Yesu lɩzɩ Sɔɔlɩ

Sɔɔlɩ kaakɛ Roma tʋ nɛ palʋlɩ-ɩ Taarɩsɩ. Ɛɛkɛ Farɩsɩ tʋ weyi ɛsɩm Yuuda mba Paɣtʋ camɩyɛ yɔ, nɛ ɛpaɖaɣ Krɩstʋ mba. Ɛlɩzaɣ Krɩstʋ mba halaa nɛ abalaa pa-ɖɩsɩ taa nɛ ɛɖʋʋ-wɛ salaka. Halɩ alɩwaatʋ ndʋ samaɣ nakɛyɛ kaamʋ pana nɛ kayaɣ Etiyɛɛnɩ pɛɛ nɛ ɛsɩ yɔ, ɛɛsɩŋ pɩ-cɔlɔ peeɖe nɛ ɛcɔŋna.

Sɔɔlɩ kaawɛɛ nɛ ɛkpaɣ Krɩstʋ ñɩma mba pɛwɛ Yeruzalɛm yɔ, ɛlɛ pɩtɩmaɣ-ɩ. Ewolo nɛ ɛpɔzɩ cɔjɔ kɩlɩm se etiyi-i Damaasɩ tɛtʋ taa nɛ ɛnazɩ ɖɔɖɔ Krɩstʋ ñɩma mba pɛwɛ peeɖe yɔ. Sɔɔlɩ ñɔtɩnɩ tɛtʋ ndʋ lɛ, ñalɩmɩyɛ naɖɩyɛ lɩɩ ɛ-yɔɔ tuda nɛ ɖɩñɩlɩsɩ ɛ-cɔlɔ kpɛɛɛ, nɛ ɛtɔlɩ tataa. Ɛnɩ ɖɔɖɔ nɔɔ nakɛyɛ; kɔyɔɔdaɣ se: «Sɔɔlɩ, ɛbɛ yɔɔ ŋwɛɛ nɛ ŋnazɩɣ-m?» Sɔɔlɩ pɔzɩ se: «Ña yɔ anɩ?» Nɛ nɔɔ ŋga kocosi-i se: “Ma lɛ Yesu. Wolo Damaasɩ, nɛ mankaɣ-ŋ wɩlʋʋ mbʋ pɩpɔzʋʋ se ŋla yɔ.” Mbʋ pɩɩlaba yɔ piiyeba nɛ Sɔɔlɩ yʋlʋmɩ. Pɩɩwɛɛ se pɔɖɔkɩ e-nesi kɩɖɔkʋʋ nɛ pasʋnɩ-ɩ tɛtʋ taa.

Krɩstʋ tʋ siɣsiɣ tʋ nɔɔyʋ kaawɛ Damaasɩ tɛtʋ taa nɛ payaɣ-ɩ se Anaanɩyaasɩ. Yesu tɩŋnɩ natʋ natʋyʋ yɔɔ nɛ eheyi Anaanɩyaasɩ se: “Kʋyɩ nɛ ŋwolo Yudaasɩ ɖɩɣa taa, habɩyɛ nɖɩ payaɣ se Kʋtʋʋzɩyɛ yɔ ɖɩ-yɔɔ, nɛ ŋñɩnɩ Sɔɔlɩ.” Anaanɩyaasɩ cosi se: “Kɩbaɣlʋ, mansɩm abalʋ ɛnʋ camɩyɛ! Ɛnʋ kpaɣnɩ ñɔ-tɔmkpɛlɩkɩyaa nɛ ɛɖʋʋ-wɛ salaka.” Ɛlɛ Yesu heyi-i se: “Wolo ɛ-cɔlɔ. Malɩzɩ-ɩ se esusi tɔm kɩbandʋ ajɛɛ sakɩyɛ.”

Anaanɩyaasɩ wobi Sɔɔlɩ cɔlɔ lɛ, eheyi-i se: “Sɔɔlɩ, mon-koobu, Yesu tiyi-m se mɔnkɔɔ nɛ monkuli ñɛ-ɛsa.” Kpaagbaa mbʋ lɛ, Sɔɔlɩ ɛsa kuli nɛ ɛpaɣzɩ naʋ. Ɛkpɛlɩkɩ Yesu yɔɔ tɔm nɛ ɛpɩsɩ ɛ-wayɩ tɩŋɩyʋ. Pamɩyɩsɩ-ɩ lɩm nɛ ɛpɩsɩ Krɩstʋ tʋ lɛ, ɛ nɛ Krɩstʋ mba lalaa papaɣzɩ tɔm susuu sinaagɔɔgɩwaa taa. Maɣzɩ nɛ ŋna ɛzɩma pɩɩɖɩɣzɩ Yuuda mba, alɩwaatʋ ndʋ panaɣaɣ Sɔɔlɩ, eɖiɣni susuu Yesu yɔɔ tɔm yɔ. Pɔyɔɔdaɣ se: “Pɩtɩkɛ abalʋ ɛnɛ ɛnazaɣnɩ Yesu tɔmkpɛlɩkɩyaa kɛ?”

Sɔɔlɩ kpaɣ pɩnzɩ 3 nɛ esusi tɔm Damaasɩ tɛtʋ taa ɛyaa. Yuuda mba paɖaɣ Sɔɔlɩ nɛ pala lɩmaɣza se pakʋʋ-ɩ. Ɛlɛ koobiya nɩɩ pa-lɩmaɣza ana a-tɔm nɛ pasɩnɩ Sɔɔlɩ nɛ ese. Paɖʋ-ɩ ɖɔkʋ nakʋyʋ taa nɛ patɩŋnɩ koloŋa pɔʋ nakʋyʋ yɔɔ nɛ petisi-i tataa.

Sɔɔlɩ wobi Yeruzalɛm lɛ, ɛñaɣ pana se ɛkatɩ peeɖe koobiya. Ɛlɛ peseɣaɣ-ɩ sɔɔndʋ. Peeɖe tɔmkpɛlɩkɩyʋ weyi payaɣ se Barnaabaasɩ yɔ, ewoni Sɔɔlɩ apostoloowaa cɔlɔ nɛ ɛñaɣ pana nɛ eyele nɛ pa-taa tɛ se toovenim taa lɛ Sɔɔlɩ lɛɣzaa. Sɔɔlɩ paɣzɩ tɔm kɩbandʋ susuu nɛ kpekpeka, ɛ nɛ ɛgbɛyɛ nɖɩ ɖɩwɛ Yeruzalɛm yɔ. Pʋwayɩ lɛ, pɔkɔɔ nɛ payaa-ɩ se Pɔɔlɩ.