa. Pɩtasɩ lɛ, pɛtɛm pa-taa se paayeki nɛ ɛjaɖɛ ɖɩnɛ ɖɩlɛɣzɩ pa-lɩmaɣza. Piya evelisi sɩnɛ sɩnawa se sɩ-pana ñaɣʋ tɩkɛ falaa. Koobiya ɖʋʋ-sɩ nesi nɛ sɔɔlɩm nɛ alɩwaatʋ ndʋ sɩkpakɩɣ sɩ-tɩ nɛ sɩha Yehowa yɔ, ɛlɛ kaɣ yebu nɛ sɩ-lɩmaɣza ɖɔmnɩ-sɩ camɩyɛ. w18.04 29 § 17, 19