Ɛzɩma Yehowa sɩɣnɩ-ɖʋ se ɖɩɖɔkɩ ɖa-laŋɩyɛ ɖa-kʋñɔmɩŋ taa?

1. (a) Ɛbɛ yɔɔ pɩpɔzʋʋ-ɖʋ laŋɩyɛ ɖɔkʋʋ? (b) Nɛ apɩzɩɣ nɛ ɛsɩnɩ-ɖʋ? (1 Pɩyɛɛrɩ 5:10)

KƐDƐZAƔ kɩyakɩŋ kaɖɛ ñɩŋ ɩnɛ ɩ-taa, pɩpɔzʋʋ Yehowa sɛyaa laŋɩyɛ ɖɔkʋʋ. Nabɛyɛ wɛ kʋdɔmɩŋ sɔsɔŋ taa. Lalaa wɛ laŋwɛɛkɩyɛ taa mbʋ pʋyɔɔ yɔ pelesi pɛ-ɛyaa kʋsɔɔlaa nabɛyɛ. Lalaa lɛ, pɔ-hɔʋ taa mba yaa komina kaɖɩɣnɩ-wɛ. (Mat. 10:​18, 36, 37) Ña-taa ɛtɛ se paa kaɖɛ nɖɩ ŋkatɩɣ yɔ, Yehowa kaɣ-ŋ sɩnʋʋ nɛ ŋɖɔkɩ ña-laŋɩyɛ.—Kalɩ 1 Pɩyɛɛrɩ 5:10.

2. Ɛbɛ sɩɣnɩ-ɖʋ se ɖɩɖɔkɩ ɖa-laŋɩyɛ?

² Ye pɔtɔm se ɛyʋ ɛɖɔkɩ ɛ-laŋɩyɛ yɔ, pʋ-tɔbʋʋ lɛ se ɛwɛɛ siɣsiɣ Yehowa ɛsɩndaa nɛ ɛsɛɛ-ɩ nɛ taa leleŋ paa ɛkatɩɣ kala, panazɩɣ-ɩ yaa pɩtakɩɣ-ɩ se ɛla kɩdɛkɛdɩm nabʋyʋ yɔ, nɛ ɛwɛɛnɩ lidaʋ se pɩkaɣ ñɔɔzʋʋ nɛ ɛsɩndaa. Ðɩɩpɩzɩɣ nɛ ɖɩɖɔkɩ ɖa-laŋɩyɛ ɖa-maɣmaɣ ɖo-ɖoŋ taa, ɛlɛ Yehowa pɩzɩɣna nɛ ɛha-ɖʋ «ɖoŋ weyi ɩcɛzɩ ɛyʋ ɖoŋ yɔ» nɛ ɖɩpɩzɩ ɖɩɖɔkɩ ɖa-laŋɩyɛ. (2 Kɔr. 4:7) Tɔm ñʋʋ kʋnɛ kɩ-taa, ɖɩkaɣ naʋ mbʋ Yehowa haɣ-ɖʋ se pɩsa nɛ ɖɩɖɔkɩ ɖa-laŋɩyɛ yɔ pɩ-taa 4. Ðɩkaɣ naʋ ɖɔɖɔ ɛzɩma ɖɩpɩzɩɣ ɖiyele nɛ mbʋ Yehowa haɣ-ɖʋ yɔ pɩwazɩ-ɖʋ yɔ.

ADƖMA

3. Ɛbɛ yɔɔ ɖɩpɩzɩɣ nɛ ɖɩyɔɔdɩ se adɩma kɛ kʋjɔʋ kɩbaŋʋ?

³ Yehowa labɩ-ɖʋ kʋjɔʋ kɩbaŋʋ nakʋyʋ se kɩsɩnɩ-ɖʋ nɛ ɖɩɖɔkɩ ɖa-laŋɩyɛ. Paa ɖɩkɛ kɩwɛɛkɩm laɖaa yɔ, ɛha-ɖʋ waɖɛ se ɖɩyɔɔdʋʋnɩ-ɩ, nɛ ewelisiɣni-ɖʋ. (Ebr. 4:16) Maɣzɩ tɔm tʋnɛ tɩ-yɔɔ nɛ ŋna: Ðɩpɩzɩɣ nɛ ɖɩtɩmnɩ Yehowa paa ɛzɩmtaa nɛ ɖɩpɔzɩ-ɩ paa ɛbɛ. Ɛpɩzɩɣ nɛ ewelisini-ɖʋ paa kʋnʋŋ ŋgʋ lɛ kɩ-taa nɛ paa le ɖɩtɩɩwɛɛ yɔ. Halɩ ewelisiɣni-ɖʋ paa ɖɩwɛ ɖe-ɖeke ɖoŋnɔɔyʋ yaa salaka taa yɔ. (Yon. 2:​1, 2; Tʋma 16:​25, 26) Paa ɖɩnɩɣzɩɣ siŋŋ nɛ ɖɩɩsɩŋ ndʋ pɩwɛɛ se ɖiheyi Yehowa ɖa-adɩma taa yɔ, ɛpɩzɩɣ nɛ ɛtɩlɩ ndʋ ɖɩmaɣzɩɣ yɔ. (Roma 8:​26, 27) Toovenim taa lɛ, adɩma kɛ kʋjɔʋ kɩbaŋʋ kpem!

4. Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa sɔɔlaa se ɖɩtɩmnɩ-ɩ se ɛsɩnɩ-ɖʋ nɛ ɖɩɖɔkɩ ɖa-laŋɩyɛ?

⁴ Yehowa heyi-ɖʋ Bibl taa se «paa ɛbɛ [ɖɩpɔzʋʋ] nɛ pɩlakɩ nɔɔ kʋɖʋmaɣ nɛ ɛ-sɔɔlɩm yɔ,» ewelisiɣni-ɖʋ. (1 Yoh. 5:14) Ðɩpɩzɩɣ nɛ ɖɩpɔzɩ Yehowa se ɛsɩnɩ-ɖʋ nɛ ɖɩɖɔkɩ ɖa-laŋɩyɛ na? Ɛɛɛ. Mbʋ pʋyɔɔ yɔ Yehowa sɔɔlaa se ɖiwolo pɩ-yɔɔ nɛ ɖɩɖɔkɩ ɖa-laŋɩyɛ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Mbʋ pʋyɔɔ yɔ alɩwaatʋ ndʋ ɖɩɖɔkʋʋ ɖa-laŋɩyɛ kaɖɛ wɛtʋ natʋyʋ taa yɔ, piyeki se Yehowa ɛpɩzɩ nɛ ecosi Sataŋ Eleeu weyi ɛyɔɔdʋʋ tɔm kɩdɛkɛdɩtʋ ɛ-yɔɔ yɔ. (Adu. 27:11) Pɩtasɩ lɛ, Bibl yɔɔdʋʋ se Yehowa ɖaŋ kpam se «ɛwɩlɩ e-ɖoŋ nɛ pɩwazɩ mba pɛsɛɣ-ɩ nɛ pa-laŋɩyɛ pilim yɔ nɛ ɛsɩnɩ-wɛ.» (2 Kro. 16:9) Ye mbʋ, ɖa-taa pɩzɩɣ nɛ pɩtɛ se pɩtasɩna se Yehowa wɛnɩ ɖoŋ se ɛsɩnɩ-ɖʋ lɛ, ɛsɔɔlaa ɖɔɖɔ se ɛla mbʋ.—Iza. 30:18; 41:10; Luka 11:13.

5. Ɛzɩma adɩma pɩzɩɣ ayele nɛ ɖɩwɛɛnɩ maɣzɩm taa laŋhɛzɩyɛ? (Izaayii 26:3)

⁵ Bibl yɔɔdʋʋ se alɩwaatʋ ndʋ ɖɩtɩmɩɣnɩ Yehowa tɔm natʋyʋ yɔɔ yɔ, ‘Ɛsɔ tɛ laŋhɛzɩyɛ nɖɩ ɖɩcɛzɩ tɔm taa nɩʋ lɛɣtʋ tɩŋa yɔ, ɖɩkaɣ tɩŋnʋʋ Krɩstʋ Yesu yɔɔ nɛ ɖɩɖaŋ ɖa-laŋa yɔɔ nɛ ɖa-maɣzɩm yɔɔ.’ (Filp. 4:7) Tɔm ndʋ tɩ-tɔbʋʋ lɛ suwe? Ɛyaa mba paasɛɣ Yehowa yɔ pakatɩɣ kʋñɔmɩŋ lɛ, patɩŋɩɣnɩ nʋmɔŋ ndɩ ndɩ yɔɔ se pehiɣ maɣzɩm taa laŋhɛzɩyɛ. Nabɛyɛ lɩzɩɣ se paamaɣzɩɣ nabʋyʋ yɔɔ halɩ pɩkpɛndɩnɩ pa-nɩɣzɛ yɔɔ. Ɛlɛ ye ɖɩwɛ yem nɛ ɖɩɩmaɣzɩɣ natʋyʋ yɔɔ yɔ, pɩkɔŋnɩ-ɖʋ kaɖɛ fezuu taa. (Kpaɣ-tʋ nɛ ŋmaɣzɩnɩ Maatiyee 12:​43-45.) Pɩtasɩ lɛ, paa ɛyaa ɩtɩŋɩɣnɩ nʋmɔŋ ɛnɩ ɩ-yɔɔ yɔ, paapɩzɩɣ nɛ pehiɣ laŋhɛzɩyɛ siŋŋ nɖɩ ɖɩlɩɣnɩ Yehowa cɔlɔ yɔ; nɛ laŋhɛzɩyɛ nɖɩ ɖɩkpaɖɩna. Alɩwaatʋ ndʋ ɖɩtɩmɩɣnɩ Yehowa yɔ, ɖɩwɩlɩɣ se ɖɩtaɣ-ɩ liu kiya, nɛ ɛhaɣ-ɖʋ «laŋhɛzɩyɛ nɖɩ ɖɩwɛɣ tam yɔ.» (Kalɩ Izaayii 26:3.) Nʋmɔŋ weyi ɩ-yɔɔ Yehowa tɩŋɩɣna nɛ ɛhaɣ-ɖʋ laŋhɛzɩyɛ nɖɩ yɔ, ɩ-taa nakʋyʋ lɛ ɛzɩma ɛsɩɣnɩ-ɖʋ nɛ ɖɩtɔzʋʋ toovenim tɔm ndʋ ɖɩkpɛlɩkɩ Bibl taa nɛ tɩhɛzɩɣ ɖa-laŋa yɔ tɩ-yɔɔ yɔ. Toovenim tɔm ndʋ, tɩhɛzɩɣ ɖa-maɣzɩm nɛ ɖa-laŋɩyɛ, mbʋ pʋyɔɔ yɔ ɖɩnawa se Yehowa cɔŋnɩ ɖɔ-yɔɔ nɛ ɛsɔɔlaa se piɖeni-ɖʋ.—Keɣ. 62:​1, 2.

6. Ɛbɛ ŋpɩzɩɣ ŋla nɛ adɩma wazɩ-ŋ nɛ pɩkɩlɩ? (Cɔnɩ ɖɔɖɔ kɩlɛmʋʋ.)

⁶ Mbʋ ŋpɩzɩɣ ŋla yɔ. Ye ŋwɛɛ nɛ ŋkatɩɣ kaɖɛ naɖɩyɛ yɔ, «pɛɖɩ ña-sʋʋtʋ Yehowa yɔɔ» nɛ ŋtɩmnɩ-ɩ se ɛha-ŋ ɛ-laŋhɛzɩyɛ. (Keɣ. 55:22) Pɔzɩ-ɩ ɖɔɖɔ se ɛha-ŋ lɔŋsɩnɖɛ nɖɩ pɩpɔzʋʋ-ŋ yɔ nɛ ŋpɩzɩ ŋlʋbɩnɩ kaɖɛ nɖɩ. (Adu. 2:​10, 11) Pɩtasɩnɩ mbʋ lɛ, taasɔɔ se ŋtɩmɩ nɛ ŋsɛɛ-ɩ mbʋ ɛlakɩ-ŋ yɔ pɩ-yɔɔ. (Filp. 4:6) Ñɩnɩ nɛ ŋna mbʋ pɩwɩlɩɣ se Yehowa wɛɛ nɛ ɛsɩɣnɩ-ŋ kaɖɛ wɛtʋ ndʋ tɩ-taa ŋwɛɛ yɔ tɩ-taa yɔ, nɛ ŋsɛɛ-ɩ pɩ-yɔɔ. Taayele nɛ kʋñɔŋ ŋgʋ kɩ-taa ŋwɛɛ yɔ kiyele nɛ ŋŋtasɩɣ naʋ wazasɩ nzɩ ŋtɛm wɛnʋʋ yɔ.—Keɣ. 16:​5, 6.

ƐSƆTƆM

7. Ɛzɩma Bibl kpɛlɩkʋʋ pɩzɩɣ pɩsɩnɩ-ɖʋ nɛ ɖɩɖɔkɩ ɖa-laŋa?

⁷ Yehowa ha-ɖʋ ɛ-Tɔm se tɩsɩnɩ-ɖʋ nɛ ɖɩɖɔkɩ ɖa-laŋa. Bibl taa masɩ sakɩyɛ yeki nɛ ɖa-taa tɛŋ se Yehowa sɩɣnɩ-ɖʋ. Iyele nɛ ɖɩna kɩɖaʋ nakʋyʋ. Maatiyee 6:8 yɔɔdʋʋ se: «Mɩ-Caa sɩm mbʋ pɩtɛɖɩɣ-mɩ yɔ, halɩ pʋcɔ nɛ ɩpɔzʋʋ-ɩ.» Yesu yɔɔdɩnɩ tɔm ndʋ, nɛ ɛsɩm ɛ-Caa camɩyɛ nɛ pɩkɩlɩ paa anɩ. Pʋyɔɔ lɛ, ɖa-taa pɩzɩɣ nɛ pɩtɛ kiya se alɩwaatʋ ndʋ ɖɩwɛɣ kaɖɛ wɛtʋ natʋyʋ taa yɔ, Yehowa sɩm mbʋ pɩpɔzʋʋ-ɖʋ yɔ nɛ ɛkaɣ-ɖʋ sɩnʋʋ. Lɩmaɣza ana a-ɖɔndɩ wɛ Bibl taa nɛ apɩzɩɣ akpazɩ-ɖʋ ɖoŋ alɩwaatʋ ndʋ ɖɩwɛɣ kaɖɛ wɛtʋ natʋyʋ taa yɔ nɛ ɖɩɖɔkɩ ɖa-laŋa.—Keɣ. 94:19.

8. (a) Ɛbɛ Bibl seɣtiɣ-ɖʋ se ɖɩla? (b) Ɛzɩma pɩsɩɣnɩ-ɖʋ se ɖɩɖɔkɩ ɖa-laŋɩyɛ kaɖɛ alɩwaatʋ taa?

⁸ Bibl paɣtʋ kila pɩzɩɣ asɩnɩ-ɖʋ nɛ ɖɩɖɔkɩ ɖa-laŋa. Mbʋ pʋyɔɔ yɔ ɖɩnaɣ «lɔŋsɩnɖɛ nɖɩ ɖɩwazɩɣ yɔ» Bibl paɣtʋ kila taa. Nɛ lɔŋsɩnɖɛ nɖɩ, ɖɩsɩɣnɩ-ɖʋ se ɖɩkpaɣ lɩmaɣza kɩbana. (Adu. 2:​6, 7) Kɩɖaʋ nakʋyʋ yɔ: Bibl seɣtiɣ-ɖʋ se ɖɩmaɣzɩ paa evemiye nɖɩ lɛ ɖɩ-nɩɣzɛ yɔɔ nɛ ɖɩtaanɩɣzɩ kadadayaɣ mbʋ pɩpɩzɩɣ nɛ pɩtalɩ-ɖʋ cee yɔ pɩ-yɔɔ. (Mat. 6:34) Ye ɖɩkalɩɣ Bibl nɛ ɖɩmaɣzɩɣ ndʋ ɖɩkalɩɣ yɔ tɩ-yɔɔ ɖoŋ ɖoŋ yɔ, pɩkaɣ-ɖʋ wɛʋ kɛlɛʋ se ɖɩtɔzɩ Bibl paɣtʋ kila yɔɔ alɩwaatʋ kɩbandʋ yɔɔ.

9. Ɛzɩma Bibl taa kɛdɛsɩ pɩzɩɣ nɛ sɩsɩnɩ-ɖʋ nɛ ɖɩtaa Yehowa liu se ɛsɩɣnɩ-ɖʋ?

⁹ Ðɩnaɣ Bibl taa ɖɔɖɔ ɛyaa mba paata Yehowa liu nɛ Yehowa sɩnɩ-wɛ yɔ pa-kɩɖaŋ. (Ebr. 11:​32-34; Yak. 5:17) Ye ɖɩmaɣzɩɣ ɛyaa mba pɛ-kɛdɛsɩ yɔɔ yɔ, pɩsɩɣnɩ-ɖʋ nɛ ɖa-taa tɛ se Yehowa kɛ «ɖa-ɖɩjɔzɩyɛ nɛ ɖo-ɖoŋ, ɛkɛ sɩnɩyʋ weyi papɩzɩɣ nɛ pana-ɩ kɛlɛʋ yem kʋñɔŋ alɩwaatʋ taa yɔ.» (Keɣ. 46:1) Ye ɖɩmaɣzɩɣ ɛzɩma caanaʋ taa Yehowa sɛyaa kaawɩlaa se pɛwɛnɩ tisuu Yehowa yɔɔ yɔ pɩ-yɔɔ nɛ ɛzɩma powobi pɩ-yɔɔ nɛ pɛsɛɣ-ɩ paa pakataɣ kala yɔ, piseɣtiɣ-ɖʋ nɛ ɖa ɖɔɖɔ ɖɩmaɣzɩnɩ-wɛ.—Yak. 5:​10, 11.

10. Ɛbɛ ŋpɩzɩɣ ŋla nɛ Bibl wazɩ-ŋ nɛ pɩkɩlɩ?

¹⁰ Mbʋ ŋpɩzɩɣ ŋla yɔ. Kalɩɣ Bibl paa evemiye nɖɩ nɛ ŋma masɩ nzɩ ŋmaɣzɩɣ se sɩpɩzɩɣ nɛ sɩsɩnɩ-ŋ yɔ nɛ ŋsɩɩ. Ɛyaa sakɩyɛ ɖiɣzinaa ɖɔɖɔ se ye patazɩɣ evemiye mayaɣ taa yɔ, pɩsɩɣnɩ-wɛ nɛ papaɣzɩ paa evemiye nɖɩ nɛ Bibl taa lɩmaɣzɩyɛ naɖɩyɛ. Payaɣ koobu halɩñɩnʋ nɔɔyʋ se Marie.a Eɖiɣzinaa se tɔm ndʋ tɩkɛ toovenim alɩwaatʋ ndʋ kansɛɛrɩ kʋdɔŋ kpa ɛ-lʋlɩyaa yɔ. Ɛbɛ kaasɩnɩ-ɩ nɛ ɛɖɔkɩ ɛ-laŋɩyɛ alɩwaatʋ ndʋ ɛcɔŋnaɣ pɔ-yɔɔ pɛ-kɛdɛzaɣ fenasɩ taa yɔ? Ɛyɔɔdaa se: «Paa tanaŋ ŋgʋ, mankalaɣ evemiye mayaɣ nɛ mamaɣzɩɣ kɔ-yɔɔ. Ðʋtʋ ndʋ tɩsɩɣaɣnɩ-m nɛ mɛwɛɣnɩ Bibl taa lɩmaɣzɩyɛ naɖɩyɛ paa evemiye nɖɩ ma-lɩmaɣza taa; piyeba nɛ manka ma-lɩmaɣza mbʋ pɩwɛ ɖeu yɔ pɩ-yɔɔ nɛ mantaakaŋ-yɛ wɛtʋ ndʋ tɩ-taa maawɛɛ yɔ tɩ-yɔɔ se pitibi-m yɔɔɔ.»—Keɣ. 61:2.

KOOBIYA

11. Ye ɖɩnawa se pɩtɩkɛ ɖe-ɖeke ɖɩwɛna nɛ ɖɩkatɩɣ kʋñɔmɩŋ yɔ, ɛzɩma pɩlakɩ-ɖʋ?

¹¹ Yehowa ha-ɖʋ koobiya se pasɩnɩ-ɖʋ nɛ ɖɩɖɔkɩ ɖa-laŋa. Ye ɖɩnawa se «[ɖo-koobiya] kpeekpe ɖiɣni katʋʋ kʋñɔmɩŋ kʋɖʋmɩŋ ɛnɩ ɛjaɖɛ yɔɔ» yɔ, piyeki nɛ ɖa-taa tɛ se ɖɩfɛyɩ ɖe-ɖeke. (1 Pɩy. 5:9) Toovenim taa lɛ, ɖa-taa pɩzɩɣ nɛ pɩtɛ se paa wɛtʋ ndʋ taa ɖɩtɩɩwɛɛ yɔ, ɖo-koobiya ɖɔɖɔ katɩ wɛtʋ ndʋ tɩ-ɖɔndɩ nɛ pɔɖɔkɩ pa-laŋa. Pɩwɩlɩɣ se ɖa ɖɔɖɔ ɖɩpɩzɩɣ nɛ ɖɩɖɔkɩ ɖa-laŋa.—Tʋma 14:22.

12. (a) Ɛzɩma ɖo-koobiya pɩzɩɣ nɛ pasɩnɩ-ɖʋ? (b) Nɛ ɛbɛ ɖɩpɩzɩɣ nɛ ɖɩlabɩ-wɛ? (2 Kɔrɛntɩ mba 1:​3, 4)

¹² Ðo-koobiya pɩzɩɣ patɩŋnɩ tɔm ndʋ pɔyɔɔdʋʋ nɛ mbʋ palakɩ yɔ pɩ-yɔɔ nɛ pasɩnɩ-ɖʋ nɛ ɖɩɖɔkɩ ɖa-laŋa. Apostoloo Pɔɔlɩ ɖiɣzinaa se tɔm ndʋ tɩkɛ toovenim. Takayɩsɩ nzɩ ɛmawa yɔ sɩ-taa, ɖoŋ ɖoŋ lɛ, mba paasɩnɩ-ɩ alɩwaatʋ ndʋ ɛɛwɛ salaka taa ɖɩɣa nakɛyɛ taa yɔ, ɛyaɣaɣ pa-hɩla nɛ ɛsɛɣ-wɛ. Paahɛzɩ ɛ-laŋɩyɛ, pakpazɩ-ɩ ɖoŋ nɛ pɔcɔnɩ ɛ-kɩcɛyɩm ɖeɖe. (Filp. 2:​25, 29, 30; Kol. 4:​10, 11) Sɔnɔ ɖɔɖɔ, koobiya pɩzɩɣ nɛ pasɩnɩ-ɖʋ mbʋ. Alɩwaatʋ ndʋ ɖɩkatɩɣ kala yɔ ɖo-koobiya pɩzɩɣ pasɩnɩ-ɖʋ nɛ ɖɩɖɔkɩ ɖa-laŋa; nɛ ɖa ɖɔɖɔ ɖɩpɩzɩɣ ɖɩsɩnɩ-wɛ nɛ pɔɖɔkɩ pa-laŋa alɩwaatʋ ndʋ pakatɩɣ kala yɔ.—Kalɩ 2 Kɔrɛntɩ mba 1:​3, 4.

13. Ɛbɛ kaasɩnɩ koobu halɩñɩnʋ Maya nɛ ɛɖɔkɩ ɛ-laŋɩyɛ?

¹³ Payaɣ koobu halɩñɩnʋ nɔɔyʋ se Maya, ɛwɛ Rusii ɛjaɖɛ taa. Koobiya kpazɩ-ɩ ɖoŋ siŋŋ. Pɩnaɣ 2020 taa, polisinaa woba nɛ pewili ɛ-ɖɩɣa taa nɛ pʋwayɩ lɛ, pɩpɔzɩ se pahʋʋnɩ-ɩ tɔm mbʋ pʋyɔɔ yɔ eheyi e-tisuu tɔm ɛyaa lalaa. Ɛyɔɔdaa se: «Alɩwaatʋ ndʋ tɩ-taa, piitibi-m yɔɔɔ nɛ manɩɣzɩɣ, nɛ maawɛ laŋwɛɛkɩyɛ taa. Ɛlɛ koobiya yaɣaɣ-m pɔrtaabɩlɩ yɔɔ, nɛ nabɛyɛ maɣaɣ-m message waa nɛ lalaa maɣaɣ-m takayɩsɩ. Piyeba nɛ man-taa tɛ se pɔsɔɔlɩ-m siŋŋ. Maanawa se koobiya sɔɔlɩ-m nɛ pɛkɛ mɔ-hɔʋ taa mba. Ɛlɛ kpaɣnɩ pɩnaɣ 2020 taa lɛ, man-taa tɛmnɩ tɔm ndʋ nɛ pɩkɩlɩ.»

14. Alɩwaatʋ ndʋ ɖɩwɛɣ kaɖɛ wɛtʋ taa yɔ, ɛbɛ ɖɩpɩzɩɣ ɖɩla nɛ ɖo-koobiya sɩnɩ-ɖʋ? (Cɔnɩ ɖɔɖɔ kɩlɛmʋʋ.)

¹⁴ Mbʋ ŋpɩzɩɣ ŋla yɔ. Alɩwaatʋ ndʋ ŋlʋkɩnɩ kaɖɛ naɖɩyɛ yɔ, pɩcɛyaa se ŋheyi-tʋ ño-koobiya nɛ ŋkpakɩɣ alɩwaatʋ nɛ ña nɛ wɛ ɩcakɩ. Sɔɔndʋ ɛtaakpa-ŋ se ŋpɔzɩ ɛzʋtʋyaa se pasɩnɩ-ŋ. Pɛwɛ «ɛzɩ kizinziku helim alɩwaatʋ taa yɔ, [ɛzɩ] ɖɩjɔzɩyɛ tɛʋ ŋgʋ kɩnɩɣnɩ helim yɔ» kɩ-taa yɔ. (Iza. 32:​2, pɩ-tɛɛ tɔm) Pɩtasɩ lɛ, tɔzɩ se ño-koobiya Krɩstʋ mba wɛɛ nɛ palʋkɩnɩ kaɖɛ wɛtʋ ɖɔɖɔ. Ye nɔɔyʋ ɛwɛ kɩcɛyɩm taa nɛ ŋlabɩ-ɩ camɩyɛ lakasɩ yɔ, pɩsɩɣnɩ-ŋ nɛ ŋwɛɛnɩ lɩmaɣza wena amʋnaa yɔ, nɛ pɩsɩɣnɩ-ŋ nɛ ŋɖɔkɩ ña-laŋɩyɛ.—Tʋma 20:35.

LIDAƲ

15. (a) Ɛbɛ lidaʋ sɩnɩ Yesu nɛ ɛla? (b) Ɛzɩma ɖe-lidaʋ sɩɣnɩ-ɖʋ? (Ebree mba 12:2)

¹⁵ Yehowa ha-ɖʋ lidaʋ ŋgʋ kɩkam camɩyɛ yɔ se kɩsɩnɩ-ɖʋ nɛ ɖɩɖɔkɩ ɖa-laŋa. (Roma 15:13) Tɔzɩ ɛzɩma lidaʋ sɩnɩ Yesu nɛ ɛɖɔkɩ ɛ-laŋɩyɛ e-wezuu caɣʋ taa evemiye nɖɩ ɖɩɩkɩlɩ kaɖɛ yɔ ɖɩ-taa yɔ. (Kalɩ Ebree mba 12:2.) Yesu kaanawa se e-siɣsiɣ wɛtʋ kaɣ ñalʋʋ Yehowa hɩɖɛ yɔɔ. Ɛɛɖaŋ kpam se alɩwaatʋ ɛtalɩ nɛ ɛpɩsɩ ɛ-Caa cɔlɔ nɛ ɛpɩsɩ Wiyaʋ nɛ ɛ nɛ e-koobiya patam numwaa pɔtɔɔ kewiyitu. Mbʋ ɖɔɖɔ, lidaʋ ŋgʋ ɖɩwɛna se ɖɩkaɣ caɣʋ wezuu tam ɛjaɖɛ kɩfaɖɛ taa yɔ, kɩsɩɣnɩ-ɖʋ se ɖɩɖɔkɩ ɖa-laŋa kala wena Sataŋ ɛjaɖɛ kɔŋnɩ ɖɔ-yɔɔ yɔ a-taa.

16. (a) Ɛzɩma lidaʋ sɩnɩ koobu halɩñɩnʋ nɔɔyʋ nɛ ɛɖɔkɩ ɛ-laŋɩyɛ? (b) Nɛ ɛbɛ ŋkpɛlɩkɩ tɔm ndʋ ɛyɔɔdaa yɔ tɩ-taa?

¹⁶ Payaɣ koobu halɩñɩnʋ nɔɔyʋ se Anna, ɛwɛ Rusii ɛjaɖɛ taa. Paakpa ɛ-walʋ nɛ pɔtɔ-ɩ salaka se pʋwayɩ lɛ paahʋʋnɩ-ɩ tɔm. Iyele nɛ ɖɩna ɛzɩma lidaʋ sɩnɩ-ɩ yɔ. Alɩwaatʋ ndʋ pɩlabɩ mbʋ yɔ, Anna yɔɔdaa se: «Mantɩmaɣnɩ Yehowa cee wayɩ lidaʋ ŋgʋ ɛha-ɖʋ yɔ kɩ-yɔɔ nɛ mamaɣzɩɣ kɩ-yɔɔ ɖoŋ ɖoŋ; piyeba nɛ pɩtɩkɩlɩ-m tibu yɔɔɔ. Maanawa se pɩkaɣ ñɔɔzʋʋ nɛ ɛsɩndaa. Yehowa kaɣ wabʋ, nɛ ɖa ɖɔɖɔ ɖɩkaɣ wabʋ.»

17. Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ lidaʋ ŋgʋ Yehowa ha-ɖʋ yɔ kɩ-yɔɔ? (Cɔnɩ ɖɔɖɔ kɩlɛmʋʋ.)

¹⁷ Mbʋ ŋpɩzɩɣ ŋla yɔ. Kpakɩɣ alɩwaatʋ nɛ ŋmaɣzɩɣ cee wayɩ kɩbaŋʋ ŋgʋ kɩ-tamaɣ Yehowa labɩ-ɖʋ yɔ kɩ-yɔɔ. Maɣzɩ se ŋtɛm wɛʋ ɛjaɖɛ kɩfaɖɛ taa nɛ ŋɖiɣni naʋ wazasɩ nzɩ ŋkaɣ hiɣu yɔ. Nɛ paa kʋñɔŋ ŋgʋ kɩ-taa ɖɩtɩɩwɛ lɛɛlɛɛyɔ yɔ, kɩkaɣ wɛʋ «alɩwaatʋ pazɩ nɛ kɩtɩpaɣlɩ» ye ɖɩkpaɣ-kʋ nɛ ɖɩmaɣzɩnɩ wezuu maatɛŋ ŋgʋ ɖɩkaɣ caɣʋ paradisuu taa yɔ. (2 Kɔr. 4:17) Pɩtasɩ lɛ, la mbʋ payɩ ŋpɩzɩɣ yɔ nɛ ŋheyi ɛyaa lalaa ñe-tisuu tɔm. Maɣzɩ nɛ ŋna ɛzɩma wezuu caɣʋ wɛ-wɛ kaɖɛ Sataŋ ɛjaɖɛ ɖɩnɛ ɖɩ-taa yɔ. Pakatɩɣ kala sakɩyɛ, ɛlɛ paasɩŋ lidaʋ kɩbaŋʋ ŋgʋ Ɛsɔ labɩ-ɖʋ yɔ kɩ-yɔɔ tɔm. Paa tɔm kɛlɛʋ ñɩndʋ natʋyʋ ŋheyi-wɛ yɔ, pɩpɩzɩɣ nɛ piseɣti-wɛ nɛ pɔsɔɔlɩ se patɩlɩ tamasɩ nzɩ Yehowa laba yɔ sɩ-yɔɔ tɔm nɛ pɩkɩlɩ.

18. Ɛbɛ yɔɔ ɖɩpɩzɩɣ nɛ ɖɩtaa liu tamasɩ nzɩ Yehowa laba yɔ?

¹⁸ Yɔɔb ɖɔkɩ ɛ-laŋɩyɛ kala sakɩyɛ taa nɛ pɩtɛ lɛ, eheyi Yehowa se: «Lɛɛlɛɛyɔ, manawa se ŋpɩzɩɣ nɛ ŋla pɩtɩŋa nɛ mbʋ payɩ ŋɖʋ ña-taa se ŋlakɩ yɔ, pɩ-taa nabʋyʋ fɛyɩ se ŋŋpɩzɩɣ pɩ-labʋ.» (Yɔɔb 42:2) Yɔɔb kpɛlɩkaa se nabʋyʋ ɛɛpɩzɩɣ nɛ pɩɖɩɣ Yehowa nʋmɔʋ se ɛtaaɖɔ ɛ-tamasɩ yɔɔ. Toovenim tɔm ndʋ, tɩpɩzɩɣ nɛ tɩsɩnɩ-ɖʋ nɛ ɖɩɖɔkɩ ɖa-laŋa alɩwaatʋ ndʋ ɖɩwɛɣ kʋñɔŋ taa yɔ. Kɩɖaʋ nakʋyʋ yɔ: Maɣzɩ se pɩwɛɛ nɛ pɩwɩɣ halʋ nɔɔyʋ pɩnzɩ sakɩyɛ. Pitibi-i yɔɔɔ mbʋ pʋyɔɔ yɔ ewoba nɛ ɛna ɖɔkɔtɔnaa sakɩyɛ ɛlɛ pa-taa nɔɔyʋ tɩpɩzɩ nɛ ɛwaa-ɩ ɛ-kʋdɔŋ. Ɛlɛ pʋwayɩ lɛ, ɛna ɖɔkɔtɔ kɩbanʋ nɔɔyʋ nɛ ɛlɛ tɩlɩ kʋdɔŋ ŋgʋ ɖeyi ɖeyi kɩcɛyɩɣ-ɩ yɔ, nɛ eheyi-i ɛzɩma ɛkaɣ kpaɣnʋʋ nɛ ɛwaa-ɩ kʋ yɔ. Peeɖe ɛ-taa labɩ leleŋ siŋŋ paa pɩkpakɩɣ alɩwaatʋ se pʋcɔ nɛ ɛ-yɔɔ cɛ yɔ. Lɛɛlɛɛyɔ pɩwɛɣ-ɩ kɛlɛʋ se ɛɖɔkɩ ɛ-laŋɩyɛ mbʋ pʋyɔɔ yɔ ɛnawa se ɛ-yɔɔ kaɣ cɛbʋ. Mbʋ ɖɔɖɔ lidaʋ ŋgʋ ɖɩwɛna se Paradisuu kaɣ kɔm yɔ, kɩsɩɣnɩ-ɖʋ se ɖɩɖɔkɩ ɖa-laŋa.

19. Ɛbɛ pɩpɔzʋʋ-ɖʋ se pɩsa nɛ ɖɩɖɔkɩ ɖa-laŋɩyɛ?

¹⁹ Ɛzɩ ɖɩnaʋ yɔ, pɩsa nɛ ɖɩɖɔkɩ ɖa-laŋa ɖa-kʋñɔmɩŋ taa lɛ, Yehowa ha-ɖʋ waɖɛ se ɖɩtɩmnɩ-ɩ; ɛha-ɖʋ ɖɔɖɔ ɛ-Tɔm, ɖo-koobiya nɛ lidaʋ. Ye ɖɩlakɩnɩ tʋmɩyɛ nʋmɔŋ ɛnɩ camɩyɛ yɔ, Yehowa kaɣ-ɖʋ sɩnʋʋ paa kʋñɔŋ ŋgʋ kɩ-taa ɖɩtɩɩwɛɛ yɔ. Ɛkaɣ wobu pɩ-yɔɔ nɛ ɛsɩɣnɩ-ɖʋ pɩkɔɔ pɩsɩɩnɩ kɩyakʋ ŋgʋ ɛɖɩzɩɣ Sataŋ ɛjaɖɛ nɛ kʋñɔmɩŋ tɩŋa yɔ.—Filp. 4:13.