Ɩkɛ Nayaa lɛzɩŋ—Sofoniya
1. Alɩwaatʋ ndʋ taa Sofoniya pɩsɩ nayʋ? Nɛ kɩɖaʋ kɩbaŋʋ ŋgʋ ɛkɛnɩ-ɖʋ sɔnɔ?
1 Ðɩwɛ pɩnaɣ 750 P.D.A., nɛ Baalɩ sɛtʋ wɛ Yuda ɛjaɖɛ taa mbʋ. Pakʋʋ wiyaʋ kɩdɛkɛdʋ Amooni yɔ pitileɖita, nɛ lɛɛlɛɛyɔ lɛ, pɩɣa evelaɣ Yoziyaasɩ pɩsɩnɩ wiyaʋ. (4 Aw. 33:21–34:1) Alɩwaatʋ ndʋ tɩ-taa, Yehowa tiyi Sofoniya se esusi ɛ-tɔm hʋʋ kɩyakʋ. Paa Sofoniya ɛɛkɛ Yuda wiyaʋ ɖɩɣa taa tʋ nɔɔyʋ yɔ, ɛtɩca lɩm Yehowa tɔm ndʋ eheyi Yuda ñʋndɩnaa yɔ tɩ-taa. (Sof. 1:1; 3:1-4) Sɔnɔ, ɖa ɖɔɖɔ ɖɩñakɩ pana se ɖɩwɛɛnɩ abalɩtʋ ɛzɩ Sofoniya yɔ. Ðiiyeki se taabalɩyɛ nɖɩ ɖɩwɛ ɖa nɛ ɖɔ-hɔʋ taa mba ɖɛ-hɛkʋ taa yɔ, ɖɩwɛɛnɩ ɖoŋ kɩdɛkɛdɩŋ ɖɛ-Ɛsɔ sɛtʋ yɔɔ. (Mat. 10:34-37) Tɔm ndʋ Sofoniya susaa nɛ pee wena pɩlʋlaa?
2. Ɛbɛ pɩwɛɛ se ɖɩla nɛ ɖihiɣ ñʋʋ yabʋ Yehowa pana kɩyakʋ wiye?
2 Ñɩnɩ Yehowa: Yehowa yeke pɩzɩɣnɩ nɛ ɛya ɛyʋ ñʋʋ ɛ-pana kɩyakʋ wiye. Pʋyɔɔ Sofoniya seɣti Yuda mba se pañɩnɩ Yehowa, pañɩnɩ siɣsiɣ wɛtʋ nɛ pañɩnɩ tɩ luzuu kpɛdɛyɛ pʋcɔ nɛ kɩyakʋ ŋgʋ kɩtalɩ. (Sof. 2:2, 3) Mbʋ pɩwɛ ɖa-alɩwaatʋ taa ɖɔɖɔ. Ɛzɩ Sofoniya yɔ, ɖiseɣtiɣ lalaa se pañɩnɩ Yehowa, ɛlɛ ɖa-maɣmaɣ ɖɔɖɔ pʋmʋnaa se ɖɩñaɣ pana, nɛ ɖɩtaakɛ ɛyaa “mba pahaɣ Kɩbaɣlʋ siɣye yɔ.” (Sof. 1:6) Ye ɖɩkpɛlɩkɩɣ Yehowa tɔm nɛ ɖɩpɔzʋʋ-ɩ adɩma taa se ɛwɩlɩ-ɖʋ nʋmɔʋ yɔ, pʋbʋ lɛ ɖɩwɛɛ nɛ ɖɩñɩnɩɣ Yehowa lɛ. Ye ɖɩcakɩ wezuu kɩbaŋʋ yɔ, ɖɩwɩlɩɣ se ɖɩñɩnɩɣ siɣsiɣ wɛtʋ. Nɛ ye ɖiluzuu ɖa-tɩ nɛ ɖɩɖɔŋ nʋmɔʋ ŋgʋ Yehowa ɛgbɛyɛ wɩlɩɣ-ɖʋ yɔ kɩ-taa yɔ, ɖɩwɩlɩɣ se ɖɩñɩnɩɣ tɩ luzuu.
3. Ɛbɛ yɔɔ pɩwɛɛ se ɖɩwɛɛnɩ lɩmaɣza kɩbana tɔm susuu taa?
3 Pee kɩbana: Sofoniya susaɣ tɔm hʋʋ kɩyakʋ ŋgʋ yɔ, kɩ-tɔm tukuni Yuda mba cabɩ ɛzɩ awumbiya taa nabɛyɛ nɛ kɔzɩ kɔzɩ Yoziyaasɩ weyi ɛɛpaɣzɩ Yehowa ñɩnʋʋ ɛ-pɩjatʋ taa yɔ. Pʋwayɩ lɛ, ɛpaɣzɩ yɔkʋʋ sɩʋ kpelisi nzɩ sɩɩwɛ ɛjaɖɛ taa yɔ. (4 Aw. 34:2-5) Sɔnɔ paa Kewiyaɣ ɖomaɣ nakɛyɛ ɛtɔlʋʋ nʋmɔʋ nɔɔ, yaa putowee taa, yaa sɔɔ hɛkʋ taa yɔ, nakɛyɛ ɖɔɖɔ tɔlʋʋ tɛtʋ kɩbandʋ yɔɔ nɛ kalʋlɩ pee sakɩyɛ. (Mat. 13:18-23) Ðɩtaɣ liu se ye ɖɩkaŋ ñʋʋ nɛ Kewiyaɣ tɔm susuu yɔ, Yehowa kaɣ wazʋʋ ɖa-pana ñaɣʋ yɔɔ.—Keɣa 125:6.
4. Ɛbɛ yɔɔ pʋmʋnaa se ‘ɖɩɖaŋ Yehowa’?
4 Yuda mba nabɛyɛ maɣzaɣ se Yehowa ɛɛkaɣ nabʋyʋ labʋ kpa. Ɛlɛ ɛɛtɛm niye ñɩɣʋ se ɛ-kɩyakʋ sɔsɔʋ ñɔtɩ kpam. (Sof. 1:12, 14) Mba paamɛlɩ Yehowa tɛɛ yɔ, pe-yeke pehiɣni ñʋʋ yabʋ (Sof. 3:12, 17) Ye ‘ɖɩɖaŋ Yehowa’ yɔ, ɖɩkaɣ hiɣu taa leleŋ nɛ ɖa nɛ ɖo-koobiya kpeekpe ɖɩsɛɛ-ɩ nɔɔ kʋyʋmaɣ taa!—Sof. 3:8, 9.