Kʋmtʋ ɖɔ sakɩyɛ!

YESU kaaheyi ɛ-wayɩ tɩŋɩyaa se pakaɣ kʋmtʋ tʋmɩyɛ sɔsɔɖɛ naɖɩyɛ labʋ kɛdɛzaɣ kɩyakɩŋ taa. (Mat. 9:37; 24:14) Mbʋ pɩɩlabɩ Transcarpathia egeetiye taa, Ukrɛɛnɩ ɛjaɖɛ taa yɔ pɩwɩlɩɣ se Yesu tɔm ndʋ tɩkɛ toovenim. Tɛtʋ naadozo ndʋ tɩwɛ Transcarpathia egeetiye nɖɩ ɖɩ-taa yɔ, tɩ-taa agbaa kpɛndɩ 50 nɛ tɔm susuyaa ñɛcɛzɩ 5400.a Pɩwɩlɩɣ se ye pɛkpɛndɩ tɛtʋ ndʋ tɩ-naadozo tɩ-taa ɛyaa kpeekpe yɔ, ɛyaa 4 yɔɔ lɛ, 1 kɛ Yehowa Aseɣɖe Tʋ.

Ɛzɩma tɔm susuu wɛ egeetiye nɖɩ ɖɩ-taa? Peeɖe koobu weyi payaɣ se Vasile yɔ, ɛyɔɔdaa se: “Cɩnɛ ɛyaa wɛnɩ ñamtʋ Bibl yɔɔ, pɔsɔɔlɩ siɣsiɣ wɛtʋ, hɔŋ taa ñɩma sɔɔlɩ ɖama camɩyɛ nɛ pañakɩ pana se pasɩnɩ ɖama. Paatisiɣ ndʋ ɖɩwɩlɩɣ yɔ tɩ-tɩŋa tɩ-yɔɔ, ɛlɛ alɩwaatʋ ndʋ ɖɩwɩlɩɣ-wɛ mayaɣ nakɛyɛ Bibl taa yɔ, pewelisiɣni-ɖʋ camɩyɛ kpem.”

Ɛzɩma koobiya ɖɔ ageeta ana a-taa yɔ, piyeba nɛ pakatɩɣ kala wena awɛ ndɩ nɛ ajɛɛ hɔɔlɩŋ lɛɛŋ taa ñɩna yɔ. Ðɩkpaɣ kɩɖaʋ kʋnɛ: Ɛgbɛyɛ naɖɩyɛ taa tɔm susuyaa talɩ ɛyaa 134 ɛlɛ ɖɩsɩ 50 ɖeke wɛnɩ egeetiye nɖɩ ɖɩ-taa posusuu tɔm yɔ. Ɛzɩma tɔm susuyaa lakɩ?

Koobiya sakɩyɛ haɣ pa-tɩ faaa nɛ powoki lona wena a-taa tɔm susuyaa fɛyɩ yɔ nɛ paɖʋʋ nesi. Koobu Ionash ɛwɛnɩ pɩnzɩ 90, ɛyɔɔdaa se: “Pakpaɣ ɖɛ-ɛgbɛyɛ taa tɔm susuyaa nɛ pamaɣzɩnɩ ɖɩsɩ yɔ, paa tɔm susuyu weyi lɛ, ɖɩsɩ naalɛ ɖeke ɛwɛɣna. Monsusuu tɔm tɛtʋ cikpetu natʋyʋ taa. Ɛlɛ ɖooo lɛ, pʋcɔ nɛ kʋdɔmɩŋ paɣzɩ-m cɛyʋʋ lɛ, mañakaɣ pana nɛ mɔnɖɔŋ kilomɛtanaa 160 mbʋ yɔ nɛ mowoki egeetiye nɖɩ ɖɩ-taa tɔm susuyaa fɛyɩ yɔ nɛ monsusuu tɔm Hungarian kʋnʋŋ yɔɔdɩyaa.” Pɩɩwɛɛ se tɔm susuyaa ɩlaa kɩlaŋ nɛ papɩzɩ powolo ageeta lɛɛna taa ɖɔɖɔ mbʋ. Ionash tasɩ yɔɔdʋʋ se: “Pɩsa nɛ suluku ɛtaaɖɛɛ mɔ-yɔɔ lɛ, mankʋyʋʋ tɛbɩyɛ tɛɛ ñɩɣtʋ naanza ɖeyi ɖeyi nɛ mowolo monsusi tɔm nɛ pɩkɔɔ pɩtalɩ ɖanaɣ ñɩɣtʋ loɖo yɔɔ ɖeyi ɖeyi, alɩwaatʋ ndʋ suluku kʋyʋʋ se kɩpɩsɩ yɔ. Nɛ mbʋ malakɩ tam nabudozo paa kpɩtaʋ ŋgʋ.” Ionash maɣzɩɣ se ɛ-pana ñaɣʋ tɩlɩɩ pʋyʋ yaa we? Ɛ-maɣmaɣ ɛyɔɔdaa se: “Mehikiɣ taa leleŋ siŋŋ tɔm susuu mbʋ pɩ-taa. Pɩkɛdɩnɩ-m se manpɩzaa nɛ mansɩnɩ poliŋ egeetiye taa peeɖe hɔʋ nakʋyʋ nɛ kɩtɩlɩ toovenim.”

Toovenim taa lɛ, pɩtɩkɛ peeɖe agbaa taa koobiya tɩŋa pɩzɩɣna nɛ pɔɖɔ nʋmɔʋ nɛ powolo poliŋ. Ɛlɛ pa-tɩŋa, halɩ pɩkpɛndɩnɩ tɔm susuyaa mba pakpadɩyaa yɔ, pañakɩ pana se posusi tɔm pe-egeetiye taa nɛ pataafɛɛ nɔɔyʋ. Piyeba nɛ pɩnaɣ 2017 taa, ye pɛkpɛndɩ tɛtʋ ndʋ tɩ-naadozo tɩ-taa ɛyaa mba powobi Krɩstʋ sɩm yɔɔ tɔzʋʋ sɔnzɩ ɖɩlaɖɛ yɔ, pɔɖɔwa nɛ pɩkpaɖɩ peeɖe tɔm susuyaa tam nabʋlɛ; pɩwɩlɩɣ se samaɣ ŋga kɛwɛ egeetiye nɖɩ ɖɩ-taa yɔ, patayɩ-kɛ nabʋlɛ yɔ, hɔɔlʋʋ kʋɖʋmʋʋ kɔm sɔnzɩ nzɩ sɩ-ɖɩlaɖɛ. Pɩtʋʋ fɛyɩ se paa le ɖɩtɩɩwɛɛ nɛ ɖɩɖʋʋ nesi Kewiyaɣ tʋma yɔ, ɖɩpɩzɩɣ ‘ɖiwobini ɛsɩndaa tam Kɩbaɣlʋ tʋmɩyɛ taa’ yaa ɖɩla tʋma sakɩyɛ Kɩbaɣlʋ tʋmɩyɛ taa.​—1 Kɔr. 15:58.