Kewiyaɣ tɔm wɩlʋʋ​—Pafalɩsɩɣ Wiyaʋ Lɩmɖʋyaa

MƖ-ƐGBƐYƐ taa koobu evebu nɔɔyʋ ɖiɣni ɛ-kajalaɣ tɔm yɔɔdʋʋ kigbeɣluu nakʋyʋ taa nɛ ŋcaɣ ño-lone taa nɛ ŋmʋʋyʋʋ nɛ taa leleŋ yem. Ŋwɛɛ nɛ ŋwelisiɣ ɛ-tɔm lɛ, ŋtɔzʋʋ ɖɔɖɔ nɛ taa leleŋ ɛzɩma Yehowa falɩsɩɣ ɛ-samaɣ tɩŋa yɔ. Ŋtɔzʋʋ alɩwaatʋ ndʋ evebu ɛnʋ ɛcalɩ kpaʋ tɔm ɖɩyɔɔdɩyɛ se ɛla ɛ-tʋmɩyɛ yɔ. Ɛlɛ, pafalɩsɩ-ɩ nʋmɔʋ lɩzɩyaa sukuli taa nɛ pɩtɛ lɛ, pɩsɩnɩ-ɩ nɛ ewobini ɛzɩdaa siŋŋ! Pitileɖi yɔ, ɛ nɛ ɛ-halʋ powobi Kewiyaɣ tɔm susuyaa sukuli. Koobu ɛnʋ ɛtɛm ɛ-tɔm yɔɔdʋʋ nɛ ŋkpalɩɣ-ɩ se ɛyɔɔdɩ ɛ-tɔm camɩyɛ lɛ, ŋcɔnɩ kpɛɛɛ nɛ ŋmaɣzɩɣ ɛzɩma pafalɩsɩɣ Ɛsɔ samaɣ yɔ pɩ-yɔɔ.

Bibl yɔɔdaa se alɩwaatʋ natʋyʋ talɩɣ nɛ Ɛsɔ samaɣ taa ɛyaa kpeekpe kaɣ “kɛʋ Yehowa sukulibiya.” (Iza. 54:13) Alɩwaatʋ ndʋ, tɩ-taa ɖɩwɛ lɛɛlɛɛyɔ. Patɩŋɩɣnɩ ɖa-takayɩsɩ, ɖe-kediɣzisi, kigbeɣliŋ cikpeŋ nɛ kigbeɣliŋ sɔsɔŋ yɔɔ nɛ pafalɩsɩɣ-ɖʋ. Patɩŋɩɣnɩ sukulinaa ndɩ ndɩ yɔɔ nɛ pafalɩsɩɣ-ɖʋ se ɖɩla tʋma naayɛ Yehowa ɛgbɛyɛ taa. Hɔɔlʋʋ kʋnɛ kɩ-taa lɛ, ɖɩkaɣ naʋ ɛzɩma falɩsʋʋ mbʋ, pɩwɩlɩɣ se Ɛsɔ Kewiyaɣ wɛɛ nɛ kalakɩ ka-tʋmɩyɛ sɔnɔ yɔ.