Abraham nɛ Saara pewelisini Ɛsɔ

Uuri kɛ tɛtʋ ndʋ tɩtaakɩlɩ posinuu Babɛɛlɩ tɛtʋ yɔ, nɛ ɛyaa mba paawɛ peeɖe yɔ, pa-taa sakɩyɛ taasɛɣ Yehowa, ɛlɛ pɛsɛɣaɣ ɛsɔnaa sakɩyɛ. Paa mbʋ yɔ, abalʋ nɔɔyʋ kaawɛ Uuri tɛtʋ taa peeɖe nɛ ɛlɛ lɛ, Yehowa ɖeke ɛsɛɣaɣ. Payaɣ abalʋ ɛnʋ se Abraham.

Yehowa heyi Abraham se: “Yele ña-ɖɩɣa nɛ ña-ñɩma nɛ ŋwolo ɛjaɖɛ nɖɩ mankaɣ-ŋ wɩlʋʋ yɔ ɖɩ-taa.” Nɛ Ɛsɔ labɩ-ɩ tamaɣ se: “Ŋkaɣ pɩsʋʋ samaɣ sɔsɔɔ, nɛ ñɔ-yɔɔ lɛ, mankaɣ wazʋʋ ɛyaa sakɩyɛ tɛtʋ kpeekpe yɔɔ.”

Abraham taatɩlɩ ɖenɖe Yehowa caɣ se ewolo yɔ, ɛlɛ ɛta-ɩ liu. Mbʋ pɩlaba nɛ Abraham, ɛ-halʋ Saara, ɛ-caa Teera nɛ ɛ-ɖɛdʋ Lɔɔtɩ, pekpeɣli po-wondu nɛ papaɣzɩ ɖɔm nʋmɔʋ kɩɖaɣlʋʋ ŋgʋ, ɛzɩ Yehowa kaapɔzʋʋ-wɛ se pala yɔ.

Abraham kaawɛnɩ pɩnzɩ 75 alɩwaatʋ ndʋ ɛ nɛ ɛ-hɔʋ patalɩ ɛjaɖɛ nɖɩ Yehowa kaasɔɔlaa se ɛcɛlɩ-wɛ yɔ, ɖɩ-taa yɔ. Nɖɩ payaɣ se Kanaŋ ɛjaɖɛ. Peeɖe Yehowa yɔɔdɩnɩ Abraham nɛ ɛlabɩ-ɩ tamaɣ se: “Ɛjaɖɛ nɖɩ ŋnaɣ ɛzʋnɔ yɔ, mankaɣ cɛlʋʋ ñe-piya ɖi-kpeekpe.” Ɛlɛ Abraham nɛ Saara paakpadɩyaa nɛ pataawɛɛnɩ pɩɣa. Ye mbʋ, ɛzɩma Yehowa kaɣ labʋ nɛ tɔm ndʋ tɩla?