Yereemii

21 Yereemii mʋ tɔm Yehowa cɔlɔ alɩwaatʋ ndʋ Wiyaʋ Zedekiya+ kaatiyi ɛ-cɔlɔ Malɩkiiya pɩyalʋ Pasuuri+ nɛ Maaseyiya pɩyalʋ Sofonii,+ weyi ɛkɛ cɔjɔ yɔ se peheyi-i se: 2 «Ðitendi-ŋ, pɔzɩ-ɖʋ Yehowa nɛ ɖɩna se ɛbɛ kaɣ labʋ, mbʋ pʋyɔɔ yɔ Babilɔɔnɩ wiyaʋ Nabukodonozɔɔrɩ* wɛɛ nɛ eyouni-ɖʋ.+ Pɩtɩla yɔ Yehowa kaɣ-ɖʋ labʋ e-piti tʋmɩyɛ naɖɩyɛ nɛ Nabukodonozɔɔrɩ yebi-ɖʋ nɛ ɛɖɛɛ.»+

3 Yereemii heyi-wɛ se: «Tɔm tʋnɛ pɩwɛɛ se iheyi Zedekiya: 4 “Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: ‘Ɩna, menɖiɣni pɩsɩnʋʋ mɩ-yɔɔ you wondu ndʋ tɩwɛ mi-nesi tɛɛ yɔ, wondu ndʋ ɩɖɔkaa nɛ ɩlakɩnɩ you Babilɔɔnɩ wiyaʋ+ nɛ Kalɩdee ñɩma mba pɛwɛ koloŋa wayɩ nɛ pɛñɛyɩɣ-mɩ yɔ. Nɛ mankaɣ-tʋ* kpeɣluu tɛtʋ tʋnɛ tɩ-hɛkʋ taa. 5 Nɛ ma-maɣmaɣ mankaɣ-mɩ yonuu+ nɛ me-nesi nzɩ mensezaa yɔ nɛ me-nesi ɖoŋ ñɩnzɩ, nɛ pana nɛ ɖɩwɩzɩyɛ nɛ hɔpɩsɩyɛ sɔsɔɖɛ.+ 6 Mankaɣ mabʋ tɛtʋ tʋnɛ tɩ-taa mba, ɛyaa nɛ kpɩna. Pakaɣ sɩbɩnʋʋ kʋdɔŋ sɔsɔʋ.’”*+

7 «“‘Nɛ pʋwayɩ lɛ, mankaɣ ɖʋzʋʋ Yuuda wiyaʋ Zedekiya nɛ ɛ-lɩmɖʋyaa nɛ tɛtʋ tʋnɛ tɩ-taa ɛyaa (mba kʋdɔŋ sɔsɔʋ, laɣɖɛ nɛ ñɔɔsɩ tɩkʋ-wɛ yɔ) Babilɔɔnɩ wiyaʋ Nabukodonozɔɔrɩ* nesi tɛɛ, po-koyindinaa nesi tɛɛ nɛ mba pɛwɛɛ nɛ pañɩnɩɣ se palɩzɩ pe-wezuu yɔ* pe-nesi tɛɛ.+ Ɛkaɣ-wɛ kʋʋ nɛ laɣɖɛ. Pɔ-tɔm ɛɛkaɣ-ɩ labʋ pʋtɔdɩyɛ, ɛɛkaɣ pe-siziŋ nɩʋ nɛ ɛɛkaɣ pa-pʋtɔdɩyɛ naʋ ɖɔɖɔ paa ññɩɩ,’+ Yehowa yɔɔdʋʋna.”

8 «Nɛ pɩwɛɛ se ŋheyi samaɣ kanɛ se: “Tɔm tʋnɛ Yehowa yɔɔdʋʋ: ‘Ɩna, menɖiɣni sɩʋ mɩ-ɛsɩndaa wezuu nʋmɔʋ nɛ sɩm nʋmɔʋ. 9 Mba pɩkazɩɣ tɛtʋ tʋnɛ tɩ-taa yɔ laɣɖɛ, ñɔɔsɩ nɛ kʋdɔŋ sɔsɔʋ kaɣ-wɛ kʋʋ. Ɛlɛ weyi ɛlɩɣ nɛ ɛcɛlɩ ɛ-tɩ Kalɩdee ñɩma mba peɖiɣni-mɩ ñɛyʋʋ yɔ, ɛkaɣ wɛʋ wezuu, nɛ e-wezuu* kaɣ-ɩ kɛʋ kɩhɛyʋʋ.’”*+

10 «“‘Mbʋ pʋyɔɔ yɔ manpam mɛ-ɛsa nɛ tɛtʋ tʋnɛ se mɔnkɔnɩ tɩ-yɔɔ asɛyʋʋ, pɩtɩkɛ kɩbandʋ mɔnkɔŋna.+ Pakaɣ-tʋ ɖʋzʋʋ Babilɔɔnɩ wiyaʋ nesi tɛɛ,+ nɛ ɛkaɣ-tʋ ñaɣzʋʋ miŋ,+ Yehowa yɔɔdʋʋna.’

11 «“Yuuda wiyaʋ ɖɩɣa taa mba: Ɩnɩɩ Yehowa tɔm. 12 Oo Daviid ɖɩɣa, tɔm tʋnɛ Yehowa yɔɔdʋʋ: