Ɛzɩma pɛwɛɛ nɛ pasɩɣnɩ mba asɛyʋʋ nakʋyʋ talɩ-wɛ yɔ

Pɩtasɩnɩ COVID-19 kʋdɔŋ sɔsɔʋ lɛ, asɛyɩŋ ndɩ ndɩ sakɩyɛ labɩ pɩnaɣ 2020 taa ɛjaɖɛ kpeekpe yɔɔ. Ɛzɩma Yehowa Aseɣɖe Tɩnaa sɩnɩ mba asɛyɩŋ ɛnɩ itukunaa yɔ?

Teokrasɩ pɩnaɣa 2020 taa, Nɔɔɖɛyaa Ɛgbɛyɛ tɛ Ðʋtʋ yɔɔ cɔnɩyaa kɔɔmiite ha nʋmɔʋ se pakpaɣ Amerika liidiye dɔlaarɩwaa miiliyɔɔwaab 28 (yaa liidiye FCFA miiliyaarɩwaa 15 nɛ miiliyɔɔwaa 120) se pasɩnɩ mba asɛyʋʋ nakʋyʋ talɩ-wɛ yɔ. Pakpaɣ liidiye nɖɩ nɛ paɖʋnɩ nesi ɛyaa mba asɛyɩŋ 200 tukunaa yɔ. Asɛyɩŋ ɛnɩ ɩ-taa nɩɩyɩ lɛ, COVID-19 kʋdɔŋ sɔsɔʋ, lɩm wadʋʋ Afrika ajɛɛ naayɛ taa, ñɔɔsɩ Venezuyeelaa ɛjaɖɛ taa nɛ wɩlɩŋ sɔsɔŋ Zimbaabuwee ɛjaɖɛ taa. Haɖɛ nɖɩ palaba yɔ, ɖɩsɩna nɛ paha mba asɛyɩŋ tukunaa yɔ tɔɔnasɩ, ɖɩzʋyɛ, wondu kususutu, kɔ nɛ wondu ndʋ tɩpɩzɩɣ nɛ tɩsɩnɩ-wɛ nɛ pɔñɔɔzɩ mbʋ mbʋ pɩwɛɛkaa yɔ yaa paɖaɣnɩ maʋ pa-ɖɩsɩ yɔ. Sɩnʋʋ tʋma wena palaba yɔ a-taa naayɛ yɔ:

COVID-19. Kʋdɔŋ sɔsɔʋ kʋnɛ, kitukuni ɖo-koobiya halaa nɛ abalaa ɛjaɖɛ kpeekpe yɔɔ. Kitukuni-wɛ tomnaɣ yɔɔ, lɩmaɣza taa nɛ liidiye nʋmɔʋ taa ɖɔɖɔ. Pɩsa nɛ pasɩnɩ-wɛ lɛ, paɖʋ sɩnʋʋ kɔɔmiitewaa mba pɛcɛzɩ 800 yɔ ɛjaɖɛ kpeekpe yɔɔ. Kɔɔmiitewaa mba patazɩ ɖo-koobiya kɩcɛyɩm taa, pala pɩ-tɛ akɔnta nɛ petiyini Ðʋtʋ yɔɔ cɔnɩyaa kɔɔmiite kpɛdɛyɛ se pɩsa nɛ papɩzɩ nɛ pɔcɔnɩ kɩcɛyɩm mbʋ pi-ɖeɖe.

Pɩnaɣ ŋga ka-taa, sɩnʋʋ kɔɔmiitewaa sɩnɩ ɛyaa sakɩyɛ nɛ pehiɣ tɔɔnaɣ, lɩm, cɩɖɩ cɩɖɩ wɛtʋ kɔ nɛ kʋdɔmɩŋ waʋ kɔ. Ajɛɛ naayɛ taa, kɔɔmiitewaa mba, pasɩnɩ koobiya nɛ pala mbʋ pɩpɔzʋʋ yɔ nɛ kominawaa sɩnɩ-wɛ hɔɔlɩŋ nɩɩyɩ taa.

Mba patɩkɛ Aseɣɖe Tɩnaa yɔ, papɩzaa nɛ pana sɩnʋʋ tʋmɩyɛ kɩbanɖɛ nɖɩ ɖɩlaba yɔ. Kɩɖaʋ nakʋyʋ yɔ: Field Simwinga kɛ komina lone taa caɣyʋ Sambii egeetiye nɖɩ payaɣ se Nakonde yɔ ɖɩ-taa. Eheyi ɖo-koobiya se: “Ɩlabaɣ lɛ kpem se ɩsɩnɩ hɔŋ sakɩyɛ weyi asɛyʋʋ talaa yɔ. Pɩpɔzʋʋ kpem se ɖɩwɩlɩ-mɩ ɖɛ-ɛsɩmɩyɛ.”

Ñɔɔsɩ Aŋgoolaa ɛjaɖɛ taa. COVID-19 kʋdɔŋ sɔsɔʋ yeba nɛ tɔɔnasɩ tɔm la kaɖɛ Aŋgoolaa ɛjaɖɛ taa nɛ wondu wɛɛ liidiye siŋŋ. Pʋyɔɔ lɛ, pɩɩwɛ ɖo-koobiya halaa nɛ abalaa sakɩyɛ kaɖɛ siŋŋ se papɩzɩ nɛ paya tɔɔnaɣ.

Paapɔzɩ Breeziili ɛgbɛyɛ piliŋa se ketiyini tɔɔnasɩ ɖo-koobiya mba pɛwɛ Aŋgoolaa yɔ. Pɩsa nɛ palabɩnɩ liidiye tʋmɩyɛ camɩyɛ lɛ, koobiya tazaa nɛ pana ɛzɩma pala nɛ paya tɔɔnasɩ nɛ petiyina nɛ pɩtaakɩlɩ mʋʋ liidiye yɔɔ. Pakpaɣ lɩmaɣza se paayakɩ tɔɔnasɩ pazɩ pazɩ, ɛlɛ payakɩ nɛ pɩɖɔɔ kpaagbaa. Piyeba nɛ papɩzɩ pakpaɣ Amerika liidiye dɔlaarɩwaa 22 (yaa liidiye FCFA 11 880) ɖeke nɛ payabɩnɩ tɔɔnasɩ nzɩ pɔhɔkɩ cabɩ cabɩ, ɛzɩ kiloo waa nɛɛlɛ nɛɛlɛ mbʋ yɔ nɛ petiyina. Tɔɔnasɩ ɛzɩ mɔʋ, sona nɛ num mbʋ yɔ payaba. Pɩkɔm nɛ pɩtalɩ sɔnɔ yɔ, petiyini tɔɔnasɩ nzɩ pɔhɔkɩ cabɩ cabɩ yɔ 33 544, nɛ pɩkɛ tɔɔnɩwaa 654. Pakpaɣ tɔɔnasɩ nzɩ nɛ tɔɔnasɩ lɛɛsɩ nzɩ peeɖe koobiya hawa yɔ, nɛ pasɩnɩ ɛyaa 50 000!

Koobiya mba pɛwɛ Aŋgoolaa yɔ, pamaɣzɩɣ suwe sɩnʋʋ tʋmɩyɛ nɖɩ ɖɩ-yɔɔ? Alexandre weyi ɛwɛ Aŋgoolaa poliŋ egeetiye naɖɩyɛ taa yɔ, ɛtɔm se: “Ma lɛ, pɩkɛ-m yʋsaɣ ŋga kawɩlɩɣ se Yehowa sɔɔlɩm nɛ mɛnfɛyɩ men-ɖeke yɔ. Manaɣ se Yehowa ɛgbɛyɛ cɔŋnɩ mɔ-yɔɔ camɩyɛ.” Mariza kɛ ɖoyo weyi ɛfɛyɩnɩ walʋ yɔ, ɛyɔɔdaa se: Ɛsɔ welisi ma-adɩma. Mɛnsɛɣ Yehowa nɛ ɛ-ɛgbɛyɛ!”

Wɩlɩŋ sɔsɔŋ Zimbaabuwee ɛjaɖɛ taa. Pɩnaɣ 2 000 taa, wɩlɩŋ sɔsɔŋ nɩɩyɩ kaayeba nɛ ɛyaa miiliyɔɔwaa sakɩyɛ sʋʋ haŋaɣ sɔsɔŋ nakɛyɛ taa Zimbaabuwee ɛjaɖɛ taa. Zimbaabuwee ɛjaɖɛ taa Aseɣɖe Tɩnaa sakɩyɛ taapɩzɩɣ se pehiɣ tɔɔnaɣ nɛ pɔtɔɔ nɛ pahaɣ.

Paɖʋ sɩnʋʋ kɔɔmiitewaa kagbanzɩ se paha tɔɔnaɣ koobiya. Koobiya mɩnɩŋ sakɩyɛ ɖʋ nesi nɛ pɔñɔɔzɩ huyiŋ nɩɩyɩ nɛ paɖʋ tɔɔnasɩ huyiŋ ɛnɩ ɩ-taa. Koobiya nabɛyɛ ɖɔɖɔ yeba nɛ paɖʋ tɔɔnasɩ pɔ-lɔɔɖa taa nɛ powoni koobiya.c Pɩnaɣ 2020 taa, pakpaɣ Amerika liidiye dɔlaarɩwaa 691 561 (yaa liidiye FCFA 373 442 940) nɛ pasɩnɩ ɛyaa mba pɛcɛzɩ 22 700 yɔ, nɛ pehiɣ tɔɔnaɣ nɛ pɔtɔɔ nɛ pahaɣ!

Hɔŋ nɩɩyɩ taa mba taatasɩ wɛnʋʋ tɔɔnaɣ nakɛyɛ paa ññɩɩ se pɔtɔɔ, nɛ alɩwaatʋ ndʋ tɩ-taa mba patayaɣ tɔɔnasɩ yɔ patalɩ pɔ-cɔlɔ. Ðo-koobiya mba pɛsɛ Yehowa pɩdɩɩfɛyɩ. Nɛ halɩ pa-taa nabɛyɛ kaapaɣzɩ teu Kewiyaɣ hendu.

Egeetiye naɖɩyɛ taa, ɛjaɖɛ yɔɔ agbaa wena atɩkɛ komina agbaa, ɛlɛ aɖʋʋ nesi ɛyaa hɔɔlɩŋ ndɩ ndɩ taa yɔ, a-taa naɖɩyɛ labɩ kediɣzaɣ nakɛyɛ se ɖɩna ɛzɩma ɖɩla nɛ ɖɩha tɔɔnaɣ ɛyaa yɔ. Koobiya halɩñɩma naalɛ kaawobi kediɣzaɣ ŋga ka-taa. Ɛlɛ pɩkɛdaa lɛ, papaɣzɩ yɔɔdʋʋ politiki tɔm kediɣzaɣ ŋga ka-taa: Pɩɩwɛɛ se koobiya halɩñɩma mba, petisi nɛ pala mbʋ pɩkaɖɩɣnɩ Krɩstʋ mba paɣtʋ yɔɔ pʋcɔ nɛ paha-wɛ tɔɔnaɣ. Koobiya mba pekizaa se pamaɣnɩ Krɩstʋ mba paɣtʋ yɔɔ. Pakʋyaa se palɩɣ lɛ, ɛyaa wɛɛ nɛ pohoŋuu-wɛ nɛ pɔtɔŋ se: “Ɩtaapɩsɩ nɛ ɩkɔɔ kpa se ɖɩha-mɩ tɔɔnaɣ.” Ɛlɛ kpɩtaŋ naalɛ ɖeke wayɩ lɛ, ɖo-koobiya woni tɔɔnasɩ ndɩ ndɩ koobiya halɩñɩma mba. Alɩwaatʋ ndʋ koobiya woni-wɛ tɔɔnasɩ yɔ, ɛjaɖɛ yɔɔ ɛgbɛyɛ nɖɩ ɖɩtaapaɣzɩtɩ sɩnʋʋ ɛyaa.

Sɩnʋʋ tʋmɩyɛ nɖɩ koobiya laba yɔ, ɖɩlɩzɩ aseɣɖe siŋŋ. Kɩɖaʋ nakʋyʋ yɔ: Prisca wɛ kɔfɩ cikpelu nakʋyʋ taa. Paa wɩlɩŋ sɔsɔŋ ɛnɩ iiyeba nɛ ɛkatɩ kala sakɩyɛ yɔ, paa kpɩtaʋ ŋgʋ, ewokaɣ tɔm susuu Cɩla wiye nɛ Kemeɣa wiye, halɩ pɩkpɛndɩnɩ haɖaʋ alɩwaatʋ taa. Kɔfɩ taa ɛyaa hoŋaɣ-ɩ nɛ pɔtɔŋ se: “Pɩkɩlɩɣ ɖeu se ŋyele tɔm susuu nɛ ŋla tʋmɩyɛ naɖɩyɛ. Ñɔɔsɩ kaɣ kʋʋ ñɔ-hɔʋ taa mba ñɔ-yɔɔ.” Prisca cosaɣ-wɛ se: “Yehowa tɔlɔ ɛ-sɛyaa wiɖiyi kpa.” Pʋwayɩ lɛ, koobiya kɔɔ nɛ paha-ɩ mbʋ payɩ pɩpɔzʋʋ-ɩ yɔ. Pɩɩɖɩɣzɩ ɛ-cɔlɔ ñɩma nabɛyɛ siŋŋ nɛ pɔyɔɔdɩ se: “Yehowa tɔlɔ-ŋ wiɖiyi kpam. Piseɣtiɣ-ɖʋ se ɖɩtɩlɩ-ɩ nɛ pɩkpaɖɩ.” Lɛɛlɛɛyɔ ɛ-cɔlɔ ñɩma lʋbɛ welisiɣ kediɣzisi nzɩ palakɩ raadiyoowaa yɔɔ yɔ.”

Ɛjaɖɛ tɛm wɛɣ nɛ pɩñɔtʋʋ lɛ, asɛyɩŋ wɛɣ nɛ akpaɣ ɖoŋ kpaʋ yɔɔ. (Maatiyee 24:3, 7) Ðɩsɛɣ-mɩ pɩdɩɩfɛyɩ haɖɛ nɖɩ ɩtɩŋɩɣnɩ donate.jw.org yɔɔ nɛ ɩlakɩ yɔ ɖɩ-yɔɔ. Mɩ-haɖɛ sɩɣnɩ-ɖʋ se ɖɩla ɖʋtʋ nɛ ɖɩsɩnɩ ɛyaa alɩwaatʋ ndʋ tɩmʋnaa yɔ tɩ-yɔɔ.