Kewiyaɣ ŋga kakaɣ ɖiyuu tɛtʋ kpeekpe yɔ

Ŋpɩzɩɣ nɛ ŋkpeɣ Kewiyaɣ ŋga kɔ-tɔm ɖɩcaɣ yɔɔdʋʋ yɔ?— Ɛɛɛ, ŋga lɛ Ɛsɔ Kewiyaɣ, nɛ ŋga kaɣnɩ labʋ nɛ tɛtʋ pɩsɩ paradisuu. Ŋsɔɔlaa se ŋkpɛlɩkɩ Kewiyaɣ ŋga kɔ-yɔɔ tɔm pazɩ na?—

Paa kewiyaɣ ŋga lɛ, kɛwɛnɩ wiyaʋ. Nɛ wiyaʋ ɛnʋ lɛ, ɛtɔkɩ kewiyitu ɛyaa mba pɛwɛ e-kewiyaɣ tɛɛ payɩ yɔ, pɔ-yɔɔ. Ŋsɩm weyi ɛkɛnɩ Ɛsɔ Kewiyaɣ wiyaʋ yɔ?— Ɛnʋ lɛ Yesu Krɩstʋ. Ɛwɛ ɛsɔdaa. Pɩkazɩ pazɩ, ɛkaɣ tɔɔʋ kewiyitu tɛtʋ yɔɔ ɛyaa kpeekpe yɔɔ. Ŋmaɣzɩɣ se ɖɩkaɣ wɛʋ koboyaɣ taa, alɩwaatʋ ndʋ Yesu pɩsɩɣ tɛtʋ kpeekpe wiyaʋ yɔ?—

Ɛɛɛ, ɖɩkaɣ wɛʋ koboyaɣ taa siŋŋ! Paradisuu taa, ɖama kaɖɩnʋʋ yaa you ɛɛtasɩɣ wɛʋ. Ɛyaa kaɣ sɔɔlʋʋ ɖama. Kʋdɔmɩŋ nɛ sɩm paatasɩɣ wɛʋ. Yʋlʋmaa kaɣ naʋ, tandamaa kaɣ nɩʋ nɛ kaakalasɩ kaɣ seu nɛ pɛmɛyɩɣ. Tɔɔnasɩ kaɣ tɔyʋʋ nɛ paa weyi lɛ ɛtɔɔ nɛ ɛhaɣ camɩyɛ. Laŋhɛzɩyɛ kaɣ wɛʋ kpɩna hɛkʋ taa nɛ laŋhɛzɩyɛ kaɣ wɛʋ ɖɔɖɔ kpɩna nɛ ɛyaa pɛ-hɛkʋ taa. Pakaɣ fezuu sɩɖaa. Abalaa nɛ halaa mba ŋkpɛlɩkɩ pɔ-tɔm hatʋ cabɩ takayaɣ kanɛ ka-taa yɔ, pa-taa sakɩyɛ ɛzɩ Rebeka, Rahaabɩ, Daviid nɛ Eliya mbʋ yɔ, pakaɣ fem. Ŋsɔɔlaa se ŋkatɩ-wɛ alɩwaatʋ ndʋ pefeŋ yɔ?—

Yehowa sɔɔlɩ-ŋ nɛ ɛñɩnɩɣ se ŋwɛɛ koboyaɣ taa. Ye ŋwobi pɩ-yɔɔ nɛ ŋkpɛlɩkɩɣ Yehowa tɔm nɛ ŋlakɩ ɛ-sɔɔlɩm yɔ, ŋkaɣ pɩzʋʋ nɛ ŋcaɣ wezuu paradisuu taa tam tam. Ŋsɔɔlaa se pɩla mbʋ?—