Ðɩwɛɛ niye tɔm susuu taa nɛ pɩkɩlɩ​—Yele Bibl kpɛlɩkɩyʋ weyi ɛɛɖɛɣnɩ ɛsɩndaa yɔ kpɛlɩkɩnʋʋ

ƐBƐ YƆƆ PƖCƐYAA? Pɩpɔzʋʋ se ɛyaa ɩyaa Yehowa hɩɖɛ nɛ pehiɣ ñʋʋ yabʋ. (Rom 10:13, 14) Ɛlɛ pɩtɩkɛ ɛyaa mba payɩ petisiɣ nɛ pɛkpɛlɩkɩɣ Bibl yɔ pa-tɩŋa pɔsɔɔlɩna se pɔɖɔ Yehowa paɣtʋ yɔɔ. Ðɩlakɩnɩ ɖa-alɩwaatʋ tʋmɩyɛ camɩyɛ tɔm susuu taa nɛ ɖɩsɩɣnɩ ɛyaa mba pɔsɔɔlɩ toovenim taa se pala lɛɣzɩtʋ nɛ pɔ-tɔm kɛdɩnɩ Yehowa yɔ. Ye ɖɩpaɣzɩ Bibl kpɛlɩkɩnʋʋ ɛyʋ nɔɔyʋ, pɩla alɩwaatʋ cabɩ, ɛlɛ ɛɛɖɛɣnɩ ɛsɩndaa yɔ, ɖiyeki-i nɛ ɖɩñɩnɩ ɛyaa mba Yehowa hɔŋ se ɛkɔnɩ ɛ-ɛgbɛyɛ taa. (Yoh 6:44) Ɛlɛ ye pʋwayɩ ɛyʋ ɛnʋ ɛlɛɣzɩ wɛtʋ nɛ ɛwɩlɩ se ‘ɛwɛnɩ laŋɩyɛ kɩbanɖɛ se ehiɣ wezuu maatɛŋ’ yɔ, pɩlakɩ-ɖʋ leleŋ se ɖɩpɩsɩ nɛ ɖa nɛ ɩ ɖɩɖaɣnɩ paɣzʋʋ kpɛlɩkʋʋ.​—Tʋm 13:48.

ƐZƖMA PƖWƐƐ SE ÐƖLA?

• Sa Bibl kpɛlɩkɩyʋ ɛzɩma ɛsɔɔlaa se ɛwɛɛnɩ toovenim sɩmtʋ yɔ pɩ-yɔɔ.​—1Ti 2:4

• Wɩlɩ-ɩ mbʋ pʋyɔɔ ndʋ ɛkpɛlɩkɩɣ yɔ tɩ-yɔɔ ɖɔm tɔm cɛyaa yɔ.​—Lk 6:46-49

• Ña nɛ ɩ ɩtazɩ ɖomaɣ ɖuyu eduuye nɖɩ ɖɩ-tɔm Yesu yɔɔdaa yɔ ɖɩ-taa, nɛ ŋsɩnɩ-ɩ nɛ ɛmaɣzɩ nɛ ɛna mbʋ piyeba nɛ ɛɛɖɛɣnɩ ɛsɩndaa yɔ.​—Mt 13:18-23

• Lɩzɩ-ɩ mbʋ pʋyɔɔ ŋsɔɔlaa se ŋyebi-i kpɛlɩkɩnʋʋ yɔ pɩ-taa nɛ sɔɔlɩm

• Yele nɛ ɛna se pʋwayɩ ŋkaɣ pɩsʋʋ wiɖii wiɖii nɛ ŋkpazɩɣ-ɩ ɖoŋ nɛ ye ɛlabɩ lɛɣzɩtʋ yɔ ɩpɩzɩɣ nɛ ɩɖaɣnɩ paɣzʋʋ kpɛlɩkʋʋ

CƆNƖ VIDEO, NƐ PƲWAYƖ LƐ ŊCOSI TƆM TƲNƐ TƖ-YƆƆ:

• Ɛbɛ wɩlɩɣ kɛdaɣ kanɛ ka-taa se Bibl kpɛlɩkɩyʋ taaɖɛɣnɩ ɛsɩndaa fezuu taa?

• Ɛzɩma tɔm susuyu sɩnɩ Bibl kpɛlɩkɩyʋ nɛ ɛnɩɩ pɩ-taa se pɩcɛyaa se ɛla lɛɣzɩtʋ?

• Ɛzɩma tɔm susuyu laba nɛ Bibl kpɛlɩkɩyʋ na se ye ɛlabɩ lɛɣzɩtʋ yɔ paɖaɣnɩɣ paɣzʋʋ kpɛlɩkʋʋ?