CAƔ WEZUU ƐZƖ KRƖSTƲ TƲ YƆ
Ɛzɩma pɩwɛɛ se ɖɩlabɩnɩ tʋmɩyɛ Bibl kpɛlɩkʋʋ tɛ videowaa?
Ðɩwɛnɩ Bibl kpɛlɩkʋʋ tɛ videowaa naanza mba ɖɩlakɩnɩ tʋmɩyɛ tɔm susuu taa yɔ. Lɩmaɣzɩyɛ nɖɩ yɔɔ palɩzɩ paa video ŋgʋ?
Ɛbɛ yɔɔ pɩwɛɛ se ɛyʋ ɛkpɛlɩkɩ Bibl?—Kɩɖaɣlʋʋ. Kiyeki se ɛyaa liŋ tɛɛ ɩkɔtɩnɩ Bibl taa tɔm paa Ɛsɔ sɛtʋ ɛgbɛyɛ nɖɩ taa pɛwɛɛ yɔ. Kiseɣtiɣ mba pɔcɔŋnɩ-kʋ yɔ se pañɩnɩ tɔm ndʋ pɔpɔzʋʋ pa-tɩ wezuu caɣʋ yɔɔ yɔ, tɩ-yɔɔ cosuu Bibl taa; nɛ kɩyɔɔdʋʋ ɖɔɖɔ tɔm ndʋ ɛyaa pɔzʋʋ pa-tɩ ɖoŋ ɖoŋ yɔ, tɩ-taa natʋyʋ tɔm. Kɩwɩlɩɣ mbʋ pʋyɔɔ pɩwɛɛ se ɛyʋ ɛpɔzɩ nɛ pɛkpɛlɩkɩnɩ-ɩ Bibl yɔ.
Ɛbɛ yɔɔ pɩwɛɛ se ɛyʋ ɛkpɛlɩkɩ Bibl? (ŋgʋ kɩtɩɖaɣlɩ yɔ). Kɩ-taa tɔm nɩɣzɩnɩ tɔm ndʋ tɩwɛ kɩɖaɣlʋʋ taa yɔ. Ɛlɛ kɩtɩɖaɣlɩ. Papɩzɩɣ nɛ palabɩnɩ-kʋ tʋmɩyɛ camɩyɛ lona wena a-taa ɛyaa fɛyɩnɩ alɩwaatʋ yɔ.
Ɛzɩma ɖɩkpɛlɩkɩɣnɩ ɛyaa Bibl?. Kiyeki se ɛyaa liŋ tɛɛ ɩkɔtɩnɩ ɖʋtʋ ndʋ ɖɩlaba nɛ ɖɩkpɛlɩkɩɣnɩ ɛyaa Bibl falaa yɔ. Kicosuu ɖɔɖɔ tɔm ndʋ ɛyaa pɔzʋʋ ɖoŋ ɖoŋ Bibl kpɛlɩkʋʋ yɔɔ yɔ tɩ-yɔɔ. Tɔm ndʋ tɩ-taa natʋyʋ lɛ ɛzɩma ɛyʋ pɩzɩɣ nɛ ɛpɔzɩ se pɛkpɛlɩkɩnɩ-ɩ Bibl yɔ.
Pɩkɛdɩnɩ-ɖʋ se ŋsɔɔlaa se ŋkpɛlɩkɩ Bibl. Palɩzɩ-kʋ se pawɩlɩ-kʋ Bibl kpɛlɩkɩyaa. Paa paɖʋ video ŋgʋ Nɩɩ wezuu leleŋ tam! takayaɣ hɔɔlʋʋ naalɛ ñɩŋgʋ yɔɔ yɔ, papɩzɩɣ nɛ pawɩlɩ-kʋ alɩwaatʋ ndʋ pɛkpɛlɩkɩɣ Nɩɩ wezuu leleŋ tam! hatʋ cabɩ takayaɣ yɔ. Video taa, pɔyɔɔdɩ tɔm ndʋ tɩwɛ takayaɣ taa yɔ nɛ mbʋ Bibl kpɛlɩkɩyʋ kaɣ kpɛlɩkʋʋ ka-taa yɔ pɩ-tɔm.
Paa kaɖʋwa nakɛyɛ yɔɔ palɩzɩ paa video ŋgʋ yɔ, ɖɩpɩzɩɣ nɛ ɖɩwɩlɩ-wɛ yaa ɖitiyini-wɛ ɛyaa alɩwaatʋ lɛɛtʋ yɔɔ ye pɩmʋnaa yɔ. Peseɣtiɣ tɔm susuyaa se pañaɣ pana nɛ patɩlɩ videowaa mba pa-taa tɔm camɩyɛ nɛ palabɩnɩ-wɛ ɖɔɖɔ tʋmɩyɛ camɩyɛ tɔm susuu taa.