Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2024 Watch Tower Bible and Tract Society of Pennsylvania
6-12 MAI
ÑƖM MBƲ PƖWƐ ƐSƆTƆM TAA YƆ KEƔSI 36-37
«Ña-taa ɛtaawɩɩ ɛyaa kɩdɛkɛdaa yɔɔ»
Ɛsɔ Kewiyaɣ kɔŋ lɛ, ɛbɛ ɛɛkaɣ tasʋʋ wɛʋ?
4 Ɛzɩma ɛyaa kɩdɛkɛdaa ɖʋʋ-ɖʋ wɩzasɩ sɔnɔ? Apostoloo Pɔɔlɩ yɔɔdaa se ɖa-alɩwaatʋ taa «alɩwaatʋ kaɖɛ ñɩndʋ kaɣ wɛʋ nɛ tɩ-lʋbɩnʋʋ kaɣ wɛʋ kaɖɛ» nɛ pɩtɛ lɛ, ɛtasɩ yɔɔdʋʋ se: «Kañatʋ laɖaa nɛ cɛtɩyaa pakaɣ kpaʋ ɖoŋ tam kɩdɛkɛdɩm labʋ taa.» (2 Tim. 3:1-5, 13) Natʋ ndʋ tiɖiɣni labʋ sɔnɔ? Puuyaɣ tɩnaa, kañatʋ laɖaa nɛ ɛyaa kʋyaa ɖʋ ɖa-taa sakɩyɛ wɩzasɩ pɩdɩɩfɛyɩ. Kɩdɛkɛdaa mba, pa-taa nabɛyɛ lakasɩ naɣ kaɣlaa se sɩfɛyɩ ɖeu, ɛlɛ lalaa lɛ patɩŋɩɣnɩ mɛsaɣ tɛɛ nʋmɔŋ nɩɩyɩ yɔɔ nɛ paɖʋʋ lalaa wɩzasɩ. Paa ɖa-maɣmaɣ ɖɩtɩtɔlɩ pa-kpaca taa yɔ, alɩwaatʋ ndʋ ɖɩnɩɣ ɛzɩma paɖʋʋ wɩzasɩ lalaa yɔ, pɩɖʋʋ-ɖʋ wɩzasɩ ɖɔɖɔ. Alɩwaatʋ ndʋ ɖɩnaɣ ɛzɩma kɩdɛkɛdaa lakɩ kañatʋ piya, akpadɩyaa nɛ mba payɩ pɩpɔzʋʋ se pakandɩyɩ pɔ-yɔɔ yɔ, pɩhaɣ-ɖʋ laŋwɛɛkɩyɛ siŋŋ. Kɩdɛkɛdaa mba pa-lakasɩ wɛ ɛzɩ kpɩna yɔ, nɛ halɩ nabʋyʋ taa sɩnɩɣzɩnɩ feziŋ kɩdɛkɛdɩŋ lakasɩ. (Yak. 3:15) Paa mbʋ yɔ, ɖa-taa wɛ leleŋ se Yehowa tɩŋɩɣnɩ ɛ-tɔm kɩbandʋ yɔɔ nɛ ɛhɛzɩɣ ɖa-laŋa.
Yehowa wazɩɣ ɛyaa mba pekpeɣu lalaa yɔ
10 Ye ɖɩcakɩnɩ lalaa yɔ, pɩkɔŋnɩ ɖa-maɣmaɣ kaɖɛ. Ɛyaa caɣnʋʋ wɛ ɛzɩ sʋʋtʋ sɔsɔtʋ natʋyʋ yɔ, nɛ Yehowa sɔɔlaa se ɖikizi ɛyaa caɣnʋʋ nɛ ɖihiɣ laŋhɛzɩyɛ. (Kalɩ Efɛɛzɩ mba 4:31, 32.) Ɛtasɩɣ ɖa-taa paa weyi lɔŋ ɛnɛ: «Yele pana nɛ ŋlɔ hɔpɩsɩyɛ.» (Keɣ. 37:8) Ye ɖɩɖɔŋ lɔŋ tasʋʋ mbʋ pɩ-yɔɔ yɔ, pɩsɩɣnɩ-ɖʋ. Ye ɖɩcakɩnɩ lalaa yɔ, pɩpɩzɩɣ nɛ pɩkɔnɩ-ɖʋ kaɖɛ tomnaɣ taa nɛ maɣzɩm taa. (Adu. 14:30) Ye ɖɩñɔ sɔtʋ yɔ, pɩɩkɔŋnɩ ɛyʋ lɛlʋ kaɖɛ; mbʋ ɖɔɖɔ alɩwaatʋ ndʋ ɖɩcakɩnɩ ɛyʋ lɛlʋ yɔ, pɩɩkɔŋnɩ ɛlɛ kaɖɛ. Ɛlɛ, alɩwaatʋ ndʋ ɖikpeɣu lalaa yɔ, ɖɩwɛɛ nɛ ɖɩlakɩ ɖa-tɩ kʋjɔʋ. (Adu. 11:17) Ðihikiɣ maɣzɩm taa nɛ laŋɩyɛ taa laŋhɛzɩyɛ, nɛ ɖɩkaɣ wobu pɩ-yɔɔ nɛ ɖɩlakɩ Yehowa tʋmɩyɛ.
w03 1/12 13 § 20
«Yehowa yɔɔ lɛ, nɩɩ leleŋ sɔsɔŋ»
20 Ðɩnɛ ɛlɛ, «tɛtʋ kaɣ pɩsʋʋ hɛɛɛ tɩnaa ñɩm.» (Keɣa 37:11a) Mba «hɛɛɛ tɩnaa» mba pɛkɛnaa? Tɔm piye nɖɩ pɛɖɛzaa se «hɛɛɛ tɩnaa» yɔ, kiɖe tɛɛ lɛ ɖɩ-tɔbʋʋ lɛ se «mba pawɩlɩɣ-wɛ ñaŋ, mba poluzuu pa-tɩ yɔ, mba paɖʋʋ-wɛ fɛyɛ yɔ.» Ye mbʋ, «hɛɛɛ tɩnaa» kɛnɩnɩ mba poluzuu pa-tɩ nɛ paɖaŋɩɣ Yehowa se ɛcɔnɩ mulum lakasɩ nzɩ palakɩ-wɛ yɔ si-ɖeɖe yɔ. «Pa-taa kaɣ labʋ leleŋ siŋŋ, mbʋ pʋyɔɔ yɔ laŋhɛzɩyɛ tɔyʋʋ.» (Keɣa 37:11b) Halɩ alɩwaatʋ tʋnɛ tɩ-taa ɖihikiɣ laŋhɛzɩyɛ siŋŋ fezuu taa paradisuu ŋgʋ kɩwɛ toovenim Krɩstʋ ɛgbɛyɛ taa yɔ kɩ-taa.
Fezuu taa ñɩm
it-2441 § 7
Pʋʋ
Mbʋ pɩkama, pɩwɛ tam, yaa pɩkʋyaa yɔ. Paayɔɔdʋʋ pʋŋ tɔm lɛ, pɔyɔɔdʋʋ se ɩkam camɩyɛ nɛ ɩwɛ tam. (Iza 54:10; Hab 3:6; Kpaɣ-tʋ nɛ ŋmaɣzɩnɩ Ke 46:2.) Pʋyɔɔ lɛ, alɩwaatʋ ndʋ keɣa maɖʋ yɔɔdaɣ se Yehowa siɣsiɣ wɛtʋ wɛ ɛzɩ «Ɛsɔ pʋŋ yɔ,» pɩtɩla yɔ ɛñɩnaɣ yɔɔdʋʋ se Yehowa siɣsiɣ wɛtʋ ɛɛlɛɣzɩɣ. (Ke 36:6; pɩ-tɛɛ tɔm.) Yaa alɩwaatʋ ndʋ ɛyɔɔdaɣ ɛzɩma pʋŋ kʋyaa yɔ pɩ-tɔm yɔ, pɩtɩla yɔ ɛñɩnaɣ ɛyɔɔdɩ se Yehowa siɣsiɣ wɛtʋ kpaɖɩ ɛyaa siɣsiɣ wɛtʋ. (Kpaɣ-tʋ nɛ ŋmaɣzɩnɩ Iza 55:8, 9) Natʋ 16:20 yɔɔdʋʋ se alɩwaatʋ ndʋ papɩyɩ Ɛsɔ pana ñanaɣ lʋbɛ ñɩŋga yɔ «patɩna pʋŋ.» Pɩwɩlɩɣ se pɩtɩla yɔ halɩ wondu ndʋ tɩkʋyɩ ɛzɩ pʋŋ yɔ Ɛsɔ pana ɛɛkaɣ-tʋ fɛʋ.—Kpaɣ-tʋ nɛ ŋmaɣzɩnɩ Yer 4:23-26.
13-19 MAI
ÑƖM MBƲ PƖWƐ ƐSƆTƆM TAA YƆ KEƔSI 38-39
Taawɛɛ nɛ ŋkʋʋ ñɔ-tɔm kadadayaɣ
‘Ñɛ-ɛsa ɩcɔnɩ’ mbʋ pɩwɛnɩ ɛsɩndaa yɔ
12 Kalɩ 1 Yohanɛɛsɩ 3:19, 20. Nabʋyʋ taa, ɖɛ-ɛhʋyɛ cɛyɩɣ-ɖʋ. Mbʋ nabɛyɛ laba pʋcɔ nɛ patɩlɩ toovenim yɔ, piyeki nɛ pɛ-ɛhʋyɛ cɛyɩɣ-wɛ. Lalaa ɛhʋyɛ cɛyɩɣ-wɛ mbʋ pʋyɔɔ yɔ, palabɩ kɩwɛɛkɩm pa-lɩm mɩyɩsʋʋ wayɩ. (Roma 3:23) Toovenim taa lɛ, ɖɩsɔɔlaa se ɖɩla mbʋ pɩtʋʋzaa yɔ. Ɛlɛ, «pituuluu ɖa-tɩŋa tam sakɩyɛ.» (Yak. 3:2; Roma 7:21-23) Paa ɖɩtɩsɔɔlɩ se ɖɛ-ɛhʋyɛ ɛcɛyɩ-ɖʋ yɔ, nabʋyʋ taa pɩwɛ ɖeu se ɖɛ-ɛhʋyɛ ɛcɛyɩ-ɖʋ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ ɖɛ-ɛhʋyɛ cɛyɩɣ-ɖʋ yɔ, pɩpɩzɩɣ piyele nɛ ɖɩla lɛɣzɩtʋ ɖe-wezuu caɣʋ taa nɛ ɖɩtɛ ɖa-taa se ɖɩɩtasɩɣ kɩwɛɛkɩm kʋɖʋmʋm mbʋ labʋ.—Ebr. 12:12, 13.
13 Hɔɔlʋʋ lɛɛkʋ taa lɛ, ɖɛ-ɛhʋyɛ pɩzɩɣ nɛ ɖɩcɛyɩɣ-ɖʋ kadadayaɣ, pʋ-tɔbʋʋ se halɩ paa ɖikpiɖi kɩwɛɛkɩm mbʋ ɖɩlaba yɔ pɩ-yɔɔ nɛ Yehowa wɩlɩ se ekpeɣ-ɖʋ yɔ, ɖɛ-ɛhʋyɛ pɩzɩɣ nɛ ɖɩwɛɛ-ɖʋ cɛyʋʋ yɔɔ. Ye pɩtalɩ-ɖʋ mbʋ yɔ, pɩpɩzɩɣ nɛ pɩkɔnɩ-ɖʋ kaɖɛ. (Keɣ. 31:10; 38:3, 4) Ɛzɩma tɩyɛ? Yele nɛ ɖɩna koobu halɩñɩnʋ nɔɔyʋ kɩɖaʋ, ɛɛlabɩ kɩwɛɛkɩm nɛ pɩɖɛɛ nɛ ɛ-ɛhʋyɛ cɛyɩɣ-ɩ kadadayaɣ. Ɛyɔɔdaa se: «Mamaɣzaɣ se paa malabɩ Yehowa tʋmɩyɛ nɛ kpekpeka ɛzɩma yɔ pɩɩwazɩɣ pʋyʋ, mbʋ pʋyɔɔ yɔ pɩtɩla ɛɛkaɣ ma-ñʋʋ yabʋ.» Ða-taa sakɩyɛ pɩzɩɣ nɛ pɛwɛɛnɩ lɩmaɣza ana ɖɔɖɔ. Pʋyɔɔ lɛ, pɩcɛyaa se ɖɩkpa ɖa-tɩ nɛ ɖɛ-ɛhʋyɛ ɛtaacɛyɩɣ-ɖʋ kadadayaɣ. Ɛbɛ yɔɔ? Mbʋ pʋyɔɔ yɔ, Sataŋ taa kaɣ labʋ leleŋ siŋŋ ye ɖiyebi Yehowa sɛʋ, ŋgʋ ɛlɛ ekpeɣu-ɖʋ ɖa-kɩwɛɛkɩm yɔ.—Kpaɣ-tʋ nɛ ŋmaɣzɩnɩ 2 Kɔrɛntɩ mba 2:5-7, 11.
w02 15/11 20 § 1-2
Ɛzɩma ɖɩpɩzɩɣ ɖɩla nɛ ɖe-wezuu kɩyakɩŋ mʋ ñɩm Yehowa ɛsɩndaa?
Ðe-wezuu caɣʋ kɩyakɩŋ tɩɖɔɔ nɛ ɩɖɛɣ lɛɛ lɛɛ. Keɣa maɖʋ Daviid yɔɔdaɣ ɛzɩma ɛyʋ wezuu caɣʋ wɛ tobi yɔ pɩ-tɔm lɛ, pituyi-i nɛ ɛtɩmɩ se: «Hayɩ Yehowa, sɩnɩ-m nɛ mantɩlɩ mbʋ pɩkaɣ-m tɛmnʋʋ yɔ, sɩnɩ-m nɛ mantɩlɩ man-kɩyakɩŋ ñʋʋ, pɩsa nɛ mantɩlɩ ɛzɩma me-wezuu wɛ tobi yɔ. Toovenim taa lɛ, ŋlaba nɛ man-kɩyakɩŋ wɛɛ ññɩɩ yem; nɛ me-wezuu ɖaɣlɩkɩŋ wɛ ñɛ-ɛsɩndaa ɛzɩ mbʋ pɩtɩlɩɩ pʋyʋ yɔ.» Daviid ñakaɣ pana se ɛtɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛcaɣ wezuu ŋgʋ kɩkɛdɩɣnɩ Ɛsɔ yɔ. Ɛñɩnaɣ se ɛwɩlɩ se Ɛsɔ ɛtaɣ liu lɛ, ɛyɔɔdaa se: «Ñe-ɖeke ñɛkɛnɩ me-lidaʋ.» (Keɣa 39:4, 5, 7) Yehowa welisini-i. Ɛna tʋma wena Daviid laba yɔ nɛ ɛwazɩ-ɩ pɩ-yɔɔ.
Pɩwɛ kɛlɛʋ se pɩɖɔkɩnɩ ɛyʋ evemiye tɩŋa nɛ tʋma ndɩ ndɩ labʋ nɛ eehikiɣ alɩwaatʋ paa ññɩɩ se ɛhɛzɩ. Pɩpɩzɩɣ piyele nɛ ɛyʋ nɩɣzɩɣ mbʋ pʋyɔɔ yɔ ɛwɛnɩ tʋma sakɩyɛ se ɛlakɩ nɛ ɛsɔɔlaa se ɛkpɛlɩkɩ nɛ ɛtɩlɩ wondu sakɩyɛ, ɛlɛ ɛfɛyɩnɩ alɩwaatʋ se ɛla mbʋ. Ɛzɩ Daviid yɔ, ɖɩnɩɣzɩɣ ɛzɩma ɖɩcaɣ wezuu nɛ ɖɔ-tɔm kɛdɩnɩ Yehowa yɔ pɩ-yɔɔ? Toovenim taa lɛ, Yehowa cɔŋnɩ-ɖʋ; nɛ ɛ-ɛsɩyɛ wɛ ɖa-taa paa weyi lɛ ɛ-yɔɔ. Yɔɔb kaakɛ abalʋ weyi eseɣ Ɛsɔ sɔɔndʋ yɔ, nɛ pɩlakɩ pɩnzɩ 3600 mbʋ yɔ eeɖiɣzinaa se Yehowa kaawɛɛ nɛ ɛcɔŋnɩ-ɩ nɛ ɛkalɩɣ nɩŋgbanzɩ nzɩ payɩ ɛkpɛzɩɣ yɔ. Yɔɔb pɔzɩ tɔm tʋnɛ se: «Suwe manpɩzɩɣ nɛ moncosi-i alɩwaatʋ ndʋ ɛpɔzʋʋ-m akɔnta yɔ?» (Yɔɔb 31:4-6, 14) Ye ɖɩsɩɣ fezuu taa tʋma kajalaɣ ɖeɖe, ɖɩñaŋ Yehowa paɣtʋ nɛ ɖɩlakɩnɩ ɖa-alɩwaatʋ tʋmɩyɛ camɩyɛ yɔ, piyeki nɛ ɖe-wezuu kɩyakɩŋ mʋ ñɩm Ɛsɔ ɛsɩndaa. Iyele nɛ ɖɩtazɩ tɔm ndʋ tɩ-taa camɩyɛ nɛ ɖɩna.
Ñɔɔzɩ ña nɛ Yehowa mɩ-taabalɩyɛ
Yɔɔdʋʋnɩ Yehowa ɖoŋ ɖoŋ. Ña-Caa nɩɣ pɩ-taa se ye ñɛ-ɛhʋyɛ ewobi pɩ-yɔɔ nɛ ɖɩkʋʋ ñɔ-tɔm kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ yɔ, pɩpɩzɩɣ piyele nɛ pɩwɛ-ŋ kaɖɛ se ŋtɩmnɩ-ɩ. (Roma 8:26) Paa mbʋ yɔ, ‘wɛɛ adɩma yɔɔ tam.’ Heyi Yehowa se ŋsɔɔlɩ siŋŋ se ŋɖʋ-ɩ nɛ taabalɩyɛ. (Roma 12:12) Andrej yɔɔdaa se: «Mɛ-ɛhʋyɛ kʋwaɣ mɔn-tɔm siŋŋ nɛ fɛyɛ kpaɣaɣ-m. Ɛlɛ, paa ɛzɩmtaa mantɩmɩɣ nɛ pɩtɛ lɛ, ma-laŋɩyɛ hɛɣ. Mehikaɣ laŋhɛzɩyɛ ma-maɣzɩm taa nɛ pɩkɩlɩɣ.» Ye ŋŋsɩŋ se tɔm ndʋ pɩwɛɛ se ŋyɔɔdɩ ña-adɩma taa yɔ, maɣzɩ adɩma wena Wiyaʋ Daviid laba alɩwaatʋ ndʋ ekpiɖi ɛ-kɩwɛɛkɩm yɔɔ yɔ a-yɔɔ. Pama-yɛ Keɣa 51 nɛ 65 taa.
Fezuu taa ñɩm
Wɩlɩ se ŋkɛ ɛyʋ weyi papɩzɩɣ nɛ pataa-ɩ liu yɔ
16 Ye ɖɩñɩnɩɣ se lalaa ɩtaa-ɖʋ liu yɔ, pɩcɛyɩ siŋŋ se ɖɩwɛɛnɩ tɩ ɖɔkʋʋ. Wɛtʋ ndʋ tɩsɩɣnɩ-ɖʋ se ɖɩɖɔkɩ ɖɔ-nɔɔ alɩwaatʋ ndʋ pɩtakɩɣ-ɖʋ se ɖikuli mɛsaɣ tɛɛ tɔm ndʋ peheyi-ɖʋ yɔ tɩ-yɔɔ yɔ. (Kalɩ Aduwa 10:19.) Pɩtɩla ɖiɖiɣzinaa se pɩwɛ-ɖʋ kaɖɛ se ɖɩɖɔkɩ ɖa-tɩ alɩwaatʋ ndʋ ɖɩlakɩnɩ tʋmɩyɛ réseau sociaux waa yɔ. Ye ɖɩtɩkpa ɖa-tɩ yɔ, ɖɩpɩzɩɣ ɖiyele nɛ ɛyaa sakɩyɛ tɩlɩ mɛsaɣ tɛɛ tɔm natʋyʋ, ɛlɛ ɖɩtaaɖʋna. Nɛ ɖɩtɩŋɩɣnɩ électronique wonuu nakʋyʋ yɔɔ nɛ ɖitiyini tɔm natʋyʋ nɛ pɩtɛ lɛ, ɖɩɩtasɩɣ wɛnʋʋ ɖoŋ ɛzɩma ɛyaa lalaa kaɣ-tʋ labɩnʋʋ tʋmɩyɛ nɛ kala sakɩyɛ wena pɩkaɣ kɔnʋʋ yɔ pɩ-yɔɔ. Ye ɛyaa mba pakaɖɩɣnɩ-ɖʋ yɔ, pañakɩ pana se pepeɣzi-ɖʋ nɛ ɖikuli mɛsaɣ tɛɛ tɔm ndʋ tɩpɩzɩɣ nɛ tɩkɔnɩ ɖo-koobiya kaɖɛ yɔ tɩ-yɔɔ yɔ, tɩ ɖɔkʋʋ sɩɣnɩ-ɖʋ ɖɔɖɔ se ɖisu tamɩyɛ. Pɩtɩla ɖɩwɛ ajɛɛ wena a-taa paɖɩɣ ɖɛ-Ɛsɔ sɛtʋ tʋma tɩŋa nʋmɔʋ yaa wena a-taa paɖɩɣ ɖɛ-Ɛsɔ sɛtʋ tʋma naayɛ nʋmɔʋ yɔ nɛ polisinaa kpa-ɖʋ nɛ pɔpɔzʋʋ-ɖʋ tɔm. Wɛtʋ ndʋ nɛ wɛtʋ lɛɛtʋ taa lɛ, ɖɩpɩzɩɣ nɛ ɖɩlabɩnɩ tʋmɩyɛ paɣtʋ kiɖe nɖɩ ɖɩtɔŋ se ‘ɖisuli ɖɔ-nɔɔ’ yɔ. (Keɣa 39:1) Pɩcɛyaa se ɖɩkɛ ɛyaa mba ɛyaa tɩŋa pɩzɩɣ nɛ pataa-wɛ liu yɔ. Paa pɩtɩɩkɛ ɖɔ-hɔʋ taa mba, ɖa-taabalaa, ɖo-koobiya Krɩstʋ ñɩma yaa ɛyʋ lɛlʋ nɔɔyʋ yɔ, pɩwɛɛ se ɖɩñaɣ pana nɛ pataa-ɖʋ liu. Nɛ pʋcɔ nɛ ɖɩkɛ ɛyaa mba papɩzɩɣ nɛ pataa-wɛ liu yɔ lɛ, pɩpɔzʋʋ se ɖɩwɛɛnɩ tɩ ɖɔkʋʋ.
20-26 MAI
ÑƖM MBƲ PƖWƐ ƐSƆTƆM TAA YƆ Keɣsi 40-41
Ɛbɛ yɔɔ pɩwɛɛ se ŋsɩnɩ lalaa?
Mba pɛkɛ kʋjɔŋ laɖaa yɔ, pehikiɣ taa leleŋ
16 Mba pɛkɛ kʋjɔŋ laɖaa toovenim ñɩma yɔ, paaɖaŋɩɣ se pɛhɛyɩ-wɛ nabʋyʋ pɩ-yɔɔ. Tɔm ndʋ tɩ-yɔɔ Yesu ñɩkaɣ niye alɩwaatʋ ndʋ ɛyɔɔdaa se: «Alɩwaatʋ ndʋ ŋlakɩ kazandʋ natʋyʋ yɔ, yaa kʋñɔndɩnaa, kaakalasɩ, taɖɩyɛ tɩnaa, yʋlʋmaa; ɖɩnɛ ɛlɛ ña-taa kaɣ labʋ leleŋ, mbʋ pʋyɔɔ yɔ pɛfɛyɩnɩ nabʋyʋ se paakpaɣ nɛ pɛhɛyɩnɩ-ŋ.» (Luka 14:13, 14) Bibl yɔɔdʋʋ se: «Pakaɣ wazʋʋ kʋjɔʋ tʋ.» Kɩyɔɔdʋʋ ɖɔɖɔ se: «Koboyaɣ tʋ lɛ weyi ɛmaɣzɩɣ ɛjam yɔɔ yɔ.» (Adu. 22:9; Keɣ. 40:1) Toovenim taa lɛ, ɖihikiɣ taa leleŋ siŋŋ alɩwaatʋ ndʋ ɖɩsɩɣnɩ lalaa yɔ.
17 Pɔɔlɩ labɩnʋʋ tʋmɩyɛ tɔm ndʋ Yesu yɔɔdaa se «Taa leleŋ wɛ haʋ taa nɛ pɩkɩlɩ mʋʋ taa» yɔ, pɩtɩkɛ tomnaɣ yɔɔ wondu haʋ tɔm ɖeke ɛyɔɔdaɣ ɛlɛ ɛyɔɔdaɣ ɖɔɖɔ ɛzɩma ɖɩkpazɩ lalaa ɖoŋ, ɖɩsɩnɩ-wɛ, nɛ ɖɩɖʋ nesi mba pɛwɛ kɩcɛyɩm taa yɔ pɩ-tɔm. (Tʋma 20:31-35) Apostoloo Pɔɔlɩ tɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛwɩlɩ-ɖʋ se pɩcɛyaa se ɖɩha ɖa-tɩ, pʋ-tɔbʋʋ se ɖa-alɩwaatʋ, ɖo-ɖoŋ nɛ ɖɔ-sɔɔlɩm.
18 Ñɩnɩyaa ɖɔɖɔ kɔm nɛ peɖiɣzina se haʋ haɣ ɛyaa taa leleŋ. Takayaɣ nakɛyɛ yɔɔdaa se: «Ɛyaa kɛdaa se pehikiɣ taa leleŋ siŋŋ alɩwaatʋ ndʋ palakɩ camɩyɛ lakasɩ ɛyaa lalaa yɔ.» Ñɩnɩyaa yɔɔdaa ɖɔɖɔ se pɩcɛyaa se ɖɩsɩɣnɩ lalaa nɛ pɩsa nɛ ɖe-wezuu caɣʋ wɛɛnɩ kaɖʋwa nɛ tɔbʋʋ nɩʋ mbʋ pʋyɔɔ yɔ mbʋ yekina nɛ ɖɩcɔŋnɩ ɖa-kɩcɛyɩm mbʋ pɩ-tɔm kɩlɩ cɛyʋʋ yɔ pi-ɖeɖe. Pʋyɔɔ ɖoŋ ɖoŋ lɛ, ñɩnɩyaa seɣtiɣ ɛyaa se paha pa-tɩ faaa nɛ pala pa-ajɛɛ taa sɩnʋʋ tʋma nɛ pɩsa nɛ pɛwɛɛnɩ tɔnʋʋ taa alaafɩya nɛ pehiɣ taa leleŋ. Tɔm ndʋ tɩɩɖɩɣzɩɣ mba petisiɣ se Bibl lɩnɩ ɖa-Caa kʋsɔɔlʋ Yehowa cɔlɔ yɔ.—2 Tim. 3:16, 17.
w15 1/12 24 § 7
Yehowa kaɣ-ŋ sɩnʋʋ
7 Ɛlɛ ye ŋhɩnɩ kʋdɔŋ yɔ, Yehowa kaɣ hɛzʋʋ ña-laŋɩyɛ nɛ ɛsɩnɩ-ŋ ɛzɩ ɛɛsɩnʋʋ ɛ-sɛyaa caanaʋ taa yɔ. Wiyaʋ Daviid mawa se: «Koboyaɣ tʋ lɛ weyi ɛmaɣzɩɣ ɛjam yɔɔ yɔ; Yehowa kaɣ-ɩ holuu asɛyʋʋ kɩyakʋ wiye. Yehowa kaɣ ɛ-yɔɔ kandɩyʋʋ nɛ eyele nɛ ɛwɛɛ wezuu.» (Keɣ. 41:1, 2) Toovenim taa lɛ, Daviid tɔm ndʋ, tɩɩwɩlɩɣ se ɛyaa kɩbama mba paawɛ alɩwaatʋ ndʋ tɩ-taa nɛ pamaɣzɩɣ kʋñɔndɩnaa nɛ ajamaa pɔ-yɔɔ yɔ, paakaɣ sɩbʋ wiɖiyi. Ye mbʋ, ɛzɩma tɩyɛ Yehowa sɩɣnɩ ɛyʋ weyi ɛmaɣzɩɣ kʋñɔndʋ nɛ ɛjam pɔ-yɔɔ yɔ? Daviid lɩzɩ pɩ-taa se: «Yehowa kaɣ-ɩ sɩnʋʋ ɛ-kʋdɔŋ ñalʋʋ yɔɔ; ɛ-kʋdɔŋ alɩwaatʋ taa, ŋkaɣ lɛɣzʋʋ ɛ-ñalʋʋ tɩŋa.» (Keɣ. 41:3) Yehowa sɩm kʋñɔmɩŋ weyi ɩ-taa ɖeyi ɖeyi ɛ-sɛyaa wɛɛ yɔ, nɛ ɛɛsɔʋ pɔ-yɔɔ. Ɛpɩzɩɣ nɛ ɛha-wɛ abalɩtʋ nɛ lɔŋsɩnɖɛ. Pɩtasɩ lɛ, ɛzɩma Yehowa labɩ ɛyʋ tomnaɣ yɔ, kapɩzɩɣ nɛ kawaa ka-tɩ yɔɔ.
Maɣzɩnɩ Yehowa pʋtɔdɩyɛ naʋ
17 Pɩtɩkɛ wazasɩ nzɩ pʋtɔdɩyɛ naʋ yeki se ɖihiɣ yɔ, si-ɖeke sɩ-yɔɔ ɖɩnaɣ lalaa pʋtɔdɩyɛ. Lɩmaɣzɩyɛ sɔsɔɖɛ nɖɩ ɖɩ-yɔɔ ɖɩnaɣ lalaa pʋtɔdɩyɛ yɔ lɛ se ɖɩsɔɔlaa se ɖɩnɩɣzɩnɩ pʋtɔdɩyɛ nayʋ nɛ sɔɔlɩm tɛ Ɛsɔ Yehowa nɛ ɖɩɖʋ-ɩ hɩɖɛ. (Adu. 14:31) Ɛha-ɖʋ kɩɖaʋ kɩbaŋʋ. Ye mbʋ ɖɩla mbʋ payɩ ɖɩpɩzɩɣ yɔ nɛ ɖɩmaɣzɩnɩ-ɩ. Ðɩñaɣ pana nɛ ɖɩkɛ pʋtɔdɩyɛ nayaa nɛ ɖiyele nɛ sɔɔlɩm nɛ taabalɩyɛ kɩbanɖɛ wɛɛ ɖa nɛ koobiya nɛ ɛyaa lalaa ɖɛ-hɛkʋ taa.—Gal. 6:10; 1 Yoh. 4:16.
Fezuu taa ñɩm
it-2 1261 § 5
Yehowa
Bibl taa kɛdɛsɩ tɩŋa yɔɔdʋʋ Yehowa kewiyitu kɩkɩlɩtʋ tɔɔʋ tɔm. Nɛ pɩwɩlɩɣ se Yehowa kaɖʋwa kajalaɣ ñɩŋga lɛ se ɛñalɩ ɛ-hɩɖɛ yɔɔ. Pʋ-tɔbʋʋ se ɛñalɩɣ mbʋ payɩ pipisi ɛ-hɩɖɛ yɔ. Ɛlɛ kɔzɩ kɔzɩ lɛ, Ɛsɔ hɩɖɛ yɔɔ ñalʋʋ kaɣ pɔzʋʋ se ɛsɔ tiyiyaa nɛ ɛyaa kpeekpe paɖʋ-ɖɩ hɩɖɛ. Pʋ-tɔbʋʋ lɛ se sɔɔlɩm mbʋ pɛwɛnɩ Yehowa yɔɔ yɔ pɩkaɣ-wɛ seɣtuu nɛ petisi Yehowa Kewiyitu kɩkɩlɩtʋ tɔɔʋ yɔɔ nɛ pañam-tʋ; nɛ pɔsɔɔlɩ se ɖɔɖɔ pɛsɛɛ-ɩ nɛ pala Ɛsɔ sɔɔlɩm nɛ taa leleŋ. Adɩma wena Daviid labɩ Keɣa 40:5-10 taa yɔ añɩkɩɣ niye wɛtʋ ndʋ tɩ-yɔɔ nɛ añɩkɩɣ niye ɖɔɖɔ Yehowa hɩɖɛ yɔɔ ñalʋʋ yɔɔ. (Ebree mba 10:5-10 taa apostoloo Pɔɔlɩ yɔɔdaa se Yesu Krɩstʋ tɔm Keɣa ŋga kɔyɔɔdaɣ.)
27 MAI–2 JUIN
ÑƖM MBƲ PƖWƐ ƐSƆTƆM TAA YƆ KEƔSI 42-44
Yele nɛ Yehowa falɩsɩ-ŋ nɛ pɩwazɩ-ŋ kiya
w06 1/6 9 § 4
Keɣsi takayaɣ naalɛ ñɩŋga taa lɩmaɣza sɔsɔna
Keɣsi 42:4, 5, 11; 43:3-5. Ye wɛtʋ ndʋ tɩ-yɔɔ ɖɩfɛyɩnɩ ɖoŋ nɩɩyɩ yɔ tiyeba nɛ ɖa nɛ koobiya ɖɩɩpɩzɩɣ se ɖɩkpɛndɩ nɛ ɖɩla fezuu taa tʋma ɛlɛ ɖɩtɔzʋʋ taa leleŋ weyi ɖihikaɣ alɩwaatʋ ndʋ ɖa nɛ wɛ ɖɩkpɛndaɣ yɔ ɩ-yɔɔ yɔ, pɩsɩɣnɩ-ɖʋ nɛ ɖɩɖɔkɩ kpam. Alɩwaatʋ ndʋ ɖɩtɔzʋʋ taa leleŋ ɛnɩ ɩ-yɔɔ yɔ, pɩtɩla yɔ kiɖe tɛɛ lɛ piyeki nɛ ɖɩnɩɩ siziŋ nɛ pɩkɩlɩ; ɛlɛ taa leleŋ ɛnɩ ɛpɩzɩɣ nɛ ɛtɔzɩ-ɖʋ se Ɛsɔ kɛnɩ ɖa-ɖɩjɔzɩyɛ nɛ pɩcɛyaa se ɖɩtaa-ɩ liu nɛ eholi-ɖʋ.
w12 15/1 15 § 2
Yele nɛ ñe-Bibl kpɛlɩkʋʋ ha-ŋ taa leleŋ nɛ pɩwazɩ-ŋ nɛ pɩkɩlɩ
1 TƖMƖ: Nɩŋgbaŋaɣ kajalaɣ ñɩŋga ŋga pɩwɛɛ se ŋkpɛzɩ yɔ ŋga lɛ se ŋtɩmɩ. (Keɣ. 42:8) Ɛbɛ yɔɔ? Pɩpɔzʋʋ se ɖɩkpaɣ Ɛsɔtɔm kpɛlɩkʋʋ se pɩkɛ ɖɛ-Ɛsɔ sɛtʋ hɔɔlʋʋ nakʋyʋ. Pʋyɔɔ lɛ, pɩwɛɛ se ɖɩpɔzɩ Yehowa se ɛsɩnɩ-ɖʋ nɛ ɖɩwɛɛnɩ maɣzɩm kɩbam nɛ ɖɩpɔzɩ-ɩ ɖɔɖɔ se ɛha-ɖʋ e-fezuu kiɖeɖeu. (Luka 11:13) Barbara kɛʋ Ɛsɔtɔm tiyiyu yɔ, pɩlakɩ alɩwaatʋ sakɩyɛ yɔ. Ɛyɔɔdaa se: «Mantɩmɩɣ paa ɛzɩmtaa pʋcɔ nɛ mankalɩ Bibl yaa mɛnkpɛlɩkɩ-kʋ. Mantɩmɩɣ nɛ pɩtɛ lɛ, menɖiɣziɣna se Yehowa wɛ mɔn-cɔlɔ nɛ ɛ-taa wɛ leleŋ nɛ mbʋ mɛwɛɛ nɛ malakɩ yɔ.» Ye ɖɩtɩmɩɣ pʋcɔ nɛ ɖɩkpɛlɩkɩɣ yɔ, ɖɩñɔɔzʋʋ ɖa-maɣzɩm nɛ ɖa-laŋɩyɛ se ɖɩtɔɔ fezuu taa tɔɔnaɣ ŋga pasɩ ɖɛ-ɛsɩndaa yɔ camɩyɛ.
«Ñe-nesi itaatii yɔɔɔ»
11 Yehowa tɩŋɩɣnɩ ɖɔɖɔ wɩlɩtʋ ndʋ ɖɩmʋʋ ɖe-kediɣzisi, ɖe-kigbeɣliŋ, nɛ sukulinaa mba ɛgbɛyɛ ɖʋwa yɔ pɔ-yɔɔ nɛ ɛkpazɩɣ-ɖʋ ɖoŋ. Falɩsʋʋ mbʋ, pɩpɩzɩɣ pɩsɩnɩ-ɖʋ nɛ ɖɩwɛɛnɩ lɩmaɣza kɩbana Yehowa sɛtʋ yɔɔ, ɖɩɖʋ ɖa-tɩ fezuu taa kaɖʋsɩ nɛ ɖɩla ɖɔɖɔ ɛgbɛyɛ taa tʋma. (Keɣ. 119:32) Ŋsɔɔlaa se Yehowa ɛtɩŋnɩ falɩsʋʋ mbʋ pɩ-yɔɔ nɛ ɛkpazɩ-ŋ ɖoŋ na?
12 Yehowa sɩnɩ Izrayɛɛlɩ piya nɛ sɩwa Amalɛɛkɩ mba nɛ Etiyoopii mba sɔɔjanaa. Ɛha ɖɔɖɔ Nehemiya nɛ Yuuda mba lalaa ɖoŋ nɛ pama Yeruzalɛm kolonzi. Mbʋ ɖɔɖɔ Ɛsɔ kaɣ-ɖʋ haʋ e-ɖoŋ se pɩsɩnɩ-ɖʋ nɛ ɖɩkaɖɩnɩ nazɩm, ɖɩlʋbɩnɩ nɩɣzɛ nɛ ɖiwolo pɩ-yɔɔ nɛ ɖɩla Kewiyaɣ tɔm susuu tʋmɩyɛ. (1 Pɩy. 5:10) Ðɩɩɖaŋɩɣ se Yehowa ɛla maamaaci lakasɩ nasɩyɩ nɛ ɖa-kʋñɔmɩŋ sɩɩ tɩnaɣ. Ɛlɛ, pɩwɛɛ se ɖɩñaɣ pana nɛ ɖɩla ɖo-ɖoŋ ɖeɖe. Pɩwɛɛ se ɖɩkalɩɣ Bibl paa ɖooye, ɖɩñɔɔzʋʋ kediɣzisi nɛ ɖiwoki sɩ-taa paa kpɩtaʋ ŋgʋ, ɖɩlakɩ tɩ-yɔɔ kpɛlɩkʋʋ nɛ hɔʋ taa Bibl kpɛlɩkʋʋ, nɛ paa ɛzɩmtaa lɛ ɖɩpɔzʋʋ Yehowa adɩma taa se ɛsɩnɩ-ɖʋ. Ðitaayele kpa nɛ ñɩm ñɩnʋʋ yaa tʋma naayɛ labʋ kɛzɩ ɖa-lɩmaɣza nɛ ɖɩɩkaŋ ñʋʋ nɛ nʋmɔŋ weyi ɩ-yɔɔ Yehowa tɩŋɩɣna se ɛkpazɩ-ɖʋ ɖoŋ yɔ. Ye ŋnawa se ŋwɛnɩ ɛjandʋ hɔɔlɩŋ ɛnɩ ɩ-taa nakʋyʋ taa yɔ, pɔzɩ Yehowa se ɛsɩnɩ-ŋ. Peeɖe ŋnaɣ ɛzɩma e-fezuu kiɖeɖeu kpazɩɣ-ŋ ɖoŋ se ‘ŋsɔɔlɩ nɛ ŋla’ mbʋ pɩwɛ ɖeu yɔ. (Filp. 2:13) Ɛlɛ, ɛbɛ ŋpɩzɩɣ ŋla nɛ ŋkpazɩ lalaa nesi ɖoŋ?
Fezuu taa ñɩm
it-1417
Tɛyɛ haɣ
Ðoŋ ɖoŋ lɛ Masɩ yɔɔdʋʋ tɛyɛ haɣ tɔm, nɛ pɩsɩŋnɩ wɛtʋ natʋyʋ. Yɔɔb kɛdaɣ pʋtɔdɩyɛ wɛtʋ ndʋ tɩ-taa ɛɛwɛɛ yɔ tɩ-tɔm lɛ ɛyɔɔdaa se ɛnʋ pɩsɩ «tɛyɛ hasɩ koobu.» (Yɔb 30:29) Alɩwaatʋ natʋyʋ pawabɩ Ɛsɔ samaɣ nɛ keɣa maɖʋ nɔɔyʋ yɔɔdʋʋ pɩ-tɔm lɛ ɛyɔɔdɩ kʋñɔwiye tɔm tʋnɛ: «Ŋtɔyɩtɩ-ɖʋ tɛyɛ hasɩ ɖɩjaɣyɛ taa» (Ke 44:19); nɛ pɩtɩla yɔ ɛkpaɣ wɛtʋ ndʋ tɩ-taa samaɣ ŋga kaawɛɛ yɔ nɛ ɛmaɣzɩɣnɩ you kadaɣ, ɖenɖe tɛyɛ hasɩ kpeɣlaa se sɩtɔɔ mba pakʋwa yɔ. (Kpaɣ-tʋ nɛ ŋmaɣzɩnɩ Ke 68:23.). Babilɔɔnɩ ñɛyɩ Yeruzalɛm tɛtʋ pɩnaɣ 607 P.P.Y; piyeba nɛ ñɔɔsɩ lɩɩ tɛtʋ ndʋ tɩ-taa nɛ ɖoonaa la pa-maɣmaɣ pe-piya kañatʋ. Pʋyɔɔ lɛ, pɩmʋnaa se Yereemii ɛkpaɣ ‘ɛ-samaɣ’ kañatʋ lakasɩ nɛ ɛmaɣzɩnɩ ɛzɩma tɛyɛ hasɩ halɩñɩnzɩ cɔŋnɩ si-piya yɔɔ yɔ.—Kʋñ 4:3, 10.
3-9 JUIN
ÑƖM MBƲ PƖWƐ ƐSƆTƆM TAA YƆ KEƔSI 45-47
Hendu ndʋ tɩyɔɔdʋʋ Wiyaʋ nɔɔyʋ nesi ɖɔkʋʋ tɔm yɔ
w14 1/2 14-15 § 8-9
Ðɩmɛyɩ amɛya Heɣa nesi ɖɔkʋʋ yɔɔ
8 Kalɩ Keɣa 45:13, 14a. Asɛyʋ sandɩ ɛ-tɩ kpem se ɛ nɛ wiyaʋ pɔɖɔkɩ nesi. Natʋ 21:2 taa lɛ, pakpaɣ asɛyʋ ɛnʋ nɛ pamaɣzɩnɩ tɛtʋ natʋyʋ, Yeruzalɛm kɩfalʋʋ, nɛ «pɔñɔɔzɩ-kʋ ɛzɩ pacanʋʋ asɛyʋ se ɛkatɩ ɛ-walʋ yɔ.» Ɛsɔdaa tɛtʋ ndʋ, «tɩwɛnɩ Ɛsɔ samtʋ» nɛ tɩñɩlɩsɩɣ «ɛzɩ ñɩɣlɩm pɩyɛ nɖɩ ɖɩwɛ ñɩm siŋŋ yɔ, ɛzɩ yaasɩpɩ pɩyɛ nɖɩ ɖɩñɩlɩsɩɣ ɛzɩ krisɩtaalɩ pɩyɛ nɖɩ pɩnaɣ ɖɩ-taa kpayɩ kpayɩ yɔ.» (Natʋ 21:10, 11) Pɛkɛdɩ ɛzɩma Yeruzalɛm kɩfalʋʋ ñɩlɩsɩɣ yɔ pɩ-tɔm Natʋ takayaɣ taa. (Natʋ 21:18-21) Pʋyɔɔ keɣa maɖʋ yɔɔdaa se asɛyʋ «ñɩlɩsɩɣ yem»! Pɩtɩŋa mbʋ yɔ pɩwɩlɩɣ se wiyaʋ lakɩnɩ nesi ɖɔkʋʋ ɛsɔdaa.
9 Weyi powoni-i asɛyʋ yɔ, ɛnʋ lɛ Krɩstʋ, Wiyaʋ Mesiya. Krɩstʋ ñɔɔzɩ-ɩ, ‘ɛtɩŋnɩ tɔm yɔɔ nɛ ɛsɔ-ɩ lɩm nɛ ɛwɛɛ cɩɖɩ cɩɖɩ.’ Asɛyʋ ‘wɛ kele kele nɛ ɛfɛyɩnɩ kɩdɛkɛdɩm nabʋyʋ.’ (Efɛz. 5:26, 27) Pɩwɛɛ ɖɔɖɔ se asɛyʋ esuu tokonaa mba pamʋnɩ nesi ɖɔkʋʋ kazandʋ ndʋ yɔ. Nɛ mbʋ ɖɔɖɔ ɛlaba ɖeyi ɖeyi. Toovenim lɛ, «pacanɩ e-tokonaa nɛ sika» nɛ «ɛkaɣ suu tokonaa mba palʋ-wɛ camɩyɛ siŋŋ yɔ nɛ powoni-i wiyaʋ cɔlɔ.» «Paha-ɩ nʋmɔʋ se esuu wondu ndʋ tɩñɩlɩsɩɣ, tɩwɛ cɩɖɩ cɩɖɩ nɛ tɩkɛ kɩbandʋ yɔ; mbʋ pʋyɔɔ yɔ wondu kɩbandʋ sɩŋnɩ ɛyaa kiɖeɖema lakasɩ siɣsiɣ ñɩnzɩ» nɛ ɛ nɛ Heɣa pɔɖɔkɩ nesi.—Natʋ 19:8.
Ɛzɩma Natʋ takayaɣ taa tɔm tukuuni ñɛ-tɛ cee wayɩ yɔ
10 Ajɛɛ tikaɣ ŋga, kakʋyʋʋ Yehowa samaɣ yɔɔ lɛ, ɛzɩma Yehowa kaɣ labʋ? Eheyiɣ-ɖʋ se: «Man-pana sɔsɔna kaɣ mʋʋ miŋ.» (Ezek. 38:18, 21-23) Natʋ ñʋʋ 19 yɔɔdʋʋ mbʋ pɩkaɣ labʋ pʋwayɩ yɔ pɩ-tɔm. Yehowa tiyiɣ ɛ-Pɩyalʋ nɛ ɛlʋ ɛ-samaɣ yɔɔ nɛ ɛwa ko-koyindinaa. «Ɛsɔdaa sɔɔjanaa,» pʋ-tɔbʋʋ se Ɛsɔ tiyiyaa siɣsiɣ tɩnaa nɛ patam numwaa 144000 kaɣ kpɛndʋʋ Yesu yɔɔ nɛ poyooni koyindinaa mba. (Natʋ 17:14; 19:11-15) Ɛbɛ kaɣ lɩʋ you ŋgʋ kɩ-taa? Paɖɩzɩɣ ɛyaa nɛ agbaa wena payɩ akaɖɩɣnɩ Yehowa yɔ caɣ caɣ!—Kalɩ Natʋ 19:19-21.
11 Alɩwaatʋ ndʋ pakaɣ ɖɩzʋʋ Ɛsɔ koyindinaa caɣ caɣ yɔ, maɣzɩ nɛ ŋna ɛzɩma pɩkaɣ labʋ tɛtʋ yɔɔ ɛyaa siɣsiɣ tɩnaa mba pehiɣ ñʋʋ yabʋ yɔ! Pɩkaɣ kɛʋ taa leleŋ alɩwaatʋ kpem! Alɩwaatʋ ndʋ paɖɩzɩɣ Babilɔɔnɩ Sɔsɔʋ yɔ, pakaɣ mabʋ taa leleŋ kubusi sɔsɔsɩ ɛsɔdaa; ɛlɛ nabʋyʋ wɛɛ ɖɔɖɔ nɛ pɩkaɣ kɔnʋʋ taa leleŋ sɔsɔŋ ɛsɔdaa. (Natʋ 19:1-3) Toovenim taa lɛ, pɩkɛ tɔm kɩcɛyɩtʋ ndʋ tɩ-tɔm Natʋ takayaɣ yɔɔdʋʋ yɔ, ndʋ lɛ «Heɣa nesi ɖɔkʋʋ.»—Natʋ 19:6-9.
12 Ɛzɩmtaa pakaɣ labʋ nesi ɖɔkʋʋ mbʋ? Alɩwaatʋ pazɩ pʋcɔ nɛ Armaagedɔɔ you paɣzɩ lɛ, patam numwaa 144000 tɩŋa kaɣ wɛʋ ɛsɔdaa. Ɛlɛ pɩtɩkɛ alɩwaatʋ ndʋ Heɣa ɖɔkʋʋ nesi. (Kalɩ Natʋ 21:1, 2.) Palakɩ Armaagedɔɔ you nɛ paɖɩzɩ Ɛsɔ koyindinaa nɛ pɩtɛ lɛ Heɣa ɖɔkʋʋ nesi.—Keɣ. 45:3, 4, 13-17.
it-2 1041 § 2
You
You ŋgʋ kɩtɛŋ lɛ, ɛyaa mba pɛwɛɣ tɛtʋ yɔɔ yɔ pakaɣ wɛʋ laŋhɛzɩyɛ taa pɩnzɩ 1000. Keɣa maɖʋ yɔɔdaa se: «[Yehowa] sɩnzɩɣ yoŋ tɛtʋ kpeekpe yɔɔ. Ɛpɛlɩɣ tɔʋ nɛ ɛpʋʋtʋʋ kɩgbɛzɛŋ; ɛñaɣzɩɣ you kɛɛkɛɛnaa miŋ»; tɔm ndʋ tɩlabɩ kajalaɣ ɖeɖe alɩwaatʋ ndʋ Yehowa pʋʋtɩ koyindinaa you wondu nɛ eyele nɛ laŋhɛzɩyɛ wɛɛ Izrayɛɛlɩ ɛjaɖɛ taa yɔ. Krɩstʋ wakɩ mba peyeki nɛ yoŋ lakɩ yɔ Armaagedɔɔ you taa nɛ pɩtɛ lɛ, laŋhɛzɩyɛ kaɣ wɛʋ tɛtʋ kpeekpe yɔɔ. (Ke 46:8-10) Ɛyaa mba «pakaɣ kpaɣʋ pa-laɣla nɛ polubini hakiŋ nɛ pakpaɣ pa-kɩgbɛzɛmɩŋ nɛ polubini loozonaa;» nɛ mba paakaɣ tasʋʋ «kpɛlɩkʋʋ you labʋ» yɔ, mba kaɣnɩ hiɣu wezuu maatɛŋ. «Mbʋ pʋyɔɔ yɔ yoyaa tɛ Yehowa nɔɔ yɔɔdɩna.»—Iza 2:4; Mik 4:3, 4.
Fezuu taa ñɩm
Ɛsɔ Kewiyaɣ kɔŋ lɛ, ɛbɛ ɛɛkaɣ tasʋʋ wɛʋ?
9 Ɛbɛ kaɣ lɛɣzʋʋ cɛtɩm agbaa lone taa? Armaagedɔɔ you wayɩ lɛ, ɛzɩ ɛgbɛyɛ naɖɩyɛ ɛɛkaɣ tasʋʋ wɛʋ tɛtʋ yɔɔ? Bibl yɔɔdʋʋ se: «Ðɩɖaŋ ɛsɔdaa kɩfalʋʋ nɛ tɛtʋ kɩfatʋ ɛzɩ ɛlabʋ tamaɣ yɔ, nɛ siɣsiɣ wɛtʋ kaɣ wɛʋ pa-taa.» (2 Pɩy. 3:13) Ɛsɔdaa kɩbɩnʋʋ nɛ tɛtʋ kɩbɩndʋ, pʋ-tɔbʋʋ se mulum kominawaa nɛ ɛyaa mba kominawaa mba peɖiyiɣ yɔ, pa-tɩŋa paatasɩɣ wɛʋ. Ɛbɛ kaɣ lɛɣzʋʋ po-lone taa? Tɔm pee «Ɛsɔdaa kɩfalʋʋ nɛ tɛtʋ kɩfatʋ» wɩlɩɣ se komina kɩfalʋʋ nakʋyʋ kaɣ wɛʋ nɛ kiɖiyi samaɣ kɩfalaɣ nakɛyɛ. Komina ŋgʋ kʋ-ñʋʋdʋ lɛ Yesu nɛ ɛkaɣ wɛnʋʋ Ɛsɔ Yehowa weyi eesidiɣ pɩtɩŋa yem yem yɔ, ɛ-wɛtʋ nɛ eɖiyi ɛyaa camɩyɛ. (1 Kɔr. 14:33) Ye mbʋ, «tɛtʋ kɩfatʋ» ndʋ tɩ-taa lɛ, pɩtɩŋa pɩkaɣ ɖɔm camɩyɛ cɔlɩɩɩ. Ɛsɔ samaɣ kaɣ wɛnʋʋ ɖiyiyaa kɩbama tɛtʋ yɔɔ. (Keɣ. 45:16) Yesu nɛ patam numwaa 144000 pakaɣnɩ wɩlʋʋ ɖiyiyaa kɩbama mba nʋmɔʋ. Maɣzɩ kpem nɛ ŋna! Alɩwaatʋ ndʋ ɛgbɛyɛ nɖɩ nɔɔ kʋyʋmaɣ wɛ ɖɩ-taa yɔ ɖi-ɖeke koŋ ɖɩwɛɣnɩ tɛtʋ yɔɔ nɛ ɖɩlɛɣzɩ agbaa kɩdɛkɛda lone taa yɔ, pɩkaɣ wɛʋ ɖeu siŋŋ!
10-16 JUIN
ÑƖM MBƲ PƖWƐ ƐSƆTƆM TAA YƆ KEƔSI 48-50
Lʋlɩyaa, ɩsɩnɩ mɩ-hɔʋ taa mba nɛ pataa liu Yehowa ɛgbɛyɛ nɛ pɩkɩlɩ
Toovenim Ɛsɔ sɛtʋ kaɣ-ŋ sɩnʋʋ nɛ ŋhiɣ taa leleŋ nɛ pɩkɩlɩ
11 Alɩwaatʋ ndʋ ɖɩkpɛlɩkɩɣ Ɛsɔtɔm nɛ ɖɩwɩlɩɣ ɖe-piya Yehowa tɔm yɔ, pɩkɛ ɖɛ-Ɛsɔ sɛtʋ hɔɔlʋʋ nakʋyʋ. Sabaatɩ haɣaɣ Izrayɛɛlɩ mba waɖɛ se peyele tʋma wena palakaɣ paa ɖooye yɔ a-labʋ nɛ pɛcɛyɩsɩ pa nɛ Yehowa pa-taabalɩyɛ. (Ejl. 31:16, 17) Pa-taa mba paawɛ siɣsiɣ yɔ, pawɩlaɣ pe-piya Yehowa nɛ ɛ-kɩbandʋ pɔ-tɔm. Sɔnɔ ɖɔɖɔ, pɩpɔzʋʋ se ɖa-taa paa anɩ ɛkpakɩɣ alɩwaatʋ nɛ ɛkalɩɣ nɛ ɛkpɛlɩkɩɣ Ɛsɔtɔm. Pɩkɛ ɖɛ-Ɛsɔ sɛtʋ hɔɔlʋʋ nakʋyʋ, nɛ pɩsɩɣnɩ-ɖʋ se ɖɩñɔtɩnɩ Yehowa nɛ pɩkɩlɩ. (Keɣ. 73:28) Nɛ alɩwaatʋ ndʋ ɖɩkpɛndɩɣ nɛ ɖɩkpɛlɩkɩɣ hɔʋ taa yɔ, ɖɩpɩzɩɣ nɛ ɖɩsɩnɩ kpaɖʋʋ kɩfalʋʋ, pʋ-tɔbʋʋ se ɖe-piya, nɛ taabalɩyɛ kɩbanɖɛ wɛɛ sɩ nɛ ɖa-Caa kʋsɔɔlʋ weyi ɛwɛ ɛsɔdaa yɔ pɛ-hɛkʋ taa.—Kalɩ Keɣa 48:13.
w11 15/3 19 § 5-7
Mbʋ piyeki se ɖɩwɛɛ taa leleŋ taa yɔ
«Ɩɖɔ nɛ ɩcɔɔ Siyɔŋ; ɩcɔɔ-kʋ nɛ ɩta; ɩkalɩ ki-tilima. Ɩcɔnɩ ki-kolonzi sɔsɔsɩ camɩyɛ. Iwili ki-tilima ɖoŋ ñɩna camɩyɛ, se pɩsa nɛ ɩkɛdɩ pɩ-tɔm kpaɖɩŋ weyi ɩkɔŋ pʋwayɩ yɔ.» (Keɣ. 48:12, 13) Keɣa maɖʋ kaaseɣti Izrayɛɛlɩ mba se pɔcɔnɩ Yeruzalɛm camɩyɛ. Maɣzɩ nɛ ŋna! Izrayɛɛlɩ mba hɔŋ weyi iwokaɣ tɛtʋ kiɖeɖetu taa pɩnaɣ kazandʋ ndɩ ndɩ taa nɛ ɩnaɣ templo keɖeɣa yɔ, ɩɩwɛnɩ tɔm kɩbandʋ sakɩyɛ se ɩkɛdɩ lalaa. Pɩtʋʋ fɛyɩ se ɩ-taa kaawɛ leleŋ se «ɩkɛdɩ [tɔm ndʋ] kpaɖɩŋ weyi ɩkɔŋ pʋwayɩ yɔ.»
Maɣzɩ Seeba abiɖe yɔɔ nɛ ŋna; kajalaɣ taa lɛ pɩɩwɛ-ɩ kaɖɛ se etisi tɔm ndʋ ɛnɩɣaɣ Salomɔɔ kewiyitu nɛ ɛ-lɔŋsɩnɖɛ sɔsɔɖɛ yɔɔ yɔ tɩ-yɔɔ. Ɛbɛ yeba nɛ ɛ-taa tɛ se tɔm ndʋ ɛnɩɣaɣ yɔ tɩkɛ toovenim? Seeba abiɖe yɔɔdaa se: «Mantitisi tɔm ndʋ tɩ-yɔɔ pɩkɔɔ nɛ pɩsɩɩnɩ alɩwaatʋ ndʋ mɔnkɔm nɛ mananɩ ma-maɣmaɣ mɛ-ɛsa yɔ.» (2 Kro. 9:6) Toovenim taa lɛ mbʋ ɖɩnaɣnɩ ‘ɖa-maɣmaɣ ɖɛ-ɛsa’ yɔ, pɩpɩzɩɣ nɛ pɩwɛnɩ ɖoŋ siŋŋ ɖɔ-yɔɔ.
Ɛzɩma ɩpɩzɩɣ nɛ ɩsɩnɩ mi-piya nɛ sɩnanɩ ‘sɩ-maɣmaɣ sɩ-ɛsa’ tʋma wena Yehowa ɛgbɛyɛ lakɩ yɔ? Ye Yehowa Aseɣɖe Tɩnaa ɛgbɛyɛ piliŋa nakɛyɛ ɛñɔtɩnɩ mɩ-tɛ yɔ, ɩñaɣ pana nɛ iwolo ikilimi ka-taa. Kɩɖaʋ nakʋyʋ yɔ: Ðenɖe Mandy nɛ Bethany pacaɣaa nɛ papaɣlɩ yɔ peeɖe posini Betɛɛlɩ nɛ kilomɛtanaa 1500 mbʋ yɔ. Paa mbʋ yɔ, pɛwɛɛ nɛ papaɣlɩɣ lɛ, pa-lʋlɩyaa labɩ ɖʋtʋ nɛ powokini-wɛ nɛ pekilimiɣ Betɛɛlɩ ŋgʋ kɩ-taa ɖoŋ ɖoŋ. Pɛkɛdaa se: «Pʋcɔ nɛ ɖiwolo nɛ ɖikilimi Betɛɛlɩ taa lɛ, ɖɩmaɣzaɣ se peeɖe paɣtʋ wɛ kaɖɛ siŋŋ nɛ ɛyaa sɔsaa ɖeke wɛnɩ peeɖe. Ɛlɛ ɖɩkatɩ evebiya nɛ pɛlaa paawɛɛ nɛ palakɩ Yehowa tʋma nɛ kpekpeka nɛ ahaɣ-wɛ taa leleŋ! Piyeba nɛ ɖɩnɩɩ pɩ-taa se pɩtɩkɛ ɖe-egeetiye taa ɖeke Yehowa ɛgbɛyɛ wɛɛ; nɛ alɩwaatʋ ndʋ payɩ ɖiwokaɣ Betɛɛlɩ yɔ pɩkpazaɣ-ɖʋ ɖoŋ fezuu taa.» Mandy nɛ Bethany patɩlɩ Yehowa ɛgbɛyɛ camɩyɛ lɛ, piseɣti-wɛ nɛ papaɣzɩ nʋmɔʋ lɩzʋʋ tʋmɩyɛ labʋ, nɛ halɩ paya-wɛ se powolo nɛ pala tʋmɩyɛ alɩwaatʋ pazɩ Betɛɛlɩ.
w12 15/8 12 § 5
Ɩɖɔ ɛzɩ tɛtʋ taa piya nzɩ sɩmʋnɩ Kewiyaɣ yɔ!
5 Ðɩkpɛlɩkɩ Yehowa ɛgbɛyɛ yɔɔ tɔm. Ye nɔɔyʋ ɛsɔɔlaa se ɛkɛ ɛjaɖɛ naɖɩyɛ taa pɩɣa yɔ, pɩwɛɛ se ɛkpɛlɩkɩ nɛ ɛtɩlɩ ɛjaɖɛ nɖɩ ɖɩ-yɔɔ tɔm. Mbʋ ɖɔɖɔ mba payɩ pɔsɔɔlaa se pɛkɛ Ɛsɔ Kewiyaɣ taa piya yɔ pɩwɛɛ pɛkpɛlɩkɩ nɛ patɩlɩ Kewiyaɣ ŋga kɔ-yɔɔ tɔm. Iyele nɛ ɖɩna Kora pɩyalaa mba paalabɩ tʋmɩyɛ caanaʋ taa Izrayɛɛlɩ taa yɔ pa-kɩɖaʋ. Pa-taa kaawɛ leleŋ nɛ Yeruzalɛm nɛ Ɛsɔ sɛtʋ lone nɖɩ ɖɩwɛ peeɖe yɔ nɛ pɛkɛdaɣ tɛtʋ ndʋ tɩ-yɔɔ tɔm. Pɩtɩkɛ ɛzɩma pama Yeruzalɛm tɛtʋ nɛ Ɛsɔ sɛtʋ lone nɖɩ yɔ mbʋ lakaɣni-wɛ piti nɛ pɩkɩlɩ; ɛlɛ mbʋ tɛtʋ ndʋ nɛ lone nɖɩ pɩɩsɩŋnaa yɔ. Yeruzalɛm kɛ Yehowa, «Wiyaʋ Sɔsɔ tɛtʋ,» mbʋ pʋyɔɔ yɔ peeɖe toovenim Ɛsɔ sɛtʋ lone sɔsɔɖɛ kaawɛɛ. Peeɖe pawɩlaɣ Yehowa Paɣtʋ. Yehowa wɩlaɣ ɛ-sɔɔlɩm siɣsiɣ ñɩmbʋ samaɣ ŋga Yeruzalɛm Wiyaʋ tɔkaɣ kewiyitu kɔ-yɔɔ yɔ. (Kalɩ Keɣa 48:1, 2, 9, 12, 13.) Ɛzɩ Kora pɩyalaa yɔ, ŋsɔɔlaa se ŋkpɛlɩkɩ Yehowa ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ kɩ-yɔɔ tɔm nɛ ŋkɛdɩ-tʋ? Ŋkpɛlɩkɩɣ Yehowa ɛgbɛyɛ yɔɔ tɔm nɛ ɛzɩma ɛsɩɣnɩ ɛ-samaɣ yɔ pɩ-yɔɔ tɔm nɛ pɩkɩlɩɣ lɛ, Ɛsɔ Kewiyaɣ kaɣ kɛʋ pʋyʋ keekee ñɛ-ɛsɩndaa nɛ pɩkɩlɩ. Sɔɔlɩm mbʋ ŋwɛna se ŋsusi Kewiyaɣ tɔm kɩbandʋ yɔ pɩkaɣ paɣlʋʋ nɛ pɩkɩlɩ.—Yer. 9:24; Luka 4:43.
Fezuu taa ñɩm
it-2799 § 7
Ñɩm
Ñɩm kaawɛ Izrayɛɛlɩ ɛjaɖɛ taa, pʋyɔɔ lɛ Izrayɛɛlɩ mba pɩzaɣ se pɔtɔɔ nɛ pɔñɔɔ (1Aw 4:20; Ekl 5:18, 19), nɛ pa-ñɩm kandɩyaɣ pɔ-yɔɔ se kala wena kʋñɔndʋtʋ kɔŋna yɔ ataatalɩ-wɛ. (Adu 10:15; Ekl 7:12) Ɛlɛ, paa pɩɩlabɩ nɔɔ kʋɖʋmaɣ nɛ Yehowa tamaɣ se Izrayɛɛlɩ mba ihiɣ ñɩm pa-tʋma ɖoŋ ñɩna labʋ taa yɔ (kpaɣ-tʋ nɛ ŋmaɣzɩnɩ Adu 6:6-11; 20:13; 24:33, 34), Yehowa kaanawa ɖɔɖɔ se pɩcɛyaa se ɛpaɣ-wɛ nɛ pataapaɣzɩ taʋ liu pa-ñɩm nɛ pɔsɔɔ se ɛ-cɔlɔ pɩlɩnaa. (Wp 8:7-17; Ke 49:6-9; Adu 11:4; 18:10, 11; Yer 9:23, 24) Ɛɛtɔzɩ-wɛ se ñɩm wɛɣ alɩwaatʋ pazɩ na (Adu 23:4, 5), nɛ paapɩzɩɣ nɛ pakpaɣ-pʋ nɛ paha Ɛsɔ se paya nɔɔyʋ ñʋʋ sɩm nesi tɛɛ (Ke 49:6, 7), nɛ ñɩm ɛɛwazɩɣ sɩɖaa ɖɔɖɔ (Ke 49:16, 17; Ekl 5:15). Eyeba nɛ peɖiɣzina ɖɔɖɔ se ye pakɩlɩɣ ñɔnʋʋ ñɩm yɔ, piyeki nɛ palakɩ mulum lakasɩ nɛ pɔ-tɔm ɛɛkɛdɩɣnɩ Yehowa. (Adu 28:20; kpaɣ-tʋ nɛ ŋmaɣzɩnɩ Yer 5:26-28; 17:9-11.) Peseɣti-wɛ ɖɔɖɔ se pakpaɣ ‘po-wondu ndʋ tɩmʋ ñɩm nɛ pɩkɩlɩ yɔ nɛ paɖʋnɩ Yehowa hɩɖɛ.’—Adu 3:9.
17-23 JUIN
ÑƖM MBƲ PƖWƐ ƐSƆTƆM TAA YƆ KEƔSI 51-53
Kpɛzɩ nɩŋgbanzɩ nzɩ siyeki nɛ ŋtaala kɩdɛkɛdɩm yɔ
Ɛzɩma ŋpɩzɩɣ nɛ ŋkandɩyɩ ña-laŋɩyɛ yɔɔ camɩyɛ?
4 Aduwa 4:23 taa tɔm piye «laŋɩyɛ» sɩŋnɩ mbʋ ɖɩkɛnɩ ɖooo ɖa-taa nɛ ɛyaa lalaa ɩɩpɩzɩɣ nɛ pana yɔ. (Kalɩ Keɣa 51:6.) Pʋ-tɔbʋʋ se «laŋɩyɛ» sɩŋnɩ ɖa-maɣzɩm yaa mbʋ ɖɩsɔɔlaa nɛ lalaa ɩɩnaɣ-pʋ yɔ. Pɩtɩkɛ ɛzɩma ɛyaa naɣ-ɖʋ ɛsa yɔɔ yem yɔ pi-ɖeke ɛlɛ pɩkɛ ɖɔɖɔ ɛyʋ weyi ɖɩkɛnɩ ɖooo ɖa-taa kiŋ yɔ.
5 Iyele nɛ ɖɩna ɛzɩma ɖo-tomnaɣ taa alaafɩya wɛʋ wɩlɩɣ se pɩcɛyaa se ɖɩcɔŋnɩ mbʋ ɖɩkɛnɩ ɖa-taa kiŋ yɔ pɩ-yɔɔ camɩyɛ yɔ. Kajalaɣ lɛ, pɩsa nɛ ɖo-tomnaɣ hɔɔlɩŋ weyi ɩwɛnɩ ɖa-taa kiŋ yɔ ɩwɛɛ alaafɩya camɩyɛ lɛ, pɩcɛyaa se ɖɩtɔkɩ tɔɔnaɣ kɩbaŋa, nɛ ɖɩlakɩ ɖɔɖɔ hola aleɣya naayɛ ɖoŋ ɖoŋ. Mbʋ ɖɔɖɔ, pɩsa nɛ ɖɩwɛɛ alaafɩya fezuu taa lɛ, pɩcɛyaa se ɖɩtɔkɩ fezuu taa tɔɔnaɣ ŋga kɛwɛ ɖeu camɩyɛ yɔ ɖoŋ ɖoŋ nɛ ɖɩcɛyɩsɩ ɖɔɖɔ tisuu mbʋ ɖɩwɛnɩ Yehowa yɔɔ yɔ. Pɩsa nɛ ɖɩcɛyɩsɩ tisuu mbʋ lɛ, pɩwɛɛ se ɖɩlakɩnɩ tʋmɩyɛ tɔm ndʋ ɖɩwɛɛ nɛ ɖɩkpɛlɩkɩɣ yɔ, nɛ ɖiheyiɣ ɖɔɖɔ lalaa ɖe-tisuu tɔm. (Roma 10:8-10; Yak. 2:26) Nabʋlɛ lɛ, ɖɩpɩzɩɣ nɛ ɖɩcɔnɩ ɖa-tɩ nɛ ɖɩmaɣzɩ se ɖɩwɛ alaafɩya, ɛlɛ toovenim taa lɛ kʋdɔŋ nakʋyʋ wɛɛ nɛ kɩcɛyɩɣ-ɖʋ. Mbʋ ɖɔɖɔ ɖɩpɩzɩɣ nɛ ɖɩcɔnɩ fezuu taa tʋma wena ɖɩlakɩ yɔ nɛ ɖɩmaɣzɩ se ɖe-tisuu cɛyɩsɩ camɩyɛ, ɛlɛ toovenim taa lɛ pɩtɩla yɔ lɩmaɣza kɩdɛkɛda naayɛ wɛɛ nɛ añɔʋ ɖa-laŋɩyɛ taa. (1 Kɔr. 10:12; Yak. 1:14, 15) Pɩwɛɛ se ɖɩtɔzɩ se Sataŋ sɔɔlaa se ɛ-maɣzɩm ɛcamɩ-ɖʋ. Nʋmɔŋ weyi ɩ-yɔɔ ɖeyi ɖeyi ɛtɩŋɩɣna nɛ ɛlakɩ mbʋ? Nɛ ɛzɩma ɖɩpɩzɩɣ nɛ ɖɩkandɩyɩ ɖa-tɩ yɔɔ?
w15 6/1 19 § 5-6
Ðɩpɩzɩɣ nɛ ɖɩwɛɛ kele kele kʋzʋʋ nʋmɔʋ taa
5 Ye ɖɩtɩmɩɣnɩ Yehowa paa ɛzɩmtaa kɔyɔ, ɛkaɣ-ɖʋ sɩnʋʋ nɛ ɖɩlʋbɩnɩ kʋzʋʋ kɩdɛkɛdʋʋ lɩmaɣza. Ɛhaɣ-ɖʋ e-fezuu kiɖeɖeu se kɩsɩnɩ-ɖʋ nɛ ɖɩwɛɛ kele kele. Ðɩɩtɩmɩɣ lɛ, ɖɩpɩzɩɣ nɛ ɖiheyi Yehowa se ɖɩsɔɔlaa se ɖa-maɣzɩm ɛkɛdɩnɩ-ɩ. (Keɣ. 19:14) Ðɩpɔzɩ-ɩ nɛ tɩ luzuu se ewili ɖa-laŋɩyɛ taa nɛ ye ɛna lɩmaɣza kɩdɛkɛda naayɛ se apɩzɩɣ nɛ atuyi-ɖʋ nɛ ɖɩla kɩwɛɛkɩm yɔ, ɛsɩnɩ-ɖʋ. (Keɣ. 139:23, 24) Ðɩpɔzɩ Yehowa tam se ɛsɩnɩ-ɖʋ nɛ ɖise kʋzʋʋ kɩdɛkɛdʋʋ nɛ ɖɩla mbʋ pɩwɛ ɖeu yɔ, paa pɩwɛ kaɖɛ yɔ.—Mat. 6:13.
6 Pʋcɔ nɛ ɖɩtɩlɩɣ Yehowa lɛ, pɩtɩtɩlɩ ɖɩɩsɔɔlɩ labʋ lakasɩ nzɩ sɩtɩkɛdɩnɩ-ɩ yɔ. Nɛ pʋtɔma yɔ, halɩ nɛ sɔnɔ ɖiɖiɣni lʋbɩnʋʋ lakasɩ kɩdɛkɛdɩsɩ nzɩ. Ɛlɛ Yehowa pɩzɩɣ ɛsɩnɩ-ɖʋ nɛ ɖɩlɛɣzɩ nɛ ɖɩla mbʋ pɩkɛdɩnɩ-ɩ yɔ. Wiyaʋ Daviid labɩ acɛyɛ nɛ Bat-Seeba nɛ pɩtɛ lɛ, ekpiɖi mbʋ ɛlaba yɔ pɩ-yɔɔ nɛ etendi Yehowa se ɛha-ɩ «laŋɩyɛ kele kele ñɩnɖɛ» nɛ ɛsɩnɩ-ɩ nɛ ɛñamɩ-ɩ. (Keɣ. 51:10, 12) Ye mbʋ, ye ɖɩɩwɛnɩ kʋzʋʋ kɩdɛkɛdʋʋ lɩmaɣza kpem nɛ ɖɩwɛɛ ɖɩlʋkɩnɩ-yɛ halɩ nɛ sɔnɔ yɔ, Yehowa pɩzɩɣ nɛ ɛsɩnɩ-ɖʋ nɛ ɖɩñamɩ-ɩ nɛ ɖɩla mbʋ pɩwɛ ɖeu yɔ. Ɛpɩzɩɣ ɛsɩnɩ-ɖʋ nɛ ɖɩlʋbɩnɩ lɩmaɣza kɩdɛkɛda.—Keɣ. 119:133.
Fezuu taa ñɩm
it-1 663
Dowɛɛgɩ
Dowɛɛgɩ kaakɛ Edom tʋ; ɛɛkɛ Wiyaʋ Sɔɔlɩ ninɖiɣyaa taa sɔsɔ nɛ pɩɩkɛ waɖɛ sɔsɔɖɛ kpem. (1Sa 21:7; 22:9) Pɩtʋʋ fɛyɩ se ɛpɩsɩ Yuuda tʋ nɛ ɛlakɩ Yuuda mba sɔnzɩ. «Paakpa-ɩ nɛ pasɩɩ Yehowa ɛsɩndaa» Noob, mbʋ pʋyɔɔ yɔ, pɩtala yɔ eeɖuu ɖuutu natʋyʋ, yaa ɛtaawɛɛ kele kele, yaa pamaɣzaɣ se ɛɛwɛnɩ canatʋ kʋdɔŋ. Ɛɛna cɔjɔ kɩlɩm Ahimelɛɛkɩ cɛlɩ Daviid kpɔnɔnaa mba pasɩɣ Ɛsɔ ɛsɩndaa yɔ nɛ Gooliyaatɩ sɩɣa. Pʋwayɩ Sɔɔlɩ yɔɔdaɣnɩ ɛ-lɩmɖʋyaa nɛ eheyiɣ-wɛ se pɛwɛɛ nɛ pɛkpɛyɩɣ ɛ-tɔm lɛ, Dowɛɛgɩ yɔɔdɩ mbʋ ɛɛna Noob yɔ pɩ-tɔm. Sɔɔlɩ ya cɔjɔ kɩlɩm Ahimelɛɛkɩ nɛ cɔjɔnaa lalaa nɛ ɛpɔzɩ tɔm Ahimelɛɛkɩ nɛ pɩtɛ lɛ, ɛɖʋ paɣtʋ seyaa se pakʋ cɔjɔnaa. Pekizaa lɛ, Sɔɔlɩ heyi Dowɛɛgɩ se ɛkʋ-wɛ nɛ ɛlɛ caŋ nɛ ɛkʋ cɔjɔnaa 85. Dowɛɛgɩ labɩ kañatʋ lakasɩ nzɩ nɛ pɩtɛ lɛ, ɛɖɩzɩ Noob tɛtʋ, ɛkʋ kɩ-taa mba tɩŋa, piya nɛ sɔsaa nɛ kpɩna.—1Sa 22:6-20.
Ɛzɩ pɔyɔɔdʋʋ Keɣa 52 kajalaɣ tɔm taa yɔ, Daviid ma tɔm tʋnɛ Dowɛɛgɩ yɔɔ: «Ña-nzʋlʋmɩyɛ wɛ lɔŋ ɛzɩ hʋnʋʋ yɔ, ɖɩtaŋ tamasɩ kɩdɛkɛdɩsɩ nɛ ɖɩcɛtɩɣ. Ŋsɔɔlɩ kɩdɛkɛdɩm nɛ pɩkɩlɩ mbʋ pɩwɛ ɖeu yɔ, ŋsɔɔlɩ cɛtɩm nɛ pɩkɩlɩ toovenim tɔm yɔɔdʋʋ. Ña, nzʋlʋmɩyɛ nɖɩ ɖipeɣziɣ yɔ, ŋsɔɔlɩ tɔm ndʋ payɩ tɩkɔŋnɩ ɛyʋ kaɖɛ yɔ!»—Ke 52:2-4.
24-30 JUIN
ÑƖM MBƲ PƖWƐ ƐSƆTƆM TAA YƆ KEƔSI 54-56
Ɛsɔ wɛ ñɔ-hɔɔlʋʋ yɔɔ
w06 1/8 22 § 10-11
Wɛɛ lɔŋ—Se Ɛsɔ sɔɔndʋ
10 Alɩwaatʋ natʋyʋ taa Daviid ñɩnɩ ɖɩmɛlɩyɛ Filistii wiyaʋ Akis cɔlɔ Gaatɩ tɛtʋ taa; Gooliyaatɩ tɛ peeɖe. (1 Samɩyɛɛlɩ 21:10-15) Wiyaʋ lɩmɖʋyaa kʋyɩ Daviid yɔɔ se ɛkɛ pɛ-ɛjaɖɛ koyindu. Ɛzɩma Daviid labɩ kaɖɛ wɛtʋ ndʋ tɩ-taa? Ɛtɩmnɩ Yehowa nɛ eheyi-i ɛ-laŋɩyɛ taa tɔm. (Keɣa 56:1-4, 11-13) Paa Daviid kalaba ɛzɩ ɛpɩsɩ kpaanzɩyʋ nɛ ɛpɩzɩ nɛ ese yɔ, ɛɛnawa se toovenim taa lɛ Yehowa wazɩnɩ ɛ-pana ñaɣʋ yɔɔ nɛ eholi-i kaɖɛ nɖɩ ɖɩ-taa. Ɛzɩma Daviid kaata Yehowa liu nɛ ɛ-laŋɩyɛ pilim yɔ, pɩwɩlɩɣ se ɛɛkɛ ɛyʋ weyi eseɣ Yehowa sɔɔndʋ toovenim taa yɔ. (Keɣa 34:4-6, 9-11)
11 Ɛzɩ Daviid yɔ, ɖɩpɩzɩɣ nɛ ɖɩwɩlɩ se ɖiseɣ Ɛsɔ sɔɔndʋ ye ɖɩtaɣ liu tamaɣ ŋga ɛlaba se ɛsɩɣnɩ-ɖʋ nɛ ɖɩlʋbɩnɩ kala wena ɖɩkatɩɣ yɔ. Daviid mawa se: «Ðʋzɩ ña-nʋmɔʋ Yehowa nesi tɛɛ; taa-ɩ liu, nɛ ɛkaɣ labʋ mbʋ pɩwazɩɣ-ŋ yɔ.» (Keɣa 37:5) Pɩtɩwɩlɩ se ɖɩɖʋzɩ ɖa-kɩcɛyɩm Yehowa nesi tɛɛ nɛ ɖɩcaɣ yem ɖɩɩlakɩ mbʋ ɖɩpɩzɩɣ yɔ se ɖɩcɔnɩ pi-ɖeɖe nɛ ɖɩɖaŋ se Yehowa ɛcɔnɩnɩ pi-ɖeɖe. Daviid tɩmnɩ Ɛsɔ se ɛsɩnɩ-ɩ nɛ pɩtɛ lɛ, ɛtɩcaɣ yem se Ɛsɔ ɛla mbʋ pɩkazaa yɔ. Ɛlabɩnɩ tʋmɩyɛ ɖoŋ nɛ lɛɣtʋ ndʋ Yehowa ha-ɩ yɔ nɛ ɛcɔnɩ kala ana a-ɖeɖe. Ɛlɛ Daviid kaanɩ pɩ-taa se ɛyʋ pana ñaɣʋ ɖeke eeyeki nɛ ɛwa kala wena ɛkatɩɣ yɔ. Lɩmaɣza ana ɖɔɖɔ pɩpɔzʋʋ se ɖɩwɛɛna. Ðɩlakɩ ɖo-ɖoŋ ɖeɖe nɛ pɩtɛ lɛ, pɩwɛɛ se ɖiyele mbʋ pɩkazaa yɔ Yehowa nesi tɛɛ. Pɩkɛ toovenim se nabʋyʋ taa ɖɩkatɩɣ kala naayɛ nɛ ɖɩɩpɩzɩɣ nɛ ɖɩla nabʋyʋ nɛ ɖɩcɔnɩ a-ɖeɖe, ɛlɛ mbʋ ɖɩpɩzɩɣ ɖɩla yɔ lɛ se ɖɩtaa Yehowa liu. Wɛtʋ ndʋ tɩ-taa ɖa-taa paa weyi wɩlɩɣ se ɛwɛnɩ Ɛsɔ sɔɔndʋ seu. Tɔm ndʋ Daviid yɔɔdɩnɩ ɛ-laŋɩyɛ pilim yɔ tɩpɩzɩɣ nɛ tɩhɛzɩ ɖa-laŋɩyɛ. Ɛyɔɔdaa se: «Mba peseɣ Yehowa sɔɔndʋ yɔ, taabalɩyɛ kɩbanɖɛ wɛɣ ɛ nɛ wɛ pɛ-hɛkʋ taa, nɛ eyeki nɛ patɩlɩɣ ɛ-ɛgbɛyɛ.»—Keɣa 25:14.
cl 243 § 9
Nabʋyʋ ‘ɛɛkaɣ pɩzʋʋ nɛ pɩyasɩ-ɖʋ nɛ Ɛsɔ sɔɔlɩm’
9 Pɩtasɩ lɛ, ɖa-laŋɩyɛ ɖɔkʋʋ mʋ ñɩm Yehowa ɛsɩndaa. (Maatiyee 24:13) Tɔzɩ se Sataŋ sɔɔlaa se ɖɩha siɣye Yehowa. Paa evemiye nɖɩ, alɩwaatʋ ndʋ ŋɖɔkʋʋ ñe-siɣsiɣ wɛtʋ Yehowa ɛsɩndaa yɔ, ŋsɩɣna Yehowa se ecosi tɔm kɩdɛkɛdɩtʋ ndʋ Sataŋ yɔɔdʋʋ ɛ-yɔɔ yɔ tɩ-yɔɔ. (Aduwa 27:11) Nabʋyʋ taa lɛ, pɩfɛyɩ kɛlɛʋ se ɛyʋ ɛɖɔkɩ ɛ-laŋɩyɛ. Tɔnʋʋ taa alaafɩya, liidiye kʋñɔŋ, laŋwɛɛkɩyɛ, nɛ kala lɛɛna pɩzɩɣ pɩtakɩ ɖe-siɣsiɣ wɛtʋ paa evemiye nɖɩ. Ye ɖɩɖaŋ nabʋyʋ nɛ pɩɩkɔŋ lɔŋ yɔ, pɩpɩzɩɣ piyele nɛ pitibi-ɖʋ yɔɔɔ. (Aduwa 13:12) Alɩwaatʋ ndʋ payɩ ɖɩɖɔkʋʋ ɖa-laŋɩyɛ kala ana a-taa yɔ, pɩkɛ mbʋ pɩmʋ ñɩm kpem Yehowa ɛsɩndaa yɔ. Pʋyɔɔ Wiyaʋ Daviid pɔzɩ Yehowa se eteɣzi ɛ-ɛsɩtɛɣlɩm ‘ɛ-tɔnɛ kokoɖe taa;’ nɛ ɛtasɩ yɔɔdʋʋ lidaʋ tɔm tʋnɛ: «Patɩma pɩ-tɔm ña-takayaɣ taa yaa we?» (Keɣa 56:8) Toovenim taa lɛ, ɛsɩtɛɣlɩm mbʋ payɩ ɖitisiɣ nɛ siziŋ weyi payɩ ɖɩnɩɣ ɛlɛ ɖiwoki pɩ-yɔɔ nɛ ɖɩɖɔkʋʋ ɖe-siɣsiɣ wɛtʋ Yehowa ɛsɩndaa taa yɔ, pɩmʋ ñɩm ɛ-ɛsɩndaa nɛ ɛtɔzʋʋ pɩ-yɔɔ.
Ɛzɩma sɔɔlɩm sɩɣnɩ-ɖʋ se ɖɩwa sɔɔndʋ?
16 Sataŋ nawa se ɖe-wezuu mʋ ñɩm ɖɛ-ɛsɩndaa nɛ ɛyɔɔdʋʋ se halɩ ɖɩkaɣ kizuu ɖa nɛ Yehowa ɖa-taabalɩyɛ se pɩsa nɛ ɖɩwɛɛ wezuu. (Yɔɔb 2:4, 5) Sataŋ fɛyɩnɩ toovenim! Ɛlɛ Sataŋ ʻwɛnɩ ɖoŋ se ɛkɔnɩ sɩm;ʼ pʋyɔɔ lɛ, ɛtɩŋɩɣnɩ ɛzɩma ɖiseɣ sɩm sɔɔndʋ yɔ pɩ-yɔɔ se ɛla nɛ ɖikizi Yehowa. (Ebr. 2:14, 15) Nabʋyʋ taa, ɛyaa mba Sataŋ ɖiyiɣ yɔ paɖʋʋ-ɖʋ sɔɔndʋ se pakʋʋ-ɖʋ ye ɖititisi nɛ ɖɩlɔ ɖe-tisuu yɔ. Yaa nabʋyʋ taa, Sataŋ pɩzɩɣ nɛ ɛna se ɖɩhɩnɩ kʋdɔŋ siŋŋ nɛ ɛpɩzɩɣ nɛ ɛñaɣ pana se ɛtɩŋnɩ pɩ-yɔɔ nɛ etuyi-ɖʋ nɛ ɖɩla mbʋ pɩtɩmʋna yɔ. Ðɔkɔtɔnaa yaa ɖɔ-hɔʋ taa ñɩma mba patɩkɛ Yehowa sɛyaa yɔ, papɩzɩɣ nɛ pañɩɣ ɖɔ-yɔɔ se ɖitisi nɛ paɖʋ-ɖʋ calɩm; ɛlɛ ye ɖɩlabɩ mbʋ yɔ, ɖɩmaɣnɩ Ɛsɔ paɣtʋ yɔɔ. Yaa nɔɔyʋ pɩzɩɣ nɛ ɛñaɣ pana se eyele nɛ ɖitisi nɛ patɩŋnɩ kʋdɔmɩŋ waʋ nʋmʋʋ ŋgʋ kɩɩlakɩ nɔɔ kʋɖʋmaɣ nɛ Bibl paɣtʋ kila yɔ kɩ-yɔɔ nɛ pawaa-ɖʋ.
17 Paa ɖɩtɩsɔɔlɩ se ɖɩsɩ yɔ, ɖɩnawa Yehowa kaɣ wobu pɩ-yɔɔ nɛ ɛsɔɔlʋʋ-ɖʋ paa pɩtalɩ-ɖʋ mbʋ yɔ. (Kalɩ Roma mba 8:37-39.) Alɩwaatʋ ndʋ Yehowa taabalaa sɩkɩ yɔ, ewoki pɩ-yɔɔ nɛ ɛtɔzʋʋ pɔ-yɔɔ, nɛ pɩwɛ ɛzɩ pɛwɛ wezuu yɔ. (Luka 20:37, 38) E-liu wɛɛ se efezi-wɛ nɛ paɖaɣnɩ caɣʋ wezuu. (Yɔɔb 14:15) Yehowa hɛyɩ mbʋ pɩmʋ ñɩm siŋŋ yɔ se pɩsa nɛ ‘ɖihiɣ wezuu maatɛŋ.’ (Yohanɛɛsɩ 3:16) Ðɩnawa se Yehowa sɔɔlɩ-ɖʋ siŋŋ nɛ ɛcɔŋnɩ ɖɔ-yɔɔ. Pʋyɔɔ lɛ, alɩwaatʋ ndʋ ɖɩhɩnɩɣ kʋdɔŋ yaa alɩwaatʋ ndʋ paɖʋʋ-ɖʋ sɔɔndʋ se pakʋʋ-ɖʋ yɔ, ɖɩɩhaɣ Yehowa siɣye; ɛlɛ ɖɩtaɣ-ɩ liu se ɛkaɣ hɛzʋʋ ɖa-laŋɩyɛ nɛ ɛha-ɖʋ lɔŋsɩnɖɛ nɛ ɖoŋ. Mbʋ ɖeyi ɖeyi Valérie nɛ ɛ-walʋ palaba.—Keɣ. 41:3.
Fezuu taa ñɩm
it-1646 § 2
Tɔm ndʋ paasɩm ɖooo lɔŋ yɔ; mbʋ paaɖʋ ɖooo lɔŋ yɔ
Alɩwaatʋ ndʋ Yudaasɩ Isɩkarɩyɔɔtɩ lɩ Yesu wayɩ yɔ piyeba nɛ natʋ tɔm ndʋ Ɛsɔ kaayɔɔdaa yɔ tɩla nɛ pɩwɩlɩ se Yehowa nɛ ɛ-Pɩyalʋ Yesu papɩzɩɣ nɛ patɩlɩ mbʋ pɩkaɣ labʋ yɔ ɖooo lɔŋ. (Ke 41:9; 55:12, 13; 109:8; Tʋm 1:16-20) Paa mbʋ yɔ, ɖɩɩpɩzɩɣ nɛ ɖɩyɔɔdɩ se Ɛsɔ kaaɖʋ ɖooo lɔŋ yaa kaasɩm ɖooo lɔŋ se Yudaasɩ Isɩkarɩyɔɔtɩ kaɣnɩ lɩʋ Yesu wayɩ. Natʋ tɔm ndɩ ndɩ kaayɔɔdaa se Yesu taabalaa taa nɔɔyʋ kaɣnɩ lɩʋ ɛ-wayɩ, ɛlɛ tɩtɩyɔɔdɩ ɛ-taabalaa taa weyi ɖeyi ɖeyi ɛkaɣaɣ labʋ mbʋ yɔ. Pɩwɩlɩɣ se Bibl paɣtʋ kila wɩlɩɣ kpayɩ se Ɛsɔ taaɖʋ ɖooo lɔŋ se Yudaasɩ kaɣ labʋ lakasɩ nzɩ. Apostoloo Pɔɔlɩ yɔɔdɩ paɣtʋ kiɖe nɖɩ Ɛsɔ ɖʋwa se palabɩnɩ tʋmɩyɛ yɔ ɖɩ-tɔm ɛzʋnɔ: «Taakpedesi nɛ ŋtɩnɩ ñe-nesi nɔɔyʋ yɔɔ kpa; taasɩnɩ ɖɔɖɔ lalaa nɛ pala kɩwɛɛkɩm; wɛɛ kele kele.» (1Ti 5:22; kpaɣ-tʋ nɛ ŋmaɣzɩnɩ 3:6.) Yesu kaakpaɣ ɖoo pilim nɛ ɛtɩmnɩ ɛ-Caa pʋcɔ nɛ ɛlɩzɩ ɛ-apostoloowaa 12 nɛ pɩwɩlɩɣ se ɛɛsɔɔlaa se ɛkpaɣ lɩmaɣzɩyɛ nɖɩ nɛ lɔŋsɩnɖɛ. (Luk 6:12-16) Ye Yehowa kaatɛm ɖʋʋ se Yudaasɩ kaɣ kɛʋ ɛyaa wayɩ lɩyʋ yɔ, ɛ-wɩlɩtʋ nɛ ɛ-lɔŋ tasʋʋ kaakaɖɩnɩ ɖama; nɛ ye pɩɩkɛ mbʋ yɔ pɩwɩlɩɣ se Ɛsɔ ɖʋ nesi kɩdɛkɛdɩm mbʋ Yudaasɩ laba yɔ pɩ-taa.
Ye mbʋ, ɖɩpɩzɩɣ nɛ ɖɩmaɣzɩ se alɩwaatʋ ndʋ palɩzaɣ Yudaasɩ se ɛkɛ apostoloo yɔ nabʋyʋ taawɛɛ ɛ-laŋɩyɛ taa nɛ pɩwɩlɩɣ se ɛkaɣ kɛʋ ɛyaa wayɩ lɩyʋ. Ɛha nʋmɔʋ nɛ ‘sɔtʋ liɖe naɖɩyɛ ñɔ’ ɛ-taa nɛ ɖipisi-i; piyeba nɛ ɛkɛɛ nʋmɔʋ nɛ ekizi Ɛsɔ paɣtʋ nɛ ewelisini Sataŋ. Piyeba Sataŋ tuyi-i nɛ ɛpɩsɩ mɩlʋ nɛ ɛyaa wayɩ lɩyʋ. (Ebr 12:14, 15; Yoh 13:2; Tʋm 1:24, 25; Yak 1:14, 15; kalɩ JUDAS No. 4.) Yudaasɩ paɣzɩ wɛnʋʋ lɩmaɣza kɩdɛkɛda nɛ pɩkɔɔ pɩtalɩ alɩwaatʋ natʋyʋ lɛ, Yesu pɩzaɣ se ɛna ɛ-laŋɩyɛ taa nɛ ɛyɔɔdɩ se ɛnʋ kaɣnɩ ɛ-wayɩ lɩʋ.—Yoh 13:10, 11.