Mazaɣ, 13 septembre
Ŋkɛ weyi ɛmʋ ñɩm siŋŋ yɔ.—Dan. 9:23.
Nayʋ Danɩyɛɛlɩ kaakɛ pɩɣa evelaɣ alɩwaatʋ ndʋ Babilɔɔnɩ mba yoni Yeruzalɛm nɛ pakpa-ɩ nɛ powoni Babilɔɔnɩ yɔ; Babilɔɔnɩ kaaposini Yeruzalɛm. Ɛlɛ paa Danɩyɛɛlɩ kaakɛ pɩɣa evelaɣ yɔ, Babilɔɔnɩ kaɖɩsɩ nawa se ɛwɛnɩ wɛtʋ natʋyʋ nɛ titukuni-wɛ siŋŋ. Paana Danɩyɛɛlɩ «wɛtʋ ndʋ [tɩnaɣaɣ] ɛsa yɔɔ yem yɔ»; paanawa se ‘ɛfɛyɩnɩ ɛjandʋ natʋyʋ, eɖewa’ nɛ ɛlɩnɩ hɔʋ ŋgʋ kɩ-taa yɔ kɩ-hɩɖɛ sɛwa. (1 Sam. 16:7) Pʋyɔɔ lɛ, Babilɔɔnɩ mba falɩsɩ-ɩ se ɛpɩsɩ wiyaʋ ɖɩɣa taa tʋmlaɖʋ. (Dan. 1:3, 4, 6) Yehowa kaasɔɔlɩ Danɩyɛɛlɩ, ɛlɛ ɛyʋ weyi pɩɣa evelaɣ ŋga kalɩzaa se kɛkɛɣ yɔ pɩ-yɔɔ Yehowa kaasɔɔlɩ-kɛ. Toovenim taa lɛ, alɩwaatʋ ndʋ Yehowa yɔɔdaa se Danɩyɛɛlɩ wɛ ɛzɩ Noowa nɛ Yɔɔb yɔ, pɩtɩla Danɩyɛɛlɩ kaawɛnɩ ɛzɩ pɩnzɩ 20 mbʋ yɔ; ŋgʋ Noowa nɛ Yɔɔb paba ñaasɛ Yehowa siɣsiɣ pɩnzɩ sakɩyɛ. (Kiɖe 5:32; 6:9, 10; Yɔɔb 42:16, 17; Ezek. 14:14) Nɛ Yehowa wobi pɩ-yɔɔ nɛ ɛsɔɔlɩ Danɩyɛɛlɩ e-wezuu caɣʋ kpeekpe.—Dan. 10:11, 19. w23.08 2 § 1-2
Kujuka, 14 septembre
Ɩnɩɩ mbʋ pɩkɛ walanzɩ nɛ ɖaɣlɩkɩŋ nɛ kʋkʋyɩŋ nɛ cukaŋ yɔ pɩ-taa camɩyɛ.—Efɛz. 3:18.
Alɩwaatʋ ndʋ ŋpɔzʋʋ ña-tɩ se ɛzɩ ŋya ɖɩɣa nakɛyɛ yaa ŋtaayabɩ-kɛ yɔ, ŋkaɣ sɔɔlʋʋ se ña-maɣmaɣ ŋwolo nɛ ŋna ɖɩɣa ŋga kɔ-hɔɔlɩŋ tɩŋa tete. Ðɩpɩzɩɣ nɛ ɖɩla mbʋ ɖɔɖɔ alɩwaatʋ ndʋ ɖɩkalɩɣ Bibl nɛ ɖɩkpɛlɩkɩɣ-kʋ yɔ. Ye ŋkalɩɣ-kʋ lɛɛ lɛɛ yɔ, pɩtɩla Bibl taa kajalaɣ wɩlɩtʋ ɖeke ŋkaɣ tɩlʋʋ, pʋ-tɔbʋʋ se «Ɛsɔ tɔm kiɖeɖetu kajalaɣ tɔm.» (Ebr. 5:12) Ɛlɛ ɛzɩ ŋsʋʋ ɖɩɣa taa se ŋna kɔ-hɔɔlɩŋ tɩŋa yɔ, pɩwɛɛ se ŋkpɛlɩkɩ Bibl nɛ ŋnɩɩ kɩ-taa camɩyɛ nɛ pɩkɩlɩ. Nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩkpɛlɩkɩ Bibl yɔ, ŋgʋ lɛ se ɖɩñɩnɩ nɛ ɖɩna nɔɔ kʋɖʋmaɣ ŋga kɛwɛ Bibl hɔɔlɩŋ ndɩ ndɩ hɛkʋ taa yɔ. Ñaɣ pana nɛ ŋnɩɩ toovenim tɔm ndʋ tɩ-yɔɔ ŋtisiɣ yɔ tɩ-taa, ñaɣ pana ɖɔɖɔ nɛ ŋnɩɩ mbʋ pʋyɔɔ ŋtisiɣ tɩ-yɔɔ yɔ pɩ-taa. Pɩsa nɛ ɖɩnɩɩ Ɛsɔtɔm taa camɩyɛ lɛ, pɩpɔzʋʋ se ɖɩkpɛlɩkɩ Bibl taa toovenim tɔm ndʋ tɩwɛ cukaŋ yɔ. Apostoloo Pɔɔlɩ seɣti e-koobiya Krɩstʋ ñɩma se pɛkpɛlɩkɩ Ɛsɔtɔm camɩyɛ nɛ pɩsa nɛ panɩɩ toovenim ‘walanzɩ nɛ pɩ-ɖaɣlɩkɩŋ nɛ pɩ-kʋkʋyɩŋ nɛ pi-cukaŋ taa camɩyɛ.’ Ðɩnɛ ɛlɛ pe-tisuu kaɣ ‘kam lila nɛ pɩcɛyɩsɩ camɩyɛ.’ (Efɛz. 3:14-19) Pɩwɛɛ se ɖa ɖɔɖɔ ɖɩla mbʋ. w23.10 18 § 1-3
Hodo, 15 septembre
Koobiya, tɩ ɖɔkʋʋ kʋñɔŋ taa nɛ suuɖu ɖʋʋ hɔɔlʋʋ taa lɛ, iyele nɛ nayaa mba pɔyɔɔdɩ tɔm Yehowa hɩɖɛ taa yɔ, pɛkɛnɩ-mɩ kɩɖaʋ.—Yak. 5:10.
Bibl yɔɔdʋʋ ɛyaa sakɩyɛ mba paaɖʋ suuɖu yɔ pɔ-tɔm. Pɩwɛɣ ɖeu se ŋla ɖʋtʋ nɛ ŋtazɩ ɛyaa mba pa-kɩɖaŋ taa. Kɩɖaŋ nɩɩyɩ yɔ: Alɩwaatʋ ndʋ pata num Daviid se ɛkaɣ pɩsʋʋ Izrayɛɛlɩ wiyaʋ yɔ ɛɛkɛ pɩɣa evelaɣ yem; pɩɩwɛɛ se ɛɖaŋ pɩnzɩ sakɩyɛ pʋcɔ nɛ ɛpɩsɩ wiyaʋ. Alɩwaatʋ ndʋ Siimeyɔɔ nɛ Ana paawɛɛ nɛ paɖaŋɩɣ se Mesiya weyi ɛ-tamaɣ paalaba yɔ ɛkɔɔ yɔ, powobi pɩ-yɔɔ nɛ pɛsɛɣ Yehowa siɣsiɣ. (Luka 2:25, 36-38) Ŋŋkpɛlɩkɩɣ ɛyaa mba pɔ-tɔm lɛ, ñaɣ pana nɛ ŋcosi tɔm tʋnɛ tɩ-yɔɔ: Pɩtɩla ɛbɛ kaasɩnɩ ɛyʋ ɛnʋ nɛ ɛɖʋ suuɖu? Ɛɖʋ suuɖu lɛ ɛzɩma pɩwazɩ-ɩ? Ɛzɩma manpɩzɩɣ nɛ mamaɣzɩnɩ-ɩ? Ɛyaa mba patɩɖʋ suuɖu yɔ, ye ŋkpɛlɩkɩ pɔ-tɔm yɔ pɩpɩzɩɣ ɖɔɖɔ nɛ pɩwazɩ-ŋ. (1 Sam. 13:8-14) Ŋpɩzɩɣ nɛ ŋpɔzɩ ña-tɩ se: ‘Pɩtɩla ɛbɛ yeba nɛ patɩɖʋ suuɖu? Patɩɖʋ suuɖu lɛ ɛbɛ lɩ pɩ-taa?’ w23.08 25 § 15