Nʋmɔŋ naadozo weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖɩtaa Yehowa liu yɔ

Daviid kaapɩzaa nɛ ɛwa Gooliyaatɩ mbʋ pʋyɔɔ yɔɔ ɛɛta Yehowa liu. (1Sam 17:45) Yehowa sɔɔlaa se ɛkpazɩ ɖoŋ ɛ-sɛyaa tɩŋa payɩ. (4Aw 16:9) Ɛbɛ pɩzɩɣ nɛ pɩsɩnɩ-ɖʋ nɛ ɖɩtaa liu Yehowa, nɛ ɖɩtaataa ɖa-maɣmaɣ ɖo-ɖoŋ yaa ɖɛ-lɛɣtʋ liu? Mbʋ pɩpɩzɩɣ nɛ pɩsɩnɩ-ŋ yɔ pɩ-taa naadozo yɔ:

• Tɩmɩɣ ɖoŋ ɖoŋ: Taatɩmɩɣ yem se pekpeɣ-ŋ ña-kɩwɛɛkɩm, ɛlɛ tɩmɩɣ ɖɔɖɔ se Ɛsɔ ɛha-ŋ ɖoŋ nɛ ŋkaɖɩnɩ takɩm mbʋ ŋkatɩɣ yɔ. (Mt. 6:12, 13) Taatɩmɩɣ yem se Yehowa ɛwazɩ lɩmaɣza wena ŋkpakɩɣ yɔ a-yɔɔ, ɛlɛ tɩmɩɣ ɖɔɖɔ se eɖiyi-ŋ nɛ ɛha-ŋ lɔŋsɩnɖɛ pʋcɔ nɛ ŋkpakɩɣ ña-lɩmaɣza.—Yak 1:5

• Wɛɛnɩ Bibl kalʋʋ nɛ Bibl kpɛlɩkʋʋ ɖʋtʋ kɩbandʋ. Kalɩɣ Bibl paa evemiye nɖɩ. (Keɣa 1:2) Maɣzɩɣ Bibl taa kɩɖaŋ yɔɔ nɛ ŋlakɩnɩ tʋmɩyɛ lɔŋ weyi ŋkpɛlɩkɩɣ yɔ. (Yak 1:23-25) Pʋcɔ nɛ ŋlɩɩ tɔm susuu lɛ, taataa liu ña-maɣmaɣ ñɔ-lɔŋsɩnɖɛ, ɛlɛ ñɔɔzɩ ña-tɩ camɩyɛ. Ñɔɔzʋʋ ña-tɩ camɩyɛ pʋcɔ nɛ ŋwoki ɛgbɛyɛ kediɣzisi nɛ pɩsa nɛ sɩwazɩ-ŋ camɩyɛ nɛ pɩkɩlɩ

• Ña nɛ Yehowa ɛgbɛyɛ ɩkpɛndɩ nɛ ɩlakɩ tʋmɩyɛ nɔɔ kʋɖʋmaɣ taa. Ñaɣ pana nɛ ŋtɩlɩ lɔŋ kɩfaŋ weyi Yehowa ɛgbɛyɛ tasɩɣ yɔ, nɛ ŋlabɩnɩ-ɩ tʋmɩyɛ kpɛdɛyɛ. (Kɩg 9:17) Welisini ɛzʋtʋyaa alɩwaatʋ ndʋ patasɩɣ lɔŋ nɛ paɖʋʋ paɣtʋ natʋyʋ yɔ.—Ebr 13:17

CƆNƖ VIDEO NAZƖM ƐTAAKPA-ÐƲ SƆƆNDƲ, NƐ PƲWAYƖ LƐ ŊCOSI TƆM TƲNƐ TƖ-YƆƆ:

• Sɔɔndʋ ndʋ kaakpa koobiya halaa nɛ abalaa?

• Ɛbɛ kaasɩnɩ-wɛ nɛ pawa sɔɔndʋ ndʋ?