Ŋtɔzʋʋ alɩwaatʋ ndʋ ŋŋkɛ pɩɣa nɛ putuuluu-ŋ nɛ ŋtɔlʋʋ yɔ tɩ-yɔɔ? Pɩtɩla ñe-nimbe mʋwaɣ heŋ yaa ña-nʋmbɔla nɔɔ taa kpɛzaɣ. Ŋtɔzʋʋ ɖɔɖɔ ɛzɩma ño-ɖoo lakaɣ-ŋ kaaka nɛ ɛhɛzɩɣ ña-laŋɩyɛ yɔ, pɩ-yɔɔ? Pɩtɩla ɛhɩzaɣ ñe-heŋ taa nɛ pʋwayɩ lɛ ɛɖʋʋ kɔyɛ. Pɩtʋʋ fɛyɩ se ŋwilaɣ, ɛlɛ ɛtɛŋ nɛ ɛkpaɣ-ŋ ɛ-nɔkɔyʋʋ taa lɛ pɩhɛzɩɣ ña-laŋɩyɛ nɛ ŋpaɣzɩ sɔʋ wɩzasɩ nzɩ sɩ-yɔɔ. Ñe-wezuu caɣʋ alɩwaatʋ ndʋ tɩ-taa lɛ, ño-ɖoo kaawɛ ñɔ-cɔlɔ kpam nɛ ɛhɛzɩɣ ña-laŋɩyɛ.

Ɛlɛ ŋwɛɣ nɛ ŋpaɣlɩɣ lɛ, ñe-wezuu caɣʋ wɛɣ nɛ kɩlakɩ kaɖɛ. Ña-kʋñɔmɩŋ wɛɣ nɛ ɩɖɔʋ nɛ pɩwɛ-ŋ ɖɔɖɔ kaɖɛ se ŋhiɣ laŋɩyɛ hɛzʋʋ. Ño-ɖoo ɛɛpɩzɩɣ nɛ ɛkpaɣ-ŋ ɛ-nɔkɔyʋʋ taa nɛ ɛhɛzɩ ña-laŋɩyɛ alɩwaatʋ ndʋ ŋpaɣlɩɣ nɛ ŋkatɩɣ kala ndɩ ndɩ yɔ. Yele nɛ ɖɩyɔɔdɩ kʋñɔmɩŋ ɛnɩ ɩ-taa nɩɩyɩ tɔm.

• Wiɖiyi ña-tʋmɩyɛ wɛɛkaa nɛ ŋsʋʋ kʋñɔŋ taa? Julian yɔɔdaa se pisidi ɛ-lɩmaɣza nɛ ɛɛnaɣ se ɛla ɛzɩma. Ɛɛpɔzaɣ ɛ-tɩ se: ‘Ɛzɩma mankaɣ labʋ nɛ mɔncɔnɩ mɔ-hɔʋ yɔɔ? Malabɩ tʋmɩyɛ nɛ kpekpeka pɩnzɩ sakɩyɛ, pɩlabɩ ɛzɩma nɛ tʋmɩyɛ ñʋʋdʋ maɣzɩɣ se mɛnfɛyɩnɩ wazaɣ?’

• Pɩtɩla kʋñɔŋ ŋgʋ kɩ-taa ɛyʋ sʋʋ alɩwaatʋ ndʋ e-nesi ɖɔkʋʋ cɛkɩ yɔ, kɩtɛmɩ-ŋ talʋʋ. Raquel yɔɔdaa se: “Pɩlakɩ fenasɩ 18 yɔ ma-walʋ ɖɛwa nɛ eyebi-m; alɩwaatʋ ndʋ ɛɖɛwa yɔ, maanɩ siziŋ siŋŋ. Laŋwɛɛkɩyɛ nɖɩ ɖɩ-taa maawɛ yɔ ɖɩ-wayɩ fɛyɩ. Manɩɣaɣ siziŋ tomnaɣ yɔɔ nɛ lɩmaɣza taa. Piiyeba nɛ sɔɔndʋ kpa-m siŋŋ.”

• Pɩtɩla kʋdɔŋ sɔsɔʋ nakʋyʋ wɛɛ kɩcɛyɩ-ŋ nɛ pɩlakɩ-ŋ ɛzɩ wiɖiyi ñɔ-yɔɔ ɛɛkaɣ cɛbʋ yɔ. Pɩtɩla nabʋyʋ taa pɩlakɩ-ŋ ɛzɩ caanaʋ taa caja Yɔb yɔ. Ewilaa nɛ ɛtɔ se: “Me-lidaʋ ɖʋ lɩm; maakaɣ tasɩɣ wɛʋ.” (Yɔb 7:16) Pɩtɔma yɔ, nabʋyʋ taa ña-lɩmaɣza lakɩ kʋyʋma nɛ abalʋ weyi payaɣ se Luis yɔ, ɛ-ñɩna; ɛwɛnɩ pɩnzɩ 80 nɛ ɛyɔɔdɩ se: “Nabʋyʋ taa pɩlakɩ-m ɛzɩ manɖaŋ kɩɖaŋʋʋ se sɩm ɛkɔɔ nɛ pɩkpaɣ-m yɔ.”

• Yaa pɩtɩla yɔ kʋñɔŋ ŋgʋ kɩ-taa ɛyʋ sʋʋ alɩwaatʋ ndʋ ɛ-ɛyʋ kʋsɔɔlʋ nɔɔyʋ sɩkɩ yɔ, kɩtɛmɩ-ŋ talʋʋ nɛ piyele nɛ ŋñɩnɩɣ laŋɩyɛ hɛzʋʋ. Robert yɔɔdaa se: “Alɩwaatʋ ndʋ man-pɩyalʋ sɩbɩ ɛsɔdaa lɔɔɖɩyɛ kɛgbɛdɩsaɣ nakɛyɛ taa yɔ, kajalaɣ lɛ pɩlakaɣ-m ɛzɩ pɩtɩkɛ toovenim yɔ. Pʋwayɩ lɛ manpaɣzɩ nɩʋ siziŋ, siziŋ weyi Bibl kpaɣ nɛ kɩmaɣzɩnɩ laɣɖɛ nɖɩ ɖɩtʋlʋʋ ɛyʋ laŋɩyɛ yɔ.”​—Luka 2:35.

Paa Robert, Luis, Raquel, nɛ Julian paakatɩ kala ndɩ ndɩ yɔ, papɩzaa nɛ pehiɣ laŋɩyɛ hɛzʋʋ kʋñɔmɩŋ weyi ɩtalɩ-wɛ yɔ ɩ-taa. Pehiɣ laŋɩyɛ hɛzʋʋ Ɛsɔ Ðoŋ Tɩŋa tʋ, laŋɩyɛ hɛzɩyʋ weyi ɛ-wayɩ fɛyɩ yɔ ɛ-cɔlɔ. Ɛzɩma tɩyɛ ɛhɛzɩɣ ɛyaa laŋa? Ɛkaɣ hɛzʋʋ ɖɔɖɔ ña-laŋɩyɛ kʋñɔmɩŋ weyi ɩ-taa ŋwɛɛ yɔ?

Apostoloo Pɔɔlɩ yɔɔdaa se Yehowaa kɛ Ɛsɔ weyi “ɛnaɣ ɖa-pʋtɔdɩyɛ nɛ ɛhɛzɩɣ ɖa-laŋa pɩtɩŋa pɩ-taa yɔ. Ɛhɛzɩɣ ɖa-laŋa ɖa-kʋñɔmɩŋ tɩŋa taa.” (2 Kɔrɛntɩ 1:3, 4; ABT) Bibl tɔm tʋnɛ tɩwɩlɩɣ se nɔɔyʋ fɛyɩ se Ɛsɔ ɛɛpɩzɩɣ nɛ ɛsɩnɩ-ɩ. Ye mbʋ, paa kʋñɔŋ ŋgʋ kɩ-taa ɖɩwɛɛ yɔ kɩpaɣlɩ ɛzɩma yɔ, ɖa-Caa weyi ɛwɛ ɛsɔdaa yɔ, ɛpɩzɩɣ nɛ ɛhɛzɩ ɖa-laŋɩyɛ.

Ɛlɛ, pɩwɛɛ se ɖɩla nabʋyʋ pʋcɔ nɛ Ɛsɔ hɛzɩ ɖa-laŋɩyɛ. Ye ɖɩtɩkatɩ ɖɔkɔtɔ nɛ ɖiheyi-i mbʋ pɩcɛyɩɣ-ɖʋ yɔ, ɛzɩma ɛpɩzɩɣ nɛ ɛsɩnɩ-ɖʋ? Nayʋ Amosi kaapɔzɩ tɔm tʋnɛ: “Ɛzɩ ɛyaa naalɛ kpɛndɩɣ nɛ pɔɖɔŋ nɛ patɩnɩɩnɩ ɖama fayɩɩɩ?” (Amosi 3:3) Pʋyɔɔ Bibl seɣtiɣ-ɖʋ se: “Ɩñɔtɩ mɩ-tɩ nɛ Ɛsɔ nɛ ɛñɔtɩ ɛ-tɩ nɛ mɩ.”​—Yakubu 4:8.

Ɛbɛ yɔɔ pɩfɛyɩ se ɖɩpɩtɩ se Ɛsɔ kaɣ-ɖʋ ñɔtɩnʋʋ? Kajalaɣ lɛ, eheyi-ɖʋ tam sakɩyɛ se ɛsɔɔlaa se ɛsɩnɩ-ɖʋ. (Kalɩ aɖakaɣ ŋga kɛwɛ hɔɔlʋʋ kʋnɛ kɩ-yɔɔ yɔ, ka-taa tɔm.) Nabʋlɛ lɛ, caanaʋ taa nɛ ɖa-alɩwaatʋ taa ɛyaa sakɩyɛ yɔɔdaa se Ɛsɔ hɛzɩ pa-laŋa pa-kʋñɔmɩŋ taa.

Ɛzɩ ɛyaa sakɩyɛ mba pañɩnɩɣ se Ɛsɔ ɛhɛzɩ pa-laŋa sɔnɔ yɔ, Wiyaʋ Daviid kaakatɩ kala sakɩyɛ. Alɩwaatʋ natʋyʋ taa, ɛtɩmnɩ Yehowa nɛ eheyi-i se: “Nɩɩ ma-adɩma, mamakɩ kubusi nɛ ñɔ-cɔlɔ kiŋ lɛ.” Ɛsɔ cosi ɛ-adɩma ana a-yɔɔ? Ɛɛɛ mbʋ pʋyɔɔ yɔ Daviid yɔɔdɩ pʋwayɩ se: “Ɛsɩnɩ-m nɛ pɩlabɩ-m leleŋ.”​—Keɣa 27:2, 7.

ƐSƆ ÐƲ YESU TƲMƖYƐ SE ƐHƐZƖ ƐYAA LAŊA

Ɛsɔ ɖʋwa se Yesu ɛla tʋmɩyɛ sɔsɔɖɛ naɖɩyɛ laŋa hɛzʋʋ nʋmɔʋ taa. Tʋma wena Ɛsɔ ɖʋ Yesu yɔ, a-taa naɖɩyɛ lɛ se ɛɖʋ “kɔyɛ laŋa taa kɩjɩkpɩŋ” taa nɛ ɛhɛzɩ “mba pewiɣ yɔ pe-kpeekpe pa-laŋa.” (Izaayii 61:1, 2) Ɛzɩ natʋ tɔm kaayɔɔdʋʋ yɔ, ‘mba palakɩ kʋñɔŋ nɛ pɩnɩɣ-wɛ yɔ,’ Yesu kaacɔnɩ pe-ɖeɖe camɩyɛ nɛ ɛhɛzɩ pa-laŋa.​—Maatiyee 11:28-30.

Yesu tɩŋnɩ sɔɔlɩm nɛ lɔŋ kɩbaŋ weyi ɛtasaɣ ɛyaa yɔ ɩ-yɔɔ nɛ ɛhɛzɩ pa-laŋa, nɛ halɩ nabʋyʋ taa ɛwaɣaɣ pa-kʋdɔmɩŋ ɖɔɖɔ. Evemiye naɖɩyɛ canaɣ nakɛyɛ tendi Yesu se: “Ye ŋsɔɔlaa kɔyɔ, ŋpɩzɩɣ ŋla nɛ mɔ-yɔɔ cɛ.” Peeɖe pɩlabɩ Yesu pʋtɔdɩyɛ nɛ ecosi-kɛ se: “Mɔnsɔɔlaa, ñɔ-yɔɔ ɛcɛ.” (Maarkɩ 1:40, 41) Nɛ canaɣ ŋga, kɔ-yɔɔ cɛ ɖɔɖɔ.

Sɔnɔ, Ɛsɔ Pɩyalʋ fɛyɩ tɛtʋ yɔɔ se ɛhɛzɩ paa weyi lɛ ɛ-laŋɩyɛ. Ɛlɛ ɛ-Caa Yehowa weyi “ɛnaɣ ɖa-pʋtɔdɩyɛ nɛ ɛhɛzɩɣ ɖa-laŋa pɩtɩŋa pɩ-taa yɔ,” eɖiɣni hɛzʋʋ ɛyaa laŋa pa-kʋñɔmɩŋ taa. (2 Kɔrɛntɩ 1:3; ABT) Iyele nɛ ɖɩtazɩ nʋmɔŋ sɔsɔŋ naanza weyi ɩ-yɔɔ Ɛsɔ tɩŋɩɣna nɛ ɛhɛzɩɣ ɛyaa laŋa yɔ, ɩ-taa.

• Bibl. “Tɔm ndʋ pama-tʋ lɔndaa yɔ, pama-tʋ ti-kpeekpe se pawɩlɩ-ɖʋ tʋ nɛ ɖihiɣ abalɩtʋ nɛ laŋhɛzɩyɛ, nɖɩ Takayaɣ Kiɖeɖeɣa haɣ yɔ, nɛ ɖɩwɛɛnɩ lidaʋ.”​—Roma 15:4.

• Ɛsɔ fezuu kiɖeɖeu. Yesu sɩba nɛ pɩla pazɩ lɛ, Krɩstʋ ɛgbɛyɛ kpeekpe sʋʋ laŋhɛzɩyɛ alɩwaatʋ natʋyʋ taa. Ɛbɛ yɔɔ? Mbʋ pʋyɔɔ yɔ agbaa wena aawɛ alɩwaatʋ ndʋ tɩ-taa yɔ, “awɛɛ apaɣlɩɣ nɛ añaŋ [Yehowa] nɛ fezuu kiɖeɖeu hɛzɩɣ a-laŋɩyɛ.” (Tʋma Labʋ 9:31) Fezuu kiɖeɖeu kɛnɩ ɖoŋ weyi Ɛsɔ lakɩnɩ tʋmɩyɛ yɔ nɛ ɖoŋ ɛnɩ ɛ-wayɩ fɛyɩ. Ɛsɔ pɩzɩɣ nɛ ɛtɩŋnɩ ɖoŋ ɛnɩ ɛ-yɔɔ nɛ ɛhɛzɩ paa weyi ɛ-laŋɩyɛ paa kʋñɔŋ ŋgʋ kɩ-taa.

• Adɩma. Bibl tasɩɣ-ɖʋ lɔŋ se: “Ɩtaalɛyɩ natʋyʋ; paa kɛdɛɖaɣ ŋga taa, ɩɖɔkɩ adɩma, sɛtʋ ɛsʋʋ-mɩ nɛ iheyi Ɛsɔ mbʋ ɩtɛɖɩɣ yɔ. Nɛ Ɛsɔ tɛ laŋhɛzɩyɛ nɖɩ ɖɩkpaɖɩ lɔŋ kpeekpe yɔ, ɖɩɖɔkɩ mɩ-laŋa nɛ mɩ-maɣzɩm.”—Filiipu 4:6, 7.

• Ðo-koobiya Krɩstʋ mba pɩzɩɣ pɛkɛnɩ-ɖʋ taabalaa kɩbama mba pɛhɛzɩɣ ɖa-laŋa kaɖɛ alɩwaatʋ taa yɔ. Apostoloo Pɔɔlɩ yɔɔdaɣ e-koobiya Krɩstʋ mba tɔm lɛ, ɛtɔma se: “Pɛkɛ-m laŋhɛzɩyɛ” “kʋñɔmɩŋ kpeekpe taa.”​—Koloosi 4:11; 1 Tesalooniiki 3:7.

Ɛlɛ pɩtɩla ŋpɔzʋʋ ña-tɩ se toovenim taa lɛ, ɛzɩma Ɛsɔ pɩzɩɣ nɛ ɛtɩŋnɩ nʋmɔŋ ɛnɛ ɩ-yɔɔ nɛ ɛhɛzɩ ña-laŋɩyɛ? Ɛyaa mba ɖɩɩtɛm yɔɔdʋʋ pɔ-tɔm se pasʋ kʋñɔmɩŋ ndɩ ndɩ taa yɔ, yele nɛ ɖɩna ɛzɩma Ɛsɔ hɛzɩ pa-laŋa yɔ. Ɛzɩ ɛyaa mba yɔ, ŋkaɣ naʋ se Ɛsɔ ɖiɣni ɖɔm ɛ-tɔm kɩbandʋ tʋnɛ tɩ-yɔɔ: “Ɛzɩ ɖoyo hɛzʋʋ ɛ-pɩɣa laŋɩyɛ yɔ, mbʋ ɖɔɖɔ mankaɣ mɩ-laŋa hɛzʋʋ.”​—Izaayii 66:13.

ALƖWAATƲ NDƲ ŊLESIƔ ÑA-TƲMƖYƐ YƆ

Setha yɔɔdaa se: “Ma nɛ ma-halʋ ɖilesi ɖa-tʋma alɩwaatʋ kʋyʋmtʋ taa. Pɩnzɩ naalɛ nzɩ sɩtɩŋ pʋwayɩ yɔ sɩ-taa lɛ, ɖɩñakaɣ pana nɛ ɖihikiɣ nesi tɛɛ tʋma cikpena naayɛ wiɖii wiɖii nɛ ɖɩlakɩ, nɛ ɖɔ-hɔʋ taa ñɩma nabɛyɛ ɖʋwaɣ-ɖʋ nesi ɖɔɖɔ. Wɛtʋ ndʋ tiyeba nɛ ma-halʋ Priscilla ɛza paɣzɩ ñɩŋʋʋ nɛ ma lɛ, pitibi-m yɔɔɔ.

Ɛbɛ sɩnɩ-wɛ kaɖɛ nɖɩ ɖɩ-taa? Paa ɛzɩmtaa lɛ, Priscilla ñakaɣ pana nɛ ɛtɔzʋʋ Yesu tɔm ndʋ tɩwɛ Maatiyee 6:34 taa yɔ, tɩ-yɔɔ. Yesu yɔɔdɩ peeɖe se pɩtɩpɔzɩ se ɖɩnɩɣzɩ cee wayɩ yɔɔ mbʋ pʋyɔɔ yɔ, paa kɩyakʋ ŋgʋ lɛ, kɩ nɛ kɩ-nɩɣzɛ. Pɩtasɩ lɛ, adɩma wena ɛlakaɣ ɖoŋ ɖoŋ nɛ ɛ-laŋɩyɛ pilim yɔ, akpazɩ-ɩ ɖoŋ nɛ ɛpɩzɩ nɛ ɛɖɔkɩ ɛ-tɩ kaɖɛ nɖɩ ɖɩ-taa. Ma lɛ, tɔm ndʋ tɩwɛ Keɣa 54:23 taa yɔ, ndʋ hɛzɩnɩ ma-laŋɩyɛ. Ɛzɩ keɣa maɖʋ kaalabʋ yɔ, mansʋʋ Yehowa man-sʋʋtʋ nɛ mana se toovenim taa lɛ ɛsɩnɩ-m. Lɛɛlɛɛyɔ, mehiɣ tʋmɩyɛ kɩfaɖɛ, paa mbʋ yɔ, ɖiyeba nɛ ɖe-wezuu caɣʋ wɛɛ kɛlɛʋ ɛzɩ Yesu tasʋʋ-ɖʋ lɔŋ Maatiyee 6:20-22 taa yɔ. Mbʋ pɩkpaɖɩ pɩtɩŋa payɩ yɔ lɛ se ma nɛ ma-halʋ ɖa-taabalɩyɛ cɛyɩsɩ camɩyɛ nɛ ɖa-naalɛ ɖɩñɔtɩnɩ ɖɔɖɔ Ɛsɔ.

Jonathan yɔɔdaa se: “Sɔɔndʋ kaawɛɛ nɛ pɩkpaɣ-m nɛ cee wayɩ, mbʋ pʋyɔɔ yɔ liidiye paɣzɩ-ɖʋ tɛɖʋʋ tadɩyɛ cikpeɖe nɖɩ ɖɔ-hɔʋ lakaɣ yɔ ɖɩ-taa. Liidiye kʋñɔŋ ŋgʋ kɩɩkɔm ajɛɛ sakɩyɛ taa alɩwaatʋ ndʋ tɩ-taa yɔ, kiyeba nɛ tʋmɩyɛ sɔsɔyɛ nɖɩ ɖɩlabɩ pɩnzɩ 20 taa yɔ, ɖɩɖʋ lɩm. Peeɖe nɔɔhɔnɖɛ paɣzɩ kɔm ma nɛ ma-halʋ ɖɛ-hɛkʋ taa pɩlɩɩnɩ liidiye yɔɔ. Ðɩtaapɩzɩɣ ɖɔɖɔ se ɖɩya wondu kɩmɩyɛ mbʋ pʋyɔɔ yɔ, faɣlɛɛ ñʋndɩnaa maɣzaɣ se pɩtɩla yɔ, ɖɩɩkaɣ pɩzʋʋ nɛ ɖɩhɛyɩ.

“Ɛlɛ Ɛsɔtɔm nɛ e-fezuu pasɩnɩ-ɖʋ nɛ ɖɩkpaɣ lɩmaɣza kɩbana. Wɛtʋ ndʋ, tɩkpɛlɩkɩ-m se pɩwɛɛ se mentisi nɛ mala paa tʋmɩyɛ nɖɩ, nɛ tɩkpɛlɩkɩ-ɖʋ ɖɔɖɔ se pɩmʋnaa se ɖɩyakɩ mbʋ pɩ-tɔm kɩlɩ cɛyʋʋ yɔ, pi-ɖeke. Ðɩkɛ Yehowa Aseɣɖe Tɩnaa, nɛ ɖɛ-ɛgbɛyɛ taa koobiya lalaa sɩnɩ-ɖʋ ɖɔɖɔ. Pakpazaɣ-ɖʋ ɖoŋ nɛ paɖʋʋ-ɖʋ nesi alɩwaatʋ ndʋ pɩsaɣaɣ-ɖʋ miŋ siŋŋ yɔ.”

ALƖWAATƲ NDƲ HALƲ NƐ Ɛ-WALƲ PE-NESI ÐƆKƲƲ CƐKƖ YƆ

Raquel yɔɔdaa se: “Alɩwaatʋ ndʋ ma-walʋ ɖɛwa nɛ eyebi-m yɔ, mamʋ pana siŋŋ.” Piyeba nɛ mansʋʋ kʋñɔŋ sɔsɔʋ nakʋyʋ taa. Ɛlɛ mɔñɔtɩnɩ Ɛsɔ nɛ ɛhɛzɩ man-laŋɩyɛ. Paa evemiye nɖɩ mantɩmɩɣnɩ laŋhɛzɩyɛ tɛ Ɛsɔ lɛ, pɩhɛzɩɣ ma-laŋɩyɛ siŋŋ. Pɩɩlakaɣ-m ɛzɩ ɛwɛɛ nɛ ɛwaɣ ma-laŋɩyɛ nɖɩ ɖɩmʋ heŋ yɔ.

“Nɛ pɩtɩŋnɩ Bibl yɔɔ lɛ, manpɩzaa nɛ malʋbɩnɩ pana mʋʋ nɛ ma-walʋ caɣnʋʋ. Mankpaɣ tɔm ndʋ apostoloo Pɔɔlɩ yɔɔdɩ Roma 12:21 taa yɔ nɛ malabɩnɩ tʋmɩyɛ: ‘Taayele ña-tɩ nɛ kɩdɛkɛdɩm wabɩ-ŋ, ɛlɛ wa kɩdɛkɛdɩm nɛ kɩbandʋ labʋ.’”

“Nɛ taabalʋ kɩbanʋ nɔɔyʋ sɩnɩ-m nɛ manɩɩ pɩ-taa se pɩcɛyaa se mɔnɖɔkɩ man-tɩ nɛ mantaayele nɛ pitibi-m yɔɔɔ. Ɛhɔm ma-lɩmaɣza nɛ nɔɔ kɩbaŋa nɛ ewoni Eklesɩyastɩ 3:6 yɔɔ nɛ eheyi-m se alɩwaatʋ natʋyʋ taa ɛyʋ lesiɣ mbʋ ɛsɔɔlaa yɔ. Pɩɩwɛ kaɖɛ se mamʋ lɔŋ tasʋʋ mbʋ, ɛlɛ lɔŋ tasʋʋ mbʋ ɖeyi ɖeyi pɩɩpɔzɩ-m. Piyeba nɛ ma-lɩmaɣza tɩtasɩ wɛʋ kʋñɔŋ ŋgʋ kɩ-yɔɔ.”

Elizabeth yɔɔdaa se: “Ye ña nɛ ña-walʋ yaa ña-halʋ mi-nesi ɖɔkʋʋ ɛcɛba yɔ, pɩkɛnɩ kaɖɛ alɩwaatʋ ndʋ tɩ-taa pɩcɛyaa se lalaa ɩɖʋʋ-ŋ nesi yɔ. Maawɛnɩ taabalʋ kɩbanʋ weyi ɛkpazaɣ-m ɖoŋ paa evemiye nɖɩ yɔ. Ɛnɩɣaɣ ma-wɩzasɩ nɛ halɩ ewiliɣ nɛ ɛhɛzɩɣ ma-laŋɩyɛ nɛ ɛwɩlɩɣ se ɛsɔɔlɩ-m siŋŋ. Piyeba nɛ pɩtɩtasɩ-m labʋ ɛzɩ mɛwɛ men-ɖeke yɔ. Pɩtʋʋ fɛyɩ se Yehowa tɩŋnɩ ɛ-yɔɔ nɛ ɛwaa ma-laŋɩyɛ taa heŋ.”

KƲDƆŊ NƐ AKPADƖYƖTƲ ALƖWAATƲ TAA

Luis weyi ɛ-tɔm ɖɩɩyɔɔdɩ takayaɣ kanɛ ka-kajalaɣ ñʋʋ taa yɔ, ɛɛwɛnɩ laŋɩyɛ kʋdɔŋ nɛ halɩ ecoɖi sɩm tam nabʋlɛ. Paa evemiye nɖɩ lɛ, paɖʋʋ-ɩ helim mbʋ payaɣ se oxygène yɔ ñɩɣtʋ 16. Ɛtɔm se: “Mantɩmɩɣnɩ Yehowa paa ɛzɩmtaa. Nɛ mantɩmɩɣ nɛ pɩtɛ lɛ, Yehowa tɩŋɩɣnɩ e-fezuu kiɖeɖeu yɔɔ nɛ ɛkpazɩɣ-m ɖoŋ. Mɛwɛnɩ tisuu ɛ-yɔɔ nɛ manawa se ɛmaɣzɩɣ mɔ-yɔɔ nɛ ɛsɩɣnɩ-m, mbʋ yebina nɛ alɩwaatʋ ndʋ mantɩmɩɣnɩ-ɩ yɔ, mehikiɣ abalɩtʋ.”

Petra wɛnɩ pɩnzɩ 80 mbʋ yɔ; ɛyɔɔdaa se: “Mɔnsɔɔlaa se mala tʋma sakɩyɛ, ɛlɛ maapɩzɩɣ. Pɩcɛyɩɣ-m kpem se mon-ɖoŋ wɛɛ nɛ ɛtɛŋ. Mantɩtasɩ ɖoŋ wɛʋ nɛ pɩɩwɛɛ se mankpakɩɣ kɔ nɛ pɩsɩnɩ-m. Pɩtɔzʋʋ-m alɩwaatʋ ndʋ Yesu kaatɩmnɩ ɛ-Caa se ye pɩsaŋ yɔ, eyele nɛ kaɖɛ nɖɩ ɖɩcaɣaɣ ɛ-yɔɔ kɔm yɔ, ɖɩtaakɔɔ yɔ tɩ-yɔɔ. Ɛlɛ Yehowa kaakpazɩ Yesu ɖoŋ nɛ mbʋ ɖɔɖɔ ɛwɛɛ ɛkpazɩɣ-m ɖoŋ sɔnɔ. Adɩma kɛnɩnɩ kɔyɛ nɖɩ mankpakɩɣ paa evemiye nɖɩ yɔ. Mɔyɔɔdʋʋnɩ Ɛsɔ adɩma taa nɛ pɩtɛ lɛ, ma-wɩzasɩ pasɩɣ siŋŋ.”​—Maatiyee 26:39.

Mbʋ ɖɔɖɔ pɩwɛɛ pɩlakɩ Julian weyi ɛwɛɛ ɛlʋkɩnɩ sclérose kʋdɔmɩŋ pɩnzɩ 30 yɔ. Ɛyɔɔdaa se: “Lɛɛlɛɛyɔ paa pɔbɔla kpelaɣ taa mɛwɛɛ yɔ, manɩɣ leleŋ me-wezuu caɣʋ taa mbʋ pʋyɔɔ yɔ, mankpakɩɣ ma-alɩwaatʋ nɛ mansɩɣnɩ ɛyaa lalaa. Haʋ pɩzɩɣ piyele nɛ ɛyʋ wɩzasɩ pasɩ, nɛ Yehowa wɛɛ ɛɖɔŋ ɛ-tɔm ndʋ ɛɛyɔɔdaa se ɛkpazɩɣ-ɖʋ ɖoŋ kaɖɛ alɩwaatʋ taa yɔ, tɩ-yɔɔ. Ɛzɩ apostoloo Pɔɔlɩ yɔ, manpɩzɩɣ mɔyɔɔdɩ se: ‘Manpɩzɩɣ pɩtɩŋa payɩ, weyi ɛsɔzʋʋ-m ɖoŋ yɔ ɛ-yɔɔ.’”​—Filiipu 4:13.

ALƖWAATƲ NDƲ ÐƐ-ƐYƲ KƲSƆƆLƲ NƆƆYƲ SƖKƖ YƆ

Antonio weyi elesi ɛ-caa yɔ, ɛtɔm se: “Alɩwaatʋ ndʋ man-caa lesi e-wezuu kɛgbɛdɩsaɣ nakɛyɛ taa yɔ, kajalaɣ taa lɛ pɩlakaɣ-m ɛzɩ pɩtɩkɛ toovenim yɔ.” Pɩɩpɩzɩɣ nɛ pimuli-i mbʋ: Ɛbɛ ɛlaba nɛ pɩwɛɛ se lɔɔɖɩyɛ ɛmabɩ-ɩ habɩyɛ kpɛŋa yɔɔ peeɖe? Ɛlɛ mantaapɩzɩɣ se mala nabʋyʋ. Efiɣnaa nɛ pɩla kɩyakɩŋ kagbanzɩ lɛ ɛsɩ. Mɔnɖɔkaɣ man-tɩ mon-ɖoo ɛzɩdaa, ɛlɛ mɔnkɔŋ mɛwɛ men-ɖeke lɛ, manpaɣzɩ wiu nɛ mɔnpɔzʋʋ man-tɩ se: ‘Ɛbɛ yɔɔ? Ɛzɩ ɛbɛ yɔɔ kpem?’

“Kaɖɛ alɩwaatʋ ndʋ tɩ-taa, maawɛɛ mɔnpɔzʋʋ Yehowa tam se ɛsɩnɩ-m nɛ manpɩzɩ mɔnɖɔkɩ man-tɩ nɛ ɛha-m ɖɔɖɔ laŋhɛzɩyɛ. Pɩsɩnɩ-m nɛ ma-lɩmaɣza paɣzɩ hɛʋ pazɩ pazɩ. Mɔntɔzaa ɖɔɖɔ se Bibl yɔɔdaa se kaɖɛ nɖɩ ɛyʋ tɩɖʋna yɔ, ɖɩpɩzɩɣ nɛ ɖɩkɔɔ ɖa-taa paa anɩ ɛ-yɔɔ. Maapɩtɩɣ kaaʋ se sɩɖaa fezuu alɩwaatʋ talɩɣ lɛ, mankaɣ ɖaɣnʋʋ naʋ man-caa, mbʋ pʋyɔɔ yɔ Ɛsɔ ɛɛcɛtɩɣ.”—Eklesɩyastɩ 9:11; Yohanɛɛsɩ 11:25; Tiiti 1:2.

Robert weyi ɖɩyɔɔdɩ ɛ-tɔm takayaɣ kanɛ ka-kajalaɣ ñʋʋ taa yɔ, ɛwɛnɩ ɖɔɖɔ lɩmaɣza ana. Ɛyɔɔdaa se: “Ma nɛ ma-halʋ Maribel ɖɩkɔm ɖɩwɛɛnɩ lɩmaɣza taa laŋhɛzɩyɛ nɖɩ ɖɩ-tɔm pɔyɔɔdɩ Filiipu 4:6, 7 taa yɔ. Yehowa tɩmnʋʋ sɩnɩnɩ-ɖʋ nɛ ɖɩwɛɛnɩ laŋhɛzɩyɛ nɖɩ. Laŋhɛzɩyɛ nɖɩ, ɖɩsɩnɩ-ɖʋ nɛ ɖɩpɩzɩ ɖiheyi tɔm kɛdɩyaa sɩɖaa fezuu lidaʋ ŋgʋ ɖɩwɛɛna yɔ, kɩ-tɔm. Paa ɛsɔdaa lɔɔɖɩyɛ kɛgbɛdɩsaɣ ŋga kalɩzɩ ɖa-pɩyalʋ wezuu yɔ, ɖɩñakɩ pana se ɖa-lɩmaɣza ɩwɛɛ alɩwaatʋ kɩbandʋ ndʋ ɖa nɛ ɩ ɖɩkaɣ wɛʋ yɔ, tɩ-yɔɔ.

“Ðo-koobiya Yehowa aseɣɖe Tɩnaa nabɛyɛ heyi-ɖʋ se pana-ɖʋ teelee yɔɔ, ɖɩwɛɛ nɛ ɖɩyɔɔdʋʋ ɖe-tisuu tɔm nɛ abalɩtʋ lɛ, ɖicosi-wɛ se ɖɩɩpɩtɩɣ kaaʋ se adɩma sakɩyɛ wena palabɩ ɖɔ-yɔɔ yɔ, ana hanɩ-ɖʋ ɖoŋ. Toovenim lɛ Yehowa kaatɩŋnɩ laŋɩyɛ hɛzʋʋ tɔm ndʋ ɖo-koobiya maɣaɣ-ɖʋ yɔ, tɩ-yɔɔ nɛ ɛhɛzɩɣ ɖa-laŋa.”

Ɛzɩ kɩɖaŋ ndɩ ndɩ ɛnɛ ɩwɩlʋʋ yɔ, Ɛsɔ pɩzɩɣ nɛ ɛhɛzɩ ɖa-laŋa paa kʋñɔŋ ŋgʋ lɛ kɩ-taa! Paa kaɖɛ nɖɩ taa ŋwɛɛ yɔ, tɩlɩ se ŋpɩzɩɣ ŋtɩŋnɩ nʋmɔʋ nakʋyʋ yɔɔ nɛ ŋhiɣ laŋɩyɛ hɛzʋʋ.b Ye mbʋ pɩsɩnɩ Yehowa yɔɔ nɛ ŋhiɣ laŋɩyɛ hɛzʋʋ kaɖɛ alɩwaatʋ taa. Ɛkɛ Ɛsɔ weyi “ɛhɛzɩɣ ɖa-laŋa pɩtɩŋa pɩ-taa yɔ.”​—2 Kɔrɛntɩ 1:3; ABT.