Ɛbɛ ŋpɩzɩɣ ŋla nɛ ŋhiɣ weyi ña nɛ ɩ ɩpɩzɩɣ nɛ ɩɖɔkɩ nesi yɔ?

1-2. (a) Tɔm ndʋ yɔɔ pɩwɛɛ se Krɩstʋ tʋ weyi ɛkɛ ɛɖanɛ yɔ ɛmaɣzɩ pʋcɔ nɛ ɛpaɣzɩ nɔɔyʋ ɖanʋʋ? (b) «Ðanɩyɛ» tɔbʋʋ lɛ suwe? (Kalɩ «Tɔm tɔbʋʋ.»)

ŊSƆƆLAA se ŋɖɔkɩ nesi na? Paa pɩtɩcɛyɩ se ɛyʋ ɛɖɔkɩ nesi pʋcɔ nɛ ehiɣ koboyaɣ yɔ, mba pɛkɛ aɖamɛɛ yɔ, paa patɩɩkɛ evebiya, pɛlaa yaa mba papɩwa yɔ, pa-taa sakɩyɛ ñɩnɩɣ kpem se pehiɣ nɔɔyʋ nɛ pa nɛ ɩ pɔɖɔkɩ nesi. Pʋcɔ nɛ ŋpaɣzɩ ɖanɩyɛ lɛ, pɩpɔzʋʋ se taabalɩyɛ kɩbanɖɛ ɛwɛɛ ña nɛ Yehowa mɩ-hɛkʋ taa, ŋtɩlɩ ña-tɩ camɩyɛ nɛ ŋwɛɛnɩ mbʋ pɩpɔzʋʋ-ŋ se ŋpɩzɩ nɛ ŋcɔnɩ ñɔ-hɔʋ kɩcɛyɩm ɖeɖe yɔ.a (1 Kɔr. 7:36) Ye ŋlabɩ mbʋ yɔ, pɩtʋʋ fɛyɩ se pɩkaɣ-ŋ ɖenuu ñe-nesi ɖɔkʋʋ taa.

² Ɛlɛ pɩfɛyɩ kɛlɛʋ paa ɛzɩmtaa se ɛyʋ ehiɣ weyi ɛmʋnɩ-ɩ se ɛ nɛ ɩ pɔɖɔkɩ nesi yɔ. (Adu 31:10) Nɛ paa ŋhiɣ nɔɔyʋ nɛ ŋsɔɔlɩ se ŋtɩlɩ-ɩ camɩyɛ yɔ, pɩtɩla pɩɩwɛɣ-ŋ kɛlɛʋ se ña nɛ ɩ ɩpaɣzɩ ɖama ɖanʋʋ.b Tɔm ñʋʋ kʋnɛ kɩ-taa, ɖɩkaɣ naʋ mbʋ pɩpɩzɩɣ pɩsɩnɩ Krɩstʋ tʋ weyi ɛkɛ ɛɖanɛ yɔ nɛ ehiɣ weyi ɛ nɛ ɩ papɩzɩɣ nɛ pɔɖɔkɩ nesi yɔ nɛ papaɣzɩ ɖama ɖanʋʋ yɔ. Ðɩkaɣ naʋ ɖɔɖɔ ɛzɩma ɛgbɛyɛ taa mba lalaa pɩzɩɣ nɛ pasɩnɩ mba pɔsɔɔlaa se pɔɖɔkɩ nesi yɔ.

ƐBƐ PƖZƖƔ PƖSƖNƖ-Ŋ NƐ ŊHIƔ WEYI ÑA NƐ Ɩ ƖPƖZƖƔ NƐ ƖÐƆKƖ NESI YƆ?

3. Tɔm ndʋ yɔɔ pɩwɛɛ se Krɩstʋ tʋ weyi ɛkɛ ɛɖanɛ yɔ ɛmaɣzɩ alɩwaatʋ ndʋ ɛñɩnɩɣ weyi ɛ nɛ ɩ papɩzɩɣ nɛ pɔɖɔkɩ nesi yɔ?

³ Ye ŋsɔɔlaa se ŋɖɔkɩ nesi yɔ, pɩwɛɣ ɖeu se ŋtɩlɩ wɛtʋ kɩbandʋ ndʋ ŋsɔɔlaa se weyi ŋñɩnɩɣ se ña nɛ ɩ ɩɖɔkɩ nesi yɔ ɛwɛɛna yɔ pʋcɔ nɛ ɩpaɣzɩ ɖama ɖanʋʋ. Pɩtɩkɛ mbʋ yɔ, ŋpɩzɩɣ nɛ ŋha siɣye weyi pɩɩmʋnaa se ña nɛ ɩ ɖɩɖɔkɩ nesi yɔ yaa ŋpɩzɩɣ nɛ ŋpaɣzɩ ɖanʋʋ weyi ɛtɩmʋnɩ-ŋ yɔ. Pɩcɛyaa se weyi ŋñɩnɩɣ se ña nɛ ɩ ɩɖɔkɩ nesi yɔ ɛkɛ Krɩstʋ tʋ weyi pamɩyɩsɩ-ɩ lɩm yɔ. (1 Kɔr. 7:39) Ɛlɛ pɩɩwɩlɩɣ se paa pamɩyɩsɩ ɛyʋ nɔɔyʋ lɩm yɔ, ɛpɩzɩɣ nɛ ɛkɛnɩ halʋ kɩbanʋ yaa walʋ kɩbanʋ. Ye mbʋ, ŋpɩzɩɣ nɛ ŋpɔzɩ ña-tɩ se: «Kaɖʋwa ŋga mɛwɛnɩ wezuu caɣʋ taa? Wɛtʋ kɩbandʋ ndʋ mamaɣzɩɣ se pɩcɛyaa se weyi mañɩnɩɣ se ma nɛ ɩ ɖɩɖɔkɩ nesi yɔ ɛwɛɛna? Mbʋ mañɩnɩɣ yɔ, pɩwɩlɩɣ se mɛnkɛ weyi ɛnɩɣ tɔm taa yɔ?»

4. Ɛbɛ nabɛyɛ tɩmaa nɛ pɔpɔzɩ?

⁴ Ye ŋsɔɔlaa se ŋɖɔkɩ nesi yɔ, pɩtʋʋ fɛyɩ se ŋtɩmnɩ Ɛsɔ se ɛsɩnɩ-ŋ nɛ ŋhiɣ weyi ɛmʋnɩ-ŋ yɔ. (Filp. 4:6) Pɩkɛ toovenim se Yehowa tɩla nɔɔyʋ tamaɣ se ɛhaɣ-ɩ halʋ yaa walʋ. Ɛlɛ ɛcɔŋnɩ ña-kɩcɛyɩm ɖeɖe nɛ ɛmaɣzɩɣ ɛzɩma pɩlakɩ-ŋ yɔ pɩ-yɔɔ, nɛ ɛpɩzɩɣ nɛ ɛsɩnɩ-ŋ alɩwaatʋ ndʋ ŋñɩnɩɣ nɔɔyʋ se ña nɛ ɩ ɩɖɔkɩ nesi yɔ. Ye mbʋ, wolo pɩ-yɔɔ nɛ ŋheyiɣ-i mbʋ ŋsɔɔlaa yɔ nɛ ɛzɩma pɩlakɩ-ŋ yɔ. (Keɣ. 62:8) Tɩmnɩ-ɩ se ɛha-ŋ lɔŋsɩnɖɛ nɛ ɛsɩnɩ-ŋ nɛ ŋwɛɛ suuɖu. (Yak. 1:5) Payaɣ koobu abalɩñɩnʋ nɔɔyʋ se John,c ɛwɛ Etaazuunii ɛjaɖɛ taa. Ɛyɔɔdɩ mbʋ ɛpɔzʋʋ ɛ-adɩma taa yɔ pɩ-tɔm. Ɛtɔm se: «Meheyiɣ Yehowa wɛtʋ kɩbandʋ ndʋ mɔnsɔɔlaa se weyi mañɩnɩɣ se ma nɛ ɩ ɖɩɖɔkɩ nesi yɔ ɛwɛɛna yɔ. Mantɩmɩɣ se ɛsɩnɩ-m nɛ mehiɣ wala wena a-taa manpɩzɩɣ nɛ mankatɩ weyi ma nɛ ɩ ɖɩpɩzɩɣ nɛ ɖɩɖɔkɩ nesi yɔ. Mɔnpɔzʋʋ ɖɔɖɔ Yehowa se ɛsɩnɩ-m nɛ mɛwɛɛnɩ wɛtʋ kɩbandʋ ndʋ tɩkaɣ-m sɩnʋʋ nɛ mɛnkɛ walʋ kɩbanʋ yɔ.» Payaɣ koobu halɩñɩnʋ nɔɔyʋ se Tanya, ɛwɛ Sri Lankaa ɛjaɖɛ taa. Ɛyɔɔdaa se: «Mɛwɛɛ nɛ mañɩnɩɣ nɔɔyʋ se ma nɛ ɩ ɖɩɖɔkɩ nesi, ɛlɛ mantɩcaɣ yem, mɛwɛɛ nɛ mɔnpɔzʋʋ Yehowa se ɛsɩnɩ-m nɛ mɛwɛɛ siɣsiɣ, mɛwɛɛnɩ lɩmaɣza kɩbana nɛ mɛwɛɛ taa leleŋ taa.» Paa ŋtihiɣti weyi ña nɛ ɩ ɩpɩzɩɣ nɛ ɩɖɔkɩ nesi yɔ, Yehowa labɩ tamaɣ se ɛkaɣ wobu pɩ-yɔɔ nɛ ɛcɔnɩ ñɔ-yɔɔ tomnaɣ yɔɔ nɛ ɛwɩlɩ-ŋ sɔɔlɩm mbʋ pɩpɔzʋʋ-ŋ yɔ.—Keɣ. 55:22.

5. Alɩwaatʋ ndʋ Krɩstʋ tʋ weyi ɛkɛ ɛɖanɛ yɔ ɛpɩzɩɣ nɛ ɛkatɩ weyi ɛsɔɔlɩ Yehowa yɔ? (1 Kɔrɛntɩ mba 15:58) (Cɔnɩ ɖɔɖɔ kɩlɛmʋʋ.)

⁵ Bibl seɣtiɣ-ɖʋ se ɖɩwɛɛnɩ «tʋma sakɩyɛ Kɩbaɣlʋ tʋmɩyɛ taa.» (Kalɩ 1 Kɔrɛntɩ mba 15:58.) Ye pɩɖɔkɩnɩ-ŋ Yehowa sɛtʋ taa nɛ ña nɛ koobiya halaa nɛ abalaa ndɩ ndɩ ɩkpɛndɩɣ nɛ ɩlakɩ tʋmɩyɛ yɔ, ŋkaɣ ɖʋʋ taabalɩyɛ nɖɩ ɖɩkpazɩɣ-ŋ ɖoŋ yɔ; pɩtasɩ lɛ, ŋkaɣ hiɣu wala nɛ ŋkatɩ koobiya mba pɛkɛ aɖamɛɛ nɛ pɛ-ɛsɩyɛ sɛnɩ Yehowa sɛtʋ ɛzɩ ña yɔ. Nɛ ye ŋlakɩ ño-ɖoŋ ɖeɖe se ñɔ-tɔm ɛkɛdɩnɩ Yehowa yɔ, ŋkaɣ hiɣu koboyaɣ siŋŋ.

6. Krɩstʋ tʋ nɔɔyʋ kaañɩnɩɣ weyi ɛ nɛ ɩ papɩzɩɣ nɛ pɔɖɔkɩ nesi yɔ lɛ, tɔm ndʋ yɔɔ pɩwɛɛ se ɛtɔzɩ?

⁶ Ɛlɛ kpa ña-tɩ: Taayele nɛ walʋ yaa halʋ ñɩnʋʋ pɩsɩ mbʋ pɩ-tɔm kɩlɩ cɛyʋʋ ñe-wezuu caɣʋ taa yɔ. (Filp. 1:10) Taa leleŋ siŋŋ ɛɛlɩɣnɩ ɛɖandʋ caɣʋ yaa nesi ɖɔkʋʋ cɔlɔ, ɛlɛ ɛlɩɣnɩ taabalɩyɛ nɖɩ ɖɩwɛ ña nɛ Yehowa mɩ-hɛkʋ taa yɔ ɖɩ-cɔlɔ na. (Mat. 5:3) Nɛ alɩwaatʋ ndʋ ŋkɛ ɛɖanɛ yɔ, ŋpɩzɩɣ nɛ ŋwalɩsɩ ñɛ-Ɛsɔ sɛtʋ tʋmɩyɛ nɛ pɩkɩlɩ. (1 Kɔr. 7:​32, 33) Labɩnɩ alɩwaatʋ ndʋ tʋmɩyɛ camɩyɛ. Payaɣ koobu halɩñɩnʋ nɔɔyʋ se Jessica, ɛwɛ Etaazuunii ɛjaɖɛ taa. Ɛɖɔkɩ nesi alɩwaatʋ ndʋ ɛɛñɔtɩnɩ pɩnzɩ 40 yɔ, ɛyɔɔdaa se: «Pʋcɔ nɛ mɔnɖɔkɩ nesi lɛ, pɩɩɖɔkɩnɩ-m Ɛsɔ sɛtʋ tʋmɩyɛ taa. Nɛ pɩɩsɩnɩ-m nɛ mehiɣ taa leleŋ paa maawɛɛ nɛ mañɩnɩɣ walʋ yɔ.»

KPAƔ ALƖWAATƲ NƐ ŊCƆNA

7. Ɛbɛ yɔɔ pɩkɛnɩ lɔŋsɩnɖɛ se ɛyʋ ɛkpaɣ alɩwaatʋ nɛ ɛcɔnɩ camɩyɛ pʋcɔ nɛ eheyi nɔɔyʋ se ɛsɔɔlɩ-ɩ? (Aduwa 13:16)

⁷ Ye ŋmaɣzɩɣ se ŋhiɣ weyi ña nɛ ɩ ɩpɩzɩɣ nɛ ɩɖɔkɩ nesi yɔ, ɛbɛ pɩwɛɛ se ŋla? Ɛzɩ pɩpɔzʋʋ se ŋheyi ɛyʋ ɛnʋ ña-lɩmaɣzɩyɛ kpaagbaa? Bibl yɔɔdʋʋ se lɔŋsɩnɖʋ ñɩnɩɣ lɔŋsɩnɖɛ pʋcɔ nɛ ɛkpɛzɩ nɩŋgbanzɩ. (Kalɩ Aduwa 13:16.) Ye mbʋ, pɩwɛɣ ɖeu se ŋkpaɣ alɩwaatʋ pazɩ nɛ ŋcɔŋnɩ ɛ-wɛtʋ pʋcɔ nɛ ŋheyi-i se ŋsɔɔlɩ-ɩ. Payaɣ koobu abalɩñɩnʋ nɔɔyʋ se Aschwin, ɛwɛ Peeyibaa ɛjaɖɛ taa. Ɛyɔɔdaa se: «Ŋpɩzɩɣ nɛ ŋpaɣzɩ nɔɔyʋ sɔɔlʋʋ lɛɛ lɛɛ, ɛlɛ sɔɔlɩm mbʋ pɩpɩzɩɣ ɖɔɖɔ nɛ pɩmʋʋ lɛɛ lɛɛ. Pʋyɔɔ lɛ, ye ŋkpaɣ alɩwaatʋ nɛ ŋcɔnɩ nɔɔyʋ wɛtʋ yɔ, sɔɔlɩm mbʋ pɩkɔŋ lɛɛ lɛɛ nɛ pɩɖɛɣ lɛɛ lɛɛ yɔ pɩɩkaɣ-ŋ peɣzuu.» Pɩtasɩ lɛ, ye ŋkpaɣ alɩwaatʋ nɛ ŋcɔnɩ nɔɔyʋ camɩyɛ yɔ, pɩtɩla ŋkaɣ ɖiɣzinuu se ña nɛ ɛyʋ ɛnʋ ɩtɩmʋnɩ ɖama.

8. Ɛzɩma ɛyʋ weyi ɛkɛ ɛɖanɛ yɔ ɛpɩzɩɣ nɛ ɛkpaɣ alɩwaatʋ nɛ ɛcɔnɩ weyi ɛ nɛ ɩ papɩzɩɣ nɛ pɔɖɔkɩ nesi yɔ? (Cɔnɩ ɖɔɖɔ kɩlɛmʋʋ.)

⁸ Ɛzɩma ŋpɩzɩɣ nɛ ŋkpaɣ alɩwaatʋ nɛ ŋcɔnɩ nɔɔyʋ ɛlɛ ŋŋyeki se ɛna se ŋɖiɣni-i cɔnʋʋ? Ɛgbɛyɛ taa kediɣzisi yaa helim mʋʋ alɩwaatʋ taa, ŋpɩzɩɣ nɛ ŋna ɛyʋ ɛnʋ e-fezuu taa wɛtʋ, ɛ-ɛyʋtʋ nɛ ɛ-lakasɩ. Mba kɛ ɛ-taabalaa, nɛ ɛbɛ tɔm ɛyɔɔdʋʋ? (Luka 6:45) Ña nɛ ɩ mɩ-kaɖʋsɩ labɩ nɔɔ kʋɖʋmaɣ na? Ŋpɩzɩɣ nɛ ŋyɔɔdɩnɩ ɛyʋ ɛnʋ ɛ-ɛgbɛyɛ taa ɛzʋtʋyaa yaa koobiya lalaa mba papɩ fezuu taa nɛ pasɩmɩ-ɩ camɩyɛ yɔ. (Adu. 20:18) Ŋpɩzɩɣ nɛ ŋpɔzɩ-wɛ nɛ ŋna se ɛyʋ ɛnʋ ɛwɛnɩ hɩɖɛ kɩbanɖɛ nɛ wɛtʋ kɩbandʋ na. (Ruti 2:11) Ŋŋkpakɩɣ alɩwaatʋ nɛ ŋcɔŋnɩ ɛyʋ ɛnʋ lɛ, ña-lakasɩ etaayele nɛ pɩcɛyɩ-ɩ. Ña ɛyʋ ɛnʋ ɛ-lɩmaɣza nɛ taawɛɛ nɛ ŋñɩnɩɣ se ŋna mbʋ payɩ pɩlakɩ e-wezuu caɣʋ taa yɔ.

9. Pʋcɔ nɛ ŋheyi nɔɔyʋ se ŋsɔɔlɩ-ɩ lɛ, ɛbɛ pɩwɛɛ se ña-taa ɛtɛmna?

⁹ Alɩwaatʋ ɛzɩma ŋpɩzɩɣ ŋkpaɣ nɛ ŋcɔnɩnɩ ɛyʋ nɔɔyʋ pʋcɔ nɛ ŋheyi-i se ŋsɔɔlɩ-ɩ? Ye ŋkpedesaa nɛ ŋheyi ɛyʋ ɛnʋ se ŋsɔɔlɩ-ɩ yɔ, ɛpɩzɩɣ nɛ ɛmaɣzɩ se ŋŋkpakɩɣ alɩwaatʋ nɛ ŋmaɣzɩɣ camɩyɛ pʋcɔ nɛ ŋkpakɩɣ lɩmaɣza. (Adu. 29:20) Ɛlɛ ye ɛyʋ ɛnʋ eɖiɣzinaa se ɛ-tɔm kɛdɩnɩ-ŋ nɛ pɩwɛɛ pileɖiɣ ɛlɛ ŋŋyɔɔdʋʋ natʋyʋ yɔ, ɛpɩzɩɣ nɛ ɛmaɣzɩ se ŋkɛ ɛyʋ weyi ɛɛpɩzɩɣ lɩmaɣza kpaɣʋ yɔ. (Ekl. 11:4) Tɔzɩ se pʋcɔ nɛ ŋheyi nɔɔyʋ se ŋsɔɔlɩ-ɩ lɛ, taamaɣzɩ se paa pɩɩkpawa nɛ pitii yɔ, ña nɛ ɩ ɩkaɣnɩ nesi ɖɔkʋʋ. Ɛlɛ pɩwɛɛ se ña-taa ɛtɛ se ŋtalaa se ŋɖɔkɩ nesi nɛ weyi ŋnawa yɔ, ɛpɩzɩɣ nɛ ɛkɛ-ŋ halʋ kɩbanʋ yaa walʋ kɩbanʋ.

10. Ye ŋɖiɣzinaa se nɔɔyʋ sɔɔlɩ ñɔ-tɔm ɛlɛ ŋtɩsɔɔlɩ se ña nɛ ɩ ɩɖanɩ ɖama yɔ, ɛbɛ pɩwɛɛ se ŋla?

¹⁰ Ɛlɛ ye ŋɖiɣzinaa se nɔɔyʋ sɔɔlɩ ñɔ-tɔm yɔ, ɛbɛ pɩwɛɛ se ŋla? Ye ŋtɩsɔɔlɩ se ña nɛ ɩ ɩɖanɩ ɖama yɔ, tɩŋnɩ ña-lakasɩ yɔɔ nɛ ŋyele nɛ ɛna kpayɩ kpayɩ se ŋtɩsɔɔlɩ. Pɩɩwɛɣ ɖeu se ŋyele nɛ ɛyʋ ɛnʋ ɛmaɣzɩ se lidaʋ wɛɛ se ña nɛ ɩ ɩpɩzɩɣ nɛ ɩɖanɩ ɖama, ŋgʋ toovenim taa lɛ ŋtɩsɔɔlɩ.—1 Kɔr. 10:24; Efɛz. 4:25.

11. Ajɛɛ wena a-taa ɛyaa lalaa ñɩnɩɣnɩ weyi ɛkɛ ɛɖanɛ yɔ nɔɔyʋ se ɛ nɛ ɩ paɖanɩ ɖama yaa se pɔɖɔkɩ nesi yɔ, tɔm ndʋ yɔɔ pɩwɛɛ se pamaɣzɩ camɩyɛ?

¹¹ Ajɛɛ naayɛ taa lɛ, mba pɛkɛ aɖamɛɛ yɔ, pa-lʋlɩyaa yaa ɛyaa lalaa lɩzɩɣnɩ-wɛ mba pa nɛ wɛ papɩzɩɣ nɛ pɔɖɔkɩ nesi yɔ. Ajɛɛ lɛɛna taa lɛ, weyi ɛkɛ ɛɖanɛ yɔ, ɛ-hɔʋ taa ñɩma yaa ɛ-taabalaa ñɩnɩɣnɩ-ɩ weyi ɛ nɛ ɩ papɩzɩɣ nɛ pɔɖɔkɩ nesi yɔ nɛ pʋwayɩ lɛ pala nɛ pa-naalɛ pakatɩ ɖama nɛ pana se pamʋnɩ ɖama yaa patɩmʋnɩ ɖama. Ye pɔpɔzɩ-ŋ se ŋñɩnɩ weyi ɛkɛ ɛɖanɛ yɔ nɔɔyʋ nɛ ɛ nɛ ɩ paɖanɩ ɖama yaa ŋñɩnɩ-ɩ nɔɔyʋ nɛ ɛ nɛ pɔɖɔkɩ nesi yɔ, maɣzɩ mbʋ pa-naalɛ pɔsɔɔlaa yɔ nɛ mbʋ pɩkɛ pa-kɩcɛyɩm yɔ pɩ-yɔɔ camɩyɛ. Ye ŋna weyi ɛpɩzɩɣ nɛ ɛkɛ walʋ kɩbanʋ yaa halʋ kɩbanʋ ñɔ-hɔʋ taa tʋ yaa ña-taabalʋ yɔ, ñaɣ pana nɛ ŋñɩnɩ nɛ ŋtɩlɩ ɛyʋ ɛnʋ camɩyɛ, ŋtɩlɩ ɛ-wɛtʋ kɩbandʋ camɩyɛ, nɛ kɔzɩ kɔzɩ lɛ ñɩnɩ nɛ ŋna se taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa. Taabalɩyɛ kɩbanɖɛ nɖɩ ɖɩwɛɣ nɔɔyʋ nɛ Yehowa pɛ-hɛkʋ taa yɔ, ɖɩ-tɔm cɛyɩ siŋŋ nɛ pɩkɩlɩ liidiye, sukuli ŋgʋ ɛlaba yɔ yaa lone nɖɩ ɛwɛna yɔ. Ɛlɛ tɔzɩ se koobu abalɩñɩnʋ weyi ɛkɛ ɛɖanɛ nɛ koobu halɩñɩnʋ weyi ɛkɛ ɛɖanɛ yɔ, pa-naalɛ pɩpɔzʋʋ se pakpaɣ lɩmaɣzɩyɛ se pɔɖɔkʋʋ nesi yaa paaɖɔkʋʋ.—Gal. 6:5.

ƐZƖMA ƖPƖZƖƔ NƐ ƖPAƔZƖ ÐAMA ÐANƲƲ?

12. Ye ŋsɔɔlaa se ña nɛ nɔɔyʋ ɩpaɣzɩ ɖama ɖanʋʋ yɔ, ɛzɩma ŋpɩzɩɣ nɛ ŋkpaɣna nɛ ŋheyi ɛyʋ ɛnʋ ña-lɩmaɣzɩyɛ?

¹² Ye ŋsɔɔlaa se ña nɛ nɔɔyʋ ɩpaɣzɩ ɖama ɖanʋʋ yɔ, ɛzɩma ŋpɩzɩɣ nɛ ŋkpaɣna nɛ ŋheyi ɛyʋ ɛnʋ ña-lɩmaɣzɩyɛ?d Ŋpɩzɩɣ ŋla ɖʋtʋ nɛ ña nɛ ɛyʋ ɛnʋ ɩyɔɔdɩ, pɩpɩzɩɣ nɛ pɩkɛ ɖenɖe ɛyaa wɛɛ yɔ yaa kaŋgalaafu yɔɔ. Heyi-i kpayɩ kpayɩ se ŋsɔɔlɩ ɛ-tɔm nɛ ñe-liu wɛɛ se ŋtɩlɩ-ɩ nɛ pɩkɩlɩ. (1 Kɔr. 14:9) Ye pɩpɔzʋʋ yɔ, ha-ɩ alɩwaatʋ nɛ ɛmaɣzɩ pʋcɔ nɛ ecosi-ŋ. (Adu. 15:28) Nɛ ye ɛyʋ ɛnʋ ɛtɩsɔɔlɩ se ña nɛ ɩ ɩɖanɩ ɖama yɔ, tisi nɛ ŋña ɛ-lɩmaɣza.

13. Ye nɔɔyʋ eheyi-ŋ se ɛsɔɔlɩ ñɔ-tɔm yɔ, ɛbɛ ŋpɩzɩɣ nɛ ŋla? (Koloosi mba 4:6)

¹³ Ye nɔɔyʋ eheyi-ŋ se ɛsɔɔlɩ ñɔ-tɔm yɔ, ɛbɛ ŋpɩzɩɣ nɛ ŋla? Pɩtʋʋ fɛyɩ se ɛyʋ ɛnʋ ɛlabɩ abalɩtʋ pʋcɔ nɛ ɛñɔtɩnɩ-ŋ, pʋyɔɔ lɛ cosi-i nɛ nɔɔ kɩbaŋa nɛ ñamtʋ. (Kalɩ Koloosi mba 4:6.) Ye pɩcɛyaa se ŋkpaɣ alɩwaatʋ nɛ ŋmaɣzɩ nɛ ŋna se ŋtisiɣ se ña nɛ ɩ ɩɖanɩ ɖama yaa ŋŋtisiɣ yɔ, heyi-i se ɛha-ŋ alɩwaatʋ. Ɛlɛ ñaɣ pana nɛ ŋcosi-i lɔŋ. (Adu. 13:12) Ye ŋtɩsɔɔlɩ se ña nɛ ɩ ɩɖanɩ ɖama yɔ, heyi-i ña-lɩmaɣza nɛ nɔɔ kɩbaŋa nɛ pɩ-taa tʋ kpayɩ kpayɩ. Payaɣ koobu abalɩñɩnʋ nɔɔyʋ se Hans, ɛwɛ Otirisi ɛjaɖɛ taa. Na ɛzɩma ecosi koobu halɩñɩnʋ nɔɔyʋ alɩwaatʋ ndʋ ɛlɛ heyi-i se ɛsɔɔlɩ-ɩ yɔ. Ɛyɔɔdaa se: «Meheyi-i ma-lɩmaɣzɩyɛ nɛ lɛɣtʋ, ɛlɛ meheyi-tʋ nɛ pɩ-taa tʋ kpayɩ kpayɩ. Moncosi-i lɛɛ lɛɛ, mbʋ pʋyɔɔ yɔ mantaasɔɔlɩ se meyele nɛ ɛmaɣzɩ se lidaʋ wɛɛ se ma nɛ ɩ ɖɩɖanɩɣ ɖama. Pɩtasɩ lɛ, mañakaɣ pana pʋwayɩ se mantaala nabʋyʋ yaa mantaayɔɔdɩ natʋyʋ nɛ ɛmaɣzɩ se ma-lɩmaɣza lɛɣzaa.» Ɛlɛ ye ŋsɔɔlaa se ña nɛ ɛyʋ ɛnʋ ɩɖanɩ ɖama yɔ, heyi-i ña-lɩmaɣza nɛ ña nɛ ɩ ɩyɔɔdɩ nɛ ɩna ɛzɩma ɩsɔɔlaa se mɩ-ɖanɩyɛ ɛɖɔ yɔ. Mɩ-sɔnzɩ yaa wɛtʋ lɛɛtʋ yɔɔ lɛ, mbʋ lɛlʋ sɔɔlaa yɔ, pɩpɩzɩɣ nɛ pɩwɛɛ ndɩ nɛ mbʋ lɛlʋ ñɔsɔɔlaa yɔ.

ƐZƖMA ƐYAA LALAA PƖZƖƔ NƐ PASƖNƖ KRƖSTƲ ÑƖMA MBA PƐKƐ AÐAMƐƐ YƆ?

14. Ɛzɩma ɖɩpɩzɩɣ nɛ ɖɩtɩŋnɩ tɔm ndʋ ɖɩyɔɔdʋʋ yɔ tɩ-yɔɔ nɛ ɖɩsɩnɩ Krɩstʋ ñɩma mba pɛkɛ aɖamɛɛ yɔ?

¹⁴ Ða-tɩŋa payɩ ɛzɩma ɖɩpɩzɩɣ nɛ ɖɩsɩnɩ Krɩstʋ ñɩma mba pɛkɛ aɖamɛɛ nɛ pɔsɔɔlaa se pɔɖɔkɩ nesi yɔ? Nʋmɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ-wɛ yɔ lɛ se ɖɩkpa ɖa-tɩ nɛ tɔm ndʋ ɖɩyɔɔdʋʋ yɔ. (Efɛz. 4:29) Ðɩpɩzɩɣ nɛ ɖɩpɔzɩ ɖa-tɩ se: «Malakɩ tanaʋ ŋgʋ kɩtɩmʋna yɔ mba pɔsɔɔlaa se pɔɖɔkɩ nesi yɔ? Alɩwaatʋ ndʋ manaɣ koobu abalɩñɩnʋ nɔɔyʋ nɛ koobu halɩñɩnʋ nɔɔyʋ pɛwɛɛ nɛ pɔyɔɔdʋʋnɩ ɖama yɔ, mɔnkɔʋ tɔm ñʋʋ kpaagbaa se sɔɔlɩm wɛ pɛ-hɛkʋ taa?» (1 Tim. 5:13) Pɩtasɩ lɛ, ɖɩtɩsɔɔlɩ kpa se ɖiyele nɛ Krɩstʋ ñɩma mba pɛkɛ aɖamɛɛ yɔ pamaɣzɩ se pɩkazɩ-wɛ nabʋyʋ mbʋ pʋyɔɔ yɔ patɩɖɔkɩ nesi. Hans weyi ɛ-tɔm ɖɩyɔɔdaa nɛ pɩɖɛɛ yɔ, ɛyɔɔdaa se: «Koobiya nabɛyɛ yɔɔdʋʋ se: “Ɛbɛ yɔɔ ŋŋkpakɩɣ halʋ? Ŋtɩtasɩ kɛʋ pɩɣa!” Tɔm ndʋ tiyeki nɛ pɩlakɩ mba pɛkɛ aɖamɛɛ yɔ ɛzɩ patɩlɩɩ pʋyʋ yɔ nɛ pamaɣzɩɣ se pɩcɛyaa kpem se pɔɖɔkɩ nesi.» Pɩkɩlɩɣ ɖeu se ɖɩñɩnɩ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsaŋ Krɩstʋ ñɩma mba pɛkɛ aɖamɛɛ yɔ.—1 Tes. 5:11.

15. (a) Ɛzɩ paɣtʋ kiɖe nɖɩ ɖɩwɛ Roma mba 15:2 taa yɔ ɖɩwɩlʋʋ yɔ, tɔm ndʋ yɔɔ pɩwɛɛ se ɖɩmaɣzɩ camɩyɛ pʋcɔ nɛ ɖɩsɩnɩ nɔɔyʋ nɛ ehiɣ weyi ɛ nɛ ɩ papɩzɩɣ nɛ pɔɖɔkɩ nesi yɔ? (Cɔnɩ ɖɔɖɔ kɩlɛmʋʋ.) (b) Lɔŋ weyi ŋkpɛlɩkɩ video taa?

¹⁵ Nɛ ye ɖɩmaɣzɩɣ se koobu abalɩñɩnʋ nɔɔyʋ nɛ koobu halɩñɩnʋ nɔɔyʋ pamʋnɩ ɖama yɔ, ɛbɛ ɖɩpɩzɩɣ nɛ ɖɩla? Bibl heyiɣ-ɖʋ se ɖɩmaɣzɩ ɛzɩma pɩlakɩ ɛyaa lalaa yɔ pɩ-yɔɔ. (Kalɩ Roma mba 15:2.) Aɖamɛɛ sakɩyɛ tɩsɔɔlɩ se lalaa ɩwɩlɩnɩ-wɛ mba pa nɛ wɛ papɩzɩɣ nɛ pɔɖɔkɩ nesi yɔ, nɛ pɩpɔzʋʋ se ɖɩña pa-lɩmaɣza. (2 Tes. 3:11) Lalaa pɩzɩɣ nɛ pɔsɔɔlɩ se ɖɩsɩnɩ-wɛ ɛlɛ ye patɩpɔzɩ-ɖʋ se ɖɩsɩnɩ-wɛ yɔ, pɩtɩpɔzɩ se ɖɩɖʋ ɖɔ-nɔɔ pɔ-tɔm taa.e (Adu. 3:27) Mba pɛkɛ aɖamɛɛ yɔ pa-taa nabɛyɛ sɔɔlaa se pasɩnɩ-wɛ ɛlɛ patɩsɔɔlɩ se peheyi-wɛ kpayɩ se akele mʋnɩnɩ-wɛ. Payaɣ koobu halɩñɩnʋ nɔɔyʋ se Lydia. Ɛkɛ ɛɖanɛ nɛ ɛwɛ Caama ɛjaɖɛ taa. Ɛyɔɔdaa se: «Ŋpɩzɩɣ nɛ ŋyaa ɛyaa sakɩyɛ nɛ ŋkpɛndɩnɩ koobu abalɩñɩnʋ ɛnʋ nɛ koobu halɩñɩnʋ ɛnʋ se ɩmʋ helim. Ña-kaɖʋwa ɛkɛna se ŋcaɣ se ŋyele nɛ pa-naalɛ pakatɩ ɖama nɛ ŋyele-wɛ nɛ pa-maɣmaɣ pakpaɣnɩ lɩmaɣza wena amʋnaa yɔ.»

16. Tɔm ndʋ yɔɔ pɩwɛɛ se Krɩstʋ ñɩma mba pɛkɛ aɖamɛɛ yɔ pɔtɔzɩ?

¹⁶ Paa ɖɩkɛ ɛɖanɛ yaa ɖɩɖɔkɩ nesi yɔ, ɖa-tɩŋa payɩ ɖɩpɩzɩɣ nɛ ɖihiɣ koboyaɣ ɖe-wezuu caɣʋ taa. (Keɣ. 128:1) Pʋyɔɔ lɛ, ye ŋsɔɔlaa se ŋɖɔkɩ nesi ɛlɛ ŋtihiɣti nɔɔyʋ yɔ, wolo pɩ-yɔɔ nɛ ŋka ña-lɩmaɣza Yehowa sɛtʋ yɔɔ. Payaɣ koobu halɩñɩnʋ nɔɔyʋ se Sin Yi, ɛwɛ Macao tɛtʋ taa. Ɛyɔɔdaa se: «Ye pakpaɣ alɩwaatʋ ndʋ ŋcaɣ ɛɖandʋ yɔ nɛ pamaɣzɩnɩ alɩwaatʋ ndʋ ña nɛ ñɛ-tɛŋga ɩkaɣ caɣʋ Paradisuu taa yɔ, alɩwaatʋ ndʋ ŋcaɣ ɛɖandʋ yɔ tɩtɩlɩɩ pʋyʋ. Yele nɛ ñɛ-ɛɖandʋ caɣʋ alɩwaatʋ mʋ ñɩm ñɛ-ɛsɩndaa nɛ ŋlabɩnɩ-tʋ tʋmɩyɛ camɩyɛ.» Ɛlɛ ye ŋhiɣ weyi ña nɛ ɩ ɩpɩzɩɣ nɛ ɩɖɔkɩ nesi yɔ nɛ ɩpaɣzɩ ɖama ɖanʋʋ yɔ, ɛbɛ pɩwɛɛ se ŋla? Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ naʋ mbʋ ŋpɩzɩɣ ŋla nɛ piɖeni-ŋ alɩwaatʋ ndʋ ña nɛ nɔɔyʋ ɩɖanɩɣ ɖama yɔ.