1 Kɔrɛntɩ mba 10:13—«Ɛsɔ cakɩ ɛ-tɔm yɔɔ»

«Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ. Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ, ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ nɛ ɩɖɔkɩ mɩ-laŋɩyɛ pɩ-taa.»—1 Kɔrɛntɩ mba 10:13, Ɛjaɖɛ kɩfaɖɛ tɔm ɖɛzʋʋ.

«Cɛzɩm nabʋyʋ tɩlɩɩ mɩ-yɔɔ, nɛ pɩkɩlɩ ɛyʋtʋ ɖoŋ. Ɛsɔ cakɩ ɛ-tɔm yɔɔ. Ɛɛkaɣ haʋ nʋmɔʋ se pɩcɛzɩ-mɩ nɛ pɩɖɛɛ mi-ɖoŋ yɔɔ. Cɛzɩm kɔŋ lɛ, ɛhaɣ-mɩ lɔŋ nɛ ɖoŋ se ɩwa-pʋ.»—1 Kɔrɛntɩ mba 10:13, TAKAYAƔ KIÐEÐEA, Verbum Bible, 1997.

1 Kɔrɛntɩ mba 10:13 tɔbʋʋ nɩʋ

Mayaɣ kanɛ kañɩkɩɣ niye Ɛsɔ wɛtʋ kɩbandʋ natʋyʋ yɔɔ, ndʋ lɛ e-siɣsiɣ wɛtʋ. Ɛsɔ sɛyaa siɣsiɣ ñɩma pɩzɩɣ nɛ pataa Ɛsɔ liu se ɛkaɣ-wɛ sɩnʋʋ kɔzɩ kɔzɩ alɩwaatʋ ndʋ pɛwɛɣ kaɖɛ naɖɩyɛ taa yaa takɩm nabʋyʋ taa yɔ.

«Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ.» Pɩpɩzɩɣ nɛ pɩtakɩ Ɛsɔ sɛyaa se pala mbʋ pɩɩkɛdɩɣnɩ-ɩ yɔ. Alɩwaatʋ ndʋ pakatɩɣ takɩm mbʋ yɔ, paa pɩfɛyɩ kɛlɛʋ yɔ, panawa se pɩkɛ takɩm «mbʋ pɩtalɩɣ ɛyaa yɔ,» pʋ-tɔbʋʋ se ɛyaa sakɩyɛ tɛm katɩɣ takɩm mbʋ nɛ pawabɩ-pʋ. Pʋyɔɔ lɛ Ɛsɔ sɛyaa taa pɩzɩɣ nɛ pɩtɛ se mba ɖɔɖɔ papɩzɩɣ nɛ palʋbɩnɩ takɩm mbʋ pakatɩɣ yɔ.

«Ɛsɔ wɛ siɣsiɣ.» Ɛsɔ Yehowaa kɛ weyi papɩzɩɣ nɛ pataa-ɩ liu yɔ. Tamaɣ ŋga ɛlaba se ɛɛkaɣ lɔʋ mba pɔsɔɔlɩ-ɩ nɛ pɛwɛɛ siɣsiɣ ɛ-ɛsɩndaa nɛ pañaŋɩ-ɩ yɔ, ɛɖɔm kɔ-yɔɔ paa ɛzɩmtaa. (Wayɩ Wayɩ Paɣtʋ 7:9; Keɣsi 9:10; 37:28) Pʋyɔɔ lɛ, mba pɛsɛɣ-ɩ yɔ pa-taa pɩzɩɣ nɛ pɩtɛ se tamasɩ naalɛ nzɩ ɛlabɩ mayaɣ kanɛ ka-taa yɔ ɛkaɣ sɩ-yɔɔ ɖɔm.

«Ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ.» Ɛsɔ wɩlɩɣ se ɛwɛ siɣsiɣ, mbʋ pʋyɔɔ yɔ ɛɛhaɣ nʋmɔʋ se kaɖɛ sɔsɔyɛ naɖɩyɛ ɛtalɩ nɔɔyʋ nɛ ɖɩcɛzɩ e-ɖoŋ nɛ pɩɩsaŋ se ɛpɩzɩ nɛ ɛɖɔkɩ ɛ-laŋɩyɛ ɖɩ-taa. Ɛsɩm ɛ-sɛyaa tɩŋa ɖoŋ kamaɣ.—Keɣa 94:14.

«Alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ nɛ ɩɖɔkɩ mɩ-laŋɩyɛ pɩ-taa.» Ɛsɔ pɩzɩɣ nɛ ɛlɩzɩ ɛ-sɛyaa takɩm nabʋyʋ taa, yaa ɛpɩzɩɣ nɛ ɛha-wɛ mbʋ pɩpɔzʋʋ yɔ nɛ pɔɖɔkɩ pa-laŋa pɩ-taa. Ɛpɩzɩɣ nɛ ɛtɩŋnɩ fezuu kiɖeɖeu yɔɔ nɛ ɛwɩlɩ-wɛ nʋmɔʋ, ɛtɩŋnɩ Bibl yɔɔ nɛ ɛhɛzɩ pa-laŋa yaa eyele nɛ ɛ-sɛyaa lalaa la nabʋyʋ keekee nɛ pasɩnɩ-wɛ.—Yohanɛɛsɩ 14:26; 2 Kɔrɛntɩ mba 1:3, 4; Koloosi mba 4:11.

Tɔm ndʋ tɩcɔ 1 Kɔrɛntɩ mba 10:13 nɛ tɩta yɔ

Takayaɣ ŋga apostoloo Pɔɔlɩ kaama Krɩstʋ ɛgbɛyɛ nɖɩ ɖɩɩwɛ Kɔrɛntɩ tɛtʋ taa yɔ ka-taa ɖɩnaɣ mayaɣ kanɛ. Ɛ-takayaɣ hɔɔlʋʋ ŋgʋ kɩ-taa ɖɩnaɣ mayaɣ kanɛ yɔ kɩ-taa, ɛkpaɣ caanaʋ taa Izrayɛɛlɩ mba kɩɖaʋ nɛ ɛpaɣnɩ Kɔrɛntɩ mba. (1 Kɔrɛntɩ mba 10:11) Pɔɔlɩ yɔɔdɩ takɩm mbʋ pɩɩtalɩ Izrayɛɛlɩ mba yɔ pɩ-taa nabʋyʋ tɔm, ɛzɩ sɩɩnaa latʋ nɛ kʋzʋʋ kɩdɛkɛdʋʋ wezuu caɣʋ mbʋ yɔ. (1 Kɔrɛntɩ mba 10:6-10) Pa-taa nabɛyɛ yebi pa-tɩ nɛ pɔtɔlɩ takɩm mbʋ pɩ-taa. Pɔɔlɩ tɩŋnɩ pa-kɩɖaʋ yɔɔ nɛ ɛtɔzɩ Krɩstʋ mba se pataakɩlɩ pa-tɩ taʋ liu nɛ pamaɣzɩ se paakaɣ tɔlʋʋ takɩm taa kpa. (1 Kɔrɛntɩ mba 10:12) Paa mbʋ yɔ, ɛtɩŋnɩ tɔm ndʋ tɩwɛ 1 Kɔrɛntɩ mba 10:13 taa yɔ tɩ-yɔɔ nɛ ɛhɛzɩ pa-laŋa. Ɛsɔ sɛyaa siɣsiɣ ñɩma pɩzɩɣ nɛ pawa paa takɩm mbʋ.

Cɔnɩ video cikpeluu kʋnɛ nɛ ŋtɩlɩ Kɔrɛntɩ mba takayaɣ kajalaɣ ñɩŋga taa lɩmaɣza sɔsɔna