Wolo pɩ-yɔɔ nɛ ŋɖɔŋnɩ tisuu

1. Apostoloo Pɔɔlɩ tɔzɩ mbʋ pɩlabɩ e-wezuu caɣʋ taa yɔ pɩ-yɔɔ lɛ, ɛbɛ yɔɔ ɛ-taa pɩzaɣ se pɩla leleŋ?

ALƖWAATƲ natʋyʋ, apostoloo Pɔɔlɩ ɖiɣzinaa se piileɖiɣ lɛ pakʋʋ-ɩ. Paa mbʋ yɔ, ɛ-taa kaawɛ leleŋ kpem nɛ wezuu ŋgʋ ɛcaɣaa yɔ. Ɛtɔzɩ mbʋ pɩlabɩ e-wezuu caɣʋ taa yɔ pɩ-yɔɔ lɛ, ɛyɔɔdɩ se: «Mense seya nɛ mɛntɛm-yɛ, mɔnɖɔkɩ tisuu.» (2 Tim. 4:​6-8) Pɔɔlɩ kpaɣʋ lɩmaɣzɩyɛ se ɛlakɩ Yehowa tʋmɩyɛ e-wezuu caɣʋ taa yɔ, pɩɩkɛnɩ lɩmaɣzɩyɛ kɩbanɖɛ nɛ ɛ-taa kaatɛma se Yehowa taa wɛnɩ-ɩ nɛ leleŋ. Ða ɖɔɖɔ ɖɩsɔɔlaa se ɖɩkpaɣ lɩmaɣza kɩbana nɛ ɖɔ-tɔm kɛdɩnɩ Yehowa. Ɛzɩma ɖɩpɩzɩɣ nɛ ɖɩtalɩ kaɖʋwa ŋga?

2. Ye pɔtɔm se ɛyʋ ɛɖɔmnɩ tisuu yɔ, pʋ-tɔbʋʋ lɛ suwe?

² Pɔɔlɩ yɔɔdɩ ɛ nɛ Krɩstʋ mba siɣsiɣ tɩnaa pɔ-tɔm se: «Ðɩɖɔŋnɩ tisuu, ɖɩɩɖɔŋnɩ mbʋ pɩnaɣ yɔ.» (2 Kɔr. 5:7) Suwe ɛñɩnaɣ yɔɔdʋʋ? Nabʋyʋ taa, Bibl lakɩnɩ tʋmɩyɛ tɔm piye «ɖɔnɛ» se kɩwɩlɩ wezuu ŋgʋ nɔɔyʋ lɩzɩɣ se ɛcakɩ yɔ. Ɛyaa mba ‘pɔɖɔŋnɩ mbʋ pɩnaɣ yɔ,’ mbʋ panaɣ, ndʋ panɩɣ nɛ ɛzɩma pɩlakɩ-wɛ yɔ pi-ɖeke piɖiyiɣni-wɛ nɛ pakpakɩɣ lɩmaɣza. Ɛlɛ mba ‘pɔɖɔŋnɩ tisuu’ yɔ, pataɣ Ɛsɔ Yehowa liu, nɛ mbʋ ɖiyiɣni-wɛ pa-lɩmaɣza kpaɣʋ taa. Pa-lakasɩ wɩlɩɣ se pa-taa tɛma se Ɛsɔ kaɣ-wɛ hɛyʋʋ, nɛ pa-taa tɛma ɖɔɖɔ se ye pɔɖɔŋ Yehowa lɔŋ tasʋʋ mbʋ pɩwɛ Bibl taa yɔ pɩ-yɔɔ yɔ, pɩkaɣ-wɛ wazʋʋ.—Keɣ. 119:66; Ebr. 11:6.

3. Ye ɖɩɖɔŋnɩ tisuu yɔ, wazasɩ nzɩ ɖihikiɣ? (2 Kɔrɛntɩ mba 4:18)

³ Toovenim taa lɛ, mbʋ ɖɩnaɣ, ndʋ ɖɩnɩɣ nɛ ɛzɩma pɩlakɩ-ɖʋ yɔ, nabʋyʋ taa pɩwɛnɩ ɖoŋ lɩmaɣza wena ɖɩkpakɩɣ yɔ a-taa naayɛ yɔɔ. Ɛlɛ ye pi-ɖeke piɖiyiɣni-ɖʋ nɛ ɖɩkpakɩɣ lɩmaɣza sɔsɔna yɔ, pɩkaɣ-ɖʋ kɔnʋʋ kaɖɛ. Ɛbɛ yɔɔ? Mbʋ pʋyɔɔ yɔ, mbʋ ɖɩnaɣ, ndʋ ɖɩnɩɣ nɛ ɛzɩma pɩlakɩ-ɖʋ yɔ pɩpɩzɩɣ nɛ pipeɣzi-ɖʋ. Paa piipeɣziɣ-ɖʋ yɔ, ye ɖɩɖɔŋnɩ mbʋ pɩnaɣ yɔ pi-ɖeke yɔ, pʋtɔma yɔ pɩtɛŋna se ɖɩlakɩ mbʋ Yehowa tɩsɔɔlɩ yɔ. (Ekl. 11:9; Mat. 24:​37-39) Ɛlɛ ye ɖɩɖɔŋnɩ tisuu yɔ, pɩtʋʋ fɛyɩ se ɖɩkaɣ kpaɣʋ lɩmaɣza wena ‘akɛdɩnɩ Kɩbaɣlʋ yɔ.’ (Efɛz. 5:10) Ye ɖɩɖɔŋ Ɛsɔ lɔŋ tasʋʋ yɔɔ yɔ, ɖɩkaɣ hiɣu maɣzɩm taa laŋhɛzɩyɛ nɛ koboyaɣ siŋŋ. (Keɣ. 16:​8, 9; Iza. 48:​17, 18) Nɛ ye ɖiwoki pɩ-yɔɔ nɛ ɖɩɖɔŋnɩ tisuu yɔ, ɖɩkaɣ hiɣu wezuu maatɛŋ.—Kalɩ 2 Kɔrɛntɩ mba 4:18.

4. Ɛzɩma ɖɩpɩzɩɣ nɛ ɖɩna se ɖɩwɛɛ nɛ ɖɩɖɔŋnɩ tisuu yaa ɖɩwɛɛ nɛ ɖɩɖɔŋnɩ mbʋ pɩnaɣ yɔ?

⁴ Ɛzɩma ɖɩpɩzɩɣ nɛ ɖɩna se ɖɩwɛɛ nɛ ɖɩɖɔŋnɩ tisuu yaa ɖɩwɛɛ nɛ ɖɩɖɔŋnɩ mbʋ pɩnaɣ yɔ? Pɩwɛɛ se ɖɩpɔzɩ ɖa-tɩ tɔm tʋnɛ: Ɛbɛ ɖiyiɣ-m alɩwaatʋ ndʋ mancaɣ kpaɣʋ lɩmaɣzɩyɛ naɖɩyɛ yɔ? Mbʋ manaɣ yɔ pi-ɖeke piɖiyiɣni-m? Yaa Yehowa lɔŋ tasʋʋ ɖiyiɣni-m? Iyele nɛ ɖɩna hɔɔlɩŋ 3 weyi ɩ-taa ɖɩpɩzɩɣ nɛ ɖiwolo pɩ-yɔɔ nɛ ɖɩɖɔŋnɩ tisuu yɔ. (1) Alɩwaatʋ ndʋ ɖɩñɩnɩɣ tʋmɩyɛ yɔ. (2) Alɩwaatʋ ndʋ ɖɩlɩzɩɣ nɔɔyʋ se ɖa nɛ ɩ ɖɩɖɔkɩ nesi yɔ. (3) Alɩwaatʋ ndʋ ɛgbɛyɛ tasɩɣ-ɖʋ lɔŋ nɩɩyɩ yɔ. Paa hɔɔlʋʋ ŋgʋ kɩ-taa lɛ, ɖɩkaɣ naʋ tɔm ndʋ tɩ-yɔɔ pɩwɛɛ se ɖɩmaɣzɩ nɛ pɩsa nɛ ɖɩkpaɣ lɩmaɣzɩyɛ kɩbanɖɛ yɔ.

ALƖWAATƲ NDƲ ÐƖÑƖNƖƔ TƲMƖYƐ YƆ

5. Tɔm ndʋ yɔɔ pɩwɛɛ se ɖɩmaɣzɩ alɩwaatʋ ndʋ ɖɩñɩnɩɣ tʋmɩyɛ yɔ?

⁵ Ða-tɩŋa ɖɩsɔɔlaa se ɖɩcɔnɩ ɖa-maɣmaɣ ɖa-kɩcɛyɩm ɖeɖe nɛ ɖɔ-hɔʋ taa mba kɩcɛyɩm ɖeɖe. (Ekl. 7:12; 1 Tim. 5:8) Tʋma naayɛ taa lɛ, pɛhɛyɩɣ liidiye camɩyɛ. Pɩpɩzɩɣ pɩsɩnɩ tʋmlaɖʋ nɛ ɛpɩzɩ nɛ ɛcɔnɩ ɛ-kɩcɛyɩm ɖeɖe paa evemiye nɖɩ nɛ halɩ ɛtɔsɩ liidiye. Ɛlɛ tʋma lɛɛna taa lɛ, paahɛyɩɣ liidiye pɩɖɔʋ; nɛ liidiye nɖɩ, hɔʋ kɩcɛyɩm ɖeke ɖɩmakɩna. Ye mbʋ, alɩwaatʋ ndʋ ɖɩñɩnɩɣ tʋmɩyɛ naɖɩyɛ yɔ, pɩmʋnɩ mbʋ se ɖɩmaɣzɩ liidiye nɖɩ pakaɣ-ɖʋ hɛyʋʋ yɔ ɖɩ-yɔɔ. Ɛlɛ ye nɔɔyʋ ɛmaɣzɩɣ liidiye nɖɩ pakaɣ-ɩ hɛyʋʋ yɔ ɖɩ-yɔɔ ɖeke yɔ, pɩwɩlɩɣ se ɛwɛɛ nɛ ɛɖɔŋnɩ mbʋ pɩnaɣ yɔ.

6. Ye ɖɩñɩnɩɣ tʋmɩyɛ yɔ, ɛzɩma ɖɩpɩzɩɣ nɛ ɖɩwɩlɩ se ɖɩɖɔŋnɩ tisuu? (Ebree mba 13:5)

⁶ Ye ɖɩɖɔŋnɩ tisuu yɔ, ɖɩkaɣ maɣzʋʋ ɖɔɖɔ ɖoŋ weyi tʋmɩyɛ nɖɩ, ɖɩkaɣ wɛnʋʋ ɖa nɛ Yehowa ɖa-taabalɩyɛ yɔɔ yɔ ɩ-yɔɔ. Ðɩpɩzɩɣ ɖɩpɔzɩ ɖa-tɩ se: «Tʋmɩyɛ nɖɩ, ɖɩkaɣ-m pɔzʋʋ se mala lakasɩ nzɩ Yehowa tɩsɔɔlɩ yɔ?» (Adu. 6:​16-19) «Ðɩkaɣ yebu nɛ maahikiɣ alɩwaatʋ nɛ mowoki kediɣzisi, monsusuu tɔm nɛ mɛnkpɛlɩkɩ Bibl? Ðɩkaɣ yebu nɛ monposini mɔ-hɔʋ alɩwaatʋ sakɩyɛ na?» (Filp. 1:10) Ye ɖicosi tɔm pɔzʋʋ mbʋ pɩ-yɔɔ se ɛɛɛ yɔ, pɩɩkɛɣnɩ lɔŋsɩnɖɛ se ɖitisi nɛ ɖɩla tʋmɩyɛ nɖɩ paa tʋmɩyɛ hiɣu ɛwɛ kaɖɛ yɔ. Ye ɖɩɖɔŋnɩ tisuu yɔ, ɖɩkpakɩɣ lɩmaɣza wena awɩlɩɣ se ɖa-taa tɛma se paa pɩɩlabɩ ɛzɩma yɔ Yehowa kaɣ cɔnʋʋ ɖa-kɩcɛyɩm ɖeɖe yɔ.—Mat. 6:33; kalɩ Ebree mba 13:5.

7-8. Ɛzɩma Amerika hadɛ kiŋ koobu abalɩñɩnʋ nɔɔyʋ wɩlaa se ɛɖɔŋnɩ tisuu? (Cɔnɩ ɖɔɖɔ kɩlɛmʋʋ.)

⁷ Payaɣ koobu abalɩñɩnʋ nɔɔyʋ se Javier,a ɛwɛ Amerika hadɛ kiŋ. Iyele nɛ ɖɩna mbʋ piyeba nɛ eɖiɣzina se pɩcɛyaa se ɛɖɔmnɩ tisuu yɔ. Ɛyɔɔdaa se: «Mañɩnaɣ se mala tʋmɩyɛ tʋmɩyɛ ɖɩlaɖɛ sɔsɔɖɛ naɖɩyɛ taa, nɛ liidiye nɖɩ pakaɣaɣ-m hɛyʋʋ peeɖe yɔ ɖɩtalɩ nɖɩ pɛhɛyaɣ-m man-tʋmɩyɛ kɩbɩnɖɛ taa yɔ ɖɩ-nabʋlɛ; nɛ man-taa kaawɛ leleŋ se mala tʋmɩyɛ nɖɩ.» Ɛlɛ Javier kaasɔɔlɩ kpem ɖɔɖɔ se ɛla nʋmɔʋ lɩzʋʋ tʋmɩyɛ. Ɛtasɩ yɔɔdʋʋ se: «Paaya-m se mowolo nɛ tʋmɩyɛ ñʋʋdʋ pɔzɩ-m tɔm nɛ ɛna se mamʋnɩ tʋmɩyɛ nɖɩ yaa mantɩmʋna. Pʋcɔ nɛ pɩpaɣzɩ lɛ, mantɩmnɩ Yehowa se ɛsɩnɩ-m, mbʋ pʋyɔɔ yɔ man-taa kaatɛma se ɛsɩm mbʋ pɩwazɩɣ-m nɛ pɩkɩlɩ yɔ. Mañɩnaɣ se mɛnɖɛɛnɩ ɛsɩndaa tʋmɩyɛ kɩfaɖɛ nɖɩ ɖɩ-taa nɛ pɛhɛyɩ-m liidiye sakɩyɛ.»

⁸ Javier kɛdaa se: «Tʋmɩyɛ ñʋʋdʋ pɔzaɣ-m tɔm lɛ, eheyi-m se pɩkaɣ pɔzʋʋ ɖoŋ ɖoŋ se mala tʋmɩyɛ nɛ pɩcɛzɩ tʋmɩyɛ alɩwaatʋ yɔɔ. Meheyi-i nɛ ñamtʋ se mɛ-Ɛsɔ sɛtʋ tʋma yɔɔ lɛ, maakaɣ pɩzʋʋ nɛ mala tʋmɩyɛ nɛ pɩcɛzɩ tʋmɩyɛ alɩwaatʋ yɔɔ.» Peeɖe Javier kpaɣ lɩmaɣzɩyɛ se ɛɛlakɩ tʋmɩyɛ nɖɩ. Kpɩtaŋ 2 wayɩ lɛ, ɛpaɣzɩ nʋmɔʋ lɩzʋʋ tʋmɩyɛ. Nɛ pʋwayɩ, pɩnaɣ kʋɖʋmaɣ ŋga ka-taa lɛ, ehiɣ tʋmɩyɛ nɖɩ ɖɩɩkpakɩɣ-ɩ alɩwaatʋ sakɩyɛ yɔ. Ɛyɔɔdaa se: «Yehowa welisi ma-adɩma nɛ ɛsɩnɩ-m nɛ mehiɣ tʋmɩyɛ nɖɩ ɖɩhaɣ-m nʋmɔʋ se mala nʋmɔʋ lɩzʋʋ tʋmɩyɛ yɔ. Man-taa wɛ leleŋ siŋŋ se mehiɣ tʋmɩyɛ nɖɩ ɖɩhaɣ-m nʋmɔʋ se mankpaɣ ma-alɩwaatʋ nɛ malabɩnɩ Yehowa tʋmɩyɛ nɛ mɛntɛ mansɩnɩ mon-koobiya yɔ.»

9. Ɛbɛ Trésor kɩɖaʋ kpɛlɩkɩɣ-ŋ?

⁹ Ye ɖiɖiɣzinaa se ɖa-tʋmɩyɛ ɛɛhaɣ-ɖʋ nʋmɔʋ se ɖɩɖɔmnɩ tisuu yɔ, ɛbɛ pɩwɛɛ se ɖɩla? Payaɣ koobu abalɩñɩnʋ nɔɔyʋ se Trésor, ɛwɛ Kɔŋgo ɛjaɖɛ taa. Iyele nɛ ɖɩna mbʋ pɩtalɩ-ɩ yɔ. Ɛyɔɔdaa se: «Tʋmɩyɛ kɩfaɖɛ nɖɩ mehiɣaa yɔ, nɖɩ maasɔɔlɩ kpem se mala. Liidiye nɖɩ pɛhɛyaɣ-m tʋmɩyɛ kɩbɩnɖɛ taa yɔ pɛhɛyaɣ-m ɖɩ-tɛ nabudozo tʋmɩyɛ kɩfaɖɛ taa, nɛ ɛyaa kaawɛnɩ ñamtʋ mɔ-yɔɔ ɖɔɖɔ.» Ɛlɛ Trésor taawoki kediɣzisi ɖoŋ ɖoŋ mbʋ pʋyɔɔ yɔ ɛlakaɣ tʋmɩyɛ nɛ pɩcɛzɩɣ tʋmɩyɛ alɩwaatʋ yɔɔ. Pañɩkaɣ ɛ-yɔɔ ɖɔɖɔ se ehuuzi ɛsa cɛtɩm lakasɩ yɔɔ. Trésor kaasɔɔlaa se eyele tʋmɩyɛ nɖɩ, ɛlɛ ɛnɩɣzaɣ se ye eyebi-ɖɩ yɔ ɛɛtasɩɣ wɛnʋʋ tʋmɩyɛ. Ɛbɛ sɩnɩ-ɩ? Ɛyɔɔdaa se: «Habakuuki 3:​17-19 sɩnɩ-m nɛ manɩɩ pɩ-taa se paa melesi man-tʋmɩyɛ yɔ, Yehowa kaɣ tɩŋnʋʋ nʋmɔʋ nakʋyʋ yɔɔ nɛ ɛcɔnɩ mɔ-yɔɔ. Pʋyɔɔ lɛ menkizi tʋmɩyɛ nɖɩ.» Ɛyɔɔdaa se: «Tʋmlaɖaa sakɩyɛ maɣzɩɣ se ye pɛhɛyɩɣ nɔɔyʋ camɩyɛ ɛ-tʋmɩyɛ taa yɔ, ɛlakɩ mbʋ payɩ ɛpɩzɩɣ yɔ nɛ etaalesi-ɖɩ paa pɩwɛɛ se ɛsɔɔ ɛ-hɔʋ yaa fezuu taa tʋma yɔɔ yɔ. Man-taa wɛ leleŋ se mankandɩyɩ taabalɩyɛ nɖɩ ɖɩwɛ ma nɛ Yehowa nɛ mɔ-hɔʋ ɖɛ-hɛkʋ taa yɔ ɖɩ-yɔɔ. Pɩnaɣ kʋɖʋmaɣ wayɩ lɛ, Yehowa sɩnɩ-m nɛ mehiɣ tʋmɩyɛ kɩbanɖɛ nɖɩ ɖɩ-taa pɛhɛyɩɣ-m liidiye nɖɩ ɖɩmakɩnɩ man-kɩcɛyɩm nɛ ɖɩsɩɣnɩ-m ɖɔɖɔ se mehiɣ alɩwaatʋ nɛ mala mɛ-Ɛsɔ sɛtʋ tʋma yɔ. Ðɩsɩɣ Yehowa tʋma kajalaɣ lone taa lɛ, nabʋyʋ taa ɖɩpɩzɩɣ nɛ ɖɩla liidiye kʋñɔŋ, ɛlɛ Yehowa kaɣ ɖɔ-yɔɔ cɔnʋʋ.» Toovenim taa lɛ, ye ɖɩtaɣ Yehowa lɔŋ tasʋʋ nɛ ɛ-tamasɩ liu yɔ, ɖɩkaɣ wobu pɩ-yɔɔ nɛ ɖɩkpakɩɣ lɩmaɣza wena awɩlɩɣ se ɖɩɖɔŋnɩ tisuu yɔ, nɛ ɛkaɣ-ɖʋ wazʋʋ.

ALƖWAATƲ NDƲ ÐƖLƖZƖƔ NƆƆYƲ SE ÐA NƐ Ɩ ÐƖÐƆKƖ NESI YƆ

10. Alɩwaatʋ ndʋ ɖɩcaɣ se ɖɩlɩzɩ weyi ɖa nɛ ɩ ɖɩɖɔkʋʋ nesi yɔ, ɛbɛ pɩzɩɣ piyele nɛ ɖɩɖɔmnɩ mbʋ pɩnaɣ yɔ?

¹⁰ Nesi ɖɔkʋʋ kɛ kʋjɔʋ ŋgʋ kɩlɩnɩ Yehowa cɔlɔ yɔ, nɛ pɩmʋnɩ mbʋ se ɛyʋ ɛlɩzɩ se ɛɖɔkʋʋ nesi. Ye koobu halɩñɩnʋ nɔɔyʋ ɛñɩnɩɣ se ɛɖɔkɩ nesi yɔ, pɩtɩla ɛmaɣzɩɣ koobu abalɩñɩnʋ weyi ɛsɔɔlaa se ɛ nɛ ɩ pɔɖɔkɩ nesi yɔ e-keɖeɣa, ɛ-lakasɩ, lɩmaɣza wena ɛyaa wɛnɩ ɛ-yɔɔ yɔ nɛ ɛzɩma ɛlakɩnɩ tʋmɩyɛ liidiye yɔ pɩ-yɔɔ. Ɛpɩzɩɣ nɛ ɛmaɣzɩ ɖɔɖɔ nɛ ɛna se koobu abalɩñɩnʋ ɛnʋ ɛwɛnɩ hɔʋ taa sʋʋtʋ natʋyʋ yaa eyeki nɛ ɛ-taa lakɩ leleŋ na.b Pɩcɛyaa se ɛmaɣzɩ tɔm ndʋ tɩ-yɔɔ. Ɛlɛ ye ɛmaɣzɩɣ tɔm ndʋ ti-ɖeke tɩ-yɔɔ na yɔ, ɛwɛɛ nɛ ɛɖɔŋnɩ mbʋ pɩnaɣ yɔ.

11. Alɩwaatʋ ndʋ ɖɩcaɣ se ɖɩlɩzɩ weyi ɖa nɛ ɩ ɖɩɖɔkʋʋ nesi yɔ, ɛzɩma ɖɩpɩzɩɣ nɛ ɖɩɖɔmnɩ tisuu? (1 Kɔrɛntɩ mba 7:39)

¹¹ Yehowa taa wɛ leleŋ siŋŋ nɛ ɖo-koobiya halɩñɩma nɛ abalɩñɩma mba pɔɖɔŋ ɛ-lɔŋ tasʋʋ yɔɔ alɩwaatʋ ndʋ palɩzɩɣ weyi pañɩnɩɣ se pa nɛ ɩ pɔɖɔkɩ nesi yɔ. Kɩɖaŋ nɩɩyɩ yɔ: Pɔɖɔŋ lɔŋ tasʋʋ mbʋ pɩyɔɔdʋʋ se pɩwɛɛ se pɛɖɛɛ «evebitu yaa pɛlɛtʋ alɩwaatʋ yɔɔ» pʋcɔ nɛ papaɣzɩ ɖanɩyɛ yɔ pɩ-yɔɔ. (1 Kɔr. 7:36) Pɔcɔŋna ɖɔɖɔ nɛ pana se weyi palɩzɩɣ se pa nɛ ɩ pɔɖɔkɩ nesi yɔ ɛwɛnɩ wɛtʋ kɩbandʋ ndʋ Yehowa yɔɔdʋʋ se pɩwɛɛ se walʋ kɩbanʋ yaa halʋ kɩbanʋ ɛwɛɛna yɔ. (Adu. 31:​10-13, 26-28; Efɛz. 5:33; 1 Tim. 5:8) Ye weyi ɛɛsɛɣ Yehowa yɔ ɛñɩnɩɣ se paɖanɩ ɖama yɔ, pɔɖɔŋ lɔŋ tasʋʋ mbʋ pɩwɛ 1 Kɔrɛntɩ mba 7:39 taa nɛ pɩtɔŋ se pɔɖɔkɩ nesi «Kɩbaɣlʋ taa ɖeke» yɔ pɩ-yɔɔ. (Kalɩ 1 Kɔrɛntɩ mba 7:39.) Powoki pɩ-yɔɔ nɛ pɔɖɔŋnɩ tisuu, mbʋ pʋyɔɔ yɔ pa-taa tɛma se Yehowa pɩzɩɣ nɛ ɛwɩlɩ-wɛ sɔɔlɩm mbʋ pɩpɔzʋʋ yɔ nɛ pɩkɩlɩ paa weyi.—Keɣ. 55:22.

12. Ɛbɛ Rosa kɩɖaʋ kpɛlɩkɩɣ-ŋ?

¹² Payaɣ koobu halɩñɩnʋ nɔɔyʋ se Rosa, ɛkɛ nʋmɔʋ lɩzɩyʋ Kolombii ɛjaɖɛ taa. Iyele nɛ ɖɩna ɛ-kɩɖaʋ. Tʋmɩyɛ nɖɩ ɛlakɩ yɔ ɖiyeba nɛ ɛkatɩɣ abalʋ nɔɔyʋ ɖoŋ ɖoŋ nɛ ɛlɛ paɣzɩ ɛ-tɔm sɔɔlʋʋ ŋgʋ ɛtɩkɛ Yehowa Aseɣɖe Tʋ. Rosa ɖɔɖɔ kaasɔɔlɩ-ɩ. Ɛyɔɔdaa se: «Ɛɛkɛ ɛyʋ kɩbanʋ kpem. Ɛsɩɣaɣnɩ e-egeetiye taa mba nɛ e-wezuu caɣʋ kaawɛ ɖeu. Ɛlakaɣ-m camɩyɛ lakasɩ nɛ pɩkɛdaɣnɩ-m. Ɛwɛnɩ wɛtʋ kɩbandʋ ndʋ payɩ mɔnsɔɔlaa se weyi ɛkaɣ kɛʋ ma-walʋ yɔ ɛwɛɛna yɔ, ɛlɛ tɔm lɛ se ɛtɩkɛ Yehowa sɛyʋ.» Ɛsɔzaa se: «Pɩɩwɛ-m kaɖɛ se meheyi-i se ma nɛ ɩ ɖɩɩpɩzɩɣ nɛ ɖɩɖanɩ ɖama, mbʋ pʋyɔɔ yɔ maasɔɔlɩ-ɩ. Alɩwaatʋ ndʋ tɩ-taa, pɩlakaɣ-m ɛzɩ mɛwɛ men-ɖeke yɔ, nɛ maasɔɔlɩ kpem se mɔnɖɔkɩ nesi, ɛlɛ mantihiɣ nɔɔyʋ ɛgbɛyɛ taa.» Paa mbʋ yɔ, Rosa tɩka ɛ-lɩmaɣza mbʋ pɩnaɣ yɔ pɩ-yɔɔ. Ɛmaɣzɩ ɖoŋ weyi ɛ nɛ abalʋ ɛnʋ pa-ɖanɩyɛ pɩzɩɣ nɛ pɩwɛɛnɩ ɛ nɛ Yehowa pa-taabalɩyɛ yɔɔ yɔ ɩ-yɔɔ. Piyeba nɛ ɛcɛ ɛ nɛ abalʋ ɛnʋ pa-taabalɩyɛ caɣ caɣ nɛ ɛka ñʋʋ nɛ fezuu taa tʋma. Pitileɖi lɛ, payaa-ɩ se ewolo Kewiyaɣ tɔm susuyaa sukuli, nɛ lɛɛlɛɛyɔ lɛ ɛkɛ nʋmɔʋ lɩzɩyʋ kiya. Rosa yɔɔdaa se: «Yehowa wazɩ-m siŋŋ, piyeba nɛ mɛwɛɛ koboyaɣ taa kpem.» Pɩfɛyɩ kɛlɛʋ se ɛyʋ ɛɖɔmnɩ tisuu kɔzɩ kɔzɩ alɩwaatʋ ndʋ ɛsɔɔlɩ nabʋyʋ kpem yɔ; paa mbʋ yɔ ye ɖɩlabɩ mbʋ Yehowa sɔɔlaa yɔ, ɖɩkaɣ hiɣu wazasɩ paa ɛzɩmtaa.

ALƖWAATƲ NDƲ ƐGBƐYƐ TASƖƔ-ÐƲ LƆŊ NƖƖYƖ YƆ

13. Alɩwaatʋ ndʋ ɛgbɛyɛ tasɩɣ-ɖʋ lɔŋ yɔ, ɛbɛ pɩzɩɣ pituyi-ɖʋ nɛ ɖɩɖɔmnɩ mbʋ pɩnaɣ yɔ?

¹³ Ðoŋ ɖoŋ lɛ, ɛgbɛyɛ taa ɛzʋtʋyaa, egeetiye yɔɔ cɔnɩyʋ, ɛgbɛyɛ piliŋa yaa Nɔɔɖɛyaa ɛgbɛyɛ tasɩɣ-ɖʋ lɔŋ se pɩsɩnɩ-ɖʋ nɛ ɖɩsɛɛ Yehowa camɩyɛ. Ɛlɛ ye patɩsɩ-ɖʋ lɔŋ nɩɩyɩ nɛ ɖɩɩnɩɣ ɩ-taa yɔ, ɛzɩma ɖɩkaɣ labʋ? Pɩtɩla, kaɖɛ nɖɩ lɔŋ tasʋʋ mbʋ pɩkaɣ yebu nɛ ɖɩkatɩ yɔ ɖi-ɖeke ɖɩ-yɔɔ ɖɩmaɣzɩɣ. Halɩ pɩtɩla, ɖɩkaɣ kam ɖa-lɩmaɣza koobiya mba patasɩ-ɖʋ lɔŋ ɛnɩ yɔ pɛ-ɛjandʋ yɔɔ.

14. Alɩwaatʋ ndʋ ɛgbɛyɛ tasɩɣ-ɖʋ lɔŋ yɔ, ɛbɛ kaɣ-ɖʋ sɩnʋʋ nɛ ɖɩɖɔmnɩ tisuu? (Ebree mba 13:17)

¹⁴ Ye ɖɩɖɔŋnɩ tisuu yɔ, ɖa-taa tɛŋ se Yehowa cɔŋnɩ pɩtɩŋa pi-ɖeɖe nɛ ɛsɩm wɛtʋ ndʋ tɩ-taa ɖɩwɛɛ yɔ. Piyeki nɛ ɖɩña lɔŋ weyi patasɩɣ-ɖʋ yɔ lɛɛ lɛɛ, nɛ ɖɩlakɩ mbʋ nɛ lɩmaɣza kɩbana. (Kalɩ Ebree mba 13:17.) Ðɩnawa se alɩwaatʋ ndʋ ɖɩɖɔŋ lɔŋ weyi patasɩɣ-ɖʋ yɔ ɩ-yɔɔ yɔ, piyeki nɛ ɛgbɛyɛ wɛɛ nɔɔ kʋɖʋmaɣ taa. (Efɛz. 4:​2, 3) Koobiya mba pɛɖɛɣ-ɖʋ nɔɔ yɔ patɩtalɩ pilim, paa mbʋ yɔ ɖa-taa tɛma se ye ɖɩñaŋ-wɛ yɔ, Yehowa kaɣ-ɖʋ wazʋʋ. (1 Sam. 15:22) Ye nabʋyʋ ɛɛɖɔŋ camɩyɛ yɔ, Yehowa kaɣ-pʋ ñɔɔzʋʋ alɩwaatʋ kɩbandʋ yɔɔ.—Mik. 7:7.

15-16. Ɛbɛ sɩnɩ koobu nɔɔyʋ nɛ ɛɖɔmnɩ tisuu paa ɛpɩtaɣ lɔŋ weyi ɛgbɛyɛ tasaa yɔ ɩ-yɔɔ yɔ? (Cɔnɩ ɖɔɖɔ kɩlɛmʋʋ.)

¹⁵ Iyele nɛ ɖɩna kɩɖaʋ ŋgʋ kɩwɩlɩɣ wazaɣ ŋga ɖihikiɣ ye ɖɩɖɔŋnɩ tisuu yɔ. Peeɖuu ɛjaɖɛ taa, Ɛsɩpaañɔɔlɩ kʋnʋŋ pakɩlɩɣ yɔɔdʋʋ, ɛlɛ ɛyaa sakɩyɛ yɔɔdʋʋ pe-egeetiye taa kʋnʋmɩŋ. Ɩ-taa nakʋyʋ lɛ Quechua kʋnʋŋ. Pɩlakɩ pɩnzɩ sakɩyɛ yɔ, koobiya mba pɔyɔɔdʋʋ Quechua kʋnʋŋ yɔ, pɛwɛɛ nɛ pañɩnɩɣ mba pɔyɔɔdʋʋ Quechua kʋnʋŋ pe-egeetiye taa yɔ. Ɛlɛ palabɩ lɛɣzɩtʋ pɩlɩɩnɩ ɛzɩma pɩwɛɛ se pañɩnɩ ɛyaa tɔm susuu taa yɔ pɩ-yɔɔ, se pɩsa nɛ pɩla nɔɔ kʋɖʋmaɣ nɛ komina paɣtʋ. (Roma 13:1) Piyeba nɛ nabɛyɛ maɣzɩ se pɩkaɣ pɩsɩnʋʋ tɔm susuu tʋmɩyɛ wayɩ. Koobiya tisaa nɛ pɔɖɔ lɔŋ weyi patasɩ-wɛ yɔ ɩ-yɔɔ lɛ, Yehowa wazɩ pa-pana ñaɣʋ yɔɔ nɛ palɩɩ Quechua kʋnʋŋ yɔɔdɩyaa sakɩyɛ yɔɔ.

¹⁶ Kevin kɛ ɛgbɛyɛ taa ɛzʋtʋyʋ ɛgbɛyɛ nɖɩ ɖɩ-taa pɔyɔɔdʋʋ Quechua kʋnʋŋ yɔ, nɛ ɛɛwɛ koobiya mba panɩɣzaɣ yɔ pa-taa. Ɛyɔɔdaa se: «Mɔnpɔzaɣ man-tɩ se: “Lɛɛlɛɛyɔ, ɛzɩma ɖɩkaɣ labʋ nɛ ɖɩkatɩ mba pɔyɔɔdʋʋ Quechua kʋnʋŋ yɔ?”» Ɛbɛ Kevin laba? Ɛyɔɔdaa se: «Mamaɣzɩ Aduwa 3:5 yɔɔ. Nɛ mɔntɔzɩ Moyizi yɔɔ. Yehowa kaaheyi-i se ɛla nabʋyʋ nɛ pɩɩwɛ ɛzɩ pɩfɛyɩnɩ tɔbʋʋ nɩʋ yɔ. Ɛɛɖʋ-ɩ tʋmɩyɛ se eɖiyi Izrayɛɛlɩ piya nɛ ɛlɩzɩ-sɩ Ejipiti nɛ patɩŋ nʋmɔʋ ŋgʋ kiwokini Teŋgu Kɩsɛɛmʋʋ cɔlɔ yɔ. Alɩwaatʋ ndʋ Ejipiti mba paɣzɩ pa-wayɩ ɖʋʋ yɔ, pɩɩwɛ ɛzɩ paapɩzɩɣ nɛ palɩɩ pe-nesi tɛɛ kpa yɔ. Paa mbʋ yɔ, ɛñam Yehowa nɛ Yehowa la mbʋ pɩwɛ piti kpem yɔ nɛ ɛwazɩ-ɩ ɛ-ñamtʋ yɔɔ.» (Ejl. 14:​1, 2, 9-11, 21, 22) Kevin kaatisi faaa nɛ ɛlabɩnɩ tʋmɩyɛ tɔm susuu nʋmɔʋ kɩfalʋʋ ŋgʋ. Ɛbɛ lɩ pɩ-taa? Ɛyɔɔdaa se: «Ɛzɩma Yehowa wazɩ-ɖʋ yɔ, pɩɩɖɩɣzɩ-m. Ðooo lɛ, ɖɩɖɔŋaɣ alɩwaatʋ sakɩyɛ nɛ ɖɩñɩnɩɣ Quechua kʋnʋŋ yɔɔdɩyaa, ɛlɛ nabʋyʋ taa ɛyʋ kʋɖʋm yaa ɛyaa naalɛ ɖɩkatɩɣ. Lɛɛlɛɛyɔ lɛ, ɖɩkam ñʋʋ nɛ ageeta wena a-taa Quechua kʋnʋŋ yɔɔdɩyaa ɖɔwa yɔ. Piyeba nɛ ɖɩkatɩ ɛyaa sakɩyɛ, nɛ ɖɩwɛɛnɩ pɩsɩ ŋna-ɩ waa nɛ Bibl kpɛlɩkɩyaa sakɩyɛ. Nɛ ɛyaa sakɩyɛ kɔŋ ɖe-kediɣzisi nɛ pɩkɩlɩɣ.» Toovenim taa lɛ, alɩwaatʋ ndʋ payɩ ɖɩɖɔŋnɩ tisuu yɔ, Yehowa wazɩɣ-ɖʋ pɩ-yɔɔ.

17. Ɛbɛ ŋkpɛlɩkɩ tɔm ñʋʋ kʋnɛ kɩ-taa?

¹⁷ Ðɩna hɔɔlɩŋ 3 weyi ɩ-taa pɩcɛyaa se ɖiwolo pɩ-yɔɔ nɛ ɖɩɖɔmnɩ tisuu yɔ. Ɛlɛ, pɩwɛɛ se ɖiwolo pɩ-yɔɔ nɛ ɖɩɖɔmnɩ tisuu ɖe-wezuu caɣʋ hɔɔlɩŋ kpeekpe taa ɛzɩ alɩwaatʋ ndʋ ɖɩlɩzɩɣ aleɣya wena ɖɩlakɩ yɔ yaa alɩwaatʋ ndʋ ɖɩmʋʋ helim yɔ, nɛ alɩwaatʋ ndʋ ɖɩkpakɩɣ lɩmaɣza sukuli labʋ yaa piya falɩsʋʋ hɔɔlʋʋ taa yɔ. Lɩmaɣza wena payɩ ɖɩkpakɩɣ yɔ a-taa, pɩfɛyɩ se ɖiyele nɛ mbʋ ɖɩnaɣ yɔ pi-ɖeke piɖiyiɣni-ɖʋ, ɛlɛ pɩwɛɛ se ɖiyele nɛ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, ɛ-lɔŋ tasʋʋ nɛ tamaɣ ŋga ɛlaba se ɛcɔŋnɩ ɖɔ-yɔɔ yɔ piɖiyi-ɖʋ ɖɔɖɔ. Ye ɖɩlabɩ mbʋ yɔ, «ɖɩkaɣ ɖɔm ɖɛ-Ɛsɔ Yehowa hɩɖɛ taa tam.»—Mik. 4:5.