Poɖuwaa se palakɩ Yehowa sɔɔlɩm

Izrayɛɛlɩ mba lɩnɩ Ejipiti nɛ pɩla ɛzɩ fenasɩ naalɛ mbʋ yɔ lɛ, patalɩ Sinayii Pʋʋ cɔlɔ nɛ pesiɣ kizinzikiŋ peeɖe. Yehowa heyi Moyizi se ɛkpa pʋʋ ñʋʋ taa. Yehowa heyi-i peeɖe se: “Mayabɩ Izrayɛɛlɩ mba ñʋʋ. Ye pewelisiɣni-m nɛ pañaŋ man-paɣtʋ yɔ, pakaɣ kɛʋ samaɣ ŋga kɛwɛ ŋgee mɛ-ɛsɩndaa yɔ.” Moyizi tiba lɛ, ɛkɛdɩ Izrayɛɛlɩ mba tɔm ndʋ Yehowa heyi-i yɔ. Suwe pocosi-i? Pocosi-i se: “Ðɩkaɣ labʋ mbʋ payɩ Yehowa pɔzʋʋ-ɖʋ se ɖɩla yɔ.”

Moyizi ɖaɣnɩ kpaʋ pʋʋ ñʋʋ taa. Nɛ Yehowa heyi-i se: “Mankaɣ-ŋ yɔɔdɩnʋʋ kɩyakɩŋ 3 wayɩ. Heyi samaɣ se kataakpa Sinayii Pʋʋ yɔɔ.” Moyizi tiba lɛ, eheyi samaɣ se kɔñɔɔzɩ ka-tɩ, mbʋ pʋyɔɔ yɔ Yehowa kaɣ-kɛ yɔɔdɩnʋʋ.

Pɩlabɩ kɩyakɩŋ 3 lɛ, Izrayɛɛlɩ mba na tɛʋ ñɩlɩsʋʋ nɛ mɩndʋ pʋʋ yɔɔ. Panɩɣaɣ ɖɔɖɔ tɛʋ nazʋʋ nɛ nɔndɔʋ hʋlʋʋ. Pʋwayɩ lɛ, Yehowa tii pʋʋ yɔɔ miŋ nɩɩyɩ taa. Sɔɔndʋ kpa Izrayɛɛlɩ mba siŋŋ nɛ peseliɣ. Pʋʋ tɩŋa ñɛyɩ ñɔsɩ pɩdɩɩfɛyɩ nɛ kiseliɣ. Nɔndɔʋ hʋlʋʋ wɛɛ nɛ pɩkpaɣ ɖoŋ kpaʋ yɔɔ. Nɛ Ɛsɔ heyi-wɛ se: “Ma-hɩɖɛ lɛ Yehowa. Ɩtaasɛɛ ɛsɔ nɔɔyʋ nɛ pɩtasɩnɩ-m.”

Moyizi tasɩ kpaʋ pʋʋ ñʋʋ taa lɛ, Yehowa cɛlɩ-ɩ paɣtʋ ndʋ tɩwɩlɩɣ samaɣ ɛzɩma kɛsɛɛ-ɩ nɛ mbʋ pɩwɛɛ se kala nɛ Yehowa kɛ kɛ-Ɛsɔ yɔ. Moyizi ma paɣtʋ ndʋ nɛ pʋwayɩ lɛ, ɛkalɩ-tʋ Izrayɛɛlɩ mba ɛsɩndaa. Peeɖe poɖuwaa nɛ pɔtɔ se: “Ðɩkaɣ labʋ mbʋ payɩ Yehowa pɔzʋʋ-ɖʋ se ɖɩla yɔ.” Poɖuwaa se palakɩ Ɛsɔ sɔɔlɩm. Ɛlɛ ɛzɩ pakaɣ ɖɔm po-ɖuutu yɔɔ?