Izaayii 26:3—«Ɛcakɩ ɛ-tɔm yɔɔ; ŋkaɣ haʋ laŋhɛzɩyɛ, mbʋ pʋyɔɔ yɔ ɖɩta-ŋ liu.»

«Ŋkaɣ kandɩyʋʋ mba pamalɩɣnɩ-ŋ nɛ pɛtɛŋ pa-taa yɔ pɔ-yɔɔ; ŋkaɣ-wɛ haʋ laŋhɛzɩyɛ nɖɩ ɖɩwɛɣ tam yɔ, mbʋ pʋyɔɔ yɔ ña pataɣ liu.»—Izaayii 26:3, Ɛjaɖɛ kɩfaɖɛ tɔm ɖɛzʋʋ.

«Ɛcakɩ ɛ-tɔm yɔɔ; ŋkaɣ haʋ laŋhɛzɩyɛ, mbʋ pʋyɔɔ yɔ ɖɩta-ŋ liu.»—Izaayii 26:3. TAKAYAƔ KIÐEÐEA, Verbum Bible, 1997.

Izaayii 26:3 tɔbʋʋ nɩʋ

Tɔm ndʋ nayʋ Izaayii yɔɔdɩ mayaɣ kanɛ ka-taa yɔ tɩhɛzɩɣ ɖa-laŋɩyɛ se Yehowa kandɩyɩɣ mba pataɣ-ɩ liu kiya yɔ pɔ-yɔɔ. Eyeki se pɛwɛɛ pɛɛyɛ nɛ laŋhɛzɩyɛ taa nɛ mbʋ wɩlɩɣna se ɛkandɩyɩɣ pɔ-yɔɔ.

«Ŋkaɣ kandɩyʋʋ mba pamalɩɣnɩ-ŋ nɛ pɛtɛŋ pa-taa yɔ pɔ-yɔɔ.» Mayaɣ hɔɔlʋʋ kʋnɛ kɩyɔɔdʋʋ mba pɛtɛm pa-taa kpem se pataɣ Ɛsɔ Yehowaa liu paa ɛzɩmtaa yɔ pɔ-tɔm na. Mba pataɣ Ɛsɔ liu yɔ, petisiɣ se ɛ-tɔm ɛkɩlɩnɩ cɛyʋʋ pe-wezuu caɣʋ taa. Kɩɖaŋ nɩɩyɩ yɔ: Paataɣ pa-maɣmaɣ pɔ-lɔŋsɩnɖɛ liu alɩwaatʋ ndʋ pakpakɩɣ lɩmaɣza sɔsɔna yɔ; ɛlɛ palakɩnɩ tʋmɩyɛ Ɛsɔ lɩmaɣza mbʋ payɩ palakɩ yɔ pɩ-taa. (Aduwa 3:5, 6) Pakpakɩɣ alɩwaatʋ nɛ pakalɩɣ Ɛsɔtɔm nɛ pamaɣzɩɣ tɩ-yɔɔ siŋŋ se pɩsa nɛ patɩlɩ lɩmaɣza wena Ɛsɔ wɛnɩ tɔm natʋyʋ yɔɔ yɔ. (Keɣa 1:2; 119:15) Patɩmɩɣnɩ Yehowa siŋŋ nɛ pɔpɔzʋʋ-ɩ se ɛsɩnɩ-wɛ alɩwaatʋ ndʋ pɛwɛ kaɖɛ wɛtʋ natʋyʋ taa yɔ. (Keɣa 37:5; 55:22) Alɩwaatʋ ndʋ palakɩ mbʋ yɔ pawɩlɩɣ se pataɣ Ɛsɔ liu, nɛ ɛlɛ kaɣ-wɛ haʋ laŋhɛzɩyɛ.

«Ŋkaɣ-wɛ haʋ laŋhɛzɩyɛ nɖɩ ɖɩwɛɣ tam yɔ.» Kiɖe tɛɛ Ebree kʋnʋŋ taa lɛ, tɔm piye nɖɩ pɛɖɛzaa se «laŋhɛzɩyɛ» yɔ, palabɩnɩ-ɖɩ tʋmɩyɛ tam nabʋlɛ se pañɩɣ niye ɖɩ-yɔɔ. Pɩsa nɛ pɛɖɛzɩ-ɖɩ mbʋ nɛ pɩla nɔɔ kʋɖʋmaɣ lɛ, papɩzɩɣ pɛɖɛzɩ-ɖɩ se «laŋhɛzɩyɛ nɖɩ ɖɩwɛɣ tam yɔ,» «laŋhɛzɩyɛ nɖɩ ɖɩtalɩ pilim yɔ» yaa «laŋhɛzɩyɛ kiya.» Tobi lɛ, mba pataɣ Yehowa liu nɛ pa-laŋɩyɛ pilim yɔ pɛwɛ laŋhɛzɩyɛ taa, pa-laŋa taa hɛ yem mbʋ pʋyɔɔ yɔ pa-laŋhɛzɩyɛ ɛɛlɩɣnɩ mbʋ pɩlakɩ pe-wezuu caɣʋ taa yɔ pɩ-cɔlɔ na. (Keɣsi 112:7; 119:165) Pɛwɛ laŋhɛzɩyɛ taa mbʋ pʋyɔɔ yɔ pa nɛ Yehowa pa-taabalɩyɛ cɛyaa nɛ pañakɩ pana se pala mbʋ pɩtʋʋzɩ Yehowa ɛsɩndaa yɔ.—Aduwa 3:32; Izaayii 48:18.

Mayaɣ taa pɔyɔɔdʋʋ se «laŋhɛzɩyɛ nɖɩ ɖɩwɛɣ tam yɔ,» pɩtɩwɩlɩ se kala wena Ɛsɔ sɛyaa katɩɣ yɔ Ɛsɔ lɩzɩɣ-yɛ se pɩsa nɛ paba ɩtaanɩɣzɩ paa ññɩɩ. (1 Samɩyɛɛlɩ 1:6, 7; Yɔɔb 6:1, 2; Keɣa 31:9) Ɛlɛ, ɛsɩɣnɩ ɛ-sɛyaa se palʋbɩnɩ kala wena pakatɩɣ yɔ. (Izaayii 41:10, 13) Ecosuu pa-adɩma yɔɔ, ɛhaɣ-wɛ lɔŋsɩnɖɛ nɛ ɖoŋ nɛ ɛhɛzɩɣ pa-laŋa. (Keɣa 94:19; Aduwa 2:6; Izaayii 40:29) Mbʋ pɩlɩɣ pɩ-taa yɔ lɛ se piyeki nɛ Ɛsɔ sɛyaa pɩzɩɣ nɛ pɔɖɔkʋʋ pa-laŋa halɩ pɩkpɛndɩnɩ kala sɔsɔna taa.—Filiipi mba 4:6, 7.

Tɔm ndʋ tɩcɔ Izaayii 26:3 nɛ tɩta yɔ

Nayʋ Izaayii kaacaɣ wezuu pɩlakɩ pɩnzɩ 2 800 mbʋ yɔ. Alɩwaatʋ ndʋ tɩ-taa nɛ pɩnzɩ nzɩ sɩtɩŋ pʋwayɩ yɔ sɩ-taa Yuuda ñɩma sakɩyɛ taasɛɣ Ɛsɔ Yehowa siɣsiɣ. Mbʋ pɩlɩ pɩ-taa yɔ lɛ se Yehowa yeba nɛ paɖɩzɩ pɛ-tɛtʋ sɔsɔtʋ Yeruzalɛm pɩnaɣ 607 P.P.Y.

Ɛlɛ, pʋcɔ nɛ paɖɩzɩɣ Yeruzalɛm tɛtʋ lɛ, nayʋ Izaayii kaama hendu natʋyʋ tɩcɛzɩ pɩnzɩ mɩnʋʋ yɔɔ; samtʋ hendu ndʋ tɩkɛ natʋ tɔm nɛ tɩsaŋ Yehowa nɛ ndʋ wɛnɩ Izaayii ñʋʋ 26 taa. (Izaayii 26:1-6) Paama hendu ndʋ tɩ-taa se pakaɣ ñɔɔzʋʋ Yuuda tɛtʋ natʋyʋ, nɛ pɩwɛ ɛzɩ Yeruzalɛm tɔm pɔyɔɔdaɣ yɔ.

Pɔñɔɔzɩ Yeruzalɛm tɛtʋ pɩnzɩ nzɩ sɩtɩŋ pɩnaɣ 537 P.P.Y yɔ sɩ-taa. Pʋwayɩ, Yuuda ñɩma siɣsiɣ tɩnaa mba paahiɣ ñʋʋ yabʋ yɔ, alɩwaatʋ ndʋ papɩsɩ Yeruzalɛm yɔ papɩzaɣ se pɛwɛɛ pɛɛyɛ taa nɛ pɔyɔɔdɩ se: «Ðɩwɛnɩ tɛtʋ ɖoŋ ñɩndʋ natʋyʋ.» (Izaayii 26:1) Ɛlɛ pɩtɩkɛ ɛzɩma tɛtʋ kolonzi kaawɛ ɖoŋ yɔ pʋyɔɔ pɔtɔŋ se tɛtʋ ndʋ tɩwɛ ɖoŋ. Ɛlɛ ɛzɩma Yehowa kaawazɩ tɛtʋ ndʋ nɛ ɛkandɩyɩ tɩ-yɔɔ se tɩwɛɛ pɛɛyɛ taa yɔ pʋyɔɔ pɔtɔŋ se tɩkɛ tɛtʋ ɖoŋ ñɩndʋ.—Izaayii 26:2.

Mbʋ ɖɔɖɔ pɩwɛ sɔnɔ. Mba pataɣ Yehowa liu nɛ pa-laŋɩyɛ pilim yɔ pɛwɛ pɛɛyɛ taa mbʋ pʋyɔɔ yɔ pakpakɩɣ Yehowa ɛzɩ ‘pa-Kaaʋ’ yaa pa-ɖɩmɛlɩyɛ yɔ.—Izaayii 26:4.

Cɔnɩ video cikpeluu kʋnɛ nɛ ŋtɩlɩ Izaayii takayaɣ taa lɩmaɣza sɔsɔna.