Soŋaɣ wɛɛ nɛ kakpaɣ ɖoŋ siŋŋ ɛjaɖɛ kpeekpe yɔɔ—Suwe Bibl yɔɔdʋʋ?

Pɔyɔɔdɩ ɛzɩma ɛjaɖɛ kpeekpe yɔɔ soŋaɣ wɛɛ nɛ kakpaɣ ɖoŋ siŋŋ yɔ pɩ-tɔm juillet 2022 taa:

• «Fenaɣ kanɛ ka-taa, Siini komina ñʋndɩnaa paɣ ɛyaa tam nabʋlɛ se Siini tɛtʋ ndʋ tɩ-taa soŋaɣ kaɣ kpaʋ ɖoŋ siŋŋ yɔ, tɩtalɩɣ 70 mbʋ yɔ.»—25 juillet 2022, CNN Wire Service.

• «Laŋ ñakɩ miŋ kpem Erɔɔpɩ ajɛɛ sakɩyɛ taa, mbʋ pʋyɔɔ yɔ soŋaɣ kpa ɖoŋ peeɖe pɩfɛyɩ yɔɔdʋʋ.»—17 juillet 2022, The Guardian.

• «Kujuka wiye, soŋaɣ kpa Etaazuunii Wɩsɩ Ðɩlɩyɛ taa nɛ Hadɛ Kiŋ nɛ Wɩsɩ Ðɩɖʋyɛ hɔɔlɩŋ nɩɩyɩ taa siŋŋ nɛ wiɖiyi soŋaɣ tɩkpa mbʋ peeɖe nɛ pana.»—24 juillet 2022, The New York Times.

Ɛbɛ lakasɩ nzɩ sɩ-tɩŋa sɩwɩlɩɣ? Wiɖiyi pɩpɩzɩɣ nɛ pɩla se ɛyaa ɩɩtasɩɣ pɩzʋʋ nɛ pacaɣ wezuu tɛtʋ yɔɔ yaa we? Suwe Bibl yɔɔdʋʋ?

Ɛzɩ Bibl kaayɔɔdɩ ɛzɩma soŋaɣ wɛɛ nɛ kakpaɣ ɖoŋ siŋŋ sɔnɔ yɔ pɩ-tɔm na?

Ɛɛɛ. Ɛzɩma soŋaɣ wɛɛ nɛ kakpaɣ ɖoŋ siŋŋ ɛjaɖɛ kpeekpe yɔɔ yɔ, pɩlabɩ nɔɔ kʋɖʋmaɣ nɛ mbʋ Bibl kaayɔɔdaa se pɩkaɣ labʋ ɖa-alɩwaatʋ tʋnɛ tɩ-taa yɔ. Kɩɖaʋ nakʋyʋ yɔ: Yesu kaayɔɔdaa se ɖɩkaɣ naʋ «lakasɩ nzɩ sɩkpaɣ ɛyaa sɔɔndʋ yɔ.» (Luka 21:11) Soŋaɣ wɛɛ nɛ kakpaɣ ɖoŋ siŋŋ ɛjaɖɛ kpeekpe yɔɔ; pʋyɔɔ lɛ, sɔɔndʋ kpaɣ ɛyaa sakɩyɛ se pɩtaakɛdɩ nɛ mbʋ ɛyaa lakɩ yɔ, pɩla nɛ ɛyʋ ɛɛtasɩɣ pɩzʋʋ nɛ ɛcaɣ wezuu tɛtʋ yɔɔ.

Wiɖiyi pɩpɩzɩɣ nɛ pɩla se ɛyaa ɩɩtasɩɣ pɩzʋʋ nɛ pacaɣ wezuu tɛtʋ yɔɔ?

Aayɩ. Ɛsɔ lɩzɩ tɛtʋ se tɩkɛ lone nɖɩ ɖɩ-taa ɛyaa pɩzɩɣ nɛ pacaɣ wezuu tam yɔ. (Keɣa 113B:16; Eklezɩyasɩtɩ 1:4) Ɛɛkaɣ yebu se ɛyaa ɩɖɩzɩ tɛtʋ; ɛlɛ ɛzɩ ɛlabʋ tamaɣ yɔ, ɛkaɣ ɖɩzʋʋ «mba pɛwɛɛkɩɣ tɛtʋ yɔ.»—Natʋ 11:18.

Yele nɛ ɖɩna natʋ naalɛ ndʋ tɩwɩlɩɣ tamasɩ lɛɛsɩ nzɩ Ɛsɔ labɩ-ɖʋ yɔ:

• «Lakʋ nɛ wɩlɩŋ tɛtʋ pɛmɛyɩ, laʋ ɛpaa nɛ kɩnɛɣdɩ ɛzɩ sɔzɩŋ hɛɖʋʋ yɔ.» (Izaayii 35:1) Ɛsɔ ɛɛkaɣ yebu se tɛtʋ ɛwɛɛkɩ nɛ pɩtalɩ ɖenɖe ɛyaa ɩɩkaɣ pɩzʋʋ se pacaɣ wezuu tɩ-yɔɔ yɔ, ɛlɛ ɛkaɣ ñɔɔzʋʋ tɩ-hɔɔlɩŋ weyi ɩwɛɛkaa yɔ.

• «Ŋkilimiɣ tɛtʋ yɔɔ nɛ ti-liu sɩkɩ, ŋhaɣzɩɣ-tʋ ñɩm sakɩyɛ kumm.» (Keɣa 64:10) Ɛsɔ kaɣ wazʋʋ tɛtʋ nɛ eyele nɛ tɩpɩsɩ paradisuu.

Ye ŋsɔɔlaa se ŋtɩlɩ ɛzɩma ɛjaɖɛ yɔɔ wɛtʋ lɛɣzʋʋ lakɩ nɔɔ kʋɖʋmaɣ nɛ natʋ tɔm ndʋ paayɔɔdɩ Bibl taa yɔ yɔ, kalɩ tɔm ñʋʋ «Les changements climatiques et notre avenir: qu’en dit la Bible?»

Ye ŋsɔɔlaa se ŋtɩlɩ tamaɣ ŋga Bibl laba se Ɛsɔ kaɣ ñɔɔzʋʋ tɛtʋ nɛ tɩpɩsɩ paradisuu yɔ kɔ-tɔm nɛ pɩkɩlɩ yɔ, kalɩ tɔm ñʋʋ «Akaɣ tɛtʋ ñʋʋ yabʋ?»