Wolo pɩ-yɔɔ nɛ ‘ŋsuu ɛyʋtʋ kɩfatʋ’ ña-lɩm mɩyɩsʋʋ wayɩ

1. Ɛbɛ wɛnɩ ɖoŋ siŋŋ ɖɛ-ɛyʋtʋ yɔɔ?

Pamɩyɩsʋʋ-ɖʋ lɩm yɔ, paa pɩlabɩ kɩyakɩŋ pazɩ yaa pɩnzɩ sakɩyɛ yɔ, ɖa-tɩŋa payɩ ɖɩsɔɔlaa se ɖɩwɛɛnɩ ɛyʋtʋ ndʋ Yehowa sɔɔlaa yɔ. Pɩsa nɛ ɖɩwɛɛnɩ ɛyʋtʋ ndʋ lɛ, pɩpɔzʋʋ se ɖɩcɔnɩ ɖa-maɣzɩm yɔɔ. Ɛbɛ yɔɔ? Mbʋ pʋyɔɔ yɔ, maɣzɩm mbʋ ɖɩwɛna yɔ, pɩwɛnɩ ɖoŋ siŋŋ ɖɛ-ɛyʋtʋ yɔɔ. Ye ɖɩmaɣzɩɣ mbʋ ɖo-tomnaɣ kɔɖɛyɩ tuyuu-ɖʋ se ɖɩla yɔ pɩ-yɔɔ ɖoŋ ɖoŋ yɔ, ɖɩkaɣ yɔɔdʋʋ tɔm kɩdɛkɛdɩtʋ nɛ ɖɩla mbʋ pɩfɛyɩ ɖeu yɔ. (Efɛz. 4:17-19) Ɛlɛ, ye ɖɩmaɣzɩɣ mbʋ pɩwɛ ɖeu yɔ pɩ-yɔɔ yɔ, pɩtʋʋ fɛyɩ se ɖɩkaɣ yɔɔdʋʋ tɔm kɩbandʋ nɛ ɖɩla lakasɩ nzɩ sɩkɛdɩɣnɩ Yehowa, ɖa-Caa weyi ɛwɛ ɛsɔdaa yɔ.—Gal. 5:16.

2. Tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

² Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, ɖɩɩpɩzɩɣ nɛ ɖɩɖɩɣ nʋmɔʋ lɩmaɣza kɩdɛkɛda tɩŋa se ataasʋʋ ɖa-maɣzɩm taa. Ɛlɛ, ɖɩpɩzɩɣ nɛ ɖɩlɩzɩ se ɖɩɩlakɩnɩ tʋmɩyɛ lɩmaɣza ana. Pʋcɔ nɛ ɖɩha ɖa-tɩ nɛ pamɩyɩsɩ-ɖʋ lɩm lɛ, pɩpɔzʋʋ se ɖikizi yɔɔdaɣ nɛ lakasɩ nzɩ Yehowa paɖɩɣ yɔ. Pɩsa nɛ ɖɩhɔzɩ ɛyʋtʋ kɩbɩndʋ lɛ, nɩŋgbaŋaɣ ŋga pɩpɔzʋʋ se ɖɩkpɛzɩ kajalaɣ ɖeɖe; nɛ kɔ-tɔm kɩlɩnɩ cɛyʋʋ. Ɛlɛ, pɩsa nɛ ɖɔ-tɔm kɛdɩnɩ Yehowa camɩyɛ lɛ, pɩpɔzʋʋ ɖɔɖɔ se ɖɩña paɣtʋ tʋnɛ: “Isuu ɛyʋtʋ kɩfatʋ.” (Kol. 3:10) Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ pʋnɛ pɩ-yɔɔ: Ɛbɛ “ɛyʋtʋ kɩfatʋ” kɛnaa? Ɛzɩma ɖɩpɩzɩɣ nɛ ɖisuu ɛyʋtʋ kɩfatʋ nɛ tɩwɛɛ ɖɔ-yɔɔ tam?

ƐBƐ “ƐYƲTƲ KƖFATƲ” KƐNAA?

3. (a) Ɛzɩ Galaatii mba 5:22, 23 yɔɔdʋʋ yɔ, ɛbɛ “ɛyʋtʋ kɩfatʋ” kɛnaa? (b) Nɛ ɛzɩma ɛyʋ pɩzɩɣ nɛ esuu ɛyʋtʋ kɩfatʋ?

³ Ɛyʋ weyi ɛwɛnɩ “ɛyʋtʋ kɩfatʋ” yɔ, ɛmaɣzɩɣnɩ Yehowa. Ye pɔtɔm se ɛyʋ su ɛyʋtʋ kɩfatʋ yɔ, pɩwɩlɩɣ se ɛwɛnɩ piye nɖɩ Ɛsɔ fezuu lʋlʋʋ yɔ, nɛ ɛhaɣ waɖɛ fezuu kiɖeɖeu se kɩwɛɛnɩ ɖoŋ ɛ-maɣzɩm, ɛzɩma pɩlakɩ-ɩ yɔ nɛ ɛ-lakasɩ yɔɔ. (Kalɩ Galaatii mba 5:22, 23.) Ɛsɔɔlʋʋ Yehowa nɛ Yehowa samaɣ. (Mat. 22:36-39) Ɛyʋ ɛnʋ ɛwɛɣ taa leleŋ taa, halɩ pɩkpɛndɩnɩ alɩwaatʋ ndʋ ɛkatɩɣ kala yɔ. (Yak. 1:2-4) Ɛkɛ laŋhɛzɩyɛ ñɩnɩyʋ. (Mat. 5:9) Ɛwɛɣ suuɖu nɛ ɛlakɩ ɛyaa lalaa camɩyɛ lakasɩ. (Kol. 3:13) Ɛsɔɔlʋʋ kɩbandʋ labʋ. (Luka 6:35) Ɛtɩŋɩɣnɩ ɛ-lakasɩ yɔɔ nɛ ɛwɩlɩɣ se ɛwɛnɩ tisuu siŋŋ ɛ-Caa weyi ɛwɛ ɛsɔdaa yɔ ɛ-yɔɔ. (Yak. 2:18) Alɩwaatʋ ndʋ ɛyaa lalaa caɣ-ɩ tɔm yaa paɖʋʋ-ɩ ɖɩwɩzɩyɛ yɔ, ɛwɛɣnɩ hɛɛɛ wɛtʋ nɛ ɛɖɔkʋʋ ɛ-tɩ alɩwaatʋ ndʋ pɩtakɩɣ-ɩ yɔ.—1 Kɔr. 9:25, 27; Tiiti 3:2.

4. Pɩsa nɛ ɖisuu ɛyʋtʋ kɩfatʋ lɛ, ɛbɛ yɔɔ pɩpɔzʋʋ se ɖɩwɛɛnɩ wɛtʋ kɩbandʋ ndʋ tɩ-tɔm pɔyɔɔdɩ Galaatii mba 5:22, 23 taa yɔ tɩ-tɩŋa nɛ wɛtʋ kɩbandʋ lɛɛtʋ ndʋ tɩ-tɔm pɔyɔɔdɩ Bibl hɔɔlɩŋ lɛɛŋ taa yɔ?

⁴ Pɩsa nɛ ɖisuu ɛyʋtʋ kɩfatʋ lɛ, pɩpɔzʋʋ se ɖɩñaɣ pana nɛ ɖɩwɛɛnɩ wɛtʋ kɩbandʋ ndʋ tɩ-tɔm pɔyɔɔdɩ Galaatii mba 5:22, 23 taa yɔ tɩ-tɩŋa, nɛ ɖɩwɛɛnɩ ɖɔɖɔ wɛtʋ kɩbandʋ lɛɛtʋ ndʋ tɩ-tɔm pɔyɔɔdɩ Bibl hɔɔlɩŋ lɛɛŋ taa yɔ.b Wɛtʋ kɩbandʋ ndʋ, tɩfɛyɩ ɛzɩ wondu kususutu ndɩ ndɩ ndʋ ɖisuu nɛ ɖɩlɛɣzɩɣ yɔ. Toovenim taa lɛ, wɛtʋ kɩbandʋ ndʋ tɩ-tɔm pɔyɔɔdɩ Galaatii mba 5:22, 23 taa yɔ, tɩ-taa sakɩyɛ nɩɣzɩnɩ wɛtʋ kɩbandʋ lɛɛtʋ ndʋ tɩ-tɔm pɔyɔɔdɩ Bibl hɔɔlɩŋ lɛɛŋ taa yɔ. Kɩɖaʋ nakʋyʋ yɔ: Ye ŋsɔɔlɩ ño-koobu toovenim taa yɔ, ŋkaɣ wɛʋ suuɖu nɛ ŋlabɩ-ɩ camɩyɛ lakasɩ. Nɛ pɩsa nɛ ŋla kɩbandʋ toovenim taa lɛ, pɩpɔzʋʋ se ŋwɛɛnɩ hɛɛɛ wɛtʋ nɛ tɩ ɖɔkʋʋ.

ƐZƖMA ÐƖPƖZƖƔ NƐ ÐISUU ƐYƲTƲ KƖFATƲ?

5. (a) Ye pɔtɔm se ɖɩwɛɛnɩ “Krɩstʋ maɣzɩm” yɔ, pʋ-tɔbʋʋ lɛ suwe? (b) Nɛ ɛbɛ yɔɔ pɩpɔzʋʋ se ɖɩkpɛlɩkɩ Yesu wezuu caɣʋ tɔm? (1 Kɔrɛntɩ mba 2:16)

⁵ Kalɩ 1 Kɔrɛntɩ mba 2:16. Pɩsa nɛ ɖisuu ɛyʋtʋ kɩfatʋ lɛ, pɩwɛɛ se ɖɩwɛɛnɩ “Krɩstʋ maɣzɩm.” Pʋ-tɔbʋʋ lɛ se pɩwɛɛ se ɖɩkpɛlɩkɩ ɛzɩma Krɩstʋ maɣzɩɣ yɔ, nɛ pʋwayɩ lɛ ɖɩmaɣzɩnɩ-ɩ. Yesu lɩzɩ piye nɖɩ Ɛsɔ fezuu lʋlʋʋ yɔ ɖɩ-hɔɔlɩŋ tɩŋa nɛ ɛwɩlɩ nɛ pɩtalɩ pilim. Ɛzɩ ñɩnʋʋ ŋgʋ kɩ-taa naɣ kpayɩ kpayɩ yɔ, ɛlɩzɩ Yehowa wɛtʋ kɩbandʋ nɛ ɛwɩlɩ ɖeyi ɖeyi ɛzɩ tɩwɛʋ yɔ. (Ebr. 1:3) Ðɩwɛɣ nɛ ɖɩmaɣzɩɣ ɛzɩ Yesu yɔ nɛ pɩkɩlɩɣ lɛ, ɖɩkaɣ labʋ ɛzɩ ɛɛlabʋ yɔ nɛ pɩkɩlɩ nɛ ɖɩkaɣ maɣzɩnʋʋ ɛ-ɛyʋtʋ camɩyɛ nɛ pɩkɩlɩ.—Fil. 2:5.

6. Alɩwaatʋ ndʋ ɖɩwɛɣ nɛ ɖɩñakɩ pana se ɖisuu ɛyʋtʋ kɩfatʋ yɔ, toovenim tɔm ndʋ yɔɔ pɩwɛɛ se ɖɩtɔzɩ?

⁶ Ɛzɩ toovenim taa lɛ, ɖɩpɩzɩɣ nɛ ɖɩmaɣzɩnɩ Yesu kɩɖaʋ na? Pɩtɩla ɖɩmaɣzɩɣ se: ‘Yesu lɛ, ɛtalɩ pilim. Maakaɣ pɩzʋʋ nɛ mɛwɛɛ ɛzɩ ɛnʋ yɔ kaaʋ!’ Ye mbʋ ŋmaɣzɩɣ yɔ, tɔzɩ toovenim tɔm tʋnɛ tɩ-yɔɔ: Kajalaɣ lɛ, palɩzɩ-ŋ nɛ ŋkɛ Yehowa nɛ Yesu pɛ-lɛzʋʋ. Pʋyɔɔ lɛ, ŋpɩzɩɣ nɛ ŋlɩzɩ se ŋmaɣzɩɣnɩ-wɛ nɛ ŋpɩzɩɣ nɛ ŋwɛɛ ɛzɩ mba yɔ, paa ŋŋpɩzɩɣ se ŋla mbʋ nɛ pɩtalɩ pilim yɔ. (Kiɖe 1:26) Nabʋlɛ lɛ, Ɛsɔ fezuu kiɖeɖeu kɛnɩ ɖoŋ weyi ɩkpaɖaa yɔ kedeŋa kpeekpe yɔɔ. Fezuu ŋgʋ, kɩpɩzɩɣ kɩsɩnɩ-ŋ nɛ ŋla mbʋ ŋŋpɩzɩɣ nɛ ŋla ña-maɣmaɣ ño-ɖoŋ taa kaaʋ yɔ. Nabudozo lɛ, Yehowa ɛɛɖaŋɩɣ se ŋlɩzɩ piye nɖɩ fezuu lʋlʋʋ yɔ ɖɩ-hɔɔlɩŋ tɩŋa nɛ ŋwɩlɩ nɛ pɩtalɩ pilim lɛɛlɛɛyɔ. Toovenim taa lɛ, ɖa-Caa kʋsɔɔlʋ kaɣ haʋ ɛyaa mba pɛwɛnɩ lidaʋ se pakaɣ caɣʋ tɛtʋ yɔɔ yɔ pɩnzɩ 1000 se patalɩ pilim. (Natʋ 20:1-3) Mbʋ Yehowa pɔzʋʋ-ɖʋ lɛɛlɛɛyɔ yɔ mbʋ yɔ: ɖɩla ɖo-ɖoŋ ɖeɖe nɛ ɖɩtaa-ɩ liu se ɛsɩnɩ-ɖʋ.

7. Ɛbɛ ɖɩkaɣ naʋ lɛɛlɛɛyɔ?

⁷ Ɛzɩma ɖeyi ɖeyi ɖɩpɩzɩɣ nɛ ɖɩmaɣzɩnɩ Yesu? Ðɩkaɣ tazʋʋ piye nɖɩ Ɛsɔ fezuu lʋlʋʋ yɔ ɖɩ-hɔɔlɩŋ naanza taa pazɩ. Paa hɔɔlʋʋ ŋgʋ kɩ-taa lɛ, ɖɩkaɣ naʋ ɛzɩma Yesu lɩzɩ wɛtʋ ndʋ nɛ ɛwɩlɩ yɔ nɛ lɔŋ weyi ɖɩpɩzɩɣ nɛ ɖɩkpɛlɩkɩ pɩ-taa yɔ. Ðɩɩlakɩ mbʋ lɛ, ɖɩkaɣ tazʋʋ tɔm pɔzʋʋ nabʋyʋ taa. Tɔm pɔzʋʋ mbʋ, pɩpɩzɩɣ pɩsɩnɩ-ɖʋ nɛ ɖɩna ɛzɩma ɖɩwɛɛnɩ ɛyʋtʋ kɩfatʋ nɛ pɩkɩlɩ yɔ.

8. Ɛzɩma Yesu lɩzɩ sɔɔlɩm nɛ ɛwɩlɩ?

⁸ Yesu sɔɔlɩ ɛ-Caa Yehowa siŋŋ; mbʋ tuyini-i nɛ ɛlaa kɩlaŋ ɛ-yɔɔ nɛ ɛtɛ ɛlaa kɩlaŋ ɖɔ-yɔɔ. (Yoh. 14:31; 15:13) Yesu tɩŋnɩ wezuu ŋgʋ ɛcaɣ tɛtʋ yɔɔ yɔ kɩ-yɔɔ nɛ ɛwɩlɩ se ɛsɔɔlɩ ɛyaa siŋŋ. Paa evemiye nɖɩ, ɛsɔɔlɩ ɛyaa nɛ ɛnaɣ pa-pʋtɔdɩyɛ, halɩ pɩkpɛndɩnɩ alɩwaatʋ ndʋ nabɛyɛ kaɖaɣnɩ-ɩ yɔ. Nʋmɔʋ sɔsɔʋ ŋgʋ kɩ-yɔɔ ɛtɩŋnaa nɛ ɛwɩlɩ ɛyaa sɔɔlɩm yɔ ŋgʋ lɛ se ɛwɩlɩ-wɛ Ɛsɔ Kewiyaɣ yɔɔ tɔm. (Luka 4:43, 44) Yesu wɩlaa ɖɔɖɔ se ɛwɛnɩ sɔɔlɩm mbʋ pɩ-taa piɖeni men-ɖeke wɛtʋ fɛyɩ yɔ. Ɛwɩlɩ-pʋ Ɛsɔ nɛ ɛyaa nɛ etisi faaa nɛ ɛtɔɔ kʋñɔŋ nɛ ɛsɩ kɩwɛɛkɩm laɖaa nesi taa. Ɛlabɩ mbʋ nɛ ɛha ɖa-tɩŋa payɩ waɖɛ se ɖihiɣ wezuu maatɛŋ.

9. Ɛzɩma ɖɩpɩzɩɣ nɛ ɖɩlɩzɩ sɔɔlɩm nɛ ɖɩwɩlɩ ɛyaa lalaa ɛzɩ Yesu labʋ yɔ?

⁹ Ðɩha ɖa-tɩ ɖa-Caa Yehowa weyi ɛwɛ ɛsɔdaa yɔ nɛ pamɩyɩsɩ-ɖʋ lɩm mbʋ pʋyɔɔ yɔ, ɖɩsɔɔlɩ-ɩ. Ye mbʋ, ɛzɩ Yesu yɔ, pɩpɔzʋʋ se ɖɩtɩŋnɩ wɛtʋ ndʋ ɖɩwɛnɩ ɛyaa lalaa yɔɔ yɔ tɩ-yɔɔ nɛ ɖɩwɩlɩ se ɖɩsɔɔlɩ Yehowa. Apostoloo Yohanɛɛsɩ mawa se: “Weyi ɛɛsɔɔlʋʋ e-koobu weyi ɛnaɣ-ɩ yɔ, ɛɛpɩzɩɣ nɛ ɛsɔɔlɩ Ɛsɔ weyi ɛɛnaɣ-ɩ yɔ.” (1 Yoh. 4:20) Ðɩpɩzɩɣ nɛ ɖɩpɔzɩ ɖa-tɩ se: ‘Mɔnsɔɔlɩ ɛyaa siŋŋ na? Manaɣ ɛyaa lalaa pʋtɔdɩyɛ, paa pɛfɛyɩnɩ wɛtʋ kɩbandʋ mɔ-yɔɔ yɔ? Sɔɔlɩm seɣtiɣ-m se malabɩnɩ tʋmɩyɛ ma-alɩwaatʋ nɛ ma-ñɩm nɛ mansɩnɩ lalaa nɛ pɛkpɛlɩkɩ Yehowa tɔm na? Mɔnsɔɔlɩ faaa se mala mbʋ, halɩ pɩkpɛndɩnɩ alɩwaatʋ ndʋ ɛyaa hɔɔlʋʋ sɔsɔʋ fɛyɩnɩ ɛsɩmɩyɛ man-pana ñaɣʋ yɔɔ yaa alɩwaatʋ ndʋ pakaɖɩɣnɩ-m yɔ? Manpɩzɩɣ mankpaɣ alɩwaatʋ nɛ pɩkɩlɩ nɛ manɖʋ nesi kpɛlɩkɩyaa labʋ tʋmɩyɛ na?’—Efɛz. 5:15, 16.

10. Ɛzɩma tɩyɛ Yesu wɩlaa se ɛkɛ laŋhɛzɩyɛ ñɩnɩyʋ?

¹⁰ Yesu kaakɛ laŋhɛzɩyɛ ñɩnɩyʋ. Alɩwaatʋ ndʋ ɛyaa labɩ-ɩ kɩdɛkɛdɩm yɔ, ɛtɩhɛyɩ-wɛ kɩdɛkɛdɩm kɩdɛkɛdɩm lone taa. Ɛlɛ, ɛɛlaba nɛ pɩcɛzɩ mbʋ. Ɛɛñɩnɩ laŋhɛzɩyɛ nɛ eeseɣti ɛyaa lalaa se pɔñɔɔzɩ tɔm ndʋ tɩwɛ pɛ-hɛkʋ taa yɔ. Ɛwɩlɩ-wɛ se ye pañɩnɩɣ se Yehowa ɛmʋ pɛ-sɛtʋ yɔ, pɩpɔzʋʋ se pa nɛ po-koobiya pala laŋhɛzɩyɛ. (Mat. 5:9, 23, 24) Nɛ ɛɛsɩnɩ ɛ-apostoloowaa tam sakɩyɛ se peyele tɔm hɔm se pana se pa-taa lɛ akɩlaa.—Luka 9:46-48; 22:24-27.

11. Ɛzɩma tɩyɛ ɖɩpɩzɩɣ nɛ ɖɩkɛ laŋhɛzɩyɛ ñɩnɩyaa?

¹¹ Pɩsa nɛ ɖɩkɛ laŋhɛzɩyɛ ñɩnɩyaa lɛ, pɩtasɩnɩ se ɖɩɩcaɣ tɔm lɛ, pɩwɛɛ se ɖɩla nabʋyʋ ɖɔɖɔ. Pɩpɔzʋʋ se ɖɩñaɣ pana nɛ ɖa nɛ lalaa ɖɩla laŋhɛzɩyɛ, nɛ ɖiseɣti ɖo-koobiya nɛ pɔñɔɔzɩ tɔm ndʋ tɩkɔŋ pɛ-hɛkʋ taa yɔ. (Fil. 4:2, 3; Yak. 3:17, 18) Ðɩpɩzɩɣ nɛ ɖɩpɔzɩ ɖa-tɩ se: ‘Ɛbɛ mɔnsɔɔlɩ faaa se mankpaɣ nɛ malaa se pɩsa nɛ ma nɛ lalaa ɖɩla laŋhɛzɩyɛ? Alɩwaatʋ ndʋ koobu nɔɔyʋ ɖʋʋ-m ɖɩwɩzɩyɛ yɔ, mancakɩnɩ-ɩ? Alɩwaatʋ ndʋ tɔm kɔŋ ma nɛ nɔɔyʋ ɖɛ-hɛkʋ taa yɔ, manɖaŋɩɣ se ɛnʋ ɛñaɣnɩ pana nɛ laŋhɛzɩyɛ ɖaɣnɩ wɛʋ ma nɛ ɩ ɖɛ-hɛkʋ taa, yaa mɛnkpɛzɩɣnɩ kajalaɣ nɩŋgbaŋaɣ, paa pɩlakɩ-m ɛzɩ ɛnʋ canɩ tɔm yɔ? Alɩwaatʋ ndʋ pɩsaŋ yɔ, menseɣtiɣ ɛyaa mba tɔm kɔm pɛ-hɛkʋ taa yɔ se pala laŋhɛzɩyɛ na?’

12. Ɛzɩma tɩyɛ Yesu wɩlaa se ɛwɛnɩ camɩyɛ lakasɩ?

¹² Yesu lakaɣ ɛyaa lalaa camɩyɛ lakasɩ. (Mat. 11:28-30) Ɛwɩlaa se ɛwɛnɩ camɩyɛ lakasɩ mbʋ pʋyɔɔ yɔ, ɛɛwɛnɩ wɛtʋ kɩbandʋ ɛyaa lalaa yɔɔ nɛ ɛnɩɣ pɔ-tɔm taa, halɩ pɩkpɛndɩnɩ alɩwaatʋ ndʋ ɛɛwɛ kala taa yɔ. Kɩɖaʋ nakʋyʋ yɔ: Alɩwaatʋ ndʋ Fenisii halʋ nɔɔyʋ tendi-i se ɛwaa ɛ-pɩɣa yɔ, kajalaɣ taa lɛ, ekizaa se ɛɛlakɩ mbʋ halʋ ɛnʋ ɛpɔzɩ-ɩ yɔ. Ɛlɛ alɩwaatʋ ndʋ halʋ ɛnʋ ɛlɩzɩ tisuu sɔsɔm nɛ ɛwɩlɩ yɔ, ɛlabɩ-ɩ camɩyɛ lakasɩ nɛ ɛwaa ɛ-pɩɣa. (Mat. 15:22-28) Paa Yesu kaalakaɣ camɩyɛ lakasɩ yɔ, etaakiziɣ ɛyaa lɔŋ tasʋʋ. Nabʋyʋ taa, ɛtasaɣ ɛyaa mba ɛsɔɔlaa yɔ lɔŋ kpayɩ nɛ ɛwɩlɩɣ se ɛwɛnɩ camɩyɛ lakasɩ. Alɩwaatʋ ndʋ Pɩyɛɛrɩ ñaɣ pana se ɛla nɛ pitii Yesu yɔɔɔ nɛ eyele Yehowa sɔɔlɩm labʋ yɔ, Yesu kalɩ-ɩ tɔmkpɛlɩkɩyaa lalaa ɛsɩndaa. (Mark. 8:32, 33) Yesu tɩla mbʋ se ɛɖʋ-ɩ fɛyɛ, ɛlɛ ɛlabɩ mbʋ se ɛfalɩsɩ-ɩ nɛ ɛpaɣ tɔmkpɛlɩkɩyaa lalaa se pataakpazɩ pa-tɩ. Pɩtʋʋ fɛyɩ se pɩɩcɛyɩ Pɩyɛɛrɩ, ɛlɛ lɔŋ sɩɣzʋʋ mbʋ pɩɩwazɩ-ɩ.

13. Ɛzɩma tɩyɛ ɖɩpɩzɩɣ nɛ ɖɩla lalaa camɩyɛ lakasɩ siŋŋ?

¹³ Pɩsa nɛ ŋla camɩyɛ lakasɩ siŋŋ ɛyaa mba ŋsɔɔlɩ-wɛ yɔ lɛ, pɩtɩla nabʋyʋ taa pɩpɔzʋʋ se ŋtasɩ-wɛ lɔŋ kpayɩ. Alɩwaatʋ ndʋ ŋlakɩ mbʋ yɔ, maɣzɩnɩ Yesu nɛ ŋtɩŋnɩ paɣtʋ kila wena awɛ Ɛsɔtɔm taa yɔ a-yɔɔ nɛ ŋtasɩ lɔŋ. Wɛɛnɩ wɛtʋ kɩbandʋ. Kpaɣ-wɛ se pɔsɔɔlaa se pala mbʋ pɩtʋʋzaa yɔ nɛ ŋtaa liu se mba pɔsɔɔlɩ Yehowa nɛ pɛtɛ pɔsɔɔlɩ-ŋ yɔ, pakaɣ tisuu nɛ pamʋ lɔŋ weyi ŋtasɩɣ-wɛ nɛ sɔɔlɩm yɔ. Pɔzɩ ña-tɩ tɔm tʋnɛ: ‘Alɩwaatʋ ndʋ manaɣ ɛyʋ weyi mɔnsɔɔlaa yɔ eɖiɣni labʋ mbʋ pɩfɛyɩ ɖeu yɔ, malakɩ abalɩtʋ nɛ mɔyɔɔdʋʋnɩ-ɩ? Ye pɩpɔzʋʋ se mantasɩ nɔɔyʋ lɔŋ yɔ, mɔyɔɔdʋʋnɩ-ɩ nɛ nɔɔ kɩbaŋa na, yaa mɔyɔɔdʋʋnɩ-ɩ nɛ pana? Ɛbɛ seɣtiɣ-m nɛ mantasɩɣ nɔɔyʋ lɔŋ? Mantasɩɣ-ɩ lɔŋ mbʋ pʋyɔɔ yɔ, ɛlabɩ nabʋyʋ nɛ pɩwɩzɩ-m, yaa mantasɩɣ-ɩ lɔŋ mbʋ pʋyɔɔ yɔ, mɔnsɔɔlaa se mansɩnɩ-ɩ?’

14. Ɛzɩma tɩyɛ Yesu lakɩ ɛyaa lalaa kɩbandʋ?

¹⁴ Yesu taatɩlɩ mbʋ pɩkɛ kɩbam yɔ yem, ɛlɛ ɛlakaɣ ɖɔɖɔ kɩbandʋ. Yesu sɔɔlɩ ɛ-Caa, pʋyɔɔ ɛlakɩ mbʋ pɩtʋʋzaa yɔ nɛ lɩmaɣza kɩbana paa ɛzɩmtaa. Paa ɛzɩmtaa lɛ, ɛyʋ kɩbanʋ ñɩnɩɣ nʋmɔŋ weyi ɩ-yɔɔ ɛpɩzɩɣ ɛtɩŋna nɛ ɛsɩnɩ ɛyaa lalaa yɔ, nɛ ɛlakɩ-wɛ kɩbandʋ. Ye ɖɩtɩlɩ kɩbandʋ ndʋ pɩwɛɛ se ɖɩla yɔ, pi-ɖeke pɩtɩmaɣ; pɩpɔzʋʋ se ɖɩlabɩ-tʋ nɛ lɩmaɣza kɩbana. Pɩtɩla ɖɩpɔzʋʋ se: ‘Ɛzɩ ɛyʋ pɩzɩɣ nɛ ɛla mbʋ pɩwɛ ɖeu yɔ nɛ lɩmaɣza kɩdɛkɛda na?’ Ɛɛɛ. Kɩɖaʋ nakʋyʋ yɔ: Yesu yɔɔdɩ mba palakɩ kʋñɔndɩnaa kʋjɔŋ nɛ peyeki se ɛyaa lalaa ɩna nɛ pasam-wɛ yɔ pɔ-tɔm. Paa tʋma ana akɛ kɩbana yɔ, aakɛdɩɣnɩ Yehowa.—Mat. 6:1-4.

15. Ɛzɩma tɩyɛ ɖɩpɩzɩɣ nɛ ɖɩkɛ ɛyʋ kɩbanʋ toovenim taa?

¹⁵ Ye ɖɩɩlakɩ kɩbandʋ nɛ piɖeni men-ɖeke lɩmaɣza yɔ, pi-ɖeke piyekina se ɖɩkɛ ɛyʋ kɩbanʋ toovenim taa. Pʋyɔɔ lɛ, ŋpɩzɩɣ nɛ ŋpɔzɩ ña-tɩ se: ‘Pɩtasɩna se mansɩm mbʋ pɩkɛ kɩbam yɔ lɛ, toovenim taa lɛ, malakɩ-pʋ ɖɔɖɔ? Ɛbɛ seɣtiɣ-m nɛ malakɩ lalaa kɩbandʋ?’

ƐZƖMA ÐƖPƖZƖƔ ÐIWOLO PƖ-YƆƆ NƐ ÐƖKANDƖYƖƔ ÐƐ-ƐYƲTƲ KƖFATƲ YƆƆ?

16. Ɛbɛ pɩpɔzʋʋ se ɖɩla paa evemiye nɖɩ, nɛ ɛbɛ yɔɔ?

¹⁶ Pɩtɩpɔzɩ se ɖɩmaɣzɩ se alɩwaatʋ ndʋ pamɩyɩsɩɣ-ɖʋ lɩm nɛ pɩtɛ yɔ, ɖisu ɛyʋtʋ kɩfatʋ nɛ pɩtɛ nɛ pɩtɩpɔzɩ se ɖɩtasɩ tʋmɩyɛ naɖɩyɛ labʋ ɖɛ-ɛyʋtʋ yɔɔ. Ɛyʋtʋ kɩfatʋ wɛ ɛzɩ toko kɩfalʋʋ ŋgʋ pɩpɔzʋʋ se ɖɩcɔnɩ kɩ-yɔɔ nɛ kɩtaawɛɛkɩ yɔ. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ, ɩ-taa nakʋyʋ: Paa evemiye nɖɩ lɛ, pɩwɛɛ se ɖɩñɩnɩ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩlɩzɩ piye nɖɩ fezuu kiɖeɖeu lʋlʋʋ yɔ nɛ ɖɩwɩlɩ ɖa-lakasɩ taa yɔ. Ɛbɛ yɔɔ? Mbʋ pʋyɔɔ yɔ, Yehowa kɛ Ɛsɔ weyi ɛlakɩ tʋmɩyɛ yɔ, nɛ e-fezuu kiɖeɖeu kɛ ɖoŋ weyi ɛlakɩ tʋmɩyɛ yɔ. (Kiɖe 1:2) Pʋyɔɔ lɛ, piye nɖɩ fezuu kiɖeɖeu lʋlʋʋ yɔ, paa kɩ-hɔɔlʋʋ ŋgʋ lɛ, kɩpɩzɩɣ kiseɣti-ɖʋ; nɛ pɩwɛɛ se kiseɣti-ɖʋ nɛ ɖɩla tʋma wena pɩpɔzʋʋ yɔ. Tɔmkpɛlɩkɩyʋ Yakubu mawa se: “Tisuu mbʋ pɩfɛyɩnɩ tʋma yɔ, pɩsɩba.” (Yak. 2:26) Papɩzɩɣ nɛ pɔyɔɔdɩ tɔm kʋɖʋmtʋ ndʋ piye nɖɩ Ɛsɔ fezuu lʋlʋʋ yɔ ɖɩ-hɔɔlɩŋ lɛɛŋ tɩŋa yɔɔ. Alɩwaatʋ ndʋ payɩ ɖɩlɩzɩɣ piye nɖɩ Ɛsɔ fezuu lʋlʋʋ yɔ nɛ ɖɩwɩlɩɣ ɖa-lakasɩ taa yɔ, ɖɩwɛɛ nɛ ɖɩwɩlɩɣ kpayɩ kpayɩ se Ɛsɔ fezuu wɛɛ nɛ kɩlakɩ tʋmɩyɛ ɖɔ-yɔɔ.

17. Alɩwaatʋ ndʋ piyiɣdiɣ-ɖʋ nɛ ɖɩɩlɩzɩɣ piye nɖɩ fezuu kiɖeɖeu lʋlʋʋ yɔ nɛ ɖɩwɩlɩɣ ɖa-lakasɩ taa yɔ, ɛbɛ pɩwɛɛ se ɖɩla?

¹⁷ Halɩ Krɩstʋ ñɩma mba pamɩyɩsɩ-wɛ lɩm pɩlakɩ pɩnzɩ sakɩyɛ yɔ, nabʋyʋ taa picoɖuu-wɛ nɛ paalɩzɩɣ piye nɖɩ fezuu lʋlʋʋ yɔ nɛ pawɩlɩɣ pa-lakasɩ taa. Ɛlɛ pɩcɛyaa se ɖiwolo pɩ-yɔɔ nɛ ɖɩñakɩ pana nɛ ɖɩlɩzɩɣ wɛtʋ ndʋ nɛ ɖɩwɩlɩɣ ɖa-lakasɩ taa. Iyele nɛ ɖɩna kɩɖaʋ kʋnɛ: Ye toko ŋgʋ ŋkɩlɩ sɔɔlʋʋ yɔ kɩcɩyaa, ŋlɔʋ-kʋ kpaagbaa? Aayɩ. Pɩtʋʋ fɛyɩ se ye pɩsaŋ yɔ, ŋkpakɩɣ alɩwaatʋ nɛ ŋñɛyɩ ɖenɖe kɩcɩyaa yɔ. Nɛ pʋwayɩ lɛ, ŋkaɣ ñaɣʋ pana nɛ pɩkɩlɩ nɛ ŋcɔnɩ kɩ-yɔɔ se kɩtaacɩyɩ. Mbʋ ɖɔɖɔ, ye nabʋyʋ taa piyiɣdi-ŋ nɛ ŋtɩla nɔɔyʋ camɩyɛ lakasɩ, ŋtɩwɩlɩ-ɩ suuɖu yaa ŋtɩwɩlɩ-ɩ sɔɔlɩm yɔ, pitaatibi-ŋ yɔɔɔ. Tendi ɛyʋ ɛnʋ nɛ ña-laŋɩyɛ pilim se ɛkpaɣ nɛ ekpeɣ-ŋ nɛ pɩsa nɛ taabalɩyɛ kɩbanɖɛ ɖaɣnɩ wɛʋ ña nɛ ɩ mɩ-hɛkʋ taa. Tɛ ña-taa se cee wayɩ lɛ, ŋlakɩ camɩyɛ nɛ pɩkɩlɩ.

18. Ɛbɛ ɖa-taa pɩzɩɣ nɛ pɩtɛmna?

¹⁸ Ðɩwɛnɩ ɛsɩmɩyɛ siŋŋ se Yesu ha-ɖʋ kɩɖaʋ. Ðɩwɛɣ nɛ ɖɩmaɣzɩɣnɩ ɛ-maɣzɩm nɛ ɛ-wɛtʋ nɛ pɩkɩlɩɣ lɛ, pɩkaɣ-ɖʋ wɛʋ kɛlɛʋ se ɖɩla ɛzɩ ɛnʋ yɔ. Ðɩwɛɣ nɛ ɖɩlakɩ ɛzɩ Yesu yɔ nɛ pɩkɩlɩɣ lɛ, ɖɩkaɣ suu ɛyʋtʋ kɩfatʋ camɩyɛ nɛ pɩkɩlɩ. Tɔm ñʋʋ kʋnɛ kɩ-taa, ɖɩna piye nɖɩ Ɛsɔ fezuu lʋlʋʋ yɔ, ɖɩ-hɔɔlɩŋ naanza ɖeke. Pɩwɛɣ ɖeu se ŋkpaɣ alɩwaatʋ nɛ ŋtazɩ piye nɖɩ Ɛsɔ fezuu lʋlʋʋ yɔ ɖɩ-hɔɔlɩŋ lɛɛŋ taa, nɛ ŋmaɣzɩ nɛ ŋna ɛzɩma ŋwɛɛ nɛ ŋlɩzɩɣ wɛtʋ kɩbandʋ ndʋ nɛ ŋwɩlɩɣ ña-lakasɩ taa yɔ. Ŋkaɣ naʋ tɔm ñʋŋ sakɩyɛ pɩlɩɩnɩ wɛtʋ ndʋ tɩ-yɔɔ Guide de recherche pour les Témoins de Jéhovah taa; cɔnɩ tɔm ñʋʋ “Mode de vie chrétien” nɛ pʋwayɩ lɛ, “Fruit de l’esprit” tɛɛ. Ña-taa pɩzɩɣ nɛ pɩtɛ se ye ŋlabɩ ñe-ɖeɖe yɔ, Yehowa kaɣ-ŋ sɩnʋʋ nɛ ŋsuu ɛyʋtʋ kɩfatʋ nɛ tɩwɛɛ ñɔ-yɔɔ tam.