Pɩnaɣ 2020 “Paa ɛzɩmtaa lɛ, ɩwɛɛ laŋhʋlʋmɩyɛ taa” kigbeɣluu tɔm yɔɔdʋʋ ɖɛzʋʋ

Juillet nɛ Août fenasɩ taa, ɛjaɖɛ kpeekpe yɔɔ koobiya wɛɣnɩ waɖɛ se pewelisi kigbeɣluu sɔsɔʋ ɖʋtʋ kʋɖʋmtʋ alɩwaatʋ kʋɖʋmtʋ taa. Nɛ pɩkɛ mbʋ ɖɩtɩla wiɖiyi nɛ ɖɩna yɔ. Pɩwɛɛ se pɛɖɛzɩ kigbeɣluu taa tɔm kʋnʋmɩŋ weyi ɩcɛzɩ 500 yɔ, ɩ-taa nɛ pala pɩ-tɛ videowaa. Toovenim taa lɛ, pɩpɔzʋʋ pɩnaɣ yaa pɩcɛzɩ mbʋ pʋcɔ nɛ papɩzɩ pala tʋmɩyɛ nɖɩ. Ɛlɛ Coronavirus kʋdɔŋ sɔsɔʋ kʋnɛ kɩ-yɔɔ lɛ, fenasɩ ɛzɩ 4 mbʋ yɔ tɔm ɖɛzɩyaa kpaɣ nɛ pɛɖɛzɩnɩ pɩnaɣ 2020 “Paa ɛzɩmtaa lɛ, ɩwɛɛ laŋhʋlʋmɩyɛ taa” kigbeɣluu tɔm yɔɔdʋʋ kpeekpe.

Tɔm ɖɛzʋʋ nɛ ɛjaɖɛ kpeekpe yɔɔ wondu yabʋ tʋma wena awɛ Yehowa Aseɣɖe Tɩnaa tʋmɩyɛ ɖɩlaɖɛ sɔsɔɖɛ taa yɔ, akpɛndaa nɛ aɖʋ nesi nɛ pɩtɩŋa pɩɖɔ camɩyɛ. Tɔm ɖɛzʋʋ tʋmɩyɛ ɖiɣzinaa se pɩpɔzʋʋ tɔm ɖɛzɩyaa tɔm ɖɛzʋʋ wondu ndɩ ndɩ, kɔzɩ kɔzɩ miikroowaa mba palakɩ tʋmɩyɛ camɩyɛ yɔ, nɛ papɩzɩ pala tʋmɩyɛ nɖɩ. Ɛjaɖɛ kpeekpe yɔɔ wondu yabʋ tʋmɩyɛ labɩ ɖʋtʋ nɛ paya miikroowaa 1000 nɛ petiyini-wɛ lona ɛzɩ 200 mbʋ yɔ taa.

Pɩsa nɛ palabɩnɩ liidiye tʋmɩyɛ camɩyɛ lɛ, payabɩ miikroowaa sakɩyɛ, powoni-wɛ lone kʋɖʋmɖɩyɛ taa nɛ pʋwayɩ lɛ, petiyini-wɛ tɔm ɖɛzɩyaa mba pɛwɛ ɛjaɖɛ kpeekpe yɔɔ yɔ. Ɛzɩma ɖɩyabɩ miikroowaa sakɩyɛ kpaagbaa yɔ, piyeba nɛ miikroo kʋɖʋm liidiye kɛ CFA waa 94350. Pɩwɩlɩɣ se papasɩ-ɖʋ piyee naanza mɩnʋʋ yɔɔ.

Ɛjaɖɛ kpeekpe yɔɔ wondu yabʋ tʋmɩyɛ yabɩ wondu ndʋ nɛ ɖɩla ɖʋtʋ nɛ petiyini-tʋ Avril nɛ Mai 2020 fenasɩ taa, pɩ-tɔbʋʋ se alɩwaatʋ ndʋ kʋdɔŋ yeba nɛ tadɩyɛ laɖaa sakɩyɛ tadɩyɛ taaɖɔŋ camɩyɛ yɔ. Pɩtasɩ lɛ, Mai fenaɣ tɛŋaɣ lɛ, wondu ndʋ tɩtalɩ RTO waa, Ɛgbɛyɛ pilinzi nɛ tɔm ɖɛzʋʋ lona lɛɛna sakɩyɛ taa.

Jay Swinney weyi ɛcɔŋnɩ ɛjaɖɛ kpeekpe yɔɔ wondu yabʋ tʋmɩyɛ yɔɔ yɔ, ɛyɔɔdaa se: “Betɛɛlɩ tʋmlaɖaa ndɩ ndɩ nɛ wondu pɛdɩyaa palabɩ tʋmɩyɛ nɔɔ kʋɖʋmaɣ taa nɛ pɩtɩŋa pɩɖɔ camɩyɛ. Ðɩpɩzaa nɛ ɖɩla tʋmɩyɛ nɖɩ lɛɛ lɛɛ, ɖɩlabɩnɩ liidiye tʋmɩyɛ camɩyɛ nɛ ɖɩsɩnɩ ɖo-koobiya halaa nɛ abalaa mbʋ pʋyɔɔ yɔ Yehowa fezuu sɩnɩ-ɖʋ.”

Nicholas Ahladis weyi ɛɖʋʋ nesi tɔm ɖɛzʋʋ tʋmɩyɛ yɔ, ɛyɔɔdaa se: “Tɔm ɖɛzɩyaa mba pataalɩɣnɩ awayɩ kʋdɔŋ yɔɔ yɔ, pamʋ miikroowaa mba lɛ, pɩkpazɩ-wɛ ɖoŋ siŋŋ.” Paa paaposini koobiya lalaa mba pa nɛ wɛ palakɩ tʋmɩyɛ yɔ, pa nɛ wɛ papɩzɩɣ pala tʋmɩyɛ nɔɔ kʋɖʋmaɣ taa nɛ pɛɖɛzɩ tɔm yɔɔdʋʋ, dramawaa nɛ hendu nɛ pala pɩ-tɛ videowaa ɖɔɖɔ kʋnʋmɩŋ weyi ɩcɛzɩ 500 yɔ ɩ-taa.

Tʋma ndɩ ndɩ wena palaba se pɔñɔɔzɩ pɩnaɣ 2020 “Paa ɛzɩmtaa lɛ, ɩwɛɛ laŋhʋlʋmɩyɛ taa” kigbeɣluu nɛ pɩwazɩ ɛjaɖɛ kpeekpe yɔɔ koobiya yɔ, a-taa kʋɖʋmɖɩyɛ lɛ. Haɖɛ nɖɩ ɩlaba pɩtɩŋnɩ donate.jw.org nɛ nʋmɔŋ lɛɛŋ yɔɔ yɔ, nɖɩ sɩnɩnɩ-ɖʋ nɛ ɖɩpɩzɩ ɖɩya mbʋ payɩ pɩpɔzɩ-ɖʋ yɔ.