Mbʋ nabɛyɛ wɛna nɛ pɩɖɛlɩsɩ yɔ, pɩsɩɣna nɛ pɔcɔŋnɩ lalaa kɩcɛyɩm ɖeɖe

Yehowa Aseɣɖe Tɩnaa lakɩ tʋma wena awazɩɣ ɛyaa ajɛɛ wena acɛzɩ 200 yɔ a-taa. Ɛlɛ ajɛɛ ana a-taa lɛ, ajɛɛ 35 ɖeke pɩzɩɣna nɛ alakɩ haɖɛ nɖɩ ɖiyeki se acɔnɩ a-maɣmaɣ a-kɩcɛyɩm ɖeɖe yɔ. Ye mbʋ ɛzɩma palakɩ nɛ pasɩɣnɩ ajɛɛ wena aapɩzɩɣ se ala haɖɛ nɛ acɔnɩ a-maɣmaɣ a-kɩcɛyɩm ɖeɖe yɔ?

Yehowa Aseɣɖe Tɩnaa tɛ Nɔɔɖɛyaa Ɛgbɛyɛ tazɩɣ ɛjaɖɛ kpeekpe yɔɔ Aseɣɖe Tɩnaa kɩcɛyɩm taa. Palakɩnɩ haɖɛ nɖɩ koobiya lakɩ yɔ tʋmɩyɛ camɩyɛ. Ye ɛgbɛyɛ piliŋa nakɛyɛ ɛmʋ koobiya haɖɛ nɛ ɖɩna se haɖɛ nɖɩ ɖɩcɛzɩ mbʋ pɩpɔzʋʋ yɔ, ɖiyeki nɛ mbʋ pɩcɛzaa yɔ, pɩwazɩ ajɛɛ lɛɛna taa koobiya. Ðʋtʋ ndʋ tɩlabɩ nɔɔ kʋɖʋmaɣ nɛ mbʋ kajalaɣ pɩnzɩ mɩnʋʋ taa Krɩstʋ mba lakaɣ yɔ. Pasɩɣaɣnɩ ɖama pʋyɔɔ pɔyɔɔdaa se: ‘Mbʋ nabɛyɛ wɛna nɛ pɩɖɛlɩsɩ yɔ, pɩsɩɣna nɛ pɔcɔŋnɩ lalaa kɩcɛyɩm ɖeɖe.’ (2 Kɔrɛntɩ mba 8:14) Mba paawɛnɩ sakɩyɛ yɔ, pakpakaɣ mbʋ pɛwɛna nɛ pɩɖɛlɩsɩ yɔ nɛ pasɩɣnɩ mba pɛwɛ kɩcɛyɩm taa yɔ.

Koobiya mba ɛgbɛyɛ pilinzi lɛɛsɩ tiyiɣni-wɛ liidiye se pɩsɩnɩ-wɛ yɔ, ɛzɩma pɩlakɩ-wɛ? Ðɩkpaɣ Tanzaanii ɛjaɖɛ kɩɖaʋ. Ɛyaa mba pɛwɛ ɛjaɖɛ nɖɩ ɖɩ-taa yɔ, liidiye nɖɩ pɔ-hɔɔlʋʋ lakɩnɩ tʋmɩyɛ paa evemiye nɖɩ yɔ, ɖɩtɩtalɩ CFA waa 1 110. Ɛlɛ, liidiye nɖɩ ɛgbɛyɛ pilinzi lɛɛsɩ tiyinaa yɔ, ɖɩsɩnaa nɛ pɔñɔɔzɩ ɛgbɛyɛ nɖɩ payaɣ se Mafinga yɔ ɖɩ-tɛ Kewiyaɣ Kpaaŋ. Ɛgbɛyɛ nɖɩ ɖɩmawa se: “Kpaɣnɩ alɩwaatʋ ndʋ pɔñɔɔzɩ ɖe-Kewiyaɣ Kpaaŋ yɔ, ɛyaa mba pɔkɔŋ kediɣzisi yɔ, pɛwɛɛ nɛ pɔɖɔʋ nɛ pɩkɩlɩɣ. Yehowa ɛgbɛyɛ nɛ ɖo-koobiya mba pɛwɛ ɛjaɖɛ kpeekpe yɔɔ yɔ, pa-sɩnʋʋ yebina nɛ ɖɩpɩzɩ nɛ ɖɩwɛɛnɩ Ɛsɔ sɛtʋ lone kɩbanɖɛ ɖɩnɛ nɛ ɖɩsɔɔlaa se ɖɩwɩlɩ ɖɛ-ɛsɩmɩyɛ.”

Covid 19 yeba nɛ pɩwɛɛ ɖo-koobiya mba pɛwɛ Sri Lanka yɔ kaɖɛ se pehiɣ tɔɔnaɣ nɛ pɔtɔɔ. Koobiya mba pasʋ kʋñɔŋ taa mbʋ yɔ, pa-taa nabɛyɛ lɛ, Imara Fernando nɛ ɛ-pɩyalʋ Enosh. Ɛlɛ ajɛɛ lɛɛna taa koobiya labɩ haɖɛ nɖɩ ɖɩsɩnɩ-wɛ nɛ pɔcɔnɩ pa-kɩcɛyɩm ɖeɖe yɔ. Palabɩ carte postale nɛ pe-nesi nɛ pama kɩ-yɔɔ se: “Ðɩsɛɣ koobiya mba palɩzɩ sɔɔlɩm nɛ pawɩlɩ-ɖʋ kaɖɛ alɩwaatʋ tʋnɛ tɩ-taa yɔ. Ða-taa wɛ leleŋ se ɖɩwɛ hɔʋ kʋnɛ kɩ-taa nɛ ɖɩtɩmɩɣ se Yehowa ɛsɩnɩ ɖo-koobiya kɛdɛzaɣ kɩyakɩŋ ɛnɛ ɩ-taa.”

Paa le ɖo-koobiya ɩwɛɛ yɔ, pɔsɔɔlaa se patayɩ mbʋ pɛwɛna yɔ. Ðɩkpaɣ ɛzɩ Enosh mbʋ yɔ, ɛlabɩ aɖakaɣ cikpelaɣ nakɛyɛ nɛ ɛcɔʋ ka-taa liidiye se ɛsɩnɩ hɔŋ weyi ɩwɛ kɩcɛyɩm taa yɔ. Guadalupe Álvarez wɩlaa se ɛsɔɔlɩ lalaa sɩnʋʋ ɖɔɖɔ. Ɛwɛ Mɛkɩsiiki tɛtʋ natʋyʋ taa. Tɛtʋ ndʋ tɩ-taa lɛ, paahɛyɩɣ ɛyaa sakɩyɛ liidiye sakɩyɛ tʋmɩyɛ taa nɛ lalaa lɛ, pɛfɛyɩnɩ tʋmɩyɛ nɖɩ ɖɩkɔŋnɩ-wɛ liidiye ɖoŋ ɖoŋ. Paa mbʋ yɔ, ɛñakɩ pana nɛ ɛlakɩ haɖɛ. Ɛmawa se: “Mɛnsɛɣ Yehowa ɛ-camɩyɛ lakasɩ nɛ ɛ-sɔɔlɩm pɔ-yɔɔ. Manawa se pakaɣ suyuu ma-haɖɛ lalaa ñɩnɖɛ yɔɔ nɛ pɩwazɩ koobiya mba pɛwɛ kɩcɛyɩm taa yɔ.”

Ɛgbɛyɛ pilinzi nzɩ sitiyiɣni liidiye lona ndɩ ndɩ taa yɔ, sɩlakɩ mbʋ nɛ taa leleŋ. Anthony Carvalho weyi ɛwɛ Breeziili ɛgbɛyɛ piliŋa kɔɔmiite taa yɔ, ɛtɔm se: “Pɩnzɩ sakɩyɛ nzɩ sɩɖɛwa yɔ, sɩ-taa, pɩɩpɔzaa se ajɛɛ lɛɛna taa koobiya ɩsɩnɩ-ɖʋ pʋcɔ nɛ ɖɩpɩzɩ nɛ ɖɩla ɖa-tʋma cɩnɛ. Sɩnʋʋ mbʋ piyeba nɛ Kewiyaɣ tʋmɩyɛ ɖɛɛnɩ ɛsɩndaa ɖɛ-ɛjaɖɛ taa. Lɛɛlɛɛyɔ wɛtʋ ndʋ tɩ-taa ɖɩwɛɛ yɔ, tɩlɛɣzaa, nɛ ɖɩwɛnɩ waɖɛ se ɖɩsɩnɩ lalaa. Breeziili ɛjaɖɛ taa koobiya maɣzɩɣ tɔm susuu tʋmɩyɛ nɖɩ palakɩ ɛjaɖɛ kpeekpe yɔɔ yɔ, ɖɩ-yɔɔ lɛ, pituyuu-wɛ nɛ palakɩ mbʋ papɩzɩɣ yɔ se paɖʋ nesi.”

Ɛzɩma Yehowa Aseɣɖe Tɩnaa pɩzɩɣ nɛ paɖʋ nesi po-koobiya halaa nɛ abalaa mba pɛwɛ kɩcɛyɩm taa yɔ? Pɩfɛyɩ se ɖitiyini liidiye ɛjaɖɛ naɖɩyɛ taa ɛgbɛyɛ piliŋa se ɖɩsɩnɩ peeɖe koobiya, ɛlɛ pɩwɛɛ se ɖɩɖʋ nesi ɛjaɖɛ kpeekpe yɔɔ tɔm susuu tʋmɩyɛ. Ðɩpɩzɩɣ nɛ ɖɩla mbʋ pɩtɩŋnɩ ɛzɩma ɖɩɖʋʋ liidiye ɛgbɛyɛ taa aɖakaɣ ŋga payaɣ se “Œuvre Mondiale” yɔ ka-taa yɔ. Ðɩpɩzɩɣ ɖɔɖɔ ɖɩtɩŋnɩ donate.jw.org yɔɔ nɛ ɖɩla haɖɛ. Ðɩsɛɣ-mɩ pɩdɩɩfɛyɩ haɖɛ nɖɩ payɩ ɩlakɩ yɔ ɖɩ-yɔɔ.