Rahaabɩ kaawɛnɩ tisuu Yehowa yɔɔ

Ðɩkpaɣ se ɖɩwɛ Yeriikoo tɛtʋ taa. Yeriikoo tɛtʋ wɛ Kanaŋ ɛjaɖɛ taa na. Ɛyaa mba pɛwɛ Kanaŋ ɛjaɖɛ ɖɩnɛ ɖɩ-taa yɔ, pɛfɛyɩnɩ tisuu Yehowa yɔɔ. Nɛ Yeriikoo tɛtʋ taa halʋ weyi payaɣ se Rahaabɩ yɔ, ɛɛwɛɛ.

Rahaabɩ kaakɛ pɛlɛ lɛ, ɛɛnɩ kɛdɛsɩ nzɩ sɩyɔɔdʋʋ ɛzɩma Moyizi tayɩ Teŋgu Kɩsɛɛmʋʋ nabʋlɛ alɩwaatʋ ndʋ Izrayɛɛlɩ piya lɩɣaɣ Egipiti tɛtʋ taa yɔ, sɩ-tɔm. Ɛɛnɩ ɖɔɖɔ yoŋ weyi ɩ-taa Yehowa sɩnɩ-wɛ nɛ pawa po-koyindinaa yɔ, ɩ-tɔm. Lɛɛlɛɛyɔ lɛ, ɛnɩɣ se Izrayɛɛlɩ piya kɔm nɛ sɩñɔtɩnɩ Yeriikoo tɛtʋ nɛ sɩñɔɔzʋʋ sɩ-tɩ se sɩla you!

Ðanaɣ nakɛyɛ lɛ, Izrayɛɛlɩ piya naalɛ kɔɔ nɛ sɩsʋʋ Yeriikoo tɛtʋ taa se sɩcɔŋ-tʋ. Sɩkɔɔ nɛ sɩtalɩ Rahaabɩ tɛ nɛ ɛlɛ mʋ-sɩ camɩyɛ. Ðoo yuwa lɛ, Yeriikoo wiyaʋ kɔɔ nɛ ɛna se cɔŋɩyaa nabɛyɛ mɛlaa nɛ pasʋʋ tɛtʋ taa nɛ powolo Rahaabɩ tɛ. Peeɖe wiyaʋ tiyi abalaa nabɛyɛ se powolo nɛ pakpa-wɛ nɛ pɔkɔna. Rahaabɩ nɩ mbʋ lɛ, ɛkpaɣ cɔŋɩyaa mba nɛ ɛmɛsɩ e-kuduyuu ñʋʋ taa. Wiyaʋ tiyiyaa talaa lɛ, eheyi-wɛ se: ‘Toovenim cɔŋɩyaa kaawɛ cɩnɛ, ɛlɛ pɛtɛm ɖɛʋ, ye ɩɖɔɔnɩ-wɛ lɛɛ lɛɛ yɔ, ɩkpaɣ-wɛ!’ Ŋna mbʋ pɩ-yɔɔ Rahaabɩ mɛsɩ cɔŋɩyaa mba yɔ?— Mbʋ pʋyɔɔ yɔ, ɛɛwɛnɩ tisuu Yehowa yɔɔ, nɛ ɛnawa se Yehowa kaɣ Kanaŋ ɛjaɖɛ cɛlʋʋ Izrayɛɛlɩ piya.

Pʋcɔ nɛ cɔŋɩyaa panɛ palɩɩ Rahaabɩ ɖɩɣa taa nɛ pɛɖɛɛ lɛ, peheyi-i se alɩwaatʋ ndʋ pɔkɔŋ se pɔyɔkɩ Yeriikoo tɛtʋ yɔ, pakaɣ huuzuu ɛ nɛ ɛ-hɔʋ pɔ-yɔɔ nɛ palɩɩ cɩŋgɩlɩm. Ŋsɩm mbʋ paaheyi Rahaabɩ se ɛla yɔ?— Peheyi-i se: ‘Mʋ nimaɣ kɩsɛɛmaɣ kanɛ yɔ, nɛ ŋtam-kɛ ño-mondoɖebɔʋ yɔɔ. Nɛ ye ŋlabɩ mbʋ yɔ, mba payɩ pakaɣ wɛʋ ña-ɖɩɣa taa puwiye yɔ, pakaɣ lɩʋ cɩŋgɩlɩm.’ Rahaabɩ la ɖeyi ɖeyi ɛzɩ cɔŋɩyaa panɛ pɔyɔɔdʋʋ yɔ. Ŋsɩm mbʋ pɩlabɩ pʋwayɩ yɔ?—

Kɩyakɩŋ cabɩ wayɩ lɛ, Izrayɛɛlɩ piya kɔɔ nɛ sɩpaɣzɩ cɔʋ tɛtʋ nɛ sɩtaŋ ɛlɛ sɩtɩmakɩ you kubusi; sɩla mbʋ kɩyakɩŋ loɖo. Nɛ paa kɩyakʋ ŋgʋ lɛ, sɩcɔwaɣ tɛtʋ tam kʋɖʋm. Kɩyakʋ lʋbɛ ŋgʋ wiye lɛ, sɩcɔɔ tɛtʋ tam lʋbɛ. Sɩtɛm tam lʋbɛ mbʋ cɔʋ lɛ, sɩtɩŋa sɩma you kubusi ɖoŋ. Peeɖe Yehowa yeba nɛ koloŋa ŋga kaacɔ tɛtʋ nɛ kata yɔ, kɔyɔlɩ. Ɛlɛ ɖɩɣa ŋga nimaɣ kɩsɛɛmaɣ kaawɛ ko-mondoɖebɔʋ yɔɔ yɔ, kasɩŋ ke-ɖeɖe cɩŋgɩlɩm. Cɔnɩ kɩlɛmʋʋ yɔɔ nɛ ŋna, le kɛwɛɛ?— Payabɩ Rahaabɩ nɛ ɛ-hɔʋ taa ñɩma ñʋʋ!

Ɛbɛ Rahaabɩ tɔm tʋnɛ tɩkpɛlɩkɩɣ-ŋ?— Rahaabɩ kaawɛnɩ tisuu Yehowa yɔɔ, mbʋ pʋyɔɔ yɔ ɛɛkpɛlɩkɩ ɛ-yɔɔ tɔm kɩbandʋ sakɩyɛ. Ña ɖɔɖɔ ŋɖiɣni kpɛlɩkʋʋ tɔm kɩbandʋ sakɩyɛ Yehowa yɔɔ. Ɛlɛ ɛzɩ Rahaabɩ yɔ, ŋwɛnɩ tisuu Yehowa yɔɔ?— Ðɩɩpɩtɩɣ se ŋwɛnɩ tisuu ɛ-yɔɔ!