Bebe kaasɔɔlɩ ɛ-caa pɩdɩɩfɛyɩ. Ɛ-taabalʋ nɔɔyʋ kaaheyini-i tɔm ndʋ se ɛhɛzɩ ɛ-laŋɩyɛ, ɛlɛ tiyeba nɛ pɩɖʋ-ɩ wɩzasɩ kɩɖʋʋ. Bebe kaawɛɛ nɛ ɛmaɣzɩɣ tɔm ndʋ tɩ-yɔɔ nɛ eheyiɣ ɛ-tɩ se: “Man-caa sɩm tɩkɛ mbʋ pɩwɛ ɖeu nɛ pɩkɩlɩ yɔ.” Pɩlabɩ pɩnzɩ sakɩyɛ pʋwayɩ lɛ, Bebe kɛdɩ tɔm ndʋ takayaɣ nakɛyɛ taa. Nɛ ɛzɩma ɛkɛdɩ-tʋ yɔ, pɩwɩlɩɣ se ɛwɛɛ nɛ ɛnɩɣ siziŋ ɛ-caa sɩm yɔɔ mbʋ.

Bebe kɔm nɛ eɖiɣzina se pɩpɩzɩɣ nɛ pɩkpaɣ alɩwaatʋ sakɩyɛ pʋcɔ nɛ ɛyʋ sɔɔ wɩzasɩ nzɩ sɩm kɔŋna yɔ sɩ-yɔɔ, kɔzɩ kɔzɩ ye ɛ nɛ weyi ɛsɩba yɔ paañɔnɩ ɖama kpam kɔyɔ. Pʋyɔɔ Bibl yɔɔdaa se sɩm kɛ “wayɩ wayɩ koyindu.” (1 Kɔrɛntɩ 15:26) Ðoŋ ɖoŋ lɛ, sɩm kɔŋnɩ lɛɣzɩtʋ sɔsɔtʋ ɖe-wezuu caɣʋ taa alɩwaatʋ ndʋ ɖɩɩɖʋʋna yɔ. Pɩkpakɩɣ ɛyaa mba ɖɩkɩlɩ sɔɔlʋʋ yɔ nɛ ɖɩfɛyɩnɩ ɖoŋ nɩɩyɩ se ɖɩɖɩɣ-pʋ nʋmɔʋ. Sɩm kɔŋnɩ wɩzasɩ ɖa-taa paa weyi. Ye mbʋ, ye ɖɩɩsɩŋ ɛzɩma ɖɩlʋbɩnɩ siziŋ weyi sɩm kɔŋna yɔ pɩfɛyɩ se pɩlabɩ-ɖʋ piti.

Pʋtɔma yɔ, ŋwɛɛ nɛ ŋpɔzʋʋ ña-tɩ se: ‘Manɩɣ siziŋ nɛ pɩkɔɔ pɩsɩɩnɩ ɖooye? Ɛzɩma ɛyʋ pɩzɩɣ nɛ ɛlʋbɩnɩ siziŋ weyi sɩm kɔŋna yɔ? Ɛzɩma manpɩzɩɣ nɛ mɛhɛzɩ mba pɛ-ɛyaa sɩba yɔ pa-laŋa? Lidaʋ nakʋyʋ wɛɛ se ɖɩkaɣ tasʋʋ naʋ ɖɛ-ɛyaa kʋsɔɔlaa mba pasɩba yɔ?’

Wiɖiyi kʋdɔŋ nakʋyʋ yeba nɛ ŋnɩɩ wɩzasɩ na? Pʋtɔma yɔ, ñɔ-yɔɔ cɛbɩ lɛɛ lɛɛ nɛ halɩ ŋsɔɔ wɩzasɩ nzɩ sɩ-yɔɔ. Ɛlɛ wɩzasɩ nzɩ sɩm kɔŋna yɔ, sɩfɛyɩ mbʋ. Alan Wolfelt mawa se: “Nabʋyʋ fɛyɩ kaɖɛ nɛ pɩtalɩ se ɛyʋ ɛlʋbɩnɩ wɩzasɩ nzɩ sɩm kɔŋna yɔ.” Ɛlɛ, ɛtasɩ yɔɔdʋʋ se: “Alɩwaatʋ kaaɖɛɣ nɛ ɛyaa lalaa sɩɣnɩ-ŋ lɛ, ñe-siziŋ nɩʋ kaɣ pasʋʋ.”

Iyele nɛ ɖɩna ɛzɩma Abraham laba alɩwaatʋ ndʋ ɛ-halʋ Saara sɩba yɔ. Bibl kɛdaa se: ‘Abraham kɔm nɛ ɛcaɣ ɛ-kʋñɔŋ nɛ ewii-i.’ Pɔyɔɔdʋʋ cɩnɛ se Abraham ‘caɣ Saara kʋñɔŋ’ yɔ, pɩwɩlɩɣ se pɩlabɩ alɩwaatʋ cabɩ pʋcɔ nɛ ɛsɔɔ ɛ-halʋ sɩm yɔɔ.a Bibl kɛdaa ɖɔɖɔ se paacɛtɩ Yakɔɔb se tɛtɛ kpɩnɛ naɖɩyɛ kʋ ɛ-pɩyalʋ Yosɛɛfʋ. Yakɔɔb nɩ tɔm ndʋ lɛ, “ɛcaɣ ɛ-pɩyalʋ kʋñɔŋ pɩɖɔɔ pɩŋŋ” nɛ ɛ-hɔʋ taa mba taapɩzɩɣ se pɛhɛzɩ ɛ-laŋɩyɛ. Pɩnzɩ sakɩyɛ kɔm nɛ sɩɖɛɛ, ɛlɛ eɖiɣni nɩʋ siziŋ mbʋ.​—Kiɖe Tɛɛ Tɔm 23:2; 37:34, 35; 42:36; 45:28.

Sɔnɔ ɖɔɖɔ, ɛyaa sakɩyɛ nɩɣ siziŋ pɛ-ɛyaa kʋsɔɔlaa sɩm yɔɔ pɩnzɩ sakɩyɛ. Iyele nɛ ɖɩna ɛyaa naalɛ nabɛyɛ kɩɖaʋ.

• “Ma-walʋ Robert sɩbɩ kɛgbɛdɩsaɣ nakɛyɛ taa 9 juillet 2008. Kɩyakʋ ŋgʋ ɛsɩba yɔ, kɩtaawɛɛ ndɩ nɛ kɩyakɩŋ lɛɛŋ. Ɛzɩ ɖɩtɩɩlakʋʋ tam yɔ, puwiye ɖɩlɩzɩ sɔntɔ tanaŋ tɛɛ nɛ ɖɩtɛ lɛ, ɖikpiikini ɖama, ɖɩkpɛlɩ ɖama yɔɔ, nɛ ɖiheyi ɖama se ɖɩsɔɔlɩ ɖama nɛ ɛcaŋ ɛɖɛɛ tʋmɩyɛ. Pɩlakɩ pɩnzɩ loɖo yɔ, ɛlɛ mɛwɛɛ nɛ manɩɣ siziŋ mbʋ ma-laŋɩyɛ taa. Mantɩsa se wiɖiyi mankaɣ sɔʋ ma-walʋ sɩm yɔɔ.”​—Gail, ɛwɛnɩ pɩnzɩ 60.

• “Ma-halʋ kʋsɔɔlʋ sɩbʋ nɛ eyebi-m yɔ pɩcɛzɩ pɩnzɩ 18, ɛlɛ menɖiɣni siziŋ nɩʋ halɩ nɛ sɔnɔ. Alɩwaatʋ ndʋ manaɣ pʋyʋ nɔɔyʋ nɛ pɩwɛ kajʋka lɛ, ma-lɩmaɣza woki ɛ-yɔɔ nɛ mamaɣzɩɣ ɛzɩma ɛ-taa pɩzaɣ se pɩla leleŋ ye ɛɛwɛɛ nɛ ɛna wonuu ŋgʋ yɔ.”​—Etienne, ɛwɛnɩ pɩnzɩ 84.

Pɩwɩlɩɣ kpayɩ kpayɩ se paa ɛyʋ ɛnɩɣ siziŋ ɛ-ɛyʋ nɔɔyʋ sɩm yɔɔ nɛ pileɖiɣ yɔ, pɩtɩkɛ kɩwɛɛkɩm. Ɛzɩma ɛyaa cakɩ kʋñɔwiye yɔ pɩwɛ ndɩ ndɩ, nɛ pʋyɔɔ lɛ pɩɩwɛɣ ɖeu se ɖɩkʋ nɔɔyʋ tɔm ɛzɩma ɛnɩɣ siziŋ ɛ-ɛyʋ nɔɔyʋ sɩm yɔɔ yɔ pɩ-yɔɔ. Pɩɩwɛɣ ɖeu ɖɔɖɔ se ɖiyele nɛ ɖa-laŋɩyɛ kʋ ɖɔ-tɔm ye pɩlakɩ-ɖʋ ɛzɩ ɖɩɖɛlɩsɩɣ niye kʋñɔwiye caɣʋ taa yɔ. Ɛzɩma ɖɩpɩzɩɣ nɛ ɖɩlʋbɩnɩ siziŋ weyi sɩm kɔŋna yɔ?

Lɔŋ weyi ɛyaa tasɩɣ hɔɔlʋʋ ŋgʋ kɩ-taa yɔ, ɩɖɔwa pɩdɩɩfɛyɩ. Ɛlɛ pɩtɩkɛ lɔŋ tasʋʋ mbʋ, pɩtɩŋa pɩwɛnɩ wazaɣ. Pʋtɔma yɔ, nabɛyɛ kaɣ-ŋ tasʋʋ lɔŋ se ŋtaawii yaa ŋtaayele nɛ pɩna se ŋwɛ kʋñɔŋ taa. Lalaa ñapɩzɩɣ nɛ patasɩ-ŋ lɔŋ se ŋwii nɛ ŋɖɛlɛsɩ niye. Ɛlɛ lɔŋ weyi Bibl tasɩɣ yɔ, ɩwɛ ɖeu nɛ pɩkɩlɩ nɛ ɩlabɩ nɔɔ kʋɖʋmaɣ nɛ mbʋ sɔnɔ ñɩnɩyaa ñɩnaa nɛ pana yɔ.

Ɛjaɖɛ hɔɔlɩŋ nɩɩyɩ taa lɛ, ɛyaa maɣzɩɣ se pɩtɩmʋna se abalʋ ewii. Ɛlɛ, pɩkɛnɩ fɛyɛ tɔm se ɛyʋ ewii ɛyaa ɛzɩdaa? Lɔŋsɩnɖaa yɔɔdʋʋ se pʋmʋnaa se ɛyʋ ewii ye ɛ-ɛyʋ kʋsɔɔlʋ nɔɔyʋ ɛsɩba yɔ. Nɛ alɩwaatʋ ndʋ ŋwiɣ ñɛ-ɛyʋ kʋsɔɔlʋ nɔɔyʋ sɩm yɔ, pɩpɩzɩɣ nɛ pɩsɩnɩ-ŋ nɛ ŋlʋbɩnɩ siziŋ weyi ŋɖiɣni nɩʋ yɔ. Ɛlɛ ye ŋkizi wiu kɔyɔ, pɩpɩzɩɣ nɛ pɩkɔnɩ-ŋ kaɖɛ. Bibl tɩyɔɔdɩ ɖoli se pɩfɛyɩ ɖeu se abalʋ ewii ɛ-ɛyʋ kʋsɔɔlʋ nɔɔyʋ sɩm. Maɣzɩ Yesu kɩɖaʋ yɔɔ nɛ ŋna. Ɛɛwɛnɩ ɖoŋ se efezi sɩɖaa. Paa mbʋ yɔ, ewi ɛyaa ɛzɩdaa alɩwaatʋ ndʋ ɛ-taabalʋ Lazaarɩ sɩba yɔ.​—Yohanɛɛsɩ 11:33-35.

Alɩwaatʋ ndʋ ɛyʋ cakɩ kʋñɔwiye yɔ, ɖoŋ ɖoŋ lɛ ɛ-taa wɩɣ kadadayaɣ kɔzɩ kɔzɩ ye pɩlabɩ se ɛ-ɛyʋ ɛnʋ ɛsɩbɩ tuda yem na yɔ. Lɩmaɣza sakɩyɛ pɩzɩɣ piyele nɛ weyi ɛwɛ kʋñɔwiye taa yɔ, ɛ-taa wɩɩ. Pɩpɩzɩɣ pɩla se ɛyʋ weyi ɛyaa ñaŋɩ-ɩ yɔ, ɛyɔɔdɩ tɔm kɩdɛkɛdɩtʋ natʋyʋ yaa tɔm ndʋ tɩtɩmʋna yɔ. Mike wɛ Afrika Haɖɛ Kiŋ ɛjaɖɛ taa. Ɛyɔɔdaa se: “Alɩwaatʋ ndʋ man-caa sɩba yɔ, maawɛnɩ pɩnzɩ 14. Kɩyakʋ ŋgʋ pepiŋaɣ-ɩ yɔ, Fada yɔɔdaa se Ɛsɔ sɔɔlaa se ɛyaa kɩbama ɩkpa ɛ-cɔlɔ, pʋyɔɔ ɛyaɣ-wɛ lɔŋ.a Tɔm ndʋ, tɩwɩzɩ-m siŋŋ mbʋ pʋyɔɔ yɔ ɖɩɩsɔɔlaa se ɖa-caa ɛwɛɛ ɖɔ-cɔlɔ nɛ ɛsɩnɩ-ɖʋ. Sɔnɔ pɩlakɩ pɩnzɩ 63 yɔ, ɛlɛ tɔm ndʋ tiɖiɣni-m wɩzʋʋ.”

Nɛ ye ña-laŋɩyɛ ɛkʋʋ ñɔ-tɔm, ɛbɛ pɩwɛɛ se ŋla? Alɩwaatʋ ndʋ ñɛ-ɛyʋ kʋsɔɔlʋ nɔɔyʋ sɩkɩ tuda nɛ ŋtaaɖʋna yɔ, ŋpɩzɩɣ nɛ ŋmaɣzɩɣ ɖoŋ ɖoŋ se: ‘Ye maalabɩ ɛzʋnɔ yaa ɛzʋnɔ kɔyɔ, pʋtɔma yɔ ɛtaasɩ.’ Yaa pʋtɔma yɔ weyi ɛsɩba yɔ, ña nɛ ɩ iyowa pʋcɔ nɛ ɛsɩkɩ. Pɩpɩzɩɣ piyele nɛ ña-laŋɩyɛ tɛzɩɣ kʋʋ ñɔ-tɔm.

Ye ña-laŋɩyɛ ɛwɛɛ nɛ ɖɩkʋʋ ñɔ-tɔm mbʋ yɔ, pɩɩwɛɣ ɖeu se ŋmɛsɩ ña-lɩmaɣza. Ɛlɛ yɔɔdɩnɩ ña-taabalʋ nɔɔyʋ nɛ ɛhɛzɩ ña-laŋɩyɛ. Ɛkaɣ-ŋ sɩnʋʋ nɛ ŋna se ɛyaa mba pelesiɣ pɛ-ɛyaa kʋsɔɔlaa yɔ, pa-taa sakɩyɛ wɛnɩ lɩmaɣza ana. Bibl heyiɣ-ɖʋ se: “Ɛsɔɔlʋʋ paa ɖooye, weyi ɛkɛ ɛgbaɣdʋ yɔ, nɛ kʋñɔŋ taa lɛ, ɛpɩsɩɣ koobu.”​—Aduwa 17:17.

Taabalʋ kɩbanʋ weyi ɛpɩzɩɣ nɛ ɛhɛzɩ ña-laŋɩyɛ nɛ pɩkpaɖɩ pɩtɩŋa yɔ, ɛnʋ lɛ Yehowa Ɛsɔ. Tɩmnɩ-ɩ nɛ ŋheyi-i mbʋ pɩwɛ ña-laŋɩyɛ taa yɔ, mbʋ pʋyɔɔ yɔ ‘ɛcɔŋnɩ ñɔ-yɔɔ.’ (1 Pɩyɛɛrɩ 5:7) Pɩtasɩ lɛ, ɛha mba patɩmɩɣnɩ-ɩ yɔ lidaʋ se “Ɛsɔ tɛ laŋhɛzɩyɛ nɖɩ ɖɩkpaɖɩ lɔŋ kpeekpe yɔ,” ɖɩkaɣ hɛzʋʋ pa-maɣzɩm nɛ pa-laŋa. (Filiipu 4:6, 7) Pɩtasɩ ɖɔɖɔ lɛ, yele nɛ Ɛsɔ tɩŋnɩ Bibl yɔɔ nɛ ɛhɛzɩ ña-laŋɩyɛ. Ma Bibl taa masɩ nzɩ sɩhɛzɩɣ laŋa yɔ. (Cɔnɩ aɖakaɣ taa tɔm.) Ŋpɩzɩɣ nɛ ŋñaɣ pana nɛ ŋɖɔkɩ sɩ-taa nasɩyɩ ña-ñʋʋ taa. Ye ŋmaɣzɩɣ masɩ nzɩ sɩ-yɔɔ kɔyɔ, pɩkaɣ-ŋ sɩnʋʋ, kɔzɩ kɔzɩ ɖoo taa alɩwaatʋ ndʋ ŋwɛ ñe-ɖeke nɛ ŋŋhikiɣ ɖom yɔ.​—Izaayii 57:15.

Payaɣ abalʋ nɔɔyʋ se Jack nɛ ɛwɛnɩ pɩnzɩ 40. Pitileɖi yɔ ɛ-halʋ kʋsɔɔlʋ sɩbɩnɩ cancer kʋdɔŋ. Ɛkɛdaa se nabʋyʋ taa, pɩlakaɣ-ɩ ɛzɩ ɛfɛyɩ nɔɔyʋ yɔ. Ɛlɛ adɩma sɩnɩ-ɩ. Ɛyɔɔdaa se: “Alɩwaatʋ ndʋ mantɩmɩɣnɩ Yehowa yɔ, pɩɩtasɩɣ-m labʋ ɛzɩ mɛwɛ men-ɖeke yɔ. Ðoŋ ɖoŋ lɛ, menfeŋ ɖoo hɛkʋ taa nɛ pɩɩtasɩɣ sam se monɖoo. Peeɖe mankpakɩɣ alɩwaatʋ nɛ mankalɩ Masɩ nzɩ sɩhɛzɩɣ laŋa yɔ nɛ mamaɣzɩɣ sɩ-yɔɔ. Pʋwayɩ lɛ, mantɩmnɩ Yehowa nɛ meheyi-i wɩzasɩ nzɩ sɩwɛ ma-laŋɩyɛ taa yɔ. Malakɩ mbʋ nɛ mɛntɛ lɛ, laŋhɛzɩyɛ sɔsɔyɛ naɖɩyɛ kɔŋ mɔ-yɔɔ nɛ ɖɩhɛzɩ ma-maɣzɩm nɛ manɖaɣnɩ hiɣu ɖom.”

Payaɣ halʋ nɔɔyʋ se Vanessa, e-ɖoo kaasɩbɩnɩ kʋdɔŋ nakʋyʋ. Adɩma sɩnɩ-ɩ ɖɔɖɔ pɩdɩɩfɛyɩ. Ɛyɔɔdaa se: “Alɩwaatʋ ndʋ wɩzasɩ kɩlaɣ-m yɔ, mañɩtɩɣ nɛ mayaa Ɛsɔ hɩɖɛ lɛ, manpaɣzɩ wiu. Yehowa welisaɣ ma-adɩma nɛ ɛkpazɩɣ-m ɖoŋ.”

Lɔŋ tasɩyaa nabɛyɛ tasɩɣ mba pɛ-ɛyaa kʋsɔɔlaa sɩba nɛ pɛwɛɛ kʋñɔŋ taa yɔ lɔŋ se pakpaɣ pa-alɩwaatʋ nɛ pasɩnɩ lalaa yaa pala tʋma wena awazɩɣ pe-egeetiye yɔ. Ye palakɩ mbʋ yɔ, pɩpɩzɩɣ nɛ pɩha-wɛ taa leleŋ nɛ pɩhɛzɩ pa-wɩzasɩ. (Tʋma Labʋ 20:35) Krɩstʋ ñɩma mba pɛ-ɛyaa kʋsɔɔlaa sɩba nɛ pakpaɣ pa-alɩwaatʋ nɛ pasɩnɩ lalaa yɔ, pɩhɛzɩ pa-taa sakɩyɛ laŋa siŋŋ.—2 Kɔrɛntɩ 1:3, 4.

Wiɖiyi ña-taabalʋ nɔɔyʋ tɛm wɛʋ kʋñɔwiye taa nɛ ŋŋnaɣ se ŋla ɛzɩma nɛ ŋsɩnɩ-ɩ? Nabʋyʋ taa ɖɩɩnaɣ tɔm ndʋ ɖiheyi-i yaa mbʋ ɖɩla nɛ ɖɩsɩnɩ-ɩ yɔ, nɛ pʋyɔɔ lɛ ɖɩtɛzɩɣ sum yem yaa ɖɩɩlakɩ nabʋyʋ. Ɛlɛ ɖɩpɩzɩɣ ɖɩla nabʋyʋ nɛ ɖɩsɩnɩ-ɩ.

Ðoŋ ɖoŋ lɛ, ye ŋwɛ pʋdʋ ɛnʋ ɛ-cɔlɔ nɛ ŋheyi-i yem se “ña nɛ kʋñɔŋ” yɔ, pɩpɩzɩɣ nɛ pɩhɛzɩ ɛ-laŋɩyɛ. Ɛjaɖɛ hɔɔlɩŋ sakɩyɛ taa lɛ, mbʋ ɛyʋ pɩzɩɣ ɛla nɛ ɛhɛzɩ lɛlʋ laŋɩyɛ yɔ lɛ se etukuni-i yaa ɛlaɣyɩ e-nesi ɛ-yɔɔ. Ye weyi ɛwɛ kʋñɔwiye taa yɔ ɛñɩnɩɣ se ɛyɔɔdɩ natʋyʋ yɔ, pɩwɛɛ se ŋwelisini-i camɩyɛ. Kɔzɩ kɔzɩ lɛ, ŋpɩzɩɣ nɛ ŋsɩnɩ-ɩ ɖɩɣa taa tʋma naayɛ labʋ ɛzɩ tɔɔnaɣ tɩzʋʋ, piya yɔɔ cɔnʋʋ mbʋ yɔ, yaa ŋsɩnɩ-ɩ nɛ ɛñɔɔzɩ pimtu ɖʋtʋ. Ye ŋlabɩ mbʋ yɔ, pɩkaɣ hɛzʋʋ ɛ-laŋɩyɛ nɛ pɩkpaɖɩ tɔm ndʋ payɩ ŋyɔɔdʋʋ yɔ.

Pɩɖɛɣnɩ ɛzɩdaa lɛ, ña nɛ ɩ ɩpɩzɩɣ nɛ ɩkɛdɩ ɛ-ɛyʋ kʋsɔɔlʋ weyi ɛsɩba yɔ ɛ-wɛtʋ kɩbandʋ natʋyʋ, yaa tʋma kɩbana wena ɛɛlaba yɔ a-tɔm. Faawɩyɛ ŋgʋ kɩpɩzɩɣ nɛ kɩha-ɩ taa leleŋ nɛ halɩ kɩlakɩ nɛ ɛmʋʋyɩ. Pam walʋ Ian sɩba pɩlakɩ pɩnzɩ loɖo. Ɛyɔɔdaa se: “Nabʋyʋ taa lɛ, ɛyaa yɔɔdʋʋ lakasɩ kɩbanzɩ nzɩ Ian laba nɛ mantaatɩlɩ-sɩ yɔ, sɩ-tɔm. Nɛ manɩɣ tɔm ndʋ lɛ, pɩhaɣ-m taa leleŋ.”

Ñɩnɩyaa ñɩnaa nɛ pana se sakɩyɛ taa lɛ, kiɖe tɛɛ ɖeke ɛyaa sɩɣnɩ mba pɛwɛ kʋñɔwiye taa yɔ. Ɛlɛ pʋwayɩ paa weyi ɛpɩsɩɣ ɛ-tʋmɩyɛ taa lɛ, paatasɩɣ pɔ-yɔɔ tɔzʋʋ. Ye mbʋ, ñaɣ pana nɛ ŋwoki ɖoŋ ɖoŋ nɛ ŋnaɣ weyi ɛwɛ kʋñɔwiye taa yɔ pʋwayɩ.a Ye ɖɩlakɩ mbʋ yɔ, pɩhɛzɩɣ mba pɛwɛ kʋñɔwiye taa nɛ pileɖi yɔ, pa-laŋa pɩdɩɩfɛyɩ.

Payaɣ pɛlɛ nɔɔyʋ Japɔŋ ɛjaɖɛ taa se Kaori. E-ɖoo kaasɩba nɛ pɩla fenasɩ 15 lɛ, ɛ-kɔɔ ɖɔɖɔ sɩ nɛ pɩwɛɛkɩ ɛ-laŋɩyɛ siŋŋ. Mbʋ pɩlabɩ ɖeu yɔ lɛ se ɛ-taabalaa sɩnɩ-ɩ alɩwaatʋ sakɩyɛ. Ɛ-taabalaa mba pa-taa nɔɔyʋ lɛ Ritsuko, nɛ ɛɛkɩlɩ Kaori nɛ pɩnzɩ sakɩyɛ. Ritsuko heyi Kaori se ɛsɔɔlaa se ɛpɩsɩ ɛ-taabalʋ sɔsɔ. Kaori yɔɔdaa se: “Toovenim taa lɛ, pɩtaakɛdɩnɩ-m. Mantaasɔɔlɩ se nɔɔyʋ ɛmʋ mon-ɖoo lone, nɛ mantaamaɣzɩ se nɔɔyʋ pɩzaɣ se ɛwɛɛ ɛzɩ mon-ɖoo yɔ. Ɛlɛ ɛzɩma Ritsuko cɔŋnaɣ mɔ-yɔɔ yɔ, piyeba nɛ mɔñɔtɩnɩ-ɩ. Paa kpɩtaʋ ŋgʋ lɛ, ma nɛ ɩ ɖiwokaɣ nɛ ɖisusuu tɔm nɛ ɖiwoki ɖɔɖɔ kediɣzisi. Ɛyaɣaɣ-m ɛ-tɛ nɛ ɖɩñɔʋ tii, ɛkɔŋnɩ-m tɔɔnaɣ, nɛ ɛmaɣ-m takayɩsɩ ɖoŋ ɖoŋ. Ritsuko lakasɩ kɩbanzɩ nzɩ, siitukuni-m siŋŋ.”

Kaori ɖoo sɩbʋ yɔ, pɩlakɩ pɩnzɩ 12 yɔ. Sɔnɔ, ɛ nɛ ɛ-walʋ pɛkɛ nʋmɔʋ lɩzɩyaa. Kaori kɛdaa se: “Ritsuko wɛɛ nɛ ɛmaɣzɩɣ mɔ-yɔɔ halɩ nɛ sɔnɔ. Alɩwaatʋ ndʋ manpɩsɩɣ ɖenɖe ɖɩɩwɛɛ yɔ lɛ, mowoki nɛ manaɣ-ɩ tam nɛ ɛkpazɩɣ-m ɖoŋ.”

Poli kɛ Yehowa Aseɣɖe Tʋ Ciiprɩ ɛjaɖɛ taa. Pasɩnɩ-ɩ ɖɔɖɔ alɩwaatʋ sakɩyɛ ɛ-kʋñɔwiye taa. Poli walʋ kʋsɔɔlʋ Sozos kaakɛ ɛgbɛyɛ taa ɛzʋtʋyʋ weyi ɛhaɣaɣ kɩɖaʋ kɩbaŋʋ yɔ. Ðoŋ ɖoŋ lɛ, ɛyaɣaɣ solisi nɛ lelaa ɛ-tɛ se pamʋ helim nɛ pɔtɔɔ tɔɔnaɣ. (Yakubu 1:27) Ɛlɛ pʋtɔdɩyɛ tɔm Sozos wɛnɩ pɩnzɩ 53 lɛ, ɛsɩbɩnɩ cancer kʋdɔŋ. Poli yɔɔdaa se: “Ma-walʋ kʋsɔɔlʋ weyi ma nɛ ɩ ɖɩɩwɛ ɖama cɔlɔ pɩnzɩ 33 yɔ, ɛsɩba nɛ eyebi-m.”

Pepim ɛ-walʋ nɛ pɩtɛ lɛ, Poli kpaɣ ɛ-pɩyalʋ tɩnʋʋ Daniel weyi ɛɛwɛnɩ pɩnzɩ 15 yɔ nɛ pɛɖɛɛ Kanadaa ɛjaɖɛ taa. Patalɩ peeɖe lɛ, papaɣzɩ wobu kediɣzisi Yehowa Aseɣɖe Tɩnaa ɛgbɛyɛ naɖɩyɛ taa. Poli yɔɔdaa se: “Taabalaa kɩfama mba ɖihiɣ ɛgbɛyɛ nɖɩ ɖɩ-taa yɔ, pataatɩlɩ mbʋ pɩɩtalɩ-ɖʋ nɛ kaɖɛ wɛtʋ ndʋ tɩ-taa ɖɩɩwɛɛ yɔ. Paa mbʋ yɔ, pɔñɔtaɣnɩ-ɖʋ nɛ pɛhɛzɩɣ ɖa-laŋa nɛ tɔm kɩbandʋ nɛ pasɩɣnɩ-ɖʋ. Sɩnʋʋ mbʋ, pɩɩwazɩ-ɖʋ pɩdɩɩfɛyɩ, mbʋ pʋyɔɔ yɔ pɩɩkɛ alɩwaatʋ ndʋ tɩ-taa man-pɩyalʋ maɣzaɣ ɛ-caa yɔɔ siŋŋ yɔ. Ɛgbɛyɛ taa ɛzʋtʋyaa kaasɩnɩ Daniel siŋŋ. Pa-taa lɛlʋ labɩ ɖʋtʋ se Daniel ɛwɛɛ pɛ-hɛkʋ taa alɩwaatʋ ndʋ ɛ nɛ ɛ-taabalaa pamʋʋ helim yaa pamakɩ pombo yɔ.” Sɔnɔ Poli nɛ ɛ-pɩyalʋ pa-laŋɩyɛ hɛwa.

Pɩtʋʋ fɛyɩ se ɖɩpɩzɩɣ ɖɩtɩŋnɩ nʋmɔŋ ndɩ ndɩ yɔɔ nɛ ɖɩsɩnɩ mba pɛwɛ kʋñɔwiye taa yɔ nɛ ɖɩhɛzɩ pa-laŋa. Pɩtasɩ lɛ, lidaʋ kɩbaŋʋ ŋgʋ Bibl haɣ-ɖʋ cee wayɩ yɔɔ yɔ, kɩhɛzɩɣ ɖa-laŋa.

Pʋtɔma yɔ, ŋtɔzʋʋ se Gail weyi ɖɩɩyɔɔdɩ ɛ-tɔm nɛ pɩɖɛɛ yɔ, ɛmaɣzaɣ se wiɖiyi ɛɛkaɣ sɔʋ ɛ-walʋ Robert sɩm yɔɔ kpa. Ɛlɛ, ɛɖaŋ kpam se ɛna ɛ-walʋ ɛjaɖɛ kɩfaɖɛ taa. Ɛyɔɔdaa se: “Bibl mayaɣ ŋga mankɩlɩ sɔɔlʋʋ yɔ lɛ Natʋ 21:3, 4.” Mayaɣ ŋga kɔtɔŋ se: “Ɛsɔ ɖɩjaɣyɛ yɔ ɛyaa hɛkʋ taa; ɛ nɛ wɛ pakaɣnɩ wɛʋ nɛ pɛkɛ ɛ-samaɣ . . . Ɛkaɣ hɩzʋʋ pɛ-ɛzɩdaa ɛzɩtɛɣlɩm kpeekpe, nɛ sɩm ɛɛtasɩɣ wɛʋ; nɛ paatasɩɣ wiu, paatasɩɣ kubusi mabʋ, kʋñɔŋ ɛɛtasɩɣ wɛʋ, mbʋ yɔ ɛjaɖɛ kɩbɩnɖɛ ɖɛwa.”

Gail yɔɔdaa se: “Lidaʋ tɔm ndʋ, tɩ-wayɩ fɛyɩ. Mamaɣzɩɣ ɛyaa mba pɛ-ɛyaa kʋsɔɔlaa nabɛyɛ sɩba ɛlɛ paasɩŋ se lidaʋ nakʋyʋ wɛɛ se pakaɣ fezuu sɩɖaa yɔ pɔ-yɔɔ lɛ, pɩlakɩ-m pʋtɔdɩyɛ.” Gail ñaɣ pana se ɛcaɣ wezuu nɛ pɩla nɔɔ kʋɖʋmaɣ nɛ e-tisuu, pʋyɔɔ ɛpɩsɩ nʋmɔʋ lɩzɩyʋ nɛ esusuu ɛyaa lalaa se Ɛsɔ ha-ɖʋ lidaʋ se cee wayɩ “sɩm ɛɛtasɩɣ wɛʋ.”

Pʋtɔma yɔ, ŋtɔŋ se: ‘Mantɩsa se tɔm ndʋ tɩkaɣ labʋ.’ Ɛlɛ maɣzɩ abalʋ weyi payaɣ se Yɔb yɔ, ɛ-kɩɖaʋ yɔɔ nɛ ŋna. Ɛɛhɩnɩ kʋdɔŋ sɔsɔʋ nakʋyʋ nɛ ɛnɩɩ siziŋ pɩdɩɩfɛyɩ. (Yɔb 2:7) Yɔb ñɩnaɣ se sɩm ɛkpaɣ-ɩ nɛ ɛhɛzɩ; paa mbʋ yɔ ɛɛwɛnɩ tisuu se Ɛsɔ kaɣ-ɩ fezuu nɛ ɛtasɩ caɣʋ wezuu tɛtʋ yɔɔ. Ɛyɔɔdɩnɩ lidaʋ se: “Alakɩ nɛ ŋtisi-m haɖɛ, nɛ ŋmɛsɩ-m . . . Ŋŋya-m lɛ, moncosi-ŋ; ŋŋɖaɣnɩ ñɩnʋʋ ñe-nesi tɛɛ tʋmɩyɛ.” (Yɔb 14:13, 15) Yɔb kaawɛnɩ lidaʋ se Ɛsɔ kaɣ tasʋʋ ñɩnʋʋ se ɛna-ɩ nɛ pɩkaɣ-ɩ selituu se efezi-i.

Piileɖiɣ lɛ, Ɛsɔ kaɣ labʋ lidaʋ tɔm ndʋ tɩ-yɔɔ nɛ efezi Yɔb nɛ ɛyaa miiliyaarɩwaa sakɩyɛ alɩwaatʋ ndʋ tɛtʋ pɩsɩɣ paradisuu yɔ. (Maatiyee 5:4) Bibl yɔɔdɩ Tʋma Labʋ 24:15 taa se ɛyaa mba pasɩba yɔ, “pakaɣ fem.” Yesu ha-ɖʋ lidaʋ se: “Pɩtaaɖɩɣzɩ-mɩ: Ñɩɣyʋʋ talɩɣ nɛ mba pɛwɛ pɩlaŋ taa yɔ, Ɛyʋ Pɩyalʋ kaɣ pe-kpeekpe yaʋ” nɛ pefe. (Yohanɛɛsɩ 5:28, 29) Pakaɣ fezuu Yɔb nɛ ɛna ɛzɩma lidaʋ tɔm ndʋ tɩlaba yɔ. Alɩwaatʋ ndʋ tɩ-taa lɛ, ɛkaɣ ɖaɣnʋʋ “pɩsʋʋ e-evebitu taa” nɛ “e-tomnaɣ ɖaɣnɩ nɛɣdʋʋ nɛ pɩkɩlɩ e-evebitu taa.” (Yɔb 33:24, 25) Mba payɩ pɛwɛnɩ ɛsɩmɩyɛ pʋtɔdɩyɛ naʋ ɖʋtʋ ndʋ Ɛsɔ laba se ɛkaɣ fezuu sɩɖaa nɛ pacaɣ wezuu tɛtʋ yɔɔ yɔ, pakaɣ hiɣu wazasɩ kʋɖʋmsɩ nzɩ.

Ye ŋwɛɛ nɛ ŋwiɣ ñɛ-ɛyʋ kʋsɔɔlʋ nɔɔyʋ sɩm yɔ, pɩtɩwɩlɩ se tɔm ndʋ tɩ-taa ɖɩtazaa yɔ, tɩkaɣ hɛzʋʋ ña-laŋɩyɛ nɛ pɩtɛ. Ɛlɛ ye ŋwɛɛ nɛ ŋmaɣzɩɣ lidaʋ tɔm ndʋ tɩwɛ Bibl taa yɔ tɩ-yɔɔ kɔyɔ, pɩpɩzɩɣ pɩsɩnɩ-ŋ nɛ ŋwɛɛnɩ lidaʋ siŋŋ nɛ ŋɖɔkɩ ña-tɩ.—1 Tesalooniiki 4:13.

Ŋsɔɔlaa se ŋtɩlɩ ɛzɩma ŋla nɛ ŋɖɔkɩ ña-tɩ kʋñɔwiye taa yɔ nɛ pɩkpaɖɩ na? Yaa ŋwɛɛ nɛ ŋpɔzʋʋ ña-tɩ se: “Ɛbɛ yɔɔ Ɛsɔ ha nʋmɔʋ se kɩdɛkɛdɩm nɛ kʋñɔŋ pɛwɛɛ?” Ðitendi-ŋ wolo ɖɛ-tɛ intɛrnɛɛtɩ lone jw.org yɔɔ nɛ ŋna ɛzɩma Bibl cosi tɔm ndʋ tɩ-yɔɔ camɩyɛ yɔ.