Labɩnɩ ña-alɩwaatʋ tʋmɩyɛ tɔm susuu taa camɩyɛ
Yehowa Aseɣɖe Tɩnaa kpaɣ ñɩɣtʋ 1945487604 nɛ posusuni tɔm 2014 tɛ teokrasɩ pɩnaɣ taa. Pʋnɛ pɩwɩlɩɣ kpayɩ se pɛtɛm pa-taa se paakaɣ yebu Yehowa tʋmɩyɛ labʋ kpa. (Keɣa 110:3, NW; 1 Kɔr. 15:58) ‘Alɩwaatʋ ndʋ tɩkazaa yɔ, tɩtɩɖɔɔ;’ ye mbʋ pɩcɛyaa se ɖɩkpaɣ alɩwaatʋ ndʋ ɖisusuuni tɔm yɔ nɛ ɖɩñaɣ pana nɛ ɖɩkatɩ ɛyaa sakɩyɛ.—1 Kɔr. 7:29.
Ye ɖɩñɩnɩɣ se ɖɩlabɩnɩ ɖa-alɩwaatʋ tʋmɩyɛ camɩyɛ tɔm susuu taa yɔ, pɩwɛɛ se ɖɩtɩlɩ lɛɣzʋʋ. Ye ŋkpakɩɣ ñɩɣyʋʋ kʋyʋmʋʋ mbʋ yɔ nɛ ŋlakɩnɩ tʋmɩyɛ tɔm susuu hɔɔlʋʋ nakʋyʋ taa ɛlɛ ŋŋkatɩɣ nɔɔyʋ yɔ, ŋpɩzɩɣ nɛ ŋlɛɣzɩ ɖʋtʋ nɛ pɩsɩnɩ-ŋ nɛ ŋkatɩ yaa ŋyɔɔdɩnɩ ɛyaa sakɩyɛ nɛ pɩkɩlɩ? Paa lone nɖɩ lɛ, ɖɩ nɛ ɖɩ-wɛtʋ. Paa mbʋ yɔ, lɔŋ tasʋʋ mbʋ pɩkɔŋ yɔ, pɩkaɣ-ŋ sɩnʋʋ nɛ ŋlabɩnɩ ña-alɩwaatʋ tʋmɩyɛ camɩyɛ nɛ ‘ŋtaala tanaʋ.’—1 Kɔr. 9:26.
Kpaɣ ɖɩɣa nɛ ŋwolo ɖɩɣa aseɣɖe lɩzʋʋ: Pɩlakɩ pɩnzɩ sakɩyɛ yɔ, koobiya paɣzɩɣ pɔ-tɔm susuu tʋmɩyɛ nɛ kpaɣ ɖɩɣa nɛ ŋwolo ɖɩɣa. Ɛyaa sakɩyɛ lakɩ tʋmɩyɛ wɩsɩ taa, ye mbʋ nabʋyʋ taa ye ɖɩlɩzɩɣ aseɣɖe kpaɣ ɖɩɣa nɛ ŋwolo ɖɩɣa wɩsɩ wɛlʋʋ yaa wɩsɩ ɖʋʋ alɩwaatʋ taa yɔ, pɩɩkɩlɩɣ ɖeu na? Alɩwaatʋ ndʋ tɩ-taa lɛ, ɛyaa sakɩyɛ wɛɣ pa-ɖɩsɩ kaalɛyɩtʋ. Wɩsɩ taa lɛ, habɩyɛ yɔɔ yaa tʋma taa aseɣɖe lɩzʋʋ pɩzɩɣ nɛ pɩlʋlɩ pee nɛ pɩkɩlɩ.
Samaɣ taa tɔm susuu: Pʋmʋnaa se pasɩɩ taabɩlɩnaa nɛ tɔm susuu wondu lɛɛtʋ lona wena a-taa ɛyaa sakɩyɛ ɖɔŋ yɔ; ɛlɛ pɩkɛ mɩ-ɛgbɛyɛ kooka taa. (Cɔnɩ juillet 2013 tɛ Kewiyaɣ Ɛsɔ Sɛtʋ Tʋmɩyɛ takayaɣ, h. 5) Ye ɛyaa sakɩyɛ ɩɩtasɩɣ ɖɔm lone nɖɩ palɩzaa yɔ ɖɩ-taa ɖoŋ ɖoŋ yɔ, ɛgbɛyɛ taa Ɛsɔ sɛtʋ kɔɔmiite pɩzɩɣ nɛ kɩkpaɣ lɩmaɣza se pɛlɛɣzɩ taabɩlɩnaa yaa tɔm susuu wondu lɛɛtʋ lone; nɛ pasɩɩ ɖenɖe ɛyaa sakɩyɛ ɖɔŋ yɔ.
Pɩsɩ nɛ ŋna-ɩ waa nɛ Bibl kpɛlɩkɩyaa: Ye pɩlakɩ yɔ, pɩɩwɛɣ ɖeu se ŋkpaɣ alɩwaatʋ ndʋ paapɩzɩɣ se palabɩnɩ tɔm susuu hɔɔlɩŋ lɛɛŋ taa tʋmɩyɛ nɛ pɩlʋlɩ pee yɔ nɛ ŋlabɩnɩ pɩsɩ nɛ ŋna-ɩ waa yaa ŋkpɛlɩkɩnɩ ɛyaa Bibl? Ye pɩwɛɛ se mazasɩ tanamɩŋ tɛɛ palakɩ kpaɣ ɖɩɣa nɛ ŋwolo ɖɩɣa nɛ pɩlʋlʋʋ pee camɩyɛ yɔ, pɩɩkɩlɩɣ ɖeu se ŋwolo ñe-Bibl kpɛlɩkɩyaa cɔlɔ mazaɣ wɩsɩ wɛlʋʋ yaa ɖanaɣ yɔɔ? Mba pɛwɛnɩ pɩsɩ nɛ ŋna-ɩ waa hɔɔlʋʋ kʋyʋmʋʋ taa yɔ, papɩzɩɣ nɛ panɩnɩ ɖama nɛ powolo.
Toovenim ɖɩpaɣzɩɣ tɔm susuu lɛ, ɖɩpaɣzɩɣ alɩwaatʋ kalʋʋ; ɛlɛ ɖɔ-tɔm susuu ɛlʋlʋʋ pee yɔ, pɩlakɩ-ɖʋ leleŋ nɛ pɩkɩlɩ. Ye ŋnawa se tɔm susuu hɔɔlʋʋ nakʋyʋ ɛɛlʋlʋʋ pee alɩwaatʋ natʋyʋ taa yɔ, lɛɣzɩ hɔɔlʋʋ lɛɛkʋ. Tɩmnɩ “hayɩm tʋ” Yehowa se ɛwɩlɩɣ nʋmɔʋ nɛ ŋpɩzɩ nɛ ŋlabɩnɩ ña-alɩwaatʋ tʋmɩyɛ tɔm susuu taa camɩyɛ!—Mat 9:38.