“Kpɩnɛ nɖɩ ɖiileba yɔ, mankaɣ-ɖɩ ñɩnʋʋ”

YEHOWA kpaɣ ɛ-tɩ nɛ ɛmaɣzɩnɩ ninɖiɣyu ɛnʋ tam sakɩyɛ. Ɛlabɩ tamaɣ kɩbaŋa kanɛ Bibl taa: “Ma-maɣmaɣ mankaɣ wobu mañɩnɩ mo-wondu nɛ mɔncɔnɩ tɩ-yɔɔ.”—Ezekɩyɛɛlɩ 34:11, 12.

“Man-[kalakʋ] taa wondu”

Mba kɛ Yehowa heŋ? Tobi lɛ, mba lɛ ɛyaa mba pɔsɔɔlɩ Yehowa nɛ pɛsɛɣ-ɩ yɔ. Bibl yɔɔdaa se: “Ɩsʋʋ, ɖiluŋ, ɖɩhɩnɩ ɛ-tɛɛ, ɖɩhɩnɩ Kɩbaɣlʋ weyi ɛlabɩ-ɖʋ yɔ nɛ ɖɩɖʋ-ɩ hɩɖɛ. Ɛnʋ na ɖɛ-Ɛsɔ, nɛ ɖa, ɖɩkɛ samaɣ ŋga eɖiyiɣ yɔ, wondu ndʋ e-nee talɩɣ yɔ.” (Keɣa 94:6, 7) Ɛzɩ heŋ weyi ɛtɩŋɩɣ e-ninɖiɣyu wayɩ yɔ, Yehowa sɛyaa tisiɣ faaa nɛ patɩŋɩɣ pe-ninɖiɣyu wayɩ. Ɛlɛ nabʋyʋ taa Yehowa sɛyaa pɩsɩɣ “wondu ndʋ tɩmɩzaa” yɔ, “heŋ kilebiŋ” nɛ “heŋ weyi iɖiɣni lebu yɔ.” (Ezekɩyɛɛlɩ 34:12; Maatiyee 15:24; 1 Pɩyɛɛrɩ 2:25) Ɛlɛ paa nɔɔyʋ eposi ɛ-tɩ mbʋ yɔ, Yehowa ɛɛlɔʋ-ɩ nɛ ɛtaɣ liu se ɛkaɣ pɩsʋʋ.

Ŋmaɣzɩɣ se Yehowa kɛ ñe-ninɖiɣyu halɩ nɛ sɔnɔ? Sɔnɔ, nʋmɔŋ weyi yɔɔ Yehowa tɩŋɩɣna nɛ ɛwɩlɩɣ se ɛkɛ ɖe-ninɖiɣyu? Iyele nɛ ɖɩyɔɔdɩ nʋmɔŋ naadozo tɔm:

Ɛcɔŋnɩ ɖɔ-yɔɔ fezuu taa. Yehowa yɔɔdaa se: “Mankaɣ-tʋ calʋʋ kɛdɛɛnzɩ nzɩ sɩ-taa ñɩtʋ ɖɔ pɩdɩɩfɛyɩ yɔ, . . . peeɖe tɩkaɣ hɛzʋʋ ñɩtʋ lɛŋ ndʋ yɔɔ nɛ tɩkaɣ tɔɔʋ kɛdɛɛnzɩ nzɩ sɩ-taa ñɩtʋ piyi camɩyɛ” yɔ. (Ezekɩyɛɛlɩ 34:14) Yehowa ɛɛkaɣ-ɖʋ yebu haʋ fezuu taa tɔɔnaɣ alɩwaatʋ ndʋ tɩmʋnaa yɔ tɩ-yɔɔ kpa. Ŋtɔzʋʋ tɔm ñʋʋ nakʋyʋ, samaɣ taa tɔm natʋyʋ yaa video nakʋyʋ ŋgʋ kicosi ña-adɩma naayɛ yɔɔ yɔ kɩ-yɔɔ? Pitaayele nɛ ña-taa tɛ se Yehowa cɔŋnɩ ñɔ-yɔɔ?

Ɛkandɩyɩɣ ɖɔ-yɔɔ nɛ ɛsɩɣnɩ-ɖʋ. Yehowa labɩ tamaɣ se: “Kpɩnɛ . . . nɖɩ ɖiisewa yɔ, mankaɣ-ɖɩ pɩsɩnʋʋ, nɛ nɖɩ pɩɩpɛlɩ-ɖɩ yɔ, mankaɣ-ɖɩ tam kpazaɣ nɛ nɖɩ ɖɩɩkɛ ɛjam yɔ, mankaɣ-ɖɩ ɖoŋ kpazʋʋ.” (Ezekɩyɛɛlɩ 34:16) Yehowa kpazɩɣ ɖoŋ mba pɩcamɩ-wɛ yaa nɩɣzɛ kɩlɩ-wɛ yɔ. Pɩtɩla koobu nɔɔyʋ lakasɩ nasɩyɩ yeba nɛ e-koobu mʋ heŋ yaa ɛwɛɛ laŋwɛɛkɩyɛ taa. Yehowa taŋ koobu weyi ɛwɛ laŋwɛɛkɩyɛ taa yɔ kpazaɣ se pɩsa nɛ ɛ-yɔɔ cɛ. Nɛ ɛpɩsɩɣnɩ mba peleba yaa pɩtɩla pɛwɛɛ nɛ palʋkɩnɩ lɩmaɣza kɩdɛkɛda yɔ kalakʋ taa.

Ɛmaɣzɩɣ se ɛ-sʋʋtʋ pɩkɛnaa se ɛcɔnɩ ɖɔ-yɔɔ. Yehowa yɔɔdaa se: ‘Mankaɣ-tʋ holuu nɛ malɩzɩ lona kpeekpe taa, ɖenɖe tɩmɩzaa yɔ . . . Kpɩnɛ nɖɩ ɖiileba yɔ, mankaɣ-ɖɩ ñɩnʋʋ.’ (Ezekɩyɛɛlɩ 34:12, 16) Yehowa ɛsɩndaa lɛ, heɣa ŋga keleba yɔ kɔ-tɔm tɩtɛ. Ye heɣa nakɛyɛ eleba yɔ, ɛñɩnɩɣ-kɛ nɛ ɛnaɣ-kɛ lɛ, ɛ-taa lakɩ leleŋ siŋŋ. (Maatiyee 18:12-14) Toovenim taa lɛ, ɛyaɣ ɛ-sɛyaa se: “Mo-wondu, man-[kalakʋ] taa wondu.” (Ezekɩyɛɛlɩ 34:31) Ŋkɛ wondu ndʋ tɩ-taa nakʋyʋ.

“Pɩsɩ ɖa-kɩyakɩŋ kɩfaŋ ɛzɩ ɖooo kiɖe tɛɛ lɛ”

Ɛbɛ yɔɔ Yehowa wɛɛ nɛ ɛñɩnɩɣ-ŋ nɛ ɛyaɣ-ŋ se ŋpɩsɩ nɛ ŋkɔɔ ɛ-cɔlɔ? Mbʋ pʋyɔɔ yɔ ɛsɔɔlaa se ŋwɛɛ laŋhʋlʋmɩyɛ taa. Ɛlabɩ tamaɣ se: “Nɛ mankaɣ pɔ-yɔɔ wazʋʋ.” (Ezekɩyɛɛlɩ 34:26) Yehowa tɩyɔɔdɩ tɔm ndʋ yem. Pɩtʋʋ fɛyɩ se ña-maɣmaɣ ŋwɛɛ nɛ ŋnaɣ se ɛwazɩɣ-ɖʋ toovenim.

Tɔzɩ alɩwaatʋ ndʋ ŋŋkpɛlɩkaa nɛ ŋtɩlɩ Yehowa yɔ tɩ-yɔɔ. Ɛzɩma pɩɩlabɩ-ŋ alɩwaatʋ ndʋ ŋcalɩ tɩlʋʋ Ɛsɔ hɩɖɛ nɛ tamaɣ ŋga ɛlabɩ ɛyaa yɔ? Ŋtɔzʋʋ alɩwaatʋ ndʋ ña nɛ no-koobiya ɩkataɣ kediɣzisi nɛ kigbeɣliŋ taa nɛ pɩkpazɩɣ-ŋ ɖoŋ ɛzɩma yɔ? Alɩwaatʋ ndʋ ŋsusaɣ ɛyaa tɔm nɛ ŋnaɣ se pɩkɛdɩnɩ-wɛ yɔ, ŋtaakpeŋ ɖɩɣa nɛ amɛya na?

Ŋpɩzɩɣ nɛ ŋtasɩ hiɣu taa leleŋ ɛnɩ. Caanaʋ taa Yehowa sɛyaa labɩ adɩma se: “Pɩsɩnɩ-ɖʋ ñɔ-cɔlɔ, Kɩbaɣlʋ, nɛ ɖɩpɩsɩ ɖa-laŋa; pɩsɩ ɖa-kaakɩŋ kɩfaŋ ɛzɩ ɖooo kiɖe tɛɛ lɛ.” (Witu 5:21) Yehowa kaacosi ɛ-sɛyaa mba pa-adɩma ana a-yɔɔ nɛ paɖaɣnɩ-ɩ paɣzʋʋ sɛʋ nɛ taa leleŋ. (Nehemiya 8:17) Yehowa kaɣ-ŋ sɩnʋʋ mbʋ ɖɔɖɔ.

Toovenim taa lɛ, pɩfɛyɩ kɛlɛʋ se ɛyʋ ɛpɩsɩ Yehowa cɔlɔ. Ye ŋsɔɔlaa se ŋpɩsɩ yɔ, ŋpɩzɩɣ nɛ ŋkatɩ kala ndɩ ndɩ. Yele nɛ ɖɩyɔɔdɩ kala ana a-taa naayɛ tɔm. Ðɩkaɣ naʋ ɖɔɖɔ mbʋ ŋpɩzɩɣ ŋla nɛ ŋwabɩ-yɛ yɔ.