Kewiyaɣ paɣtʋ​—Ɛsɔ siɣsiɣ wɛtʋ ñɩnʋʋ

KƖYAKƲ nakʋyʋ ŋlɩwa nɛ ŋɖɛɣ lɛ, ŋkpazɩ ñɔ-cɔlɔ tʋ nɔɔyʋ nesi nɛ ŋsɛɛ-ɩ. Pʋwayɩ lɛ, ŋna se pɩtɩkɛ kajalaɣ ɖeɖe yɔ ɛwɛʋ nɛ ɛcɔŋnɩ ña nɛ ñɔ-hɔʋ yɔ. Peeɖe ɛkpazɩ nesi ɖɔɖɔ nɛ ɛsɛ-ŋ nɛ ɛya-ŋ se ŋwolo. Ŋtalaa lɛ, ɛpɩsɩna se: “Manpɩzɩɣ nɛ mɔnpɔzɩ-ŋ tɔm natʋyʋ? Ɛbɛ sɩnɩ-mɩ nɛ ɩwɛɛ ndɩ kpem nɛ ɛyaa lalaa mbʋ?” Peeɖe ñɔpɔzɩ-ɩ se: “Suwe ŋcaɣ yɔɔdʋʋ?” Ekitina se: “Pɩcaɣ ɩkɛ Yehowa Aseɣɖe Tɩnaa na? Ɩfɛyɩ ɛzɩ ɛyaa lalaa yɔ. Mɩ nɛ coocinaa lalaa ɩɩkpɛndɩɣ, ɩɩtɔkɩ kazandʋ nɛ ɩɩɖʋʋ mɩ-nɔɔ politiki nɛ yoŋ taa ɖɔɖɔ. Mɩ-taa nɔɔyʋ ɛɛñɔʋ sɩgaa. Nɛ pɩnaɣ se mɩ-hɔʋ wɛnɩ wezuu caɣʋ kɩbaŋʋ. Ɛbɛ sɩɣnɩ-mɩ nɛ ɩwɛɣ ndɩ hɔɔlɩŋ sakɩyɛ taa mbʋ?”

Ða-tɩŋa ɖɩnawa se tɔm tʋnɛ tɩ-yɔɔ cosuu fɛyɩ kaɖɛ. Ndʋ yɔ: Ðiluzuu ɖa-tɩ Ɛsɔ Kewiyaɣ tɛɛ, pʋyɔɔ ɖɩwɛ ndɩ mbʋ. Wiyaʋ Yesu wɛɛ nɛ ɛñɔɔzʋʋ-ɖʋ tam. Ɛwɛɛ ɛsɩɣnɩ-ɖʋ se ɖɩɖɔ ɛ-nɩŋgbanzɩ taa nɛ pɩsɩnɩ-ɖʋ nɛ ɖɩwɛɛ ndɩ nɛ ɛjaɖɛ kɩdɛkɛdɩyɛ ɖɩnɛ. Hɔɔlʋʋ kʋnɛ kɩ-taa, ɖɩkaɣ naʋ ɛzɩma Mesiya Kewiyaɣ wɛɛ nɛ kɔñɔɔzʋʋ Ɛsɔ samaɣ fezuu taa, wezuu kɩbaŋʋ caɣʋ nʋmɔʋ taa nɛ ɛgbɛyɛ taa ɖʋtʋ nʋmɔʋ taa nɛ pɩɖʋʋ Yehowa hɩɖɛ yɔ.