Yɔɔdɩ Bibl taa toovenim tɔm nɛ nɔɔ kɩbaŋa alɩwaatʋ kɩbandʋ yɔɔ

1. Ye ɖɩsɔɔlaa se ɖɩwɛɛ Yehowa hɔʋ taa yɔ, ɛbɛ pɩwɛɛ se ɖɩla?

ALƖWAATƲ ndʋ ɖɩcalɩɣ katʋʋ koobu nɔɔyʋ yɔ, ɖoŋ ɖoŋ lɛ, ɖɩpɔzʋʋ-ɩ se: «Ɛzɩma pɩɖɔma nɛ ŋtɩlɩ toovenim?» Nabɛyɛ cosuu se palʋlɩ-wɛ toovenim taa. Pɩtɩla lalaa ñocosuu se mba tɩlʋʋ toovenim yɔ pitileɖita. Pocosuu mbʋ, mbʋ pʋyɔɔ yɔ toovenim tɔm ndʋ tɩwɛ Bibl taa yɔ tɩwɛnɩ ɖoŋ pe-wezuu caɣʋ kpeekpe yɔɔ. Ɛbɛ yɔɔ? Mbʋ pʋyɔɔ yɔ ɖɩnawa se pʋcɔ nɛ ɖɩwɛɛ Yehowa hɔʋ taa lɛ, pɩwɛɛ se ɖɩsɔɔlɩ toovenim nɛ ɖiyele nɛ ɖe-wezuu caɣʋ la nɔɔ kʋɖʋmaɣ nɛ toovenim tɔm ndʋ. Mbʋ ɖɩpɩzɩɣ ɖɩla nɛ ɖɩwɩlɩ se ɖɩsɔɔlɩ toovenim nɛ ɖe-wezuu caɣʋ lakɩ nɔɔ kʋɖʋmaɣ nɛ toovenim yɔ pɩ-taa nabʋyʋ lɛ se ɖɩwɛɛ toovenim ɖɔ-yɔɔdaɣ nɛ ɖa-lakasɩ taa.—Keɣ. 15:​1-3.

2. (a) Wɛtʋ kɩbandʋ ndʋ Yesu kaawɛna? (b) Ɛyaa nɩ tɔm ndʋ Yesu susaa yɔ lɛ, ɛzɩma palaba?

² Yesu yɔɔdaɣ toovenim paa ɛzɩmtaa. E-koyindinaa kaaɖiɣzinaa se ɛyɔɔdʋʋ toovenim halɩ paa ndʋ ɛyɔɔdaɣ yɔ tɩtaakɛdɩɣnɩ-wɛ yɔ. (Mat. 22:16) Yesu heyi ɛ-wayɩ tɩŋɩyaa ɛzɩma ɛyaa kaɣ labʋ alɩwaatʋ ndʋ panɩɣ toovenim tɔm ndʋ ɛwɩlaɣ-wɛ yɔ pɩ-tɔm; ɛyɔɔdaa se: «Mɔnkɔm se mantayɩ, ɛyʋ nɛ ɛ-caa pɛ-hɛkʋ taa, pɛlɛ nɛ e-ɖoo pɛ-hɛkʋ taa, wolu nɛ ɛ-waŋ pɛ-hɛkʋ taa.» (Mat. 10:35) Yesu taasɔɔlɩ se ɛyaa ɩkaɖɩnɩ tɔm ndʋ ɛ nɛ ɛ-wayɩ tɩŋɩyaa posusaɣ yɔ, ɛlɛ ɛɛnawa se mbʋ pɩkaɣ labʋ. (Mat. 23:37) Ɛɛnawa se ɛ-tɔm kaɣ kɔnʋʋ tayʋʋ ɛyaa hɛkʋ taa. Nabɛyɛ kaɣ-tʋ sɔɔlʋʋ, ɛlɛ lalaa ɩɩkaɣ-tʋ sɔɔlʋʋ.—2 Tes. 2:​9-11.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ɛzɩ Yesu yɔ, ɖɩñakɩ pana se ɖɩyɔɔdɩ toovenim paa ɛzɩmtaa, paa ndʋ ɖɩyɔɔdʋʋ yɔ tɩɩkɛdɩɣnɩ ɛyaa yɔ. Nɛ ɖisusuu Bibl taa toovenim tɔm, paa tɔm ndʋ ɖisusuu-wɛ yɔ tɩɖʋʋ pa-taa nabɛyɛ ɖɩwɩzɩyɛ yɔ. Ɛzɩ pɩwɩlɩɣ se pɩtɩcɛyɩ se ɖɩmaɣzɩ ɛzɩma ɖɩyɔɔdʋʋ toovenim tɔm nɛ alɩwaatʋ ndʋ ɖɩyɔɔdʋʋ-tʋ yɔ pɩ-yɔɔ? Aayɩ. Tɔm ñʋʋ kʋnɛ kɩ-taa, kajalaɣ lɛ, ɖɩkaɣ cosuu tɔm pɔzʋʋ pʋnɛ pɩ-yɔɔ: Le ɖɩpɩzɩɣ nɛ ɖɩlɩɩ toovenim yɔɔ? Pʋwayɩ lɛ, ɖɩkaɣ cosuu tɔm pɔzʋʋ pʋnɛ pɩ-yɔɔ: Ɛbɛ yɔɔ pɩwɛɛ se ɖɩyɔɔdɩ toovenim? Ɛzɩma ɖɩpɩzɩɣ nɛ ɖɩla mbʋ? Nɛ alɩwaatʋ ndʋ pɩwɛɛ se ɖɩyɔɔdɩ toovenim? Tɔm ndʋ tɩ-yɔɔ cosuu kaɣ-ɖʋ sɩnʋʋ nɛ ɖisusi ɛyaa tɔm kɩbandʋ alɩwaatʋ kɩbandʋ yɔɔ nɛ nɔɔ kɩbaŋa nɛ pɩkɩlɩ.

LE ÐƖPƖZƖƔ NƐ ÐƖLƖƖ TOOVENIM YƆƆ?

4. Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa cɔlɔ toovenim lɩnaa?

⁴ Yehowa cɔlɔ toovenim lɩnaa. Tɔm ndʋ payɩ ɛyɔɔdʋʋ yɔ tɩkɛ toovenim. Tɔm ndʋ payɩ eheyi-ɖʋ kɩbam nɛ kɩdɛkɛdɩm pɔ-yɔɔ yɔ tɩkɛ toovenim. (Keɣ. 19:9; 119:​142, 151) Tamasɩ nzɩ payɩ ɛlabɩ cee wayɩ yɔɔ yɔ sɩkaɣ labʋ. (Iza. 55:​10, 11) Ɛɖɔŋ ɛ-tamasɩ tɩŋa yɔɔ. (Kɩg. 23:19) Toovenim taa lɛ, Yehowa ɛɛpɩzɩɣ nɛ ɛcɛtɩ kpa. (Ebr. 6:18) Ye mbʋ, ɖɩnaɣ mbʋ pʋyɔɔ Bibl ya Yehowa se «toovenim tɛ Ɛsɔ» yɔ.—Keɣ. 31:5.

5. Ɛbɛ yɔɔ pɩfɛyɩ kaɖɛ se ɖɩtɩlɩ «toovenim tɛ Ɛsɔ»? Lɩzɩ pɩ-taa. (Tʋma Labʋ 17:27)

⁵ Ɛyaa nabɛyɛ tɔŋ se pɩwɛ kaɖɛ se ɖɩtɩlɩ «toovenim tɛ Ɛsɔ» Yehowa, ɛlɛ pɩtɩkɛ toovenim. Mbʋ payɩ pɩcɔ-ɖʋ nɛ pɩta yɔ, pɩwɩlɩɣ kpayɩ kpayɩ se ɛwɛɛ. (Roma 1:20) Alɩwaatʋ ndʋ Pɔɔlɩ yɔɔdaɣnɩ Grɛɛkɩ lɔŋsɩnɖaa nabɛyɛ Atɛɛnɩ tɛtʋ taa yɔ, ɛyɔɔdaa se Ɛsɔ sɔɔlaa se ‘ɖɩñɩnɩ-ɩ nɛ ɖɩna-ɩ’ nɛ «etiposini ɖa-taa nɔɔyʋ.» (Kalɩ Tʋma Labʋ 17:27.) Toovenim taa lɛ, Yehowa hɔŋ ɛyaa mba poluzuu pa-tɩ nɛ pañɩnɩɣ toovenim yɔ nɛ ɛkɔŋnɩ ɛ-cɔlɔ.—Yoh. 6:44.

6. (a) Toovenim tɔm ndʋ tɩwɛ Bibl taa yɔ tɩ-taa natʋyʋ lɛ ndʋ? (b) Ɛbɛ yɔɔ ɖa-taa wɛ leleŋ se ɖɩsɩm toovenim tɔm ndʋ?

⁶ Mbʋ ɖɩpɩzɩɣ ɖɩla nɛ ɖɩtɩlɩ Yehowa yɔ, pɩ-taa nabʋyʋ lɛ se ɖɩkpɛlɩkɩ Bibl. Ɛyaa mba pama Bibl yɔ, Ɛsɔ fezuu kiɖeɖeu ɖiyini-wɛ. (2 Pɩy. 1:​20, 21) Pʋyɔɔ lɛ, tɔm ndʋ payɩ Bibl yɔɔdʋʋ yɔ tɩkɛ toovenim nɛ ɖɩpɩzɩɣ nɛ ɖɩtaa-tʋ liu. Kɩɖaŋ nɩɩyɩ yɔ: Bibl yɔɔdʋʋ ɖenɖe kedeŋa nɛ wezuu palɩnaa yɔ pɩ-tɔm. (Kiɖe 1:​1, 26) Kɩyɔɔdʋʋ mbʋ pʋyɔɔ ɖa-tɩŋa ɖɩlakɩ kɩwɛɛkɩm yɔ, mbʋ pʋyɔɔ kʋñɔmɩŋ tɔyaa yɔ nɛ mbʋ pʋyɔɔ ɖɩsɩkɩ yɔ pɩ-tɔm. (Roma 5:12; 6:23) Kɩyɔɔdʋʋ se Yehowa kaɣ tɩŋnʋʋ ɛ-Pɩyalʋ yɔɔ nɛ ɛñɔɔzɩ mbʋ payɩ «cɛtɩm caa» Sataŋ wɛɛkaa yɔ. (Yoh. 8:44; Roma 16:20) Pɩtasɩ lɛ, kɩyɔɔdʋʋ se Yesu kaɣ ɖɩzʋʋ kañatʋ tɩnaa, efezi sɩɖaa, ɛñɔɔzɩ tɛtʋ nɛ tɩpɩsɩ paradisuu nɛ ɛsɩnɩ-ɖʋ nɛ ɖɩtalɩ pilim. (Yoh. 11:​25, 26; 1 Yoh. 3:8) Ðɩpɩzɩɣ nɛ ɖɩtaa tɔm ndʋ tɩ-tɩŋa liu. Waɖɛ kɩbanɖɛ kpem Yehowa ha-ɖʋ. Ɛwɩlɩ-ɖʋ toovenim, nɛ ɛha-ɖʋ waɖɛ se ɖɩwɩlɩ-pʋ ɛyaa lalaa.—Mat. 28:​19, 20.

ƐBƐ YƆƆ PƖWƐƐ SE ÐƖYƆƆDƖ TOOVENIM?

7-8. Ɛbɛ seɣtiɣ-ɖʋ nɛ ɖɩyɔɔdʋʋ toovenim? Ha kɩɖaʋ nakʋyʋ. (Maarɩkɩ 3:​11, 12) (Cɔnɩ ɖɔɖɔ kɩlɛmɩŋ.)

⁷ Ɛzɩ ɖɩyɔɔdʋʋ nɛ pɩɖɛɛ yɔ, ye ɖɩsɔɔlaa se ɖɩwɛɛ Yehowa hɔʋ taa yɔ pɩwɛɛ se ɖɩyɔɔdɩ toovenim. Ɛlɛ pɩsa nɛ ɖɔ-tɔm kɛdɩnɩ Yehowa lɛ, toovenim yɔɔdʋʋ ɖeke tɩmaɣ. Mbʋ pʋyɔɔ ɖɩyɔɔdʋʋ toovenim yɔ pɩ-tɔm cɛyɩ Yehowa ɛsɩndaa. Iyele nɛ ɖɩna mbʋ pɩɩlaba alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ. (Kalɩ Maarɩkɩ 3:​11, 12.) Kɩyakʋ nakʋyʋ ɛɛwɛ Galilee Teŋgu nɔɔ nɛ esusuu tɔm nɛ ɛyaa samaɣ nakɛyɛ kpeɣli nɛ kewelisiɣni-i. Aliikenaa nabɛyɛ kaawɛ samaɣ ŋga ka-taa nɛ poluŋ Yesu tɛɛ nɛ pamakɩ kubusi nɛ pɔtɔŋ se: «Ŋkɛ Ɛsɔ Pɩyalʋ.» Ɛbɛ yɔɔ aleewaa mba pɔyɔɔdɩ toovenim tɔm Yesu yɔɔ? Pɩtɩla pañɩnaɣ se ɛyaa mba pewelisaɣni-wɛ yɔ pataa-wɛ liu, nɛ pʋwayɩ pɛkɛzɩ pa-lɩmaɣza nɛ peyele Yehowa sɛʋ. Tɔm ndʋ aleewa mba pɔyɔɔdaa yɔ tɩkɛ toovenim, ɛlɛ pa-maɣmaɣ pɛ-kɛzɛsɩ pañɩnaɣ. Patɩpɩzɩ nɛ pepeɣzi Yesu yaa mbʋ palaba yɔ pɩtaakɛdɩnɩ-ɩ. Ɛlɛ Yesu kizini-wɛ se pataasusi ɛ-yɔɔ tɔm.

⁸ Lɔŋ weyi ɖɩpɩzɩɣ nɛ ɖɩkpɛlɩkɩ kɛdaɣ ŋga ka-taa? Mbʋ piseɣtiɣ-ɖʋ nɛ ɖɩyɔɔdʋʋ toovenim yɔ, pɩ-tɔm cɛyɩ Yehowa ɛsɩndaa. Ye mbʋ pɩcɛyɩ siŋŋ se sɔɔlɩm mbʋ ɖɩwɛnɩ Yehowa yɔɔ yɔ mbʋ eseɣtini-ɖʋ nɛ ɖɩwɩlɩ ɛyaa lalaa ɛ-yɔɔ toovenim tɔm. Nɛ ye ɛyaa ɩñɩnɩɣ se pɛcɛlɩ-ɖʋ samtʋ toovenim tɔm ndʋ ɖisusuu-wɛ yɔ tɩ-yɔɔ yɔ, pɩwɛɛ se ɖɩcɛlɩ samtʋ ndʋ Yehowa.—Mat. 5:16; kpaɣ-tʋ nɛ ŋmaɣzɩnɩ Tʋma Labʋ 14:​12-15.

9. (a) Ɛbɛ pɩtɩpɔzɩ se ɖɩla? (b) Ɛbɛ yɔɔ?

⁹ Iyele nɛ ɖɩna hɔɔlʋʋ lɛɛkʋ ŋgʋ kɩ-taa pɩtɩpɔzɩ se ɖɩñɩnɩ ɖa-maɣmaɣ ɖa-samtʋ yɔ. Kpaɣ se ɛgbɛyɛ taa ɛzʋtʋyʋ nɔɔyʋ heyi-ŋ mɛsaɣ tɛɛ tɔm natʋyʋ, nɛ pʋwayɩ lɛ ŋwolo nɛ ŋheyi tɔm ndʋ ɛyaa lalaa. Mba ŋheyi tɔm ndʋ yɔ ye pʋwayɩ panawa se tɔm ndʋ ŋŋheyi-wɛ yɔ tɩkɛ toovenim yɔ, papɩzɩɣ nɛ papaɣzɩ maɣzʋʋ se ŋsɩm mɛsaɣ tɛɛ tɔm sakɩyɛ. Pɩpɩzɩɣ piyele nɛ pamaɣzɩɣ se ŋkɛ ɛyʋ weyi ɛ-tɔm cɛyaa yɔ, nɛ pɩɩkɛdɩɣnɩ Yehowa. (Adu. 11:13) Ɛbɛ yɔɔ? Mbʋ pʋyɔɔ yɔ paa tɔm ndʋ ɖɩyɔɔdaa yɔ tɩkɛ toovenim yɔ ɖɩtaawɛɛnɩ waɖɛ se ɖɩyɔɔdɩ-tʋ nɛ pɩtɩkɛ lɩmaɣza kɩbana seɣtini-ɖʋ nɛ ɖɩyɔɔdɩ-tʋ.

ƐZƖMA ÐƖPƖZƖƔ NƐ ÐƖYƆƆDƖ TOOVENIM?

10. Ye pɔtɔm se ɖɔ-yɔɔdaɣ ɛwɛɛ leleŋ yɔ, pʋ-tɔbʋʋ lɛ suwe? (Koloosi mba 4:6)

¹⁰ Kalɩ Koloosi mba 4:6. Apostoloo Pɔɔlɩ tɔzɩ Krɩstʋ ñɩma mba paawɛ Koloosi tɛtʋ taa yɔ se pɩwɛɛ se peyele nɛ pɔ-yɔɔdaɣ «wɛɛ leleŋ paa ɛzɩmtaa.» Tɔm ndʋ, tɩ-tɔbʋʋ lɛ suwe? Grɛɛkɩ kʋnʋŋ taa tɔm loyaɣ ŋga palabɩnɩ tʋmɩyɛ mayaɣ kanɛ ka-taa yɔ kɔ-tɔbʋʋ lɛ se tɔm ndʋ ɖɩyɔɔdʋʋ yɔ ɖiyele nɛ tɩwazɩ mba panɩɣ-tʋ yɔ nɛ tɩtɛ tɩkɛdɩnɩ-wɛ.

11-12. Ɛbɛ yɔɔ pɩcɛyaa se ɖɩlabɩnɩ Bibl tʋmɩyɛ camɩyɛ alɩwaatʋ ndʋ ɖisusuu lalaa tɔm yɔ? Ha kɩɖaʋ nakʋyʋ. (Cɔnɩ ɖɔɖɔ kɩlɛmɩŋ.)

¹¹ Alɩwaatʋ ndʋ ɖisusuu lalaa Bibl taa toovenim tɔm yɔ, pɩcɛyaa se ɖɩɖɔ lɔŋ weyi Pɔɔlɩ tasaa se ɖɔ-yɔɔdaɣ ɛwɛɛ leleŋ yɔ ɩ-yɔɔ. Bibl kpaɣ toovenim tɔm ndʋ tɩwɛ kɩ-taa yɔ nɛ kɩmaɣzɩnɩ laɣɖɛ nɖɩ ɖɩwɛ lɔŋ ceemenje nɛ ɖɩpɩzɩɣ nɛ ɖɩtayɩɣ kalɩzaɣ nɛ fezuu pa-taa yɔ. Pʋ-tɔbʋʋ lɛ se tɩpɩzɩɣ tiyele nɛ ɖa nɛ ɛyaa lalaa ɖɩtɩlɩ ɖa-lɩmaɣza nɛ mbʋ piseɣtiɣ-ɖʋ nɛ ɖɩlakɩ nabʋyʋ yɔ. (Ebr. 4:12) Ɛlɛ ye ɖɩɩlakɩnɩ Bibl tʋmɩyɛ nɛ lɛɣtʋ yɔ pɩpɩzɩɣ piyele nɛ ɖɩɖʋ lalaa ɖɩwɩzɩyɛ yaa ɖa nɛ wɛ ɖɩhɔ tɔm. Ɛzɩma pɩpɩzɩɣ nɛ pɩla mbʋ?

¹² Iyele nɛ ɖɩkpaɣ kɩɖaʋ kʋnɛ: Ðɩwɛɛ nɛ ɖisusuu tɔm lɛ ɖɩkatɩ abalʋ nɔɔyʋ. Ɛsɛɣ sɩʋ kpelisi nɛ ɛ nɛ ɛ-hɔʋ pɔtɔkɩ kisimasɩ nɛ paska kazandʋ, paa mbʋ yɔ ɛwɛnɩ laŋɩyɛ kɩbanɖɛ. Ðɩpɩzɩɣ ɖɩtɩŋnɩ Bibl yɔɔ nɛ ɖɩwɩlɩ abalʋ ɛnʋ se pɩkɛnɩ kɩmɛlɛndʋ se ɛyʋ ɛsɛɛ sɩʋ kpelisi. Ðɩpɩzɩɣ ɖɔɖɔ nɛ ɖɩwɩlɩ-ɩ se kisimasɩ nɛ paska kazandʋ kɛ sɩɩnaa layaa kazandʋ. (Iza. 44:​14-20; 2 Kɔr. 6:​14-17) Ye ɖɩlabɩ mbʋ alɩwaatʋ ndʋ ɖɩcalɩ katʋʋ abalʋ ɛnʋ yɔ, ɖiheyi-i toovenim, ɛlɛ ɖɩtɩlabɩnɩ Bibl tʋmɩyɛ camɩyɛ.

13. Ɛzɩma ɖɩpɩzɩɣ nɛ ɖɩɖʋ ɖɔm ɖɔ-yɔɔdaɣ taa?

¹³ Pɔɔlɩ yɔɔdaa ɖɔɖɔ se pɩwɛɛ se ɖɔ-yɔɔdaɣ ɛwɛɛ leleŋ ɛzɩ tɔɔnaɣ ŋga ka-taa paɖʋ ɖɔm nɛ pɩmaɣna yɔ. Ɛtaañɩnɩɣ yɔɔdʋʋ se ɖɩmɛsɩ toovenim tɔm yaa ɖɩca lɩm tɩ-taa. Ɛlɛ ɛwɛɛ nɛ eseɣtiɣ-ɖʋ se ɖɩwɛɛnɩ yɔɔdaɣ kɩbaŋa, ɖɩnɛ ɛlɛ alɩwaatʋ ndʋ ɖisusuu ɛyaa toovenim tɔm yɔ tɩkɛdɩɣnɩ-wɛ. (Yɔɔb 12:11) Pɩfɛyɩ kɛlɛʋ se ɖɩla mbʋ. Ðoŋ ɖoŋ lɛ, ye tɔɔnaɣ nakɛyɛ ɛkɛdɩnɩ-ɖʋ yɔ ɖɩmaɣzɩɣ se kakaɣ kɛdɩnʋʋ lalaa ɖɔɖɔ. Mbʋ ɖɔɖɔ, ɖɩpɩzɩɣ nɛ ɖɩmaɣzɩ se ɛzɩma ɖɩyɔɔdʋʋ yɔ pɩkɛdɩɣnɩ ɛyaa tɩŋa, ɛlɛ pɩtɩkɛ toovenim. Pɩtɩla ɛyaa nabɛyɛ sɔnzɩ taa, pɔyɔɔdʋʋ ndʋ pamaɣzɩɣ yɔ kpayɩ paa pɛwɛɛ nɛ pɔyɔɔdʋʋnɩ ɛyaa mba pakɩlɩ-wɛ pɩnzɩ yɔ. Ɛlɛ lalaa sɔnzɩ taa lɛ, paayɔɔdʋʋnɩ ɛyaa mbʋ, halɩ ye ɛyʋ nɔɔyʋ ɛyɔɔdʋʋnɩ lalaa mbʋ yɔ pɩɖʋʋ-wɛ ɖɩwɩzɩyɛ. Pɔɔlɩ yɔɔdaa se pɩwɛɛ se ɖɩtɩlɩ ɛzɩma ‘pɩwɛɛ se ɖicosi paa ɛyʋ weyi lɛ yɔ.’ Pʋ-tɔbʋʋ se pɩwɛɛ se ɖɩmaɣzɩ ndʋ ɖɩyɔɔdʋʋ yɔ tɩ-yɔɔ nɛ pɩsa nɛ pɩkɛdɩnɩ weyi ewelisiɣni-ɖʋ yɔ, pɩtaakɛ ɖa-maɣmaɣ.

ALƖWAATƲ NDƲ PƖWƐƐ SE ÐƖYƆƆDƖ TOOVENIM?

14. Alɩwaatʋ ndʋ Yesu kaawɛ tɛtʋ yɔɔ yɔ, ɛzɩ ɛɛwɩlɩ ɛ-tɔmkpɛlɩkɩyaa tɔm ndʋ payɩ ɛsɩma yɔ? Lɩzɩ pɩ-taa.

¹⁴ Alɩwaatʋ ndʋ Yesu yɔɔdaɣnɩ ɛ-wayɩ tɩŋɩyaa yɔ, ɛ-yɔɔdaɣ kaawɛ leleŋ paa ɛzɩmtaa nɛ ɛɛwɩlɩ-wɛ tɔm sakɩyɛ nɛ nɔɔ kɩbaŋa. (Mark. 6:34) Ɛlɛ tɔm sakɩyɛ kaawɛɛ se patasɩ kpɛlɩkʋʋ. Yesu taañaɣ pana se ɛwɩlɩ-wɛ tɔm ndʋ payɩ ɛsɩma yɔ kpaagbaa. Ɛɛsɩm po-ɖoŋ kamaɣ nɛ ɛnɩ pɩ-taa se toovenim tɔm natʋyʋ wɛɛ lɛ, pɩtaakɛnɩ alɩwaatʋ kɩbandʋ ndʋ tɩ-yɔɔ pɩwɛɛ se ɛwɩlɩ-wɛ tʋ yɔ. Halɩ ɛyɔɔdaa se paapɩzɩɣ nɛ pɔɖɔkɩ toovenim tɔm ndʋ. (Yoh. 16:12) Ɛbɛ tɔm ndʋ tɩkpɛlɩkɩɣ-ɖʋ?

15. Ɛzɩ pɩwɛɛ se ɖɩwɩlɩ ɖe-Bibl kpɛlɩkɩyaa tɔm ndʋ payɩ ɖɩsɩma yɔ alɩwaatʋ kʋɖʋmtʋ taa? Lɩzɩ pɩ-taa. (Aduwa 25:11) (Cɔnɩ ɖɔɖɔ kɩlɛmʋʋ.)

¹⁵ Yesu kɩɖaʋ wɩlɩɣ se ye ɖɩsɩm toovenim yɔ pɩtɩwɩlɩ se pɩpɔzʋʋ se ɖɩwɩlɩ ndʋ payɩ ɖɩsɩma yɔ ɛyaa kɩyakʋ kʋɖʋmʋʋ. Ɛzɩma ɖɩpɩzɩɣ nɛ ɖɩmaɣzɩnɩ Yesu? Pɩwɛɛ se ɖɩmaɣzɩ ɛyaa wɛtʋ yɔɔ. Tasɩ maɣzʋʋ abalʋ weyi ɛ nɛ ɛ-hɔʋ pɔtɔkɩ kisimasɩ nɛ paska kazandʋ yɔ ɛ-yɔɔ nɛ ŋna. Ðɩnawa se kazandʋ ndʋ tɩlɩnɩ sɩɩnaa layaa cɔlɔ nɛ tɩɩkɛdɩɣnɩ Ɛsɔ. Ɛlɛ kpaɣ se pɩkazɩ kpɩtaʋ yaa kpɩtaŋ 2 se pɔtɔɔ kazandʋ ndʋ lɛ ña nɛ abalʋ ɛnʋ ɩpaɣzɩ Bibl kpɛlɩkʋʋ. Ye ɖɩwɩlɩ-ɩ se Bibl yɔɔdʋʋ se kazandʋ ndʋ, tɩlɩnɩ sɩɩnaa layaa cɔlɔ nɛ ɖiheyi-i kpaagbaa se ɛtaatasɩ-tʋ tɔɔʋ yɔ ɛzɩ ɖɩwɩlɩɣ se ɖɔ-yɔɔdaɣ wɛ leleŋ na? Pɩkɛ toovenim se Bibl kpɛlɩkɩyaa nabɛyɛ lɛ, papɩzɩɣ nɛ palabɩnɩ tʋmɩyɛ ndʋ payɩ pɛkpɛlɩkɩɣ yɔ lɛɛ lɛɛ. Ɛlɛ lalaa lɛ, pɩkpakɩɣ alɩwaatʋ pʋcɔ nɛ pɛlɛɣzɩ pa-maɣzɩm nɛ pa-lakasɩ. Ðɩpɩzɩɣ nɛ ɖɩsɩnɩ ɖe-Bibl kpɛlɩkɩyaa nɛ pala lɛɣzɩtʋ ye ɖiheyiɣ-wɛ ndʋ pɩwɛɛ se patɩlɩ yɔ alɩwaatʋ kɩbandʋ yɔɔ yɔ, pʋ-tɔbʋʋ se alɩwaatʋ ndʋ pɩwɛɣ-wɛ kɛlɛʋ se petisi tɩ-yɔɔ yɔ.—Kalɩ Aduwa 25:11.

16. Ɛzɩma ɖɩpɩzɩɣ nɛ ɖɩsɩnɩ Bibl kpɛlɩkɩyaa nɛ powolo pɩ-yɔɔ nɛ ‘pɔɖɔŋ toovenim taa’?

¹⁶ Mbʋ ɖɩpɩzɩɣ ɖɩla nɛ pɩha-ɖʋ taa leleŋ nɛ pɩkɩlɩ yɔ pɩ-taa nabʋyʋ lɛ se ɖɩsɩnɩ ɛyaa lalaa se patɩlɩ Yehowa yɔɔ toovenim tɔm. Ðɩpɩzɩɣ ɖɩsɩnɩ-wɛ nɛ powolo pɩ-yɔɔ nɛ pɔɖɔŋ toovenim taa ye ɖɩhaɣ-wɛ kɩɖaʋ kɩbaŋʋ yɔ. (3 Yoh. 3, 4) Ñe-wezuu caɣʋ ɛwɩlɩ se ña-taa tɛma se tamasɩ nzɩ sɩwɛ Bibl taa yɔ sɩkaɣ labʋ. Alɩwaatʋ ndʋ ŋyɔɔdʋʋ toovenim yɔ, la mbʋ nɛ lɩmaɣza kɩbana. Ŋŋwɩlɩɣ ɛyaa Bibl taa toovenim tɔm lɛ, yɔɔdɩnɩ nɔɔ kɩbaŋa, labɩnɩ tʋmɩyɛ tɔm pee kɩbana nɛ ŋyele nɛ tɔm ndʋ ŋyɔɔdʋʋ yɔ tɩwɛɛ leleŋ. Nɛ ye ɛyaa ɩcɛlɩɣ-ŋ samtʋ yɔ, cɛlɩ-tʋ Yehowa. Ye ŋlakɩ mbʋ yɔ, ŋkaɣ wɩlʋʋ se ŋwɛɛ nɛ ŋsɛɣ toovenim tɛ Ɛsɔ Yehowa.