Aduwa 16:3—«Kuli ña-tʋma yɔɔ nɛ ŋwɩlɩ Kɩbaɣlʋ»

«Ðʋzɩ mbʋ payɩ ŋlakɩ yɔ Yehowa nesi taa, nɛ mbʋ ŋɖʋwa se ŋlakɩ yɔ pɩkaɣ ɖɔm camɩyɛ.»—Aduwa 16:3, Ɛjaɖɛ kɩfaɖɛ tɔm ɖɛzʋʋ.

«Kuli ña-tʋma yɔɔ nɛ ŋwɩlɩ Kɩbaɣlʋ, nɛ ña-lɩmaɣza kaɣ ɖɔm camɩyɛ.»—Aduwa 16:3, TAKAYAƔ KIÐEÐEA, Verbum Bible, 1997.

Aduwa 16:3 tɔbʋʋ nɩʋ

Mayaɣ kanɛ keyeki se mba pɛsɛɣ Ɛsɔ toovenim tʋ yɔ pa-taa ɩtɛ se ye peyeki se Ɛsɔ ɛwɩlɩ-wɛ nʋmɔʋ nɛ pɩwɩlɩ se pataɣ-ɩ liu yɔ, mbʋ paɖʋwa se palakɩ yɔ pɩkaɣ ɖɔm camɩyɛ.

«Ðʋzɩ mbʋ payɩ ŋlakɩ yɔ Yehowa nesi taa.» Pʋcɔ nɛ Yehowaa sɛyaa kpaɣ lɩmaɣza lɛ, pɔpɔzʋʋ-ɩ nɛ tɩ luzuu se ɛwɩlɩ-wɛ nʋmɔʋ. (Yakubu 1:5) Ɛbɛ yɔɔ? Mbʋ pʋyɔɔ yɔ, lɩmaɣzɩyɛ naɖɩyɛ lɛ se mbʋ pɩtalɩɣ ɛyaa pe-wezuu caɣʋ taa yɔ, ɖoŋ ɖoŋ lɛ pɛfɛyɩnɩ ɖoŋ sakɩyɛ pɩ-yɔɔ yaa pɛfɛyɩnɩ ɖoŋ pɩ-yɔɔ paa ññɩɩ. (Eklezɩyasɩtɩ 9:11; Yakubu 4:13-15) Pɩtasɩ lɛ, papɩzɩɣ paawɛɣnɩ lɔŋsɩnɖɛ se pala mbʋ paɖʋwa se palakɩ yɔ. Lɩmaɣza ana a-yɔɔ lɛ ɛyaa sakɩyɛ cɛlɩɣ yaa ɖʋzʋʋ mbʋ pacaɣ labʋ yɔ Ɛsɔ nesi tɛɛ. Palakɩ mbʋ pɩtɩŋnɩ ɛzɩma patɩmɩɣnɩ-ɩ se ɛwɩlɩ-wɛ nʋmɔʋ yɔ, nɛ ɛzɩma pañakɩ pana se pa-lakasɩ ɩla nɔɔ kʋɖʋmaɣ nɛ ɛ-sɔɔlɩm ɛzɩ ɛ-Tɔm Bibl wɩlʋʋ yɔ.—Aduwa 3:5, 6; 2 Timootee 3:16, 17.

Tɔm ndʋ pɛɖɛzaa se «kuli ña-tʋma yɔɔ nɛ ŋwɩlɩ Kɩbaɣlʋb» yɔ papɩzɩɣ nɛ pɛɖɛzɩ-tʋ piye piye se «pilisi ña-tʋma Kɩbaɣlʋ yɔɔ.» Takayaɣ nakɛyɛ lɩzɩ pɩ-taa se tɔm tʋnɛ tɩwɩlɩɣ ɛzɩma «ɛyʋ nɔɔyʋ kpakɩɣ ɛ-sʋʋtʋ nɛ ɛsʋʋ weyi ɛkɩlɩ-ɩ ɖoŋ nɛ ɛpɩzɩɣ nɛ ɛsɩɣlɩ-tʋ nɛ pɩkɩlɩ ɛ-maɣmaɣ yɔ.» Mba poluzuu pa-tɩ nɛ pataɣ Ɛsɔ liu yɔ pa-taa pɩzɩɣ nɛ pɩ-tɛ se ɛkaɣ-wɛ sɩnʋʋ.—Keɣsi 37:5; 55:22.

Tɔm loyaɣ «mbʋ payɩ ŋlakɩ yɔ» ɛɛwɩlɩɣ se ɖʋtʋ ndʋ ɛyaa lakɩ yɔ tɩ-tɩŋa tɩkɛdɩɣnɩ Ɛsɔ yaa se ɛkaɣ wazʋʋ tɩ-tɩŋa tɩ-yɔɔ. Pɩsa nɛ Yehowa wazɩ pa-ɖʋtʋ yɔɔ lɛ pɩwɛɛ se tɩla nɔɔ kʋɖʋmaɣ nɛ ɛ-paɣtʋ nɛ tɩla nɔɔ kʋɖʋmaɣ ɖɔɖɔ nɛ ɛ-sɔɔlɩm. (Keɣa 127:1; 1 Yohanɛɛsɩ 5:14) Ɛsɔ ɛɛwazɩɣ kaañamtʋ tɩnaa. Ɛlɛ «ɛwɛɛkɩɣ kañatʋ tɩnaa ɖʋtʋ.» (Keɣa 146:9) Alɩwaatʋ kʋɖʋmtʋ ndʋ tɩ-taa lɛ, ɛsɩɣnɩ mba pañaŋ ɛ-paɣtʋ ndʋ tɩwɛ Bibl taa nɛ pawɩlɩɣ se poluzuu pa-tɩ ɛ-tɛɛ yɔ.—Keɣa 37:23.

«Nɛ mbʋ ŋɖʋwa se ŋlakɩ yɔ pɩkaɣ ɖɔm camɩyɛ.» Ebree Masɩ taa yaa Bibl hɔɔlʋʋ ŋgʋ payaɣ ɖoŋ ɖoŋ se Nɔɔ Haʋ Kɩbɩm yɔ kɩ-taa, tɔm loyaɣ ŋga pɛɖɛzaa se «pɩkaɣ ɖɔm camɩyɛ» yɔ papɩzɩɣ nɛ pɛɖɛzɩ-kɛ ɖɔɖɔ se «pɩkaɣ caɣʋ camɩyɛ.» Nɛ tɔm loyaɣ ŋga keyeki nɛ ɛyʋ maɣzɩ ɛzɩma pasɩɣ tigiɖe naɖɩyɛ yɔ pɩ-yɔɔ, nɛ ɖoŋ ɖoŋ lɛ palakɩnɩ tɔm loyaɣ ŋga tʋmɩyɛ ɛzɩma Ɛsɔ wondu kɩlɩzɩtʋ kam camɩyɛ yɔ pɩ-hɔɔlʋʋ taa. (Aduwa 3:19; Yereemii 10:12) Mbʋ ɖɔɖɔ mba palakɩ mbʋ pɩwɛ ɖeu Ɛsɔ ɛsɩndaa yɔ, ɛkaɣ tɩŋnʋʋ ɛzɩma ɛsɩɣnɩ-wɛ se pehiɣ ɖiɣ ɖiɣ caɣʋ nɛ taa leleŋ pe-wezuu caɣʋ taa nɛ pɩkɩlɩ yɔ pɩ-yɔɔ nɛ eyele nɛ mbʋ paɖʋwa se palakɩ yɔ pɩka camɩyɛ.—Keɣa 20:4; Aduwa 12:3.

Tɔm ndʋ tɩcɔ Aduwa 16:3 nɛ tɩta yɔ

Wiyaʋ Salomɔɔ manɩ tɔm ndʋ tɩwɛ mayaɣ kanɛ ka-taa yɔ, nɛ ɛnʋ manɩ Aduwa takayaɣ hɔɔlʋʋ sɔsɔʋ. Lɔŋsɩnɖɛ nɖɩ Ɛsɔ kaaha-ɩ yɔ ɖɩ-yɔɔ lɛ ɛpɩzaɣ se etuu aduwa kudokiŋ sakɩyɛ.—1 Awiya 4:29, 32; 10:23, 24.

Salomɔɔ paɣzɩ ñʋʋ 16 nɛ Ɛsɔ lɔŋsɩnɖɛ sam nɛ ɛwɩlɩ ɖɔɖɔ ɛzɩma Ɛsɔ paɖɩɣ tɩ kpazɩyaa siŋŋ yɔ. (Aduwa 16:1-5) Tɔm ndʋ tɩtɩŋ pʋwayɩ yɔ ñʋʋ ŋgʋ kɩ-taa yɔ, tɩsɩɣnɩ kalɩyʋ se ɛnɩɩ tɔm kɩcɛyɩtʋ natʋyʋ taa, nɛ Aduwa takayaɣ yɔɔdɩ tɔm kɩcɛyɩtʋ ndʋ tɩ-tɔm tam sakɩyɛ. Ndʋ yɔ: Nʋmɔʋ kʋɖʋmʋʋ ŋgʋ kɩ-yɔɔ ɛyaa pɩzɩɣ patɩŋna nɛ pɛwɛɛnɩ lɔŋsɩnɖɛ siŋŋ nɛ pɩɖɔmnɩ-wɛ camɩyɛ yɔ ŋgʋ lɛ se pɛwɛɛnɩ tɩ luuzuu nɛ peyele nɛ Yehowa ɖiyi pa-nɩŋgbanzɩ. (Aduwa 16:3, 6-8, 18-23) Toovenim tɔm ndʋ, pɔyɔɔdɩ tɩ-tɔm tam sakɩyɛ Bibl taa.—Keɣsi 1:1-3; Izaayii 26:3; Yereemii 17:7, 8; 1 Yohanɛɛsɩ 3:22.

Cɔnɩ video cikpeluu kʋnɛ nɛ ŋtɩlɩ Aduwa takayaɣ taa lɩmaɣza sɔsɔna.