Ɛzɩma Bibl kalʋʋ pɩzɩɣ nɛ pɩwazɩ-ŋ nɛ pɩkpaɖɩ?

Tʋmɩyɛ sɔsɔɖɛ naɖɩyɛ paɣzʋʋ ɖʋ-ŋ sɔɔndʋ wiɖiyi? Pɩsa nɛ ŋlabɩ-ɖɩ nɛ sɔɔndʋ ɛtaakɩlɩ-ŋ kpaʋ lɛ, ŋpɩzɩɣ nɛ ŋtayɩ tʋmɩyɛ nɖɩ ɖɩ-taa nɛ ŋlakɩ-ɖɩ pazɩ pazɩ. Mbʋ ɖɔɖɔ pɩwɛ Bibl kalʋʋ hɔɔlʋʋ taa. Pɩtɩla ŋpɔzʋʋ ña-tɩ se ɛzɩ le pɩwɛɛ se ŋpaɣzɩna. Ñʋʋ kʋnɛ kɩ-taa, ɖɩkaɣ naʋ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ñe-Bibl kalʋʋ nɛ kɩ-kpɛlɩkʋʋ labɩ-ŋ kɛlɛʋ nɛ ŋnɩɩ pi-leleŋ yɔ.

1. Ɛbɛ yɔɔ pɩwɛɛ se ɖɩkalɩɣ Bibl ɖoŋ ɖoŋ?

Ɛyʋ weyi ɛkalɩɣ Bibl yaa «Yehowa paɣtʋ» ɖoŋ ɖoŋ yɔ, ɛkaɣ wɛʋ koboyaɣ taa nɛ pɩkaɣ-ɩ ɖɔmnʋʋ camɩyɛ ɖɔɖɔ. (Kalɩ Keɣa 1:1-3.) Kajalaɣ taa lɛ, kpaɣ cɛcɛsɩ nasɩyɩ pazɩ paa evemiye nɖɩ nɛ ŋkalɩɣ Bibl. Ŋwɛɣ nɛ ŋtɩlɩɣ Bibl nɛ pɩkɩlɩɣ lɛ, ñe-Bibl kalʋʋ kaɣ-ŋ labʋ leleŋ nɛ pɩkɩlɩ.

2. Ɛbɛ pɩzɩɣ pɩsɩnɩ-ŋ nɛ ŋhiɣ wazasɩ ñe-Bibl kalʋʋ taa?

Pɩsa nɛ ɖe-Bibl kalʋʋ wazɩ-ɖʋ nɛ pɩkpaɖɩ lɛ, pɩpɔzʋʋ se ɖɩsɩŋɩɣ nɛ ɖɩmaɣzɩɣ tɔm ndʋ ɖɩkalɩɣ yɔ tɩ-yɔɔ. Pɩpɔzʋʋ se ɖɩkalɩɣ-kʋ nɛ ‘ɖɩmaɣzɩɣ kɩ-taa tɔm yɔɔ’ ɖɔɖɔ. (Yozuwee 1:8) Ŋŋkalɩɣ-kʋ lɛ, pɔzɩ ña-tɩ tɔm ɛzɩ tʋnɛ yɔ: «Ɛbɛ pɩkpɛlɩkɩɣ-m Yehowa yɔɔ? Ɛzɩma manpɩzɩɣ nɛ malabɩnɩ tɔm tʋnɛ tʋmɩyɛ me-wezuu caɣʋ taa? Ɛzɩma manpɩzɩɣ nɛ malabɩnɩ tʋmɩyɛ masɩ sɩnɛ nɛ mansɩnɩ lalaa?»

3. Ɛzɩmtaa ŋpɩzɩɣ nɛ ŋhiɣ alɩwaatʋ nɛ ŋkalɩ Bibl?

Ɛzɩ pɩwɛ-ŋ kaɖɛ se ŋhiɣ alɩwaatʋ nɛ ŋkalɩ Bibl? Mbʋ pɩwɛ ɖa-taa sakɩyɛ hɔɔlʋʋ taa. Ñaɣ pana nɛ ‘ŋlabɩnɩ ña-alɩwaatʋ tʋmɩyɛ camɩyɛ.’ (Efɛɛzɩ mba 5:16) Pɩsa nɛ ŋla mbʋ lɛ, pɩwɛɣ ɖeu se ŋlɩzɩ alɩwaatʋ natʋyʋ paa evemiye nɖɩ nɛ ŋkalɩɣ Bibl ña-tɩ yɔɔ. Nabɛyɛ ñɩnɩɣ alɩwaatʋ tanaŋ tɛɛ cu nɛ pakalɩɣ Bibl. Lalaa ñɩnɩɣ alɩwaatʋ wɩsɩ taa nɛ pakalɩɣ-kʋ, lalaa ɖɔɖɔ ñakalɩɣ-kʋ ɖoo taa pʋcɔ nɛ pahɩnɩ. Alɩwaatʋ ndʋ ñapɩzɩɣ nɛ ŋkalɩ-kʋ?

TAZƖ NƐ PILIMI

4. Kpɛlɩkɩ ɛzɩma pɩwɛɛ se ŋla nɛ ŋnɩɩ ñe-Bibl kalʋʋ leleŋ yɔ

Pɩpɩzɩɣ nɛ pɩwɛɛ-ɖʋ kaɖɛ se ɖɩpaɣzɩ Bibl kalʋʋ. Paa mbʋ yɔ, ye ɖɩpaɣzɩ Bibl kalʋʋ pazɩ pazɩ yɔ, ɖɩkɔŋ nɛ ɖɩsɔɔlɩ kɩ-kalʋʋ; pɩwɛ ɛzɩ ɛyʋ paɣzʋʋ tɔɔʋ tɔɔnaɣ kɩfalaɣ nakɛyɛ nɛ pazɩ pazɩ lɛ kɔkɔɔ nɛ kamalɩnɩ-ɩ nɛ ɛsɔɔlɩ-kɛ yɔ. Ɩkalɩ 1 Pɩyɛɛrɩ 2:2, nɛ pʋwayɩ lɛ ɩtazɩ tɔm tʋnɛ tɩ-taa:

• Ŋmaɣzɩɣ se ye ŋkalɩɣ Bibl paa evemiye nɖɩ yɔ, ŋkɔŋ nɩʋ ki-leleŋ nɛ ŋsɔɔlɩ kɩ-kalʋʋ nɛ pɩkɩlɩ?

Ɩcɔnɩ VIDEO nɛ ɩna ɛzɩma nabɛyɛ paɣzɩ Bibl kalʋʋ leleŋ nɩʋ yɔ. Pʋwayɩ lɛ, ɩtazɩ tɔm tʋnɛ tɩ-taa.

VIDEO: Piya evelisi nzɩ sɩkpɛlɩkɩ ɛzɩma sɩsɔɔlɩ Ɛsɔtɔm yɔ (5:33)

• Kala wena piya evelisi nzɩ sɩyɔɔdɩ video taa yɔ sɩwaba?

• Ɛbɛ sɩnɩ-sɩ nɛ sɩñɔɔnɩ kaɖʋwa ŋga sɩwɛna nɛ sɩkalɩɣ Bibl yɔ?

• Ɛzɩma sɩlaba nɛ Bibl kalʋʋ kɛdɩnɩ-sɩ nɛ pɩkɩlɩ?

Lɔŋ tasʋʋ mbʋ pɩpɩzɩɣ pɩsɩnɩ-ŋ nɛ ŋpaɣzɩ yɔ:

• Lɩzɩ Bibl ŋgʋ kɩ-taa palabɩnɩ tʋmɩyɛ tɔm pee wena a-tɔbʋʋ nɩʋ wɛ kɛlɛʋ yɔ. Ŋpɩzɩɣ nɛ ŋkalɩ Bibl—Ɛjaɖɛ kɩfaɖɛ tɔm ɖɛzʋʋ ye kɩwɛ ña-kʋnʋŋ taa yɔ.

• Kajalaɣ lɛ paɣzɩnɩ hɔɔlɩŋ weyi ŋmaɣzɩɣ se ɩkɛdɩnɩ-ŋ nɛ pɩkɩlɩ yɔ. Ŋpɩzɩɣ nɛ ŋkalɩ aɖakaɣ «Mbʋ pɩpɩzɩɣ pɩsɩnɩ-ŋ nɛ ŋpaɣzɩ kalʋʋ Bibl yɔ» nɛ ŋna lɔŋ tasʋʋ mbʋ pɩpɩzɩɣ nɛ pɩsɩnɩ-ŋ yɔ.

• Tɔzʋʋ mbʋ ŋtɛm kalʋʋ yɔ pɩ-yɔɔ. Labɩnɩ tʋmɩyɛ hɔɔlʋʋ «Ðenɖe ŋsɩnɩ ñe-Bibl kalʋʋ taa yɔ,» kɩwɛ takayaɣ kanɛ ka-taa.

• Labɩnɩ tʋmɩyɛ application JW Library^®. Ŋpɩzɩɣ nɛ ŋtɩŋnɩ pɔrtaabɩlɩ, taabɩlɛɛtɩ yaa wondu lɛɛtʋ yɔɔ nɛ ŋkalɩ yaa ŋwelisi JW Library yɔɔ Bibl taa tɔm paa le ŋwɛɛ yɔ.

• Labɩnɩ tʋmɩyɛ tɔm kɩsɔzɩtʋ ndʋ tɩwɛ Ɛjaɖɛ kɩfaɖɛ tɔm ɖɛzʋʋ taa yɔ. Ŋpɩzɩɣ nɛ ŋna hɔɔlʋʋ ŋgʋ kɩ-taa anjaʋwaa, aɖakasɩ nɛ Bibl taa tɔm pee tɔbʋʋ nɩʋ nɛ pɩkaɣ yebu nɛ ñe-Bibl kalʋʋ kɛdɩnɩ-ŋ nɛ pɩkɩlɩ.

5. Ñɔɔzɩ ña-tɩ pʋcɔ nɛ ŋkpɛlɩkɩ Bibl

Ɩkalɩ Keɣa 119:34, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ pɩpɔzʋʋ se ŋtɩmɩ pʋcɔ nɛ ŋkalɩ Bibl yaa pʋcɔ nɛ ŋkpɛlɩkɩ Bibl?

Ɛbɛ pɩwɛɛ se ŋla nɛ paa kpɛlɩkʋʋ alɩwaatʋ ndʋ lɛ tɩwazɩ-ŋ nɛ pɩkɩlɩ? Alɩwaatʋ ndʋ ŋñɔɔzʋʋ paa tɔm ñʋʋ ŋgʋ takayaɣ kanɛ ka-taa yɔ, ŋpɩzɩɣ nɛ ŋlabɩnɩ tʋmɩyɛ lɔŋ tasʋʋ pʋnɛ:

1. Kalɩ paa tɔm kɩkpɛlɩkɩtʋ ndʋ lɛ tɩ-tɛ kɔɔnɔɔ tayʋʋ.

2. Kalɩ masɩ nɛ ŋñaɣ pana nɛ ŋna se nɔɔ kʋɖʋmaɣ ŋga wɛ sɩ nɛ tɔm ndʋ tɩ-taa patazɩɣ yɔ pɩ-hɛkʋ taa.

3. Yʋsɩ tɔm pee wena a-tɔm cɛyaa yɔ, yaa tɔm loyisi nzɩ sicosuu tɔm pɔzʋʋ yɔɔ yɔ. Ye ŋlakɩ mbʋ yɔ, pɩkaɣ-ŋ sɩnʋʋ alɩwaatʋ ndʋ ña nɛ ña-wɩlɩyʋ ɩtazɩɣ tɔm kɩkpɛlɩkɩtʋ ndʋ tɩ-taa yɔ.

Ŋŋsɩm-tʋ?

Yehowa Aseɣɖe Tɩnaa labɩnɩ tʋmɩyɛ Biblwaa ndɩ ndɩ. Paa mbʋ yɔ ɖɩsɔɔlɩ Bibl—Ɛjaɖɛ kɩfaɖɛ tɔm ɖɛzʋʋ, mbʋ pʋyɔɔ yɔ pɛɖɛzɩ kɩ-taa tɔm ɖeyi ɖeyi nɛ pɩtʋ kpayɩ kpayɩ nɛ kɩlakɩnɩ tʋmɩyɛ Ɛsɔ hɩɖɛ.—Kalɩ intɛrnɛɛtɩ yɔɔ tɔm ñʋʋ «Yehowa Aseɣɖe Tɩnaa wɛnɩ pa-maɣmaɣ pe-Bibl?»

TOBI LƐ

Pɩsa nɛ ñe-Bibl kalʋʋ ɖʋtʋ wazɩ-ŋ nɛ pɩkɩlɩ lɛ, ñɩnɩ alɩwaatʋ nɛ ŋkalɩɣ-kʋ, tɩmɩ se Ɛsɔ ɛsɩnɩ-ŋ nɛ ŋnɩɩ kɩ-taa nɛ ŋñɔɔzɩ ña-tɩ camɩyɛ pʋcɔ nɛ kpɛlɩkʋʋ alɩwaatʋ talɩ.

Tɔm taa tazʋʋ

• Ɛbɛ pɩzɩɣ pɩsɩnɩ-ŋ nɛ Bibl wazɩ-ŋ nɛ pɩkpaɖɩ?

• Ɛzɩmtaa ŋpɩzɩɣ nɛ ŋhiɣ alɩwaatʋ nɛ ŋkalɩɣ nɛ ŋkpɛlɩkɩɣ Bibl?

• Ɛbɛ yɔɔ pɩwɛ ɖeu se ŋñɔɔzʋʋ paa kpɛlɩkʋʋ mbʋ?

WONDU LƐƐTƲ

Cuuzi lɔŋ tasʋʋ mbʋ pɩpɩzɩɣ pɩsɩnɩ-ŋ nɛ ñe-Bibl kalʋʋ wazɩ-ŋ nɛ pɩkɩlɩ yɔ pɩ-taa.

«Ɛzɩma ŋpɩzɩɣ ŋla nɛ Bibl kalʋʋ wazɩ-ŋ nɛ pɩkɩlɩ?» (Feŋuu Tilimiye No. 1 2017)

Kalɩ nɛ ŋna nʋmɔŋ naadozo weyi ɩ-yɔɔ ŋpɩzɩɣ ŋtɩŋna nɛ ŋkalɩ Bibl yɔ.

«Comment la Bible peut-elle m’aider?—1^re partie: Explore ta bible» (Intɛrnɛɛtɩ yɔɔ tɔm ñʋʋ)

Kalɩ nɛ ŋna mbʋ ŋpɩzɩɣ ŋla nɛ ŋnɩɩ Bibl kalʋʋ leleŋ yɔ.

«Comment la Bible peut-elle m’aider?—2^e partie: Rends ta lecture de la Bible agréable» (intɛrnɛɛtɩ yɔɔ tɔm ñʋʋ)

Ɛyaa nabɛyɛ paɣzɩ Bibl kalʋʋ pileɖaa; na mbʋ pɩsɩnɩ-wɛ yɔ.

Tɩ-yɔɔ kpɛlɩkʋʋ mbʋ pɩlʋlʋʋ pee kɩbana siŋŋ yɔ (2:06)