Tɩmɩɣ ɛyaa lalaa yɔɔ

1. Ɛzɩma ɖɩlaba nɛ ɖɩna se ɖa-adɩma tɔm cɛyɩ Yehowa ɛsɩndaa?

ADƖMA kɛ kʋjɔʋ kɩbaŋʋ siŋŋ. Maɣzɩ tɔm tʋnɛ tɩ-yɔɔ nɛ ŋna. Yehowa ɖʋ tʋma ndɩ ndɩ Ɛsɔ tiyiyaa. (Keɣ. 91:11) Ɛɖʋ ɖɔɖɔ ɛ-Pɩyalʋ tʋma kɩcɛya naayɛ. (Mat. 28:18) Ɛlɛ anɩ ɛlɩzaa se ewelisi adɩma wena ɛyaa lakɩ yɔ? Ɛtɩlɩzɩ nɔɔyʋ. Ɛ-maɣmaɣ ɛlakɩnɩ tʋmɩyɛ nɖɩ. Yehowa weyi ɛkɛ «adɩma Welisiyu» yɔ, ɛ-maɣmaɣ ewelisiɣni ɖa-adɩma.—Keɣ. 65:2.

2. Ɛbɛ yɔɔ apostoloo Pɔɔlɩ kɛ kɩɖaʋ kɩbaŋʋ adɩma hɔɔlʋʋ taa?

² Ðɩpɩzɩɣ nɛ ɖɩtɩmnɩ Yehowa faaa nɛ ɖiheyi-i ɖa-kɩcɛyɩm. Ɛlɛ pɩwɛɛ ɖɔɖɔ se ɖɩtɩmɩ ɛyaa lalaa yɔɔ. Mbʋ apostoloo Pɔɔlɩ laba. Ɛma tɔm tʋnɛ Efɛɛzɩ ɛgbɛyɛ: «Mɛwɛɛ nɛ mɔntɔzʋʋ mɩ-yɔɔ ma-adɩma taa.» (Efɛz. 1:16) Pɔɔlɩ tɩmɩ ɛyaa nabɛyɛ yɔɔ ɖɔɖɔ. Eheyi Timootee se: «Mɛwɛnɩ ɛsɩmɩyɛ Ɛsɔ yɔɔ, . . . nɛ maayeki ñɔ-yɔɔ tɔzʋʋ kpa alɩwaatʋ ndʋ mentendiɣ Ɛsɔ ɖoo nɛ wɩsɩ yɔ.» (2 Tim. 1:3) Pɔɔlɩ kataɣ kala nɛ ɛtɩmaɣ a-yɔɔ. (2 Kɔr. 11:23; 12:​7, 8) Paa mbʋ yɔ, ɛkpakaɣ alɩwaatʋ nɛ ɛtɩmɩɣ ɛyaa lalaa yɔɔ ɖɔɖɔ.

3. Ɛbɛ yɔɔ ɖɩpɩzɩɣ nɛ ɖɩsɔɔ se ɖɩtɩmɩ ɛyaa lalaa yɔɔ?

³ Nabʋyʋ taa, ɖɩpɩzɩɣ ɖɩsɔɔ se ɖɩtɩmɩ ɛyaa lalaa yɔɔ. Ɛbɛ yɔɔ? Payaɣ koobu halɩñɩnʋ nɔɔyʋ se Sabrina.a Ɛyɔɔdɩ mbʋ pʋyɔɔ ɖɩpɩzɩɣ nɛ ɖɩsɔɔ nɛ ɖɩɩtɩmɩɣ lalaa yɔɔ yɔ pɩ-tɔm. Ɛyɔɔdaa se: «Pɩɖɔkɩnɩ-ɖʋ kpem ɖe-wezuu caɣʋ taa, nɛ ɖɩkatɩɣ ɖɔɖɔ kala. Pʋyɔɔ lɛ, ɖɩpɩzɩɣ nɛ ɖɩka ɖa-lɩmaɣza kala wena ɖɩkatɩɣ yɔ a-yɔɔ, nɛ ɖɩɩtɩmɩɣ lɛ ɖɩtɩmɩɣ ɖe-ɖeke ɖa-kɩcɛyɩm yɔɔ.» Pɩlakɩ ña ɖɔɖɔ mbʋ nabʋyʋ taa? Ye mbʋ yɔ, tɔm ñʋʋ kʋnɛ kɩpɩzɩɣ nɛ kɩsɩnɩ-ŋ. Kajalaɣ lɛ, kɩyɔɔdʋʋ mbʋ pʋyɔɔ pɩcɛyaa se ɖɩtɩmɩɣ ɛyaa lalaa yɔɔ yɔ, nɛ nabʋlɛ lɛ kɩsɩɣnɩ-ɖʋ nɛ ɖɩna ɛzɩma ɖɩpɩzɩɣ nɛ ɖɩla mbʋ yɔ.

ƐBƐ YƆƆ PƖCƐYAA SE ÐƖTƖMƖƔ ƐYAA LALAA YƆƆ?

4-5. Adɩma wena ɖɩlakɩ ɛyaa lalaa yɔɔ yɔ, ɖoŋ weyi awɛna? (Yakubu 5:16)

⁴ «Adɩma wɛnɩ ɖoŋ siŋŋ.» (Kalɩ Yakubu 5:16.) Ye ɖɩtɩmɩɣ ɛyaa lalaa yɔɔ yɔ, ɛzɩ toovenim taa lɛ, wɛtʋ ndʋ tɩ-taa pɛwɛɛ yɔ tɩpɩzɩɣ nɛ tɩlɛɣzɩ? Ɛɛɛ, tɩpɩzɩɣ nɛ tɩlɛɣzɩ. Yesu kaanawa se piileɖiɣ lɛ, apostoloo Pɩyɛɛrɩ kaɣ-ɩ kizuu lɛ, eheyi-i se: «Mentendi Ɛsɔ ñɔ-yɔɔ se ñe-tisuu ɛtaahɛɛ.» (Luka 22:32) Apostoloo Pɔɔlɩ ɖɔɖɔ kaanawa se ye ɖɩtɩmɩɣ ɛyaa lalaa yɔɔ yɔ, pɛ-wɛtʋ pɩzɩɣ nɛ tɩlɛɣzɩ. Paaɖɩɣ-ɩ salaka ɖulum Roma lɛ, eheyi Fileemɔɔ se: «Mantaɣ liu se mɩ-adɩma yɔɔ lɛ, pakaɣ-m yebu nɛ manpɩsɩ mɩ-cɔlɔ.» (Filem. 22) Nɛ mbʋ pɩlaba. Pitileɖi lɛ, palɩzɩ Pɔɔlɩ salaka taa nɛ ɛɖaɣnɩ paɣzʋʋ tɔm susuu.

⁵ Pɩɩwɩlɩɣ se alɩwaatʋ ndʋ ɖɩtɩmɩɣnɩ Yehowa yɔ, ɖɩpɩzɩɣ nɛ ɖɩñɩɣ ɛ-yɔɔ se ɛla mbʋ ɖɩsɔɔlaa yɔ. Ɛnawa se mbʋ ɛ-sɛyaa pɔzʋʋ-ɩ yɔ, pɩ-tɔm cɛyɩ pɛ-ɛsɩndaa. Nɛ nabʋyʋ taa, ɛlɩzɩɣ se ɛlakɩ-wɛ mbʋ pɔpɔzʋʋ-ɩ yɔ. Ye ɖɩsɩm tɔm ndʋ yɔ, pɩpɩzɩɣ pɩsɩnɩ-ɖʋ nɛ ɖɩtɩmnɩ Yehowa nɛ ɖa-laŋɩyɛ pilim tɔm natʋyʋ yɔɔ, nɛ pʋwayɩ lɛ, ɖa-taa tɛ se ɛkaɣ ti-ɖeɖe cɔnʋʋ ɛzɩ pɩmʋnʋʋ yɔ.—Keɣ. 37:5; 2 Kɔr. 1:11.

6. Ye ɖɩtɩmɩɣ ɛyaa lalaa yɔɔ yɔ, ɛzɩma pɩsɩɣnɩ-ɖʋ? (1 Pɩyɛɛrɩ 3:8)

⁶ Ye ɖɩtɩmɩɣ ɛyaa lalaa yɔɔ yɔ, pɩsɩɣnɩ-ɖʋ nɛ ɖɩwɛɛnɩ «pʋtɔdɩyɛ naʋ siŋŋ.» (Kalɩ 1 Pɩyɛɛrɩ 3:8.) Ɛyʋ weyi ɛkɛ pʋtɔdɩyɛ nayʋ yɔ, ɛsɩm kʋñɔŋ ŋgʋ kɩ-taa ɛyʋ lɛlʋ wɛɛ yɔ nɛ ɛsɔɔlaa se ɛla nabʋyʋ nɛ ɛsɩnɩ-ɩ. (Mark. 1:​40, 41) Payaɣ ɛzʋtʋyʋ nɔɔyʋ se Michael. Ɛyɔɔdaa se: «Alɩwaatʋ ndʋ mantɩmɩɣ ɛyaa lalaa kɩcɛyɩm yɔɔ yɔ, mantɩlɩɣ kala wena pakatɩɣ yɔ nɛ pɩkɩlɩɣ nɛ piyeki nɛ mɔnsɔɔlʋʋ-wɛ nɛ pɩkɩlɩɣ. Mɔñɔtʋʋnɩ-wɛ ɖɔɖɔ nɛ pɩkɩlɩɣ, paa patiɖiɣzina yɔ.» Payaɣ ɛgbɛyɛ taa ɛzʋtʋyʋ lɛlʋ se Richard. Ɛlɛ ñɔyɔɔdaa se: «Alɩwaatʋ ndʋ ɖɩtɩmɩɣ ɛyʋ nɔɔyʋ yɔɔ yɔ, piseɣtiɣ-ɖʋ kpem se ɖɩla nabʋyʋ nɛ ɖɩsɩnɩ-ɩ.» Ɛsɔzaa se: «Alɩwaatʋ ndʋ ɖɩsɩɣnɩ ɛyʋ weyi ɖɩtɩmɩ ɛ-yɔɔ yɔ, pɩwɛ ɛzɩ ɖɩwɛɛ nɛ ɖɩɖʋʋ nesi se Yehowa ecosi adɩma ana a-yɔɔ yɔ.»

7. Ye ɖɩtɩmɩɣ ɛyaa lalaa yɔɔ yɔ, ɛzɩma pɩsɩɣnɩ-ɖʋ nɛ ɖɩtaakɩlɩ kam ɖa-lɩmaɣza ɖa-maɣmaɣ ɖa-kʋñɔmɩŋ yɔɔ? (Filiipi mba 2:​3, 4) (Cɔnɩ ɖɔɖɔ kɩlɛmɩŋ.)

⁷ Ye ɖɩtɩmɩɣ ɛyaa lalaa yɔɔ yɔ, pɩsɩɣnɩ-ɖʋ se ɖɩwɛɛnɩ lɩmaɣza kɩbana ɖa-maɣmaɣ ɖa-kʋñɔmɩŋ yɔɔ. (Kalɩ Filiipi mba 2:​3, 4.) Ða-tɩŋa ɖɩkatɩɣ kala, mbʋ pʋyɔɔ yɔ ɖɩwɛ ɛjaɖɛ nɖɩ Sataŋ ɖiyiɣ yɔ ɖɩ-taa. (1 Yoh. 5:19; Natʋ 12:12) Ye ɖɩtɩmɩɣ ɛyaa lalaa yɔɔ ɖoŋ ɖoŋ yɔ, pɩtɔzʋʋ-ɖʋ se ɖo-koobiya «kpeekpe ɖiɣni katʋʋ kʋñɔmɩŋ kʋɖʋmɩŋ ɛnɩ ɛjaɖɛ yɔɔ.» (1 Pɩy. 5:9) Payaɣ koobu halɩñɩnʋ nʋmɔʋ lɩzɩyʋ nɔɔyʋ se Katherine. Ɛyɔɔdaa se: «Mantɩmɩɣ ɛyaa lalaa yɔɔ lɛ, pɩtɔzʋʋ-m se paba ɖɔɖɔ pɛwɛɛ nɛ pakatɩɣ kala. Piyeki nɛ maakɩlɩɣ maɣzʋʋ kala wena mankatɩɣ yɔ a-yɔɔ.»

MBA PƆ-YƆƆ ÐƖPƖZƖƔ NƐ ÐƖTƖMƖ YƆ

8. Mba yɔɔ ɖɩpɩzɩɣ nɛ ɖɩtɩmɩ?

⁸ Mba yɔɔ ɖɩpɩzɩɣ nɛ ɖɩtɩmɩ? Ðɩpɩzɩɣ nɛ ɖɩtɩmɩ ɛyaa mba pɩwɩɣ-wɛ yɔ pɔ-yɔɔ, piya evelisi nzɩ sɩ-taabalaa hoŋuu-sɩ yaa patakɩɣ-sɩ se sɩla mbʋ pɩfɛyɩ ɖeu yɔ sɩ-yɔɔ, nɛ akpadɩyaa yɔɔ. Ðɩpɩzɩɣ ɖɔɖɔ nɛ ɖɩtɩmɩ ɖo-koobiya mba pɔ-hɔŋ taa mba yaa komina kaɖɩɣnɩ-wɛ yɔ pɔ-yɔɔ. (Mat. 10:​18, 36; Tʋma 12:5) Pɩtasɩ ɖɔɖɔ lɛ, ɖɩpɩzɩɣ nɛ ɖɩtɩmɩ ɖo-koobiya mba ñam ñam lakasɩ yeba nɛ pese pa-ɖɩsɩ yɔ pɔ-yɔɔ, yaa ɖɩtɩmɩ mba kɛgbɛdɩsasɩ talɩ-wɛ yɔ pɔ-yɔɔ. Pɩtɩla yɔ ɖɩɩsɩŋ koobiya mba, ɛlɛ ye ɖɩtɩmɩɣ pɔ-yɔɔ yɔ, ɖɩwɩlɩɣ se ɖɩɖɔŋ paɣtʋ ndʋ Yesu ɖʋ-ɖʋ se ‘ɖɩsɔɔlɩ ɖama’ yɔ tɩ-yɔɔ.—Yoh. 13:34.

9. (a) Ɛbɛ yɔɔ pɩwɛɛ se ɖɩtɩmɩɣ koobiya mba pɛɖɛɣ nɔɔ Yehowa ɛgbɛyɛ taa yɔ pɔ-yɔɔ? (b) Ɛbɛ yɔɔ pɩwɛɛ ɖɔɖɔ se ɖɩtɩmɩɣ koobiya mba pa-halaa yɔɔ?

⁹ Ðɩpɩzɩɣ ɖɔɖɔ nɛ ɖɩtɩmɩ koobiya mba pɛɖɛɣ nɔɔ Yehowa ɛgbɛyɛ taa yɔ pɔ-yɔɔ. Pa-taa nabɛyɛ lɛ Nɔɔɖɛyaa ɛgbɛyɛ taa koobiya nɛ pa-sɩnɩyaa, ɛgbɛyɛ pilinzi kɔɔmiteewaa taa mba, ɛgbɛyɛ pilinzi taa tʋma yɔɔ cɔnɩyaa, egeetiye yɔɔ cɔnɩyaa, ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa. Paa koobiya mba, palakɩ tʋma sakɩyɛ se pasɩnɩ-ɖʋ yɔ, pa-taa sakɩyɛ katɩɣ kala ndɩ ndɩ. (2 Kɔr. 12:15) Mark kɛ egeetiye yɔɔ cɔnɩyʋ. Ɛyɔɔdaa se: «Kala wena mankatɩɣ yɔ a-taa naɖɩyɛ lɛ se monposini ma-lʋlɩyaa, ŋgʋ pakpadɩyaa nɛ pɩwɩɣ-wɛ ɖɔɖɔ. Paa mɔn-kɔɔ nɛ ɛ-walʋ pɛwɛ pɔ-cɔlɔ nɛ pɔcɔŋnɩ pa-kɩcɛyɩm ɖeɖe yɔ, mɛwɛ laŋwɛɛkɩyɛ taa, mbʋ pʋyɔɔ yɔ maapɩzɩɣ nɛ mɛwɛɛ pɔ-cɔlɔ nɛ mansɩnɩ-wɛ ɛzɩ pɩpɔzʋʋ yɔ.» Pɩtɩla ɖɩɩsɩŋ kala wena koobiya kpekpeka tɩnaa mba pakatɩɣ yɔ a-tɩŋa, ɛlɛ pɩwɛɣ ɖeu se ɖɩtɔzʋʋ pɔ-yɔɔ ɖa-adɩma taa. (1 Tes. 5:​12, 13) Ðɩpɩzɩɣ ɖɔɖɔ nɛ ɖɩtɩmɩ koobiya mba pa-halaa yɔɔ, mbʋ pʋyɔɔ pɛwɛɛ nɛ paɖʋʋ pa-walaa nesi se paba iwolo pɩ-yɔɔ nɛ palakɩ pa-tʋma.

10-11. Ɛzɩ Yehowa welisiɣ adɩma wena ɖɩlakɩ nɛ ɖɩpɔzʋʋ-ɩ se ɛsɩnɩ ɖo-koobiya tɩŋa yɔ? Lɩzɩ pɩ-taa.

¹⁰ Ɛzɩ ɖɩyɔɔdʋʋ nɛ pɩɖɛɛ yɔ, ɖoŋ ɖoŋ lɛ ɖɩtɩmɩɣ koobiya tindima ndɩ ndɩ yɔɔ. Paa ɖɩɩmaɣzɩɣ koobu nɔɔyʋ yɔɔ ɖeyi ɖeyi yɔ, ɖɩpɩzɩɣ nɛ ɖɩpɔzɩ Yehowa se ɛsɩnɩ mba pɛwɛ salakanaa taa yɔ, yaa ɛhɛzɩ mba pɛ-ɛyaa kʋsɔɔlaa sɩba yɔ pa-laŋa. Payaɣ ɛgbɛyɛ taa ɛzʋtʋyʋ nɔɔyʋ se Donald; ɛyɔɔdaa se: «Ðo-koobiya sakɩyɛ katɩɣ kala ndɩ ndɩ, nɛ pʋyɔɔ lɛ nabʋyʋ taa, ɖɩtɩmɩɣnɩ Yehowa se ɛsɩnɩ ɖo-koobiya mba payɩ pakatɩɣ kala yɔ.»

¹¹ Ɛzɩ Yehowa welisiɣ adɩma ana a-ɖɔndɩ? Ɛɛɛ, ewelisiɣ-yɛ. Mbʋ pʋyɔɔ yɔ ɖɩɩsɩŋ kala wena ɖeyi ɖeyi paa koobu weyi lɛ, ɛkatɩɣ yɔ. Ye mbʋ, pɩmʋnɩ mbʋ se ɖɩtɩmnɩ Yehowa nɛ ɖɩpɔzɩ-ɩ se ɛsɩnɩ ɖo-koobiya tɩŋa. (Yoh. 17:20; Efɛz. 6:18) Adɩma ana awɩlɩɣ se ɖɩsɔɔlɩ «ɛjaɖɛ kpeekpe yɔɔ koobiya.»—1 Pɩy. 2:17.

ALƖWAATƲ NDƲ ÐƖTƖMƖƔ NƆƆYƲ YƆƆ YƆ

12. Ye ɖɩkɛ ɛyʋ weyi ɛcɔŋnɩ camɩyɛ yɔ, ɛzɩma pɩsɩɣnɩ-ɖʋ alɩwaatʋ ndʋ ɖɩtɩmɩɣ lalaa yɔɔ yɔ?

¹² Kɛ ɛyʋ weyi ɛsɩm cɔnʋʋ yɔ. Pɩtasɩna se ɖɩpɩzɩɣ nɛ ɖɩtɩmɩ ɛyaa tindimiye naɖɩyɛ yɔɔ lɛ, ɖɩpɩzɩɣ ɖɔɖɔ nɛ ɖɩtɩmɩ ɛyʋ nɔɔyʋ yɔɔ ɖeyi ɖeyi nɛ ɖɩyaa ɛ-hɩɖɛ. Nɔɔyʋ wɛ ñɛ-ɛgbɛyɛ taa nɛ ɛlʋkɩnɩ kʋdɔŋ sɔsɔʋ nakʋyʋ? Pitibi ñɛ-ɛgbɛyɛ taa pɩɣa evelaɣ nakɛyɛ yɔɔɔ mbʋ pʋyɔɔ yɔ ko-sukuli taa taabalaa wɛɛ nɛ pañɩkɩɣ kɔ-yɔɔ se kala mbʋ pɩfɛyɩ ɖeu yɔ? Lʋlɩyʋ nɔɔyʋ wɛ ñɛ-ɛgbɛyɛ taa nɛ ɛñakɩ pana se ɛcɔnɩ ɛ-pɩɣa yɔɔ e-ɖeke nɛ «pɩla nɔɔ kʋɖʋmaɣ nɛ lɔŋ sɩɣzʋʋ nɛ paɣʋ mbʋ pɩlɩnɩ Yehowa cɔlɔ yɔ»? (Efɛz. 6:4) Ye ŋkɛ ɛyʋ weyi ɛcɔŋnɩ camɩyɛ yɔ, ŋkaɣ sɔɔlʋʋ lalaa nɛ ŋmaɣzɩɣ pɔ-yɔɔ nɛ pɩkɩlɩ, nɛ pɩkaɣ-ŋ seɣtuu se ŋtɩmɩ pɔ-yɔɔ.b—Roma 12:15.

13. Ɛzɩma ɖɩpɩzɩɣ nɛ ɖɩtɩmɩ koobiya mba ɖɩɩsɩŋ-wɛ yɔ pɔ-yɔɔ?

¹³ Yaa mba ŋtɩmɩɣ pɔ-yɔɔ yɔ pa-hɩla ña-adɩma taa. Halɩ ɖɩpɩzɩɣ nɛ ɖɩla mbʋ alɩwaatʋ ndʋ ɖɩtɩmɩɣ ɛyaa mba ɖɩtɩna-wɛ wiɖiyi yɔ pɔ-yɔɔ yɔ. Kɩɖaŋ nɩɩyɩ lɛ ɖo-koobiya halaa nɛ abalaa mba paɖɩɣ-wɛ salakanaa taa Krimee, Eritree, Rusii nɛ Singaapuuri ajɛɛ taa yɔ. Ŋpɩzɩɣ nɛ ŋna koobiya mba pa-hɩla jw.org yɔɔ.c Payaɣ egeetiye yɔɔ cɔnɩyʋ nɔɔyʋ se Brian, ɛyɔɔdaa se: «Menɖiɣzinaa se alɩwaatʋ ndʋ mamaɣ koobiya mba paɖɩɣ-wɛ salaka yɔ pa-taa nɔɔyʋ hɩɖɛ nɛ mayaɣ-ɖɩ nɛ nɔɔ kʋkʋyaɣ yɔ, pɩsɩɣnɩ-m se mɔntɔzɩ ɖɩ-yɔɔ nɛ maatɩmɩɣ lɛ mantɩmɩ ɛ-yɔɔ.»

14-15. Ɛbɛ pɩzɩɣ pɩsɩnɩ-ɖʋ nɛ ɖɩɩtɩmɩɣ lɛ, ɖɩpɔzɩ nabʋyʋ keekee ɖa-adɩma taa?

¹⁴ Pɔzɩ nabʋyʋ keekee ña-adɩma taa. Michael weyi ɛ-tɔm ɖɩɩyɔɔdaa nɛ pɩɖɛɛ yɔ ɛ-tɔm se: «Maakalɩɣ koobiya mba paɖɩɣ-wɛ salaka yɔ pɔ-yɔɔ tɔm jw.org yɔɔ lɛ, mañakɩ pana se manɖʋ man-tɩ po-lone taa. Manawa se ye maawɛnɩ po-lone taa yɔ mankaɣaɣ nɩɣzʋʋ ma-halʋ yɔɔ nɛ mankaɣaɣ sɔɔlʋʋ se pɔcɔnɩ ɛ-yɔɔ. Mamaɣzɩɣ mbʋ lɛ, pɩsɩɣnɩ-m nɛ maatɩmɩɣ koobiya mba paɖɩɣ-wɛ salaka nɛ pɔɖɔkɩ nesi yɔ pɔ-yɔɔ lɛ, mɔnpɔzɩ nabʋyʋ keekee ma-adɩma taa.»—Ebr. 13:​3, pɩtɛɛ tɔm.

¹⁵ Ye ɖɩmaɣzɩɣ wɛtʋ ndʋ tɩ-taa ɖo-koobiya wɛ salakanaa taa yɔ tɩ-yɔɔ yɔ, pɩsɩɣnɩ-ɖʋ nɛ ɖɩɩtɩmɩɣ pɔ-yɔɔ lɛ ɖɩpɔzɩ nabʋyʋ keekee ɖa-adɩma taa. Ðɩɩtɩmɩɣ lɛ, ɖɩpɩzɩɣ nɛ ɖɩpɔzɩ Yehowa se eyele nɛ salakanaa yɔɔ cɔnɩyaa la ɖo-koobiya camɩyɛ lakasɩ. Ðɩpɩzɩɣ ɖɔɖɔ nɛ ɖɩtɩmɩ se Yehowa eyele nɛ ñʋndɩnaa ha ɖo-koobiya nʋmɔʋ nɛ pala pɛ-Ɛsɔ sɛtʋ tʋma faaa. (1 Tim. 2:​1, 2) Ðɩpɩzɩɣ ɖɩtɩmɩ ɖɔɖɔ se koobiya siɣsiɣ tɩnaa mba paɖɩɣ-wɛ salaka yɔ, pa-kɩɖaʋ kɩbaŋʋ ɛkpazɩ pa-agbaa taa koobiya ɖoŋ, yaa ɖɩtɩmɩ se ɛyaa mba patɩkɛtɩ Yehowa Aseɣɖe Tɩnaa yɔ pana pɛ-wɛtʋ kɩbandʋ nɛ piseɣti-wɛ nɛ pewelisi tɔm ndʋ ɖisusuu yɔ. (1 Pɩy. 2:12) Ðɩpɩzɩɣ ɖɔɖɔ nɛ ɖɩɖʋ ɖa-tɩ koobiya mba pakatɩɣ kala lɛɛna yɔ po-lone taa nɛ pɩsɩnɩ-ɖʋ alɩwaatʋ ndʋ ɖɩtɩmɩɣ pɔ-yɔɔ yɔ. Ye ɖɩkɛ ɛyaa mba pasɩm cɔnʋʋ camɩyɛ yɔ, nɛ ɖɩyaɣ mba ɖɩtɩmɩɣ pɔ-yɔɔ yɔ pa-hɩla nɛ ɖɩɩtɩmɩɣ pɔ-yɔɔ lɛ ɖɩpɔzʋʋ nabʋyʋ keekee yɔ, ɖɩnɛ ɛlɛ ɖɩkaɣ wɩlʋʋ se sɔɔlɩm mbʋ ɖɩwɛnɩ ɖama yɔɔ yɔ pɩpaɣlaa.—1 Tes. 3:12.

WƐƐNƖ LƖMAƔZA WENA AMƲNAA YƆ ÑA-ADƖMA YƆƆ

16. Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ lɩmaɣza wena amʋnaa yɔ ɖa-adɩma yɔɔ? (Maatiyee 6:8)

¹⁶ Ɛzɩ ɖɩnaʋ tɔm ñʋʋ kʋnɛ kɩ-taa yɔ, ɖa-adɩma pɩzɩɣ ayele nɛ nɔɔyʋ wɛtʋ lɛɣzɩ. Paa mbʋ yɔ, pɩwɛɛ se ɖɩwɛɛnɩ lɩmaɣza wena amʋnaa yɔ ɖa-adɩma yɔɔ. Ðɩɩtɩmɩɣ lɛ, pɩwɛɛ se ɖɩtɔzɩ se pɩtɩkɛ tɔm ndʋ Yehowa ɛɛsɩŋ yɔ ɖiheyiɣ-i, nɛ ɖɩɩtasɩɣ-ɩ ɖɔɖɔ lɔŋ ɛzɩma pɩwɛɛ se ɛcɔnɩ tɔm ndʋ ti-ɖeɖe yɔ. Yehowa sɩm mbʋ pɩpɔzʋʋ-ɖʋ yɔ halɩ pʋcɔ nɛ ɖa ɖɩtɩlɩɣ-pʋ. (Kalɩ Maatiyee 6:8.) Ye mbʋ, ɛbɛ yɔɔ pɩwɛɛ se ɖɩtɩmɩɣ lalaa yɔɔ? Pɩtasɩnɩ lɩmaɣza wena ɖɩtɛm yɔɔdʋʋ a-tɔm yɔ lɛ, ɖɩlakɩ mbʋ mbʋ pʋyɔɔ yɔ, mbʋ wɩlɩɣna se ɖɩmaɣzɩɣ ɖama yɔɔ. Sɔɔlɩm seɣtiɣni-ɖʋ nɛ ɖɩtɩmɩɣ ɖama yɔɔ. Nɛ Yehowa taa lakɩ leleŋ alɩwaatʋ ndʋ ɛnaɣ se ɛ-sɛyaa wɛɛ nɛ pamaɣzɩɣnɩ-ɩ nɛ pawɩlɩɣ ɖama sɔɔlɩm yɔ.

17-18. Ɛbɛ yɔɔ pɩwɛɛ se ɖɩtɩmɩɣ ɖo-koobiya yɔɔ? Ha kɩɖaʋ nakʋyʋ.

¹⁷ Paa pɩlakɩ-ɖʋ ɛzɩ adɩma wena ɖɩlabɩ ɖo-koobiya yɔɔ yɔ atiyele nɛ pɛ-wɛtʋ lɛɣzɩ yɔ, awɩlɩɣ se ɖɩsɔɔlɩ-wɛ, nɛ mbʋ kɛdɩɣnɩnɩ Yehowa. Kɩɖaʋ nakʋyʋ yɔ: Ðɩkpaɣ se lʋlɩyaa nabɛyɛ wɛnɩ piya 2, abalɩbɩɣa nɛ halɩbɩɣa. Kɩyakʋ nakʋyʋ lɛ pɩwɩɣ abalɩbɩɣa, nɛ halɩbɩɣa heyi ka-caa se: «Baaba mentendi-ŋ, la nabʋyʋ nɛ ŋsɩnɩ me-neu mbʋ pʋyɔɔ yɔ pɩwɩɣ-ɩ siŋŋ.» Caja tɛm paɣzʋʋ labʋ nabʋyʋ se ɛ-pɩyalʋ yɔɔ ɛcɛ, ɛsɔɔlɩ ɛ-pɩyalʋ nɛ ɛwɛɛ ɛcɔŋnɩ ɛ-yɔɔ camɩyɛ. Paa mbʋ yɔ, caja taa lakɩ leleŋ mbʋ pʋyɔɔ yɔ ɛ-pɛlɛ wɛɛ nɛ ɛmaɣzɩɣ e-neu yɔɔ siŋŋ, nɛ pʋyɔɔ etendi-i se ɛsɩnɩ-ɩ.

¹⁸ Mbʋ ɖeyi ɖeyi Yehowa seɣtiɣ-ɖʋ se ɖɩla, pʋ-tɔbʋʋ se ɖɩmaɣzɩɣ ɖama yɔɔ nɛ ɖɩtɩmɩɣ ɖama yɔɔ. Ye ɖɩlakɩ mbʋ yɔ ɖɩwɩlɩɣ se ɖɩɩmaɣzɩɣ ɖe-ɖeke ɖɔ-yɔɔ ɛlɛ ɖɩwɩlɩɣ se ɖɩsɔɔlɩ ɖo-koobiya siŋŋ, nɛ pɩkɛdɩɣnɩ Yehowa. (2 Tes. 1:3; Ebr. 6:10) Pɩtasɩ lɛ, ɛzɩ ɖɩyɔɔdʋʋ nɛ pɩɖɛɛ yɔ ɖa-adɩma pɩzɩɣ ayele nɛ ɖo-koobu nɔɔyʋ wɛtʋ lɛɣzɩ. Ye mbʋ, ɖɩla mbʋ payɩ ɖɩpɩzɩɣ yɔ nɛ ɖɩtɩmɩɣ ɖama yɔɔ.