Juin

Tɔm tʋnɛ tɩɩkpazɩ apostoloowaa ɖoŋ siŋŋ! Paa pataana se pɩzaɣ pazɩ ɛnʋ weyi ɛkɛ pa-ñʋʋdʋ yɔ ɛɛtasɩɣ wɛʋ pɔ-cɔlɔ yɔ, ɛtɩŋnɩ tɔm tʋnɛ tɩ-yɔɔ se patɩlɩ se paa ɛfɛyɩ pɔ-cɔlɔ yɔ, ɛkaɣ-wɛ nesi ɖʋʋ. Yehowa sɔɔlɩ faaa se ewelisi pa-adɩma nɛ ɛsɩnɩ-wɛ nɛ pala Kewiyaɣ tɔm susuu tʋmɩyɛ nɖɩ paɖʋ-wɛ yɔ. Nɛ toovenim taa pitileɖi lɛ, pana ɛzɩma Yehowa cosi pa-adɩma yɔɔ nɛ ɛsɩnɩ-wɛ yɔ. Tʋma 4:​29, 31) Sɔnɔ tɔm tʋnɛ tɩkɛ toovenim ɖɔɖɔ. Ye ɖiwobi pɩ-yɔɔ nɛ ɖɩlʋlʋʋ pee yɔ, ɖa-taa kaɣ labʋ leleŋ se ɖɩkɛ Yesu taabalaa. Pɩtasɩ lɛ, ɖɩɩpɩtɩɣ se Yehowa nɩɣ ɖa-adɩma nɛ ɛsɩnɩ-ɖʋ nɛ ɖɩwa kala wena ɖɩpɩzɩɣ ɖɩkatɩ alɩwaatʋ ndʋ ɖiisusuu Kewiyaɣ tɔm ɖɔɖɔ yɔ. (Fil. 4:​13) Ða-taa wɛ leleŋ siŋŋ se Ɛsɔ cosuu ɖa-adɩma yɔɔ nɛ ɖɩkɛ ɖɔɖɔ Yesu taabalaa! Yehowa kʋjɔŋ ɩnɛ, ɩkpazɩɣ-ɖʋ ɖoŋ se ɖiwolo pɩ-yɔɔ nɛ ɖɩlʋlʋʋ pee.​—Yak. 1:​17. w18.05 21 § 17-18

Pɩnzɩ kagbanzɩ wayɩ lɛ, Yuuda Krɩstʋ ñɩma mba paawɛ Yeruzalɛm yɔ, pakaɣ naʋ se “[Yehowa] kɩyakʋ” ñɔtaa nɛ peɖiɣzini ɖɔɖɔ yʋsaɣ ŋga Yesu heyi-wɛ se pana-kɛ lɛ, pese palɩɩ tɛtʋ ndʋ tɩ-taa yɔ. (Tʋma 2:​19, 20; Luka 21:20-​22) Yehowa kɩyakʋ ŋgʋ kɩkɔm pɩnaɣ 70, alɩwaatʋ ndʋ Yehowa tɩŋnɩ Roma kewiyaɣ yɔɔ nɛ ɛɖɩzɩ Yeruzalɛm yɔ. Sɔnɔ ɖɩɩpɩtɩɣ se ‘[Yehowa] kɩyakʋ sɔsɔʋ ŋgʋ kɩwɛ sɔɔndʋ pɩŋŋ’ yɔ kɩñɔtɩ kpam. (Yow. 2:​11) Nayʋ Sofoniya yɔɔdaa se: “Kɩbaɣlʋ kɩyakʋ sɔsɔʋ ñɔtaa nɛ kɩkɔŋ lɛɛ lɛɛ.” (Sof. 1:​14) Natʋ tɔm tʋnɛ ­titukuuni ɖa-alɩwaatʋ ɖɔɖɔ. Ɛzɩma Yehowa kɩyakʋ ñɔtɩ kpam yɔ pʋyɔɔ lɛ, Pɔɔlɩ seɣtiɣ-ɖʋ se “ɖikemsini ɖama nɛ ɖɩkpazɩ ɖama sɔɔlɩm ɖoŋ nɛ tʋma kɩbana labʋ.” (Ebr. 10:24) Pʋyɔɔ lɛ, pɩwɛɛ se ɖɩmaɣzɩɣ ɖo-koobiya yɔɔ nɛ pɩkpaɖɩ nɛ ɖɩpɩzɩ nɛ ɖɩkpazɩ-wɛ ɖoŋ alɩwaatʋ ndʋ pɩpɔzʋʋ yɔ. w18.04 20 § 1-2

Yehowa kpazɩ Yozuwee ɖoŋ siŋŋ pʋcɔ nɛ ɛɖʋʋ-ɩ tʋmɩyɛ se eɖiyi Ɛsɔ samaɣ nɛ ewoni-kɛ Kanaŋ tɛtʋ taa. Pɩtasɩnɩ se Yehowa kpazaɣ ɖoŋ ɛyaa nabɛyɛ lɛ, ɛɛyɔɔdɩ ɖɔɖɔ tɔm pee wena akpazɩ ɖoŋ ɛ-samaɣ tɩŋa yɔ. Alɩwaatʋ ndʋ Yuuda ñɩma kaawɛ yomiye taa Babilɔɔnɩ yɔ, Yehowa yɔɔdɩ natʋ tɔm natʋyʋ nɛ tɩkpazɩ-wɛ ɖoŋ siŋŋ. Ɛyɔɔdaa se: “Ña-laŋɩyɛ ­ɛtaalɩɩ, mbʋ yɔ mɛwɛ ñɔ-cɔlɔ; taahʋʋ, mbʋ yɔ mɛnkɛ ñɛ-Ɛsɔ: Mankaɣ-ŋ kpazʋʋ ɖoŋ nɛ mankaɣ-ŋ sɩnʋʋ nɛ mankaɣ-ŋ ɖɔkʋʋ nɛ mon-toovenim nɩwaŋ.” (Iza. 41:10) Ɛɛkpazɩ ɖoŋ caanaʋ taa Krɩstʋ ñɩma nɛ mbʋ ɖɔɖɔ eɖiɣni labʋ ɛ-sɛyaa mba pɛwɛ sɔnɔ yɔ. (2 Kɔr. 1:​3, 4) Halɩ Yesu maɣmaɣ, ɛ-Caa kpazɩ-ɩ ɖoŋ. Alɩwaatʋ ndʋ pamɩyɩsaɣ Yesu lɩm yɔ, ɛnɩ nɔɔ nakɛyɛ taŋ nɛ ɛsɔdaa kiŋ nɛ keheyi-i se: “Ɛnʋ yɔ ɛkɛnɩ man-Pɩyalʋ kʋsɔɔlʋ weyi man-taa wɛ-ɩ nɛ leleŋ pɩdɩɩfɛyɩ yɔ.” (Mat. 3:​17) Pɩtʋʋ fɛyɩ se tɔm tʋnɛ tɩɩkpazɩ Yesu ɖoŋ nɛ ɛpɩzɩ nɛ ɛla tɔm susuu tʋmɩyɛ nɖɩ ɖɩ-yɔɔ ɛkɔm tɛtʋ yɔɔ yɔ! w18.04 16 § 3-5

Sɔnɔ ɛyaa sakɩyɛ kalɩɣ paɣtʋ ndʋ Yehowa ɖʋ Aɖam yɔ lɛ, papɩzɩɣ nɛ pɔyɔɔdɩ se tɩwɩlɩɣ se Aɖam tɩtasɩ wɛʋ ɛ-tɩ yɔɔ se ɛpɩzɩ nɛ ɛla mbʋ ɛ-maɣmaɣ ɛsɔɔlaa yɔ. Pɔ-tɔm ndʋ tɩwɩlɩɣ se paasɩŋ tʋkaɣ ŋga kɛwɛ tɩ-yɔɔ wɛʋ lɩzʋʋ waɖɛ nɛ kɩbam nɛ kɩdɛkɛdɩm tɩlʋʋ waɖɛ pɛ-hɛkʋ taa yɔ. Aɖam nɛ Ɛva paawɛnɩ waɖɛ se palɩzɩ se pañaŋ Ɛsɔ yaa paañaŋɩ-ɩ. Ɛlɛ Yehowa ɖeke ­kaawɛnɩnɩ waɖɛ se eheyi-wɛ mbʋ pɩwɛ ɖeu nɛ mbʋ pɩfɛyɩ ɖeu yɔ, nɛ mbʋ ­kaasɩŋnɩ “kɩbam nɛ kɩdɛkɛdɩm sɩmtʋ tɩʋ” ŋgʋ kɩɩwɛ Edɛɛnɩ kaɖaɣ taa yɔ. (Kiɖe 2:​9) Pɩtɩŋnɩ paɣtʋ ndʋ Yehowa ɖʋwa yɔ tɩ-yɔɔ lɛ, ɛkpɛlɩkɩ Aɖam nɛ Ɛva ɛzɩma papɩzɩɣ nɛ pɛwɛɛ pa-tɩ yɔɔ siŋŋ yɔ. Ɛzɩ ɖɩnaʋ yɔ, Aɖam nɛ Ɛva palɩzaa se paañaŋ Ɛsɔ. Mbʋ Aɖam nɛ Ɛva palaba yɔ, piyeba nɛ pɛwɛɛ pa-tɩ yɔɔ nɛ pɩkpaɖɩ yaa we? Pɩlabɩ pʋtɔdɩyɛ se pɩtɩla mbʋ. Ɛzɩma pañaɣ pana se peɖiyi pa-tɩ yɔ, piyeba nɛ pelesi tɩ-yɔɔ wɛʋ siŋŋ mbʋ Ɛsɔ ha-wɛ yɔ. w18.04 5-6 § 9-​12

Pɩtasɩnɩ se Yehowa nɩɣ ɛ-sɛyaa mba pɔtɔkɩ kʋñɔŋ yɔ pe-siziŋ lɛ, ɛlakɩ nabʋyʋ se ɛsɩnɩ-wɛ. Kɩɖaʋ nakʋyʋ lɛ alɩwaatʋ ndʋ Izrayɛɛlɩ piya kaakɛ yomaa Ejipiti nɛ pɔtɔkɩ kʋñɔŋ yɔ. Alɩwaatʋ ndʋ tɩ-taa, Yehowa nɩ pe-siziŋ nɛ piseɣti-i nɛ ɛlɩzɩ-wɛ pɩ-taa. Yehowa heyi Moyizi se: “Mana man-samaɣ kʋñɔŋ . . . , nɛ manɩɩ ko-kubuka, kɔ-yɔɔ cɔnɩyaa wɩlɩɣ-kɛ ñaŋ weyi yɔ, ɩ-taa. Mɛntɛm man-taa se moholuu-kɛ malɩzɩ Ejipiti mba nesi tɛɛ.” (Ejl. 3:​7, 8) Ɛzɩma Yehowa nɩ ɛ-samaɣ siziŋ yɔ, pʋyɔɔ ɛlɩzɩ-kɛ Yomiye taa. Pɩnzɩ mɩnɩŋ sakɩyɛ wayɩ, Izrayɛɛlɩ piya kaawɛ Lidaʋ Tɛtʋ taa lɛ, koyindinaa lakaɣ-sɩ nɛ you. Ɛzɩma Yehowa laba? Ɛlɩzɩ-sɩ si-koyindinaa mba panazaɣ-sɩ siŋŋ yɔ pe-nesi tɛɛ “mbʋ pʋyɔɔ yɔ pɩlakaɣ-ɩ pʋtɔdɩyɛ nɛ ɛnɩɣ [sɩ]-mɔla.” Lɛɛlɛɛyɔ ɖɔɖɔ lɛ, pʋtɔdɩyɛ naʋ seɣti Yehowa nɛ ɛsɩnɩ ɛ-samaɣ. Etiyi tɔm hʋyaa se palɩzɩ Izrayɛɛlɩ piya si-koyindinaa nesi tɛɛ.​—Th. 2:​16, 18. w19.03 15 § 4-5

Paɣtʋ Hiu taa kajalaɣ ñɩndʋ nɛ naalɛ ñɩndʋ pɔzaɣ Izrayɛɛlɩ piya se sɩsɛɛ Yehowa ɖeke nɛ sɩkpa sɩ-tɩ nɛ sɩɩnaa latʋ. (Ejl. 20:​3-6) Paɣtʋ ndʋ, pɩtɩkɛ Yehowa tɩwazaɣ. Ɛlɛ ɛɛɖʋ-tʋ se tɩwazɩ ɛ-samaɣ. Alɩwaatʋ ndʋ ­pɛsɛɣaɣ ajɛɛ lɛɛna taa ɛsɔnaa yɔ, ­pɩkɔŋnaɣ-wɛ kʋñɔmɩŋ ndɩ ndɩ. Ɛlɛ Yehowa wazaɣ Izrayɛɛlɩ piya yɔɔ alɩwaatʋ ndʋ sɩɖɔŋaɣ ɛ-paɣtʋ yɔɔ siɣsiɣ nɛ ­siimuluu ɖama yɔ. (1 Aw. 10:​4-9) Ye mba pamaɣzɩɣ se pɛwɛɛ nɛ pɛsɛɣ Yehowa yɔ, paaɖɔŋ ɛ-paɣtʋ yɔɔ nɛ palakɩ kañatʋ ɛ-samaɣ yɔ, pɩtɩlɩɩnɩ Yehowa cɔlɔ. Ɛlɛ Yehowa sɔɔlɩ-ɖʋ nɛ alɩwaatʋ ndʋ pomuluu-ɖʋ yɔ eɖiɣni naʋ. Ɛnɩɣ ɖa-wɩzasɩ halɩ pɩkpaɖɩ ɛzɩma ɖoyo nɩɣ ɛ-pɩɣa wɩzasɩ yɔ. Paa ɛɛlakɩ nabʋyʋ kpaagbaa se mulum lakasɩ nzɩ sɩsɩɩ tɩnaɣ yɔ, ɛkaɣ pɔzʋʋ akɔnta kɩdɛkɛdɩm laɖaa mba paakpiɖiɣ po-mulum lakasɩ nzɩ sɩ-yɔɔ yɔ. w19.02 22 § 13-​15

Kpɩtaŋ weyi ɩkɔŋ nɛ pʋcɔ Yesu sɩm yɔɔ tɔzʋʋ sɔnzɩ kɩyakʋ talɩ yɔ ɩ-taa, ɖoŋ ɖoŋ lɛ ɖe-kediɣzisi ñɩkɩɣ niye Yesu kɩɖaʋ yɔɔ nɛ tɩ luzuu mbʋ ɛwɩlaa nɛ ɛkpaɣ e-wezuu nɛ ɛlaa ɖɔ-yɔɔ yɔ pɩ-yɔɔ. Piseɣtiɣ-ɖʋ ɖɔɖɔ se ɖɩmaɣzɩnɩ ɛ-tɩ luzuu nɛ ɖɩla ­Yehowa sɔɔlɩm, halɩ pɩkpɛndɩnɩ alɩwaatʋ ndʋ pɩwɛ-ɖʋ kaɖɛ yɔ tɩ-taa. Ðɩmaɣzɩɣ abalɩtʋ ndʋ ɛɛwɩlaa alɩwaatʋ ndʋ ɛ-sɩm kaañɔtaa yɔ tɩ-yɔɔ. Ɛɛnawa se pɩkazɩ pazɩ e-koyindinaa kaɣ-ɩ ɖʋʋ fɛyɛ, pamabɩ-ɩ nɛ pakʋ-ɩ. (Mat. 20:17-​19) Paa mbʋ yɔ, etisi faaa se ɛsɩkɩ. Alɩwaatʋ talaa lɛ, eheyi ɛ-apostoloowaa siɣsiɣ ñɩma mba paawɛ ɛ-cɔlɔ Jɛtɩsemaanee yɔ se: “Ɩkʋyɩ nɛ ɖɩɖɛɛ. Ɩna! Weyi ɛlɩɣ ma-wayɩ yɔ, ɛñɔtaa.” (Mat. 26:36, 46) Nɛ alɩwaatʋ ndʋ ɛyaa mba paaɖɔkɩ you ­won­du yɔ pɔkɔm se pakpa-ɩ lɛ, ɛñɔtɩnɩ-wɛ, ɛwɩlɩ-wɛ ɛ-tɩ nɛ eheyi sɔɔjanaa se peyele ɛ-apostoloowaa nɛ pɛɖɛɛ. (Yoh. 18:​3-8) Yesu kaawɩlaa se ɛwɛ abalɩtʋ siŋŋ! Sɔnɔ, Krɩstʋ ñɩma patam numwaa nɛ heŋ lɛɛŋ taa ñɩma pañakɩ pana se pɛwɛɛ abalɩtʋ ɛzɩ Yesu yɔ. w19.01 27-​28 § 7-8

Ɛzɩ anjaʋ lɩzɩyʋ kpɛndʋʋ tɔlɩm kɩbam ndɩ ndɩ nɛ ɛlɩzɩɣnɩ anjaʋ yɔ, mbʋ ɖɔɖɔ pɩpɔzʋʋ se ɖɩwɛɛnɩ wɛtʋ kɩbandʋ ndɩ ndɩ nɛ pɩsa nɛ ɖɩwɛɛnɩ tɩ luzuu. Wɛtʋ ndʋ tɩ-taa natʋyʋ lɛ ñamtʋ, hɛɛɛ wɛtʋ, nɛ abalɩtʋ. Mba pɛwɛnɩ tɩ luzuu yɔ, pe-ɖeke petisiɣna nɛ pañaŋ Ɛsɔ. Mbʋ Ɛsɔ pɔzʋʋ-ɖʋ se ɖɩla yɔ, pɩ-taa nabʋyʋ lɛ se ɖɩwɛɛnɩ hɛɛɛ wɛtʋ. (Mat. 5:5; Gal. 5:​23) Alɩwaatʋ ndʋ ɖɩlakɩ Ɛsɔ sɔɔlɩm yɔ, piyeki nɛ Sataŋ taa wɩɣ. Pʋyɔɔ lɛ, paa ɖɩwɛnɩ tɩ luzuu nɛ hɛɛɛ wɛtʋ yɔ, ɛyaa sakɩyɛ mba pɛwɛ Sataŋ ɛjaɖɛ ɖɩnɛ ɖɩ-taa yɔ papaɖɩɣ-ɖʋ. (Yoh. 15:18, 19) Mbʋ yebina nɛ pɩpɔzʋʋ se ɖɩwɛɛnɩ abalɩtʋ nɛ ɖɩkaɖɩnɩ Sataŋ. Ɛyʋ weyi ɛfɛyɩnɩ tɩ luzuu yɔ, ɛkpazɩɣ ɛ-tɩ, ɛkɔʋ pana kadadayaɣ nɛ ɛɛñaŋ Yehowa. Mbʋ ɖeyi ɖeyi Sataŋ wɛɛ. Pʋyɔɔ pɩɩɖɩɣzɩɣ-ɖʋ se ɛpaɖɩɣ mba pɛwɛnɩ tɩ luzuu yɔ. Mba pɛwɛnɩ tɩ luzuu yɔ pawɩlɩɣ se ɛkɛ kɩdɛkɛdʋ, mbʋ pʋyɔɔ yɔ pɛwɛnɩ wɛtʋ kɩbandʋ ndʋ ɛfɛyɩna yɔ. Halɩ pawɩlɩɣ ɖɔɖɔ se Sataŋ kɛ cɛtɩyʋ. Ɛbɛ yɔɔ? Mbʋ pʋyɔɔ yɔ paa tɔm ndʋ Sataŋ ɛyɔɔdʋʋ yaa paa ɛbɛ ɛtɩɩlakɩ yɔ, ɛɛpɩzɩɣ nɛ ɛɖɩɣ mba pɛwɛnɩ tɩ luzuu yɔ nʋmɔʋ se pataasɛɛ Yehowa.​—Yɔɔb 2:​3-5. w19.02 8-9 § 3-5

Yehowa nawa se alɩwaatʋ natʋyʋ kaɣ kɔm nɛ ɛyaa mba pɛwɛ Babilɔɔnɩ ɛjaɖɛ taa yɔ sɔɔndʋ kaɣ-wɛ kpaʋ. Mɛɛdɩ nɛ Pɛrsɩ sɔɔjanaa kaɣ labʋ you nɛ Babilɔɔnɩ. Yehowa kaɣ tɩŋnʋʋ sɔɔjanaa mba pɔ-yɔɔ nɛ ɛlɩzɩ ɛ-samaɣ yomiye nɖɩ ɖɩ-taa pɛwɛ Babilɔɔnɩ yɔ, ɖɩ-taa. (Iza. 41:​2-4) Babilɔɔnɩ ñɩma nɛ ajɛɛ lɛɛna taa ɛyaa nawa se po-koyindinaa ñɔtɩnɩ-wɛ lɛ, pañaɣ pana se pɛwɛɛ abalɩtʋ. Pʋyɔɔ pa-taa paa weyi heyaɣ lɛlʋ se: “Cɛyɩ ña-tɩ.” Pɩtasɩ ɖɔɖɔ lɛ, polubi pa-tɩ cɛtɩm ɛsɔnaa sakɩyɛ nɛ pataɣ liu se paba kaɣ pɔ-yɔɔ kandɩyʋʋ. (Iza. 41:​5-7) Ɛlɛ pʋcɔ nɛ pɩtalɩ mbʋ lɛ, Yehowa hɛzɩ Yuuda ñɩma mba paawɛ yomiye taa yɔ pa-laŋa nɛ eheyi-wɛ se: “Ña yɔ, Izrayɛɛlɩ, ma-lɩmɖʋyʋ . . . Taahʋʋ, mbʋ yɔ mɛnkɛ ñɛ-Ɛsɔ.” (Iza. 41:​8-​10) Yʋsɩ se Yehowa yɔɔdaa se: “Mɛnkɛ ñɛ-Ɛsɔ.” Yehowa tɩŋnɩ tɔm tʋnɛ tɩ-yɔɔ nɛ ɛsɩnɩ ɛ-sɛyaa siɣsiɣ ñɩma nɛ patɩlɩ se ɛtɩsɔɔ pɔ-yɔɔ mbʋ pʋyɔɔ yɔ pɛkɛ ɛ-samaɣ. Eheyi-wɛ ɖɔɖɔ se: “Mankaɣ-mɩ ɖɔkʋʋ nɛ maya mɩ-ñʋʋ.” Pɩtʋʋ fɛyɩ se tɔm tʋnɛ ­tɩɩkpazɩ Yuuda ñɩma mba pɛwɛ yomiye taa yɔ ɖoŋ siŋŋ.​—Iza. 46:​3, 4. w19.01 4 § 8

Maarkɩ 1:​9-​11 yɔɔdʋʋ tam nabudozo mbʋ Yehowa yɔɔdɩnɩ ɖooo ɛsɔdaa yɔ pɩ-taa ka-kajalaɣ mbʋ tɔm. Yehowa yɔɔdaa se: “Ŋkɛ man-Pɩyalʋ, weyi mɔnsɔɔlɩ-ɩ yɔ; ñɔ-tɔm kɛdɩnɩ-m.” Yesu nɩ ɛ-Caa sɔɔlɩm nɛ ɖoŋ kpazʋʋ tɔm tʋnɛ lɛ, titukuni-i siŋŋ! Yehowa tɔm tʋnɛ, tɩñɩkɩɣ niye Yesu yɔɔ tɔm kɩcɛyɩtʋ naadozo yɔɔ. Kajalaɣ lɛ, Yesu kɛnɩ ɛ-Pɩyalʋ. Nabʋlɛ lɛ, Yehowa sɔɔlɩ ɛ-Pɩyalʋ. Nɛ nabudozo lɛ, ɛ-Pɩyalʋ tɔm kɛdɩnɩ-ɩ. Yehowa yɔɔdʋʋ se “ŋkɛ man-Pɩyalʋ” yɔ, pɩwɩlɩɣ se alɩwaatʋ ndʋ pamɩyɩsɩ Yesu lɩm yɔ, ɛgbɛyɛ kɩfaɖɛ naɖɩyɛ paɣzɩ ɛ nɛ ɛ-Caa pɛ-hɛkʋ taa. Alɩwaatʋ ndʋ Yesu kaawɛ ɛsɔdaa yɔ, ɛɛkɛ Ɛsɔ Pɩyalʋ fezuu taa tʋ. Ɛlɛ alɩwaatʋ ndʋ pamɩyɩsɩ-ɩ lɩm yɔ, Ɛsɔ tɩŋnɩ fezuu kiɖeɖeu yɔɔ nɛ ɛtaa-ɩ num. Pɩwɩlɩɣ se pɩtɩŋnɩ num taʋ mbʋ pɩ-yɔɔ lɛ, lɛɛlɛɛyɔ ɛwɛnɩ lidaʋ se ɛpɩzɩɣ nɛ ɛpɩsɩ ɛsɔdaa nɛ Ɛsɔ pɩsɩ-ɩ Wiyaʋ nɛ Cɔjɔ Sɔsɔ. (Luka 1:​31-​33; Ebr. 1:​8, 9; 2:​17) Ye mbʋ alɩwaatʋ ndʋ pamɩyɩsɩ Yesu lɩm yɔ, pɩɩmʋnɩ mbʋ se ɛ-Caa ɛyɔɔdɩ se: “Ŋkɛ man-Pɩyalʋ.”​—Luka 3:​22. w19.03 8 § 3-4

Lɔŋ tasʋʋ mbʋ pɩfɛyɩ ɖeu yɔ, pɩpaɣzɩ alɩwaatʋ ndʋ Sataŋ peɣzi Ɛva yɔ. Tɩ kpazʋʋ yeba nɛ Sataŋ pɩsɩ ɛ-tɩ lɔŋ tasɩyʋ nɛ ewolo nɛ eheyi Ɛva se ye ɛ nɛ ɛ-walʋ palɩzaa se pacakɩ wezuu ɛzɩ pa-maɣmaɣ pɔsɔɔlʋʋ yɔ, pakaɣ wɛʋ koboyaɣ taa nɛ pɩkpaɖɩ. (Kiɖe 3:​1-6) Sataŋ ñɩnaɣ ɛ-maɣmaɣ ɛ-kɛzɛɣa na. Ɛɛsɔɔlaa se Aɖam, Ɛva nɛ pa-sayɩnaa poluzi pa-tɩ ɛ-tɛɛ nɛ pɛsɛɛ-ɩ nɛ peyele Yehowa sɛʋ. Ɛlɛ Yehowa kaahanɩ-wɛ mbʋ payɩ paawɛna yɔ. Ɛlɩzɩ-wɛ nɛ ɛsɩɩ-wɛ kaɖaɣ kɩbaŋa taa nɛ ɛha-wɛ ɖɔɖɔ tomnaɣ ŋga kaatalɩ pilim nɛ kahaɣ-wɛ waɖɛ se papɩzɩ nɛ pacaɣ wezuu tam tam yɔ. Pɩlabɩ pʋtɔdɩyɛ se Aɖam nɛ Ɛva pamanɩ Ɛsɔ paɣtʋ yɔɔ nɛ paha-ɩ siɣye. Ɛzɩ ­ɖa-tɩŋa payɩ ɖɩnaʋ yɔ, pɩkɔnɩ asɛyʋʋ siŋŋ. Ɛzɩ hɛɖʋʋ ŋgʋ pakpalɩ-kʋ ki-piliŋa yɔɔ yɔ, Aɖam nɛ Ɛva pɔkɔma nɛ papaɣzɩ lou nɛ pɔkɔɔ nɛ pasɩ. Nɛ ­kɩdɛkɛdɩm mbʋ palaba yɔ, pɩkɔnɩ ɖɔɖɔ asɛyʋʋ pe-piya yɔɔ. (Roma 5:​12) Paa mbʋ yɔ, sɔnɔ ɛyaa sakɩyɛ tɩsɔɔlɩ se pala Ɛsɔ sɔɔlɩm. Pañɩnɩɣ se pacaɣ wezuu ɛzɩ pa-maɣmaɣ pɔsɔɔlʋʋ yɔ. (Efɛz. 2:1-3) Mbʋ pɩlɩ pɩ-taa yɔ, pɩwɩlɩɣ kpayɩ kpayɩ se tɔm ndʋ tɩwɛ sɔnɔ evemiye mayaɣ taa yɔ, tɩkɛ toovenim. w18.12 20 § 3-4

Apostoloo Pɔɔlɩ kaakɛ ɛyʋ weyi ɛɛsɩm lɔŋ nɛ ɛtɩlɩ ɖɔɖɔ takayaɣ camɩyɛ yɔ. Halɩ ɛyɔɔdaɣ kʋnʋmɩŋ ɛzɩ naalɛ mbʋ yɔ, Ebree nɛ Grɛɛkɩ. (Tʋma 5:​34; 21:37, 39; 22:​2, 3) Ɛlɛ paɣtʋ kila nʋmɔʋ taa lɛ, ɛtɩlabɩnɩ tʋmɩyɛ ɛjaɖɛ yɔɔ lɔŋsɩnɖɛ. Masɩ yɔɔ ɛtɩŋaɣnaɣ nɛ ɛwɩlɩɣ tɔm. (Tʋma 17:2; 1 Kɔr. 2:​6, 7) Piyeba nɛ ɛ-Ɛsɔ sɛtʋ tʋmɩyɛ ɖeni-i camɩyɛ nɛ ɛwɛɛnɩ ɖɔɖɔ tam tam kɩhɛyʋʋ lidaʋ. (2 Tim. 4:8) Pɩtʋʋ fɛyɩ, Ɛsɔ maɣzɩm kpaɖɩ ɖeu siŋŋ ɛjaɖɛ ñɩmbʋ. Ye ɖiyeba nɛ ɛ-maɣzɩm ɖiyiɣ-ɖʋ yɔ, ɖihikiɣ koboyaɣ ŋga kakpaɖaa yɔ nɛ ɖe-wezuu caɣʋ ɖeni-ɖʋ camɩyɛ. Ɛlɛ Yehowa ɛɛñɩkɩɣ ɖɔ-yɔɔ se ɖɩwɛɛnɩ ɛ-maɣzɩm. Nɛ ‘Yom siɣsiɣ tʋ nɛ lɔŋsɩnɖʋ’ nɛ ɛzʋtʋyaa paalakɩ mbʋ ɖɔɖɔ. (Mat. 24:45; 2 Kɔr. 1:​24) Ɛlɛ paa Krɩstʋ tʋ weyi ɛ-sʋʋtʋ pɩkɛnaa se ɛñaɣ pana nɛ ɛ-maɣzɩm la nɔɔ kʋɖʋmaɣ nɛ Ɛsɔ ñɩmbʋ. w18.11 20-​21 § 12-​13

Ɛsɔ tɩŋnɩ Izaayii yɔɔ nɛ ɛyɔɔdɩ se ɛ-samaɣ lɩɣnɩ yomiye taa nɛ kapɩsɩ kɛ-tɛtʋ taa lɛ, kɩdɛkɛdɩm nabʋyʋ ɛɛkaɣ-kɛ talʋʋ nɛ sɔɔndʋ ɛɛkaɣ-kɛ kpaʋ nɛ kpɩna yaa ɛyaa mba pa-lakasɩ wɛ ɛzɩ kpɩna yɔ. Ɛkaɣ kandɩyʋʋ piya nɛ sɔsaa pɔ-yɔɔ. (Iza. 11:​6-9; 35:​5-​10; 51:3) Izaayii yɔɔdɩ ɖɔɖɔ se tɛtʋ kpeekpe taa ɛyaa kaɣ tɩlʋʋ “[Yehowa] camɩyɛ, ɛzɩ lɩm wadʋʋ pɔɔ taa yɔ” nɛ pɩwɩlɩɣ se pɩtɩkɛ Izrayɛɛlɩ samaɣ ɖeke tɔm tɩyɔɔdaɣ. Izaayii tasɩ yɔɔdʋʋ se Izrayɛɛlɩ piya nzɩ sɩpɩsɩɣ sɩ-tɛ yɔ, kpɩna yaa ɛyaa ɛɛkaɣ-sɩ labʋ ñaŋ. Halɩ ɛzɩ lɩm kaatɔyʋʋ Edɛɛnɩ kaɖaɣ taa yɔ, mbʋ ɖɔɖɔ lɩm kaɣ tɔyʋʋ sɩ-tɛtʋ taa nɛ piyele nɛ tɩlʋlɩ tɔɔnasɩ sakɩyɛ. (Kiɖe 2:​10-​14; Yer. 31:12) Ɛlɛ natʋ tɔm ndʋ tɩ-tɩŋa tɩtɩla Izrayɛɛlɩ piya alɩwaatʋ taa. Mbʋ pʋyɔɔ yɔ, nabʋyʋ ɛɛwɩlɩɣ se Ɛsɔ tɩŋnɩ piti lakasɩ nasɩyɩ yɔɔ nɛ ɛwaa mba palɩnɩ yomiye taa nɛ papɩsɩ pɛ-tɛ yɔ, pa-kʋdɔmɩŋ. Ðɩkpaɣ ɛzɩ yʋlʋmaa mbʋ yɔ, pa-taa nɔɔyʋ ɛsa tikuli. Ye mbʋ Ɛsɔ tɩŋnɩ natʋ tɔm tʋnɛ tɩ-yɔɔ nɛ ɛwɩlɩ se ɛkaɣ waʋ ɛyaa kʋdɔmɩŋ cee wayɩ. w18.12 5 § 11-​12

Toovenim nʋmɔʋ taa ɖɔm fɛyɩ tɩnaɣ, pʋyɔɔ lɛ ɖɩsɔɔlaa se ɖiwolo pɩ-yɔɔ nɛ ɖɩwɛɛ kɩ-taa ɖɔm yɔɔ tam. Ɛbɛ pɩzɩɣ pɩzɩnɩ-ɖʋ nɛ ɖiwolo pɩ-yɔɔ nɛ ɖɩɖɔŋ toovenim nʋmɔʋ taa? Wolo pɩ-yɔɔ nɛ ŋkpɛlɩkɩɣ toovenim tɔm kɩbandʋ ndʋ tɩwɛ Bibl taa yɔ nɛ ŋmaɣzɩɣ tɩ-yɔɔ. Ɛɛɛ, wolo pɩ-yɔɔ nɛ ŋyakɩ toovenim pɩtɩŋnɩ ɛzɩma ŋlakɩ ɖʋtʋ nɛ ŋkpɛlɩkɩɣ Bibl taa toovenim tɔm yɔ. Ye ŋlakɩ mbʋ yɔ, toovenim tɔm kaɣ mʋʋ ñɩm siŋŋ ñɛ-ɛsɩndaa nɛ ŋtɛ ña-taa se ŋŋpɛdɩɣ-pʋ kpa. Pɩtasɩnɩ toovenim yabʋ lɛ, Aduwa 23:23 heyiɣ-ɖʋ se pɩwɛɛ se ɖɩya ɖɔɖɔ ‘lɔŋ nɛ lɔŋ sɩɣzʋʋ nɛ lɔŋsɩmtʋ.’ Toovenim tɔm tɩlʋʋ ɖeke tɩmaɣ. Pɩwɛɛ se ɖɩlabɩnɩ toovenim tɔm ndʋ ɖɩkpɛlɩkaa yɔ tʋmɩyɛ ɖe-wezuu caɣʋ taa. Lɛɣtʋ sɩɣnɩ-ɖʋ se ɖɩtɩlɩ nɔɔ kʋɖʋmaɣ ŋga kɛwɛ tɔm ndʋ payɩ Yehowa yɔɔdʋʋ yɔ tɩ-hɛkʋ taa yɔ. Lɔŋ seɣtiɣ-ɖʋ se ɖɩlabɩnɩ tʋmɩyɛ mbʋ payɩ ɖɩsɩma yɔ. Nabʋyʋ taa lɛ, toovenim tɔm sɩɣzɩɣ-ɖʋ lɔŋ nɛ tɩwɩlɩɣ-ɖʋ ɖe-wezuu caɣʋ hɔɔlɩŋ weyi ɩ-taa pɩpɔzʋʋ se ɖɩla lɛɣzɩtʋ yɔ. Pɩwɛɛ se ɖiyele nɛ toovenim tɔm ɖiyiɣ-ɖʋ paa ɛzɩmtaa. Pɩmʋ ñɩm nɛ pɩkpaɖɩ liidiye.​—Adu. 8:​10. w18.11 9 § 3; 11 § 13-​14

Ɛbɛ ŋwɛna nɛ pɩmʋ ñɩm nɛ pɩkpaɖɩ pɩtɩŋa? Ŋtisiɣ faaa nɛ ŋkpaɣ-pʋ nɛ ŋlɛɣzɩnɩ mbʋ pɩtɩmʋ ñɩm caaa yɔ? Mba paha pa-tɩ Yehowa nɛ pɛsɛɣ-ɩ yɔ, tɔm tʋnɛ tɩ-yɔɔ cosuu wɛ-wɛ kɛlɛʋ. Mbʋ pɩmʋ ñɩm ɖɛ-ɛsɩndaa nɛ pɩkpaɖɩ yɔ lɛ, taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ. Nɛ ɖɩɩkaɣ tisuu kpa nɛ ɖɩkpaɣ-pʋ nɛ ɖɩlɛɣzɩnɩ nabʋyʋ. Bibl taa toovenim tɔm mʋ ñɩm ɖɛ-ɛsɩndaa ɖɔɖɔ nɛ ndʋ sɩɣnɩnɩ-ɖʋ se taabalɩyɛ ɛwɛɛ ɖa nɛ ɖa-caa weyi ɛwɛ ɛsɔdaa yɔ ɖɛ-hɛkʋ taa. (Kol. 1:​9, 10) Maɣzɩ tɔm ndʋ payɩ ɖa-wɩlɩyʋ sɔsɔ wɩlɩɣ-ɖʋ ɛ-Tɔm takayaɣ yaa Bibl taa yɔ, tɩ-yɔɔ nɛ ŋna! Ɛwɩlɩɣ-ɖʋ toovenim tɔm pɩlɩɩnɩ ɛ-hɩɖɛ nɛ ɛ-wɛtʋ kɩbandʋ yɔɔ. Ɛlɩzɩ-ɖʋ mbʋ kɩhɛyʋʋ pʋ-ñʋʋ taa ŋgʋ ɛha-ɖʋ nɛ sɔɔlɩm yɔ kɩkɛnaa yɔ. Ɛ-Pɩyalʋ Yesu yɔɔ ɛtɩŋnaa nɛ ɛlabɩ-ɖʋ kʋjɔʋ ŋgʋ. Ɛwɩlɩɣ-ɖʋ ɖɔɖɔ mbʋ Mesiya Kewiyaɣ kɛnaa yɔ nɛ ɛha lidaʋ heŋ lɛɛŋ se ɩkaɣ caɣʋ tɛtʋ yɔɔ paradisuu taa. Ɛwɩlɩɣ-ɖʋ ɖɔɖɔ ɛzɩma pɩwɛɛ se ɖɩcaɣ wezuu yɔ. Toovenim tɔm tʋnɛ tɩmʋ ñɩm siŋŋ ɖɛ-ɛsɩndaa mbʋ pʋyɔɔ yɔ, tiyeba nɛ taabalɩyɛ kɩbanɖɛ wɛɛ ɖa nɛ ɖa-Lɩzɩyʋ ɖɛ-hɛkʋ taa. Tɩsɩnɩ-ɖʋ nɛ ɖe-wezuu caɣʋ wɛɛnɩ tɔbʋʋ nɩʋ. w18.11 3 § 1-2

Ɛyaa mba pɛcɛtɩɣ yɔ, paapɩzɩɣ nɛ pɛmɛsɩ pɛ-wɛtʋ ndʋ Yehowa mbʋ pʋyɔɔ yɔ “pɩtɩŋa pɩwɛ ndaakpeɖe nɛ pɩ-yɔɔ kulaa nɛ pɩnaɣ kaɣlaa” ɛ-ɛsɩndaa. (Ebr. 4:​13) Anaanɩyaasɩ nɛ Safiira patɩŋnɩ ajitu natʋyʋ yɔɔ nɛ pepeɣzi apostoloowaa. Pɛpɛdɩ pɛ-tɛtʋ lɛ, patayɩ liidiye taa nɛ powoni hɔɔlʋʋ kʋɖʋmʋʋ ɖeke nɛ pɛcɛlɩ apostoloowaa. Paasɔɔlaa se pawɩlɩ se pɛkɛnɩ kʋjɔŋ laɖaa siŋŋ nɛ pɩkpaɖɩ mbʋ papɩzaɣ labʋ ɖeyi ɖeyi yɔ, nɛ pɩsa nɛ ɛgbɛyɛ taa ñɩma sam-wɛ. Ɛlɛ Yehowa kaana mbʋ palaba yɔ nɛ ɛhɔ pa-nɩŋgbaaŋ. (Tʋma 5:​1-​10) Lɩmaɣza wena Yehowa wɛnɩ cɛtɩm yɔɔ? “Miŋ taa” pɩtɛŋnɩ Sataŋ nɛ mba payɩ pɛkɛ cɛtɩyaa nɛ paakpiɖiɣ pa-lakasɩ nzɩ sɩ-yɔɔ yɔ. (Natʋ 20:10; 21:8; Keɣa 5:7) Ðɩnawa se Yehowa “fɛyɩ ɛzɩ ɛyʋ yɔ” se ɛcɛtɩ. Toovenim lɛ, “pɩɩsaŋ se Ɛsɔ ɛcɛtɩ.” (Kɩg. 23:19; Ebr. 6:​18) Yehowa paɖɩɣ “nzʋlʋmɩyɛ kɩcɛtɩyɛ.” (Adu. 6:16, 17) Pʋcɔ nɛ ɖɔ-tɔm kɛdɩnɩ-ɩ lɛ, pɩwɛɛ se ɖɩɖɔ paɣtʋ ndʋ ɛɖʋ toovenim yɔɔdʋʋ nʋmɔʋ taa yɔ tɩ-yɔɔ. w18.10 8 § 10-​13

Kpaɣ se ña-tʋmɩyɛ ñʋʋdʋ pɔzɩ-ŋ se ŋha liidiye nɛ ŋɖʋnɩ nesi cɛtɩm Ɛsɔ sɛtʋ kazandʋ natʋyʋ. Ɛbɛ ŋkaɣ labʋ? Pʋcɔ nɛ ŋkatɩ wɛtʋ ndʋ lɛ, pɩɩwɛɣ ɖeu se ŋñɩnɩ lɛɛlɛɛyɔ nɛ ŋtɩlɩ Yehowa maɣzɩm tɔm ndʋ tɩ-yɔɔ yaa we? Ye ŋlabɩ mbʋ yɔ, alɩwaatʋ ndʋ ŋkatɩɣ wɛtʋ ndʋ tɩ-taa natʋyʋ lɛ, ŋtɩlɩɣ nɩŋgbaŋaɣ kɩbaŋa ŋga pɩwɛɛ ŋkpɛzɩ nɛ tɔm kɩbandʋ ndʋ pɩwɛɛ ŋyɔɔdɩ yɔ. Ye ɖɩmaɣzɩɣ ɛzɩma pɩcɛyaa se ɖɩɖɔkɩ ɖe-siɣsiɣ wɛtʋ yɔ pɩ-yɔɔ lɛɛlɛɛyɔ yɔ, pɩpɩzɩɣ nɛ pɩsɩnɩ-ɖʋ ɖɔɖɔ alɩwaatʋ ndʋ ɖɩhɩnɩɣ kʋdɔŋ yɔ. Paa ɖɩtɛm ɖa-taa se ɖikiziɣ calɩm yaa calɩm hɔɔlɩŋ sɔsɔŋ naanza taa nakʋyʋ yɔ, nʋmɔŋ lɛɛŋ weyi patɩŋɩɣna ɩ-yɔɔ nɛ palakɩnɩ tʋmɩyɛ calɩm yɔ ɩ-taa lɛ, ɖa-taa paa anɩ pɩpɔzʋʋ se ɛlabɩnɩ tʋmɩyɛ Bibl paɣtʋ kila nɛ ɛtɩlɩ Yehowa maɣzɩm nɛ pɩsa nɛ ɛsɛtɩ ɛ-tɩ tɔm. (Tʋma 15:28, 29) Toovenim taa lɛ, pɩtɩkɛ alɩwaatʋ ndʋ ɖɩwɛɣ ɖɔkɔtɔ tɛ nɛ pɩtɩla ɖɩwɛɛ nɛ ɖɩnɩɣ siziŋ nɛ pɩpɔzʋʋ se ɖɩkpaɣ ­lɩmaɣza lɛɛ lɛɛ yɔ, pɩwɛɛ se ɖɩmaɣzɩ tɔm ndʋ tɩ-yɔɔ. Lɛɛlɛɛyɔ pɩwɛɛ se ɖɩtazɩ ɛgbɛyɛ takayɩsɩ taa, ɖɩma mbʋ ɖɩsɔɔlaa se palabɩ-ɖʋ alɩwaatʋ ndʋ ɖɩhɩnɩɣ kʋdɔŋ yɔ nɛ ɖɩyɔɔdɩnɩ ɖɔɖɔ fɛɖʋ weyi ɛlakɩ-ɖʋ kɔyɛ yɔ. w18.11 24 § 5; 26 § 15-​16

Yehowa kɛ ɖiyiyu sɔɔlɩm tʋ weyi ɛ-samaɣ ɛkandɩyɩɣ ɛ-samaɣ yɔɔ camɩyɛ nɛ ehuuzuu kɔ-yɔɔ se ko-koyindinaa ɩtaalabɩ-kɛ kɩdɛkɛdɩm nabʋyʋ yɔ. Toovenim tɔm tʋnɛ tɩkpazɩɣ ɖoŋ ɖa mba ɖɩwɛɛ nɛ ɖɩlʋkɩnɩ ɛjaɖɛ kɩdɛkɛdɩyɛ ɖɩnɛ, kɛdɛzaɣ kɩyakɩŋ ɩnɛ ɩ-taa yɔ. Yehowa kaɣ wobu pɩ-yɔɔ nɛ ɛcɔŋnɩ ɛ-samaɣ yɔɔ kʋñɔŋ sɔsɔʋ alɩwaatʋ taa. (Natʋ 7:​9, 10) Ye mbʋ, mba pɛwɛ Yehowa samaɣ taa yɔ, paa paakɛ piya evelisi yaa akpadɩyaa, mba pa nɛ ­po-ɖoŋ yaa ajamaa yɔ, sɔɔndʋ ɛɛkaɣ pa-taa nɔɔyʋ kpaʋ kʋñɔŋ sɔsɔʋ alɩwaatʋ taa. Pa-tɩŋa pakaɣ pa-tɩ ɖɔkʋʋ! Pakaɣ tɔzʋʋ tɔm ndʋ Yesu yɔɔdaa yɔ tɩ-yɔɔ. Ɛyɔɔdaa se: “Ɩkʋyɩ nɛ ɩsɩŋ nɛ ɩkʋsɩ mɩ-ñʋŋ, mbʋ pʋyɔɔ yɔ mɩ-ñʋʋ yabɩtʋ talaa kɛlɛ.” (Luka 21:28) Pakaɣ ɖɔkʋʋ pa-cɩŋgɩlɩm wɛtʋ halɩ pɩkpɛndɩnɩ alɩwaatʋ ndʋ Gɔɔgɩ kaɣ kʋyʋʋ pɔ-yɔɔ yɔ. Gɔɔgɩ sɩŋnɩ ajɛɛ kɩgbɛndʋʋ ɖoŋ ñɩŋgʋ nakʋyʋ. (Ezek. 38:​2, 14-​16) Ɛbɛ yɔɔ Ɛsɔ samaɣ kaɣ ɖɔkʋʋ ka-cɩŋgɩlɩm wɛtʋ? Mbʋ pʋyɔɔ yɔ, kanawa se Yehowa ɛɛlɛɣzɩɣ. Ɛkaɣ tasʋʋ wɩlʋʋ se ɛkɛ Ñʋʋ Yaɖʋ weyi ɛcɔŋnɩ ɛ-samaɣ yɔɔ nɛ ɛmaɣzɩɣ kɔ-yɔɔ siŋŋ yɔ.​—Iza. 26:​20. w18.09 26 § 15-​16

Yehowa kaaheyi tɔm ndʋ tɩwɛ sɔnɔ evemiye mayaɣ taa yɔ Izrayɛɛlɩ samaɣ alɩwaatʋ ndʋ kaawɛ siɣsiɣ yɔ. Pɩtʋʋ fɛyɩ se tɔm tʋnɛ tɩɩkpazɩ-wɛ ɖoŋ siŋŋ! Ña ɖɔɖɔ ŋkɛ Yehowa sɛyʋ, ye mbʋ taapɩtɩ kaaʋ se Yehowa sɔɔlɩ-ŋ pɩdɩɩfɛyɩ. Bibl heyiɣ mba pɛwɛ Ɛsɔ sɛtʋ kele kele ñɩndʋ taa yɔ se: “Ðoŋ tʋ maɣmaɣ kaɣ ñʋʋ yabʋ; ɛkaɣ-ŋ mɛyɩnʋʋ nɛ ɛ-taa leleŋ.” (Sof. 3:​16, 17) Paa kaɖɛ nɖɩ taa Yehowa samaɣ ɛwɛɛ yɔ, ɛyɔɔdaa se ɛkaɣ-kɛ ɖʋʋ nesi nɛ ɛhɛzɩ ka-laŋɩyɛ. Ɛyɔɔdaa se: “Ɩkaɣ mʋzʋʋ nɛ pakaɣ-mɩ nʋʋʋ nɔkɔyɩŋ taa, nɛ pakaɣ mɩ-yɔɔ kpɛlʋʋ. . . . Ɛzɩ ɖoyo hɛzʋʋ ɛ-pɩɣa laŋɩyɛ yɔ, mbʋ ɖɔɖɔ mankaɣ mɩ-laŋa hɛzʋʋ.” (Iza. 66:​12, 13) Tɔm kɩbandʋ ndʋ lɛ mbʋ yɔ! Yehowa wɛ ɛzɩ ɖoyo weyi ɛnʋʋ ɛ-pɩɣa nɔkɔyʋʋ taa yaa ɛhɛzɩɣ ɛ-pɩɣa laŋɩyɛ yɔ. Pɩtɩŋnɩ kɩɖaʋ kʋnɛ kɩ-yɔɔ lɛ, Yehowa wɩlɩ kpayɩ kpayɩ se ɛsɔɔlɩ ɛ-sɛyaa siɣsiɣ ñɩma pɩdɩɩfɛyɩ. Taapɩtɩ kaaʋ se ŋmʋ ñɩm Yehowa ɛsɩndaa nɛ ɛsɔɔlɩ ñɔ-tɔm siŋŋ.​—Yer. 31:⁠3. w18.09 13 § 6-7

Caanaʋ taa Izrayɛɛlɩ piya alɩwaatʋ taa, pɩɩpɔzaa se ɛyaa ɩha pa-tɩ faaa nɛ pala tʋma ndɩ ndɩ. (Ejl. 36:2; Neh. 11:2) Sɔnɔ ɖɔɖɔ, ŋwɛnɩ waɖɛ se ŋha ña-alɩwaatʋ, ña-ñɩm, nɛ ñɛ-lɛɣtʋ nɛ ŋsɩnɩ ño-koobiya. Nɛ ye ŋlabɩ mbʋ yɔ, ŋkaɣ hiɣu taa leleŋ siŋŋ nɛ ŋhiɣ ɖɔɖɔ wazasɩ sakɩyɛ. Mba pahaɣ pa-tɩ faaa nɛ palakɩ teokrasɩ tʋma yɔ, ɖoŋ ɖoŋ lɛ, pehikiɣ taabalaa kɩfama. Yele nɛ ɖɩyɔɔdɩ koobu halɩñɩnʋ Margie tɔm. Ɛpaɣzʋʋ kpaamɩŋ maʋ tʋmɩyɛ yɔ, pɩlakɩ pɩnzɩ 18 yɔ. Pɩnzɩ nzɩ sɩɖɛwa yɔ sɩ-taa ɛfalɩsɩ koobiya halɩñɩma sakɩyɛ nɛ sɔɔlɩm. Piyeba nɛ ɛna se pɩkɛnɩ nʋmɔʋ ŋgʋ kɩ-yɔɔ ɛ nɛ wɛ patɩŋɩɣna nɛ pakpazɩɣ ɖama ɖoŋ fezuu taa yɔ. (Roma 1:​12) Taabalaa mba ehiɣ kpaamɩŋ maʋ tʋmɩyɛ taa yɔ, pakpazɩ-ɩ ɖoŋ kpem kaɖɛ alɩwaatʋ taa. Ŋtɛm ña-tɩ haʋ wiɖiyi nɛ ŋɖʋ nesi kpaamɩŋ maʋ tʋmɩyɛ na? w18.08 25 § 9, 11

Alɩwaatʋ ndʋ Pɔɔlɩ ma tɔm tʋnɛ Timootee yɔ, Timootee kaatɛm wɛnʋʋ ɛzɩ pɩnzɩ 30 mbʋ yɔ. Paa mbʋ yɔ Pɔɔlɩ kaaha-ɩ wala sɔsɔna ɛgbɛyɛ taa. Paa ɖɩɩsɩŋ mbʋ pʋyɔɔ ɖeyi ɖeyi Pɔɔlɩ kaatasɩ-ɩ lɔŋ ɛnʋ yɔ, tɔm ndʋ ɛcaɣ se ɖɩkpɛlɩkɩ yɔ, tɩnaɣ kaɣlaa: Pɩtɩpɔzɩ se ɖikizi ɛgbɛyɛ taa evebiya wala haʋ mbʋ pʋyɔɔ yɔ, ɖɩmaɣzɩɣ se pa-pɩnzɩ tɩɖɔɔ. Ðɩtaasɔɔ se ɖa-kɩbaɣlʋ Yesu maɣmaɣ, pɩnzɩ 30 mbʋ yɔ ɛɛwɛna pʋcɔ nɛ ɛpaɣzɩ tʋmɩyɛ nɖɩ ɖɩ-yɔɔ ɛkɔm tɛtʋ yɔɔ yɔ. Pɩtɩla sɔnzɩ nzɩ sɩ-taa ɖɩpaɣlaa yɔ, ɛyaa cɔŋnɩ evebiya se pɛfɛyɩ lɛɣtʋ. Pɩpɩzɩɣ nɛ piyele nɛ nabʋyʋ taa, ɛgbɛyɛ taa ɛzʋtʋyaa kizi haʋ ɛgbɛyɛ taa evebiya wala se pɛkɛ ɛgbɛyɛ taa tʋmlaɖaa yaa ɛzʋtʋyaa. Pɩwɛɛ se ɛzʋtʋyaa tɩŋa ɩtɔzɩ se Bibl taa lɛ, patɩɖʋ pɩnzɩ nasɩyɩ se pɩcɛyaa se ɛyʋ ɛwɛɛnɩ-sɩ pʋcɔ nɛ ɛkɛ ɛgbɛyɛ taa tʋmlaɖʋ yaa ɛzʋtʋyʋ.​—1 Tim. 3:​1-​10, 12, 13; Tiiti 1:​5-9. w18.08 11-​12 § 15-​16

Pɩsa nɛ ɖɩkpaɣ lɩmaɣza tɔm natʋyʋ yɔɔ lɛ, pɩcɛyaa se ɖɩtɩlɩ mbʋ pɩwɩlɩɣ ɖeyi ɖeyi se tɩkɛ toovenim yɔ. Pʋyɔɔ lɛ, pɩwɛɛ se ɖɩlabɩnɩ ɖa-maɣzɩm tʋmɩyɛ camɩyɛ nɛ ɖɩlɩzɩ tɔm ndʋ ɖɩkalɩɣ yɔ nɛ lɛɣtʋ. (Fil. 4:​8, 9) Pɩtɩpɔzɩ se ɖilesi ɖa-alɩwaatʋ nɛ ɖiwoki intɛrnɛɛtɩ lona wena a-yɔɔ paɖʋʋ tɔm ndʋ tɩtɩmʋna ɖeyi ɖeyi yɔ, yaa ɖilesi alɩwaatʋ ɖɔɖɔ nɛ ɖɩkalɩɣ tɔm ndʋ petiyiɣni-ɖʋ pɔrtaabɩlɩwaa yɔɔ nɛ ɖɩɩsɩŋ se tɩkɛ toovenim yaa tɩkɛ cɛtɩm yɔ. Kɔzɩ kɔzɩ lɛ, pɩtɩpɔzɩ se ɖiwoki tisuu yebiyaa intɛrnɛɛtɩ lona yɔɔ. Pa-kaɖʋwa lɛ se pɔkɔnɩ tayʋʋ Ɛsɔ samaɣ taa nɛ koobiya maɣzɩ ɖɔɖɔ se tɔm ndʋ pawɩlɩɣ-wɛ yɔ tɩtɩkɛ toovenim ɖeyi ɖeyi. Tɔm ndʋ tɩtɩkɛ toovenim ɖeyi ɖeyi yɔ, tiiyeki se ɛyʋ ɛkpaɣ lɩmaɣza kɩbana. Ðitaani ɖoŋ kɩdɛkɛdɩŋ weyi tɔm ndʋ tɩtɩkɛ toovenim ɖeyi ɖeyi yɔ tɩpɩzɩɣ nɛ tɩwɛɛnɩ ɖa-maɣzɩm nɛ ɖa-laŋa pɔ-yɔɔ yɔ kpa. Yele nɛ ɖɩna mbʋ pɩɩlabɩ Moyizi alɩwaatʋ taa yɔ, alɩwaatʋ ndʋ cɔŋɩyaa 12 waa mba paatiyaa se pɔcɔŋ Kanaŋ tɛtʋ yɔ, pa-taa 10 kɔma nɛ pɛkɛdɩ tɔm ndʋ tɩɖʋʋ sɔɔndʋ yɔ. (Kɩg. 13:25-​33) Ɛzɩma pɛɖɛlɛsɩ niye pɔ-tɔm kɛdʋʋ taa yɔ, pɩɩyɔbɩ Yehowa samaɣ toma taa siŋŋ. (Kɩg. 14:​1-4, 6-​10) Pɩɩwɛɛ se pataa Yehowa liu nɛ petisi Yozuwee nɛ Kalɛɛb pɔ-tɔm yɔɔ, ɛlɛ patɩla mbʋ. w18.08 4 § 4-5

Ɛyaa sakɩyɛ wɛnɩ wɛtʋ kɩbandʋ hɔɔlɩŋ nɩɩyɩ taa, nɛ mba pɛfɛyɩ ɛgbɛyɛ taa yɔ, pa-taa sakɩyɛ ɖɔɖɔ ɩɩlakɩ mbʋ pɩkɛ kɩdɛkɛdɩm sɔsɔm yɔ. Ye mbʋ ña-taabalaa ɩwɛɛ, ŋpɩzɩɣ nɛ ŋtɔ se pɛkɛ taabalaa kɩbama ­toovenim na? Maɣzɩ nɛ ŋna se ɖoŋ weyi ña nɛ wɛ mɩ-taabalɩyɛ kaɣ wɛnʋʋ ña nɛ Ɛsɔ mɩ-taabalɩyɛ yɔɔ. Pakaɣ-ŋ sɩnʋʋ nɛ ña nɛ Ɛsɔ mɩ-taabalɩyɛ ɖɛɛnɩ ­ɛsɩndaa camɩyɛ na? Ŋsɩm mbʋ pɩwɛ pa-laŋa taa yɔ? Faawɩyɛ ŋgʋ palakɩ yɔ kɩ-taa, ­won­du kɩfatʋ, liidiye, aleɣya ­won­du, helim mʋʋ, yaa tomnaɣ yɔɔ ñɩm lɛɛbʋ tɔm pɔyɔɔdʋʋ paa ɛzɩmtaa? Ðoŋ ɖoŋ lɛ, pɔyɔɔdʋʋ tɔm kɩdɛkɛdɩtʋ lalaa yɔɔ yaa kʋzɔɔtʋ tɔm na? Yesu yɔɔdɩ kpayɩ se: “Laŋɩyɛ taa kɩlɩɣnɩ suu nɛ nɔɔ yɔɔdʋʋ.” (Mat. 12:34) Ye ŋnawa se taabalaa mba ŋwɛna yɔ ­pacamɩɣ taabalɩyɛ nɖɩ ɖɩwɛ ña nɛ Yehowa mɩ-hɛkʋ taa yɔ, pɩcɛyaa se ŋla mbʋ pɩpɔzʋʋ yɔ kpɛdɛyɛ, nɛ ŋcɛ ­taabalɩyɛ nɖɩ.​—Adu. 13:20. w18.07 19 § 11

Moyizi wɛnɩ pɩnzɩ 80 lɛ, Yehowa ɖʋ-ɩ tʋmɩyɛ se eɖiyi Izrayɛɛlɩ piya nɛ ɛlɩzɩ-sɩ yomiye taa Ejipiti. (Ejl. 3:​10) Tam sakɩyɛ, Moyizi ñaɣ pana se ɛñɩnɩ kawanaɣ. Ɛlɛ Yehowa ɖʋ suuɖu nɛ halɩ ɛha-ɩ ɖoŋ se ɛla maamaaci lakasɩ. (Ejl. 4:​2-9, 21) Yehowa pɩzaɣ se ɛñazɩ Moyizi kɩñazʋ. Ɛlɛ Yehowa ɖʋ suuɖu nɛ ɛñaɣ pana se ɛwɩlɩ ɛ-sɛyʋ weyi ɛlɛ wɛnɩ tɩ luzuu yɔ se ­ɛmaɣzɩɣ ɛ-yɔɔ siŋŋ. Yehowa wɛtʋ ndʋ tɩlʋlɩ pee na? Ɛɛɛ! Moyizi kɔma nɛ ɛpɩsɩ ɖiyiyu kɩbanʋ siŋŋ, weyi ɛñaɣ pana nɛ ɛmaɣzɩnɩ Yehowa wɛtʋ kɩbandʋ ndʋ nɛ ɛwɩlɩ-tʋ lalaa yɔ. Ye ŋwɛnɩ sʋʋtʋ se ŋɖiyi ­nabɛyɛ yɔ, pɩcɛyɩ siŋŋ se ŋmaɣzɩnɩ Yehowa nɛ ŋwɩlɩɣ se ŋmaɣzɩɣ lalaa yɔɔ, ŋlakɩ ­camɩyɛ lakasɩ nɛ ŋɖiyiɣ lalaa nɛ ­suuɖu. (Kol. 3:​19-​21; 1 Pɩy. 5:​1-3) Ye ­ŋñakɩ pana se ŋmaɣzɩnɩ Yehowa nɛ Moyizi Sɔsɔ Yesu Krɩstʋ yɔ, pɩkaɣ lalaa wɛʋ kɛlɛʋ se pɔñɔtɩnɩ-ŋ nɛ ŋhɛzɩ pa-laŋa.​—Mat. 11:28, 29. w18.09 24-​25 § 7-​10

Pɩɩwɛɣ ɖeu se ŋtɛ ña-taa se ŋñakɩ pana nɛ ŋwɛɛnɩ wɛtʋ kɩbandʋ nɛ ŋyele nɛ nɔɔ kʋɖʋmaɣ wɛɛ ña nɛ koobiya mɩ-hɛkʋ taa? Ye ŋtɛm paɣzʋʋ labʋ mbʋ yɔ, ŋmʋnɩ samtʋ. Ŋkaɣ ñaɣʋ pana nɛ ŋwolo pɩ-yɔɔ nɛ ‘ŋkuli ña-laŋɩyɛ’ yaa ŋwalɩsɩ ña-taabalɩyɛ ɖʋʋ nɛ pɩkpaɖɩ yaa we? (2 Kɔr. 6:​11-​13) Ɛbɛ ŋpɩzɩɣ ŋla nɛ Bibl taa toovenim tɔm mintʋsʋʋ ñandɩ ño-kooka taa? Ñɔ-tɔm pee kɩbana nɛ ña-lakasɩ pɩzɩɣ pɩhɔ ño-kooka taa tʋ nɔɔyʋ nɛ ɛkɔɔ toovenim taa. Pɔzɩ ña-tɩ se: ‘Ɛzɩma mon-kooka taa ñɩma naɣ-m? Mɔñɔɔzɩ man-ɖɩɣa nɛ mo-­won­du camɩyɛ se pɩkɛnɩ kɩɖaʋ kɩbaŋʋ mon-kooka taa ñɩma yaa we? Mañakɩ pana se manɖʋ lalaa nesi na?’ Alɩwaatʋ ndʋ ña nɛ Aseɣɖe Tɩnaa lalaa ɩlakɩ faawɩyɛ yɔ, pɩɩwɛɣ ɖeu se ŋpɔzɩ-wɛ nɛ pɛkɛdɩ-ŋ ɖoŋ weyi pɛ-wɛtʋ kɩbandʋ wɛnɩ pɔ-hɔʋ taa ñɩma, po-kooka taa ñɩma, pa-tʋmɩyɛ taa yaa po-sukuli taa taabalaa yɔɔ yɔ? Pɩtʋʋ fɛyɩ se pakaɣ-ŋ kɛdʋʋ pee kɩbana wena pɛ-wɛtʋ lʋlaa yɔ.​—Efɛz. 5:9. w18.06 24 § 13-​14

Tɔm tʋnɛ tɩkɛ toovenim mba pakʋ Etiyɛɛnɩ yɔ, nɛ mba payɩ pakʋwaɣ lalaa ɖɔɖɔ mbʋ yɔ pɔ-hɔɔlʋʋ taa. (Tʋma 6:​8, 12; 7:​54-​60) Pɩɩkɛnɩ kɩmɛlɛndʋ kpem se mba palakɩ kɩdɛkɛdɩm sɔsɔm ɛzɩ ɛyaa kʋʋ yɔ, payaa pa-tɩ se Ɛsɔ sɛyaa ŋgʋ pɛwɛɛ pamaɣnɩ Ɛsɔ weyi pamaɣzɩɣ se peɖiɣni sɛʋ yɔ ɛ-paɣtʋ yɔɔ! (Ejl. 20:13) Pɩwɩlɩɣ kpayɩ kpayɩ se pɛ-ɛhʋyɛ peɣziɣ-wɛ kipeɣzu! Ɛbɛ ɖɩpɩzɩɣ ɖɩla nɛ ɖɛ-ɛhʋyɛ pɩzɩ nɛ ɖiɖiyi-ɖʋ camɩyɛ? Paɣtʋ kila wena awɛ Bibl taa yɔ awazɩɣ “tɔm wɩlʋʋ nɛ kɛlɛnzʋʋ nɛ sɩzʋʋ yiɣ yiɣ nɛ siɣsiɣ tɔm kpɛlɩkʋʋ.” (2 Tim. 3:​16) Ye mbʋ, ye ɖɩkpɛlɩkɩɣ Bibl, ɖɩmaɣzɩɣ ndʋ ɖɩkpɛlɩkʋʋ yɔ tɩ-yɔɔ nɛ ɖɩlakɩnɩ-tʋ tʋmɩyɛ ɖe-wezuu caɣʋ taa yɔ, pɩpɩzɩɣ nɛ pɩsɩnɩ-ɖʋ nɛ ɖɩfalɩsɩ ɖɛ-ɛhʋyɛ nɛ ɖɩla nɔɔ kʋɖʋmaɣ nɛ Ɛsɔ lɩmaɣza nɛ ɖɩpɩzɩ ɖiɖiyi-ɖʋ camɩyɛ. w18.06 16-​17 § 3-4

Alɩwaatʋ ndʋ Pɔɔlɩ maɣaɣ ɛ-takayaɣ yɔ, laɣɖɛ yaa you sɩɣa ŋga Roma sɔɔjanaa lakaɣnɩ tʋmɩyɛ yɔ, kaaɖaɣlɩ ɛzɩ santimɛtawaa 50 mbʋ yɔ, nɛ sɔɔjanaa ɖɔkaɣ-kɛ nesi tɛɛ nɛ poyouni ɖama. Lɩmaɣza wena a-yɔɔ Roma sɔɔjanaa kaawɛ niye you labʋ taa yɔ a-taa naɖɩyɛ lɛ se pafalɩsaɣ pa-tɩ paa evemiye nɖɩ nɛ po-you ­won­du. Pɔɔlɩ kpaɣ Ɛsɔtɔm nɛ ɛmaɣzɩnɩ you sɩɣa ŋga Yehowa ha-ɖʋ yɔ. Ɛlɛ pɩwɛɛ se ɖɩkpɛlɩkɩ nɛ ɖɩtɩlɩ ɛzɩma pɩwɛɛ se ­ɖɩlabɩnɩ you sɩɣa ŋga tʋmɩyɛ camɩyɛ nɛ ɖɩlʋbɩnɩ ɖe-tisuu yɔɔ yɔ yaa ɛzɩma ɖɩlabɩnɩ-kɛ tʋmɩyɛ alɩwaatʋ ndʋ pɩpɔzʋʋ se ɖɩñɔɔzɩ ɖa-maɣmaɣ ɖa-maɣzɩm yɔ. (2 Kɔr. 10:​4, 5; 2 Tim. 2:​15) Pɩtɩpɔzɩ se sɔɔndʋ ɛkpa-ɖʋ nɛ Sataŋ nɛ aleewaa. Pɛwɛ ɖoŋ ɛlɛ pɩtɩwɩlɩ se ɖɩɩpɩzɩɣ nɛ ɖɩwabɩ-wɛ. Nɛ pɩtasɩ ɖɔɖɔ lɛ, papɩzɩɣ nɛ pasɩ. Pɩkazɩ pazɩ, Yesu kaatɔkɩ kewiyitu pɩnzɩ kudoku lɛ, ɛkaɣ-wɛ ɖʋʋ salaka nɛ paatasɩɣ wɛnʋʋ ɖoŋ nɩɩyɩ nɛ pʋwayɩ lɛ, ɛkaɣ-wɛ ɖɩzʋʋ kpaagbaa ɖɩzʋʋ. (Natʋ 20:​1-3, 7-​10) Ðɩsɩm ɖo-koyindu, ɛ-lɛɣtʋ, nɛ ɛ-lɩmaɣza. Pɩtɩŋnɩ Yehowa sɩnʋʋ yɔɔ lɛ, ɖɩpɩzɩɣ nɛ ɖɩkaɖɩnɩ-ɩ. w18.05 30-31 § 15, 19-21

Pɩtʋʋ fɛyɩ se Aɖam kaanawa se ɖʋmaa ɩɩyɔɔdʋʋ. Pʋyɔɔ lɛ, pɩtɩla yɔ ɛɛnawa se tiyiyu nɔɔyʋ tɩŋnɩnɩ ɖʋm yɔɔ nɛ ɛyɔɔdɩnɩ Ɛva. (Kiɖe 3:​1-6) Aɖam nɛ Ɛva pataatɩlɩ natʋyʋ caaa tiyiyu ɛnʋ ɛ-yɔɔ. Paa mbʋ yɔ Aɖam kpaɣ lɩmaɣzɩyɛ se ekiziɣ Ɛsɔ sɔɔlɩm labʋ nɛ ɛla mbʋ ɛgɔm weyi ɛɛsɩŋɩ-ɩ yɔ ɛsɔɔlaa yɔ. (1 Tim. 2:​14) Peeɖe ­Yehowa paɣzɩ koyindu weyi epeɣzi Aɖam nɛ Ɛva yɔ, ɛ-yɔɔ tɔm kuluu nɛ ɛwɩlɩɣ pazɩ pazɩ pɩtɩŋnɩ ɛzɩma ɛyɔɔdaa se kɩdɛkɛdʋʋ ɛnʋ pakaɣ-ɩ ɖɩzʋʋ yɔ. Ɛlɛ Yehowa yɔɔdaa ɖɔɖɔ se tiyiyu ɛnʋ ɛkaɣ ­kaɖɩnʋʋ mba payɩ pɔsɔɔlɩ Ɛsɔ yɔ alɩwaatʋ natʋyʋ. (Kiɖe 3:​15) Yehowa kɛ lɔŋsɩnɖʋ siŋŋ, pʋyɔɔ lɛ etiheyi-ɖʋ tiyiyu weyi ɛkaɖɩnɩ-ɩ yɔ ɛ-hɩɖɛ kaaʋ. Halɩ tiyiyu ɛnʋ ɛkaɖɩnɩ-ɩ nɛ pɩla pɩnzɩ 2 500 pʋcɔ nɛ Ɛsɔ yele nɛ ɖɩtɩlɩ hɩɖɛ nɖɩ pakʋmɩ-ɩ ɛ-lakasɩ nzɩ sɩ-yɔɔ yɔ.​—Yɔɔb 1:6. w18.05 22 § 1-2

Ye ŋsusi tɔm ageeta naayɛ taa nɛ pitibi-ŋ yɔɔɔ mbʋ pʋyɔɔ yɔ, patɩmʋ-ŋ camɩyɛ yɔ, tɔzɩ apostoloo Pɔɔlɩ kɩɖaʋ yɔɔ. Pɩnzɩ ɛzɩ niidozo nzɩ sɩ-taa esusi tɔm nɛ kpekpeka siŋŋ yɔ, ɛɛsɩnɩ ɛyaa sakɩyɛ nɛ papɩsɩ Yesu tɔm mʋyaa. (Tʋma 14:21; 2 Kɔr. 3:​2, 3) Paa mbʋ yɔ, ɛtɩpɩzɩ nɛ ɛsɩnɩ Yuuda ñɩma sakɩyɛ nɛ papɩsɩ toovenim Ɛsɔ sɛyaa. Ɛyaa sakɩyɛ kizi ɛ-tɔm nɛ lalaa ñanazɩ-ɩ ɖɔɖɔ. (Tʋma 14:19; 17:​1, 4, 5, 13) Lakasɩ ndɩ ndɩ sɩnɛ, ɖoŋ weyi sɩɩwɛnɩ Pɔɔlɩ yɔɔ? Ɛmawa se: “Krɩstʋ taa mɔyɔɔdʋʋ toovenim . . . manɩɣ ma-laŋɩyɛ taa siziŋ sɔsɔŋ nɩɩyɩ, nɛ wɩzasɩ nasɩyɩ kaatɛŋa.” (Roma 9:​1-3) Ɛbɛ yɔɔ Pɔɔlɩ kaanɩ siziŋ mbʋ? Mbʋ pʋyɔɔ yɔ, ɛɛkam ɛ-ñʋʋ nɛ tɔm susuu tʋmɩyɛ. Esusi Yuuda ñɩma tɔm nɛ ɛmaɣzaɣ pɔ-yɔɔ siŋŋ. Mbʋ yebina nɛ ɛnɩɩ wɩzasɩ sakɩyɛ alɩwaatʋ ndʋ pekizi Ɛsɔ tɛ pʋtɔdɩyɛ naʋ yɔ. Ɛzɩ Pɔɔlɩ yɔ, ɖɩmaɣzɩɣ mba ɖisusuu-wɛ tɔm yɔ pɔ-yɔɔ siŋŋ.​—Mat. 22:39; 1 Kɔr. 11:⁠1. w18.05 13 § 4-5

Pɔɔlɩ yɔɔdaa se halɩ weyi ɛwɛnɩ waɖɛ se ɛkpazɩ lalaa ɖoŋ yɔ, pɩcɛyaa se pakpazɩ-ɩ ɖoŋ ɖɔɖɔ. Ɛma Krɩstʋ ñɩma mba pɛwɛ Roma yɔ takayaɣ nɛ ɛyɔɔdɩ se: “Mbʋ pʋyɔɔ yɔ me-liu wɛɛ pɩŋŋ se mana mɩ-ɛsɩndaa nɛ mɛnɖɛzɩ-mɩ fezuu kʋjɔʋ nakʋyʋ nɛ ɩkpa ɖoŋ, yaa ma-maɣmaɣ mankpa ɖoŋ mɩ-hɛkʋ taa, ma nɛ mɩ ɖɩka tisuu mbʋ yɔ pɩ-yɔɔ.” (Roma 1:​11, 12) Toovenim taa lɛ, Pɔɔlɩ weyi ɛkpazɩ lalaa ɖoŋ siŋŋ yɔ, nabʋyʋ taa pɩɩpɔzaa se pakpazɩ-ɩ ɖoŋ ɖɔɖɔ. (Roma 15:30-​32) Mba palaɣ kɩlaŋ sakɩyɛ pe-wezuu caɣʋ taa yɔ, pamʋnɩ samtʋ. Ɛyaa lalaa mba pɩpɔzʋʋ se pakpazɩ ɖoŋ yɔ, mba lɛ koobiya halaa nɛ abalaa mba pɛkɛ aɖamɛɛ mbʋ pʋyɔɔ yɔ pɔsɔɔlaa se paña paɣtʋ ndʋ tɩtɔŋ se pɔɖɔkɩ nesi “Kɩbaɣlʋ taa yeke” yɔ. (1 Kɔr. 7:​39) Krɩstʋ ñɩma mba pɔɖɔkʋʋ pe-siɣsiɣ wɛtʋ nazɩm taa yɔ yaa kʋdɔŋ alɩwaatʋ taa yɔ, pɩpɔzʋʋ se pakpazɩ-wɛ ɖoŋ ɖɔɖɔ.​—2 Tes. 1:​3-5. w18.04 21 § 3-5