Ɛbɛ yɔɔ Yehowa Aseɣɖe Tɩnaa ɩɩtɔkɩ kazandʋ natʋyʋ?

• Ɛzɩma Yehowa Aseɣɖe Tɩnaa lakɩ nɛ peɖiɣzina se pɩwɛɛ se pɔtɔɔ kazandʋ natʋyʋ yaa pataatɔɔ-tʋ?

• Paa Yehowa Aseɣɖe Tɩnaa ɩɩtɔkɩ kazandʋ natʋyʋ yɔ, ɛzɩ pɔsɔɔlɩ pɔ-hɔŋ taa mba na?

• Ɛzɩ Yehowa Aseɣɖe Tɩnaa ñɩkɩɣ lalaa yɔɔ se pataatɔɔ kazandʋ natʋyʋ?

Ɛzɩma Yehowa Aseɣɖe Tɩnaa lakɩ nɛ peɖiɣzina se pɩwɛɛ se pɔtɔɔ kazandʋ natʋyʋ yaa pataatɔɔ-tʋ?

Pʋcɔ nɛ Yehowa Aseɣɖe Tɩnaa kpaɣ lɩmaɣzɩyɛ se pɔtɔkɩ kazandʋ natʋyʋ yaa paatɔkɩ-tʋ lɛ, pañɩnɩɣ Bibl taa. Kazandʋ nɛ sɔnzɩ nasɩyɩ wɛɛ lɛ, tɩkaɖɩɣnɩ Bibl taa paɣtʋ kila. Ye Yehowa Aseɣɖe Tɩnaa ɩnawa se mbʋ pɩwɛ sɔnzɩ nasɩyɩ yaa kazandʋ natʋyʋ hɔɔlʋʋ taa yɔ, paatɔkɩ-tʋ. Kazandʋ lɛɛtʋ hɔɔlʋʋ taa lɛ, paa Aseɣɖe Tʋ weyi kpakɩɣnɩ ɛ-lɩmaɣza, ɛlɛ ɛñakɩ pana se ɛwɛɛnɩ «ɛhʋyɛ kele kele ñɩnɖɛ Ɛsɔ nɛ ɛyaa pɛ-ɛsɩndaa.»—Tʋma Labʋ 24:16.

Tɔm pɔzʋʋ mbʋ pɩkɔŋ yɔ, pɩ-yɔɔ Yehowa Aseɣɖe Tɩnaa maɣzɩɣ pʋcɔ nɛ pakpakɩɣ lɩmaɣzɩyɛ se pɔtɔkɩ kazandʋ natʋyʋ yaa paatɔkɩ-tʋ.a

• Sɔnzɩ nzɩ sɩɩlakɩ nɔɔ kʋɖʋmaɣ nɛ Bibl yɔ, sɩ-taa kazandʋ ndʋ tɩlɩnaa?

  Bibl paɣtʋ kiɖe: «Ɩlɩɩ pɛ-hɛkʋ taa, nɛ ɩkɛzɩ mɩ-tɩ nɛ hɔɔlʋʋ nɛ iyele tukunuu azuluma pʋyʋ, nɛ mankaɣ-mɩ mʋʋ; Yehowa yɔɔdʋʋna.»—2 Kɔrɛntɩ mba 6:15-17.

  Pɩsa nɛ Yehowa Aseɣɖe Tɩnaa posi pa-tɩ siŋŋ nɛ azuluma wɩlɩtʋ, pʋ-tɔbʋʋ se wɩlɩtʋ ndʋ tɩɩlakɩ nɔɔ kʋɖʋmaɣ nɛ Bibl wɩlɩtʋ yɔ lɛ, paatɔkɩ kazandʋ ndʋ tɩ-taa wɛtʋ ndʋ tɩkɔŋ yɔ tɩwɛɛ yɔ.

  Kazandʋ ndʋ tɩlɩnɩ ɛsɔnaa lalaa sɛʋ sɔnzɩ taa yɔ. Yesu yɔɔdaa se: «Ñɛ-Ɛsɔ Yehowa pɩwɛɛ se ŋsɛɛ, nɛ e-ɖeke koŋ pɩwɛɛ se ŋla tʋmɩyɛ kiɖeɖeye.» (Maatiyee 4:10) Paɣtʋ tʋnɛ tɩ-yɔɔ Yehowa Aseɣɖe Tɩnaa ɖɔŋ nɛ paatɔkɩ Kisimasɩ, Paska nɛ 1^er mai kazandʋ; mbʋ pʋyɔɔ yɔ panawa se kazandʋ ndʋ tɩlɩnɩ ɛsɔnaa lalaa sɛʋ sɔnzɩ taa, pɩtɩkɛ Yehowa tɩsandɩɣ.

  • Kwanzaa: Hɩɖɛ Kwanzaa lɩnɩ Swahili kʋnʋŋ tɛ tɔm loyaɣ matundaya kwanza taa; nɛ kɔ-tɔbʋʋ lɛ se «kajalaɣ tɩŋ pee.» Kazandʋ ndʋ tɩlɩnɩ kajalaɣ kʋmtʋ kazandʋ ndʋ pɔtɔkɩ Afrika taa yɔ tɩ-taa.» (Encyclopedia of Black Studies) Nabɛyɛ maɣzɩɣ se Kwanzaa tɩkɛ Ɛsɔ sɛtʋ kazandʋ, ɛlɛ takayaɣ nakɛyɛ (Encyclopedia of African Religion) kpaɣ kazandʋ ndʋ kamaɣzɩnɩ Afrika taa kazandʋ ndʋ tɩ-taa pakpakɩɣ kajalaɣ tɩŋ pee nɛ «pahaɣ ɛsɔnaa nɛ hadɛ tɩnaa se pɛsɛɛnɩ-wɛ se palabaɣ lɛ yɔ.» Kɔsɔzaa se: «Lɩmaɣza kʋɖʋma ana ayebina nɛ pɔtɔkɩ Afrika nɛ Amerika kazandʋ ndʋ payaɣ se kwanzaa yɔ.»

    

  • Lʋŋɩyɛ hɛkʋ taa kazandʋ. Palakɩ «kazandʋ ndʋ se paɖʋ hɩɖɛ ɛsɔ halɩñɩnʋ weyi payaɣ se fenaɣ yɔ.» (Holidays, Festivals, and Celebrations of the World Dictionary) Kazandʋ ndʋ tɩ-sɔnzɩ nasɩyɩ taa lɛ, «ɖɩɣa taa halaa luŋuu Ɛsɔ ɛnʋ ɛ-tɛɛ.»—(Religions of the World—A Comprehensive Encyclopedia of Beliefs and Practices.

  • Norouz (Nowruz). «Kazandʋ ndʋ tɩlɩnɩ zoroastrisme taa. Ɛsɔ sɛtʋ ɛgbɛyɛ nɖɩ ɖɩ-kɩyakɩŋ kiɖeɖeŋ sɔsɔŋ taa kɩyakʋ nakʋyʋ pɩɩkɛnaa. Norouz evemiye wiye miidii taa, pasandaɣ miidii taa fezuu mbʋ pʋyɔɔ yɔ kɩpɩsaa (miidii taa fezuu ŋgʋ payaɣ ɖɔɖɔ se Rapithwin.) Pamaɣzaɣ se Niŋkaɣ fezuu ɖɩɣ fezuu ŋgʋ salaka tɛtɛɛ fenasɩ nzɩ sɩ-taa niŋkaɣ kɩlaa yɔ.»—United Nations Educational, Scientific and Cultural Organization

  • Shab-e Yalda. Takayaɣ nakɛyɛ (Sufism in the Secret History of Persia) yɔɔdaa se pɩtʋʋ fɛyɩ se niŋkaɣ alɩwaatʋ taa ciŋaayɩ ŋgʋ, kɩlɩnɩ Mithra sɛtʋ taa na.» Mithra kɛnɩ ñalɩmɩyɛ tɛ ɛsɔ. Lalaa maɣzɩɣ se pɩtɩla yɔ, nɔɔ kʋɖʋmaɣ nakɛyɛ wɛ kazandʋ ndʋ nɛ Roma nɛ Grɛɛkɩ mba ɛsɔ weyi payaɣ se wɩsɩ yɔ pɛ-hɛkʋ taa.b

  • Thanksgiving. Ɛzɩ kwanzaa kazandʋ yɔ, kazandʋ tʋnɛ tɩlɩnɩ kʋmtʋ kazandʋ ndʋ palakaɣ nɛ paɖʋʋnɩ ɛsɔnaa ndɩ ndɩ hɩɖɛ yɔ tɩ-taa. Alɩwaatʋ wɛɛ nɛ tɩɖɛɣ lɛ, «Krɩstʋ mba kpaɣ caanaʋ taa samaɣ kazandʋ ndʋ nɛ pasɩɩ pa-tɩ».—A Great and Godly Adventure—The Pilgrims and the Myth of the First Thanksgiving

  Kazandʋ ndʋ tɩ-taa ñʋʋ leleŋ yaa lɩmaɣza kɩdɛkɛda lɛɛna wɛɛ yɔ. Bibl yɔɔdʋʋ se «mba pɔñɔɔzʋʋ taabɩlɩ Ñʋʋ Leleŋ tɛ ɛsɔ yɔ,» pɛwɛ «mba pɔlɔʋ Yehowa yɔ pɛ-hɛkʋ taa.» (Izaayii 65:11) Pʋyɔɔ lɛ, Yehowa Aseɣɖe Tɩnaa ɩɩtɔkɩ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  • Kupala tɛ ɖoo: Takayaɣ ŋga payaɣ se The A to Z of Belarus yɔ kɔyɔɔdaa se: «Ɛyaa sakɩyɛ maɣzɩɣ se [Kupala tɛ ɖoo] alɩwaatʋ taa, wondu yeki ti-ɖoŋ nɛ mba pɛwɛ abalɩtʋ nɛ pɛwɛɛnɩ ñʋʋ leleŋ siŋŋ yɔ, mba pɩzɩɣna nɛ pɛwɛɛnɩ ɖoŋ tɩ-yɔɔ.» Kiɖe tɛɛ lɛ, sɩɩnaa layaa tɔkaɣnɩ kazandʋ ndʋ se paɖʋ hɩɖɛ soŋaɣ evemiye nɖɩ ɖɩkɩlɩ ɖaɣlʋʋ yɔ. Ɛlɛ, takayaɣ ŋga payaɣ se Encyclopedia of Contemporary Russian Culture yɔ, kɔyɔɔdaa se «sɩɩnaa layaa pɩsɩ Krɩstʋ mba lɛ, pɛkpɛndɩ-tʋ Cooci kazandʋ ndʋ payaɣ se [“Yohanɛɛsɩ kiɖeɖeu,” yaa Yohanɛɛsɩ lɩm mɩyɩsɩyʋ kazandʋ] yɔ tɩ-yɔɔ.»

  • Pɩnaɣ kɩfalaɣ (Siini mba yaa Kooree mba tɛ ñɩŋga). «Pɩnaɣ alɩwaatʋ ndʋ tɩ-taa hɔŋ, taabalaa nɛ ɛyɩsɩmaa ñakɩ pana kpem se piɖeni-wɛ pɩnaɣ taa, paɖʋ hɩɖɛ ɛsɔnaa nɛ feziŋ nɛ pɛsɛɛ ɖama se ɖa nɛ pɩnaɣ waa» (Mooncakes and Hungry Ghosts—Festivals of China). Kooree mba tɛ pɩnaɣ kɩfalaɣ kazandʋ ɖɔɖɔ «kɛ ɛsɔ sɛtʋ ndʋ pɛcɛlɩɣ hadɛ tɩnaa yɔ, palakɩ sɔnzɩ se pɔɖɔɔnɩ feziŋ kɩdɛkɛdɩŋ nɛ piɖeni-wɛ pɩnaɣ taa, pɔyɔɔdʋʋ ɖɔɖɔ tɔm [yaa palakɩ yʋsasɩ nzɩ sɩwɩlɩɣ mbʋ pɩkaɣ labʋ cee wayɩ yɔ]; se pɩsa nɛ patɩlɩ mbʋ pɩnaɣ kɩfalaɣ kaɣ kɔnʋʋ yɔ.»—Encyclopedia of New Year’s Holidays Worldwide

    

  Kazandʋ ndʋ palakɩ nɛ tɩwɩlɩɣ se kalɩzaɣ ɛɛsɩkɩ yɔ. Bibl yɔɔdɩ kpayɩ se kalɩzaɣ sɩkɩ (Ezekɩyɛɛlɩ 18:4) Pʋyɔɔ lɛ, Yehowa Aseɣɖe Tɩnaa ɩɩtɔkɩ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ, mbʋ pʋyɔɔ yɔ tiyeki nɛ ɛyaa maɣzɩɣ se kalɩzaɣ ɛɛsɩkɩ:

  • Sɩɖaa evemiye: Takayaɣ ŋga payaɣ se New Catholic Encyclopedia yɔ kɔyɔɔdaa se evemiye nɖɩ «pɔtɔzʋʋ ɛyaa siɣsiɣ tɩnaa mba payɩ pasɩba yɔ pɔ-yɔɔ. Kpaɣnɩ pɩnzɩ 500 waa nɛ piwolo pɩnzɩ 1 500 waa taa mbʋ yɔ ɛyaa maɣzaɣ se kalɩzasɩ nzɩ sɩwɛ lone nɖɩ ɖɩ-taa pañalɩɣ-sɩ yɔ, sɩpɩzɩɣ nɛ sɩpɩsɩ nɛ sɩwɛɛ ɛzɩ ɖoo tɛɛ miŋ, aleewaa, fetee yaa wondu lɛɛtʋ nɛ sɩwɩlɩ sɩ-tɩ mba paalabɩ-sɩ ɛzaɣtʋ si-wezuu taa yɔ.»

  • Qingming kazandʋ (Ch’ing Ming) nɛ Ñazɩñazɩŋ kazandʋ. Pɔtɔkɩ kazandʋ ndʋ tɩ-naalɛ se paɖʋ hadɛ tɩnaa hɩɖɛ. Takayaɣ ŋga payaɣ se Celebrating Life Customs Around the World—From Baby Showers to Funerals yɔ, kɔyɔɔdaa se Qingming alɩwaatʋ taa «pɔsɔkɩ miŋ tɔɔnaɣ, sʋlʋm nɛ liidiye hatʋ se pɩsa nɛ pa-taa tɛ se sɩɖaa ɩɩkaɣ sɩbʋ ñɔɔsɩ yaa lɔkɔtʋ nɛ paakaɣ ɖɔɖɔ tɛɖʋʋ liidiye.» Takayaɣ ŋga kɔyɔɔdaa ɖɔɖɔ se ɛyaa mba pɔtɔkɩ kazandʋ ndʋ yɔ «ñazɩñazɩŋ kazandʋ alɩwaatʋ taa, kɔzɩ kɔzɩ ɖoo wena a-taa fenaɣ ñakɩ kpem yɔ, sɩɖaa nɛ ɛsadɩnaa palakɩ tʋmɩyɛ nɛ pɩkɩlɩ ɖoo lɛɛna. Pʋyɔɔ pɩmʋnaa se pala ɖʋtʋ nɛ pɛhɛzɩ sɩɖaa laŋa nɛ paɖʋ hadɛdɩnaa hɩɖɛ.»

  • Chuseok. Takayaɣ ŋga payaɣ se The Korean Tradition of Religion, Society, and Ethics yɔ kɔyɔɔdaa se kazandʋ ndʋ tɩ-taa lɛ, «pahaɣ tɔɔnaɣ nɛ vɛɛ mba pasɩba yɔ pa-kalɩzasɩ.» Haɖɛ nɖɩ ɖɩwɩlɩɣ se «pamaɣzɩɣ ɛyʋ tomnaɣ sɩm wayɩ lɛ, kalɩzaɣ ñɛwɛɣ wezuu tam.»

  Kazandʋ ndʋ tɩlakɩ nɔɔ kʋɖʋmaɣ nɛ tɩyɩtʋ yɔ: Bibl yɔɔdʋʋ se: «Weyi ɛtɩyɩɣ yɔ, yaa weyi ɛlakɩ maajiki yɔ, yaa piye pɔzɩyʋ yaa alɩfaa, yaa weyi ɛhɔkʋʋ lalaa fadɩŋ se pɩkɔnɩ-wɛ kaɖɛ yɔ, yaa weyi ewoki tɩʋ tɛ se ɛlɛ ɛsʋzɩ sɩɖʋ yɔ, yaa tɩʋ weyi ɛyɔɔdʋʋ cee wayɩ tɔm yɔ yaa weyi ɛpɔzʋʋ se ɛnɩɩ sɩɖaa nɔɔ taa tɔm yɔ. . . . Yehowa paɖɩɣ ɛyʋ weyi ɛlakɩ lakasɩ nzɩ yɔ.» (Wayɩ Wayɩ Paɣtʋ 18:10-12) Mba patɩyɩɣnɩ tɩɩnzɩ yɔ, tɩyɩtʋ lakasɩ pɩkɛnaa ɖɔɖɔ. Pɩsa nɛ Yehowa Aseɣɖe Tɩnaa ɩtaatɔlɩ tɩyɩtʋ kpaca nakʋyʋ taa lɛ, paatɔkɩ Halloween nɛ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  • Sinhala mba nɛ tamoul mba tɛ pɩnaɣ kɩfalaɣ. «Pɩtalɩɣ kazandʋ tʋnɛ tɩ-alɩwaatʋ natʋyʋ taa lɛ, palakɩ tʋma naayɛ nɛ mba patɩyɩɣnɩ tɩɩnzɩ yɔ pamaɣzɩɣ se tʋma ana ahaɣ ñʋʋ leleŋ.»—Encyclopedia of Sri Lanka.

  • Songkran: Aazii taa kazandʋ ndʋ «tɩlɩnɩ tɔm piye sanskrit taa nɛ ɖɩ-tɔbʋʋ lɛ se «tɩɩnzɩ ɖɔnɛ» nɛ kazandʋ ndʋ tɩ-taa «wɩsɩ sʋʋ tɩɩnzɩ tindimiye nɖɩ payaɣ se Belier yɔ ɖɩ-taa.»—Food, Feasts, and Faith—An Encyclopedia of Food Culture in World Religions.

  Kazandʋ ndʋ palakɩ nɛ tɩwɛ nɔɔ kʋɖʋmaɣ nɛ Moyizi paɣtʋ yɔ, tʋtʋ ñasɩ tɩnaɣ alɩwaatʋ ndʋ pala Yesu yɔ. Bibl yɔɔdʋʋ se: «Krɩstʋ kɛnɩ Paɣtʋ tɩnaɣ.» (Roma mba 10:4) Paɣtʋ kila wena awɛ Moyizi paɣtʋ ndʋ paacɛlɩ Izrayɛɛlɩ mba yɔ tɩ-taa taa yɔ, awazɩɣ Krɩstʋ mba halɩ nɛ sɔnɔ. Ɛlɛ, paalakɩ kazandʋ ndʋ tɩɩwɛ paɣtʋ ndʋ tɩ-taa yɔ, kɔzɩ kɔzɩ ndʋ tɩyɔɔdʋʋ Yesu kɔmtʋ tɔm yɔ, mbʋ pʋyɔɔ yɔ pamaɣzɩɣ se Krɩstʋ tɛm kɔm. Bibl yɔɔdʋʋ se: «Pɩkɛ wondu ndʋ tɩkaɣ kɔm yɔ tɩ-kɩlɛmʋʋ, ɛlɛ pʋyʋ keem lɛ Krɩstʋ.» (Koloosi mba 2:17) Pesidi kazandʋ natʋyʋ taa sɔnzɩ nzɩ sɩtɩlɩɩnɩ Masɩ taa nɛ pɩtɩŋnɩ lɩmaɣza ana a-yɔɔ ɖɔɖɔ lɛ, Yehowa Aseɣɖe Tɩnaa ɩɩtɔkɩ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  • Hanukka. Kazandʋ ndʋ tɩ-taa pɔtɔzʋʋ alɩwaatʋ ndʋ paañɔɔzɩ Yeruzalɛm templo nɔnɔsɩ yɔ tɩ-yɔɔ. Ŋgʋ Bibl ñɔyɔɔdʋʋ se Yesu pɩsɩ Cɔjɔ Kɩlɩm «kizinziku [yaa templo] ŋgʋ kɩpaɣlaa nɛ pɩkɩlɩ nɛ kɩwɛɛ pilim nɛ pɩkɩlɩ yɔ kɩ-tɛɛ, patɩlabɩ-kʋ nɛ nesi, pʋ-tɔbʋʋ se kɩtɩkɛ ɛjaɖɛ ɖɩnɛ ɖɩ-yɔɔ pʋyʋ.» (Ebree mba 9:11) Krɩstʋ mba ɛsɩndaa lɛ, fezuu taa templo ŋgʋ kɩlɛɣzɩ Yeruzalɛm templo lone taa.

  • Rosh Hashanah. Yuuda mba pɩnaɣ taa kajalaɣ kɩyakʋ lɛ. Ðooo caanaʋ taa lɛ, palaɣaɣ Ɛsɔ kɩlaŋ nɩɩyɩ kazandʋ ndʋ ti-wiye. (Kɩgalʋʋ 29:1-6) Ɛlɛ, Yesu Krɩstʋ pʋ-tɔbʋʋ se Mesiya kaɣ «labʋ nɛ kɩlaʋ nɛ haɖɛ sɩɩ tɩnaɣ.» (Danɩyɛɛlɩ 9:26, 27) Ye mbʋ Ɛsɔ ɛsɩndaa lɛ, lakasɩ nzɩ sɩtɩtasɩ wɛnʋʋ wazaɣ nakɛyɛ.

• Kazandʋ ndʋ tiseɣtiɣ ɛyaa se paa pɛfɛyɩ cooci kʋɖʋmʋʋ taa yɔ, pɛkpɛndɩ nɛ pɛsɛɛ Ɛsɔ?

  Bibl paɣtʋ kiɖe: «Weyi ɛwɛnɩ tisuu nɛ weyi ɛfɛyɩnɩ tisuu yɔ, paka we? Nɛ ɖama nɩnʋʋ mbʋ wɛ Ɛsɔ tɛ templo nɛ sɩʋ kpelisi pɛ-hɛkʋ taa?»—2 Kɔrɛntɩ mba 6:15-17.

  Yehowa Aseɣɖe Tɩnaa ñakɩ pana se pa nɛ pɔ-cɔlɔ mba pɛwɛɛ nɔɔ kʋɖʋmaɣ taa, nɛ peɖiɣzinaa ɖɔɖɔ se paa weyi ɛwɛnɩ waɖɛ se ɛlɩzɩ ɛ-Ɛsɔ sɛtʋ ɛgbɛyɛ; paa mbʋ yɔ, kazandʋ ndʋ tiseɣtiɣ ɛyaa se paa pɛfɛyɩ cooci kʋɖʋmʋʋ taa yɔ, pɛkpɛndɩ nɛ pɛsɛɛ Ɛsɔ yɔ paatɔkɩ-tʋ. Tɩ-taa natʋyʋ yɔ:

  Kazandʋ ndʋ tɩɖʋʋ hɩɖɛ cooci nakʋyʋ taa tʋ yaa ndʋ tiseɣtiɣ ɛyaa mba pɛfɛyɩ Ɛsɔ sɛtʋ ɛgbɛyɛ kʋɖʋmɖɩyɛ taa yɔ se pɛkpɛndɩ nɛ pɛsɛɛ Ɛsɔ yɔ. Alɩwaatʋ taa Ɛsɔ kaasʋnɩ ɛ-samaɣ ɛjaɖɛ nɖɩ ɖɩ-taa ɛyaa lakaɣ sɔnzɩ lɛɛsɩ yɔ, eheyi-kɛ se: «Pɩtɩpɔzɩ se ña nɛ wɛ yaa ña nɛ pɛ-ɛsɔnaa ɩɖʋ ɛgbɛyɛ. . . . Ye ŋsɛɣ pɛ-ɛsɔnaa kɔyɔ, pɩtʋʋ fɛyɩ se pɩkaɣ-ŋ pɩsʋʋ kpaca.» (Ejipiti Lɩʋ 23:32, 33) Pʋyɔɔ lɛ, Yehowa Aseɣɖe Tɩnaa ɩɩtɔkɩ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  • Loy Kratong. Thaï mba kazandʋ ndʋ tɩ-taa, «ɛyaa kpakɩɣ tɩŋ hatʋ nɛ palakɩnɩ ñanzɩ cikpesi nasɩyɩ, paɖʋ sɩ-taa buuziiwaa, sɔnzɩ tɩlaaɖɩ ɖasɩ nɛ pakpaɣ ñanzɩ nzɩ nɛ pasɩɩ lɩm yɔɔ. Pɔyɔɔdʋʋ se kpɩyɩŋ cikpeŋ ɛnɩ ɩkpakɩɣ ñʋʋzɩkɩyɛ nɛ ɩɖɛɣna. Toovenim taa lɛ, pɔtɔkɩ kazandʋ ndʋ se paɖʋ Bouddha hɩɖɛ.»—Encyclopedia of Buddhism

  • Ɛjaɖɛ kpeekpe kpiɖuu evemiye. Papouasie-Nouvelle-Guinée ɛjaɖɛ taa komina lone taa caɣyʋ nɔɔyʋ yɔɔdɩ tɔm natʋyʋ nɛ pama-tʋ ɛjaɖɛ nɖɩ ɖɩ-taa ɛjaɖɛ yɔɔ tɔm susuu takayaɣ ŋga payaɣ se The National ka-taa, ɛyɔɔdaa se mba pɔtɔkɩ kazandʋ ndʋ yɔ, «pawɩlɩɣ se petisiɣ tɔm ndʋ Krɩstʋ mba wɩlɩɣ yɔ tɩ-taa sɔsɔtʋ yɔɔ.» Ɛtasɩ yɔɔdʋʋ se kazandʋ ndʋ «tiyeki nɛ Krɩstʋ mba paɣtʋ kila yɛlɩɣ ɛjaɖɛ taa nɛ pɩkɩlɩɣ.»

  • Vesak. «Kazandʋ ndʋ tɩkɩlɩnɩ cɛyʋʋ Bouddha mba ɛsɩndaa, nɛ tɩsandɩɣ Bouddha lʋlʋʋ, ɛ-ñalɩmɩyɛ taa sʋʋ nɛ ɛ-sɩm (alɩwaatʋ ndʋ ɛsʋ nirvâna taa yɔ).»—Holidays, Festivals, and Celebrations of the World Dictionary.

    

  Kazandʋ ndʋ tɩlɩnɩ sɔnzɩ nzɩ sɩɩlakɩ nɔɔ kʋɖʋmaɣ Bibl taa tɔm yɔ. Yesu heyi Ɛsɔ sɛtʋ ñʋndɩnaa se: «Mɩ-sɔnzɩ yɔɔ lɛ, ɩlaba nɛ Ɛsɔ tɔm tɩtasɩ wɛnʋʋ wazaɣ.» Ɛyɔɔdaa ɖɔɖɔ se pɛ-Ɛsɔ sɛtʋ kɛ falaa mbʋ pʋyɔɔ yɔ tɔm ndʋ pawɩlɩɣ yɔ, «ɛyaa paɣtʋ tɩkɛnaa.» (Maatiyee 15:6, 9) Tɔm tʋnɛ tɩcɛyɩ Yehowa Aseɣɖe Tɩnaa ɛsɩndaa, pʋyɔɔ paatɔkɩ Krɩstʋ mba kazandʋ sakɩyɛ.

  • Épiphanie (Timkat yaa Awiya kazandʋ). Kazandʋ ndʋ titukuuni Yesu lɩm mɩyɩsʋʋ yaa alɩwaatʋ ndʋ mba patɩyɩɣnɩ tɩɩnzɩ yɔ powobi Yesu cɔlɔ yɔ. Kazandʋ ndʋ «tiyeba nɛ kpiziɣɖe alɩwaatʋ taa sɩɩnaa layaa kazandʋ ndʋ tɩɖʋʋ hɩɖɛ pɔsɩ cikpesi nɛ pɔsɩ sɔsɔsɩ yɔ, tɩpɩsɩ Krɩstʋ mba kazandʋ natʋyʋ.» (The Christmas Encyclopedia) Timkat kɛ kazandʋ ndʋ tɩ-ɖɔndɩ Etiyoopii ɛjaɖɛ taa, nɛ «tɩkam lila sɔnzɩ taa kpem.»—Encyclopedia of Society and Culture in the Ancient World

  • Maarɩɩ ɛsɔdaa kpaʋ. Kazandʋ ndʋ tɩwɩlɩɣ se Yesu ɖoo kpa ɛsɔdaa nɛ e-tomnaɣ maɣmaɣ. Takayaɣ ŋga payaɣ se Religion and Society—Encyclopedia of Fundamentalism yɔ, kɔyɔɔdaa se «pataatɩlɩ lɩmaɣza ana kajalaɣ cooci taa nɛ tɩ-tɔm natʋyʋ fɛyɩ Masɩ taa.»

  • Maarɩ weyi ɛtɩlɩ pilim yɔ ɛ-kazandʋ. Patɩyɔɔdɩ [Maarɩɩ] weyi ɛtalɩ pilim yɔ ɛ-tɔm Masɩ taa. Cooci maɣmaɣ lubini wɩlɩtʋ ndʋ.»—New Catholic Encyclopedia

  • Nɔɔ hɔkʋʋ. Takayaɣ ŋga payaɣ New Catholic Encyclopedia yɔ kɔyɔɔdʋʋ se «pɩnzɩ nasɩnaza waa taa» paɖʋ nɔɔ hɔkʋʋ nɛ tɩ nazʋʋ alɩwaatʋ ndʋ; nɛ pɛtɛm maʋ Bibl nɛ pɩcɛzɩ pɩnzɩ 200 pʋcɔ nɛ pɩlakɩ mbʋ. Takayaɣ ŋga kɔyɔɔdɩ nɔɔ hɔkʋʋ kajalaɣ evemiye tɔm se: «Sɔnzɩ nzɩ palakɩ nɛ pataɣ tɔlɩma pazɩ coocinaa tɩnaa kila taa [tɔlɩma tɛ cɩla] wiye yɔ, palabɩ cooci ñʋndɩnaa kediɣzaɣ sɔsɔɔ pɩnaɣ 1901 taa nɛ pɩtɛ lɛ, sɩyɛlɩ paa le.»

  • Mɛsɩkɛɛlɩ. Takayaɣ ŋga payaɣ se Encyclopedia of Society and Culture in the Medieval World yɔ kɔyɔɔdʋʋ se Etiyoopii mba kazandʋ ndʋ tɩsandɩɣ «alɩwaatʋ ndʋ tɩ-taa pehiɣ kaamaŋgaɣ maɣmaɣ yɔ (kaamaŋgaɣ ŋga kɔ-yɔɔ paakam Krɩstʋ yɔ); kazandʋ ndʋ tɩ-taa pɔsɔkɩ taa leleŋ miŋ nɛ papaɣ nɛ pɔcɔʋ kaamaŋgaɣ ŋga.» (Weyi ɛma tɔm tʋnɛ yɔ, ɛnʋ tɩnɩ ɖɔɖɔ tɔm ndʋ tɩwɛ kʋlɔmɩŋ taa yɔ). Ŋgʋ Yehowa Aseɣɖe Tɩnaa ɩɩlakɩnɩ tʋmɩyɛ kaamaŋgaɣ pɛ-Ɛsɔ sɛtʋ taa.

• Ɛzɩ kazandʋ ndʋ tɩɖʋʋ ɛyʋ nɔɔyʋ, ɛgbɛyɛ naɖɩyɛ yaa ɛjaɖɛ kɩɖaʋ pʋyʋ?

  Paɣtʋ kiɖe: «Tɔm tʋnɛ Yehowa yɔɔdʋʋ: “Pɔlɔ nɔɔ kɩdɛkɛdaɣ ɛyʋ weyi ɛtaɣ ɛyaa yem liu yɔ ɛ-yɔɔ, Weyi ɛtaɣ liu ɛyʋ ɖoŋ yɔ, Nɛ weyi ɛ-laŋɩyɛ haɣ siɣye Yehowa yɔ.”»—Yereemii 17:5.

  Yehowa Aseɣɖe Tɩnaa wɩlɩɣ se pɔsɔɔlɩ ɛyaa lalaa nɛ halɩ papɩzɩɣ nɛ patɩmɩ pɔ-yɔɔ; ɛlɛ paaɖʋʋ pɔ-nɔɔ kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  Kazandʋ ndʋ tɩɖʋʋ hɩɖɛ ñʋʋdʋ yaa ɛyʋ sɔsɔ nɔɔyʋ yɔ. Bibl yɔɔdʋʋ se: «Pɩsa nɛ pɩya mɩ-ñʋʋ lɛ, iyele taʋ liu ɛyʋ yem, Weyi ɛkɛ mɔɔŋ tɛɛ helim yem yɔ. Ɛbɛ yɔɔ pɩwɛɛ se pamaɣzɩ ɛ-yɔɔ?» (Izaayii 2:22) Pʋyɔɔ Yehowa Aseɣɖe Tɩnaa ɩɩtɔkɩ wiyaʋ nɔɔyʋ yaa abiɖe naɖɩyɛ lʋlʋʋ kazandʋ.

  Kazandʋ ndʋ tɩɖʋʋ kɩɖaʋ kɛdɛɛka hɩɖɛ yɔ. Yehowa Aseɣɖe Tɩnaa ɩɩɖʋʋ nɔɔ kazandʋ ndʋ palakɩ se pɔtɔzɩ evemiye nɖɩ ɖi-wiye pakpaɣ lɩmaɣzɩyɛ se palakɩnɩ kɩɖaʋ kɛdɛɛka tʋmɩyɛ yɔ tɩ-taa. Ɛbɛ yɔɔ? Mbʋ pʋyɔɔ Bibl yɔɔdʋʋ: «Piya cikpesi, ɩkpa mɩ-tɩ nɛ sɩʋ kpelisi.» (1 Yohanɛɛsɩ 5:21) Sɔnɔ, ɛyaa nabɛyɛ maɣzɩɣ se kɩɖaʋ kɛdɛɛka tɩkɛ sɩʋ kpeliɣa, katɩkɛnɩ mbʋ pɩwɛɛ se pɛsɛɛ yɔ; ɛlɛ caanaʋ taa tɔm kɛdɩyʋ Carlton Hayes kaamawa se: «Mbʋ pɩsɩŋnɩ tisuu nɛ pɛsɛɣ-pʋ nɛ pɩkɩlɩ yɔ mbʋ lɛ kɩɖaʋ kɛdɛɛka.»

  Kazandʋ ndʋ tɩɖʋʋ kiɖeɖeu nɔɔyʋ hɩɖɛ yɔ. Alɩwaatʋ ndʋ ɛyʋ nɔɔyʋ kaaluŋ apostoloo Pɩyɛɛrɩ tɛɛ yɔ, ɛbɛ Pɩyɛɛrɩ kaalaba? Bibl yɔɔdʋʋ se: «Pɩyɛɛrɩ kʋsɩ-ɩ, nɛ eheyi-i se: “Kʋyɩ; ma ɖɔɖɔ mɛnkɛ ɛyʋ yem na.”» (Tʋma Labʋ 10:25, 26) Pɩyɛɛrɩ yaa apostoloowaa taa nɔɔyʋ taatisi se paɖʋ-ɩ ŋgee hɩɖɛ yaa pɛsɛɛ-ɩ; pʋyɔɔ Yehowa Aseɣɖe Tɩnaa ɩɩɖʋʋ nesi kazandʋ ndʋ tɩɖʋʋ hɩɖɛ mba pakpakɩɣ se pɛkɛ kiɖeɖema yɔ; kazandʋ ndʋ tɩ-taa natʋyʋ yɔ:

  • Toussaint: «Kazandʋ ndʋ tɩɖʋʋ kiɖeɖema tɩŋa hɩɖɛ yɔ [. . .]. Paasɩŋ keekee ɖenɖe kazandʋ ndʋ tɩlɩnaa yɔ.»—New Catholic Encyclopedia.

  • Notre-Dame de Guadalupe tɛ kazandʋ. Kazandʋ ndʋ tɩɖʋʋ hɩɖɛ «Mɛskɩsiiki kiɖeɖeu sɔsɔ;» nɛ pamaɣzɩɣ se ɛnʋ lɛ Maarɩɩ, Yesu ɖoo. Pɔtɔŋ se ɛtɩŋnɩ piti lakasɩ nasɩyɩ yɔɔ nɛ ɛlɩɩ haɖʋ nɔɔyʋ yɔɔ pɩnaɣ 1531 taa.—The Greenwood Encyclopedia of Latino Literature.

    

  • Hɩɖɛ cikpeɖe kazandʋ. Takayaɣ ŋga payaɣ se Celebrating Life Customs Around the World—From Baby Showers to Funerals yɔ kɔyɔɔdaa se: «Hɩɖɛ cikpeɖe kazandʋ kɛnɩ kazandʋ ndʋ palakɩ se paɖʋ hɩɖɛ kiɖeɖeu weyi ɛ-hɩɖɛ pakpaɣ nɛ pɛcɛlɩ pɩɣa nakɛyɛ ka-lʋlʋʋ wiye yaa ka-lɩm mɩyɩsʋʋ wiye yɔ.» Takayaɣ ŋga katasɩ yɔɔdʋʋ se «evemiye nɖɩ ɖɩkɛ Ɛsɔ sɛtʋ evemiye sɔsɔɖɛ kpem.»

  Kazandʋ ndʋ tɩɖʋʋ politiki yaa samaɣ taa agbaa naayɛ hɩɖɛ yɔ. Bibl yɔɔdʋʋ se: «Pɩwɛ ɖeu se ɛyʋ ɛɖʋ Yehowa kʋyʋʋ nɛ pɩkɩlɩ se ɛtaa ɛyaa liu.» (Keɣa 118:8, 9) Pɩsa nɛ Yehowa Aseɣɖe Tɩnaa wɩlɩ se paataɣ ɛyaa liu, ɛlɛ Ɛsɔ pataɣ liu se ɛkɔɔ nɛ ɛcɔnɩ ɛjaɖɛ tɩlasɩ ɖeɖe lɛ, paaɖʋʋ pɔ-nɔɔ kazandʋ ndʋ payaɣ se halaa evemiye yaa evebiya evemiye yɔ tɩ-taa; mbʋ pʋyɔɔ yɔ kazandʋ ndʋ tɩɖʋʋ nesi politiki yaa samaɣ taa agbaa. Pʋyɔɔ ɖɔɖɔ paaɖʋʋ pɔ-nɔɔ tɩ yɔɔ wɛʋ evemiye yaa kazandʋ ndʋ tɩ-ɖaɣʋnaa taa. Ɛlɛ Ɛsɔ Kewiyaɣ pataɣ liu se kakaɣ yebu nɛ tɛ yɔɔ tɛ yɔɔ lakasɩ sɩɩ tɩnaɣ.—Roma mba 2:11; 8:21.

• Kazandʋ ndʋ tiyeki se ɛyaa ɩmaɣzɩ se ɛjaɖɛ naɖɩyɛ yaa kʋnʋŋ nakʋyʋ taa mba kɩlɩ lalaa na?

  Bibl paɣtʋ kiɖe: «Ɛsɔ ɛɛtʋkʋʋ ɛyaa taa, ɛlɛ paa ɛjaɖɛ nɖɩ ɖɩ-taa, weyi ɛñaŋɩ-ɩ nɛ ɛlakɩ mbʋ pɩwɛ ɖeu yɔ ɛ-tɔm kɛdɩɣnɩ-ɩ.»—Tʋma Labʋ 10:34, 35.

  Yehowa Aseɣɖe Tɩnaa sakɩyɛ sɔɔlɩ pa-ajɛɛ, ɛlɛ paañɩnɩɣ se paɖʋ nesi kazandʋ ndʋ tiyeki se pamaɣzɩ se pa-ajɛɛ yaa pa-kʋnʋmɩŋ kɩlɩ lɛɛŋ yɔ. Tɩ-taa natʋyʋ yɔ:

  Kazandʋ ndʋ tɩɖʋʋ sɔɔjanaa hɩɖɛ yɔ. Yesu tiseɣti ɛyaa se pala you, ɛlɛ eheyi ɛ-wayɩ tɩŋɩyaa se: «Iwolo pɩ-yɔɔ nɛ ɩsɔɔlɩ mi-koyindinaa nɛ ɩtɩmɩ mba panazɩɣ-mɩ yɔ pɔ-yɔɔ,” (Maatiyee 5:44) Mbʋ yebina nɛ Yehowa Aseɣɖe Tɩnaa ɩɩtɔkɩ kazandʋ ndʋ tɩɖʋʋ sɔɔjanaa hɩɖɛ yɔ; tɩ-taa natʋyʋ yɔ:

  • Anzac evemiye. «Anzac kɛnɩ Australian and New Zealand Army Corps kajalaɣ masɩ» (Ositralii nɛ Nuvɛɛlɩ Zelandɩ sɔɔjanaa).» Kazandʋ ndʋ tɩkɔma nɛ «pazɩ pazɩ lɛ, tɩpɩsɩ evemiye nɖɩ ɖi-wiye pɔtɔzʋʋ mba pasɩbɩ you taa yɔ pɔ-yɔɔ yɔ.»—Historical Dictionary of Australia.

  • Yɔɔ tɔzʋʋ evemiye yaa sɔɔjanaa kɩbɩma evemiye. Kazandʋ ndʋ tɩɖʋʋ hɩɖɛ «sɔɔjanaa kɩbɩma nɛ mba pasɩbɩ you taa pɛ-ɛjaɖɛ yɔɔ yɔ.»—Encyclopædia Britannica

  Kazandʋ ndʋ tɩyɔɔdʋʋ ajɛɛ tɔm yaa a-tɩ yɔɔ wɛʋ tɔm yɔ. Yesu yɔɔdɩ ɛ-wayɩ tɩŋɩyaa tɔm se: «Patɩkɛ ɛjaɖɛ yɔɔ mba, ɛzɩ ma ɖɔɖɔ mantɩkɛ ɛjaɖɛ yɔɔ tʋ yɔ.» (Yohanɛɛsɩ 17:16) Yehowa Aseɣɖe Tɩnaa sɔɔlɩ ajɛɛ yɔɔ tɔm kpɛlɩkʋʋ; paa mbʋ yɔ, paaɖʋʋ nesi kazandʋ ndʋ pɔyɔɔdɩ tɩ-tɔm pɩ-tɛɛ cɩnɛ yɔ:

  • Ositralii evemiye. Takayaɣ ŋga payaɣ se Worldmark Encyclopedia of Cultures and Daily Life yɔ kɔtɔŋ se kazandʋ ndʋ tiyeki nɛ pɔtɔzʋʋ evemiye nɖɩ ɖi-wiye «Aŋgletɛɛrɩ sɔɔjanaa siɣ pa-kɩɖaʋ kɛdɛɛka 1788 taa nɛ pɔyɔɔdɩ se Ositralii pɩsɩ pɛ-tɛtʋ yɔ.»

  • Guy Fawkes evemiye. «Kazandʋ ndʋ palakɩ-tʋ se pɔtɔzɩ evemiye nɖɩ ɖi-wiye pañɩnaɣ se pakʋ Aŋgletɛɛrɩ wiyaʋ Jacques 1^er nɛ [Aŋgletɛɛrɩ] paɣtʋ lɩzɩyaa nɛ katoliiki mba lalaa mba Guy Fawkes kaañɔɔzɩ pɩnaɣ 1605 taa yɔ.»—A Dictionary of English Folklore.

  • Ɛjaɖɛ hɛzɩyɛ mʋʋ evemiye. Ajɛɛ sakɩyɛ taa lɛ, «evemiye nɖɩ palɩzaa se ɖi-wiye lɛ, samaɣ kaatɔɔ kazandʋ nɛ kɔtɔzɩ kɩyakʋ ŋgʋ ɛjaɖɛ nɖɩ ɖɩmʋ hɛzɩyɛ nɛ ɖɩwɛɛ ɖɩ-tɩ yɔɔ yɔ.»—Merriam-Webster’s Unabridged Dictionary.

• Kʋzʋʋ lakasɩ wɛ kazandʋ tɩ-taa nɛ tɩ ɖɔkʋʋ fɛyɩ tɩ-taa?

  Bibl paɣtʋ kiɖe: «Pɩmaɣ mbʋ se alɩwaatʋ ndʋ tɩɖɛwa yɔ tɩ-taa, ɩɩlabɩ ajɛɛ sɔɔlɩm alɩwaatʋ ndʋ ɩkpaɣ mɩ-tɩ nɛ ɩcɛlɩ lakasɩ nzɩ sɩwɛ fɛyɛ yɔ, kɔɖɛyɩ ŋgʋ kɩ-taa ɛyaa ɩɩpɩzɩɣ pa-tɩ ɖɔkʋʋ yɔ, sʋlʋm ñɔʋ kadadayaɣ, kazandʋ ndʋ tɩ-taa pɛɖɛlɛsɩɣ niye yɔ, ahela labʋ sʋlʋm ñɔʋ taa, nɛ sɩɩnaa latʋ ndʋ tɩwɛ kiniŋ yɔ.»—1 Pɩyɛɛrɩ 4:3.

  Paɣtʋ kiɖe ɖɩnɛ ɖɩ-yɔɔ lɛ, Yehowa Aseɣɖe Tɩnaa ɩɩɖʋʋ nesi kazandʋ ndʋ tɩ-taa pɔñɔʋ sʋlʋm sakɩyɛ yaa ɛyaa ɩɩɖɔkʋʋ pa-tɩ yɔ tɩ-taa. Yehowa Aseɣɖe Tɩnaa sɔɔlaa se pa nɛ pa-taabalaa pekpeɣliɣ ɖama; halɩ papɩzɩɣ nɛ pɔñɔɔ sʋlʋm alɩwaatʋ ndʋ tɩ-taa, ɛlɛ paaɖɛlɛsɩɣ niye. Pañakɩ pana nɛ pɔɖɔŋ Bibl paɣtʋ kiɖe ɖɩnɛ ɖɩ-yɔɔ: «Paa ɩtɔkɩ yaa ɩñɔʋ yaa paa ɛbɛ ɖɔɖɔ ɩlakɩ yɔ, ɩla pɩtɩŋa Ɛsɔ samtʋ yɔɔ.»—1 Kɔrɛntɩ mba 10:31.

  Pʋyɔɔ lɛ Yehowa Aseɣɖe Tɩnaa ɩɩɖʋʋ pe-nesi carnaval waa yaa kazandʋ ndʋ tɩ-taa palakɩ lakasɩ nzɩ Bibl tɩsɔɔlɩ yɔ. Tɩ-taa lɛ Yuuda mba kazandʋ ndʋ payaɣ se Puurim yɔ. Toovenim alɩwaatʋ sakɩyɛ taa lɛ, paalakaɣ Puurim kazandʋ se pɔtɔzɩnɩ alɩwaatʋ ndʋ palɩzɩ Yuuda mba yomiye taa pɩnzɩ 400 waa P. P. Y. yɔ tɩ-yɔɔ; ɛlɛ takayaɣ ŋga payaɣ se Essential Judaism yɔ kɔyɔɔdʋʋ se sɔnɔ lɛ, pɩwɛ ɛzɩ Puurim «kɛ Yuuda mba kazandʋ ndʋ tɩnɩɣzɩnɩ kazandʋ ndʋ payaɣ se Mardi gras yaa carnaval yɔ.» Mba palakɩ kazandʋ ndʋ yɔ pa-taa sakɩyɛ «lɛzɩɣ pɛ-wɛtʋ (ɖoŋ ɖoŋ abalaa suu wondu ɛzɩ halaa yɔ), paacɔŋnɩ pa-lakasɩ ɖeɖe, pɔñɔʋ sʋlʋm sakɩyɛ nɛ pamakɩ kubusi pɩfɛyɩ yɔɔdʋʋ.»

Paa Yehowa Aseɣɖe Tɩnaa ɩɩtɔkɩ kazandʋ natʋyʋ yɔ, ɛzɩ pɔsɔɔlɩ pɔ-hɔŋ taa mba na?

Ɛɛɛ. Bibl wɩlɩɣ ɛyaa se pɩwɛɛ se pɔsɔɔlɩ nɛ paña pɔ-hɔŋ taa ɛyaa kpeekpe, paa tisuu mbʋ patɩɩwɛna yɔ. (1 Pɩyɛɛrɩ 3:1, 2, 7) Toovenim taa lɛ, alɩwaatʋ ndʋ Yehowa Aseɣɖe Tʋ yeki kazandʋ natʋyʋ tɔɔʋ yɔ, ɛ-hɔʋ taa mba taa pɩzɩɣ nɛ pɩwɩɩ, halɩ papɩzɩɣ nɛ pamaɣzɩ se ɛlɔ-wɛ nɛ ɛtɩsɔɔlɩ-wɛ. Pʋyɔɔ Yehowa Aseɣɖe Tɩnaa nabɛyɛ woki nɛ pɛhɛzɩɣ pɔ-hɔŋ taa mba laŋa nɛ pawɩlɩɣ-wɛ se pɔsɔɔlɩ-wɛ mbʋ; palɩzɩɣ-wɛ ɖɔɖɔ mbʋ pʋyɔɔ paatɔkɩ kazandʋ natʋyʋ yɔ pɩ-taa; nɛ powoki nɛ panaɣ pɔ-hɔŋ taa ñɩma mba patɩkɛ Aseɣɖe Tɩnaa yɔ alɩwaatʋ lɛɛtʋ yɔɔ.

Ɛzɩ Yehowa Aseɣɖe Tɩnaa heyiɣ ɛyaa lalaa se pataatɔɔ kazandʋ natʋyʋ?

Aayɩ. Panawa se paa weyi pɩwɛɛ se ɛkpaɣ ɛ-maɣmaɣ ɛ-lɩmaɣza. (Yozuwee 24:15) Yehowa Aseɣɖe Tɩnaa ɖʋʋ «hɩɖɛ ɛyaa ndɩ ndɩ» paa Ɛsɔ sɛtʋ ɛgbɛyɛ nɖɩ taa pɛwɛɛ yɔ.—1 Pɩyɛɛrɩ 2:17.